| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
161. மூலாதி³பே⁴ஸஜ்ஜகதா²
161. Mūlādibhesajjakathā
263. மூலபே⁴ஸஜ்ஜாதி³வினிச்ச²யோபீதி பிஸத்³தோ³ அச்ச²வஸந்திஆதீ³ஸு வினிச்ச²யங் அபெக்க²தி. இதா⁴தி பே⁴ஸஜ்ஜக்க²ந்த⁴கே. யங் யந்தி வினிச்ச²யங். பிஸனஸிலாதி பிஸதி எத்தா²தி பிஸனா, ஸாயேவ ஸிலாதி பிஸனஸிலா. இமினா அசலங் ஹுத்வா நிஸீத³தீதி நிஸதோ³தி அத்த²ங் த³ஸ்ஸேதி. பிஸனபோதகோதி பிஸதி அனேனாதி பிஸனோ, ஸோயேவ போதகோதி பிஸனபோதகோ, இமினா நிஸத³தோ போதகோதி நிஸத³போதகோதி அத்த²ங் த³ஸ்ஸேதி. ஹிங்கு³ஜாதியோதி ஹிங்கு³குலானி.
263.Mūlabhesajjādivinicchayopīti pisaddo acchavasantiādīsu vinicchayaṃ apekkhati. Idhāti bhesajjakkhandhake. Yaṃ yanti vinicchayaṃ. Pisanasilāti pisati etthāti pisanā, sāyeva silāti pisanasilā. Iminā acalaṃ hutvā nisīdatīti nisadoti atthaṃ dasseti. Pisanapotakoti pisati anenāti pisano, soyeva potakoti pisanapotako, iminā nisadato potakoti nisadapotakoti atthaṃ dasseti. Hiṅgujātiyoti hiṅgukulāni.
ஸாமுத்³த³ந்தி எத்த² ஸமுத்³தே³ ஸந்திட்ட²தீதி ஸாமுத்³த³ந்தி வசனத்த²ங் த³ஸ்ஸெந்தோ ஆஹ ‘‘ஸமுத்³த³தீரே’’திஆதி³. ‘‘தீரே’’தி இமினா ஸமுத்³தே³தி எத்த² ஸத்தமீவிப⁴த்தியா ஸமீபத்தே² பவத்தபா⁴வங் த³ஸ்ஸேதி. பகதிலோணந்தி ஸபா⁴வலோணங், ந த³ப்³ப³ஸம்பா⁴ரேஹி ஸத்³தி⁴ங் பசிதந்தி அத்தோ². ‘‘பப்³ப³தே உட்ட²ஹதீ’’தி இமினா ஸிந்து⁴னாமகே பப்³ப³தே உட்ட²ஹதீதி ஸிந்த⁴வந்தி அத்த²ங் த³ஸ்ஸேதி. உப்³பி³தோ பூ⁴மிதோ ஈரதி உக்³க³ச்ச²தீதி உப்³பி³ரந்தி வசனத்த²ங் த³ஸ்ஸெந்தோ ஆஹ ‘‘பூ⁴மிதோ அங்குரங் உட்ட²ஹதீ’’தி. இமினா அட்ட²கதா²னயேன ஒட்ட²ஜோ ததியக்க²ரோயேவ யுஜ்ஜதி, பொத்த²கேஸு பன சதுத்த²க்க²ரோயேவ தி³ஸ்ஸதி. ‘‘உப்³பி⁴த³’’ந்திபி பாடோ². பி³லந்தி கொட்டா²ஸோ. தஸ்மா த³ப்³ப³ஸம்பா⁴ரேஹி பி³லேஹி ஸத்³தி⁴ங் பசிதங் பி³லந்தி அத்த²ங் த³ஸ்ஸெந்தோ ஆஹ ‘‘த³ப்³ப³ஸம்பா⁴ரேஹி ஸத்³தி⁴ங் பசித’’ந்தி. அபி⁴தா⁴னே பன (அபி⁴தா⁴னே 461 கா³தா²யங்) ‘‘பி³லால’’ந்தி பாடோ² அத்தி². தந்தி பி³லங்.
Sāmuddanti ettha samudde santiṭṭhatīti sāmuddanti vacanatthaṃ dassento āha ‘‘samuddatīre’’tiādi. ‘‘Tīre’’ti iminā samuddeti ettha sattamīvibhattiyā samīpatthe pavattabhāvaṃ dasseti. Pakatiloṇanti sabhāvaloṇaṃ, na dabbasambhārehi saddhiṃ pacitanti attho. ‘‘Pabbate uṭṭhahatī’’ti iminā sindhunāmake pabbate uṭṭhahatīti sindhavanti atthaṃ dasseti. Ubbito bhūmito īrati uggacchatīti ubbiranti vacanatthaṃ dassento āha ‘‘bhūmito aṅkuraṃ uṭṭhahatī’’ti. Iminā aṭṭhakathānayena oṭṭhajo tatiyakkharoyeva yujjati, potthakesu pana catutthakkharoyeva dissati. ‘‘Ubbhida’’ntipi pāṭho. Bilanti koṭṭhāso. Tasmā dabbasambhārehi bilehi saddhiṃ pacitaṃ bilanti atthaṃ dassento āha ‘‘dabbasambhārehi saddhiṃ pacita’’nti. Abhidhāne pana (abhidhāne 461 gāthāyaṃ) ‘‘bilāla’’nti pāṭho atthi. Tanti bilaṃ.
264. அஸ்ஸாதீ³னங் காயக³ந்தோ⁴ விய கஸ்ஸசி காயக³ந்தோ⁴ ஹோதீதி யோஜனா. தஸ்ஸாபீதி பி⁴க்கு²னோபி. பிஸத்³தே³ன கண்டு³வாபா³த⁴பி⁴க்கு²ஆத³யோபி ஸம்பிண்டே³தி. ச²கணஸத்³த³ஸ்ஸ அஸ்ஸாதீ³னங் மலேபி பவத்தனதோ வுத்தங் ‘‘கோ³மய’’ந்தி. பாகதிகசுண்ணம்பீதி அபக்கரஜனசுண்ணம்பி. ஏதம்பீதி பாகதிகசுண்ணம்பி.
264. Assādīnaṃ kāyagandho viya kassaci kāyagandho hotīti yojanā. Tassāpīti bhikkhunopi. Pisaddena kaṇḍuvābādhabhikkhuādayopi sampiṇḍeti. Chakaṇasaddassa assādīnaṃ malepi pavattanato vuttaṃ ‘‘gomaya’’nti. Pākatikacuṇṇampīti apakkarajanacuṇṇampi. Etampīti pākatikacuṇṇampi.
தந்தி ஆமகமங்ஸங், ந கா²தீ³தி ஸம்ப³ந்தோ⁴. தந்தி ஆமகலோஹிதங் வா, ந பிவீதி ஸம்ப³ந்தோ⁴. அமனுஸ்ஸோதி மனுஸ்ஸஸதி³ஸோ பூ⁴தோ. தந்தி ஆமகமங்ஸலோஹிதங்.
Tanti āmakamaṃsaṃ, na khādīti sambandho. Tanti āmakalohitaṃ vā, na pivīti sambandho. Amanussoti manussasadiso bhūto. Tanti āmakamaṃsalohitaṃ.
265. ‘‘அஞ்ஜன’’ந்தி நாமங் ஸாமஞ்ஞந்தி ஆஹ ‘‘அஞ்ஜனந்தி ஸப்³ப³ஸங்கா³ஹகவசனமேத’’ந்தி. ஸப்³ப³ஸங்கா³ஹகவசனந்தி ஸப்³பே³ஸங் அஞ்ஜனானங் ஸங்கா³ஹகவசனங். ஏதந்தி ‘‘அஞ்ஜன’’ந்தி ஏதங் வசனங். அஞ்ஜதி சக்கு²ங் மக்கே²தி அனேனாதி அஞ்ஜனங், அஞ்ஜதி சக்கு²ங் ப்³யத்தங் கரோதீதி வா அஞ்ஜனங், தாலுஜோ ததியக்க²ரோ. கபல்லந்தி கபல்லே பவத்தங். கபாலஞ்ஹி தீ³பஸிகா²ய உபரி நிகுஜ்ஜித்வா தத்த² பவத்தங் மஸி ‘‘கபல்ல’’ந்தி வுச்சதி. தமத்த²ங் த³ஸ்ஸெந்தோ ஆஹ ‘‘தீ³பஸிக²தோ க³ஹிதமஸீ’’தி. அஞ்ஜனூபபிஸனேஹீதி எத்த² அஞ்ஜனேஹி ஸத்³தி⁴ங் உபனேதுங் பிஸிதப்³ப³ந்தி அஞ்ஜனூபபிஸனந்தி வசனத்த²ங் த³ஸ்ஸெந்தோ ஆஹ ‘‘அஞ்ஜனேன ஸத்³தி⁴ங் ஏகதோ பிஸிதேஹீ’’தி. ‘‘ஏகதோ’’தி இமினா ‘‘ஸத்³தி⁴’’ந்தி பத³ஸ்ஸேவ அத்த²ங் த³ஸ்ஸேதி. ஹீதி ஸச்சங். யங்கிஞ்சி அஞ்ஜனூபபிஸனங் சுண்ணங் ந ந வட்டதீதி யோஜனா. அத² வா ந வட்டதி ந ஹோதி, வட்டதியேவாதி யோஜனா. இமஸ்மிங் நயே ‘‘ந வட்டதீ’’தி ஆக்²யாதபத³ங் கிரியாந்தராபெக்க²த்தா கத்தா ஹோதி. ஆக்²யாதேஸுபி ஹி கத்துத்தஞ்ச கம்மத்தஞ்ச லப்³ப⁴தி. சந்த³னந்திஆதீ³னி ஸுவிஞ்ஞெய்யானேவ.
265.‘‘Añjana’’nti nāmaṃ sāmaññanti āha ‘‘añjananti sabbasaṅgāhakavacanameta’’nti. Sabbasaṅgāhakavacananti sabbesaṃ añjanānaṃ saṅgāhakavacanaṃ. Etanti ‘‘añjana’’nti etaṃ vacanaṃ. Añjati cakkhuṃ makkheti anenāti añjanaṃ, añjati cakkhuṃ byattaṃ karotīti vā añjanaṃ, tālujo tatiyakkharo. Kapallanti kapalle pavattaṃ. Kapālañhi dīpasikhāya upari nikujjitvā tattha pavattaṃ masi ‘‘kapalla’’nti vuccati. Tamatthaṃ dassento āha ‘‘dīpasikhato gahitamasī’’ti. Añjanūpapisanehīti ettha añjanehi saddhiṃ upanetuṃ pisitabbanti añjanūpapisananti vacanatthaṃ dassento āha ‘‘añjanena saddhiṃ ekato pisitehī’’ti. ‘‘Ekato’’ti iminā ‘‘saddhi’’nti padasseva atthaṃ dasseti. Hīti saccaṃ. Yaṃkiñci añjanūpapisanaṃ cuṇṇaṃ na na vaṭṭatīti yojanā. Atha vā na vaṭṭati na hoti, vaṭṭatiyevāti yojanā. Imasmiṃ naye ‘‘na vaṭṭatī’’ti ākhyātapadaṃ kiriyāntarāpekkhattā kattā hoti. Ākhyātesupi hi kattuttañca kammattañca labbhati. Candanantiādīni suviññeyyāneva.
அட்டி²மயந்தி பத³ஸ்ஸ அதிப்³யாபிததோ³ஸங் படிக்கி²பந்தோ ஆஹ ‘‘மனுஸ்ஸட்டி²ங் ட²பெத்வா’’தி. ஸலாகட்டா²னியந்தி எத்த² ஸலாகா திட்ட²ந்தி எத்தா²தி ஸலாகட்டா²னியந்தி வசனத்த²ங் த³ஸ்ஸெந்தோ ஆஹ ‘‘யத்தா²’’திஆதி³. தத்த² யத்தா²தி யஸ்மிங் ஸுஸிரத³ண்ட³காதி³கே. ஸலாகந்தி அஞ்ஜனிஸலாகங். ஓத³ஹந்தீதி ட²பெந்தி. அங்ஸப³த்³த⁴கோதி அங்ஸே ப³த்³த⁴தி அனேனாதி அங்ஸப³த்³த⁴கோ. யமகனத்து²கரணிந்தி நத்து² கரீயதி இமாயாதி நத்து²கரணீ, யமகா நத்து²கரணீ யமகனத்து²கரணீ.
Aṭṭhimayanti padassa atibyāpitadosaṃ paṭikkhipanto āha ‘‘manussaṭṭhiṃ ṭhapetvā’’ti. Salākaṭṭhāniyanti ettha salākā tiṭṭhanti etthāti salākaṭṭhāniyanti vacanatthaṃ dassento āha ‘‘yatthā’’tiādi. Tattha yatthāti yasmiṃ susiradaṇḍakādike. Salākanti añjanisalākaṃ. Odahantīti ṭhapenti. Aṃsabaddhakoti aṃse baddhati anenāti aṃsabaddhako. Yamakanatthukaraṇinti natthu karīyati imāyāti natthukaraṇī, yamakā natthukaraṇī yamakanatthukaraṇī.
267. தங் ஸப்³ப³ங் தேலபாகந்தி ஸம்ப³ந்தோ⁴. ‘‘அதி விய கி²த்தமஜ்ஜானீ’’தி இமினா அதி விய கி²பீயந்தி பக்கி²பீயந்தீதி அதிகி²த்தானி, தானியேவ மஜ்ஜானி அதிகி²த்தமஜ்ஜானீதி வசனத்த²ங் த³ஸ்ஸேதி.
267. Taṃ sabbaṃ telapākanti sambandho. ‘‘Ati viya khittamajjānī’’ti iminā ati viya khipīyanti pakkhipīyantīti atikhittāni, tāniyeva majjāni atikhittamajjānīti vacanatthaṃ dasseti.
பண்ணஸேத³ந்தி பண்ணேஹி ஸேத³ங். அங்கா³ரானந்தி அங்கா³ரேஹி. தத்தா²தி தேஸு பங்ஸுவாலிகாதீ³ஸு. வாதஹரணபண்ணானீதி வாதஸ்ஸ அபனயனானி உத்³தா³லாதீ³னி பண்ணானி. தத்தா²தி தேஸு பண்ணேஸு. நானாபண்ணப⁴ங்க³குதி²தந்தி நானாபண்ணானியேவ ப⁴ஞ்ஜிதப்³ப³ட்டே²ன நானாபண்ணப⁴ங்க³ங், தேன குதி²தங் நானாபண்ணப⁴ங்க³குதி²தங். உண்ஹோத³கஸ்ஸாதி உண்ஹோத³கேன. தத்தா²தி உத³ககொட்ட²கே.
Paṇṇasedanti paṇṇehi sedaṃ. Aṅgārānanti aṅgārehi. Tatthāti tesu paṃsuvālikādīsu. Vātaharaṇapaṇṇānīti vātassa apanayanāni uddālādīni paṇṇāni. Tatthāti tesu paṇṇesu. Nānāpaṇṇabhaṅgakuthitanti nānāpaṇṇāniyeva bhañjitabbaṭṭhena nānāpaṇṇabhaṅgaṃ, tena kuthitaṃ nānāpaṇṇabhaṅgakuthitaṃ. Uṇhodakassāti uṇhodakena. Tatthāti udakakoṭṭhake.
பப்³பே³ பப்³பே³தி ப²ளும்ஹி ப²ளும்ஹி. யேனாதி பஜ்ஜேன. தங் பஜ்ஜங் அபி⁴ஸங்க²ரிதுந்தி யோஜனா. ‘‘பாதா³னங் ஸப்பாயபே⁴ஸஜ்ஜ’’ந்தி இமினா பாத³ஸ்ஸ ஹிதங் பஜ்ஜந்தி வசனத்த²ங் த³ஸ்ஸேதி. திலகக்கேனாதி எத்த² கக்கஸத்³த³ஸ்ஸ சுண்ணவாசகத்தா ‘‘பிட்டே²ஹீ’’தி வுத்தங். கப³ளேன பக்கி²பனங் கப³ளிகங். ஸத்துபிண்ட³ஸ்ஸ ப⁴த்தகப³ளஸதி³ஸத்தா ஸத்துபிண்ட³ந்தி வுத்தங். ஆணி வியாதி கீ²லா விய. கா²ரேனாதி லோணஸக்க²ரிகமயேன கா²ரேன. விகாஸங் ருந்த⁴தீதி விகாஸிகங், தேலருந்த⁴னபிலோதிகங். வணகம்மந்தி வணஸ்ஸ, வணே வா கம்மங்.
Pabbe pabbeti phaḷumhi phaḷumhi. Yenāti pajjena. Taṃ pajjaṃ abhisaṅkharitunti yojanā. ‘‘Pādānaṃ sappāyabhesajja’’nti iminā pādassa hitaṃ pajjanti vacanatthaṃ dasseti. Tilakakkenāti ettha kakkasaddassa cuṇṇavācakattā ‘‘piṭṭhehī’’ti vuttaṃ. Kabaḷena pakkhipanaṃ kabaḷikaṃ. Sattupiṇḍassa bhattakabaḷasadisattā sattupiṇḍanti vuttaṃ. Āṇi viyāti khīlā viya. Khārenāti loṇasakkharikamayena khārena. Vikāsaṃ rundhatīti vikāsikaṃ, telarundhanapilotikaṃ. Vaṇakammanti vaṇassa, vaṇe vā kammaṃ.
268. ஸப்பத³ட்ட²காலேயேவ கிங் ஸாமங் க³ஹெத்வா பரிபு⁴ஞ்ஜிதப்³ப³ந்தி ஆஹ ‘‘ந கேவல’’ந்திஆதி³. இத³ந்தி மஹாவிகடங், பரிபு⁴ஞ்ஜீகப்³ப³ந்தி ஸம்ப³ந்தோ⁴ . அஞ்ஞேஸு பனாதி ஸப்பத³ட்ட²தோ அஞ்ஞேஸு பன. ஸசே பூ⁴மிபத்தோ கூ³தோ² ஹோதி, படிக்³க³ஹேதப்³போ³தி யோஜனா.
268. Sappadaṭṭhakāleyeva kiṃ sāmaṃ gahetvā paribhuñjitabbanti āha ‘‘na kevala’’ntiādi. Idanti mahāvikaṭaṃ, paribhuñjīkabbanti sambandho . Aññesu panāti sappadaṭṭhato aññesu pana. Sace bhūmipatto gūtho hoti, paṭiggahetabboti yojanā.
269. வஸீகரணபானகஸமுட்டி²தரோகோ³தி கந்திபா⁴வஸங்கா²தங் வஸங் கரோதி அனேனாதி வஸீகரணங், பே⁴ஸஜ்ஜங், பிவதே பானங், தங்யேவ பானகங், வஸீகரணஸ்ஸ பானகங் வஸீகரணபானகங், தேன ஸமுட்டி²தோ ரோகோ³ வஸீகரணபானகஸமுட்டி²தரோகோ³. இமினா க⁴ரதி³ன்னகாபா³தோ⁴தி எத்த² க⁴ரணியா தி³ன்னேன வஸீகரணபானகேன ஸமுட்டி²தோ ஆபா³தோ⁴ க⁴ரதி³ன்னகாபா³தோ⁴தி வசனத்த²ங் த³ஸ்ஸேதி. ஸீதாய ஆலோளேதப்³ப³ந்தி ஸீதாலோளங், உத³கங். ஸீதாஸத்³தோ³ நங்க³லலேகா²ஸங்கா²தங் பா²லபத்³த⁴திங் முக்²யதோ வத³தி, பா²லபத்³த⁴திகரே பா²லே லக்³க³மத்திகங் உபசாரதோ வத³தி. தேன வுத்தங் ‘‘ஸீதாய ஆலோளேதப்³ப³’’ந்தி. அட்ட²கதா²யம்பி தமத்த²ங் த³ஸ்ஸெந்தோ ஆஹ ‘‘நங்க³லேனா’’திஆதி³.
269.Vasīkaraṇapānakasamuṭṭhitarogoti kantibhāvasaṅkhātaṃ vasaṃ karoti anenāti vasīkaraṇaṃ, bhesajjaṃ, pivate pānaṃ, taṃyeva pānakaṃ, vasīkaraṇassa pānakaṃ vasīkaraṇapānakaṃ, tena samuṭṭhito rogo vasīkaraṇapānakasamuṭṭhitarogo. Iminā gharadinnakābādhoti ettha gharaṇiyā dinnena vasīkaraṇapānakena samuṭṭhito ābādho gharadinnakābādhoti vacanatthaṃ dasseti. Sītāya āloḷetabbanti sītāloḷaṃ, udakaṃ. Sītāsaddo naṅgalalekhāsaṅkhātaṃ phālapaddhatiṃ mukhyato vadati, phālapaddhatikare phāle laggamattikaṃ upacārato vadati. Tena vuttaṃ ‘‘sītāya āloḷetabba’’nti. Aṭṭhakathāyampi tamatthaṃ dassento āha ‘‘naṅgalenā’’tiādi.
விபக்கக³ஹணிகோதி விஸேஸேன பாசாபனக³ஹணிகோ. முத்தஹரீதகந்தி எத்த² ‘‘முத்த’’ந்தி ஸாமஞ்ஞதோ வுத்தேபி கோ³முத்தமேவ க³ஹேதப்³ப³ந்தி த³ஸ்ஸெந்தோ ஆஹ ‘‘கோ³முத்தபரிபா⁴விதங் ஹரீதக’’ந்தி. இமினா முத்தேன பரிபா⁴விதங் ஹரீதகங் முத்தஹரீதகந்தி வசனத்த²ங் த³ஸ்ஸேதி. தண்டு³லகஸடோதி தண்டு³லதோ⁴வனோத³ககஸடோ தோ⁴தஸினித்³தோ⁴, ஸோவ முக்³க³பசிதபானீயோதி யோஜனா. ‘‘மங்ஸரஸேனா’’தி இமினா மங்ஸரஸோ மங்ஸேன படிச்சா²தே³தப்³ப³ந்தி படிச்சா²த³னீயந்தி வுச்சதீதி த³ஸ்ஸேதி.
Vipakkagahaṇikoti visesena pācāpanagahaṇiko. Muttaharītakanti ettha ‘‘mutta’’nti sāmaññato vuttepi gomuttameva gahetabbanti dassento āha ‘‘gomuttaparibhāvitaṃ harītaka’’nti. Iminā muttena paribhāvitaṃ harītakaṃ muttaharītakanti vacanatthaṃ dasseti. Taṇḍulakasaṭoti taṇḍuladhovanodakakasaṭo dhotasiniddho, sova muggapacitapānīyoti yojanā. ‘‘Maṃsarasenā’’ti iminā maṃsaraso maṃsena paṭicchādetabbanti paṭicchādanīyanti vuccatīti dasseti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 161. மூலாதி³பே⁴ஸஜ்ஜகதா² • 161. Mūlādibhesajjakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஞ்சபே⁴ஸஜ்ஜாதி³கதா² • Pañcabhesajjādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
