| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១០. មោនេយ្យសុត្តំ
10. Moneyyasuttaṃ
១២៣. ‘‘តីណិមានិ, ភិក្ខវេ, មោនេយ្យានិ។ កតមានិ តីណិ? កាយមោនេយ្យំ, វចីមោនេយ្យំ, មនោមោនេយ្យំ។ កតមញ្ច, ភិក្ខវេ, កាយមោនេយ្យំ ? ឥធ, ភិក្ខវេ, ភិក្ខុ បាណាតិបាតា បដិវិរតោ ហោតិ, អទិន្នាទានា បដិវិរតោ ហោតិ, អព្រហ្មចរិយា បដិវិរតោ ហោតិ។ ឥទំ វុច្ចតិ, ភិក្ខវេ, កាយមោនេយ្យំ។
123. ‘‘Tīṇimāni, bhikkhave, moneyyāni. Katamāni tīṇi? Kāyamoneyyaṃ, vacīmoneyyaṃ, manomoneyyaṃ. Katamañca, bhikkhave, kāyamoneyyaṃ ? Idha, bhikkhave, bhikkhu pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti. Idaṃ vuccati, bhikkhave, kāyamoneyyaṃ.
‘‘កតមញ្ច, ភិក្ខវេ, វចីមោនេយ្យំ? ឥធ, ភិក្ខវេ, ភិក្ខុ មុសាវាទា បដិវិរតោ ហោតិ, បិសុណាយ វាចាយ បដិវិរតោ ហោតិ, ផរុសាយ វាចាយ បដិវិរតោ ហោតិ, សម្ផប្បលាបា បដិវិរតោ ហោតិ។ ឥទំ វុច្ចតិ, ភិក្ខវេ, វចីមោនេយ្យំ។
‘‘Katamañca, bhikkhave, vacīmoneyyaṃ? Idha, bhikkhave, bhikkhu musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Idaṃ vuccati, bhikkhave, vacīmoneyyaṃ.
‘‘កតមញ្ច, ភិក្ខវេ, មនោមោនេយ្យំ? ឥធ, ភិក្ខវេ, ភិក្ខុ អាសវានំ ខយា អនាសវំ ចេតោវិមុត្តិំ បញ្ញាវិមុត្តិំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ។ ឥទំ វុច្ចតិ, ភិក្ខវេ, មនោមោនេយ្យំ។ ឥមានិ ខោ, ភិក្ខវេ, តីណិ មោនេយ្យានី’’តិ។
‘‘Katamañca, bhikkhave, manomoneyyaṃ? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ vuccati, bhikkhave, manomoneyyaṃ. Imāni kho, bhikkhave, tīṇi moneyyānī’’ti.
‘‘កាយមុនិំ វចីមុនិំ, ចេតោមុនិំ អនាសវំ;
‘‘Kāyamuniṃ vacīmuniṃ, cetomuniṃ anāsavaṃ;
មុនិំ មោនេយ្យសម្បន្នំ, អាហុ សព្ពប្បហាយិន’’ន្តិ។ ទសមំ;
Muniṃ moneyyasampannaṃ, āhu sabbappahāyina’’nti. dasamaṃ;
អាបាយិកវគ្គោ ទ្វាទសមោ។
Āpāyikavaggo dvādasamo.
តស្សុទ្ទានំ –
Tassuddānaṃ –
អាបាយិកោ ទុល្លភោ អប្បមេយ្យំ, អានេញ្ជវិបត្តិសម្បទា;
Āpāyiko dullabho appameyyaṃ, āneñjavipattisampadā;
អបណ្ណកោ ច កម្មន្តោ, ទ្វេ សោចេយ្យានិ មោនេយ្យន្តិ។
Apaṇṇako ca kammanto, dve soceyyāni moneyyanti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. មោនេយ្យសុត្តវណ្ណនា • 10. Moneyyasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. មោនេយ្យសុត្តវណ្ណនា • 10. Moneyyasuttavaṇṇanā
