| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. মোনেয্যসুত্তৰণ্ণনা
10. Moneyyasuttavaṇṇanā
১২৩. দসমে মোনেয্যানীতি মুনিভাৰা। কাযমোনেয্যন্তি কাযদ্ৰারে মুনিভাৰো সাধুভাৰো পণ্ডিতভাৰো। সেসদ্ৰযেপি এসেৰ নযো। ইদং ৰুচ্চতি, ভিক্খৰে, কাযমোনেয্যন্তি ইদং তিৰিধকাযদুচ্চরিতপ্পহানং কাযমোনেয্যং নাম। অপিচ তিৰিধং কাযসুচরিতম্পি কাযমোনেয্যং, তথা কাযারম্মণং ঞাণং কাযমোনেয্যং, কাযপরিঞ্ঞা কাযমোনেয্যং, পরিঞ্ঞাসহগতো মগ্গো কাযমোনেয্যং, কাযে ছন্দরাগস্স পহানং কাযমোনেয্যং, কাযসঙ্খারনিরোধো চতুত্থজ্ঝানসমাপত্তি কাযমোনেয্যং। ৰচীমোনেয্যেপি এসেৰ নযো।
123. Dasame moneyyānīti munibhāvā. Kāyamoneyyanti kāyadvāre munibhāvo sādhubhāvo paṇḍitabhāvo. Sesadvayepi eseva nayo. Idaṃ vuccati, bhikkhave, kāyamoneyyanti idaṃ tividhakāyaduccaritappahānaṃ kāyamoneyyaṃ nāma. Apica tividhaṃ kāyasucaritampi kāyamoneyyaṃ, tathā kāyārammaṇaṃ ñāṇaṃ kāyamoneyyaṃ, kāyapariññā kāyamoneyyaṃ, pariññāsahagato maggo kāyamoneyyaṃ, kāye chandarāgassa pahānaṃ kāyamoneyyaṃ, kāyasaṅkhāranirodho catutthajjhānasamāpatti kāyamoneyyaṃ. Vacīmoneyyepi eseva nayo.
অযং পনেত্থ ৰিসেসো – যথা ইধ চতুত্থজ্ঝানসমাপত্তি, এৰং তত্থ ৰচীসঙ্খারনিরোধো দুতিযজ্ঝানসমাপত্তি ৰচীমোনেয্যন্তি ৰেদিতব্বা। মনোমোনেয্যম্পি ইমিনাৰ নযেন অত্থং ঞত্ৰা চিত্তসঙ্খারনিরোধো সঞ্ঞাৰেদযিতনিরোধসমাপত্তি মনোমোনেয্যন্তি ৰেদিতব্বা। কাযমুনিন্তি কাযদ্ৰারে মুনিং উত্তমং পরিসুদ্ধং, কাযেন ৰা মুনিং। সেসদ্ৰযেপি এসেৰ নযো। সব্বপ্পহাযিনন্তি খীণাসৰং। খীণাসৰো হি সব্বপ্পহাযী নামাতি।
Ayaṃ panettha viseso – yathā idha catutthajjhānasamāpatti, evaṃ tattha vacīsaṅkhāranirodho dutiyajjhānasamāpatti vacīmoneyyanti veditabbā. Manomoneyyampi imināva nayena atthaṃ ñatvā cittasaṅkhāranirodho saññāvedayitanirodhasamāpatti manomoneyyanti veditabbā. Kāyamuninti kāyadvāre muniṃ uttamaṃ parisuddhaṃ, kāyena vā muniṃ. Sesadvayepi eseva nayo. Sabbappahāyinanti khīṇāsavaṃ. Khīṇāsavo hi sabbappahāyī nāmāti.
আপাযিকৰগ্গো দুতিযো।
Āpāyikavaggo dutiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. মোনেয্যসুত্তং • 10. Moneyyasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. মোনেয্যসুত্তৰণ্ণনা • 10. Moneyyasuttavaṇṇanā
