| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. မောနေယ္ယသုတ္တဝဏ္ဏနာ
10. Moneyyasuttavaṇṇanā
၁၂၃. ဒသမေ မောနေယ္ယာနီတိ မုနိဘာဝာ။ ကာယမောနေယ္ယန္တိ ကာယဒ္ဝာရေ မုနိဘာဝော သာဓုဘာဝော ပဏ္ဍိတဘာဝော။ သေသဒ္ဝယေပိ ဧသေဝ နယော။ ဣဒံ ဝုစ္စတိ, ဘိက္ခဝေ, ကာယမောနေယ္ယန္တိ ဣဒံ တိဝိဓကာယဒုစ္စရိတပ္ပဟာနံ ကာယမောနေယ္ယံ နာမ။ အပိစ တိဝိဓံ ကာယသုစရိတမ္ပိ ကာယမောနေယ္ယံ, တထာ ကာယာရမ္မဏံ ဉာဏံ ကာယမောနေယ္ယံ, ကာယပရိညာ ကာယမောနေယ္ယံ, ပရိညာသဟဂတော မဂ္ဂော ကာယမောနေယ္ယံ, ကာယေ ဆန္ဒရာဂသ္သ ပဟာနံ ကာယမောနေယ္ယံ, ကာယသင္ခာရနိရောဓော စတုတ္ထဇ္ဈာနသမာပတ္တိ ကာယမောနေယ္ယံ။ ဝစီမောနေယ္ယေပိ ဧသေဝ နယော။
123. Dasame moneyyānīti munibhāvā. Kāyamoneyyanti kāyadvāre munibhāvo sādhubhāvo paṇḍitabhāvo. Sesadvayepi eseva nayo. Idaṃ vuccati, bhikkhave, kāyamoneyyanti idaṃ tividhakāyaduccaritappahānaṃ kāyamoneyyaṃ nāma. Apica tividhaṃ kāyasucaritampi kāyamoneyyaṃ, tathā kāyārammaṇaṃ ñāṇaṃ kāyamoneyyaṃ, kāyapariññā kāyamoneyyaṃ, pariññāsahagato maggo kāyamoneyyaṃ, kāye chandarāgassa pahānaṃ kāyamoneyyaṃ, kāyasaṅkhāranirodho catutthajjhānasamāpatti kāyamoneyyaṃ. Vacīmoneyyepi eseva nayo.
အယံ ပနေတ္ထ ဝိသေသော – ယထာ ဣဓ စတုတ္ထဇ္ဈာနသမာပတ္တိ, ဧဝံ တတ္ထ ဝစီသင္ခာရနိရောဓော ဒုတိယဇ္ဈာနသမာပတ္တိ ဝစီမောနေယ္ယန္တိ ဝေဒိတဗ္ဗာ။ မနောမောနေယ္ယမ္ပိ ဣမိနာဝ နယေန အတ္ထံ ဉတ္ဝာ စိတ္တသင္ခာရနိရောဓော သညာဝေဒယိတနိရောဓသမာပတ္တိ မနောမောနေယ္ယန္တိ ဝေဒိတဗ္ဗာ။ ကာယမုနိန္တိ ကာယဒ္ဝာရေ မုနိံ ဥတ္တမံ ပရိသုဒ္ဓံ, ကာယေန ဝာ မုနိံ။ သေသဒ္ဝယေပိ ဧသေဝ နယော။ သဗ္ဗပ္ပဟာယိနန္တိ ခီဏာသဝံ။ ခီဏာသဝော ဟိ သဗ္ဗပ္ပဟာယီ နာမာတိ။
Ayaṃ panettha viseso – yathā idha catutthajjhānasamāpatti, evaṃ tattha vacīsaṅkhāranirodho dutiyajjhānasamāpatti vacīmoneyyanti veditabbā. Manomoneyyampi imināva nayena atthaṃ ñatvā cittasaṅkhāranirodho saññāvedayitanirodhasamāpatti manomoneyyanti veditabbā. Kāyamuninti kāyadvāre muniṃ uttamaṃ parisuddhaṃ, kāyena vā muniṃ. Sesadvayepi eseva nayo. Sabbappahāyinanti khīṇāsavaṃ. Khīṇāsavo hi sabbappahāyī nāmāti.
အာပာယိကဝဂ္ဂော ဒုတိယော။
Āpāyikavaggo dutiyo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. မောနေယ္ယသုတ္တံ • 10. Moneyyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. မောနေယ္ယသုတ္တဝဏ္ဏနာ • 10. Moneyyasuttavaṇṇanā
