| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
முசலிந்த³கதா²
Mucalindakathā
5. அகாலமேகோ⁴தி அஸம்பத்தே வஸ்ஸகாலே உப்பன்னமேகோ⁴. அயங் பன கி³ம்ஹானங் பச்சி²மே மாஸே உத³பாதி³. ஸத்தாஹவத்³த³லிகாதி தஸ்மிங் உப்பன்னே ஸத்தாஹங் அவிச்சி²ன்னவுட்டி²கா அஹோஸி. ஸீதவாதது³த்³தி³னீதி ஸா ச பன ஸத்தாஹவத்³த³லிகா உத³கபு²ஸிதஸம்மிஸ்ஸேன ஸீதவாதேன ஸமந்தா பரிப்³ப⁴மந்தேன தூ³ஸிததி³வஸத்தா ஸீதவாதது³த்³தி³னீ நாம அஹோஸி. அத² கோ² முசலிந்தோ³ நாக³ராஜாதி தஸ்ஸேவ முசலிந்த³ருக்க²ஸ்ஸ ஸமீபே பொக்க²ரணியா நிப்³ப³த்தோ மஹானுபா⁴வோ நாக³ராஜா. ஸத்தக்க²த்துங் போ⁴கே³ஹி பரிக்கி²பித்வாதி ஏவங் போ⁴கே³ஹி பரிக்கி²பித்வா உபரிமுத்³த⁴னி மஹந்தங் ப²ணங் கரித்வாவ டி²தே; தஸ்மிங் தஸ்ஸ பரிக்கே²பப்³ப⁴ந்தரங் லோஹபாஸாதே³ ப⁴ண்டா³கா³ரக³ப்³ப⁴ப்பமாணங் அஹோஸி, தஸ்மா ப⁴க³வா நிவாதே பிஹிதத்³வாரவாதபானே கூடாகா³ரே நிஸின்னோ விய ஜாதோ. மா ப⁴க³வந்தங் ஸீதந்திஆதி³ தஸ்ஸ ததா² கரித்வா டா²னகாரணபரிதீ³பனங். ஸோ ஹி ‘‘மா ப⁴க³வந்தங் ஸீதங் பா³த⁴யித்த², மா உண்ஹங், மா ட³ங்ஸாதி³ஸம்ப²ஸ்ஸோ பா³த⁴யித்தா²’’தி ததா² கரித்வா அட்டா²ஸி. தத்த² கிஞ்சாபி ஸத்தாஹவத்³த³லிகாய உண்ஹமேவ நத்தி², ஸசே பன அந்தரந்தரா மேகோ⁴ விக³ச்செ²ய்ய உண்ஹங் ப⁴வெய்ய , தம்பி நங் மா பா³த⁴யித்தா²தி ஏவங் தஸ்ஸ சிந்தேதுங் யுத்தங். வித்³த⁴ந்தி உப்³பி³த்³த⁴ங்; மேக⁴விக³மேன தூ³ரீபூ⁴தந்தி அத்தோ². விக³தவலாஹகந்தி அபக³தமேக⁴ங். தே³வந்தி ஆகாஸங். ஸகவண்ணந்தி அத்தனோ ரூபங்.
5.Akālameghoti asampatte vassakāle uppannamegho. Ayaṃ pana gimhānaṃ pacchime māse udapādi. Sattāhavaddalikāti tasmiṃ uppanne sattāhaṃ avicchinnavuṭṭhikā ahosi. Sītavātaduddinīti sā ca pana sattāhavaddalikā udakaphusitasammissena sītavātena samantā paribbhamantena dūsitadivasattā sītavātaduddinī nāma ahosi. Atha kho mucalindo nāgarājāti tasseva mucalindarukkhassa samīpe pokkharaṇiyā nibbatto mahānubhāvo nāgarājā. Sattakkhattuṃ bhogehi parikkhipitvāti evaṃ bhogehi parikkhipitvā uparimuddhani mahantaṃ phaṇaṃ karitvāva ṭhite; tasmiṃ tassa parikkhepabbhantaraṃ lohapāsāde bhaṇḍāgāragabbhappamāṇaṃ ahosi, tasmā bhagavā nivāte pihitadvāravātapāne kūṭāgāre nisinno viya jāto. Mā bhagavantaṃ sītantiādi tassa tathā karitvā ṭhānakāraṇaparidīpanaṃ. So hi ‘‘mā bhagavantaṃ sītaṃ bādhayittha, mā uṇhaṃ, mā ḍaṃsādisamphasso bādhayitthā’’ti tathā karitvā aṭṭhāsi. Tattha kiñcāpi sattāhavaddalikāya uṇhameva natthi, sace pana antarantarā megho vigaccheyya uṇhaṃ bhaveyya , tampi naṃ mā bādhayitthāti evaṃ tassa cintetuṃ yuttaṃ. Viddhanti ubbiddhaṃ; meghavigamena dūrībhūtanti attho. Vigatavalāhakanti apagatameghaṃ. Devanti ākāsaṃ. Sakavaṇṇanti attano rūpaṃ.
ஸுகோ² விவேகோதி நிப்³பா³னஸங்கா²தோ உபதி⁴விவேகோ ஸுகோ². துட்ட²ஸ்ஸாதி சதுமக்³க³ஞாணஸந்தோஸேன ஸந்துட்ட²ஸ்ஸ. ஸுதத⁴ம்மஸ்ஸாதி பகாஸிதத⁴ம்மஸ்ஸ. பஸ்ஸதோதி தங் விவேகங் யங் வா கிஞ்சி பஸ்ஸிதப்³ப³ங் நாம, தங் ஸப்³ப³ங் அத்தனோ வீரியப³லாதி⁴க³தேன ஞாணசக்கு²னா பஸ்ஸந்தஸ்ஸ. அப்³யாபஜ்ஜந்தி அகுப்பனபா⁴வோ; ஏதேன மெத்தாபுப்³ப³பா⁴கோ³ த³ஸ்ஸிதோ. பாணபூ⁴தேஸு ஸங்யமோதி ஸத்தேஸு ச ஸங்யமோ; அவிஹிங்ஸனபா⁴வோ ஸுகோ²தி அத்தோ². ஏதேன கருணாபுப்³ப³பா⁴கோ³ த³ஸ்ஸிதோ. ஸுகா² விராக³தா லோகேதி வீதராக³தாபி ஸுகா²தி தீ³பேதி. காமானங் ஸமதிக்கமோதி யா ‘‘காமானங் ஸமதிக்கமோ’’தி வுச்சதி; ஸா விராக³தாபி ஸுகா²தி அத்தோ². ஏதேன அனாகா³மிமக்³கோ³ கதி²தோ. அஸ்மிமானஸ்ஸ யோ வினயோதி இமினா பன அரஹத்தங் கதி²தங்; அரஹத்தஞ்ஹி அஸ்மிமானஸ்ஸ ‘‘பஸ்ஸத்³தி⁴வினயோ’’தி வுச்சதி. இதோ பரஞ்ச ஸுக²ங் நாம நத்தி², தேனாஹ ‘‘ஏதங் வே பரமங் ஸுக²’’ந்தி.
Sukho vivekoti nibbānasaṅkhāto upadhiviveko sukho. Tuṭṭhassāti catumaggañāṇasantosena santuṭṭhassa. Sutadhammassāti pakāsitadhammassa. Passatoti taṃ vivekaṃ yaṃ vā kiñci passitabbaṃ nāma, taṃ sabbaṃ attano vīriyabalādhigatena ñāṇacakkhunā passantassa. Abyāpajjanti akuppanabhāvo; etena mettāpubbabhāgo dassito. Pāṇabhūtesu saṃyamoti sattesu ca saṃyamo; avihiṃsanabhāvo sukhoti attho. Etena karuṇāpubbabhāgo dassito. Sukhā virāgatā loketi vītarāgatāpi sukhāti dīpeti. Kāmānaṃ samatikkamoti yā ‘‘kāmānaṃ samatikkamo’’ti vuccati; sā virāgatāpi sukhāti attho. Etena anāgāmimaggo kathito. Asmimānassa yo vinayoti iminā pana arahattaṃ kathitaṃ; arahattañhi asmimānassa ‘‘passaddhivinayo’’ti vuccati. Ito parañca sukhaṃ nāma natthi, tenāha ‘‘etaṃ ve paramaṃ sukha’’nti.
முசலிந்த³கதா² நிட்டி²தா.
Mucalindakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 3. முசலிந்த³கதா² • 3. Mucalindakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / முசலிந்த³கதா²வண்ணனா • Mucalindakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / முசலிந்த³கதா²வண்ணனா • Mucalindakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / முசலிந்த³கதா²வண்ணனா • Mucalindakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. முசலிந்த³கதா² • 3. Mucalindakathā
