| Library / Tipiṭaka / ਤਿਪਿਟਕ • Tipiṭaka / ਮਹਾવਗ੍ਗਪਾਲ਼ਿ • Mahāvaggapāḷi |
੧੬੧. ਮੂਲਾਦਿਭੇਸਜ੍ਜਕਥਾ
161. Mūlādibhesajjakathā
੨੬੩. ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਮੂਲੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ , ਭਿਕ੍ਖવੇ, ਮੂਲਾਨਿ ਭੇਸਜ੍ਜਾਨਿ – ਹਲਿਦ੍ਦਿਂ, ਸਿਙ੍ਗਿવੇਰਂ, વਚਂ, વਚਤ੍ਥਂ 1, ਅਤਿવਿਸਂ, ਕਟੁਕਰੋਹਿਣਿਂ, ਉਸੀਰਂ, ਭਦ੍ਦਮੁਤ੍ਤਕਂ, ਯਾਨਿ વਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨਿ, ਨੇવ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ – ਪਟਿਗ੍ਗਹੇਤ੍વਾ ਯਾવਜੀવਂ ਪਰਿਹਰਿਤੁਂ; ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ। ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ।
263. Tena kho pana samayena gilānānaṃ bhikkhūnaṃ mūlehi bhesajjehi attho hoti. Bhagavato etamatthaṃ ārocesuṃ. Anujānāmi , bhikkhave, mūlāni bhesajjāni – haliddiṃ, siṅgiveraṃ, vacaṃ, vacatthaṃ 2, ativisaṃ, kaṭukarohiṇiṃ, usīraṃ, bhaddamuttakaṃ, yāni vā panaññānipi atthi mūlāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਮੂਲੇਹਿ ਭੇਸਜ੍ਜੇਹਿ ਪਿਟ੍ਠੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਨਿਸਦਂ ਨਿਸਦਪੋਤਕਨ੍ਤਿ।
Tena kho pana samayena gilānānaṃ bhikkhūnaṃ mūlehi bhesajjehi piṭṭhehi attho hoti. Bhagavato etamatthaṃ ārocesuṃ. Anujānāmi, bhikkhave, nisadaṃ nisadapotakanti.
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਕਸਾવੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਕਸਾવਾਨਿ 3 ਭੇਸਜ੍ਜਾਨਿ – ਨਿਮ੍ਬਕਸਾવਂ, ਕੁਟਜਕਸਾવਂ, ਪਟੋਲਕਸਾવਂ, ਫਗ੍ਗવਕਸਾવਂ, ਨਤ੍ਤਮਾਲਕਸਾવਂ, ਯਾਨਿ વਾ ਪਨਞ੍ਞਾਨਿਪਿ ਅਤ੍ਥਿ ਕਸਾવਾਨਿ ਭੇਸਜ੍ਜਾਨਿ ਨੇવ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ – ਪਟਿਗ੍ਗਹੇਤ੍વਾ ਯਾવਜੀવਂ ਪਰਿਹਰਿਤੁਂ; ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ। ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ।
Tena kho pana samayena gilānānaṃ bhikkhūnaṃ kasāvehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, kasāvāni 4 bhesajjāni – nimbakasāvaṃ, kuṭajakasāvaṃ, paṭolakasāvaṃ, phaggavakasāvaṃ, nattamālakasāvaṃ, yāni vā panaññānipi atthi kasāvāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਪਣ੍ਣੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ , ਪਣ੍ਣਾਨਿ ਭੇਸਜ੍ਜਾਨਿ – ਨਿਮ੍ਬਪਣ੍ਣਂ, ਕੁਟਜਪਣ੍ਣਂ, ਪਟੋਲਪਣ੍ਣਂ, ਸੁਲਸਿਪਣ੍ਣਂ, ਕਪ੍ਪਾਸਪਣ੍ਣਂ, ਯਾਨਿ વਾ ਪਨਞ੍ਞਾਨਿਪਿ ਅਤ੍ਥਿ ਪਣ੍ਣਾਨਿ ਭੇਸਜ੍ਜਾਨਿ, ਨੇવ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ…ਪੇ॰…।
Tena kho pana samayena gilānānaṃ bhikkhūnaṃ paṇṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave , paṇṇāni bhesajjāni – nimbapaṇṇaṃ, kuṭajapaṇṇaṃ, paṭolapaṇṇaṃ, sulasipaṇṇaṃ, kappāsapaṇṇaṃ, yāni vā panaññānipi atthi paṇṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਫਲੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਫਲਾਨਿ ਭੇਸਜ੍ਜਾਨਿ – ਬਿਲਙ੍ਗਂ, ਪਿਪ੍ਪਲਿਂ, ਮਰਿਚਂ, ਹਰੀਤਕਂ, વਿਭੀਤਕਂ, ਆਮਲਕਂ, ਗੋਟ੍ਠਫਲਂ 5, ਯਾਨਿ વਾ ਪਨਞ੍ਞਾਨਿਪਿ ਅਤ੍ਥਿ ਫਲਾਨਿ ਭੇਸਜ੍ਜਾਨਿ, ਨੇવ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ…ਪੇ॰…।
Tena kho pana samayena gilānānaṃ bhikkhūnaṃ phalehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, phalāni bhesajjāni – bilaṅgaṃ, pippaliṃ, maricaṃ, harītakaṃ, vibhītakaṃ, āmalakaṃ, goṭṭhaphalaṃ 6, yāni vā panaññānipi atthi phalāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti…pe….
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਜਤੂਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਜਤੂਨਿ ਭੇਸਜ੍ਜਾਨਿ – ਹਿਙ੍ਗੁਂ, ਹਿਙ੍ਗੁਜਤੁਂ, ਹਿਙ੍ਗੁਸਿਪਾਟਿਕਂ, ਤਕਂ, ਤਕਪਤ੍ਤਿਂ, ਤਕਪਣ੍ਣਿਂ , ਸਜ੍ਜੁਲਸਂ, ਯਾਨਿ વਾ ਪਨਞ੍ਞਾਨਿਪਿ ਅਤ੍ਥਿ ਜਤੂਨਿ ਭੇਸਜ੍ਜਾਨਿ, ਨੇવ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ…ਪੇ॰…।
Tena kho pana samayena gilānānaṃ bhikkhūnaṃ jatūhi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, jatūni bhesajjāni – hiṅguṃ, hiṅgujatuṃ, hiṅgusipāṭikaṃ, takaṃ, takapattiṃ, takapaṇṇiṃ , sajjulasaṃ, yāni vā panaññānipi atthi jatūni bhesajjāni, neva khādanīye khādanīyatthaṃ pharanti…pe….
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਲੋਣੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਲੋਣਾਨਿ ਭੇਸਜ੍ਜਾਨਿ – ਸਾਮੁਦ੍ਦਂ, ਕਾਲ਼ਲੋਣਂ, ਸਿਨ੍ਧવਂ, ਉਬ੍ਭਿਦਂ 7, ਬਿਲਂ 8, ਯਾਨਿ વਾ ਪਨਞ੍ਞਾਨਿਪਿ ਅਤ੍ਥਿ ਲੋਣਾਨਿ ਭੇਸਜ੍ਜਾਨਿ, ਨੇવ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ – ਪਟਿਗ੍ਗਹੇਤ੍વਾ ਯਾવਜੀવਂ ਪਰਿਹਰਿਤੁਂ; ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ। ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ।
Tena kho pana samayena gilānānaṃ bhikkhūnaṃ loṇehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, loṇāni bhesajjāni – sāmuddaṃ, kāḷaloṇaṃ, sindhavaṃ, ubbhidaṃ 9, bilaṃ 10, yāni vā panaññānipi atthi loṇāni bhesajjāni, neva khādanīye khādanīyatthaṃ pharanti, na bhojanīye bhojanīyatthaṃ pharanti, tāni – paṭiggahetvā yāvajīvaṃ pariharituṃ; sati paccaye paribhuñjituṃ. Asati paccaye paribhuñjantassa āpatti dukkaṭassāti.
੨੬੪. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਉਪਜ੍ਝਾਯਸ੍ਸ ਆਯਸ੍ਮਤੋ ਬੇਲਟ੍ਠਸੀਸਸ੍ਸ ਥੁਲ੍ਲਕਚ੍ਛਾਬਾਧੋ ਹੋਤਿ। ਤਸ੍ਸ ਲਸਿਕਾਯ ਚੀવਰਾਨਿ ਕਾਯੇ ਲਗ੍ਗਨ੍ਤਿ, ਤਾਨਿ ਭਿਕ੍ਖੂ ਉਦਕੇਨ ਤੇਮੇਤ੍વਾ ਤੇਮੇਤ੍વਾ ਅਪਕਡ੍ਢਨ੍ਤਿ। ਅਦ੍ਦਸਾ ਖੋ ਭਗવਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਾਨਿ ਚੀવਰਾਨਿ ਉਦਕੇਨ ਤੇਮੇਤ੍વਾ ਤੇਮੇਤ੍વਾ ਅਪਕਡ੍ਢਨ੍ਤੇ, ਦਿਸ੍વਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਤੇ ਭਿਕ੍ਖੂ ਏਤਦવੋਚ – ‘‘ਕਿਂ ਇਮਸ੍ਸ, ਭਿਕ੍ਖવੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਥੁਲ੍ਲਕਚ੍ਛਾਬਾਧੋ, ਲਸਿਕਾਯ ਚੀવਰਾਨਿ ਕਾਯੇ ਲਗ੍ਗਨ੍ਤਿ, ਤਾਨਿ ਮਯਂ ਉਦਕੇਨ ਤੇਮੇਤ੍વਾ ਤੇਮੇਤ੍વਾ ਅਪਕਡ੍ਢਾਮਾ’’ਤਿ । ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖવੇ, ਯਸ੍ਸ ਕਣ੍ਡੁ વਾ, ਪਿਲ਼ਕਾ વਾ, ਅਸ੍ਸਾવੋ વਾ, ਥੁਲ੍ਲਕਚ੍ਛੁ વਾ ਆਬਾਧੋ, ਕਾਯੋ વਾ ਦੁਗ੍ਗਨ੍ਧੋ, ਚੁਣ੍ਣਾਨਿ ਭੇਸਜ੍ਜਾਨਿ; ਅਗਿਲਾਨਸ੍ਸ ਛਕਣਂ ਮਤ੍ਤਿਕਂ ਰਜਨਨਿਪ੍ਪਕ੍ਕਂ। ਅਨੁਜਾਨਾਮਿ, ਭਿਕ੍ਖવੇ, ਉਦੁਕ੍ਖਲਂ ਮੁਸਲ’’ਨ੍ਤਿ।
264. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti, tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho, lasikāya cīvarāni kāye lagganti, tāni mayaṃ udakena temetvā temetvā apakaḍḍhāmā’’ti . Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā, piḷakā vā, assāvo vā, thullakacchu vā ābādho, kāyo vā duggandho, cuṇṇāni bhesajjāni; agilānassa chakaṇaṃ mattikaṃ rajananippakkaṃ. Anujānāmi, bhikkhave, udukkhalaṃ musala’’nti.
ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਚੁਣ੍ਣੇਹਿ ਭੇਸਜ੍ਜੇਹਿ ਚਾਲਿਤੇਹਿ ਅਤ੍ਥੋ ਹੋਤਿ । ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਚੁਣ੍ਣਚਾਲਿਨਿਨ੍ਤਿ। ਸਣ੍ਹੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਦੁਸ੍ਸਚਾਲਿਨਿਨ੍ਤਿ।
Tena kho pana samayena gilānānaṃ bhikkhūnaṃ cuṇṇehi bhesajjehi cālitehi attho hoti . Bhagavato etamatthaṃ ārocesuṃ. Anujānāmi, bhikkhave, cuṇṇacālininti. Saṇhehi attho hoti. Bhagavato etamatthaṃ ārocesuṃ. Anujānāmi, bhikkhave, dussacālininti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਅਮਨੁਸ੍ਸਿਕਾਬਾਧੋ ਹੋਤਿ। ਤਂ ਆਚਰਿਯੁਪਜ੍ਝਾਯਾ ਉਪਟ੍ਠਹਨ੍ਤਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ। ਸੋ ਸੂਕਰਸੂਨਂ ਗਨ੍ਤ੍વਾ ਆਮਕਮਂਸਂ ਖਾਦਿ, ਆਮਕਲੋਹਿਤਂ ਪਿવਿ । ਤਸ੍ਸ ਸੋ ਅਮਨੁਸ੍ਸਿਕਾਬਾਧੋ ਪਟਿਪ੍ਪਸ੍ਸਮ੍ਭਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ । ਅਨੁਜਾਨਾਮਿ, ਭਿਕ੍ਖવੇ, ਅਮਨੁਸ੍ਸਿਕਾਬਾਧੇ ਆਮਕਮਂਸਂ ਆਮਕਲੋਹਿਤਨ੍ਤਿ।
Tena kho pana samayena aññatarassa bhikkhuno amanussikābādho hoti. Taṃ ācariyupajjhāyā upaṭṭhahantā nāsakkhiṃsu arogaṃ kātuṃ. So sūkarasūnaṃ gantvā āmakamaṃsaṃ khādi, āmakalohitaṃ pivi . Tassa so amanussikābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, amanussikābādhe āmakamaṃsaṃ āmakalohitanti.
੨੬੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਚਕ੍ਖੁਰੋਗਾਬਾਧੋ ਹੋਤਿ। ਤਂ ਭਿਕ੍ਖੂ ਪਰਿਗ੍ਗਹੇਤ੍વਾ ਉਚ੍ਚਾਰਮ੍ਪਿ ਪਸ੍ਸਾવਮ੍ਪਿ ਨਿਕ੍ਖਾਮੇਨ੍ਤਿ। ਅਦ੍ਦਸਾ ਖੋ ਭਗવਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਪਰਿਗ੍ਗਹੇਤ੍વਾ ਉਚ੍ਚਾਰਮ੍ਪਿ ਪਸ੍ਸਾવਮ੍ਪਿ ਨਿਕ੍ਖਾਮੇਨ੍ਤੇ, ਦਿਸ੍વਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਤੇ ਭਿਕ੍ਖੂ ਏਤਦવੋਚ – ‘‘ਕਿਂ ਇਮਸ੍ਸ, ਭਿਕ੍ਖવੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਚਕ੍ਖੁਰੋਗਾਬਾਧੋ। ਇਮਂ ਮਯਂ ਪਰਿਗ੍ਗਹੇਤ੍વਾ ਉਚ੍ਚਾਰਮ੍ਪਿ ਪਸ੍ਸਾવਮ੍ਪਿ ਨਿਕ੍ਖਾਮੇਮਾ’’ਤਿ। ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖવੇ, ਅਞ੍ਜਨਂ – ਕਾਲ਼ਞ੍ਜਨਂ, ਰਸਞ੍ਜਨਂ, ਸੋਤਞ੍ਜਨਂ, ਗੇਰੁਕਂ, ਕਪਲ੍ਲ’’ਨ੍ਤਿ। ਅਞ੍ਜਨੂਪਪਿਸਨੇਹਿ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਚਨ੍ਦਨਂ, ਤਗਰਂ, ਕਾਲ਼ਾਨੁਸਾਰਿਯਂ, ਤਾਲੀਸਂ, ਭਦ੍ਦਮੁਤ੍ਤਕਨ੍ਤਿ। ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਿਟ੍ਠਾਨਿ ਅਞ੍ਜਨਾਨਿ ਚਰੁਕੇਸੁਪਿ 11 ਸਰਾવਕੇਸੁਪਿ ਨਿਕ੍ਖਿਪਨ੍ਤਿ; ਤਿਣਚੁਣ੍ਣੇਹਿਪਿ ਪਂਸੁਕੇਹਿਪਿ ਓਕਿਰਿਯਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਞ੍ਜਨਿਨ੍ਤਿ।
265. Tena kho pana samayena aññatarassa bhikkhuno cakkhurogābādho hoti. Taṃ bhikkhū pariggahetvā uccārampi passāvampi nikkhāmenti. Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ pariggahetvā uccārampi passāvampi nikkhāmente, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato cakkhurogābādho. Imaṃ mayaṃ pariggahetvā uccārampi passāvampi nikkhāmemā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, añjanaṃ – kāḷañjanaṃ, rasañjanaṃ, sotañjanaṃ, gerukaṃ, kapalla’’nti. Añjanūpapisanehi attho hoti. Bhagavato etamatthaṃ ārocesuṃ. Anujānāmi, bhikkhave, candanaṃ, tagaraṃ, kāḷānusāriyaṃ, tālīsaṃ, bhaddamuttakanti. Tena kho pana samayena bhikkhū piṭṭhāni añjanāni carukesupi 12 sarāvakesupi nikkhipanti; tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, añjaninti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾવਚਾ ਅਞ੍ਜਨਿਯੋ ਧਾਰੇਨ੍ਤਿ – ਸੋવਣ੍ਣਮਯਂ, ਰੂਪਿਯਮਯਂ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਉਚ੍ਚਾવਚਾ ਅਞ੍ਜਨੀ ਧਾਰੇਤਬ੍ਬਾ। ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਅਟ੍ਠਿਮਯਂ, ਦਨ੍ਤਮਯਂ, વਿਸਾਣਮਯਂ, ਨਲ਼ਮਯਂ, વੇਲ਼ੁਮਯਂ, ਕਟ੍ਠਮਯਂ, ਜਤੁਮਯਂ, ਫਲਮਯਂ, ਲੋਹਮਯਂ, ਸਙ੍ਖਨਾਭਿਮਯਨ੍ਤਿ।
Tena kho pana samayena chabbaggiyā bhikkhū uccāvacā añjaniyo dhārenti – sovaṇṇamayaṃ, rūpiyamayaṃ. Manussā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ, dantamayaṃ, visāṇamayaṃ, naḷamayaṃ, veḷumayaṃ, kaṭṭhamayaṃ, jatumayaṃ, phalamayaṃ, lohamayaṃ, saṅkhanābhimayanti.
ਤੇਨ ਖੋ ਪਨ ਸਮਯੇਨ ਅਞ੍ਜਨਿਯੋ ਅਪਾਰੁਤਾ ਹੋਨ੍ਤਿ, ਤਿਣਚੁਣ੍ਣੇਹਿਪਿ ਪਂਸੁਕੇਹਿਪਿ ਓਕਿਰਿਯਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਪਿਧਾਨਨ੍ਤਿ। ਅਪਿਧਾਨਂ ਨਿਪਤਤਿ । ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸੁਤ੍ਤਕੇਨ ਬਨ੍ਧਿਤ੍વਾ ਅਞ੍ਜਨਿਯਾ ਬਨ੍ਧਿਤੁਨ੍ਤਿ। ਅਞ੍ਜਨੀ ਫਲਤਿ 13। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸੁਤ੍ਤਕੇਨ ਸਿਬ੍ਬੇਤੁਨ੍ਤਿ।
Tena kho pana samayena añjaniyo apārutā honti, tiṇacuṇṇehipi paṃsukehipi okiriyanti. Bhagavato etamatthaṃ ārocesuṃ. Anujānāmi, bhikkhave, apidhānanti. Apidhānaṃ nipatati . Bhagavato etamatthaṃ ārocesuṃ. Anujānāmi, bhikkhave, suttakena bandhitvā añjaniyā bandhitunti. Añjanī phalati 14. Bhagavato etamatthaṃ ārocesuṃ. Anujānāmi, bhikkhave, suttakena sibbetunti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਙ੍ਗੁਲਿਯਾ ਅਞ੍ਜਨ੍ਤਿ, ਅਕ੍ਖੀਨਿ ਦੁਕ੍ਖਾਨਿ ਹੋਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਞ੍ਜਨਿਸਲਾਕਨ੍ਤਿ।
Tena kho pana samayena bhikkhū aṅguliyā añjanti, akkhīni dukkhāni honti. Bhagavato etamatthaṃ ārocesuṃ. Anujānāmi, bhikkhave, añjanisalākanti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾવਚਾ ਅਞ੍ਜਨਿਸਲਾਕਾਯੋ ਧਾਰੇਨ੍ਤਿ – ਸੋવਣ੍ਣਮਯਂ ਰੂਪਿਯਮਯਂ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਉਚ੍ਚਾવਚਾ ਅਞ੍ਜਨਿਸਲਾਕਾ ਧਾਰੇਤਬ੍ਬਾ। ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਅਟ੍ਠਿਮਯਂ…ਪੇ॰… ਸਙ੍ਖਨਾਭਿਮਯਨ੍ਤਿ।
Tena kho pana samayena chabbaggiyā bhikkhū uccāvacā añjanisalākāyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā añjanisalākā dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
ਤੇਨ ਖੋ ਪਨ ਸਮਯੇਨ ਅਞ੍ਜਨਿਸਲਾਕਾ ਭੂਮਿਯਂ ਪਤਿਤਾ ਫਰੁਸਾ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ । ਅਨੁਜਾਨਾਮਿ, ਭਿਕ੍ਖવੇ, ਸਲਾਕਠਾਨਿਯਨ੍ਤਿ 15।
Tena kho pana samayena añjanisalākā bhūmiyaṃ patitā pharusā hoti. Bhagavato etamatthaṃ ārocesuṃ . Anujānāmi, bhikkhave, salākaṭhāniyanti 16.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਞ੍ਜਨਿਮ੍ਪਿ ਅਞ੍ਜਨਿਸਲਾਕਮ੍ਪਿ ਹਤ੍ਥੇਨ ਪਰਿਹਰਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਞ੍ਜਨਿਤ੍ਥવਿਕਨ੍ਤਿ। ਅਂਸਬਦ੍ਧਕੋ ਨ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕਨ੍ਤਿ।
Tena kho pana samayena bhikkhū añjanimpi añjanisalākampi hatthena pariharanti. Bhagavato etamatthaṃ ārocesuṃ. Anujānāmi, bhikkhave, añjanitthavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
੨੬੬. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਸੀਸਾਭਿਤਾਪੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਮੁਦ੍ਧਨਿ ਤੇਲਕਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਨਤ੍ਥੁਕਮ੍ਮਨ੍ਤਿ। ਨਤ੍ਥੁ ਗਲਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਨਤ੍ਥੁਕਰਣਿਨ੍ਤਿ।
266. Tena kho pana samayena āyasmato pilindavacchassa sīsābhitāpo hoti. Bhagavato etamatthaṃ ārocesuṃ. Anujānāmi, bhikkhave, muddhani telakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, natthukammanti. Natthu galati. Bhagavato etamatthaṃ ārocesuṃ. Anujānāmi, bhikkhave, natthukaraṇinti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾવਚਾ ਨਤ੍ਥੁਕਰਣਿਯੋ ਧਾਰੇਨ੍ਤਿ – ਸੋવਣ੍ਣਮਯਂ ਰੂਪਿਯਮਯਂ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਉਚ੍ਚਾવਚਾ ਨਤ੍ਥੁਕਰਣੀ ਧਾਰੇਤਬ੍ਬਾ। ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਅਟ੍ਠਿਮਯਂ…ਪੇ॰… ਸਙ੍ਖਨਾਭਿਮਯਨ੍ਤਿ। ਨਤ੍ਥੁਂ વਿਸਮਂ ਆਸਿਞ੍ਚਨ੍ਤਿ 17। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ , ਯਮਕਨਤ੍ਥੁਕਰਣਿਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਧੂਮਂ ਪਾਤੁਨ੍ਤਿ। ਤਞ੍ਞੇવ વਟ੍ਟਿਂ ਆਲਿਮ੍ਪੇਤ੍વਾ ਪਿવਨ੍ਤਿ , ਕਣ੍ਠੋ ਦਹਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਧੂਮਨੇਤ੍ਤਨ੍ਤਿ।
Tena kho pana samayena chabbaggiyā bhikkhū uccāvacā natthukaraṇiyo dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, uccāvacā natthukaraṇī dhāretabbā. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti. Natthuṃ visamaṃ āsiñcanti 18. Bhagavato etamatthaṃ ārocesuṃ. Anujānāmi, bhikkhave , yamakanatthukaraṇinti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, dhūmaṃ pātunti. Taññeva vaṭṭiṃ ālimpetvā pivanti , kaṇṭho dahati. Bhagavato etamatthaṃ ārocesuṃ. Anujānāmi, bhikkhave, dhūmanettanti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾવਚਾਨਿ ਧੂਮਨੇਤ੍ਤਾਨਿ ਧਾਰੇਨ੍ਤਿ – ਸੋવਣ੍ਣਮਯਂ ਰੂਪਿਯਮਯਂ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਉਚ੍ਚਾવਚਾਨਿ ਧੂਮਨੇਤ੍ਤਾਨਿ ਧਾਰੇਤਬ੍ਬਾਨਿ। ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਅਟ੍ਠਿਮਯਂ…ਪੇ॰… ਸਙ੍ਖਨਾਭਿਮਯਨ੍ਤਿ।
Tena kho pana samayena chabbaggiyā bhikkhū uccāvacāni dhūmanettāni dhārenti – sovaṇṇamayaṃ rūpiyamayaṃ. Manussā ujjhāyanti khiyyanti vipācenti – seyyathāpi gihī kāmabhoginoti. Bhagavato etamatthaṃ ārocesuṃ. Na, bhikkhave, uccāvacāni dhūmanettāni dhāretabbāni. Yo dhāreyya, āpatti dukkaṭassa. Anujānāmi, bhikkhave, aṭṭhimayaṃ…pe… saṅkhanābhimayanti.
ਤੇਨ ਖੋ ਪਨ ਸਮਯੇਨ ਧੂਮਨੇਤ੍ਤਾਨਿ ਅਪਾਰੁਤਾਨਿ ਹੋਨ੍ਤਿ, ਪਾਣਕਾ ਪવਿਸਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਪਿਧਾਨਨ੍ਤਿ।
Tena kho pana samayena dhūmanettāni apārutāni honti, pāṇakā pavisanti. Bhagavato etamatthaṃ ārocesuṃ. Anujānāmi, bhikkhave, apidhānanti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਧੂਮਨੇਤ੍ਤਾਨਿ ਹਤ੍ਥੇਨ ਪਰਿਹਰਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਧੂਮਨੇਤ੍ਤਥવਿਕਨ੍ਤਿ। ਏਕਤੋ ਘਂਸਿਯਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਯਮਕਥવਿਕਨ੍ਤਿ। ਅਂਸਬਦ੍ਧਕੋ ਨ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕਨ੍ਤਿ।
Tena kho pana samayena bhikkhū dhūmanettāni hatthena pariharanti. Bhagavato etamatthaṃ ārocesuṃ. Anujānāmi, bhikkhave, dhūmanettathavikanti. Ekato ghaṃsiyanti. Bhagavato etamatthaṃ ārocesuṃ. Anujānāmi, bhikkhave, yamakathavikanti. Aṃsabaddhako na hoti. Bhagavato etamatthaṃ ārocesuṃ. Anujānāmi, bhikkhave, aṃsabaddhakaṃ bandhanasuttakanti.
੨੬੭. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ વਾਤਾਬਾਧੋ ਹੋਤਿ। વੇਜ੍ਜਾ ਏવਮਾਹਂਸੁ – ‘‘ਤੇਲਂ ਪਚਿਤਬ੍ਬ’’ਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਤੇਲਪਾਕਨ੍ਤਿ। ਤਸ੍ਮਿਂ ਖੋ ਪਨ ਤੇਲਪਾਕੇ ਮਜ੍ਜਂ ਪਕ੍ਖਿਪਿਤਬ੍ਬਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਤੇਲਪਾਕੇ ਮਜ੍ਜਂ ਪਕ੍ਖਿਪਿਤੁਨ੍ਤਿ।
267. Tena kho pana samayena āyasmato pilindavacchassa vātābādho hoti. Vejjā evamāhaṃsu – ‘‘telaṃ pacitabba’’nti. Bhagavato etamatthaṃ ārocesuṃ. Anujānāmi, bhikkhave, telapākanti. Tasmiṃ kho pana telapāke majjaṃ pakkhipitabbaṃ hoti. Bhagavato etamatthaṃ ārocesuṃ. Anujānāmi, bhikkhave, telapāke majjaṃ pakkhipitunti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਪਕ੍ਖਿਤ੍ਤਮਜ੍ਜਾਨਿ 19 ਤੇਲਾਨਿ ਪਚਨ੍ਤਿ, ਤਾਨਿ ਪਿવਿਤ੍વਾ ਮਜ੍ਜਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਅਤਿਪਕ੍ਖਿਤ੍ਤਮਜ੍ਜਂ ਤੇਲਂ ਪਾਤਬ੍ਬਂ। ਯੋ ਪਿવੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ। ਅਨੁਜਾਨਾਮਿ, ਭਿਕ੍ਖવੇ, ਯਸ੍ਮਿਂ ਤੇਲਪਾਕੇ ਮਜ੍ਜਸ੍ਸ ਨ વਣ੍ਣੋ ਨ ਗਨ੍ਧੋ ਨ ਰਸੋ ਪਞ੍ਞਾਯਤਿ, ਏવਰੂਪਂ ਮਜ੍ਜਪਕ੍ਖਿਤ੍ਤਂ ਤੇਲਂ ਪਾਤੁਨ੍ਤਿ।
Tena kho pana samayena chabbaggiyā bhikkhū atipakkhittamajjāni 20 telāni pacanti, tāni pivitvā majjanti. Bhagavato etamatthaṃ ārocesuṃ. Na, bhikkhave, atipakkhittamajjaṃ telaṃ pātabbaṃ. Yo piveyya, yathādhammo kāretabbo. Anujānāmi, bhikkhave, yasmiṃ telapāke majjassa na vaṇṇo na gandho na raso paññāyati, evarūpaṃ majjapakkhittaṃ telaṃ pātunti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਬਹੁਂ ਅਤਿਪਕ੍ਖਿਤ੍ਤਮਜ੍ਜਂ ਤੇਲਂ ਪਕ੍ਕਂ ਹੋਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਅਤਿਪਕ੍ਖਿਤ੍ਤਮਜ੍ਜੇ ਤੇਲੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਬ੍ਭਞ੍ਜਨਂ ਅਧਿਟ੍ਠਾਤੁਨ੍ਤਿ।
Tena kho pana samayena bhikkhūnaṃ bahuṃ atipakkhittamajjaṃ telaṃ pakkaṃ hoti. Atha kho bhikkhūnaṃ etadahosi – ‘‘kathaṃ nu kho atipakkhittamajje tele paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, abbhañjanaṃ adhiṭṭhātunti.
ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਬਹੁਤਰਂ ਤੇਲਂ ਪਕ੍ਕਂ ਹੋਤਿ, ਤੇਲਭਾਜਨਂ ਨ વਿਜ੍ਜਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਤੀਣਿ ਤੁਮ੍ਬਾਨਿ – ਲੋਹਤੁਮ੍ਬਂ, ਕਟ੍ਠਤੁਮ੍ਬਂ, ਫਲਤੁਮ੍ਬਨ੍ਤਿ।
Tena kho pana samayena āyasmato pilindavacchassa bahutaraṃ telaṃ pakkaṃ hoti, telabhājanaṃ na vijjati. Bhagavato etamatthaṃ ārocesuṃ. Anujānāmi, bhikkhave, tīṇi tumbāni – lohatumbaṃ, kaṭṭhatumbaṃ, phalatumbanti.
ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਅਙ੍ਗવਾਤੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸੇਦਕਮ੍ਮਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸਮ੍ਭਾਰਸੇਦਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਮਹਾਸੇਦਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਭਙ੍ਗੋਦਕਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਉਦਕਕੋਟ੍ਠਕਨ੍ਤਿ।
Tena kho pana samayena āyasmato pilindavacchassa aṅgavāto hoti. Bhagavato etamatthaṃ ārocesuṃ. Anujānāmi, bhikkhave, sedakammanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, sambhārasedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, mahāsedanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, bhaṅgodakanti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, udakakoṭṭhakanti.
ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਪਬ੍ਬવਾਤੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਲੋਹਿਤਂ ਮੋਚੇਤੁਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਲੋਹਿਤਂ ਮੋਚੇਤ੍વਾ વਿਸਾਣੇਨ ਗਾਹੇਤੁਨ੍ਤਿ 21।
Tena kho pana samayena āyasmato pilindavacchassa pabbavāto hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetunti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, lohitaṃ mocetvā visāṇena gāhetunti 22.
ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਪਾਦਾ ਫਲਿਤਾ 23 ਹੋਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਪਾਦਬ੍ਭਞ੍ਜਨਨ੍ਤਿ। ਨਕ੍ਖਮਨਿਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਪਜ੍ਜਂ ਅਭਿਸਙ੍ਖਰਿਤੁਨ੍ਤਿ।
Tena kho pana samayena āyasmato pilindavacchassa pādā phalitā 24 honti. Bhagavato etamatthaṃ ārocesuṃ. Anujānāmi, bhikkhave, pādabbhañjananti. Nakkhamaniyo hoti. Bhagavato etamatthaṃ ārocesuṃ. Anujānāmi, bhikkhave, pajjaṃ abhisaṅkharitunti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਗਣ੍ਡਾਬਾਧੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸਤ੍ਥਕਮ੍ਮਨ੍ਤਿ। ਕਸਾવੋਦਕੇਨ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਕਸਾવੋਦਕਨ੍ਤਿ। ਤਿਲਕਕ੍ਕੇਨ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਤਿਲਕਕ੍ਕਨ੍ਤਿ। ਕਬਲ਼ਿਕਾਯ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਕਬਲ਼ਿਕਨ੍ਤਿ। વਣਬਨ੍ਧਨਚੋਲ਼ੇਨ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, વਣਬਨ੍ਧਨਚੋਲ਼ਨ੍ਤਿ। વਣੋ ਕਣ੍ਡੁવਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸਾਸਪਕੁਟ੍ਟੇਨ 25 ਫੋਸਿਤੁਨ੍ਤਿ। વਣੋ ਕਿਲਿਜ੍ਜਿਤ੍ਥ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ , ਭਿਕ੍ਖવੇ, ਧੂਮਂ ਕਾਤੁਨ੍ਤਿ। વਡ੍ਢਮਂਸਂ વੁਟ੍ਠਾਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਲੋਣਸਕ੍ਖਰਿਕਾਯ ਛਿਨ੍ਦਿਤੁਨ੍ਤਿ। વਣੋ ਨ ਰੁਹਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, વਣਤੇਲਨ੍ਤਿ। ਤੇਲਂ ਗਲਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ , ਭਿਕ੍ਖવੇ, વਿਕਾਸਿਕਂ ਸਬ੍ਬਂ વਣਪਟਿਕਮ੍ਮਨ੍ਤਿ।
Tena kho pana samayena aññatarassa bhikkhuno gaṇḍābādho hoti. Bhagavato etamatthaṃ ārocesuṃ. Anujānāmi, bhikkhave, satthakammanti. Kasāvodakena attho hoti. Bhagavato etamatthaṃ ārocesuṃ. Anujānāmi, bhikkhave, kasāvodakanti. Tilakakkena attho hoti. Bhagavato etamatthaṃ ārocesuṃ. Anujānāmi, bhikkhave, tilakakkanti. Kabaḷikāya attho hoti. Bhagavato etamatthaṃ ārocesuṃ. Anujānāmi, bhikkhave, kabaḷikanti. Vaṇabandhanacoḷena attho hoti. Bhagavato etamatthaṃ ārocesuṃ. Anujānāmi, bhikkhave, vaṇabandhanacoḷanti. Vaṇo kaṇḍuvati. Bhagavato etamatthaṃ ārocesuṃ. Anujānāmi, bhikkhave, sāsapakuṭṭena 26 phositunti. Vaṇo kilijjittha. Bhagavato etamatthaṃ ārocesuṃ. Anujānāmi , bhikkhave, dhūmaṃ kātunti. Vaḍḍhamaṃsaṃ vuṭṭhāti. Bhagavato etamatthaṃ ārocesuṃ. Anujānāmi, bhikkhave, loṇasakkharikāya chinditunti. Vaṇo na ruhati. Bhagavato etamatthaṃ ārocesuṃ. Anujānāmi, bhikkhave, vaṇatelanti. Telaṃ galati. Bhagavato etamatthaṃ ārocesuṃ. Anujānāmi , bhikkhave, vikāsikaṃ sabbaṃ vaṇapaṭikammanti.
੨੬੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਹਿਨਾ ਦਟ੍ਠੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਚਤ੍ਤਾਰਿ ਮਹਾવਿਕਟਾਨਿ ਦਾਤੁਂ – ਗੂਥਂ, ਮੁਤ੍ਤਂ, ਛਾਰਿਕਂ, ਮਤ੍ਤਿਕਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਅਪ੍ਪਟਿਗ੍ਗਹਿਤਾਨਿ ਨੁ ਖੋ ਉਦਾਹੁ ਪਟਿਗ੍ਗਹੇਤਬ੍ਬਾਨੀ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸਤਿ ਕਪ੍ਪਿਯਕਾਰਕੇ ਪਟਿਗ੍ਗਹਾਪੇਤੁਂ, ਅਸਤਿ ਕਪ੍ਪਿਯਕਾਰਕੇ ਸਾਮਂ ਗਹੇਤ੍વਾ ਪਰਿਭੁਞ੍ਜਿਤੁਨ੍ਤਿ।
268. Tena kho pana samayena aññataro bhikkhu ahinā daṭṭho hoti. Bhagavato etamatthaṃ ārocesuṃ. Anujānāmi, bhikkhave, cattāri mahāvikaṭāni dātuṃ – gūthaṃ, muttaṃ, chārikaṃ, mattikanti. Atha kho bhikkhūnaṃ etadahosi – ‘‘appaṭiggahitāni nu kho udāhu paṭiggahetabbānī’’ti. Bhagavato etamatthaṃ ārocesuṃ. Anujānāmi, bhikkhave, sati kappiyakārake paṭiggahāpetuṃ, asati kappiyakārake sāmaṃ gahetvā paribhuñjitunti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਭਿਕ੍ਖੁਨਾ વਿਸਂ ਪੀਤਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ ਭਿਕ੍ਖવੇ ਗੂਥਂ ਪਾਯੇਤੁਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਅਪ੍ਪਟਿਗ੍ਗਹਿਤਂ ਨੁ ਖੋ ਉਦਾਹੁ ਪਟਿਗ੍ਗਹੇਤਬ੍ਬੋ’’ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਯਂ ਕਰੋਨ੍ਤੋ ਪਟਿਗ੍ਗਣ੍ਹਾਤਿ, ਸ੍વੇવ ਪਟਿਗ੍ਗਹੋ ਕਤੋ, ਨ ਪੁਨ 27 ਪਟਿਗ੍ਗਹੇਤਬ੍ਬੋਤਿ।
Tena kho pana samayena aññatarena bhikkhunā visaṃ pītaṃ hoti. Bhagavato etamatthaṃ ārocesuṃ. Anujānāmi bhikkhave gūthaṃ pāyetunti. Atha kho bhikkhūnaṃ etadahosi – ‘‘appaṭiggahitaṃ nu kho udāhu paṭiggahetabbo’’ti? Bhagavato etamatthaṃ ārocesuṃ. Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna 28 paṭiggahetabboti.
੨੬੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਘਰਦਿਨ੍ਨਕਾਬਾਧੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸੀਤਾਲੋਲ਼ਿਂ ਪਾਯੇਤੁਨ੍ਤਿ।
269. Tena kho pana samayena aññatarassa bhikkhuno gharadinnakābādho hoti. Bhagavato etamatthaṃ ārocesuṃ. Anujānāmi, bhikkhave, sītāloḷiṃ pāyetunti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦੁਟ੍ਠਗਹਣਿਕੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਆਮਿਸਖਾਰਂ ਪਾਯੇਤੁਨ੍ਤਿ।
Tena kho pana samayena aññataro bhikkhu duṭṭhagahaṇiko hoti. Bhagavato etamatthaṃ ārocesuṃ. Anujānāmi, bhikkhave, āmisakhāraṃ pāyetunti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਪਣ੍ਡੁਰੋਗਾਬਾਧੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ । ਅਨੁਜਾਨਾਮਿ, ਭਿਕ੍ਖવੇ, ਮੁਤ੍ਤਹਰੀਤਕਂ ਪਾਯੇਤੁਨ੍ਤਿ।
Tena kho pana samayena aññatarassa bhikkhuno paṇḍurogābādho hoti. Bhagavato etamatthaṃ ārocesuṃ . Anujānāmi, bhikkhave, muttaharītakaṃ pāyetunti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਛવਿਦੋਸਾਬਾਧੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਗਨ੍ਧਾਲੇਪਂ ਕਾਤੁਨ੍ਤਿ।
Tena kho pana samayena aññatarassa bhikkhuno chavidosābādho hoti. Bhagavato etamatthaṃ ārocesuṃ. Anujānāmi, bhikkhave, gandhālepaṃ kātunti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਭਿਸਨ੍ਨਕਾਯੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ । ਅਨੁਜਾਨਾਮਿ, ਭਿਕ੍ਖવੇ, વਿਰੇਚਨਂ ਪਾਤੁਨ੍ਤਿ। ਅਚ੍ਛਕਞ੍ਜਿਯਾ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਚ੍ਛਕਞ੍ਜਿਨ੍ਤਿ। ਅਕਟਯੂਸੇਨ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਅਕਟਯੂਸਨ੍ਤਿ। ਕਟਾਕਟੇਨ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਕਟਾਕਟਨ੍ਤਿ। ਪਟਿਚ੍ਛਾਦਨੀਯੇਨ ਅਤ੍ਥੋ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਪਟਿਚ੍ਛਾਦਨੀਯਨ੍ਤਿ।
Tena kho pana samayena aññataro bhikkhu abhisannakāyo hoti. Bhagavato etamatthaṃ ārocesuṃ . Anujānāmi, bhikkhave, virecanaṃ pātunti. Acchakañjiyā attho hoti. Bhagavato etamatthaṃ ārocesuṃ. Anujānāmi, bhikkhave, acchakañjinti. Akaṭayūsena attho hoti. Bhagavato etamatthaṃ ārocesuṃ. Anujānāmi, bhikkhave, akaṭayūsanti. Kaṭākaṭena attho hoti. Bhagavato etamatthaṃ ārocesuṃ. Anujānāmi, bhikkhave, kaṭākaṭanti. Paṭicchādanīyena attho hoti. Bhagavato etamatthaṃ ārocesuṃ. Anujānāmi, bhikkhave, paṭicchādanīyanti.
ਮੂਲਾਦਿਭੇਸਜ੍ਜਕਥਾ ਨਿਟ੍ਠਿਤਾ।
Mūlādibhesajjakathā niṭṭhitā.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā / ਪਞ੍ਚਭੇਸਜ੍ਜਾਦਿਕਥਾ • Pañcabhesajjādikathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਪਞ੍ਚਭੇਸਜ੍ਜਾਦਿਕਥਾવਣ੍ਣਨਾ • Pañcabhesajjādikathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਪਞ੍ਚਭੇਸਜ੍ਜਾਦਿਕਥਾવਣ੍ਣਨਾ • Pañcabhesajjādikathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਪਞ੍ਚਭੇਸਜ੍ਜਾਦਿਕਥਾવਣ੍ਣਨਾ • Pañcabhesajjādikathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੧੬੧. ਮੂਲਾਦਿਭੇਸਜ੍ਜਕਥਾ • 161. Mūlādibhesajjakathā
