| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
161. மூலாதி³பே⁴ஸஜ்ஜகதா²
161. Mūlādibhesajjakathā
263. தேன கோ² பன ஸமயேன கி³லானானங் பி⁴க்கூ²னங் மூலேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி , பி⁴க்க²வே, மூலானி பே⁴ஸஜ்ஜானி – ஹலித்³தி³ங், ஸிங்கி³வேரங், வசங், வசத்த²ங் 1, அதிவிஸங், கடுகரோஹிணிங், உஸீரங், ப⁴த்³த³முத்தகங், யானி வா பனஞ்ஞானிபி அத்தி² மூலானி பே⁴ஸஜ்ஜானி, நேவ கா²த³னீயே கா²த³னீயத்த²ங் ப²ரந்தி, ந போ⁴ஜனீயே போ⁴ஜனீயத்த²ங் ப²ரந்தி, தானி – படிக்³க³ஹெத்வா யாவஜீவங் பரிஹரிதுங்; ஸதி பச்சயே பரிபு⁴ஞ்ஜிதுங். அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸாதி.
263. Tena kho pana samayena gilānānaṃ bhikkhūnaṃ mūlehi bhesajjehi attho hoti. Bhagavato etamatthaṃ ārocesuṃ. Anujānāmi , bhikkhave, mūlāni bhesajjāni – haliddiṃ, siṅgiveraṃ, vacaṃ, vacatthaṃ 2, ativisaṃ, kaṭukarohiṇiṃ, usīraṃ, bhaddamuttakaṃ, yāni vā panaññānipi atthi mūlāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
தேன கோ² பன ஸமயேன கி³லானானங் பி⁴க்கூ²னங் மூலேஹி பே⁴ஸஜ்ஜேஹி பிட்டே²ஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, நிஸத³ங் நிஸத³போதகந்தி.
Tena kho pana samayena gilānānaṃ bhikkhūnaṃ mūlehi bhesajjehi piṭṭhehi attho hoti. Bhagavato etamatthaṃ ārocesuṃ. Anujānāmi, bhikkhave, nisadaṃ nisadapotakanti.
தேன கோ² பன ஸமயேன கி³லானானங் பி⁴க்கூ²னங் கஸாவேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கஸாவானி 3 பே⁴ஸஜ்ஜானி – நிம்ப³கஸாவங், குடஜகஸாவங், படோலகஸாவங், ப²க்³க³வகஸாவங், நத்தமாலகஸாவங், யானி வா பனஞ்ஞானிபி அத்தி² கஸாவானி பே⁴ஸஜ்ஜானி நேவ கா²த³னீயே கா²த³னீயத்த²ங் ப²ரந்தி, ந போ⁴ஜனீயே போ⁴ஜனீயத்த²ங் ப²ரந்தி, தானி – படிக்³க³ஹெத்வா யாவஜீவங் பரிஹரிதுங்; ஸதி பச்சயே பரிபு⁴ஞ்ஜிதுங். அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸாதி.
Tena kho pana samayena gilānānaṃ bhikkhūnaṃ kasāvehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, kasāvāni 4 bhesajjāni – nimbakasāvaṃ, kuṭajakasāvaṃ, paṭolakasāvaṃ, phaggavakasāvaṃ, nattamālakasāvaṃ, yāni vā panaññānipi atthi kasāvāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
தேன கோ² பன ஸமயேன கி³லானானங் பி⁴க்கூ²னங் பண்ணேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே , பண்ணானி பே⁴ஸஜ்ஜானி – நிம்ப³பண்ணங், குடஜபண்ணங், படோலபண்ணங், ஸுலஸிபண்ணங், கப்பாஸபண்ணங், யானி வா பனஞ்ஞானிபி அத்தி² பண்ணானி பே⁴ஸஜ்ஜானி, நேவ கா²த³னீயே கா²த³னீயத்த²ங் ப²ரந்தி, ந போ⁴ஜனீயே போ⁴ஜனீயத்த²ங் ப²ரந்தி…பே॰….
Tena kho pana samayena gilānānaṃ bhikkhūnaṃ paṇṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave , paṇṇāni bhesajjāni – nimbapaṇṇaṃ, kuṭajapaṇṇaṃ, paṭolapaṇṇaṃ, sulasipaṇṇaṃ, kappāsapaṇṇaṃ, yāni vā panaññānipi atthi paṇṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
தேன கோ² பன ஸமயேன கி³லானானங் பி⁴க்கூ²னங் ப²லேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ப²லானி பே⁴ஸஜ்ஜானி – பி³லங்க³ங், பிப்பலிங், மரிசங், ஹரீதகங், விபீ⁴தகங், ஆமலகங், கொ³ட்ட²ப²லங் 5, யானி வா பனஞ்ஞானிபி அத்தி² ப²லானி பே⁴ஸஜ்ஜானி, நேவ கா²த³னீயே கா²த³னீயத்த²ங் ப²ரந்தி, ந போ⁴ஜனீயே போ⁴ஜனீயத்த²ங் ப²ரந்தி…பே॰….
Tena kho pana samayena gilānānaṃ bhikkhūnaṃ phalehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, phalāni bhesajjāni – bilaṅgaṃ, pippaliṃ, maricaṃ, harītakaṃ, vibhītakaṃ, āmalakaṃ, goṭṭhaphalaṃ 6, yāni vā panaññānipi atthi phalāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
தேன கோ² பன ஸமயேன கி³லானானங் பி⁴க்கூ²னங் ஜதூஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஜதூனி பே⁴ஸஜ்ஜானி – ஹிங்கு³ங், ஹிங்கு³ஜதுங், ஹிங்கு³ஸிபாடிகங், தகங், தகபத்திங், தகபண்ணிங் , ஸஜ்ஜுலஸங், யானி வா பனஞ்ஞானிபி அத்தி² ஜதூனி பே⁴ஸஜ்ஜானி, நேவ கா²த³னீயே கா²த³னீயத்த²ங் ப²ரந்தி…பே॰….
Tena kho pana samayena gilānānaṃ bhikkhūnaṃ jatūhi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, jatūni bhesajjāni – hiṅguṃ, hiṅgujatuṃ, hiṅgusipāṭikaṃ, takaṃ, takapattiṃ, takapaṇṇiṃ , sajjulasaṃ, yāni vā panaññānipi atthi jatūni bhesajjāni, neva khādanīye khādanīyatthaṃ pharanti…pe….
தேன கோ² பன ஸமயேன கி³லானானங் பி⁴க்கூ²னங் லோணேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, லோணானி பே⁴ஸஜ்ஜானி – ஸாமுத்³த³ங், காளலோணங், ஸிந்த⁴வங், உப்³பி⁴த³ங் 7, பி³லங் 8, யானி வா பனஞ்ஞானிபி அத்தி² லோணானி பே⁴ஸஜ்ஜானி, நேவ கா²த³னீயே கா²த³னீயத்த²ங் ப²ரந்தி, ந போ⁴ஜனீயே போ⁴ஜனீயத்த²ங் ப²ரந்தி, தானி – படிக்³க³ஹெத்வா யாவஜீவங் பரிஹரிதுங்; ஸதி பச்சயே பரிபு⁴ஞ்ஜிதுங். அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸாதி.
Tena kho pana samayena gilānānaṃ bhikkhūnaṃ loṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, loṇāni bhesajjāni – sāmuddaṃ, kāḷaloṇaṃ, sindhavaṃ, ubbhidaṃ 9, bilaṃ 10, yāni vā panaññānipi atthi loṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
264. தேன கோ² பன ஸமயேன ஆயஸ்மதோ ஆனந்த³ஸ்ஸ உபஜ்ஜா²யஸ்ஸ ஆயஸ்மதோ பே³லட்ட²ஸீஸஸ்ஸ து²ல்லகச்சா²பா³தோ⁴ ஹோதி. தஸ்ஸ லஸிகாய சீவரானி காயே லக்³க³ந்தி, தானி பி⁴க்கூ² உத³கேன தேமெத்வா தேமெத்வா அபகட்³ட⁴ந்தி. அத்³த³ஸா கோ² ப⁴க³வா ஸேனாஸனசாரிகங் ஆஹிண்ட³ந்தோ தே பி⁴க்கூ² தானி சீவரானி உத³கேன தேமெத்வா தேமெத்வா அபகட்³ட⁴ந்தே, தி³ஸ்வான யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘கிங் இமஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘இமஸ்ஸ, ப⁴ந்தே, ஆயஸ்மதோ து²ல்லகச்சா²பா³தோ⁴, லஸிகாய சீவரானி காயே லக்³க³ந்தி, தானி மயங் உத³கேன தேமெத்வா தேமெத்வா அபகட்³டா⁴மா’’தி . அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, யஸ்ஸ கண்டு³ வா, பிளகா வா, அஸ்ஸாவோ வா, து²ல்லகச்சு² வா ஆபா³தோ⁴, காயோ வா து³க்³க³ந்தோ⁴, சுண்ணானி பே⁴ஸஜ்ஜானி; அகி³லானஸ்ஸ ச²கணங் மத்திகங் ரஜனநிப்பக்கங். அனுஜானாமி, பி⁴க்க²வே, உது³க்க²லங் முஸல’’ந்தி.
264. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti, tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho, lasikāya cīvarāni kāye lagganti, tāni mayaṃ udakena temetvā temetvā apakaḍḍhāmā’’ti . Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā, piḷakā vā, assāvo vā, thullakacchu vā ābādho, kāyo vā duggandho, cuṇṇāni bhesajjāni; agilānassa chakaṇaṃ mattikaṃ rajananippakkaṃ. Anujānāmi, bhikkhave, udukkhalaṃ musala’’nti.
தேன கோ² பன ஸமயேன கி³லானானங் பி⁴க்கூ²னங் சுண்ணேஹி பே⁴ஸஜ்ஜேஹி சாலிதேஹி அத்தோ² ஹோதி . ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சுண்ணசாலினிந்தி. ஸண்ஹேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, து³ஸ்ஸசாலினிந்தி.
Tena kho pana samayena gilānānaṃ bhikkhūnaṃ cuṇṇehi bhesajjehi cālitehi attho hoti . Bhagavato etamatthaṃ ārocesuṃ. Anujānāmi, bhikkhave, cuṇṇacālininti. Saṇhehi attho hoti. Bhagavato etamatthaṃ ārocesuṃ. Anujānāmi, bhikkhave, dussacālininti.
தேன கோ² பன ஸமயேன அஞ்ஞதரஸ்ஸ பி⁴க்கு²னோ அமனுஸ்ஸிகாபா³தோ⁴ ஹோதி. தங் ஆசரியுபஜ்ஜா²யா உபட்ட²ஹந்தா நாஸக்கி²ங்ஸு அரோக³ங் காதுங். ஸோ ஸூகரஸூனங் க³ந்த்வா ஆமகமங்ஸங் கா²தி³, ஆமகலோஹிதங் பிவி . தஸ்ஸ ஸோ அமனுஸ்ஸிகாபா³தோ⁴ படிப்பஸ்ஸம்பி⁴. ப⁴க³வதோ ஏதமத்த²ங் ஆரோசேஸுங் . அனுஜானாமி, பி⁴க்க²வே, அமனுஸ்ஸிகாபா³தே⁴ ஆமகமங்ஸங் ஆமகலோஹிதந்தி.
Tena kho pana samayena aññatarassa bhikkhuno amanussikābādho hoti. Taṃ ācariyupajjhāyā upaṭṭhahantā nāsakkhiṃsu arogaṃ kātuṃ. So sūkarasūnaṃ gantvā āmakamaṃsaṃ khādi, āmakalohitaṃ pivi . Tassa so amanussikābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, amanussikābādhe āmakamaṃsaṃ āmakalohitanti.
265. தேன கோ² பன ஸமயேன அஞ்ஞதரஸ்ஸ பி⁴க்கு²னோ சக்கு²ரோகா³பா³தோ⁴ ஹோதி. தங் பி⁴க்கூ² பரிக்³க³ஹெத்வா உச்சாரம்பி பஸ்ஸாவம்பி நிக்கா²மெந்தி. அத்³த³ஸா கோ² ப⁴க³வா ஸேனாஸனசாரிகங் ஆஹிண்ட³ந்தோ தே பி⁴க்கூ² தங் பி⁴க்கு²ங் பரிக்³க³ஹெத்வா உச்சாரம்பி பஸ்ஸாவம்பி நிக்கா²மெந்தே, தி³ஸ்வான யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘கிங் இமஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘இமஸ்ஸ, ப⁴ந்தே, ஆயஸ்மதோ சக்கு²ரோகா³பா³தோ⁴. இமங் மயங் பரிக்³க³ஹெத்வா உச்சாரம்பி பஸ்ஸாவம்பி நிக்கா²மேமா’’தி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அஞ்ஜனங் – காளஞ்ஜனங், ரஸஞ்ஜனங், ஸோதஞ்ஜனங், கே³ருகங், கபல்ல’’ந்தி. அஞ்ஜனூபபிஸனேஹி அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சந்த³னங், தக³ரங், காளானுஸாரியங், தாலீஸங், ப⁴த்³த³முத்தகந்தி. தேன கோ² பன ஸமயேன பி⁴க்கூ² பிட்டா²னி அஞ்ஜனானி சருகேஸுபி 11 ஸராவகேஸுபி நிக்கி²பந்தி; திணசுண்ணேஹிபி பங்ஸுகேஹிபி ஓகிரியந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அஞ்ஜனிந்தி.
265. Tena kho pana samayena aññatarassa bhikkhuno cakkhurogābādho hoti. Taṃ bhikkhū pariggahetvā uccārampi passāvampi nikkhāmenti. Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ pariggahetvā uccārampi passāvampi nikkhāmente, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato cakkhurogābādho. Imaṃ mayaṃ pariggahetvā uccārampi passāvampi nikkhāmemā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, añjanaṃ – kāḷañjanaṃ, rasañjanaṃ, sotañjanaṃ, gerukaṃ, kapalla’’nti. Añjanūpapisanehi attho hoti. Bhagavato etamatthaṃ ārocesuṃ. Anujānāmi, bhikkhave, candanaṃ, tagaraṃ, kāḷānusāriyaṃ, tālīsaṃ, bhaddamuttakanti. Tena kho pana samayena bhikkhū piṭṭhāni añjanāni carukesupi 12 sarāvakesupi nikkhipanti; tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, añjaninti.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா அஞ்ஜனியோ தா⁴ரெந்தி – ஸோவண்ணமயங், ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘ஸெய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, உச்சாவசா அஞ்ஜனீ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங், த³ந்தமயங், விஸாணமயங், நளமயங், வேளுமயங், கட்ட²மயங், ஜதுமயங், ப²லமயங், லோஹமயங், ஸங்க²னாபி⁴மயந்தி.
Tena kho pana samayena chabbaggiyā bhikkhū uccāvacā añjaniyo dhārenti – sovaṇṇamayaṃ, rūpiyamayaṃ. Manussā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ, dantamayaṃ, visāṇamayaṃ, naḷamayaṃ, veḷumayaṃ, kaṭṭhamayaṃ, jatumayaṃ, phalamayaṃ, lohamayaṃ, saṅkhanābhimayanti.
தேன கோ² பன ஸமயேன அஞ்ஜனியோ அபாருதா ஹொந்தி, திணசுண்ணேஹிபி பங்ஸுகேஹிபி ஓகிரியந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அபிதா⁴னந்தி. அபிதா⁴னங் நிபததி . ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸுத்தகேன ப³ந்தி⁴த்வா அஞ்ஜனியா ப³ந்தி⁴துந்தி. அஞ்ஜனீ ப²லதி 13. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸுத்தகேன ஸிப்³பே³துந்தி.
Tena kho pana samayena añjaniyo apārutā honti, tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, apidhānanti. Apidhānaṃ nipatati . Bhagavato etamatthaṃ ārocesuṃ. Anujānāmi, bhikkhave, suttakena bandhitvā añjaniyā bandhitunti. Añjanī phalati 14. Bhagavato etamatthaṃ ārocesuṃ. Anujānāmi, bhikkhave, suttakena sibbetunti.
தேன கோ² பன ஸமயேன பி⁴க்கூ² அங்கு³லியா அஞ்ஜந்தி, அக்கீ²னி து³க்கா²னி ஹொந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அஞ்ஜனிஸலாகந்தி.
Tena kho pana samayena bhikkhū aṅguliyā añjanti, akkhīni dukkhāni honti. Bhagavato etamatthaṃ ārocesuṃ. Anujānāmi, bhikkhave, añjanisalākanti.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா அஞ்ஜனிஸலாகாயோ தா⁴ரெந்தி – ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி, ‘‘ஸெய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, உச்சாவசா அஞ்ஜனிஸலாகா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங்…பே॰… ஸங்க²னாபி⁴மயந்தி.
Tena kho pana samayena chabbaggiyā bhikkhū uccāvacā añjanisalākāyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanisalākā dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
தேன கோ² பன ஸமயேன அஞ்ஜனிஸலாகா பூ⁴மியங் பதிதா ப²ருஸா ஹோதி. ப⁴க³வதோ ஏதமத்த²ங் ஆரோசேஸுங் . அனுஜானாமி, பி⁴க்க²வே, ஸலாகடா²னியந்தி 15.
Tena kho pana samayena añjanisalākā bhūmiyaṃ patitā pharusā hoti. Bhagavato etamatthaṃ ārocesuṃ . Anujānāmi, bhikkhave, salākaṭhāniyanti 16.
தேன கோ² பன ஸமயேன பி⁴க்கூ² அஞ்ஜனிம்பி அஞ்ஜனிஸலாகம்பி ஹத்தே²ன பரிஹரந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அஞ்ஜனித்த²விகந்தி. அங்ஸப³த்³த⁴கோ ந ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அங்ஸப³த்³த⁴கங் ப³ந்த⁴னஸுத்தகந்தி.
Tena kho pana samayena bhikkhū añjanimpi añjanisalākampi hatthena pariharanti. Bhagavato etamatthaṃ ārocesuṃ. Anujānāmi, bhikkhave, añjanitthavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
266. தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ ஸீஸாபி⁴தாபோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, முத்³த⁴னி தேலகந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, நத்து²கம்மந்தி. நத்து² க³லதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, நத்து²கரணிந்தி.
266. Tena kho pana samayena āyasmato pilindavacchassa sīsābhitāpo hoti. Bhagavato etamatthaṃ ārocesuṃ. Anujānāmi, bhikkhave, muddhani telakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, natthukammanti. Natthu galati. Bhagavato etamatthaṃ ārocesuṃ. Anujānāmi, bhikkhave, natthukaraṇinti.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா நத்து²கரணியோ தா⁴ரெந்தி – ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி, ‘‘ஸெய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, உச்சாவசா நத்து²கரணீ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங்…பே॰… ஸங்க²னாபி⁴மயந்தி. நத்து²ங் விஸமங் ஆஸிஞ்சந்தி 17. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே , யமகனத்து²கரணிந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தூ⁴மங் பாதுந்தி. தஞ்ஞேவ வட்டிங் ஆலிம்பெத்வா பிவந்தி , கண்டோ² த³ஹதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தூ⁴மனெத்தந்தி.
Tena kho pana samayena chabbaggiyā bhikkhū uccāvacā natthukaraṇiyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā natthukaraṇī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti. Natthuṃ visamaṃ āsiñcanti 18. Bhagavato etamatthaṃ ārocesuṃ. Anujānāmi, bhikkhave , yamakanatthukaraṇinti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, dhūmaṃ pātunti. Taññeva vaṭṭiṃ ālimpetvā pivanti , kaṇṭho dahati. Bhagavato etamatthaṃ ārocesuṃ. Anujānāmi, bhikkhave, dhūmanettanti.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசானி தூ⁴மனெத்தானி தா⁴ரெந்தி – ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, உச்சாவசானி தூ⁴மனெத்தானி தா⁴ரேதப்³பா³னி. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங்…பே॰… ஸங்க²னாபி⁴மயந்தி.
Tena kho pana samayena chabbaggiyā bhikkhū uccāvacāni dhūmanettāni dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti – seyyathāpi gihī kāmabhoginoti. Bhagavato etamatthaṃ ārocesuṃ. Na, bhikkhave, uccāvacāni dhūmanettāni dhāretabbāni. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
தேன கோ² பன ஸமயேன தூ⁴மனெத்தானி அபாருதானி ஹொந்தி, பாணகா பவிஸந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அபிதா⁴னந்தி.
Tena kho pana samayena dhūmanettāni apārutāni honti, pāṇakā pavisanti. Bhagavato etamatthaṃ ārocesuṃ. Anujānāmi, bhikkhave, apidhānanti.
தேன கோ² பன ஸமயேன பி⁴க்கூ² தூ⁴மனெத்தானி ஹத்தே²ன பரிஹரந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தூ⁴மனெத்தத²விகந்தி. ஏகதோ க⁴ங்ஸியந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, யமகத²விகந்தி. அங்ஸப³த்³த⁴கோ ந ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அங்ஸப³த்³த⁴கங் ப³ந்த⁴னஸுத்தகந்தி.
Tena kho pana samayena bhikkhū dhūmanettāni hatthena pariharanti. Bhagavato etamatthaṃ ārocesuṃ. Anujānāmi, bhikkhave, dhūmanettathavikanti. Ekato ghaṃsiyanti. Bhagavato etamatthaṃ ārocesuṃ. Anujānāmi, bhikkhave, yamakathavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
267. தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ வாதாபா³தோ⁴ ஹோதி. வேஜ்ஜா ஏவமாஹங்ஸு – ‘‘தேலங் பசிதப்³ப³’’ந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தேலபாகந்தி. தஸ்மிங் கோ² பன தேலபாகே மஜ்ஜங் பக்கி²பிதப்³ப³ங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தேலபாகே மஜ்ஜங் பக்கி²பிதுந்தி.
267. Tena kho pana samayena āyasmato pilindavacchassa vātābādho hoti. Vejjā evamāhaṃsu – ‘‘telaṃ pacitabba’’nti. Bhagavato etamatthaṃ ārocesuṃ. Anujānāmi, bhikkhave, telapākanti. Tasmiṃ kho pana telapāke majjaṃ pakkhipitabbaṃ hoti. Bhagavato etamatthaṃ ārocesuṃ. Anujānāmi, bhikkhave, telapāke majjaṃ pakkhipitunti.
தேன கோ² பன ஸமயேன ச²ப்³ப³க்³கி³யா பி⁴க்கூ² அதிபக்கி²த்தமஜ்ஜானி 19 தேலானி பசந்தி, தானி பிவித்வா மஜ்ஜந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அதிபக்கி²த்தமஜ்ஜங் தேலங் பாதப்³ப³ங். யோ பிவெய்ய, யதா²த⁴ம்மோ காரேதப்³போ³. அனுஜானாமி, பி⁴க்க²வே, யஸ்மிங் தேலபாகே மஜ்ஜஸ்ஸ ந வண்ணோ ந க³ந்தோ⁴ ந ரஸோ பஞ்ஞாயதி, ஏவரூபங் மஜ்ஜபக்கி²த்தங் தேலங் பாதுந்தி.
Tena kho pana samayena chabbaggiyā bhikkhū atipakkhittamajjāni 20 telāni pacanti, tāni pivitvā majjanti. Bhagavato etamatthaṃ ārocesuṃ. Na, bhikkhave, atipakkhittamajjaṃ telaṃ pātabbaṃ. Yo piveyya, yathādhammo kāretabbo. Anujānāmi, bhikkhave, yasmiṃ telapāke majjassa na vaṇṇo na gandho na raso paññāyati, evarūpaṃ majjapakkhittaṃ telaṃ pātunti.
தேன கோ² பன ஸமயேன பி⁴க்கூ²னங் ப³ஹுங் அதிபக்கி²த்தமஜ்ஜங் தேலங் பக்கங் ஹோதி. அத² கோ² பி⁴க்கூ²னங் ஏதத³ஹோஸி – ‘‘கத²ங் நு கோ² அதிபக்கி²த்தமஜ்ஜே தேலே படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அப்³ப⁴ஞ்ஜனங் அதி⁴ட்டா²துந்தி.
Tena kho pana samayena bhikkhūnaṃ bahuṃ atipakkhittamajjaṃ telaṃ pakkaṃ hoti. Atha kho bhikkhūnaṃ etadahosi – ‘‘kathaṃ nu kho atipakkhittamajje tele paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, abbhañjanaṃ adhiṭṭhātunti.
தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ ப³ஹுதரங் தேலங் பக்கங் ஹோதி, தேலபா⁴ஜனங் ந விஜ்ஜதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தீணி தும்பா³னி – லோஹதும்ப³ங், கட்ட²தும்ப³ங், ப²லதும்ப³ந்தி.
Tena kho pana samayena āyasmato pilindavacchassa bahutaraṃ telaṃ pakkaṃ hoti, telabhājanaṃ na vijjati. Bhagavato etamatthaṃ ārocesuṃ. Anujānāmi, bhikkhave, tīṇi tumbāni – lohatumbaṃ, kaṭṭhatumbaṃ, phalatumbanti.
தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ அங்க³வாதோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸேத³கம்மந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸம்பா⁴ரஸேத³ந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, மஹாஸேத³ந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ப⁴ங்கோ³த³கந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, உத³ககொட்ட²கந்தி.
Tena kho pana samayena āyasmato pilindavacchassa aṅgavāto hoti. Bhagavato etamatthaṃ ārocesuṃ. Anujānāmi, bhikkhave, sedakammanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, sambhārasedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, mahāsedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, bhaṅgodakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, udakakoṭṭhakanti.
தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ பப்³ப³வாதோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, லோஹிதங் மோசேதுந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, லோஹிதங் மோசெத்வா விஸாணேன கா³ஹேதுந்தி 21.
Tena kho pana samayena āyasmato pilindavacchassa pabbavāto hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetunti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetvā visāṇena gāhetunti 22.
தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ பாதா³ ப²லிதா 23 ஹொந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பாத³ப்³ப⁴ஞ்ஜனந்தி. நக்க²மனியோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பஜ்ஜங் அபி⁴ஸங்க²ரிதுந்தி.
Tena kho pana samayena āyasmato pilindavacchassa pādā phalitā 24 honti. Bhagavato etamatthaṃ ārocesuṃ. Anujānāmi, bhikkhave, pādabbhañjananti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, pajjaṃ abhisaṅkharitunti.
தேன கோ² பன ஸமயேன அஞ்ஞதரஸ்ஸ பி⁴க்கு²னோ க³ண்டா³பா³தோ⁴ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸத்த²கம்மந்தி. கஸாவோத³கேன அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கஸாவோத³கந்தி. திலகக்கேன அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, திலகக்கந்தி. கப³ளிகாய அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கப³ளிகந்தி. வணப³ந்த⁴னசோளேன அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, வணப³ந்த⁴னசோளந்தி. வணோ கண்டு³வதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸாஸபகுட்டேன 25 போ²ஸிதுந்தி. வணோ கிலிஜ்ஜித்த². ப⁴க³வதோ ஏதமத்த²ங் ஆரோசேஸுங். அனுஜானாமி , பி⁴க்க²வே, தூ⁴மங் காதுந்தி. வட்³ட⁴மங்ஸங் வுட்டா²தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, லோணஸக்க²ரிகாய சி²ந்தி³துந்தி. வணோ ந ருஹதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, வணதேலந்தி. தேலங் க³லதி. ப⁴க³வதோ ஏதமத்த²ங் ஆரோசேஸுங். அனுஜானாமி , பி⁴க்க²வே, விகாஸிகங் ஸப்³ப³ங் வணபடிகம்மந்தி.
Tena kho pana samayena aññatarassa bhikkhuno gaṇḍābādho hoti. Bhagavato etamatthaṃ ārocesuṃ. Anujānāmi, bhikkhave, satthakammanti. Kasāvodakena attho hoti. Bhagavato etamatthaṃ ārocesuṃ. Anujānāmi, bhikkhave, kasāvodakanti. Tilakakkena attho hoti. Bhagavato etamatthaṃ ārocesuṃ. Anujānāmi, bhikkhave, tilakakkanti. Kabaḷikāya attho hoti. Bhagavato etamatthaṃ ārocesuṃ. Anujānāmi, bhikkhave, kabaḷikanti. Vaṇabandhanacoḷena attho hoti. Bhagavato etamatthaṃ ārocesuṃ. Anujānāmi, bhikkhave, vaṇabandhanacoḷanti. Vaṇo kaṇḍuvati. Bhagavato etamatthaṃ ārocesuṃ. Anujānāmi, bhikkhave, sāsapakuṭṭena 26 phositunti. Vaṇo kilijjittha. Bhagavato etamatthaṃ ārocesuṃ. Anujānāmi , bhikkhave, dhūmaṃ kātunti. Vaḍḍhamaṃsaṃ vuṭṭhāti. Bhagavato etamatthaṃ ārocesuṃ. Anujānāmi, bhikkhave, loṇasakkharikāya chinditunti. Vaṇo na ruhati. Bhagavato etamatthaṃ ārocesuṃ. Anujānāmi, bhikkhave, vaṇatelanti. Telaṃ galati. Bhagavato etamatthaṃ ārocesuṃ. Anujānāmi , bhikkhave, vikāsikaṃ sabbaṃ vaṇapaṭikammanti.
268. தேன கோ² பன ஸமயேன அஞ்ஞதரோ பி⁴க்கு² அஹினா த³ட்டோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சத்தாரி மஹாவிகடானி தா³துங் – கூ³த²ங், முத்தங், சா²ரிகங், மத்திகந்தி. அத² கோ² பி⁴க்கூ²னங் ஏதத³ஹோஸி – ‘‘அப்படிக்³க³ஹிதானி நு கோ² உதா³ஹு படிக்³க³ஹேதப்³பா³னீ’’தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸதி கப்பியகாரகே படிக்³க³ஹாபேதுங், அஸதி கப்பியகாரகே ஸாமங் க³ஹெத்வா பரிபு⁴ஞ்ஜிதுந்தி.
268. Tena kho pana samayena aññataro bhikkhu ahinā daṭṭho hoti. Bhagavato etamatthaṃ ārocesuṃ. Anujānāmi, bhikkhave, cattāri mahāvikaṭāni dātuṃ – gūthaṃ, muttaṃ, chārikaṃ, mattikanti. Atha kho bhikkhūnaṃ etadahosi – ‘‘appaṭiggahitāni nu kho udāhu paṭiggahetabbānī’’ti. Bhagavato etamatthaṃ ārocesuṃ. Anujānāmi, bhikkhave, sati kappiyakārake paṭiggahāpetuṃ, asati kappiyakārake sāmaṃ gahetvā paribhuñjitunti.
தேன கோ² பன ஸமயேன அஞ்ஞதரேன பி⁴க்கு²னா விஸங் பீதங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி பி⁴க்க²வே கூ³த²ங் பாயேதுந்தி. அத² கோ² பி⁴க்கூ²னங் ஏதத³ஹோஸி – ‘‘அப்படிக்³க³ஹிதங் நு கோ² உதா³ஹு படிக்³க³ஹேதப்³போ³’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, யங் கரொந்தோ படிக்³க³ண்ஹாதி, ஸ்வேவ படிக்³க³ஹோ கதோ, ந புன 27 படிக்³க³ஹேதப்³போ³தி.
Tena kho pana samayena aññatarena bhikkhunā visaṃ pītaṃ hoti. Bhagavato etamatthaṃ ārocesuṃ. Anujānāmi bhikkhave gūthaṃ pāyetunti. Atha kho bhikkhūnaṃ etadahosi – ‘‘appaṭiggahitaṃ nu kho udāhu paṭiggahetabbo’’ti? Bhagavato etamatthaṃ ārocesuṃ. Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna 28 paṭiggahetabboti.
269. தேன கோ² பன ஸமயேன அஞ்ஞதரஸ்ஸ பி⁴க்கு²னோ க⁴ரதி³ன்னகாபா³தோ⁴ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸீதாலோளிங் பாயேதுந்தி.
269. Tena kho pana samayena aññatarassa bhikkhuno gharadinnakābādho hoti. Bhagavato etamatthaṃ ārocesuṃ. Anujānāmi, bhikkhave, sītāloḷiṃ pāyetunti.
தேன கோ² பன ஸமயேன அஞ்ஞதரோ பி⁴க்கு² து³ட்ட²க³ஹணிகோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஆமிஸகா²ரங் பாயேதுந்தி.
Tena kho pana samayena aññataro bhikkhu duṭṭhagahaṇiko hoti. Bhagavato etamatthaṃ ārocesuṃ. Anujānāmi, bhikkhave, āmisakhāraṃ pāyetunti.
தேன கோ² பன ஸமயேன அஞ்ஞதரஸ்ஸ பி⁴க்கு²னோ பண்டு³ரோகா³பா³தோ⁴ ஹோதி. ப⁴க³வதோ ஏதமத்த²ங் ஆரோசேஸுங் . அனுஜானாமி, பி⁴க்க²வே, முத்தஹரீதகங் பாயேதுந்தி.
Tena kho pana samayena aññatarassa bhikkhuno paṇḍurogābādho hoti. Bhagavato etamatthaṃ ārocesuṃ . Anujānāmi, bhikkhave, muttaharītakaṃ pāyetunti.
தேன கோ² பன ஸமயேன அஞ்ஞதரஸ்ஸ பி⁴க்கு²னோ ச²விதோ³ஸாபா³தோ⁴ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, க³ந்தா⁴லேபங் காதுந்தி.
Tena kho pana samayena aññatarassa bhikkhuno chavidosābādho hoti. Bhagavato etamatthaṃ ārocesuṃ. Anujānāmi, bhikkhave, gandhālepaṃ kātunti.
தேன கோ² பன ஸமயேன அஞ்ஞதரோ பி⁴க்கு² அபி⁴ஸன்னகாயோ ஹோதி. ப⁴க³வதோ ஏதமத்த²ங் ஆரோசேஸுங் . அனுஜானாமி, பி⁴க்க²வே, விரேசனங் பாதுந்தி. அச்ச²கஞ்ஜியா அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அச்ச²கஞ்ஜிந்தி. அகடயூஸேன அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அகடயூஸந்தி. கடாகடேன அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கடாகடந்தி. படிச்சா²த³னீயேன அத்தோ² ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, படிச்சா²த³னீயந்தி.
Tena kho pana samayena aññataro bhikkhu abhisannakāyo hoti. Bhagavato etamatthaṃ ārocesuṃ . Anujānāmi, bhikkhave, virecanaṃ pātunti. Acchakañjiyā attho hoti. Bhagavato etamatthaṃ ārocesuṃ. Anujānāmi, bhikkhave, acchakañjinti. Akaṭayūsena attho hoti. Bhagavato etamatthaṃ ārocesuṃ. Anujānāmi, bhikkhave, akaṭayūsanti. Kaṭākaṭena attho hoti. Bhagavato etamatthaṃ ārocesuṃ. Anujānāmi, bhikkhave, kaṭākaṭanti. Paṭicchādanīyena attho hoti. Bhagavato etamatthaṃ ārocesuṃ. Anujānāmi, bhikkhave, paṭicchādanīyanti.
மூலாதி³பே⁴ஸஜ்ஜகதா² நிட்டி²தா.
Mūlādibhesajjakathā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஞ்சபே⁴ஸஜ்ஜாதி³கதா² • Pañcabhesajjādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 161. மூலாதி³பே⁴ஸஜ்ஜகதா² • 161. Mūlādibhesajjakathā
