| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១០. មោនេយ្យសុត្តវណ្ណនា
10. Moneyyasuttavaṇṇanā
១២៣. ទសមេ មោនេយ្យានីតិ មុនិភាវា។ កាយមោនេយ្យន្តិ កាយទ្វារេ មុនិភាវោ សាធុភាវោ បណ្ឌិតភាវោ។ សេសទ្វយេបិ ឯសេវ នយោ។ ឥទំ វុច្ចតិ, ភិក្ខវេ, កាយមោនេយ្យន្តិ ឥទំ តិវិធកាយទុច្ចរិតប្បហានំ កាយមោនេយ្យំ នាម។ អបិច តិវិធំ កាយសុចរិតម្បិ កាយមោនេយ្យំ, តថា កាយារម្មណំ ញាណំ កាយមោនេយ្យំ, កាយបរិញ្ញា កាយមោនេយ្យំ, បរិញ្ញាសហគតោ មគ្គោ កាយមោនេយ្យំ, កាយេ ឆន្ទរាគស្ស បហានំ កាយមោនេយ្យំ, កាយសង្ខារនិរោធោ ចតុត្ថជ្ឈានសមាបត្តិ កាយមោនេយ្យំ។ វចីមោនេយ្យេបិ ឯសេវ នយោ។
123. Dasame moneyyānīti munibhāvā. Kāyamoneyyanti kāyadvāre munibhāvo sādhubhāvo paṇḍitabhāvo. Sesadvayepi eseva nayo. Idaṃ vuccati, bhikkhave, kāyamoneyyanti idaṃ tividhakāyaduccaritappahānaṃ kāyamoneyyaṃ nāma. Apica tividhaṃ kāyasucaritampi kāyamoneyyaṃ, tathā kāyārammaṇaṃ ñāṇaṃ kāyamoneyyaṃ, kāyapariññā kāyamoneyyaṃ, pariññāsahagato maggo kāyamoneyyaṃ, kāye chandarāgassa pahānaṃ kāyamoneyyaṃ, kāyasaṅkhāranirodho catutthajjhānasamāpatti kāyamoneyyaṃ. Vacīmoneyyepi eseva nayo.
អយំ បនេត្ថ វិសេសោ – យថា ឥធ ចតុត្ថជ្ឈានសមាបត្តិ, ឯវំ តត្ថ វចីសង្ខារនិរោធោ ទុតិយជ្ឈានសមាបត្តិ វចីមោនេយ្យន្តិ វេទិតព្ពា។ មនោមោនេយ្យម្បិ ឥមិនាវ នយេន អត្ថំ ញត្វា ចិត្តសង្ខារនិរោធោ សញ្ញាវេទយិតនិរោធសមាបត្តិ មនោមោនេយ្យន្តិ វេទិតព្ពា។ កាយមុនិន្តិ កាយទ្វារេ មុនិំ ឧត្តមំ បរិសុទ្ធំ, កាយេន វា មុនិំ។ សេសទ្វយេបិ ឯសេវ នយោ។ សព្ពប្បហាយិនន្តិ ខីណាសវំ។ ខីណាសវោ ហិ សព្ពប្បហាយី នាមាតិ។
Ayaṃ panettha viseso – yathā idha catutthajjhānasamāpatti, evaṃ tattha vacīsaṅkhāranirodho dutiyajjhānasamāpatti vacīmoneyyanti veditabbā. Manomoneyyampi imināva nayena atthaṃ ñatvā cittasaṅkhāranirodho saññāvedayitanirodhasamāpatti manomoneyyanti veditabbā. Kāyamuninti kāyadvāre muniṃ uttamaṃ parisuddhaṃ, kāyena vā muniṃ. Sesadvayepi eseva nayo. Sabbappahāyinanti khīṇāsavaṃ. Khīṇāsavo hi sabbappahāyī nāmāti.
អាបាយិកវគ្គោ ទុតិយោ។
Āpāyikavaggo dutiyo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. មោនេយ្យសុត្តំ • 10. Moneyyasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. មោនេយ្យសុត្តវណ្ណនា • 10. Moneyyasuttavaṇṇanā
