| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৬১. মূলাদিভেসজ্জকথা
161. Mūlādibhesajjakathā
২৬৩. তেন খো পন সমযেন গিলানানং ভিক্খূনং মূলেহি ভেসজ্জেহি অত্থো হোতি। ভগৰতো এতমত্থং আরোচেসুং। অনুজানামি , ভিক্খৰে, মূলানি ভেসজ্জানি – হলিদ্দিং, সিঙ্গিৰেরং, ৰচং, ৰচত্থং 1, অতিৰিসং, কটুকরোহিণিং, উসীরং, ভদ্দমুত্তকং, যানি ৰা পনঞ্ঞানিপি অত্থি মূলানি ভেসজ্জানি, নেৰ খাদনীযে খাদনীযত্থং ফরন্তি, ন ভোজনীযে ভোজনীযত্থং ফরন্তি, তানি – পটিগ্গহেত্ৰা যাৰজীৰং পরিহরিতুং; সতি পচ্চযে পরিভুঞ্জিতুং। অসতি পচ্চযে পরিভুঞ্জন্তস্স আপত্তি দুক্কটস্সাতি।
263. Tena kho pana samayena gilānānaṃ bhikkhūnaṃ mūlehi bhesajjehi attho hoti. Bhagavato etamatthaṃ ārocesuṃ. Anujānāmi , bhikkhave, mūlāni bhesajjāni – haliddiṃ, siṅgiveraṃ, vacaṃ, vacatthaṃ 2, ativisaṃ, kaṭukarohiṇiṃ, usīraṃ, bhaddamuttakaṃ, yāni vā panaññānipi atthi mūlāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
তেন খো পন সমযেন গিলানানং ভিক্খূনং মূলেহি ভেসজ্জেহি পিট্ঠেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, নিসদং নিসদপোতকন্তি।
Tena kho pana samayena gilānānaṃ bhikkhūnaṃ mūlehi bhesajjehi piṭṭhehi attho hoti. Bhagavato etamatthaṃ ārocesuṃ. Anujānāmi, bhikkhave, nisadaṃ nisadapotakanti.
তেন খো পন সমযেন গিলানানং ভিক্খূনং কসাৰেহি ভেসজ্জেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, কসাৰানি 3 ভেসজ্জানি – নিম্বকসাৰং, কুটজকসাৰং, পটোলকসাৰং, ফগ্গৰকসাৰং, নত্তমালকসাৰং, যানি ৰা পনঞ্ঞানিপি অত্থি কসাৰানি ভেসজ্জানি নেৰ খাদনীযে খাদনীযত্থং ফরন্তি, ন ভোজনীযে ভোজনীযত্থং ফরন্তি, তানি – পটিগ্গহেত্ৰা যাৰজীৰং পরিহরিতুং; সতি পচ্চযে পরিভুঞ্জিতুং। অসতি পচ্চযে পরিভুঞ্জন্তস্স আপত্তি দুক্কটস্সাতি।
Tena kho pana samayena gilānānaṃ bhikkhūnaṃ kasāvehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, kasāvāni 4 bhesajjāni – nimbakasāvaṃ, kuṭajakasāvaṃ, paṭolakasāvaṃ, phaggavakasāvaṃ, nattamālakasāvaṃ, yāni vā panaññānipi atthi kasāvāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
তেন খো পন সমযেন গিলানানং ভিক্খূনং পণ্ণেহি ভেসজ্জেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে , পণ্ণানি ভেসজ্জানি – নিম্বপণ্ণং, কুটজপণ্ণং, পটোলপণ্ণং, সুলসিপণ্ণং, কপ্পাসপণ্ণং, যানি ৰা পনঞ্ঞানিপি অত্থি পণ্ণানি ভেসজ্জানি, নেৰ খাদনীযে খাদনীযত্থং ফরন্তি, ন ভোজনীযে ভোজনীযত্থং ফরন্তি…পে॰…।
Tena kho pana samayena gilānānaṃ bhikkhūnaṃ paṇṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave , paṇṇāni bhesajjāni – nimbapaṇṇaṃ, kuṭajapaṇṇaṃ, paṭolapaṇṇaṃ, sulasipaṇṇaṃ, kappāsapaṇṇaṃ, yāni vā panaññānipi atthi paṇṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
তেন খো পন সমযেন গিলানানং ভিক্খূনং ফলেহি ভেসজ্জেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, ফলানি ভেসজ্জানি – বিলঙ্গং, পিপ্পলিং, মরিচং, হরীতকং, ৰিভীতকং, আমলকং, গোট্ঠফলং 5, যানি ৰা পনঞ্ঞানিপি অত্থি ফলানি ভেসজ্জানি, নেৰ খাদনীযে খাদনীযত্থং ফরন্তি, ন ভোজনীযে ভোজনীযত্থং ফরন্তি…পে॰…।
Tena kho pana samayena gilānānaṃ bhikkhūnaṃ phalehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, phalāni bhesajjāni – bilaṅgaṃ, pippaliṃ, maricaṃ, harītakaṃ, vibhītakaṃ, āmalakaṃ, goṭṭhaphalaṃ 6, yāni vā panaññānipi atthi phalāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
তেন খো পন সমযেন গিলানানং ভিক্খূনং জতূহি ভেসজ্জেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, জতূনি ভেসজ্জানি – হিঙ্গুং, হিঙ্গুজতুং, হিঙ্গুসিপাটিকং, তকং, তকপত্তিং, তকপণ্ণিং , সজ্জুলসং, যানি ৰা পনঞ্ঞানিপি অত্থি জতূনি ভেসজ্জানি, নেৰ খাদনীযে খাদনীযত্থং ফরন্তি…পে॰…।
Tena kho pana samayena gilānānaṃ bhikkhūnaṃ jatūhi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, jatūni bhesajjāni – hiṅguṃ, hiṅgujatuṃ, hiṅgusipāṭikaṃ, takaṃ, takapattiṃ, takapaṇṇiṃ , sajjulasaṃ, yāni vā panaññānipi atthi jatūni bhesajjāni, neva khādanīye khādanīyatthaṃ pharanti…pe….
তেন খো পন সমযেন গিলানানং ভিক্খূনং লোণেহি ভেসজ্জেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, লোণানি ভেসজ্জানি – সামুদ্দং, কাল়লোণং, সিন্ধৰং, উব্ভিদং 7, বিলং 8, যানি ৰা পনঞ্ঞানিপি অত্থি লোণানি ভেসজ্জানি, নেৰ খাদনীযে খাদনীযত্থং ফরন্তি, ন ভোজনীযে ভোজনীযত্থং ফরন্তি, তানি – পটিগ্গহেত্ৰা যাৰজীৰং পরিহরিতুং; সতি পচ্চযে পরিভুঞ্জিতুং। অসতি পচ্চযে পরিভুঞ্জন্তস্স আপত্তি দুক্কটস্সাতি।
Tena kho pana samayena gilānānaṃ bhikkhūnaṃ loṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, loṇāni bhesajjāni – sāmuddaṃ, kāḷaloṇaṃ, sindhavaṃ, ubbhidaṃ 9, bilaṃ 10, yāni vā panaññānipi atthi loṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
২৬৪. তেন খো পন সমযেন আযস্মতো আনন্দস্স উপজ্ঝাযস্স আযস্মতো বেলট্ঠসীসস্স থুল্লকচ্ছাবাধো হোতি। তস্স লসিকায চীৰরানি কাযে লগ্গন্তি, তানি ভিক্খূ উদকেন তেমেত্ৰা তেমেত্ৰা অপকড্ঢন্তি। অদ্দসা খো ভগৰা সেনাসনচারিকং আহিণ্ডন্তো তে ভিক্খূ তানি চীৰরানি উদকেন তেমেত্ৰা তেমেত্ৰা অপকড্ঢন্তে, দিস্ৰান যেন তে ভিক্খূ তেনুপসঙ্কমি, উপসঙ্কমিত্ৰা তে ভিক্খূ এতদৰোচ – ‘‘কিং ইমস্স, ভিক্খৰে, ভিক্খুনো আবাধো’’তি? ‘‘ইমস্স, ভন্তে, আযস্মতো থুল্লকচ্ছাবাধো, লসিকায চীৰরানি কাযে লগ্গন্তি, তানি মযং উদকেন তেমেত্ৰা তেমেত্ৰা অপকড্ঢামা’’তি । অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, যস্স কণ্ডু ৰা, পিল়কা ৰা, অস্সাৰো ৰা, থুল্লকচ্ছু ৰা আবাধো, কাযো ৰা দুগ্গন্ধো, চুণ্ণানি ভেসজ্জানি; অগিলানস্স ছকণং মত্তিকং রজননিপ্পক্কং। অনুজানামি, ভিক্খৰে, উদুক্খলং মুসল’’ন্তি।
264. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti, tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho, lasikāya cīvarāni kāye lagganti, tāni mayaṃ udakena temetvā temetvā apakaḍḍhāmā’’ti . Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā, piḷakā vā, assāvo vā, thullakacchu vā ābādho, kāyo vā duggandho, cuṇṇāni bhesajjāni; agilānassa chakaṇaṃ mattikaṃ rajananippakkaṃ. Anujānāmi, bhikkhave, udukkhalaṃ musala’’nti.
তেন খো পন সমযেন গিলানানং ভিক্খূনং চুণ্ণেহি ভেসজ্জেহি চালিতেহি অত্থো হোতি । ভগৰতো এতমত্থং আরোচেসুং। অনুজানামি, ভিক্খৰে, চুণ্ণচালিনিন্তি। সণ্হেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, দুস্সচালিনিন্তি।
Tena kho pana samayena gilānānaṃ bhikkhūnaṃ cuṇṇehi bhesajjehi cālitehi attho hoti . Bhagavato etamatthaṃ ārocesuṃ. Anujānāmi, bhikkhave, cuṇṇacālininti. Saṇhehi attho hoti. Bhagavato etamatthaṃ ārocesuṃ. Anujānāmi, bhikkhave, dussacālininti.
তেন খো পন সমযেন অঞ্ঞতরস্স ভিক্খুনো অমনুস্সিকাবাধো হোতি। তং আচরিযুপজ্ঝাযা উপট্ঠহন্তা নাসক্খিংসু অরোগং কাতুং। সো সূকরসূনং গন্ত্ৰা আমকমংসং খাদি, আমকলোহিতং পিৰি । তস্স সো অমনুস্সিকাবাধো পটিপ্পস্সম্ভি। ভগৰতো এতমত্থং আরোচেসুং । অনুজানামি, ভিক্খৰে, অমনুস্সিকাবাধে আমকমংসং আমকলোহিতন্তি।
Tena kho pana samayena aññatarassa bhikkhuno amanussikābādho hoti. Taṃ ācariyupajjhāyā upaṭṭhahantā nāsakkhiṃsu arogaṃ kātuṃ. So sūkarasūnaṃ gantvā āmakamaṃsaṃ khādi, āmakalohitaṃ pivi . Tassa so amanussikābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, amanussikābādhe āmakamaṃsaṃ āmakalohitanti.
২৬৫. তেন খো পন সমযেন অঞ্ঞতরস্স ভিক্খুনো চক্খুরোগাবাধো হোতি। তং ভিক্খূ পরিগ্গহেত্ৰা উচ্চারম্পি পস্সাৰম্পি নিক্খামেন্তি। অদ্দসা খো ভগৰা সেনাসনচারিকং আহিণ্ডন্তো তে ভিক্খূ তং ভিক্খুং পরিগ্গহেত্ৰা উচ্চারম্পি পস্সাৰম্পি নিক্খামেন্তে, দিস্ৰান যেন তে ভিক্খূ তেনুপসঙ্কমি, উপসঙ্কমিত্ৰা তে ভিক্খূ এতদৰোচ – ‘‘কিং ইমস্স, ভিক্খৰে, ভিক্খুনো আবাধো’’তি? ‘‘ইমস্স, ভন্তে, আযস্মতো চক্খুরোগাবাধো। ইমং মযং পরিগ্গহেত্ৰা উচ্চারম্পি পস্সাৰম্পি নিক্খামেমা’’তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, অঞ্জনং – কাল়ঞ্জনং, রসঞ্জনং, সোতঞ্জনং, গেরুকং, কপল্ল’’ন্তি। অঞ্জনূপপিসনেহি অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, চন্দনং, তগরং, কাল়ানুসারিযং, তালীসং, ভদ্দমুত্তকন্তি। তেন খো পন সমযেন ভিক্খূ পিট্ঠানি অঞ্জনানি চরুকেসুপি 11 সরাৰকেসুপি নিক্খিপন্তি; তিণচুণ্ণেহিপি পংসুকেহিপি ওকিরিযন্তি। ভগৰতো এতমত্থং আরোচেসুং। অনুজানামি, ভিক্খৰে, অঞ্জনিন্তি।
265. Tena kho pana samayena aññatarassa bhikkhuno cakkhurogābādho hoti. Taṃ bhikkhū pariggahetvā uccārampi passāvampi nikkhāmenti. Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ pariggahetvā uccārampi passāvampi nikkhāmente, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato cakkhurogābādho. Imaṃ mayaṃ pariggahetvā uccārampi passāvampi nikkhāmemā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, añjanaṃ – kāḷañjanaṃ, rasañjanaṃ, sotañjanaṃ, gerukaṃ, kapalla’’nti. Añjanūpapisanehi attho hoti. Bhagavato etamatthaṃ ārocesuṃ. Anujānāmi, bhikkhave, candanaṃ, tagaraṃ, kāḷānusāriyaṃ, tālīsaṃ, bhaddamuttakanti. Tena kho pana samayena bhikkhū piṭṭhāni añjanāni carukesupi 12 sarāvakesupi nikkhipanti; tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, añjaninti.
তেন খো পন সমযেন ছব্বগ্গিযা ভিক্খূ উচ্চাৰচা অঞ্জনিযো ধারেন্তি – সোৰণ্ণমযং, রূপিযমযং। মনুস্সা উজ্ঝাযন্তি খিয্যন্তি ৰিপাচেন্তি – ‘‘সেয্যথাপি গিহী কামভোগিনো’’তি। ভগৰতো এতমত্থং আরোচেসুং। ন, ভিক্খৰে, উচ্চাৰচা অঞ্জনী ধারেতব্বা। যো ধারেয্য, আপত্তি দুক্কটস্স। অনুজানামি, ভিক্খৰে, অট্ঠিমযং, দন্তমযং, ৰিসাণমযং, নল়মযং, ৰেল়ুমযং, কট্ঠমযং, জতুমযং, ফলমযং, লোহমযং, সঙ্খনাভিমযন্তি।
Tena kho pana samayena chabbaggiyā bhikkhū uccāvacā añjaniyo dhārenti – sovaṇṇamayaṃ, rūpiyamayaṃ. Manussā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ, dantamayaṃ, visāṇamayaṃ, naḷamayaṃ, veḷumayaṃ, kaṭṭhamayaṃ, jatumayaṃ, phalamayaṃ, lohamayaṃ, saṅkhanābhimayanti.
তেন খো পন সমযেন অঞ্জনিযো অপারুতা হোন্তি, তিণচুণ্ণেহিপি পংসুকেহিপি ওকিরিযন্তি। ভগৰতো এতমত্থং আরোচেসুং। অনুজানামি, ভিক্খৰে, অপিধানন্তি। অপিধানং নিপততি । ভগৰতো এতমত্থং আরোচেসুং। অনুজানামি, ভিক্খৰে, সুত্তকেন বন্ধিত্ৰা অঞ্জনিযা বন্ধিতুন্তি। অঞ্জনী ফলতি 13। ভগৰতো এতমত্থং আরোচেসুং। অনুজানামি, ভিক্খৰে, সুত্তকেন সিব্বেতুন্তি।
Tena kho pana samayena añjaniyo apārutā honti, tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, apidhānanti. Apidhānaṃ nipatati . Bhagavato etamatthaṃ ārocesuṃ. Anujānāmi, bhikkhave, suttakena bandhitvā añjaniyā bandhitunti. Añjanī phalati 14. Bhagavato etamatthaṃ ārocesuṃ. Anujānāmi, bhikkhave, suttakena sibbetunti.
তেন খো পন সমযেন ভিক্খূ অঙ্গুলিযা অঞ্জন্তি, অক্খীনি দুক্খানি হোন্তি। ভগৰতো এতমত্থং আরোচেসুং। অনুজানামি, ভিক্খৰে, অঞ্জনিসলাকন্তি।
Tena kho pana samayena bhikkhū aṅguliyā añjanti, akkhīni dukkhāni honti. Bhagavato etamatthaṃ ārocesuṃ. Anujānāmi, bhikkhave, añjanisalākanti.
তেন খো পন সমযেন ছব্বগ্গিযা ভিক্খূ উচ্চাৰচা অঞ্জনিসলাকাযো ধারেন্তি – সোৰণ্ণমযং রূপিযমযং। মনুস্সা উজ্ঝাযন্তি খিয্যন্তি ৰিপাচেন্তি, ‘‘সেয্যথাপি গিহী কামভোগিনো’’তি। ভগৰতো এতমত্থং আরোচেসুং। ন, ভিক্খৰে, উচ্চাৰচা অঞ্জনিসলাকা ধারেতব্বা। যো ধারেয্য, আপত্তি দুক্কটস্স। অনুজানামি, ভিক্খৰে, অট্ঠিমযং…পে॰… সঙ্খনাভিমযন্তি।
Tena kho pana samayena chabbaggiyā bhikkhū uccāvacā añjanisalākāyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanisalākā dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
তেন খো পন সমযেন অঞ্জনিসলাকা ভূমিযং পতিতা ফরুসা হোতি। ভগৰতো এতমত্থং আরোচেসুং । অনুজানামি, ভিক্খৰে, সলাকঠানিযন্তি 15।
Tena kho pana samayena añjanisalākā bhūmiyaṃ patitā pharusā hoti. Bhagavato etamatthaṃ ārocesuṃ . Anujānāmi, bhikkhave, salākaṭhāniyanti 16.
তেন খো পন সমযেন ভিক্খূ অঞ্জনিম্পি অঞ্জনিসলাকম্পি হত্থেন পরিহরন্তি। ভগৰতো এতমত্থং আরোচেসুং। অনুজানামি, ভিক্খৰে, অঞ্জনিত্থৰিকন্তি। অংসবদ্ধকো ন হোতি। ভগৰতো এতমত্থং আরোচেসুং। অনুজানামি, ভিক্খৰে, অংসবদ্ধকং বন্ধনসুত্তকন্তি।
Tena kho pana samayena bhikkhū añjanimpi añjanisalākampi hatthena pariharanti. Bhagavato etamatthaṃ ārocesuṃ. Anujānāmi, bhikkhave, añjanitthavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
২৬৬. তেন খো পন সমযেন আযস্মতো পিলিন্দৰচ্ছস্স সীসাভিতাপো হোতি। ভগৰতো এতমত্থং আরোচেসুং। অনুজানামি, ভিক্খৰে, মুদ্ধনি তেলকন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, নত্থুকম্মন্তি। নত্থু গলতি। ভগৰতো এতমত্থং আরোচেসুং। অনুজানামি, ভিক্খৰে, নত্থুকরণিন্তি।
266. Tena kho pana samayena āyasmato pilindavacchassa sīsābhitāpo hoti. Bhagavato etamatthaṃ ārocesuṃ. Anujānāmi, bhikkhave, muddhani telakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, natthukammanti. Natthu galati. Bhagavato etamatthaṃ ārocesuṃ. Anujānāmi, bhikkhave, natthukaraṇinti.
তেন খো পন সমযেন ছব্বগ্গিযা ভিক্খূ উচ্চাৰচা নত্থুকরণিযো ধারেন্তি – সোৰণ্ণমযং রূপিযমযং। মনুস্সা উজ্ঝাযন্তি খিয্যন্তি ৰিপাচেন্তি, ‘‘সেয্যথাপি গিহী কামভোগিনো’’তি। ভগৰতো এতমত্থং আরোচেসুং। ন, ভিক্খৰে, উচ্চাৰচা নত্থুকরণী ধারেতব্বা। যো ধারেয্য, আপত্তি দুক্কটস্স। অনুজানামি, ভিক্খৰে, অট্ঠিমযং…পে॰… সঙ্খনাভিমযন্তি। নত্থুং ৰিসমং আসিঞ্চন্তি 17। ভগৰতো এতমত্থং আরোচেসুং। অনুজানামি, ভিক্খৰে , যমকনত্থুকরণিন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, ধূমং পাতুন্তি। তঞ্ঞেৰ ৰট্টিং আলিম্পেত্ৰা পিৰন্তি , কণ্ঠো দহতি। ভগৰতো এতমত্থং আরোচেসুং। অনুজানামি, ভিক্খৰে, ধূমনেত্তন্তি।
Tena kho pana samayena chabbaggiyā bhikkhū uccāvacā natthukaraṇiyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā natthukaraṇī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti. Natthuṃ visamaṃ āsiñcanti 18. Bhagavato etamatthaṃ ārocesuṃ. Anujānāmi, bhikkhave , yamakanatthukaraṇinti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, dhūmaṃ pātunti. Taññeva vaṭṭiṃ ālimpetvā pivanti , kaṇṭho dahati. Bhagavato etamatthaṃ ārocesuṃ. Anujānāmi, bhikkhave, dhūmanettanti.
তেন খো পন সমযেন ছব্বগ্গিযা ভিক্খূ উচ্চাৰচানি ধূমনেত্তানি ধারেন্তি – সোৰণ্ণমযং রূপিযমযং। মনুস্সা উজ্ঝাযন্তি খিয্যন্তি ৰিপাচেন্তি – সেয্যথাপি গিহী কামভোগিনোতি। ভগৰতো এতমত্থং আরোচেসুং। ন, ভিক্খৰে, উচ্চাৰচানি ধূমনেত্তানি ধারেতব্বানি। যো ধারেয্য, আপত্তি দুক্কটস্স। অনুজানামি, ভিক্খৰে, অট্ঠিমযং…পে॰… সঙ্খনাভিমযন্তি।
Tena kho pana samayena chabbaggiyā bhikkhū uccāvacāni dhūmanettāni dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti – seyyathāpi gihī kāmabhoginoti. Bhagavato etamatthaṃ ārocesuṃ. Na, bhikkhave, uccāvacāni dhūmanettāni dhāretabbāni. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
তেন খো পন সমযেন ধূমনেত্তানি অপারুতানি হোন্তি, পাণকা পৰিসন্তি। ভগৰতো এতমত্থং আরোচেসুং। অনুজানামি, ভিক্খৰে, অপিধানন্তি।
Tena kho pana samayena dhūmanettāni apārutāni honti, pāṇakā pavisanti. Bhagavato etamatthaṃ ārocesuṃ. Anujānāmi, bhikkhave, apidhānanti.
তেন খো পন সমযেন ভিক্খূ ধূমনেত্তানি হত্থেন পরিহরন্তি। ভগৰতো এতমত্থং আরোচেসুং। অনুজানামি, ভিক্খৰে, ধূমনেত্তথৰিকন্তি। একতো ঘংসিযন্তি। ভগৰতো এতমত্থং আরোচেসুং। অনুজানামি, ভিক্খৰে, যমকথৰিকন্তি। অংসবদ্ধকো ন হোতি। ভগৰতো এতমত্থং আরোচেসুং। অনুজানামি, ভিক্খৰে, অংসবদ্ধকং বন্ধনসুত্তকন্তি।
Tena kho pana samayena bhikkhū dhūmanettāni hatthena pariharanti. Bhagavato etamatthaṃ ārocesuṃ. Anujānāmi, bhikkhave, dhūmanettathavikanti. Ekato ghaṃsiyanti. Bhagavato etamatthaṃ ārocesuṃ. Anujānāmi, bhikkhave, yamakathavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
২৬৭. তেন খো পন সমযেন আযস্মতো পিলিন্দৰচ্ছস্স ৰাতাবাধো হোতি। ৰেজ্জা এৰমাহংসু – ‘‘তেলং পচিতব্ব’’ন্তি। ভগৰতো এতমত্থং আরোচেসুং। অনুজানামি, ভিক্খৰে, তেলপাকন্তি। তস্মিং খো পন তেলপাকে মজ্জং পক্খিপিতব্বং হোতি। ভগৰতো এতমত্থং আরোচেসুং। অনুজানামি, ভিক্খৰে, তেলপাকে মজ্জং পক্খিপিতুন্তি।
267. Tena kho pana samayena āyasmato pilindavacchassa vātābādho hoti. Vejjā evamāhaṃsu – ‘‘telaṃ pacitabba’’nti. Bhagavato etamatthaṃ ārocesuṃ. Anujānāmi, bhikkhave, telapākanti. Tasmiṃ kho pana telapāke majjaṃ pakkhipitabbaṃ hoti. Bhagavato etamatthaṃ ārocesuṃ. Anujānāmi, bhikkhave, telapāke majjaṃ pakkhipitunti.
তেন খো পন সমযেন ছব্বগ্গিযা ভিক্খূ অতিপক্খিত্তমজ্জানি 19 তেলানি পচন্তি, তানি পিৰিত্ৰা মজ্জন্তি। ভগৰতো এতমত্থং আরোচেসুং। ন, ভিক্খৰে, অতিপক্খিত্তমজ্জং তেলং পাতব্বং। যো পিৰেয্য, যথাধম্মো কারেতব্বো। অনুজানামি, ভিক্খৰে, যস্মিং তেলপাকে মজ্জস্স ন ৰণ্ণো ন গন্ধো ন রসো পঞ্ঞাযতি, এৰরূপং মজ্জপক্খিত্তং তেলং পাতুন্তি।
Tena kho pana samayena chabbaggiyā bhikkhū atipakkhittamajjāni 20 telāni pacanti, tāni pivitvā majjanti. Bhagavato etamatthaṃ ārocesuṃ. Na, bhikkhave, atipakkhittamajjaṃ telaṃ pātabbaṃ. Yo piveyya, yathādhammo kāretabbo. Anujānāmi, bhikkhave, yasmiṃ telapāke majjassa na vaṇṇo na gandho na raso paññāyati, evarūpaṃ majjapakkhittaṃ telaṃ pātunti.
তেন খো পন সমযেন ভিক্খূনং বহুং অতিপক্খিত্তমজ্জং তেলং পক্কং হোতি। অথ খো ভিক্খূনং এতদহোসি – ‘‘কথং নু খো অতিপক্খিত্তমজ্জে তেলে পটিপজ্জিতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, অব্ভঞ্জনং অধিট্ঠাতুন্তি।
Tena kho pana samayena bhikkhūnaṃ bahuṃ atipakkhittamajjaṃ telaṃ pakkaṃ hoti. Atha kho bhikkhūnaṃ etadahosi – ‘‘kathaṃ nu kho atipakkhittamajje tele paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, abbhañjanaṃ adhiṭṭhātunti.
তেন খো পন সমযেন আযস্মতো পিলিন্দৰচ্ছস্স বহুতরং তেলং পক্কং হোতি, তেলভাজনং ন ৰিজ্জতি। ভগৰতো এতমত্থং আরোচেসুং। অনুজানামি, ভিক্খৰে, তীণি তুম্বানি – লোহতুম্বং, কট্ঠতুম্বং, ফলতুম্বন্তি।
Tena kho pana samayena āyasmato pilindavacchassa bahutaraṃ telaṃ pakkaṃ hoti, telabhājanaṃ na vijjati. Bhagavato etamatthaṃ ārocesuṃ. Anujānāmi, bhikkhave, tīṇi tumbāni – lohatumbaṃ, kaṭṭhatumbaṃ, phalatumbanti.
তেন খো পন সমযেন আযস্মতো পিলিন্দৰচ্ছস্স অঙ্গৰাতো হোতি। ভগৰতো এতমত্থং আরোচেসুং। অনুজানামি, ভিক্খৰে, সেদকম্মন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, সম্ভারসেদন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, মহাসেদন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, ভঙ্গোদকন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, উদককোট্ঠকন্তি।
Tena kho pana samayena āyasmato pilindavacchassa aṅgavāto hoti. Bhagavato etamatthaṃ ārocesuṃ. Anujānāmi, bhikkhave, sedakammanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, sambhārasedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, mahāsedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, bhaṅgodakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, udakakoṭṭhakanti.
তেন খো পন সমযেন আযস্মতো পিলিন্দৰচ্ছস্স পব্বৰাতো হোতি। ভগৰতো এতমত্থং আরোচেসুং। অনুজানামি, ভিক্খৰে, লোহিতং মোচেতুন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, লোহিতং মোচেত্ৰা ৰিসাণেন গাহেতুন্তি 21।
Tena kho pana samayena āyasmato pilindavacchassa pabbavāto hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetunti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetvā visāṇena gāhetunti 22.
তেন খো পন সমযেন আযস্মতো পিলিন্দৰচ্ছস্স পাদা ফলিতা 23 হোন্তি। ভগৰতো এতমত্থং আরোচেসুং। অনুজানামি, ভিক্খৰে, পাদব্ভঞ্জনন্তি। নক্খমনিযো হোতি। ভগৰতো এতমত্থং আরোচেসুং। অনুজানামি, ভিক্খৰে, পজ্জং অভিসঙ্খরিতুন্তি।
Tena kho pana samayena āyasmato pilindavacchassa pādā phalitā 24 honti. Bhagavato etamatthaṃ ārocesuṃ. Anujānāmi, bhikkhave, pādabbhañjananti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, pajjaṃ abhisaṅkharitunti.
তেন খো পন সমযেন অঞ্ঞতরস্স ভিক্খুনো গণ্ডাবাধো হোতি। ভগৰতো এতমত্থং আরোচেসুং। অনুজানামি, ভিক্খৰে, সত্থকম্মন্তি। কসাৰোদকেন অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, কসাৰোদকন্তি। তিলকক্কেন অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, তিলকক্কন্তি। কবল়িকায অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, কবল়িকন্তি। ৰণবন্ধনচোল়েন অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, ৰণবন্ধনচোল়ন্তি। ৰণো কণ্ডুৰতি। ভগৰতো এতমত্থং আরোচেসুং। অনুজানামি, ভিক্খৰে, সাসপকুট্টেন 25 ফোসিতুন্তি। ৰণো কিলিজ্জিত্থ। ভগৰতো এতমত্থং আরোচেসুং। অনুজানামি , ভিক্খৰে, ধূমং কাতুন্তি। ৰড্ঢমংসং ৰুট্ঠাতি। ভগৰতো এতমত্থং আরোচেসুং। অনুজানামি, ভিক্খৰে, লোণসক্খরিকায ছিন্দিতুন্তি। ৰণো ন রুহতি। ভগৰতো এতমত্থং আরোচেসুং। অনুজানামি, ভিক্খৰে, ৰণতেলন্তি। তেলং গলতি। ভগৰতো এতমত্থং আরোচেসুং। অনুজানামি , ভিক্খৰে, ৰিকাসিকং সব্বং ৰণপটিকম্মন্তি।
Tena kho pana samayena aññatarassa bhikkhuno gaṇḍābādho hoti. Bhagavato etamatthaṃ ārocesuṃ. Anujānāmi, bhikkhave, satthakammanti. Kasāvodakena attho hoti. Bhagavato etamatthaṃ ārocesuṃ. Anujānāmi, bhikkhave, kasāvodakanti. Tilakakkena attho hoti. Bhagavato etamatthaṃ ārocesuṃ. Anujānāmi, bhikkhave, tilakakkanti. Kabaḷikāya attho hoti. Bhagavato etamatthaṃ ārocesuṃ. Anujānāmi, bhikkhave, kabaḷikanti. Vaṇabandhanacoḷena attho hoti. Bhagavato etamatthaṃ ārocesuṃ. Anujānāmi, bhikkhave, vaṇabandhanacoḷanti. Vaṇo kaṇḍuvati. Bhagavato etamatthaṃ ārocesuṃ. Anujānāmi, bhikkhave, sāsapakuṭṭena 26 phositunti. Vaṇo kilijjittha. Bhagavato etamatthaṃ ārocesuṃ. Anujānāmi , bhikkhave, dhūmaṃ kātunti. Vaḍḍhamaṃsaṃ vuṭṭhāti. Bhagavato etamatthaṃ ārocesuṃ. Anujānāmi, bhikkhave, loṇasakkharikāya chinditunti. Vaṇo na ruhati. Bhagavato etamatthaṃ ārocesuṃ. Anujānāmi, bhikkhave, vaṇatelanti. Telaṃ galati. Bhagavato etamatthaṃ ārocesuṃ. Anujānāmi , bhikkhave, vikāsikaṃ sabbaṃ vaṇapaṭikammanti.
২৬৮. তেন খো পন সমযেন অঞ্ঞতরো ভিক্খু অহিনা দট্ঠো হোতি। ভগৰতো এতমত্থং আরোচেসুং। অনুজানামি, ভিক্খৰে, চত্তারি মহাৰিকটানি দাতুং – গূথং, মুত্তং, ছারিকং, মত্তিকন্তি। অথ খো ভিক্খূনং এতদহোসি – ‘‘অপ্পটিগ্গহিতানি নু খো উদাহু পটিগ্গহেতব্বানী’’তি। ভগৰতো এতমত্থং আরোচেসুং। অনুজানামি, ভিক্খৰে, সতি কপ্পিযকারকে পটিগ্গহাপেতুং, অসতি কপ্পিযকারকে সামং গহেত্ৰা পরিভুঞ্জিতুন্তি।
268. Tena kho pana samayena aññataro bhikkhu ahinā daṭṭho hoti. Bhagavato etamatthaṃ ārocesuṃ. Anujānāmi, bhikkhave, cattāri mahāvikaṭāni dātuṃ – gūthaṃ, muttaṃ, chārikaṃ, mattikanti. Atha kho bhikkhūnaṃ etadahosi – ‘‘appaṭiggahitāni nu kho udāhu paṭiggahetabbānī’’ti. Bhagavato etamatthaṃ ārocesuṃ. Anujānāmi, bhikkhave, sati kappiyakārake paṭiggahāpetuṃ, asati kappiyakārake sāmaṃ gahetvā paribhuñjitunti.
তেন খো পন সমযেন অঞ্ঞতরেন ভিক্খুনা ৰিসং পীতং হোতি। ভগৰতো এতমত্থং আরোচেসুং। অনুজানামি ভিক্খৰে গূথং পাযেতুন্তি। অথ খো ভিক্খূনং এতদহোসি – ‘‘অপ্পটিগ্গহিতং নু খো উদাহু পটিগ্গহেতব্বো’’তি? ভগৰতো এতমত্থং আরোচেসুং। অনুজানামি, ভিক্খৰে, যং করোন্তো পটিগ্গণ্হাতি, স্ৰেৰ পটিগ্গহো কতো, ন পুন 27 পটিগ্গহেতব্বোতি।
Tena kho pana samayena aññatarena bhikkhunā visaṃ pītaṃ hoti. Bhagavato etamatthaṃ ārocesuṃ. Anujānāmi bhikkhave gūthaṃ pāyetunti. Atha kho bhikkhūnaṃ etadahosi – ‘‘appaṭiggahitaṃ nu kho udāhu paṭiggahetabbo’’ti? Bhagavato etamatthaṃ ārocesuṃ. Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna 28 paṭiggahetabboti.
২৬৯. তেন খো পন সমযেন অঞ্ঞতরস্স ভিক্খুনো ঘরদিন্নকাবাধো হোতি। ভগৰতো এতমত্থং আরোচেসুং। অনুজানামি, ভিক্খৰে, সীতালোল়িং পাযেতুন্তি।
269. Tena kho pana samayena aññatarassa bhikkhuno gharadinnakābādho hoti. Bhagavato etamatthaṃ ārocesuṃ. Anujānāmi, bhikkhave, sītāloḷiṃ pāyetunti.
তেন খো পন সমযেন অঞ্ঞতরো ভিক্খু দুট্ঠগহণিকো হোতি। ভগৰতো এতমত্থং আরোচেসুং। অনুজানামি, ভিক্খৰে, আমিসখারং পাযেতুন্তি।
Tena kho pana samayena aññataro bhikkhu duṭṭhagahaṇiko hoti. Bhagavato etamatthaṃ ārocesuṃ. Anujānāmi, bhikkhave, āmisakhāraṃ pāyetunti.
তেন খো পন সমযেন অঞ্ঞতরস্স ভিক্খুনো পণ্ডুরোগাবাধো হোতি। ভগৰতো এতমত্থং আরোচেসুং । অনুজানামি, ভিক্খৰে, মুত্তহরীতকং পাযেতুন্তি।
Tena kho pana samayena aññatarassa bhikkhuno paṇḍurogābādho hoti. Bhagavato etamatthaṃ ārocesuṃ . Anujānāmi, bhikkhave, muttaharītakaṃ pāyetunti.
তেন খো পন সমযেন অঞ্ঞতরস্স ভিক্খুনো ছৰিদোসাবাধো হোতি। ভগৰতো এতমত্থং আরোচেসুং। অনুজানামি, ভিক্খৰে, গন্ধালেপং কাতুন্তি।
Tena kho pana samayena aññatarassa bhikkhuno chavidosābādho hoti. Bhagavato etamatthaṃ ārocesuṃ. Anujānāmi, bhikkhave, gandhālepaṃ kātunti.
তেন খো পন সমযেন অঞ্ঞতরো ভিক্খু অভিসন্নকাযো হোতি। ভগৰতো এতমত্থং আরোচেসুং । অনুজানামি, ভিক্খৰে, ৰিরেচনং পাতুন্তি। অচ্ছকঞ্জিযা অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, অচ্ছকঞ্জিন্তি। অকটযূসেন অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, অকটযূসন্তি। কটাকটেন অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, কটাকটন্তি। পটিচ্ছাদনীযেন অত্থো হোতি। ভগৰতো এতমত্থং আরোচেসুং। অনুজানামি, ভিক্খৰে, পটিচ্ছাদনীযন্তি।
Tena kho pana samayena aññataro bhikkhu abhisannakāyo hoti. Bhagavato etamatthaṃ ārocesuṃ . Anujānāmi, bhikkhave, virecanaṃ pātunti. Acchakañjiyā attho hoti. Bhagavato etamatthaṃ ārocesuṃ. Anujānāmi, bhikkhave, acchakañjinti. Akaṭayūsena attho hoti. Bhagavato etamatthaṃ ārocesuṃ. Anujānāmi, bhikkhave, akaṭayūsanti. Kaṭākaṭena attho hoti. Bhagavato etamatthaṃ ārocesuṃ. Anujānāmi, bhikkhave, kaṭākaṭanti. Paṭicchādanīyena attho hoti. Bhagavato etamatthaṃ ārocesuṃ. Anujānāmi, bhikkhave, paṭicchādanīyanti.
মূলাদিভেসজ্জকথা নিট্ঠিতা।
Mūlādibhesajjakathā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পঞ্চভেসজ্জাদিকথা • Pañcabhesajjādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৬১. মূলাদিভেসজ্জকথা • 161. Mūlādibhesajjakathā
