| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
161. මූලාදිභෙසජ්‌ජකථා
161. Mūlādibhesajjakathā
263. තෙන ඛො පන සමයෙන ගිලානානං භික්‌ඛූනං මූලෙහි භෙසජ්‌ජෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි , භික්‌ඛවෙ, මූලානි භෙසජ්‌ජානි – හලිද්‌දිං, සිඞ්‌ගිවෙරං, වචං, වචත්‌ථං 1, අතිවිසං, කටුකරොහිණිං, උසීරං, භද්‌දමුත්‌තකං, යානි වා පනඤ්‌ඤානිපි අත්‌ථි මූලානි භෙසජ්‌ජානි, නෙව ඛාදනීයෙ ඛාදනීයත්‌ථං ඵරන්‌ති, න භොජනීයෙ භොජනීයත්‌ථං ඵරන්‌ති, තානි – පටිග්‌ගහෙත්‌වා යාවජීවං පරිහරිතුං; සති පච්‌චයෙ පරිභුඤ්‌ජිතුං. අසති පච්‌චයෙ පරිභුඤ්‌ජන්‌තස්‌ස ආපත්‌ති දුක්‌කටස්‌සාති.
263. Tena kho pana samayena gilānānaṃ bhikkhūnaṃ mūlehi bhesajjehi attho hoti. Bhagavato etamatthaṃ ārocesuṃ. Anujānāmi , bhikkhave, mūlāni bhesajjāni – haliddiṃ, siṅgiveraṃ, vacaṃ, vacatthaṃ 2, ativisaṃ, kaṭukarohiṇiṃ, usīraṃ, bhaddamuttakaṃ, yāni vā panaññānipi atthi mūlāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
තෙන ඛො පන සමයෙන ගිලානානං භික්‌ඛූනං මූලෙහි භෙසජ්‌ජෙහි පිට්‌ඨෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, නිසදං නිසදපොතකන්‌ති.
Tena kho pana samayena gilānānaṃ bhikkhūnaṃ mūlehi bhesajjehi piṭṭhehi attho hoti. Bhagavato etamatthaṃ ārocesuṃ. Anujānāmi, bhikkhave, nisadaṃ nisadapotakanti.
තෙන ඛො පන සමයෙන ගිලානානං භික්‌ඛූනං කසාවෙහි භෙසජ්‌ජෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, කසාවානි 3 භෙසජ්‌ජානි – නිම්‌බකසාවං, කුටජකසාවං, පටොලකසාවං, ඵග්‌ගවකසාවං, නත්‌තමාලකසාවං, යානි වා පනඤ්‌ඤානිපි අත්‌ථි කසාවානි භෙසජ්‌ජානි නෙව ඛාදනීයෙ ඛාදනීයත්‌ථං ඵරන්‌ති, න භොජනීයෙ භොජනීයත්‌ථං ඵරන්‌ති, තානි – පටිග්‌ගහෙත්‌වා යාවජීවං පරිහරිතුං; සති පච්‌චයෙ පරිභුඤ්‌ජිතුං. අසති පච්‌චයෙ පරිභුඤ්‌ජන්‌තස්‌ස ආපත්‌ති දුක්‌කටස්‌සාති.
Tena kho pana samayena gilānānaṃ bhikkhūnaṃ kasāvehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, kasāvāni 4 bhesajjāni – nimbakasāvaṃ, kuṭajakasāvaṃ, paṭolakasāvaṃ, phaggavakasāvaṃ, nattamālakasāvaṃ, yāni vā panaññānipi atthi kasāvāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
තෙන ඛො පන සමයෙන ගිලානානං භික්‌ඛූනං පණ්‌ණෙහි භෙසජ්‌ජෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ , පණ්‌ණානි භෙසජ්‌ජානි – නිම්‌බපණ්‌ණං, කුටජපණ්‌ණං, පටොලපණ්‌ණං, සුලසිපණ්‌ණං, කප්‌පාසපණ්‌ණං, යානි වා පනඤ්‌ඤානිපි අත්‌ථි පණ්‌ණානි භෙසජ්‌ජානි, නෙව ඛාදනීයෙ ඛාදනීයත්‌ථං ඵරන්‌ති, න භොජනීයෙ භොජනීයත්‌ථං ඵරන්‌ති…පෙ.….
Tena kho pana samayena gilānānaṃ bhikkhūnaṃ paṇṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave , paṇṇāni bhesajjāni – nimbapaṇṇaṃ, kuṭajapaṇṇaṃ, paṭolapaṇṇaṃ, sulasipaṇṇaṃ, kappāsapaṇṇaṃ, yāni vā panaññānipi atthi paṇṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
තෙන ඛො පන සමයෙන ගිලානානං භික්‌ඛූනං ඵලෙහි භෙසජ්‌ජෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ඵලානි භෙසජ්‌ජානි – බිලඞ්‌ගං, පිප්‌පලිං, මරිචං, හරීතකං, විභීතකං, ආමලකං, ගොට්‌ඨඵලං 5, යානි වා පනඤ්‌ඤානිපි අත්‌ථි ඵලානි භෙසජ්‌ජානි, නෙව ඛාදනීයෙ ඛාදනීයත්‌ථං ඵරන්‌ති, න භොජනීයෙ භොජනීයත්‌ථං ඵරන්‌ති…පෙ.….
Tena kho pana samayena gilānānaṃ bhikkhūnaṃ phalehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, phalāni bhesajjāni – bilaṅgaṃ, pippaliṃ, maricaṃ, harītakaṃ, vibhītakaṃ, āmalakaṃ, goṭṭhaphalaṃ 6, yāni vā panaññānipi atthi phalāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
තෙන ඛො පන සමයෙන ගිලානානං භික්‌ඛූනං ජතූහි භෙසජ්‌ජෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ජතූනි භෙසජ්‌ජානි – හිඞ්‌ගුං, හිඞ්‌ගුජතුං, හිඞ්‌ගුසිපාටිකං, තකං, තකපත්‌තිං, තකපණ්‌ණිං , සජ්‌ජුලසං, යානි වා පනඤ්‌ඤානිපි අත්‌ථි ජතූනි භෙසජ්‌ජානි, නෙව ඛාදනීයෙ ඛාදනීයත්‌ථං ඵරන්‌ති…පෙ.….
Tena kho pana samayena gilānānaṃ bhikkhūnaṃ jatūhi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, jatūni bhesajjāni – hiṅguṃ, hiṅgujatuṃ, hiṅgusipāṭikaṃ, takaṃ, takapattiṃ, takapaṇṇiṃ , sajjulasaṃ, yāni vā panaññānipi atthi jatūni bhesajjāni, neva khādanīye khādanīyatthaṃ pharanti…pe….
තෙන ඛො පන සමයෙන ගිලානානං භික්‌ඛූනං ලොණෙහි භෙසජ්‌ජෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ලොණානි භෙසජ්‌ජානි – සාමුද්‌දං, කාළලොණං, සින්‌ධවං, උබ්‌භිදං 7, බිලං 8, යානි වා පනඤ්‌ඤානිපි අත්‌ථි ලොණානි භෙසජ්‌ජානි, නෙව ඛාදනීයෙ ඛාදනීයත්‌ථං ඵරන්‌ති, න භොජනීයෙ භොජනීයත්‌ථං ඵරන්‌ති, තානි – පටිග්‌ගහෙත්‌වා යාවජීවං පරිහරිතුං; සති පච්‌චයෙ පරිභුඤ්‌ජිතුං. අසති පච්‌චයෙ පරිභුඤ්‌ජන්‌තස්‌ස ආපත්‌ති දුක්‌කටස්‌සාති.
Tena kho pana samayena gilānānaṃ bhikkhūnaṃ loṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, loṇāni bhesajjāni – sāmuddaṃ, kāḷaloṇaṃ, sindhavaṃ, ubbhidaṃ 9, bilaṃ 10, yāni vā panaññānipi atthi loṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
264. තෙන ඛො පන සමයෙන ආයස්‌මතො ආනන්‌දස්‌ස උපජ්‌ඣායස්‌ස ආයස්‌මතො බෙලට්‌ඨසීසස්‌ස ථුල්‌ලකච්‌ඡාබාධො හොති. තස්‌ස ලසිකාය චීවරානි කායෙ ලග්‌ගන්‌ති, තානි භික්‌ඛූ උදකෙන තෙමෙත්‌වා තෙමෙත්‌වා අපකඩ්‌ඪන්‌ති. අද්‌දසා ඛො භගවා සෙනාසනචාරිකං ආහිණ්‌ඩන්‌තො තෙ භික්‌ඛූ තානි චීවරානි උදකෙන තෙමෙත්‌වා තෙමෙත්‌වා අපකඩ්‌ඪන්‌තෙ, දිස්‌වාන යෙන තෙ භික්‌ඛූ තෙනුපසඞ්‌කමි, උපසඞ්‌කමිත්‌වා තෙ භික්‌ඛූ එතදවොච – ‘‘කිං ඉමස්‌ස, භික්‌ඛවෙ, භික්‌ඛුනො ආබාධො’’ති? ‘‘ඉමස්‌ස, භන්‌තෙ, ආයස්‌මතො ථුල්‌ලකච්‌ඡාබාධො, ලසිකාය චීවරානි කායෙ ලග්‌ගන්‌ති, තානි මයං උදකෙන තෙමෙත්‌වා තෙමෙත්‌වා අපකඩ්‌ඪාමා’’ති . අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, යස්‌ස කණ්‌ඩු වා, පිළකා වා, අස්‌සාවො වා, ථුල්‌ලකච්‌ඡු වා ආබාධො, කායො වා දුග්‌ගන්‌ධො, චුණ්‌ණානි භෙසජ්‌ජානි; අගිලානස්‌ස ඡකණං මත්‌තිකං රජනනිප්‌පක්‌කං. අනුජානාමි, භික්‌ඛවෙ, උදුක්‌ඛලං මුසල’’න්‌ති.
264. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti, tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho, lasikāya cīvarāni kāye lagganti, tāni mayaṃ udakena temetvā temetvā apakaḍḍhāmā’’ti . Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā, piḷakā vā, assāvo vā, thullakacchu vā ābādho, kāyo vā duggandho, cuṇṇāni bhesajjāni; agilānassa chakaṇaṃ mattikaṃ rajananippakkaṃ. Anujānāmi, bhikkhave, udukkhalaṃ musala’’nti.
තෙන ඛො පන සමයෙන ගිලානානං භික්‌ඛූනං චුණ්‌ණෙහි භෙසජ්‌ජෙහි චාලිතෙහි අත්‌ථො හොති . භගවතො එතමත්‌ථං ආරොචෙසුං. අනුජානාමි, භික්‌ඛවෙ, චුණ්‌ණචාලිනින්‌ති. සණ්‌හෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, දුස්‌සචාලිනින්‌ති.
Tena kho pana samayena gilānānaṃ bhikkhūnaṃ cuṇṇehi bhesajjehi cālitehi attho hoti . Bhagavato etamatthaṃ ārocesuṃ. Anujānāmi, bhikkhave, cuṇṇacālininti. Saṇhehi attho hoti. Bhagavato etamatthaṃ ārocesuṃ. Anujānāmi, bhikkhave, dussacālininti.
තෙන ඛො පන සමයෙන අඤ්‌ඤතරස්‌ස භික්‌ඛුනො අමනුස්‌සිකාබාධො හොති. තං ආචරියුපජ්‌ඣායා උපට්‌ඨහන්‌තා නාසක්‌ඛිංසු අරොගං කාතුං. සො සූකරසූනං ගන්‌ත්‌වා ආමකමංසං ඛාදි, ආමකලොහිතං පිවි . තස්‌ස සො අමනුස්‌සිකාබාධො පටිප්‌පස්‌සම්‌භි. භගවතො එතමත්‌ථං ආරොචෙසුං . අනුජානාමි, භික්‌ඛවෙ, අමනුස්‌සිකාබාධෙ ආමකමංසං ආමකලොහිතන්‌ති.
Tena kho pana samayena aññatarassa bhikkhuno amanussikābādho hoti. Taṃ ācariyupajjhāyā upaṭṭhahantā nāsakkhiṃsu arogaṃ kātuṃ. So sūkarasūnaṃ gantvā āmakamaṃsaṃ khādi, āmakalohitaṃ pivi . Tassa so amanussikābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, amanussikābādhe āmakamaṃsaṃ āmakalohitanti.
265. තෙන ඛො පන සමයෙන අඤ්‌ඤතරස්‌ස භික්‌ඛුනො චක්‌ඛුරොගාබාධො හොති. තං භික්‌ඛූ පරිග්‌ගහෙත්‌වා උච්‌චාරම්‌පි පස්‌සාවම්‌පි නික්‌ඛාමෙන්‌ති. අද්‌දසා ඛො භගවා සෙනාසනචාරිකං ආහිණ්‌ඩන්‌තො තෙ භික්‌ඛූ තං භික්‌ඛුං පරිග්‌ගහෙත්‌වා උච්‌චාරම්‌පි පස්‌සාවම්‌පි නික්‌ඛාමෙන්‌තෙ, දිස්‌වාන යෙන තෙ භික්‌ඛූ තෙනුපසඞ්‌කමි, උපසඞ්‌කමිත්‌වා තෙ භික්‌ඛූ එතදවොච – ‘‘කිං ඉමස්‌ස, භික්‌ඛවෙ, භික්‌ඛුනො ආබාධො’’ති? ‘‘ඉමස්‌ස, භන්‌තෙ, ආයස්‌මතො චක්‌ඛුරොගාබාධො. ඉමං මයං පරිග්‌ගහෙත්‌වා උච්‌චාරම්‌පි පස්‌සාවම්‌පි නික්‌ඛාමෙමා’’ති. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, අඤ්‌ජනං – කාළඤ්‌ජනං, රසඤ්‌ජනං, සොතඤ්‌ජනං, ගෙරුකං, කපල්‌ල’’න්‌ති. අඤ්‌ජනූපපිසනෙහි අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, චන්‌දනං, තගරං, කාළානුසාරියං, තාලීසං, භද්‌දමුත්‌තකන්‌ති. තෙන ඛො පන සමයෙන භික්‌ඛූ පිට්‌ඨානි අඤ්‌ජනානි චරුකෙසුපි 11 සරාවකෙසුපි නික්‌ඛිපන්‌ති; තිණචුණ්‌ණෙහිපි පංසුකෙහිපි ඔකිරියන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අඤ්‌ජනින්‌ති.
265. Tena kho pana samayena aññatarassa bhikkhuno cakkhurogābādho hoti. Taṃ bhikkhū pariggahetvā uccārampi passāvampi nikkhāmenti. Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ pariggahetvā uccārampi passāvampi nikkhāmente, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato cakkhurogābādho. Imaṃ mayaṃ pariggahetvā uccārampi passāvampi nikkhāmemā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, añjanaṃ – kāḷañjanaṃ, rasañjanaṃ, sotañjanaṃ, gerukaṃ, kapalla’’nti. Añjanūpapisanehi attho hoti. Bhagavato etamatthaṃ ārocesuṃ. Anujānāmi, bhikkhave, candanaṃ, tagaraṃ, kāḷānusāriyaṃ, tālīsaṃ, bhaddamuttakanti. Tena kho pana samayena bhikkhū piṭṭhāni añjanāni carukesupi 12 sarāvakesupi nikkhipanti; tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, añjaninti.
තෙන ඛො පන සමයෙන ඡබ්‌බග්‌ගියා භික්‌ඛූ උච්‌චාවචා අඤ්‌ජනියො ධාරෙන්‌ති – සොවණ්‌ණමයං, රූපියමයං. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘සෙය්‍යථාපි ගිහී කාමභොගිනො’’ති. භගවතො එතමත්‌ථං ආරොචෙසුං. න, භික්‌ඛවෙ, උච්‌චාවචා අඤ්‌ජනී ධාරෙතබ්‌බා. යො ධාරෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, අට්‌ඨිමයං, දන්‌තමයං, විසාණමයං, නළමයං, වෙළුමයං, කට්‌ඨමයං, ජතුමයං, ඵලමයං, ලොහමයං, සඞ්‌ඛනාභිමයන්‌ති.
Tena kho pana samayena chabbaggiyā bhikkhū uccāvacā añjaniyo dhārenti – sovaṇṇamayaṃ, rūpiyamayaṃ. Manussā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ, dantamayaṃ, visāṇamayaṃ, naḷamayaṃ, veḷumayaṃ, kaṭṭhamayaṃ, jatumayaṃ, phalamayaṃ, lohamayaṃ, saṅkhanābhimayanti.
තෙන ඛො පන සමයෙන අඤ්‌ජනියො අපාරුතා හොන්‌ති, තිණචුණ්‌ණෙහිපි පංසුකෙහිපි ඔකිරියන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අපිධානන්‌ති. අපිධානං නිපතති . භගවතො එතමත්‌ථං ආරොචෙසුං. අනුජානාමි, භික්‌ඛවෙ, සුත්‌තකෙන බන්‌ධිත්‌වා අඤ්‌ජනියා බන්‌ධිතුන්‌ති. අඤ්‌ජනී ඵලති 13. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සුත්‌තකෙන සිබ්‌බෙතුන්‌ති.
Tena kho pana samayena añjaniyo apārutā honti, tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, apidhānanti. Apidhānaṃ nipatati . Bhagavato etamatthaṃ ārocesuṃ. Anujānāmi, bhikkhave, suttakena bandhitvā añjaniyā bandhitunti. Añjanī phalati 14. Bhagavato etamatthaṃ ārocesuṃ. Anujānāmi, bhikkhave, suttakena sibbetunti.
තෙන ඛො පන සමයෙන භික්‌ඛූ අඞ්‌ගුලියා අඤ්‌ජන්‌ති, අක්‌ඛීනි දුක්‌ඛානි හොන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අඤ්‌ජනිසලාකන්‌ති.
Tena kho pana samayena bhikkhū aṅguliyā añjanti, akkhīni dukkhāni honti. Bhagavato etamatthaṃ ārocesuṃ. Anujānāmi, bhikkhave, añjanisalākanti.
තෙන ඛො පන සමයෙන ඡබ්‌බග්‌ගියා භික්‌ඛූ උච්‌චාවචා අඤ්‌ජනිසලාකායො ධාරෙන්‌ති – සොවණ්‌ණමයං රූපියමයං. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති, ‘‘සෙය්‍යථාපි ගිහී කාමභොගිනො’’ති. භගවතො එතමත්‌ථං ආරොචෙසුං. න, භික්‌ඛවෙ, උච්‌චාවචා අඤ්‌ජනිසලාකා ධාරෙතබ්‌බා. යො ධාරෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, අට්‌ඨිමයං…පෙ.… සඞ්‌ඛනාභිමයන්‌ති.
Tena kho pana samayena chabbaggiyā bhikkhū uccāvacā añjanisalākāyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanisalākā dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
තෙන ඛො පන සමයෙන අඤ්‌ජනිසලාකා භූමියං පතිතා ඵරුසා හොති. භගවතො එතමත්‌ථං ආරොචෙසුං . අනුජානාමි, භික්‌ඛවෙ, සලාකඨානියන්‌ති 15.
Tena kho pana samayena añjanisalākā bhūmiyaṃ patitā pharusā hoti. Bhagavato etamatthaṃ ārocesuṃ . Anujānāmi, bhikkhave, salākaṭhāniyanti 16.
තෙන ඛො පන සමයෙන භික්‌ඛූ අඤ්‌ජනිම්‌පි අඤ්‌ජනිසලාකම්‌පි හත්‌ථෙන පරිහරන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අඤ්‌ජනිත්‌ථවිකන්‌ති. අංසබද්‌ධකො න හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අංසබද්‌ධකං බන්‌ධනසුත්‌තකන්‌ති.
Tena kho pana samayena bhikkhū añjanimpi añjanisalākampi hatthena pariharanti. Bhagavato etamatthaṃ ārocesuṃ. Anujānāmi, bhikkhave, añjanitthavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
266. තෙන ඛො පන සමයෙන ආයස්‌මතො පිලින්‌දවච්‌ඡස්‌ස සීසාභිතාපො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, මුද්‌ධනි තෙලකන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, නත්‌ථුකම්‌මන්‌ති. නත්‌ථු ගලති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, නත්‌ථුකරණින්‌ති.
266. Tena kho pana samayena āyasmato pilindavacchassa sīsābhitāpo hoti. Bhagavato etamatthaṃ ārocesuṃ. Anujānāmi, bhikkhave, muddhani telakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, natthukammanti. Natthu galati. Bhagavato etamatthaṃ ārocesuṃ. Anujānāmi, bhikkhave, natthukaraṇinti.
තෙන ඛො පන සමයෙන ඡබ්‌බග්‌ගියා භික්‌ඛූ උච්‌චාවචා නත්‌ථුකරණියො ධාරෙන්‌ති – සොවණ්‌ණමයං රූපියමයං. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති, ‘‘සෙය්‍යථාපි ගිහී කාමභොගිනො’’ති. භගවතො එතමත්‌ථං ආරොචෙසුං. න, භික්‌ඛවෙ, උච්‌චාවචා නත්‌ථුකරණී ධාරෙතබ්‌බා. යො ධාරෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, අට්‌ඨිමයං…පෙ.… සඞ්‌ඛනාභිමයන්‌ති. නත්‌ථුං විසමං ආසිඤ්‌චන්‌ති 17. භගවතො එතමත්‌ථං ආරොචෙසුං. අනුජානාමි, භික්‌ඛවෙ , යමකනත්‌ථුකරණින්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ධූමං පාතුන්‌ති. තඤ්‌ඤෙව වට්‌ටිං ආලිම්‌පෙත්‌වා පිවන්‌ති , කණ්‌ඨො දහති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ධූමනෙත්‌තන්‌ති.
Tena kho pana samayena chabbaggiyā bhikkhū uccāvacā natthukaraṇiyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā natthukaraṇī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti. Natthuṃ visamaṃ āsiñcanti 18. Bhagavato etamatthaṃ ārocesuṃ. Anujānāmi, bhikkhave , yamakanatthukaraṇinti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, dhūmaṃ pātunti. Taññeva vaṭṭiṃ ālimpetvā pivanti , kaṇṭho dahati. Bhagavato etamatthaṃ ārocesuṃ. Anujānāmi, bhikkhave, dhūmanettanti.
තෙන ඛො පන සමයෙන ඡබ්‌බග්‌ගියා භික්‌ඛූ උච්‌චාවචානි ධූමනෙත්‌තානි ධාරෙන්‌ති – සොවණ්‌ණමයං රූපියමයං. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – සෙය්‍යථාපි ගිහී කාමභොගිනොති. භගවතො එතමත්‌ථං ආරොචෙසුං. න, භික්‌ඛවෙ, උච්‌චාවචානි ධූමනෙත්‌තානි ධාරෙතබ්‌බානි. යො ධාරෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, අට්‌ඨිමයං…පෙ.… සඞ්‌ඛනාභිමයන්‌ති.
Tena kho pana samayena chabbaggiyā bhikkhū uccāvacāni dhūmanettāni dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti – seyyathāpi gihī kāmabhoginoti. Bhagavato etamatthaṃ ārocesuṃ. Na, bhikkhave, uccāvacāni dhūmanettāni dhāretabbāni. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
තෙන ඛො පන සමයෙන ධූමනෙත්‌තානි අපාරුතානි හොන්‌ති, පාණකා පවිසන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අපිධානන්‌ති.
Tena kho pana samayena dhūmanettāni apārutāni honti, pāṇakā pavisanti. Bhagavato etamatthaṃ ārocesuṃ. Anujānāmi, bhikkhave, apidhānanti.
තෙන ඛො පන සමයෙන භික්‌ඛූ ධූමනෙත්‌තානි හත්‌ථෙන පරිහරන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ධූමනෙත්‌තථවිකන්‌ති. එකතො ඝංසියන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, යමකථවිකන්‌ති. අංසබද්‌ධකො න හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අංසබද්‌ධකං බන්‌ධනසුත්‌තකන්‌ති.
Tena kho pana samayena bhikkhū dhūmanettāni hatthena pariharanti. Bhagavato etamatthaṃ ārocesuṃ. Anujānāmi, bhikkhave, dhūmanettathavikanti. Ekato ghaṃsiyanti. Bhagavato etamatthaṃ ārocesuṃ. Anujānāmi, bhikkhave, yamakathavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
267. තෙන ඛො පන සමයෙන ආයස්‌මතො පිලින්‌දවච්‌ඡස්‌ස වාතාබාධො හොති. වෙජ්‌ජා එවමාහංසු – ‘‘තෙලං පචිතබ්‌බ’’න්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, තෙලපාකන්‌ති. තස්‌මිං ඛො පන තෙලපාකෙ මජ්‌ජං පක්‌ඛිපිතබ්‌බං හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, තෙලපාකෙ මජ්‌ජං පක්‌ඛිපිතුන්‌ති.
267. Tena kho pana samayena āyasmato pilindavacchassa vātābādho hoti. Vejjā evamāhaṃsu – ‘‘telaṃ pacitabba’’nti. Bhagavato etamatthaṃ ārocesuṃ. Anujānāmi, bhikkhave, telapākanti. Tasmiṃ kho pana telapāke majjaṃ pakkhipitabbaṃ hoti. Bhagavato etamatthaṃ ārocesuṃ. Anujānāmi, bhikkhave, telapāke majjaṃ pakkhipitunti.
තෙන ඛො පන සමයෙන ඡබ්‌බග්‌ගියා භික්‌ඛූ අතිපක්‌ඛිත්‌තමජ්‌ජානි 19 තෙලානි පචන්‌ති, තානි පිවිත්‌වා මජ්‌ජන්‌ති. භගවතො එතමත්‌ථං ආරොචෙසුං. න, භික්‌ඛවෙ, අතිපක්‌ඛිත්‌තමජ්‌ජං තෙලං පාතබ්‌බං. යො පිවෙය්‍ය, යථාධම්‌මො කාරෙතබ්‌බො. අනුජානාමි, භික්‌ඛවෙ, යස්‌මිං තෙලපාකෙ මජ්‌ජස්‌ස න වණ්‌ණො න ගන්‌ධො න රසො පඤ්‌ඤායති, එවරූපං මජ්‌ජපක්‌ඛිත්‌තං තෙලං පාතුන්‌ති.
Tena kho pana samayena chabbaggiyā bhikkhū atipakkhittamajjāni 20 telāni pacanti, tāni pivitvā majjanti. Bhagavato etamatthaṃ ārocesuṃ. Na, bhikkhave, atipakkhittamajjaṃ telaṃ pātabbaṃ. Yo piveyya, yathādhammo kāretabbo. Anujānāmi, bhikkhave, yasmiṃ telapāke majjassa na vaṇṇo na gandho na raso paññāyati, evarūpaṃ majjapakkhittaṃ telaṃ pātunti.
තෙන ඛො පන සමයෙන භික්‌ඛූනං බහුං අතිපක්‌ඛිත්‌තමජ්‌ජං තෙලං පක්‌කං හොති. අථ ඛො භික්‌ඛූනං එතදහොසි – ‘‘කථං නු ඛො අතිපක්‌ඛිත්‌තමජ්‌ජෙ තෙලෙ පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, අබ්‌භඤ්‌ජනං අධිට්‌ඨාතුන්‌ති.
Tena kho pana samayena bhikkhūnaṃ bahuṃ atipakkhittamajjaṃ telaṃ pakkaṃ hoti. Atha kho bhikkhūnaṃ etadahosi – ‘‘kathaṃ nu kho atipakkhittamajje tele paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, abbhañjanaṃ adhiṭṭhātunti.
තෙන ඛො පන සමයෙන ආයස්‌මතො පිලින්‌දවච්‌ඡස්‌ස බහුතරං තෙලං පක්‌කං හොති, තෙලභාජනං න විජ්‌ජති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, තීණි තුම්‌බානි – ලොහතුම්‌බං, කට්‌ඨතුම්‌බං, ඵලතුම්‌බන්‌ති.
Tena kho pana samayena āyasmato pilindavacchassa bahutaraṃ telaṃ pakkaṃ hoti, telabhājanaṃ na vijjati. Bhagavato etamatthaṃ ārocesuṃ. Anujānāmi, bhikkhave, tīṇi tumbāni – lohatumbaṃ, kaṭṭhatumbaṃ, phalatumbanti.
තෙන ඛො පන සමයෙන ආයස්‌මතො පිලින්‌දවච්‌ඡස්‌ස අඞ්‌ගවාතො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සෙදකම්‌මන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සම්‌භාරසෙදන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, මහාසෙදන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, භඞ්‌ගොදකන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, උදකකොට්‌ඨකන්‌ති.
Tena kho pana samayena āyasmato pilindavacchassa aṅgavāto hoti. Bhagavato etamatthaṃ ārocesuṃ. Anujānāmi, bhikkhave, sedakammanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, sambhārasedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, mahāsedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, bhaṅgodakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, udakakoṭṭhakanti.
තෙන ඛො පන සමයෙන ආයස්‌මතො පිලින්‌දවච්‌ඡස්‌ස පබ්‌බවාතො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ලොහිතං මොචෙතුන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ලොහිතං මොචෙත්‌වා විසාණෙන ගාහෙතුන්‌ති 21.
Tena kho pana samayena āyasmato pilindavacchassa pabbavāto hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetunti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetvā visāṇena gāhetunti 22.
තෙන ඛො පන සමයෙන ආයස්‌මතො පිලින්‌දවච්‌ඡස්‌ස පාදා ඵලිතා 23 හොන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, පාදබ්‌භඤ්‌ජනන්‌ති. නක්‌ඛමනියො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, පජ්‌ජං අභිසඞ්‌ඛරිතුන්‌ති.
Tena kho pana samayena āyasmato pilindavacchassa pādā phalitā 24 honti. Bhagavato etamatthaṃ ārocesuṃ. Anujānāmi, bhikkhave, pādabbhañjananti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, pajjaṃ abhisaṅkharitunti.
තෙන ඛො පන සමයෙන අඤ්‌ඤතරස්‌ස භික්‌ඛුනො ගණ්‌ඩාබාධො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සත්‌ථකම්‌මන්‌ති. කසාවොදකෙන අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, කසාවොදකන්‌ති. තිලකක්‌කෙන අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, තිලකක්‌කන්‌ති. කබළිකාය අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, කබළිකන්‌ති. වණබන්‌ධනචොළෙන අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, වණබන්‌ධනචොළන්‌ති. වණො කණ්‌ඩුවති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සාසපකුට්‌ටෙන 25 ඵොසිතුන්‌ති. වණො කිලිජ්‌ජිත්‌ථ. භගවතො එතමත්‌ථං ආරොචෙසුං. අනුජානාමි , භික්‌ඛවෙ, ධූමං කාතුන්‌ති. වඩ්‌ඪමංසං වුට්‌ඨාති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ලොණසක්‌ඛරිකාය ඡින්‌දිතුන්‌ති. වණො න රුහති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, වණතෙලන්‌ති. තෙලං ගලති. භගවතො එතමත්‌ථං ආරොචෙසුං. අනුජානාමි , භික්‌ඛවෙ, විකාසිකං සබ්‌බං වණපටිකම්‌මන්‌ති.
Tena kho pana samayena aññatarassa bhikkhuno gaṇḍābādho hoti. Bhagavato etamatthaṃ ārocesuṃ. Anujānāmi, bhikkhave, satthakammanti. Kasāvodakena attho hoti. Bhagavato etamatthaṃ ārocesuṃ. Anujānāmi, bhikkhave, kasāvodakanti. Tilakakkena attho hoti. Bhagavato etamatthaṃ ārocesuṃ. Anujānāmi, bhikkhave, tilakakkanti. Kabaḷikāya attho hoti. Bhagavato etamatthaṃ ārocesuṃ. Anujānāmi, bhikkhave, kabaḷikanti. Vaṇabandhanacoḷena attho hoti. Bhagavato etamatthaṃ ārocesuṃ. Anujānāmi, bhikkhave, vaṇabandhanacoḷanti. Vaṇo kaṇḍuvati. Bhagavato etamatthaṃ ārocesuṃ. Anujānāmi, bhikkhave, sāsapakuṭṭena 26 phositunti. Vaṇo kilijjittha. Bhagavato etamatthaṃ ārocesuṃ. Anujānāmi , bhikkhave, dhūmaṃ kātunti. Vaḍḍhamaṃsaṃ vuṭṭhāti. Bhagavato etamatthaṃ ārocesuṃ. Anujānāmi, bhikkhave, loṇasakkharikāya chinditunti. Vaṇo na ruhati. Bhagavato etamatthaṃ ārocesuṃ. Anujānāmi, bhikkhave, vaṇatelanti. Telaṃ galati. Bhagavato etamatthaṃ ārocesuṃ. Anujānāmi , bhikkhave, vikāsikaṃ sabbaṃ vaṇapaṭikammanti.
268. තෙන ඛො පන සමයෙන අඤ්‌ඤතරො භික්‌ඛු අහිනා දට්‌ඨො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, චත්‌තාරි මහාවිකටානි දාතුං – ගූථං, මුත්‌තං, ඡාරිකං, මත්‌තිකන්‌ති. අථ ඛො භික්‌ඛූනං එතදහොසි – ‘‘අප්‌පටිග්‌ගහිතානි නු ඛො උදාහු පටිග්‌ගහෙතබ්‌බානී’’ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සති කප්‌පියකාරකෙ පටිග්‌ගහාපෙතුං, අසති කප්‌පියකාරකෙ සාමං ගහෙත්‌වා පරිභුඤ්‌ජිතුන්‌ති.
268. Tena kho pana samayena aññataro bhikkhu ahinā daṭṭho hoti. Bhagavato etamatthaṃ ārocesuṃ. Anujānāmi, bhikkhave, cattāri mahāvikaṭāni dātuṃ – gūthaṃ, muttaṃ, chārikaṃ, mattikanti. Atha kho bhikkhūnaṃ etadahosi – ‘‘appaṭiggahitāni nu kho udāhu paṭiggahetabbānī’’ti. Bhagavato etamatthaṃ ārocesuṃ. Anujānāmi, bhikkhave, sati kappiyakārake paṭiggahāpetuṃ, asati kappiyakārake sāmaṃ gahetvā paribhuñjitunti.
තෙන ඛො පන සමයෙන අඤ්‌ඤතරෙන භික්‌ඛුනා විසං පීතං හොති. භගවතො එතමත්‌ථං ආරොචෙසුං. අනුජානාමි භික්‌ඛවෙ ගූථං පායෙතුන්‌ති. අථ ඛො භික්‌ඛූනං එතදහොසි – ‘‘අප්‌පටිග්‌ගහිතං නු ඛො උදාහු පටිග්‌ගහෙතබ්‌බො’’ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, යං කරොන්‌තො පටිග්‌ගණ්‌හාති, ස්‌වෙව පටිග්‌ගහො කතො, න පුන 27 පටිග්‌ගහෙතබ්‌බොති.
Tena kho pana samayena aññatarena bhikkhunā visaṃ pītaṃ hoti. Bhagavato etamatthaṃ ārocesuṃ. Anujānāmi bhikkhave gūthaṃ pāyetunti. Atha kho bhikkhūnaṃ etadahosi – ‘‘appaṭiggahitaṃ nu kho udāhu paṭiggahetabbo’’ti? Bhagavato etamatthaṃ ārocesuṃ. Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna 28 paṭiggahetabboti.
269. තෙන ඛො පන සමයෙන අඤ්‌ඤතරස්‌ස භික්‌ඛුනො ඝරදින්‌නකාබාධො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සීතාලොළිං පායෙතුන්‌ති.
269. Tena kho pana samayena aññatarassa bhikkhuno gharadinnakābādho hoti. Bhagavato etamatthaṃ ārocesuṃ. Anujānāmi, bhikkhave, sītāloḷiṃ pāyetunti.
තෙන ඛො පන සමයෙන අඤ්‌ඤතරො භික්‌ඛු දුට්‌ඨගහණිකො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ආමිසඛාරං පායෙතුන්‌ති.
Tena kho pana samayena aññataro bhikkhu duṭṭhagahaṇiko hoti. Bhagavato etamatthaṃ ārocesuṃ. Anujānāmi, bhikkhave, āmisakhāraṃ pāyetunti.
තෙන ඛො පන සමයෙන අඤ්‌ඤතරස්‌ස භික්‌ඛුනො පණ්‌ඩුරොගාබාධො හොති. භගවතො එතමත්‌ථං ආරොචෙසුං . අනුජානාමි, භික්‌ඛවෙ, මුත්‌තහරීතකං පායෙතුන්‌ති.
Tena kho pana samayena aññatarassa bhikkhuno paṇḍurogābādho hoti. Bhagavato etamatthaṃ ārocesuṃ . Anujānāmi, bhikkhave, muttaharītakaṃ pāyetunti.
තෙන ඛො පන සමයෙන අඤ්‌ඤතරස්‌ස භික්‌ඛුනො ඡවිදොසාබාධො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ගන්‌ධාලෙපං කාතුන්‌ති.
Tena kho pana samayena aññatarassa bhikkhuno chavidosābādho hoti. Bhagavato etamatthaṃ ārocesuṃ. Anujānāmi, bhikkhave, gandhālepaṃ kātunti.
තෙන ඛො පන සමයෙන අඤ්‌ඤතරො භික්‌ඛු අභිසන්‌නකායො හොති. භගවතො එතමත්‌ථං ආරොචෙසුං . අනුජානාමි, භික්‌ඛවෙ, විරෙචනං පාතුන්‌ති. අච්‌ඡකඤ්‌ජියා අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අච්‌ඡකඤ්‌ජින්‌ති. අකටයූසෙන අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, අකටයූසන්‌ති. කටාකටෙන අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, කටාකටන්‌ති. පටිච්‌ඡාදනීයෙන අත්‌ථො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, පටිච්‌ඡාදනීයන්‌ති.
Tena kho pana samayena aññataro bhikkhu abhisannakāyo hoti. Bhagavato etamatthaṃ ārocesuṃ . Anujānāmi, bhikkhave, virecanaṃ pātunti. Acchakañjiyā attho hoti. Bhagavato etamatthaṃ ārocesuṃ. Anujānāmi, bhikkhave, acchakañjinti. Akaṭayūsena attho hoti. Bhagavato etamatthaṃ ārocesuṃ. Anujānāmi, bhikkhave, akaṭayūsanti. Kaṭākaṭena attho hoti. Bhagavato etamatthaṃ ārocesuṃ. Anujānāmi, bhikkhave, kaṭākaṭanti. Paṭicchādanīyena attho hoti. Bhagavato etamatthaṃ ārocesuṃ. Anujānāmi, bhikkhave, paṭicchādanīyanti.
මූලාදිභෙසජ්‌ජකථා නිට්‌ඨිතා.
Mūlādibhesajjakathā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පඤ්‌චභෙසජ්‌ජාදිකථා • Pañcabhesajjādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පඤ්‌චභෙසජ්‌ජාදිකථාවණ්‌ණනා • Pañcabhesajjādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පඤ්‌චභෙසජ්‌ජාදිකථාවණ්‌ණනා • Pañcabhesajjādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පඤ්‌චභෙසජ්‌ජාදිකථාවණ්‌ණනා • Pañcabhesajjādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 161. මූලාදිභෙසජ්‌ජකථා • 161. Mūlādibhesajjakathā
