| Upanishads |
Mudgala Upanishad
Sanskrit Devanagari with Roman transliteration (IAST)
॥ मुद्गलोपनिषत् ॥
॥ mudgalopaniṣat ॥
श्रीमत्पुरुषसूक्तार्थं पूर्णानन्दकलेवरम् ।
पुरुषोत्तमविख्यातं पूर्णं ब्रह्म भवाम्यहम् ॥
śrīmatpuruṣasūktārthaṃ pūrṇānandakalevaram ।
puruṣottamavikhyātaṃ pūrṇaṃ brahma bhavāmyaham ॥
ॐ वाङ् मे मनसि प्रतिष्ठिता
मनो मे वाचि प्रतिष्ठितमाविरावीर्म एधि ॥
oṃ vāṅ me manasi pratiṣṭhitā
mano me vāci pratiṣṭhitamāvirāvīrma edhi ॥
वेदस्य म आणीस्थः । श्रुतं मे मा प्रहासीरनेनाधीते-
नाहोरात्रान्सन्दधाम्यृतं वदिष्यामि सत्यं वदिष्यामि ॥
vedasya ma āṇīsthaḥ । śrutaṃ me mā prahāsīranenādhīte-
nāhorātrānsandadhāmyṛtaṃ vadiṣyāmi satyaṃ vadiṣyāmi ॥
तन्मामवतु तद्वक्तारमवतु अवतु मामवतु वक्तारमवतु वक्तारम् ॥
tanmāmavatu tadvaktāramavatu avatu māmavatu vaktāramavatu vaktāram ॥
ॐ पुरुषसूक्तार्थनिर्णयं व्याख्यास्यामः
पुरुषसंहितायां पुरुषसूक्तार्थः संग्रहेण प्रोच्यते ।
सहस्रशीर्षेत्यत्र सशब्दोऽनन्तवाचकः ।
अनन्तयोजनं प्राह दशाङ्गुलवचस्तथा ॥ १॥
oṃ puruṣasūktārthanirṇayaṃ vyākhyāsyāmaḥ
puruṣasaṃhitāyāṃ puruṣasūktārthaḥ saṃgraheṇa procyate ।
sahasraśīrṣetyatra saśabdo'nantavācakaḥ ।
anantayojanaṃ prāha daśāṅgulavacastathā ॥ 1॥
तस्य प्रथमया विष्णोर्देशतो व्याप्तिरीरिता ।
द्वितीयया चास्य विष्णोः कालतो व्याप्तिरुच्यते ॥ २॥
tasya prathamayā viṣṇordeśato vyāptirīritā ।
dvitīyayā cāsya viṣṇoḥ kālato vyāptirucyate ॥ 2॥
विष्णोर्मोक्षप्रदत्वं च कथितं तु तृतीयया ।
एतावानिति मन्त्रेण वैभवं कथितं हरेः ॥ ३॥
viṣṇormokṣapradatvaṃ ca kathitaṃ tu tṛtīyayā ।
etāvāniti mantreṇa vaibhavaṃ kathitaṃ hareḥ ॥ 3॥
एतेनैव च मन्त्रेण चतुर्व्यूहो विभाषितः ।
त्रिपादित्यनया प्रोक्तमनिरुद्धस्य वैभवम् ॥ ४॥
etenaiva ca mantreṇa caturvyūho vibhāṣitaḥ ।
tripādityanayā proktamaniruddhasya vaibhavam ॥ 4॥
तस्माद्विराडित्यनया पादनारायणाद्धरेः ।
प्रकृतेः पुरुषस्यापि समुत्पत्तिः प्रदर्शिता ॥ ५॥
tasmādvirāḍityanayā pādanārāyaṇāddhareḥ ।
prakṛteḥ puruṣasyāpi samutpattiḥ pradarśitā ॥ 5॥
यत्पुरुषेणेत्यनया सृष्टियज्ञः समीरितः ।
सप्तास्यासन्परिधयः समिधश्च समीरिताः ॥ ६॥
yatpuruṣeṇetyanayā sṛṣṭiyajñaḥ samīritaḥ ।
saptāsyāsanparidhayaḥ samidhaśca samīritāḥ ॥ 6॥
तं यज्ञमिति मन्त्रेण सृष्टियज्ञः समीरितः ।
अनेनैव च मन्त्रेण मोक्षश्च समुदीरितः ॥ ७॥
taṃ yajñamiti mantreṇa sṛṣṭiyajñaḥ samīritaḥ ।
anenaiva ca mantreṇa mokṣaśca samudīritaḥ ॥ 7॥
तस्मादिति च मन्त्रेण जगत्सृष्टिः समीरिता ।
वेदाहमिति मन्त्राभ्यां वैभवं कथितं हरेः ॥ ८॥
tasmāditi ca mantreṇa jagatsṛṣṭiḥ samīritā ।
vedāhamiti mantrābhyāṃ vaibhavaṃ kathitaṃ hareḥ ॥ 8॥
यज्ञेनेत्युपसंहारः सृष्टेर्मोक्षस्य चेरितः ।
य एवमेतज्जानाति स हि मुक्तो भवेदिति ॥ ९॥ १॥
yajñenetyupasaṃhāraḥ sṛṣṭermokṣasya ceritaḥ ।
ya evametajjānāti sa hi mukto bhavediti ॥ 9॥ 1॥
अथ तथा मुद्गलोपनिषदि पुरुषसूक्तस्य वैभवं
विस्तरेण प्रतिपादितम् । वासुदेव इन्द्राय भगवज्ज्ञानमुपदिश्य
पुनरपि सूक्ष्मश्रवणाय प्रणतायेन्द्राय परमरहस्यभूतं
पुरुषसूक्ताभ्यां खण्डद्वयाभ्यामुपादिशत् ।
द्वौ खण्डावुच्येते । योऽय मुक्तः स पुरुषो
नामरूपज्ञानागोचरं संसारिणामतिदुर्ज्ञेयं
विषयं विहाय क्लेशादिभिः संक्लिष्टदेवादिजिहीर्षया
सहस्रकलावयवकल्याणं दृष्टमात्रेण मोक्षदं
वेषमाददे । तेन वेषेण भूम्यादिलोकं व्याप्यानन्त-
योजनमत्यतिष्ठत् । पुरुषो नारायणो भूतं भव्यं
भविष्यच्चासीत् । स च सर्वस्मान्महिम्नो ज्यायान् ।
तस्मान्न कोऽपि ज्यायान् । महापुरुष आत्मानं
चतुर्धा कृत्वा त्रिपादेन परमे व्योम्नि चासीत् । इतरेण
चतुर्थेनानिरुद्धनारायणेन विश्वान्यासन् । स च
पादनारायणो जगत्स्रष्टुं प्रकृतिमजनयत् । स
समृद्धकायः सन्सृष्टिकर्म न जज्ञिवान् ।
सोऽनिरुद्धनारायणस्तस्मै सृष्टिमुपादिशत् ।
ब्रह्मंस्तवेन्द्रियाणि याजकानि ध्यात्वा कोशभूतं
दृढं ग्रन्थिकलेवरं हविर्ध्यात्वा मां हविर्भुजं
ध्यात्वा वसन्तकालमाज्यं ध्यात्वा ग्रीष्ममिध्मं
ध्यात्वा शरदृतुं रसं ध्यात्वैवमग्नौ हुत्वाङ्ग-
स्पर्शात्कलेवरो वज्रं हीष्यते । ततः स्वकार्यान्सर्व-
प्राणिजीवान्सृष्ट्वा पश्वाद्याः प्रादुर्भविष्यन्ति ।
ततः स्थावरजङ्गमात्मकं जगद्भविष्यति । एतेन
जीवात्मनोर्योगेन मोक्षप्रकारश्च कथित इत्यनुसन्धेयम् ।
य इमं सृष्टियज्ञं जानाति मोक्षप्रकारं च
सर्वमायुरेति ॥ २॥
atha tathā mudgalopaniṣadi puruṣasūktasya vaibhavaṃ
vistareṇa pratipāditam । vāsudeva indrāya bhagavajjñānamupadiśya
punarapi sūkṣmaśravaṇāya praṇatāyendrāya paramarahasyabhūtaṃ
puruṣasūktābhyāṃ khaṇḍadvayābhyāmupādiśat ।
dvau khaṇḍāvucyete । yo'ya muktaḥ sa puruṣo
nāmarūpajñānāgocaraṃ saṃsāriṇāmatidurjñeyaṃ
viṣayaṃ vihāya kleśādibhiḥ saṃkliṣṭadevādijihīrṣayā
sahasrakalāvayavakalyāṇaṃ dṛṣṭamātreṇa mokṣadaṃ
veṣamādade । tena veṣeṇa bhūmyādilokaṃ vyāpyānanta-
yojanamatyatiṣṭhat । puruṣo nārāyaṇo bhūtaṃ bhavyaṃ
bhaviṣyaccāsīt । sa ca sarvasmānmahimno jyāyān ।
tasmānna ko'pi jyāyān । mahāpuruṣa ātmānaṃ
caturdhā kṛtvā tripādena parame vyomni cāsīt । itareṇa
caturthenāniruddhanārāyaṇena viśvānyāsan । sa ca
pādanārāyaṇo jagatsraṣṭuṃ prakṛtimajanayat । sa
samṛddhakāyaḥ sansṛṣṭikarma na jajñivān ।
so'niruddhanārāyaṇastasmai sṛṣṭimupādiśat ।
brahmaṃstavendriyāṇi yājakāni dhyātvā kośabhūtaṃ
dṛḍhaṃ granthikalevaraṃ havirdhyātvā māṃ havirbhujaṃ
dhyātvā vasantakālamājyaṃ dhyātvā grīṣmamidhmaṃ
dhyātvā śaradṛtuṃ rasaṃ dhyātvaivamagnau hutvāṅga-
sparśātkalevaro vajraṃ hīṣyate । tataḥ svakāryānsarva-
prāṇijīvānsṛṣṭvā paśvādyāḥ prādurbhaviṣyanti ।
tataḥ sthāvarajaṅgamātmakaṃ jagadbhaviṣyati । etena
jīvātmanoryogena mokṣaprakāraśca kathita ityanusandheyam ।
ya imaṃ sṛṣṭiyajñaṃ jānāti mokṣaprakāraṃ ca
sarvamāyureti ॥ 2॥
एको देवो बहुधा निविष्ट अजायमानो बहुधा विजायते ।
तमेतमग्निरित्यध्वर्यव उपासते । यजुरित्येष हीदं
सर्वं युनक्ति । सामेति छन्दोगाः । एतस्मिन्हीदं सर्वं
प्रतिष्ठितम् । विषमिति सर्पाः । सर्प इति सर्पविदः ।
ऊर्गिति देवाः । रयिरिति मनुष्याः । मायेत्यसुराः ।
स्वधेति पितरः । देवजन इति देवजनविदः । रूपमिति गन्धर्वाः ।
गन्धर्व इति अप्सरसः । तं यथायथोपासते तथैव भवति ।
तस्माद्ब्राह्मणः पुरुषरूपं परंब्रह्मैवाहमिति
भावयेत् । तद्रूपो भवति । य एवं वेद ॥ ३॥
eko devo bahudhā niviṣṭa ajāyamāno bahudhā vijāyate ।
tametamagnirityadhvaryava upāsate । yajurityeṣa hīdaṃ
sarvaṃ yunakti । sāmeti chandogāḥ । etasminhīdaṃ sarvaṃ
pratiṣṭhitam । viṣamiti sarpāḥ । sarpa iti sarpavidaḥ ।
ūrgiti devāḥ । rayiriti manuṣyāḥ । māyetyasurāḥ ।
svadheti pitaraḥ । devajana iti devajanavidaḥ । rūpamiti gandharvāḥ ।
gandharva iti apsarasaḥ । taṃ yathāyathopāsate tathaiva bhavati ।
tasmādbrāhmaṇaḥ puruṣarūpaṃ paraṃbrahmaivāhamiti
bhāvayet । tadrūpo bhavati । ya evaṃ veda ॥ 3॥
तद्ब्रह्म तापत्रयातीतं षट्कोशविनिर्मुक्तं षडूर्मिवर्जितं
पञ्चकोशातीतं षड्भावविकारशून्यमेवमादि-
सर्वविलक्षणं भवति । तापत्रयं त्वाध्यात्मिकाधिभौति-
काधिदैविकं कर्तृकर्मकार्यज्ञातृज्ञानज्ञेय-
भोक्तृभोगभोग्यमिति त्रिविधम् । त्वङ्मांसशोणितास्थि-
स्नायुमज्जाः षट्कोशाः । कामक्रोधलोभमोहमद-
मात्सर्यमित्यरिषड्वर्गः । अन्नमयप्राणमयमनोमय-
विज्ञानमयानन्दमया इति पञ्चकोशाः ।
प्रियात्मजननवर्धनपरिणामक्षयनाशाः षड्भावाः ।
अशनायापिपासाशोकमोहजरामरणानीति षडूर्मयः ।
कुलगोत्रजातिवर्णाश्रमरूपाणि षड् भ्रमाः ।
एतद्योगेन परमपुरुषो जीवो भवति नान्यः ।
य एतदुपनिषदं नित्यमधीते सोऽग्निपूतो भवति । स वायुपूतो
भवति । स आदित्यपूतो भवति । अरोगी भवति । श्रीमांश्च भवति ।
पुत्रपौत्रादिभिः समृद्धो भवति । विद्वांश्च भवति ।
महापातकात्पूतो भवति । सुरापानात्पूतो भवति ।
अगम्यागमनात्पूतो भवति । मातृगमनात्पूतो भवति ।
दुहितृस्नुषाभिगमनात्पूतो भवति । स्वर्णस्तेयात्पूतो भवति ।
वेदिजन्महानात्पूतो भवति । गुरोरशुश्रूषणात्पूतो भवति ।
अयाज्ययाजनात्पूतो भवति । अभक्ष्यभक्षणात्पूतो भवति ।
उग्रप्रतिग्रहात्पूतो भवति । परदारगमनात्पूतो भवति ।
कामक्रोधलोभमोहेर्ष्यादिभिरबाधितो भवति । सर्वेभ्यः
पापेभ्यो मुक्तो भवति । इह जन्मनि पुरुषो भवति तस्मादेत-
त्पुरुषसूक्तार्थमतिरहस्यं राजगुह्यं देवगुह्यं गुह्यादपि
गुह्यतरं नादीक्षितायोपदिशेत् ।
नानूचानाय । नायज्ञशीलाय । नावैष्णवाय ।
नायोगिने । न बहुभाषिणे । नाप्रियवादिने ।
नासंवत्सरवेदिने । नातुष्टाय । नानधीतवेदायोपदिशेत् ।
गुरुरप्येवंविच्छुचौ देशे पुण्यनक्षत्रे
प्राणानायम्य पुरुषं ध्यायन्नुपसन्नाय
शिष्याय दक्षिणकर्णे पुरुषसूक्तार्थमुपदिशेद्विद्वान् ।
न बहुशो वदेत् । यातयामो भवति । असकृत्कर्णमुपदिशेत् ।
एतत्कुर्वाणोऽध्येताध्यापकश्च इह जन्मनि पुरुषो
भवतीत्युपनिषत् ॥
tadbrahma tāpatrayātītaṃ ṣaṭkośavinirmuktaṃ ṣaḍūrmivarjitaṃ
pañcakośātītaṃ ṣaḍbhāvavikāraśūnyamevamādi-
sarvavilakṣaṇaṃ bhavati । tāpatrayaṃ tvādhyātmikādhibhauti-
kādhidaivikaṃ kartṛkarmakāryajñātṛjñānajñeya-
bhoktṛbhogabhogyamiti trividham । tvaṅmāṃsaśoṇitāsthi-
snāyumajjāḥ ṣaṭkośāḥ । kāmakrodhalobhamohamada-
mātsaryamityariṣaḍvargaḥ । annamayaprāṇamayamanomaya-
vijñānamayānandamayā iti pañcakośāḥ ।
priyātmajananavardhanapariṇāmakṣayanāśāḥ ṣaḍbhāvāḥ ।
aśanāyāpipāsāśokamohajarāmaraṇānīti ṣaḍūrmayaḥ ।
kulagotrajātivarṇāśramarūpāṇi ṣaḍ bhramāḥ ।
etadyogena paramapuruṣo jīvo bhavati nānyaḥ ।
ya etadupaniṣadaṃ nityamadhīte so'gnipūto bhavati । sa vāyupūto
bhavati । sa ādityapūto bhavati । arogī bhavati । śrīmāṃśca bhavati ।
putrapautrādibhiḥ samṛddho bhavati । vidvāṃśca bhavati ।
mahāpātakātpūto bhavati । surāpānātpūto bhavati ।
agamyāgamanātpūto bhavati । mātṛgamanātpūto bhavati ।
duhitṛsnuṣābhigamanātpūto bhavati । svarṇasteyātpūto bhavati ।
vedijanmahānātpūto bhavati । guroraśuśrūṣaṇātpūto bhavati ।
ayājyayājanātpūto bhavati । abhakṣyabhakṣaṇātpūto bhavati ।
ugrapratigrahātpūto bhavati । paradāragamanātpūto bhavati ।
kāmakrodhalobhamoherṣyādibhirabādhito bhavati । sarvebhyaḥ
pāpebhyo mukto bhavati । iha janmani puruṣo bhavati tasmādeta-
tpuruṣasūktārthamatirahasyaṃ rājaguhyaṃ devaguhyaṃ guhyādapi
guhyataraṃ nādīkṣitāyopadiśet ।
nānūcānāya । nāyajñaśīlāya । nāvaiṣṇavāya ।
nāyogine । na bahubhāṣiṇe । nāpriyavādine ।
nāsaṃvatsaravedine । nātuṣṭāya । nānadhītavedāyopadiśet ।
gururapyevaṃvicchucau deśe puṇyanakṣatre
prāṇānāyamya puruṣaṃ dhyāyannupasannāya
śiṣyāya dakṣiṇakarṇe puruṣasūktārthamupadiśedvidvān ।
na bahuśo vadet । yātayāmo bhavati । asakṛtkarṇamupadiśet ।
etatkurvāṇo'dhyetādhyāpakaśca iha janmani puruṣo
bhavatītyupaniṣat ॥
ॐ वाङ्मे मनसि प्रतिष्ठिता मनो मे वाचि प्रतिष्ठित-
माविरावीर्म एधि ॥ वेदस्य म आणीस्थः श्रुतं मे मा
प्रहासीरनेनाधीतेनाहोरात्रान्सन्दधाम्यृतं वदिष्यामि
सत्यं वदिष्यामि ॥ तन्मामवतु तद्वक्तारमवतु अवतु
मामवतु वक्तारमवतु वक्तारम् ॥
oṃ vāṅme manasi pratiṣṭhitā mano me vāci pratiṣṭhita-
māvirāvīrma edhi ॥ vedasya ma āṇīsthaḥ śrutaṃ me mā
prahāsīranenādhītenāhorātrānsandadhāmyṛtaṃ vadiṣyāmi
satyaṃ vadiṣyāmi ॥ tanmāmavatu tadvaktāramavatu avatu
māmavatu vaktāramavatu vaktāram ॥
ॐ शान्तिः शान्तिः शान्तिः ॥
oṃ śāntiḥ śāntiḥ śāntiḥ ॥
इति मुद्गलोपनिषत्समाप्ता ॥
iti mudgalopaniṣatsamāptā ॥
YOU MAY ALSO LIKE
