| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
மூலபஞ்ஞத்திவண்ணனா
Mūlapaññattivaṇṇanā
55. இதோ பட்டா²யாதி து³ட்டு²ல்லபத³தோ பட்டா²ய. மேது²னத⁴ம்மோ யதா² ஸரூபேனேவ து³ட்டு²ல்லங், ஏவங் த³ஸ்ஸனாதி³து³ட்டு²ல்லத⁴ம்மபரிவாரத்தாபி து³ட்டு²ல்லந்தி த³ஸ்ஸேதுங் யஸ்மாதிஆதி³ வுத்தங். அவஸ்ஸுதானந்தி மேது²னராகே³ன திந்தானங். பரியுட்டி²தானந்தி மேது²னராகே³ன அபி⁴பூ⁴தசித்தானங். மேது²ன-ஸத்³த³ஸ்ஸ ஸதி³ஸஸத்³த³பஅயாயத்தா வுத்தங் ‘‘ஸதி³ஸான’’ந்தி, ரத்ததாதீ³ஹி ஸதி³ஸானந்தி அத்தோ². இத³ஞ்ச யேபு⁴ய்யதோ வுத்தங் உபோ⁴ஸு அஞ்ஞதரஸ்ஸ ராகா³பா⁴வேபி இதரஸ்ஸ மேது²னஸேவனஸங்ஸித்³தி⁴தோ. மேது²ன-ஸத்³தோ³ வா உப⁴யஸத்³த³பஅயாயோ, மேது²னங் யுக³ளங் யமகங் உப⁴யந்தி ஹி அத்த²தோ ஏகங், தேனாஹ ‘‘உபி⁴ன்னங் ரத்தான’’ந்தி. ‘‘த்³வயங்த்³வயஸமாபத்தீ’’தி ஹி பாளியம்பி வுத்தங். நிமித்தேனாதி பு⁴ம்மத்தே² கரணவசனங், இத்தி²னிமித்தே அத்தனோ நிமித்தங் பவேஸேதீதி அத்தோ². நிமித்தங் அங்க³ஜாதந்தி அத்த²தோ ஏகங். திலப²லந்தி ஸாஸபமத்தங் திலபீ³ஜங் அதி⁴ப்பேதங், ந கோஸஸஹிதங் ப²லந்தி ஆஹ ‘‘திலபீ³ஜமத்தம்பீ’’தி. அல்லோகாஸேதி ஸபா⁴வேன பிஹிதஸ்ஸ நிமித்தஸ்ஸ பகதிவாதேன அஸம்பு²ட்டே² திந்தப்பதே³ஸே. தாதி³ஸோ பதே³ஸோ ஸசேபி கேனசி வாதாதி³விகாரேன ஸுக்க²தி, ததா²பி அனல்லோகாஸோதி உபக்கமதோ பாராஜிகமேவ.
55.Itopaṭṭhāyāti duṭṭhullapadato paṭṭhāya. Methunadhammo yathā sarūpeneva duṭṭhullaṃ, evaṃ dassanādiduṭṭhulladhammaparivārattāpi duṭṭhullanti dassetuṃ yasmātiādi vuttaṃ. Avassutānanti methunarāgena tintānaṃ. Pariyuṭṭhitānanti methunarāgena abhibhūtacittānaṃ. Methuna-saddassa sadisasaddapaayāyattā vuttaṃ ‘‘sadisāna’’nti, rattatādīhi sadisānanti attho. Idañca yebhuyyato vuttaṃ ubhosu aññatarassa rāgābhāvepi itarassa methunasevanasaṃsiddhito. Methuna-saddo vā ubhayasaddapaayāyo, methunaṃ yugaḷaṃ yamakaṃ ubhayanti hi atthato ekaṃ, tenāha ‘‘ubhinnaṃ rattāna’’nti. ‘‘Dvayaṃdvayasamāpattī’’ti hi pāḷiyampi vuttaṃ. Nimittenāti bhummatthe karaṇavacanaṃ, itthinimitte attano nimittaṃ pavesetīti attho. Nimittaṃ aṅgajātanti atthato ekaṃ. Tilaphalanti sāsapamattaṃ tilabījaṃ adhippetaṃ, na kosasahitaṃ phalanti āha ‘‘tilabījamattampī’’ti. Allokāseti sabhāvena pihitassa nimittassa pakativātena asamphuṭṭhe tintappadese. Tādiso padeso sacepi kenaci vātādivikārena sukkhati, tathāpi anallokāsoti upakkamato pārājikameva.
வேமஜ்ஜ²ந்தி யதா² சத்தாரி பஸ்ஸானி அபு²ஸந்தோ பவேஸேதி, ஏவங் கதவிவரஸ்ஸ இத்தி²னிமித்தஸ்ஸ அப்³ப⁴ந்தரதலங் வுச்சதி. புரிஸனிமித்தே பன மஜ்ஜ²ந்தி அக்³க³கோடிங் ஸந்தா⁴ய வத³தி. உபரீதி மஜ்ஜி²மபப்³பே³ன ஸமிஞ்ஜித்வா பவேஸியமானஸ்ஸ அங்க³ஜாதஸ்ஸ ஸமிஞ்ஜிதங்கு³லியா மஜ்ஜி²மபப்³ப³பிட்டி²ஸதி³ஸஅக்³க³கோடியேவ. ஹெட்டா² பவேஸெந்தோதி இத்தி²னிமித்தஸ்ஸ ஹெட்டா²பா⁴கே³ன சு²பியமானங் பவேஸெந்தோ, யதா² இத்தி²னிமித்தஸ்ஸ அல்லோகாஸங் ஹெட்டி²மதலங் திலபீ³ஜமத்தம்பி அத்தனோ நிமித்தேன சு²பதி, ஏவங் பவேஸெந்தோதி அத்தோ². சு²பனமேவ ஹெத்த² பவேஸனங், ஏவங் ஸேஸேஸுபி. மஜ்ஜே²ன பவேஸெந்தோதி அப்³ப⁴ந்தரதலேன சு²பியமானங் பவேஸெந்தோ, யதா² அப்³ப⁴ந்தரதலங் சு²பதி, ஏவங் பவேஸெந்தோதி அத்தோ². கத்த²சி அச்சு²பந்தங் பவேஸெத்வா ஆகாஸக³தமேவ நீஹரந்தஸ்ஸ நத்தி² பாராஜிகங், து³க்கடங் பன ஹோதி சி²ன்னஸீஸவத்து²ஸ்மிங் (பாரா॰ 73) விய. மஜ்ஜே²னேவ சு²பந்தங் பவேஸெந்தோதி அக்³க³கோடியா சு²பந்தங் பவேஸெந்தோ. மஜ்ஜி²மபப்³ப³பிட்டி²யா ஸங்கோசெத்வாதி நிமித்தங் அத்தனோ மஜ்ஜி²மபப்³ப³பிட்டி²யா ஸமிஞ்ஜித்வா உபரிபா⁴கே³ன சு²பந்தங் பவேஸெந்தோபி. கிங் விய? ஸமிஞ்ஜிதங்கு³லி வியாதி யோஜனா. அத² வா மஜ்ஜி²மபப்³ப³பிட்டி²யா ஸமிஞ்ஜிதங்கு³லி வியாதி ஸம்ப³ந்தோ⁴, ஸமிஞ்ஜிதங்கு³லிங் வா மஜ்ஜி²மபப்³ப³பிட்டி²யா பவேஸெந்தோ வியாதிபி யோஜேதப்³ப³ங். உபரிபா⁴கே³னாதி ஸங்கோசிதஸ்ஸ நிமித்தஸ்ஸ உபரிகோடியா.
Vemajjhanti yathā cattāri passāni aphusanto paveseti, evaṃ katavivarassa itthinimittassa abbhantaratalaṃ vuccati. Purisanimitte pana majjhanti aggakoṭiṃ sandhāya vadati. Uparīti majjhimapabbena samiñjitvā pavesiyamānassa aṅgajātassa samiñjitaṅguliyā majjhimapabbapiṭṭhisadisaaggakoṭiyeva. Heṭṭhā pavesentoti itthinimittassa heṭṭhābhāgena chupiyamānaṃ pavesento, yathā itthinimittassa allokāsaṃ heṭṭhimatalaṃ tilabījamattampi attano nimittena chupati, evaṃ pavesentoti attho. Chupanameva hettha pavesanaṃ, evaṃ sesesupi. Majjhena pavesentoti abbhantaratalena chupiyamānaṃ pavesento, yathā abbhantaratalaṃ chupati, evaṃ pavesentoti attho. Katthaci acchupantaṃ pavesetvā ākāsagatameva nīharantassa natthi pārājikaṃ, dukkaṭaṃ pana hoti chinnasīsavatthusmiṃ (pārā. 73) viya. Majjheneva chupantaṃ pavesentoti aggakoṭiyā chupantaṃ pavesento. Majjhimapabbapiṭṭhiyā saṅkocetvāti nimittaṃ attano majjhimapabbapiṭṭhiyā samiñjitvā uparibhāgena chupantaṃ pavesentopi. Kiṃ viya? Samiñjitaṅguli viyāti yojanā. Atha vā majjhimapabbapiṭṭhiyā samiñjitaṅguli viyāti sambandho, samiñjitaṅguliṃ vā majjhimapabbapiṭṭhiyā pavesento viyātipi yojetabbaṃ. Uparibhāgenāti saṅkocitassa nimittassa uparikoṭiyā.
இதா³னி புரிஸனிமித்தஸ்ஸ ஹெட்டா² வுத்தேஸு ச²ஸு ‘‘உபரீ’’தி வுத்தஸ்ஸ ச²ட்ட²ஸ்ஸ டா²னஸ்ஸ வஸேன விஸுங் சத்தாரி பஸ்ஸானி க³ஹெத்வா புரிஸனிமித்தே த³ஸட்டா²னபே⁴த³ங் த³ஸ்ஸெந்தோ தத்தா²திஆதி³மாஹ. ஹெட்டா² பன அக³ஹிதக்³க³ஹணவஸேன ச² டா²னானி வுத்தானி. துலாத³ண்ட³ஸதி³ஸங் பவேஸெந்தஸ்ஸாபீதி அஸமிஞ்ஜித்வா உஜுகங் பவேஸெந்தஸ்ஸ. சம்மகீ²லந்தி ஏளகாதீ³னங் கீ³வாய விய நிமித்தே ஜாதங் சம்மங்குரங், ‘‘உண்ணிக³ண்டோ³’’திபி வத³ந்தி. ‘‘உபஹதகாயப்பஸாத³’’ந்தி அவத்வா நட்ட²காயப்பஸாத³ந்தி வசனேன உபாதி³ன்னபா⁴வே ஸதி கேனசி பச்சயேன உபஹதேபி காயப்பஸாதே³ உபஹதிந்த்³ரியவத்து²ஸ்மிங் (பாரா॰ 73) விய பாராஜிகமேவாதி த³ஸ்ஸேதி. இத்தி²னிமித்தஸ்ஸ பன நட்டே²பி உபாதி³ன்னபா⁴வே ஸதி மதஸரீரே விய பாராஜிகக்கெ²த்ததா ந விஜஹதீதி வேதி³தப்³பா³. மேது²னஸ்ஸாதே³னாதி இத³ங் காயஸங்ஸக்³க³ராகே³ ஸதி ஸங்கா⁴தி³ஸேஸோ ஹோதீதி வுத்தங். பீ³ஜானீதி அண்டா³னி.
Idāni purisanimittassa heṭṭhā vuttesu chasu ‘‘uparī’’ti vuttassa chaṭṭhassa ṭhānassa vasena visuṃ cattāri passāni gahetvā purisanimitte dasaṭṭhānabhedaṃ dassento tatthātiādimāha. Heṭṭhā pana agahitaggahaṇavasena cha ṭhānāni vuttāni. Tulādaṇḍasadisaṃ pavesentassāpīti asamiñjitvā ujukaṃ pavesentassa. Cammakhīlanti eḷakādīnaṃ gīvāya viya nimitte jātaṃ cammaṅkuraṃ, ‘‘uṇṇigaṇḍo’’tipi vadanti. ‘‘Upahatakāyappasāda’’nti avatvā naṭṭhakāyappasādanti vacanena upādinnabhāve sati kenaci paccayena upahatepi kāyappasāde upahatindriyavatthusmiṃ (pārā. 73) viya pārājikamevāti dasseti. Itthinimittassa pana naṭṭhepi upādinnabhāve sati matasarīre viya pārājikakkhettatā na vijahatīti veditabbā. Methunassādenāti idaṃ kāyasaṃsaggarāge sati saṅghādiseso hotīti vuttaṃ. Bījānīti aṇḍāni.
முக²ங் அபிதா⁴யாதி பமாதே³ன ஸமுப்பன்னம்பி ஹாஸங் பீ³ஜனியா படிச்சா²த³னம்பி அகத்வா நிஸீத³னங் அகா³ரவந்தி வுத்தங். அத² வா அபிதா⁴யாதி பித³ஹித்வா, பீ³ஜனியா முக²ங் படிச்சா²தெ³த்வா ஹஸமானேன ந நிஸீதி³தப்³ப³ந்தி அத்தோ². த³ந்தவித³ங்ஸகந்தி த³ந்தே த³ஸ்ஸெத்வா. க³ப்³பி⁴தேனாதி ‘‘அயுத்தகதா²’’தி ஸங்கோசங் அனாபஜ்ஜந்தேன, நிரவஸேஸாதி⁴ப்பாயகத²னே ஸஞ்ஜாதுஸ்ஸாஹேனாதி அத்தோ².
Mukhaṃ apidhāyāti pamādena samuppannampi hāsaṃ bījaniyā paṭicchādanampi akatvā nisīdanaṃ agāravanti vuttaṃ. Atha vā apidhāyāti pidahitvā, bījaniyā mukhaṃ paṭicchādetvā hasamānena na nisīditabbanti attho. Dantavidaṃsakanti dante dassetvā. Gabbhitenāti ‘‘ayuttakathā’’ti saṅkocaṃ anāpajjantena, niravasesādhippāyakathane sañjātussāhenāti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மூலபஞ்ஞத்திவண்ணனா • Mūlapaññattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மூலபஞ்ஞத்திகதா²வண்ணனா • Mūlapaññattikathāvaṇṇanā
