| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༦༡. མཱུལཱདིབྷེསཛྫཀཐཱ
161. Mūlādibhesajjakathā
༢༦༣. ཏེན ཁོ པན སམཡེན གིལཱནཱནཾ བྷིཀྑཱུནཾ མཱུལེཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི , བྷིཀྑཝེ, མཱུལཱནི བྷེསཛྫཱནི – ཧལིདྡིཾ, སིངྒིཝེརཾ, ཝཙཾ, ཝཙཏྠཾ 1, ཨཏིཝིསཾ, ཀཊུཀརོཧིཎིཾ, ཨུསཱིརཾ, བྷདྡམུཏྟཀཾ, ཡཱནི ཝཱ པནཉྙཱནིཔི ཨཏྠི མཱུལཱནི བྷེསཛྫཱནི, ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི – པཊིགྒཧེཏྭཱ ཡཱཝཛཱིཝཾ པརིཧརིཏུཾ; སཏི པཙྩཡེ པརིབྷུཉྫིཏུཾ། ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱཏི།
263. Tena kho pana samayena gilānānaṃ bhikkhūnaṃ mūlehi bhesajjehi attho hoti. Bhagavato etamatthaṃ ārocesuṃ. Anujānāmi , bhikkhave, mūlāni bhesajjāni – haliddiṃ, siṅgiveraṃ, vacaṃ, vacatthaṃ 2, ativisaṃ, kaṭukarohiṇiṃ, usīraṃ, bhaddamuttakaṃ, yāni vā panaññānipi atthi mūlāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
ཏེན ཁོ པན སམཡེན གིལཱནཱནཾ བྷིཀྑཱུནཾ མཱུལེཧི བྷེསཛྫེཧི པིཊྛེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ནིསདཾ ནིསདཔོཏཀནྟི།
Tena kho pana samayena gilānānaṃ bhikkhūnaṃ mūlehi bhesajjehi piṭṭhehi attho hoti. Bhagavato etamatthaṃ ārocesuṃ. Anujānāmi, bhikkhave, nisadaṃ nisadapotakanti.
ཏེན ཁོ པན སམཡེན གིལཱནཱནཾ བྷིཀྑཱུནཾ ཀསཱཝེཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཀསཱཝཱནི 3 བྷེསཛྫཱནི – ནིམྦཀསཱཝཾ, ཀུཊཛཀསཱཝཾ, པཊོལཀསཱཝཾ, ཕགྒཝཀསཱཝཾ, ནཏྟམཱལཀསཱཝཾ, ཡཱནི ཝཱ པནཉྙཱནིཔི ཨཏྠི ཀསཱཝཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི – པཊིགྒཧེཏྭཱ ཡཱཝཛཱིཝཾ པརིཧརིཏུཾ; སཏི པཙྩཡེ པརིབྷུཉྫིཏུཾ། ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱཏི།
Tena kho pana samayena gilānānaṃ bhikkhūnaṃ kasāvehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, kasāvāni 4 bhesajjāni – nimbakasāvaṃ, kuṭajakasāvaṃ, paṭolakasāvaṃ, phaggavakasāvaṃ, nattamālakasāvaṃ, yāni vā panaññānipi atthi kasāvāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
ཏེན ཁོ པན སམཡེན གིལཱནཱནཾ བྷིཀྑཱུནཾ པཎྞེཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ , པཎྞཱནི བྷེསཛྫཱནི – ནིམྦཔཎྞཾ, ཀུཊཛཔཎྞཾ, པཊོལཔཎྞཾ, སུལསིཔཎྞཾ, ཀཔྤཱསཔཎྞཾ, ཡཱནི ཝཱ པནཉྙཱནིཔི ཨཏྠི པཎྞཱནི བྷེསཛྫཱནི, ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི…པེ॰…།
Tena kho pana samayena gilānānaṃ bhikkhūnaṃ paṇṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave , paṇṇāni bhesajjāni – nimbapaṇṇaṃ, kuṭajapaṇṇaṃ, paṭolapaṇṇaṃ, sulasipaṇṇaṃ, kappāsapaṇṇaṃ, yāni vā panaññānipi atthi paṇṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
ཏེན ཁོ པན སམཡེན གིལཱནཱནཾ བྷིཀྑཱུནཾ ཕལེཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཕལཱནི བྷེསཛྫཱནི – བིལངྒཾ, པིཔྤལིཾ, མརིཙཾ, ཧརཱིཏཀཾ, ཝིབྷཱིཏཀཾ, ཨཱམལཀཾ, གོཊྛཕལཾ 5, ཡཱནི ཝཱ པནཉྙཱནིཔི ཨཏྠི ཕལཱནི བྷེསཛྫཱནི, ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི…པེ॰…།
Tena kho pana samayena gilānānaṃ bhikkhūnaṃ phalehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, phalāni bhesajjāni – bilaṅgaṃ, pippaliṃ, maricaṃ, harītakaṃ, vibhītakaṃ, āmalakaṃ, goṭṭhaphalaṃ 6, yāni vā panaññānipi atthi phalāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
ཏེན ཁོ པན སམཡེན གིལཱནཱནཾ བྷིཀྑཱུནཾ ཛཏཱུཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཛཏཱུནི བྷེསཛྫཱནི – ཧིངྒུཾ, ཧིངྒུཛཏུཾ, ཧིངྒུསིཔཱཊིཀཾ, ཏཀཾ, ཏཀཔཏྟིཾ, ཏཀཔཎྞིཾ , སཛྫུལསཾ, ཡཱནི ཝཱ པནཉྙཱནིཔི ཨཏྠི ཛཏཱུནི བྷེསཛྫཱནི, ནེཝ ཁཱདནཱིཡེ ཁཱདནཱིཡཏྠཾ ཕརནྟི…པེ॰…།
Tena kho pana samayena gilānānaṃ bhikkhūnaṃ jatūhi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, jatūni bhesajjāni – hiṅguṃ, hiṅgujatuṃ, hiṅgusipāṭikaṃ, takaṃ, takapattiṃ, takapaṇṇiṃ , sajjulasaṃ, yāni vā panaññānipi atthi jatūni bhesajjāni, neva khādanīye khādanīyatthaṃ pharanti…pe….
ཏེན ཁོ པན སམཡེན གིལཱནཱནཾ བྷིཀྑཱུནཾ ལོཎེཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ལོཎཱནི བྷེསཛྫཱནི – སཱམུདྡཾ, ཀཱལ༹ལོཎཾ, སིནྡྷཝཾ, ཨུབྦྷིདཾ 7, བིལཾ 8, ཡཱནི ཝཱ པནཉྙཱནིཔི ཨཏྠི ལོཎཱནི བྷེསཛྫཱནི, ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི – པཊིགྒཧེཏྭཱ ཡཱཝཛཱིཝཾ པརིཧརིཏུཾ; སཏི པཙྩཡེ པརིབྷུཉྫིཏུཾ། ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱཏི།
Tena kho pana samayena gilānānaṃ bhikkhūnaṃ loṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, loṇāni bhesajjāni – sāmuddaṃ, kāḷaloṇaṃ, sindhavaṃ, ubbhidaṃ 9, bilaṃ 10, yāni vā panaññānipi atthi loṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
༢༦༤. ཏེན ཁོ པན སམཡེན ཨཱཡསྨཏོ ཨཱནནྡསྶ ཨུཔཛ྄ཛྷཱཡསྶ ཨཱཡསྨཏོ བེལཊྛསཱིསསྶ ཐུལླཀཙྪཱབཱདྷོ ཧོཏི། ཏསྶ ལསིཀཱཡ ཙཱིཝརཱནི ཀཱཡེ ལགྒནྟི, ཏཱནི བྷིཀྑཱུ ཨུདཀེན ཏེམེཏྭཱ ཏེམེཏྭཱ ཨཔཀཌྜྷནྟི། ཨདྡསཱ ཁོ བྷགཝཱ སེནཱསནཙཱརིཀཾ ཨཱཧིཎྜནྟོ ཏེ བྷིཀྑཱུ ཏཱནི ཙཱིཝརཱནི ཨུདཀེན ཏེམེཏྭཱ ཏེམེཏྭཱ ཨཔཀཌྜྷནྟེ, དིསྭཱན ཡེན ཏེ བྷིཀྑཱུ ཏེནུཔསངྐམི, ཨུཔསངྐམིཏྭཱ ཏེ བྷིཀྑཱུ ཨེཏདཝོཙ – ‘‘ཀིཾ ཨིམསྶ, བྷིཀྑཝེ, བྷིཀྑུནོ ཨཱབཱདྷོ’’ཏི? ‘‘ཨིམསྶ, བྷནྟེ, ཨཱཡསྨཏོ ཐུལླཀཙྪཱབཱདྷོ, ལསིཀཱཡ ཙཱིཝརཱནི ཀཱཡེ ལགྒནྟི, ཏཱནི མཡཾ ཨུདཀེན ཏེམེཏྭཱ ཏེམེཏྭཱ ཨཔཀཌྜྷཱམཱ’’ཏི ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཡསྶ ཀཎྜུ ཝཱ, པིལ༹ཀཱ ཝཱ, ཨསྶཱཝོ ཝཱ, ཐུལླཀཙྪུ ཝཱ ཨཱབཱདྷོ, ཀཱཡོ ཝཱ དུགྒནྡྷོ, ཙུཎྞཱནི བྷེསཛྫཱནི; ཨགིལཱནསྶ ཚཀཎཾ མཏྟིཀཾ རཛནནིཔྤཀྐཾ། ཨནུཛཱནཱམི, བྷིཀྑཝེ, ཨུདུཀྑལཾ མུསལ’’ནྟི།
264. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti, tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho, lasikāya cīvarāni kāye lagganti, tāni mayaṃ udakena temetvā temetvā apakaḍḍhāmā’’ti . Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā, piḷakā vā, assāvo vā, thullakacchu vā ābādho, kāyo vā duggandho, cuṇṇāni bhesajjāni; agilānassa chakaṇaṃ mattikaṃ rajananippakkaṃ. Anujānāmi, bhikkhave, udukkhalaṃ musala’’nti.
ཏེན ཁོ པན སམཡེན གིལཱནཱནཾ བྷིཀྑཱུནཾ ཙུཎྞེཧི བྷེསཛྫེཧི ཙཱལིཏེཧི ཨཏྠོ ཧོཏི ། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཙུཎྞཙཱལིནིནྟི། སཎྷེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, དུསྶཙཱལིནིནྟི།
Tena kho pana samayena gilānānaṃ bhikkhūnaṃ cuṇṇehi bhesajjehi cālitehi attho hoti . Bhagavato etamatthaṃ ārocesuṃ. Anujānāmi, bhikkhave, cuṇṇacālininti. Saṇhehi attho hoti. Bhagavato etamatthaṃ ārocesuṃ. Anujānāmi, bhikkhave, dussacālininti.
ཏེན ཁོ པན སམཡེན ཨཉྙཏརསྶ བྷིཀྑུནོ ཨམནུསྶིཀཱབཱདྷོ ཧོཏི། ཏཾ ཨཱཙརིཡུཔཛ྄ཛྷཱཡཱ ཨུཔཊྛཧནྟཱ ནཱསཀྑིཾསུ ཨརོགཾ ཀཱཏུཾ། སོ སཱུཀརསཱུནཾ གནྟྭཱ ཨཱམཀམཾསཾ ཁཱདི, ཨཱམཀལོཧིཏཾ པིཝི ། ཏསྶ སོ ཨམནུསྶིཀཱབཱདྷོ པཊིཔྤསྶམྦྷི། བྷགཝཏོ ཨེཏམཏྠཾ ཨཱརོཙེསུཾ ། ཨནུཛཱནཱམི, བྷིཀྑཝེ, ཨམནུསྶིཀཱབཱདྷེ ཨཱམཀམཾསཾ ཨཱམཀལོཧིཏནྟི།
Tena kho pana samayena aññatarassa bhikkhuno amanussikābādho hoti. Taṃ ācariyupajjhāyā upaṭṭhahantā nāsakkhiṃsu arogaṃ kātuṃ. So sūkarasūnaṃ gantvā āmakamaṃsaṃ khādi, āmakalohitaṃ pivi . Tassa so amanussikābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, amanussikābādhe āmakamaṃsaṃ āmakalohitanti.
༢༦༥. ཏེན ཁོ པན སམཡེན ཨཉྙཏརསྶ བྷིཀྑུནོ ཙཀྑུརོགཱབཱདྷོ ཧོཏི། ཏཾ བྷིཀྑཱུ པརིགྒཧེཏྭཱ ཨུཙྩཱརམྤི པསྶཱཝམྤི ནིཀྑཱམེནྟི། ཨདྡསཱ ཁོ བྷགཝཱ སེནཱསནཙཱརིཀཾ ཨཱཧིཎྜནྟོ ཏེ བྷིཀྑཱུ ཏཾ བྷིཀྑུཾ པརིགྒཧེཏྭཱ ཨུཙྩཱརམྤི པསྶཱཝམྤི ནིཀྑཱམེནྟེ, དིསྭཱན ཡེན ཏེ བྷིཀྑཱུ ཏེནུཔསངྐམི, ཨུཔསངྐམིཏྭཱ ཏེ བྷིཀྑཱུ ཨེཏདཝོཙ – ‘‘ཀིཾ ཨིམསྶ, བྷིཀྑཝེ, བྷིཀྑུནོ ཨཱབཱདྷོ’’ཏི? ‘‘ཨིམསྶ, བྷནྟེ, ཨཱཡསྨཏོ ཙཀྑུརོགཱབཱདྷོ། ཨིམཾ མཡཾ པརིགྒཧེཏྭཱ ཨུཙྩཱརམྤི པསྶཱཝམྤི ནིཀྑཱམེམཱ’’ཏི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཨཉྫནཾ – ཀཱལ༹ཉྫནཾ, རསཉྫནཾ, སོཏཉྫནཾ, གེརུཀཾ, ཀཔལླ’’ནྟི། ཨཉྫནཱུཔཔིསནེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཙནྡནཾ, ཏགརཾ, ཀཱལཱ༹ནུསཱརིཡཾ, ཏཱལཱིསཾ, བྷདྡམུཏྟཀནྟི། ཏེན ཁོ པན སམཡེན བྷིཀྑཱུ པིཊྛཱནི ཨཉྫནཱནི ཙརུཀེསུཔི 11 སརཱཝཀེསུཔི ནིཀྑིཔནྟི; ཏིཎཙུཎྞེཧིཔི པཾསུཀེཧིཔི ཨོཀིརིཡནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཉྫནིནྟི།
265. Tena kho pana samayena aññatarassa bhikkhuno cakkhurogābādho hoti. Taṃ bhikkhū pariggahetvā uccārampi passāvampi nikkhāmenti. Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ pariggahetvā uccārampi passāvampi nikkhāmente, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato cakkhurogābādho. Imaṃ mayaṃ pariggahetvā uccārampi passāvampi nikkhāmemā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, añjanaṃ – kāḷañjanaṃ, rasañjanaṃ, sotañjanaṃ, gerukaṃ, kapalla’’nti. Añjanūpapisanehi attho hoti. Bhagavato etamatthaṃ ārocesuṃ. Anujānāmi, bhikkhave, candanaṃ, tagaraṃ, kāḷānusāriyaṃ, tālīsaṃ, bhaddamuttakanti. Tena kho pana samayena bhikkhū piṭṭhāni añjanāni carukesupi 12 sarāvakesupi nikkhipanti; tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, añjaninti.
ཏེན ཁོ པན སམཡེན ཚབྦགྒིཡཱ བྷིཀྑཱུ ཨུཙྩཱཝཙཱ ཨཉྫནིཡོ དྷཱརེནྟི – སོཝཎྞམཡཾ, རཱུཔིཡམཡཾ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘སེཡྻཐཱཔི གིཧཱི ཀཱམབྷོགིནོ’’ཏི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཨུཙྩཱཝཙཱ ཨཉྫནཱི དྷཱརེཏབྦཱ། ཡོ དྷཱརེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, ཨཊྛིམཡཾ, དནྟམཡཾ, ཝིསཱཎམཡཾ, ནལ༹མཡཾ, ཝེལུ༹མཡཾ, ཀཊྛམཡཾ, ཛཏུམཡཾ, ཕལམཡཾ, ལོཧམཡཾ, སངྑནཱབྷིམཡནྟི།
Tena kho pana samayena chabbaggiyā bhikkhū uccāvacā añjaniyo dhārenti – sovaṇṇamayaṃ, rūpiyamayaṃ. Manussā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ, dantamayaṃ, visāṇamayaṃ, naḷamayaṃ, veḷumayaṃ, kaṭṭhamayaṃ, jatumayaṃ, phalamayaṃ, lohamayaṃ, saṅkhanābhimayanti.
ཏེན ཁོ པན སམཡེན ཨཉྫནིཡོ ཨཔཱརུཏཱ ཧོནྟི, ཏིཎཙུཎྞེཧིཔི པཾསུཀེཧིཔི ཨོཀིརིཡནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཔིདྷཱནནྟི། ཨཔིདྷཱནཾ ནིཔཏཏི ། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སུཏྟཀེན བནྡྷིཏྭཱ ཨཉྫནིཡཱ བནྡྷིཏུནྟི། ཨཉྫནཱི ཕལཏི 13། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སུཏྟཀེན སིབྦེཏུནྟི།
Tena kho pana samayena añjaniyo apārutā honti, tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, apidhānanti. Apidhānaṃ nipatati . Bhagavato etamatthaṃ ārocesuṃ. Anujānāmi, bhikkhave, suttakena bandhitvā añjaniyā bandhitunti. Añjanī phalati 14. Bhagavato etamatthaṃ ārocesuṃ. Anujānāmi, bhikkhave, suttakena sibbetunti.
ཏེན ཁོ པན སམཡེན བྷིཀྑཱུ ཨངྒུལིཡཱ ཨཉྫནྟི, ཨཀྑཱིནི དུཀྑཱནི ཧོནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཉྫནིསལཱཀནྟི།
Tena kho pana samayena bhikkhū aṅguliyā añjanti, akkhīni dukkhāni honti. Bhagavato etamatthaṃ ārocesuṃ. Anujānāmi, bhikkhave, añjanisalākanti.
ཏེན ཁོ པན སམཡེན ཚབྦགྒིཡཱ བྷིཀྑཱུ ཨུཙྩཱཝཙཱ ཨཉྫནིསལཱཀཱཡོ དྷཱརེནྟི – སོཝཎྞམཡཾ རཱུཔིཡམཡཾ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི, ‘‘སེཡྻཐཱཔི གིཧཱི ཀཱམབྷོགིནོ’’ཏི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཨུཙྩཱཝཙཱ ཨཉྫནིསལཱཀཱ དྷཱརེཏབྦཱ། ཡོ དྷཱརེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, ཨཊྛིམཡཾ…པེ॰… སངྑནཱབྷིམཡནྟི།
Tena kho pana samayena chabbaggiyā bhikkhū uccāvacā añjanisalākāyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanisalākā dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
ཏེན ཁོ པན སམཡེན ཨཉྫནིསལཱཀཱ བྷཱུམིཡཾ པཏིཏཱ ཕརུསཱ ཧོཏི། བྷགཝཏོ ཨེཏམཏྠཾ ཨཱརོཙེསུཾ ། ཨནུཛཱནཱམི, བྷིཀྑཝེ, སལཱཀཋཱནིཡནྟི 15།
Tena kho pana samayena añjanisalākā bhūmiyaṃ patitā pharusā hoti. Bhagavato etamatthaṃ ārocesuṃ . Anujānāmi, bhikkhave, salākaṭhāniyanti 16.
ཏེན ཁོ པན སམཡེན བྷིཀྑཱུ ཨཉྫནིམྤི ཨཉྫནིསལཱཀམྤི ཧཏྠེན པརིཧརནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཉྫནིཏྠཝིཀནྟི། ཨཾསབདྡྷཀོ ན ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཾསབདྡྷཀཾ བནྡྷནསུཏྟཀནྟི།
Tena kho pana samayena bhikkhū añjanimpi añjanisalākampi hatthena pariharanti. Bhagavato etamatthaṃ ārocesuṃ. Anujānāmi, bhikkhave, añjanitthavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
༢༦༦. ཏེན ཁོ པན སམཡེན ཨཱཡསྨཏོ པིལིནྡཝཙྪསྶ སཱིསཱབྷིཏཱཔོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, མུདྡྷནི ཏེལཀནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ནཏྠུཀམྨནྟི། ནཏྠུ གལཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ནཏྠུཀརཎིནྟི།
266. Tena kho pana samayena āyasmato pilindavacchassa sīsābhitāpo hoti. Bhagavato etamatthaṃ ārocesuṃ. Anujānāmi, bhikkhave, muddhani telakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, natthukammanti. Natthu galati. Bhagavato etamatthaṃ ārocesuṃ. Anujānāmi, bhikkhave, natthukaraṇinti.
ཏེན ཁོ པན སམཡེན ཚབྦགྒིཡཱ བྷིཀྑཱུ ཨུཙྩཱཝཙཱ ནཏྠུཀརཎིཡོ དྷཱརེནྟི – སོཝཎྞམཡཾ རཱུཔིཡམཡཾ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི, ‘‘སེཡྻཐཱཔི གིཧཱི ཀཱམབྷོགིནོ’’ཏི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཨུཙྩཱཝཙཱ ནཏྠུཀརཎཱི དྷཱརེཏབྦཱ། ཡོ དྷཱརེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, ཨཊྛིམཡཾ…པེ॰… སངྑནཱབྷིམཡནྟི། ནཏྠུཾ ཝིསམཾ ཨཱསིཉྩནྟི 17། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ , ཡམཀནཏྠུཀརཎིནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, དྷཱུམཾ པཱཏུནྟི། ཏཉྙེཝ ཝཊྚིཾ ཨཱལིམྤེཏྭཱ པིཝནྟི , ཀཎྛོ དཧཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, དྷཱུམནེཏྟནྟི།
Tena kho pana samayena chabbaggiyā bhikkhū uccāvacā natthukaraṇiyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā natthukaraṇī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti. Natthuṃ visamaṃ āsiñcanti 18. Bhagavato etamatthaṃ ārocesuṃ. Anujānāmi, bhikkhave , yamakanatthukaraṇinti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, dhūmaṃ pātunti. Taññeva vaṭṭiṃ ālimpetvā pivanti , kaṇṭho dahati. Bhagavato etamatthaṃ ārocesuṃ. Anujānāmi, bhikkhave, dhūmanettanti.
ཏེན ཁོ པན སམཡེན ཚབྦགྒིཡཱ བྷིཀྑཱུ ཨུཙྩཱཝཙཱནི དྷཱུམནེཏྟཱནི དྷཱརེནྟི – སོཝཎྞམཡཾ རཱུཔིཡམཡཾ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – སེཡྻཐཱཔི གིཧཱི ཀཱམབྷོགིནོཏི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཨུཙྩཱཝཙཱནི དྷཱུམནེཏྟཱནི དྷཱརེཏབྦཱནི། ཡོ དྷཱརེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, ཨཊྛིམཡཾ…པེ॰… སངྑནཱབྷིམཡནྟི།
Tena kho pana samayena chabbaggiyā bhikkhū uccāvacāni dhūmanettāni dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti – seyyathāpi gihī kāmabhoginoti. Bhagavato etamatthaṃ ārocesuṃ. Na, bhikkhave, uccāvacāni dhūmanettāni dhāretabbāni. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
ཏེན ཁོ པན སམཡེན དྷཱུམནེཏྟཱནི ཨཔཱརུཏཱནི ཧོནྟི, པཱཎཀཱ པཝིསནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཔིདྷཱནནྟི།
Tena kho pana samayena dhūmanettāni apārutāni honti, pāṇakā pavisanti. Bhagavato etamatthaṃ ārocesuṃ. Anujānāmi, bhikkhave, apidhānanti.
ཏེན ཁོ པན སམཡེན བྷིཀྑཱུ དྷཱུམནེཏྟཱནི ཧཏྠེན པརིཧརནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, དྷཱུམནེཏྟཐཝིཀནྟི། ཨེཀཏོ གྷཾསིཡནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཡམཀཐཝིཀནྟི། ཨཾསབདྡྷཀོ ན ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཾསབདྡྷཀཾ བནྡྷནསུཏྟཀནྟི།
Tena kho pana samayena bhikkhū dhūmanettāni hatthena pariharanti. Bhagavato etamatthaṃ ārocesuṃ. Anujānāmi, bhikkhave, dhūmanettathavikanti. Ekato ghaṃsiyanti. Bhagavato etamatthaṃ ārocesuṃ. Anujānāmi, bhikkhave, yamakathavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
༢༦༧. ཏེན ཁོ པན སམཡེན ཨཱཡསྨཏོ པིལིནྡཝཙྪསྶ ཝཱཏཱབཱདྷོ ཧོཏི། ཝེཛྫཱ ཨེཝམཱཧཾསུ – ‘‘ཏེལཾ པཙིཏབྦ’’ནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཏེལཔཱཀནྟི། ཏསྨིཾ ཁོ པན ཏེལཔཱཀེ མཛྫཾ པཀྑིཔིཏབྦཾ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཏེལཔཱཀེ མཛྫཾ པཀྑིཔིཏུནྟི།
267. Tena kho pana samayena āyasmato pilindavacchassa vātābādho hoti. Vejjā evamāhaṃsu – ‘‘telaṃ pacitabba’’nti. Bhagavato etamatthaṃ ārocesuṃ. Anujānāmi, bhikkhave, telapākanti. Tasmiṃ kho pana telapāke majjaṃ pakkhipitabbaṃ hoti. Bhagavato etamatthaṃ ārocesuṃ. Anujānāmi, bhikkhave, telapāke majjaṃ pakkhipitunti.
ཏེན ཁོ པན སམཡེན ཚབྦགྒིཡཱ བྷིཀྑཱུ ཨཏིཔཀྑིཏྟམཛྫཱནི 19 ཏེལཱནི པཙནྟི, ཏཱནི པིཝིཏྭཱ མཛྫནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཨཏིཔཀྑིཏྟམཛྫཾ ཏེལཾ པཱཏབྦཾ། ཡོ པིཝེཡྻ, ཡཐཱདྷམྨོ ཀཱརེཏབྦོ། ཨནུཛཱནཱམི, བྷིཀྑཝེ, ཡསྨིཾ ཏེལཔཱཀེ མཛྫསྶ ན ཝཎྞོ ན གནྡྷོ ན རསོ པཉྙཱཡཏི, ཨེཝརཱུཔཾ མཛྫཔཀྑིཏྟཾ ཏེལཾ པཱཏུནྟི།
Tena kho pana samayena chabbaggiyā bhikkhū atipakkhittamajjāni 20 telāni pacanti, tāni pivitvā majjanti. Bhagavato etamatthaṃ ārocesuṃ. Na, bhikkhave, atipakkhittamajjaṃ telaṃ pātabbaṃ. Yo piveyya, yathādhammo kāretabbo. Anujānāmi, bhikkhave, yasmiṃ telapāke majjassa na vaṇṇo na gandho na raso paññāyati, evarūpaṃ majjapakkhittaṃ telaṃ pātunti.
ཏེན ཁོ པན སམཡེན བྷིཀྑཱུནཾ བཧུཾ ཨཏིཔཀྑིཏྟམཛྫཾ ཏེལཾ པཀྐཾ ཧོཏི། ཨཐ ཁོ བྷིཀྑཱུནཾ ཨེཏདཧོསི – ‘‘ཀཐཾ ནུ ཁོ ཨཏིཔཀྑིཏྟམཛྫེ ཏེལེ པཊིཔཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨབྦྷཉྫནཾ ཨདྷིཊྛཱཏུནྟི།
Tena kho pana samayena bhikkhūnaṃ bahuṃ atipakkhittamajjaṃ telaṃ pakkaṃ hoti. Atha kho bhikkhūnaṃ etadahosi – ‘‘kathaṃ nu kho atipakkhittamajje tele paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, abbhañjanaṃ adhiṭṭhātunti.
ཏེན ཁོ པན སམཡེན ཨཱཡསྨཏོ པིལིནྡཝཙྪསྶ བཧུཏརཾ ཏེལཾ པཀྐཾ ཧོཏི, ཏེལབྷཱཛནཾ ན ཝིཛྫཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཏཱིཎི ཏུམྦཱནི – ལོཧཏུམྦཾ, ཀཊྛཏུམྦཾ, ཕལཏུམྦནྟི།
Tena kho pana samayena āyasmato pilindavacchassa bahutaraṃ telaṃ pakkaṃ hoti, telabhājanaṃ na vijjati. Bhagavato etamatthaṃ ārocesuṃ. Anujānāmi, bhikkhave, tīṇi tumbāni – lohatumbaṃ, kaṭṭhatumbaṃ, phalatumbanti.
ཏེན ཁོ པན སམཡེན ཨཱཡསྨཏོ པིལིནྡཝཙྪསྶ ཨངྒཝཱཏོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སེདཀམྨནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སམྦྷཱརསེདནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, མཧཱསེདནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, བྷངྒོདཀནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨུདཀཀོཊྛཀནྟི།
Tena kho pana samayena āyasmato pilindavacchassa aṅgavāto hoti. Bhagavato etamatthaṃ ārocesuṃ. Anujānāmi, bhikkhave, sedakammanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, sambhārasedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, mahāsedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, bhaṅgodakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, udakakoṭṭhakanti.
ཏེན ཁོ པན སམཡེན ཨཱཡསྨཏོ པིལིནྡཝཙྪསྶ པབྦཝཱཏོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ལོཧིཏཾ མོཙེཏུནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ལོཧིཏཾ མོཙེཏྭཱ ཝིསཱཎེན གཱཧེཏུནྟི 21།
Tena kho pana samayena āyasmato pilindavacchassa pabbavāto hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetunti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetvā visāṇena gāhetunti 22.
ཏེན ཁོ པན སམཡེན ཨཱཡསྨཏོ པིལིནྡཝཙྪསྶ པཱདཱ ཕལིཏཱ 23 ཧོནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, པཱདབྦྷཉྫནནྟི། ནཀྑམནིཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, པཛྫཾ ཨབྷིསངྑརིཏུནྟི།
Tena kho pana samayena āyasmato pilindavacchassa pādā phalitā 24 honti. Bhagavato etamatthaṃ ārocesuṃ. Anujānāmi, bhikkhave, pādabbhañjananti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, pajjaṃ abhisaṅkharitunti.
ཏེན ཁོ པན སམཡེན ཨཉྙཏརསྶ བྷིཀྑུནོ གཎྜཱབཱདྷོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སཏྠཀམྨནྟི། ཀསཱཝོདཀེན ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཀསཱཝོདཀནྟི། ཏིལཀཀྐེན ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཏིལཀཀྐནྟི། ཀབལི༹ཀཱཡ ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཀབལི༹ཀནྟི། ཝཎབནྡྷནཙོལེ༹ན ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཝཎབནྡྷནཙོལ༹ནྟི། ཝཎོ ཀཎྜུཝཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སཱསཔཀུཊྚེན 25 ཕོསིཏུནྟི། ཝཎོ ཀིལིཛྫིཏྠ། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི , བྷིཀྑཝེ, དྷཱུམཾ ཀཱཏུནྟི། ཝཌྜྷམཾསཾ ཝུཊྛཱཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ལོཎསཀྑརིཀཱཡ ཚིནྡིཏུནྟི། ཝཎོ ན རུཧཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཝཎཏེལནྟི། ཏེལཾ གལཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི , བྷིཀྑཝེ, ཝིཀཱསིཀཾ སབྦཾ ཝཎཔཊིཀམྨནྟི།
Tena kho pana samayena aññatarassa bhikkhuno gaṇḍābādho hoti. Bhagavato etamatthaṃ ārocesuṃ. Anujānāmi, bhikkhave, satthakammanti. Kasāvodakena attho hoti. Bhagavato etamatthaṃ ārocesuṃ. Anujānāmi, bhikkhave, kasāvodakanti. Tilakakkena attho hoti. Bhagavato etamatthaṃ ārocesuṃ. Anujānāmi, bhikkhave, tilakakkanti. Kabaḷikāya attho hoti. Bhagavato etamatthaṃ ārocesuṃ. Anujānāmi, bhikkhave, kabaḷikanti. Vaṇabandhanacoḷena attho hoti. Bhagavato etamatthaṃ ārocesuṃ. Anujānāmi, bhikkhave, vaṇabandhanacoḷanti. Vaṇo kaṇḍuvati. Bhagavato etamatthaṃ ārocesuṃ. Anujānāmi, bhikkhave, sāsapakuṭṭena 26 phositunti. Vaṇo kilijjittha. Bhagavato etamatthaṃ ārocesuṃ. Anujānāmi , bhikkhave, dhūmaṃ kātunti. Vaḍḍhamaṃsaṃ vuṭṭhāti. Bhagavato etamatthaṃ ārocesuṃ. Anujānāmi, bhikkhave, loṇasakkharikāya chinditunti. Vaṇo na ruhati. Bhagavato etamatthaṃ ārocesuṃ. Anujānāmi, bhikkhave, vaṇatelanti. Telaṃ galati. Bhagavato etamatthaṃ ārocesuṃ. Anujānāmi , bhikkhave, vikāsikaṃ sabbaṃ vaṇapaṭikammanti.
༢༦༨. ཏེན ཁོ པན སམཡེན ཨཉྙཏརོ བྷིཀྑུ ཨཧིནཱ དཊྛོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཙཏྟཱརི མཧཱཝིཀཊཱནི དཱཏུཾ – གཱུཐཾ, མུཏྟཾ, ཚཱརིཀཾ, མཏྟིཀནྟི། ཨཐ ཁོ བྷིཀྑཱུནཾ ཨེཏདཧོསི – ‘‘ཨཔྤཊིགྒཧིཏཱནི ནུ ཁོ ཨུདཱཧུ པཊིགྒཧེཏབྦཱནཱི’’ཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སཏི ཀཔྤིཡཀཱརཀེ པཊིགྒཧཱཔེཏུཾ, ཨསཏི ཀཔྤིཡཀཱརཀེ སཱམཾ གཧེཏྭཱ པརིབྷུཉྫིཏུནྟི།
268. Tena kho pana samayena aññataro bhikkhu ahinā daṭṭho hoti. Bhagavato etamatthaṃ ārocesuṃ. Anujānāmi, bhikkhave, cattāri mahāvikaṭāni dātuṃ – gūthaṃ, muttaṃ, chārikaṃ, mattikanti. Atha kho bhikkhūnaṃ etadahosi – ‘‘appaṭiggahitāni nu kho udāhu paṭiggahetabbānī’’ti. Bhagavato etamatthaṃ ārocesuṃ. Anujānāmi, bhikkhave, sati kappiyakārake paṭiggahāpetuṃ, asati kappiyakārake sāmaṃ gahetvā paribhuñjitunti.
ཏེན ཁོ པན སམཡེན ཨཉྙཏརེན བྷིཀྑུནཱ ཝིསཾ པཱིཏཾ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི བྷིཀྑཝེ གཱུཐཾ པཱཡེཏུནྟི། ཨཐ ཁོ བྷིཀྑཱུནཾ ཨེཏདཧོསི – ‘‘ཨཔྤཊིགྒཧིཏཾ ནུ ཁོ ཨུདཱཧུ པཊིགྒཧེཏབྦོ’’ཏི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཡཾ ཀརོནྟོ པཊིགྒཎྷཱཏི, སྭེཝ པཊིགྒཧོ ཀཏོ, ན པུན 27 པཊིགྒཧེཏབྦོཏི།
Tena kho pana samayena aññatarena bhikkhunā visaṃ pītaṃ hoti. Bhagavato etamatthaṃ ārocesuṃ. Anujānāmi bhikkhave gūthaṃ pāyetunti. Atha kho bhikkhūnaṃ etadahosi – ‘‘appaṭiggahitaṃ nu kho udāhu paṭiggahetabbo’’ti? Bhagavato etamatthaṃ ārocesuṃ. Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna 28 paṭiggahetabboti.
༢༦༩. ཏེན ཁོ པན སམཡེན ཨཉྙཏརསྶ བྷིཀྑུནོ གྷརདིནྣཀཱབཱདྷོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སཱིཏཱལོལི༹ཾ པཱཡེཏུནྟི།
269. Tena kho pana samayena aññatarassa bhikkhuno gharadinnakābādho hoti. Bhagavato etamatthaṃ ārocesuṃ. Anujānāmi, bhikkhave, sītāloḷiṃ pāyetunti.
ཏེན ཁོ པན སམཡེན ཨཉྙཏརོ བྷིཀྑུ དུཊྛགཧཎིཀོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཱམིསཁཱརཾ པཱཡེཏུནྟི།
Tena kho pana samayena aññataro bhikkhu duṭṭhagahaṇiko hoti. Bhagavato etamatthaṃ ārocesuṃ. Anujānāmi, bhikkhave, āmisakhāraṃ pāyetunti.
ཏེན ཁོ པན སམཡེན ཨཉྙཏརསྶ བྷིཀྑུནོ པཎྜུརོགཱབཱདྷོ ཧོཏི། བྷགཝཏོ ཨེཏམཏྠཾ ཨཱརོཙེསུཾ ། ཨནུཛཱནཱམི, བྷིཀྑཝེ, མུཏྟཧརཱིཏཀཾ པཱཡེཏུནྟི།
Tena kho pana samayena aññatarassa bhikkhuno paṇḍurogābādho hoti. Bhagavato etamatthaṃ ārocesuṃ . Anujānāmi, bhikkhave, muttaharītakaṃ pāyetunti.
ཏེན ཁོ པན སམཡེན ཨཉྙཏརསྶ བྷིཀྑུནོ ཚཝིདོསཱབཱདྷོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, གནྡྷཱལེཔཾ ཀཱཏུནྟི།
Tena kho pana samayena aññatarassa bhikkhuno chavidosābādho hoti. Bhagavato etamatthaṃ ārocesuṃ. Anujānāmi, bhikkhave, gandhālepaṃ kātunti.
ཏེན ཁོ པན སམཡེན ཨཉྙཏརོ བྷིཀྑུ ཨབྷིསནྣཀཱཡོ ཧོཏི། བྷགཝཏོ ཨེཏམཏྠཾ ཨཱརོཙེསུཾ ། ཨནུཛཱནཱམི, བྷིཀྑཝེ, ཝིརེཙནཾ པཱཏུནྟི། ཨཙྪཀཉྫིཡཱ ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཙྪཀཉྫིནྟི། ཨཀཊཡཱུསེན ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཀཊཡཱུསནྟི། ཀཊཱཀཊེན ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཀཊཱཀཊནྟི། པཊིཙྪཱདནཱིཡེན ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, པཊིཙྪཱདནཱིཡནྟི།
Tena kho pana samayena aññataro bhikkhu abhisannakāyo hoti. Bhagavato etamatthaṃ ārocesuṃ . Anujānāmi, bhikkhave, virecanaṃ pātunti. Acchakañjiyā attho hoti. Bhagavato etamatthaṃ ārocesuṃ. Anujānāmi, bhikkhave, acchakañjinti. Akaṭayūsena attho hoti. Bhagavato etamatthaṃ ārocesuṃ. Anujānāmi, bhikkhave, akaṭayūsanti. Kaṭākaṭena attho hoti. Bhagavato etamatthaṃ ārocesuṃ. Anujānāmi, bhikkhave, kaṭākaṭanti. Paṭicchādanīyena attho hoti. Bhagavato etamatthaṃ ārocesuṃ. Anujānāmi, bhikkhave, paṭicchādanīyanti.
མཱུལཱདིབྷེསཛྫཀཐཱ ནིཊྛིཏཱ།
Mūlādibhesajjakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཉྩབྷེསཛྫཱདིཀཐཱ • Pañcabhesajjādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཉྩབྷེསཛྫཱདིཀཐཱཝཎྞནཱ • Pañcabhesajjādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པཉྩབྷེསཛྫཱདིཀཐཱཝཎྞནཱ • Pañcabhesajjādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / པཉྩབྷེསཛྫཱདིཀཐཱཝཎྞནཱ • Pañcabhesajjādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༦༡. མཱུལཱདིབྷེསཛྫཀཐཱ • 161. Mūlādibhesajjakathā
