អង្គុត្តរ និកាយ ៣។១២២

១២។ អាបាយិកវគ្គ

មោនេយ្យសុត្ត

“តីណិមានិ, ភិក្ខវេ, មោនេយ្យានិ។ កតមានិ តីណិ? កាយមោនេយ្យំ, វចីមោនេយ្យំ, មនោមោនេយ្យំ។

កតមញ្ច, ភិក្ខវេ, កាយមោនេយ្យំ? ឥធ, ភិក្ខវេ, ភិក្ខុ បាណាតិបាតា បដិវិរតោ ហោតិ, អទិន្នាទានា បដិវិរតោ ហោតិ, អព្រហ្មចរិយា បដិវិរតោ ហោតិ។ ឥទំ វុច្ចតិ, ភិក្ខវេ, កាយមោនេយ្យំ។

កតមញ្ច, ភិក្ខវេ, វចីមោនេយ្យំ? ឥធ, ភិក្ខវេ, ភិក្ខុ មុសាវាទា បដិវិរតោ ហោតិ, បិសុណាយ វាចាយ បដិវិរតោ ហោតិ, ផរុសាយ វាចាយ បដិវិរតោ ហោតិ, សម្ផប្បលាបា បដិវិរតោ ហោតិ។ ឥទំ វុច្ចតិ, ភិក្ខវេ, វចីមោនេយ្យំ។

កតមញ្ច, ភិក្ខវេ, មនោមោនេយ្យំ? ឥធ, ភិក្ខវេ, ភិក្ខុ អាសវានំ ខយា អនាសវំ ចេតោវិមុត្តិំ បញ្ញាវិមុត្តិំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ។ ឥទំ វុច្ចតិ, ភិក្ខវេ, មនោមោនេយ្យំ។ ឥមានិ ខោ, ភិក្ខវេ, តីណិ មោនេយ្យានីតិ។

កាយមុនិំ វចីមុនិំ, ចេតោមុនិំ អនាសវំ; មុនិំ មោនេយ្យសម្បន្នំ, អាហុ សព្ពប្បហាយិនន៑”តិ។

ទសមំ។

អាបាយិកវគ្គោ ទុតិយោ។

តស្សុទ្ទានំ

អាបាយិកោ ទុល្លភោ អប្បមេយ្យំ, អានេញ្ជវិបត្តិសម្បទា; អបណ្ណកោ ច កម្មន្តោ, ទ្វេ សោចេយ្យានិ មោនេយ្យន្តិ។