| Library / Tipiṭaka / තිපිටක • Tipiṭaka / අපදානපාළි • Apadānapāḷi |
2. මොරහත්‌ථියත්‌ථෙරඅපදානං
2. Morahatthiyattheraapadānaṃ
9.
9.
‘‘මොරහත්‌ථං ගහෙත්‌වාන, උපෙසිං ලොකනායකං;
‘‘Morahatthaṃ gahetvāna, upesiṃ lokanāyakaṃ;
පසන්‌නචිත්‌තො සුමනො, මොරහත්‌ථමදාසහං.
Pasannacitto sumano, morahatthamadāsahaṃ.
10.
10.
‘‘ඉමිනා මොරහත්‌ථෙන, චෙතනාපණිධීහි ච;
‘‘Iminā morahatthena, cetanāpaṇidhīhi ca;
නිබ්‌බායිංසු තයො අග්‌ගී, ලභාමි විපුලං සුඛං.
Nibbāyiṃsu tayo aggī, labhāmi vipulaṃ sukhaṃ.
11.
11.
‘‘අහො බුද්‌ධො අහො ධම්‌මො, අහො නො සත්‌ථුසම්‌පදා;
‘‘Aho buddho aho dhammo, aho no satthusampadā;
දත්‌වානහං මොරහත්‌ථං, ලභාමි විපුලං සුඛං.
Datvānahaṃ morahatthaṃ, labhāmi vipulaṃ sukhaṃ.
12.
12.
සබ්‌බාසවා පරික්‌ඛීණා, නත්‌ථි දානි පුනබ්‌භවො.
Sabbāsavā parikkhīṇā, natthi dāni punabbhavo.
13.
13.
‘‘එකතිංසෙ ඉතො කප්‌පෙ, යං දානමදදිං තදා;
‘‘Ekatiṃse ito kappe, yaṃ dānamadadiṃ tadā;
දුග්‌ගතිං නාභිජානාමි, මොරහත්‌ථස්‌සිදං ඵලං.
Duggatiṃ nābhijānāmi, morahatthassidaṃ phalaṃ.
14.
14.
‘‘කිලෙසා ඣාපිතා මය්‌හං…පෙ.… විහරාමි අනාසවො.
‘‘Kilesā jhāpitā mayhaṃ…pe… viharāmi anāsavo.
15.
15.
‘‘ස්‌වාගතං වත මෙ ආසි…පෙ.… කතං බුද්‌ධස්‌ස සාසනං.
‘‘Svāgataṃ vata me āsi…pe… kataṃ buddhassa sāsanaṃ.
16.
16.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා මොරහත්‌ථියො ථෙරො ඉමා ගාථායො
Itthaṃ sudaṃ āyasmā morahatthiyo thero imā gāthāyo
අභාසිත්‌ථාති.
Abhāsitthāti.
මොරහත්‌ථියත්‌ථෙරස්‌සාපදානං දුතියං.
Morahatthiyattherassāpadānaṃ dutiyaṃ.
Footnotes:
