| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. མཱུལཀསུཏྟཾ
8. Mūlakasuttaṃ
༥༨. 1 ‘‘སཙེ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ ཨེཝཾ པུཙྪེཡྻུཾ – ‘ཀིཾམཱུལཀཱ, ཨཱཝུསོ, སབྦེ དྷམྨཱ, ཀིཾསམྦྷཝཱ སབྦེ དྷམྨཱ, ཀིཾསམུདཡཱ སབྦེ དྷམྨཱ, ཀིཾསམོསརཎཱ སབྦེ དྷམྨཱ, ཀིཾཔམུཁཱ སབྦེ དྷམྨཱ, ཀིཾཨདྷིཔཏེཡྻཱ སབྦེ དྷམྨཱ, ཀིཾཨུཏྟརཱ སབྦེ དྷམྨཱ, ཀིཾསཱརཱ སབྦེ དྷམྨཱ, ཀིཾཨོགདྷཱ སབྦེ དྷམྨཱ, ཀིཾཔརིཡོསཱནཱ སབྦེ དྷམྨཱ’ཏི, ཨེཝཾ པུཊྛཱ ཏུམྷེ, བྷིཀྑཝེ , ཏེསཾ ཨཉྙཏིཏྠིཡཱནཾ པརིབྦཱཛཀཱནཾ ཀིནྟི བྱཱཀརེཡྻཱཐཱ’’ཏི? ‘‘བྷགཝཾམཱུལཀཱ ནོ, བྷནྟེ, དྷམྨཱ བྷགཝཾནེཏྟིཀཱ བྷགཝཾཔཊིསརཎཱ། སཱདྷུ ཝཏ, བྷནྟེ, བྷགཝནྟཾཡེཝ པཊིབྷཱཏུ ཨེཏསྶ བྷཱསིཏསྶ ཨཏྠོ། བྷགཝཏོ སུཏྭཱ བྷིཀྑཱུ དྷཱརེསྶནྟཱི’’ཏི།
58.2 ‘‘Sace, bhikkhave, aññatitthiyā paribbājakā evaṃ puccheyyuṃ – ‘kiṃmūlakā, āvuso, sabbe dhammā, kiṃsambhavā sabbe dhammā, kiṃsamudayā sabbe dhammā, kiṃsamosaraṇā sabbe dhammā, kiṃpamukhā sabbe dhammā, kiṃadhipateyyā sabbe dhammā, kiṃuttarā sabbe dhammā, kiṃsārā sabbe dhammā, kiṃogadhā sabbe dhammā, kiṃpariyosānā sabbe dhammā’ti, evaṃ puṭṭhā tumhe, bhikkhave , tesaṃ aññatitthiyānaṃ paribbājakānaṃ kinti byākareyyāthā’’ti? ‘‘Bhagavaṃmūlakā no, bhante, dhammā bhagavaṃnettikā bhagavaṃpaṭisaraṇā. Sādhu vata, bhante, bhagavantaṃyeva paṭibhātu etassa bhāsitassa attho. Bhagavato sutvā bhikkhū dhāressantī’’ti.
‘‘ཏེན ཧི, བྷིཀྑཝེ, སུཎཱཐ, སཱདྷུཀཾ མནསི ཀརོཐ; བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
‘‘Tena hi, bhikkhave, suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘སཙེ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ ཨེཝཾ པུཙྪེཡྻུཾ – ‘ཀིཾམཱུལཀཱ, ཨཱཝུསོ, སབྦེ དྷམྨཱ, ཀིཾསམྦྷཝཱ སབྦེ དྷམྨཱ, ཀིཾསམུདཡཱ སབྦེ དྷམྨཱ, ཀིཾསམོསརཎཱ སབྦེ དྷམྨཱ ཀིཾཔམུཁཱ སབྦེ དྷམྨཱ, ཀིཾ ཨདྷིཔཏེཡྻཱ སབྦེ དྷམྨཱ, ཀིཾཨུཏྟརཱ སབྦེ དྷམྨཱ, ཀིཾསཱརཱ སབྦེ དྷམྨཱ, ཀིཾཨོགདྷཱ སབྦེ དྷམྨཱ, ཀིཾཔརིཡོསཱནཱ སབྦེ དྷམྨཱ’ཏི, ཨེཝཾ པུཊྛཱ ཏུམྷེ, བྷིཀྑཝེ, ཏེསཾ ཨཉྙཏིཏྠིཡཱནཾ པརིབྦཱཛཀཱནཾ ཨེཝཾ བྱཱཀརེཡྻཱཐ – ‘ཚནྡམཱུལཀཱ, ཨཱཝུསོ, སབྦེ དྷམྨཱ, མནསིཀཱརསམྦྷཝཱ སབྦེ དྷམྨཱ, ཕསྶསམུདཡཱ སབྦེ དྷམྨཱ, ཝེདནཱསམོསརཎཱ སབྦེ དྷམྨཱ, སམཱདྷིཔྤམུཁཱ སབྦེ དྷམྨཱ, སཏཱདྷིཔཏེཡྻཱ སབྦེ དྷམྨཱ, པཉྙུཏྟརཱ སབྦེ དྷམྨཱ, ཝིམུཏྟིསཱརཱ སབྦེ དྷམྨཱ, ཨམཏོགདྷཱ སབྦེ དྷམྨཱ, ནིབྦཱནཔརིཡོསཱནཱ སབྦེ དྷམྨཱ’ཏི། ཨེཝཾ པུཊྛཱ ཏུམྷེ, བྷིཀྑཝེ, ཏེསཾ ཨཉྙཏིཏྠིཡཱནཾ པརིབྦཱཛཀཱནཾ ཨེཝཾ བྱཱཀརེཡྻཱཐཱ’’ཏི། ཨཊྛམཾ།
‘‘Sace, bhikkhave, aññatitthiyā paribbājakā evaṃ puccheyyuṃ – ‘kiṃmūlakā, āvuso, sabbe dhammā, kiṃsambhavā sabbe dhammā, kiṃsamudayā sabbe dhammā, kiṃsamosaraṇā sabbe dhammā kiṃpamukhā sabbe dhammā, kiṃ adhipateyyā sabbe dhammā, kiṃuttarā sabbe dhammā, kiṃsārā sabbe dhammā, kiṃogadhā sabbe dhammā, kiṃpariyosānā sabbe dhammā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘chandamūlakā, āvuso, sabbe dhammā, manasikārasambhavā sabbe dhammā, phassasamudayā sabbe dhammā, vedanāsamosaraṇā sabbe dhammā, samādhippamukhā sabbe dhammā, satādhipateyyā sabbe dhammā, paññuttarā sabbe dhammā, vimuttisārā sabbe dhammā, amatogadhā sabbe dhammā, nibbānapariyosānā sabbe dhammā’ti. Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyāthā’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. མཱུལཀསུཏྟཝཎྞནཱ • 8. Mūlakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སཙིཏྟསུཏྟཱདིཝཎྞནཱ • 1-10. Sacittasuttādivaṇṇanā
