| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. මොනෙය්‍යසුත්‌තං
10. Moneyyasuttaṃ
123. ‘‘තීණිමානි, භික්‌ඛවෙ, මොනෙය්‍යානි. කතමානි තීණි? කායමොනෙය්‍යං, වචීමොනෙය්‍යං, මනොමොනෙය්‍යං. කතමඤ්‌ච, භික්‌ඛවෙ, කායමොනෙය්‍යං ? ඉධ, භික්‌ඛවෙ, භික්‌ඛු පාණාතිපාතා පටිවිරතො හොති, අදින්‌නාදානා පටිවිරතො හොති, අබ්‍රහ්‌මචරියා පටිවිරතො හොති. ඉදං වුච්‌චති, භික්‌ඛවෙ, කායමොනෙය්‍යං.
123. ‘‘Tīṇimāni, bhikkhave, moneyyāni. Katamāni tīṇi? Kāyamoneyyaṃ, vacīmoneyyaṃ, manomoneyyaṃ. Katamañca, bhikkhave, kāyamoneyyaṃ ? Idha, bhikkhave, bhikkhu pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti. Idaṃ vuccati, bhikkhave, kāyamoneyyaṃ.
‘‘කතමඤ්‌ච, භික්‌ඛවෙ, වචීමොනෙය්‍යං? ඉධ, භික්‌ඛවෙ, භික්‌ඛු මුසාවාදා පටිවිරතො හොති, පිසුණාය වාචාය පටිවිරතො හොති, ඵරුසාය වාචාය පටිවිරතො හොති, සම්‌ඵප්‌පලාපා පටිවිරතො හොති. ඉදං වුච්‌චති, භික්‌ඛවෙ, වචීමොනෙය්‍යං.
‘‘Katamañca, bhikkhave, vacīmoneyyaṃ? Idha, bhikkhave, bhikkhu musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Idaṃ vuccati, bhikkhave, vacīmoneyyaṃ.
‘‘කතමඤ්‌ච, භික්‌ඛවෙ, මනොමොනෙය්‍යං? ඉධ, භික්‌ඛවෙ, භික්‌ඛු ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. ඉදං වුච්‌චති, භික්‌ඛවෙ, මනොමොනෙය්‍යං. ඉමානි ඛො, භික්‌ඛවෙ, තීණි මොනෙය්‍යානී’’ති.
‘‘Katamañca, bhikkhave, manomoneyyaṃ? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ vuccati, bhikkhave, manomoneyyaṃ. Imāni kho, bhikkhave, tīṇi moneyyānī’’ti.
‘‘කායමුනිං වචීමුනිං, චෙතොමුනිං අනාසවං;
‘‘Kāyamuniṃ vacīmuniṃ, cetomuniṃ anāsavaṃ;
මුනිං මොනෙය්‍යසම්‌පන්‌නං, ආහු සබ්‌බප්‌පහායින’’න්‌ති. දසමං;
Muniṃ moneyyasampannaṃ, āhu sabbappahāyina’’nti. dasamaṃ;
ආපායිකවග්‌ගො ද්‌වාදසමො.
Āpāyikavaggo dvādasamo.
තස්‌සුද්‌දානං –
Tassuddānaṃ –
ආපායිකො දුල්‌ලභො අප්‌පමෙය්‍යං, ආනෙඤ්‌ජවිපත්‌තිසම්‌පදා;
Āpāyiko dullabho appameyyaṃ, āneñjavipattisampadā;
අපණ්‌ණකො ච කම්‌මන්‌තො, ද්‌වෙ සොචෙය්‍යානි මොනෙය්‍යන්‌ති.
Apaṇṇako ca kammanto, dve soceyyāni moneyyanti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. මොනෙය්‍යසුත්‌තවණ්‌ණනා • 10. Moneyyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. මොනෙය්‍යසුත්‌තවණ්‌ණනා • 10. Moneyyasuttavaṇṇanā
