| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
မူလပညတ္တိဝဏ္ဏနာ
Mūlapaññattivaṇṇanā
၅၅. နိဒ္ဒိသိတဗ္ဗသ္သာတိ ဝိဝရိတဗ္ဗသ္သ ပကာသေတဗ္ဗသ္သ။ ကိလေသေဟီတိ အဟိရိကာဒီဟိ ကိလေသေဟိ။ ဣတော ပဋ္ဌာယာတိ ဒုဋ္ဌုလ္လ-ပဒတော ပဋ္ဌာယ။ တသ္သ ကမ္မသ္သာတိ မေထုနဓမ္မပဋိသေဝနသင္ခာတသ္သ ကမ္မသ္သ။ ဒသ္သနန္တိအာဒိ ဝုတ္တနယမေဝ။ အသ္သာတိ မေထုနဓမ္မသ္သ။
55.Niddisitabbassāti vivaritabbassa pakāsetabbassa. Kilesehīti ahirikādīhi kilesehi. Ito paṭṭhāyāti duṭṭhulla-padato paṭṭhāya. Tassa kammassāti methunadhammapaṭisevanasaṅkhātassa kammassa. Dassanantiādi vuttanayameva. Assāti methunadhammassa.
ဒ္ဝီဟိ ဒ္ဝီဟိ သမာပဇ္ဇိတဗ္ဗာ ဒ္ဝယံဒ္ဝယသမာပတ္တီတိ အာဟ ‘‘ဒ္ဝယေန ဒ္ဝယေန သမာပဇ္ဇိတဗ္ဗတော’’တိ။ ရာဂပရိယုဋ္ဌာနေန သဒိသဘာဝပ္ပတ္တိယာ မိထုနာနံ ဣဒံ မေထုနံ, မေထုနမေဝ ဓမ္မော မေထုနဓမ္မောတိ အာဟ ‘‘ဥဘိန္နံ ရတ္တာန’’န္တိအာဒိ။ တတ္ထ ရတ္တာနန္တိ မေထုနရာဂေန ရတ္တာနံ။ သာရတ္တာနန္တိ တေနေဝ ရာဂေန အတိဝိယ ရတ္တာနံ။ အဝသ္သုတာနန္တိ လောကသ္သာဒမိတ္တသန္ထဝဝသေန ဥပ္ပန္နမေထုနရာဂေန တိန္တာနံ။ ပရိယုဋ္ဌိတာနန္တိ မေထုနရာဂုပ္ပတ္တိယာ ပရိယောနဒ္ဓစိတ္တာနံ။ သဒိသာနန္တိ ရတ္တတာဒီဟိ သဒိသာနံ။
Dvīhi dvīhi samāpajjitabbā dvayaṃdvayasamāpattīti āha ‘‘dvayena dvayena samāpajjitabbato’’ti. Rāgapariyuṭṭhānena sadisabhāvappattiyā mithunānaṃ idaṃ methunaṃ, methunameva dhammo methunadhammoti āha ‘‘ubhinnaṃ rattāna’’ntiādi. Tattha rattānanti methunarāgena rattānaṃ. Sārattānanti teneva rāgena ativiya rattānaṃ. Avassutānanti lokassādamittasanthavavasena uppannamethunarāgena tintānaṃ. Pariyuṭṭhitānanti methunarāguppattiyā pariyonaddhacittānaṃ. Sadisānanti rattatādīhi sadisānaṃ.
ယသ္မာ ‘‘ပဋိသေဝတိ နာမာ’’တိ ပဒံ မာတိကာယ နတ္ထိ, တသ္မာ ‘‘ပဋိသေဝတိ နာမာတိ ကသ္မာ ဥဒ္ဓဋ’’န္တိ ယော မညတိ, တသ္သ ကာရဏံ ဒသ္သေန္တော ‘‘ပဋိသေဝေယ္ယာတိ ဧတ္ထ။ပေ.။ မာတိကာပဒ’’န္တိ အာဟ။ ဣတ္ထိယာ နိမိတ္တေနာတိ ဣဒံ ‘‘မဂ္ဂေန ဂစ္ဆတီ’’တိအာဒိ ဝိယ ဒဋ္ဌဗ္ဗံ။ ယထာ ဟိ ‘‘မဂ္ဂေန ဂစ္ဆတီ’’တိ ဝုတ္တေ ‘‘မဂ္ဂံ ဂစ္ဆတိ, မဂ္ဂေ ဝာ ဂစ္ဆတီ’’တိ အယမတ္ထော လဗ္ဘတိ, ဧဝံ ‘‘ဣတ္ထိယာ နိမိတ္တေန ပဝေသေတီ’’တိ ဝုတ္တေ ‘‘ဣတ္ထိယာ နိမိတ္တံ ပဝေသေတိ, နိမိတ္တေ ဝာ ပဝေသေတီ’’တိ အယမတ္ထော လဗ္ဘတိ။ ဣဒဉ္စ ယေဘုယ္ယေန ပုရိသပယောဂဒသ္သနတ္ထံ ဝုတ္တံ။ နိမိတ္တံ အင္ဂဇာတန္တိ အတ္ထတော ဧကံ။ ပဝေသနံ နာမ န ဗဟိ ဆုပနမတ္တန္တိ အာဟ ‘‘ဝာတေန အသမ္ဖုဋ္ဌေ အလ္လောကာသေ’’တိ။ အဗ္ဘန္တရဉ္ဟိ ပဝေသေန္တော ‘‘ပဝေသေတီ’’တိ ဝုစ္စတိ, န ဗဟိ ဆုပန္တော။ အဗ္ဘန္တရန္တိ စ ပကတိယာ သဗ္ဗသော ပိဟိတသ္သ နိမိတ္တသ္သ ဝာတေန အသမ္ဖုဋ္ဌောကာသော ဝုစ္စတီတိ။
Yasmā ‘‘paṭisevati nāmā’’ti padaṃ mātikāya natthi, tasmā ‘‘paṭisevati nāmāti kasmā uddhaṭa’’nti yo maññati, tassa kāraṇaṃ dassento ‘‘paṭiseveyyāti ettha…pe… mātikāpada’’nti āha. Itthiyā nimittenāti idaṃ ‘‘maggena gacchatī’’tiādi viya daṭṭhabbaṃ. Yathā hi ‘‘maggena gacchatī’’ti vutte ‘‘maggaṃ gacchati, magge vā gacchatī’’ti ayamattho labbhati, evaṃ ‘‘itthiyā nimittena pavesetī’’ti vutte ‘‘itthiyā nimittaṃ paveseti, nimitte vā pavesetī’’ti ayamattho labbhati. Idañca yebhuyyena purisapayogadassanatthaṃ vuttaṃ. Nimittaṃ aṅgajātanti atthato ekaṃ. Pavesanaṃ nāma na bahi chupanamattanti āha ‘‘vātena asamphuṭṭhe allokāse’’ti. Abbhantarañhi pavesento ‘‘pavesetī’’ti vuccati, na bahi chupanto. Abbhantaranti ca pakatiyā sabbaso pihitassa nimittassa vātena asamphuṭṭhokāso vuccatīti.
ဣဒာနိ သဗ္ဗထာ လေသောကာသပိဒဟနတ္ထံ ဣတ္ထိနိမိတ္တေ ပုရိသနိမိတ္တေ စ လဗ္ဘမာနံ ပဝေသကာလေ အညမညံ ဖသ္သာရဟံ ပဒေသဝိသေသံ ဝိဘဇိတ္ဝာ ဒသ္သေန္တော ‘‘ဣတ္ထိနိမိတ္တေ စတ္တာရိ ပသ္သာနီ’’တိအာဒိမာဟ။ ဝာတေန ဟိ အသမ္ဖုဋ္ဌေ အလ္လောကာသေ ယတ္ထ ကတ္ထစိ ဧကေနပိ ပဒေသေန ဆုပိတ္ဝာ ပဝေသေန္တော ‘‘ပဝေသေတီ’’တိ ဝုစ္စတိ။ ဝေမဇ္ဈန္တိ ယထာ စတ္တာရိ ပသ္သာနိ အသမ္ဖုသန္တော ပဝေသေတိ, ဧဝံ ကတဝိဝရသ္သ ဣတ္ထိနိမိတ္တသ္သ ဟေဋ္ဌိမတလံ ဝုစ္စတိ , ပုရိသနိမိတ္တေ ပန မဇ္ဈန္တိ အဂ္ဂကောဋိံ သန္ဓာယ ဝဒတိ။ ဥပရီတိ အဂ္ဂကောဋိတော ဥပရိဘာဂပ္ပဒေသော။ ဣဒဉ္စ မဇ္ဈေန သမိဉ္ဇိတ္ဝာ ပဝေသေန္တသ္သ မဇ္ဈိမပဗ္ဗသမိဉ္ဇိတင္ဂုလိံ ကတ္ထစိ ပဝေသေန္တသ္သ အင္ဂုလိယာ မဇ္ဈိမပဗ္ဗပိဋ္ဌိသဒိသံ အင္ဂဇာတသ္သ ဥပရိဘာဂဝေမဇ္ဈံ သန္ဓာယ ဝုတ္တံ။ ဟေဋ္ဌာ ပဝေသေန္တောတိ ဣတ္ထိနိမိတ္တသ္သ ဟေဋ္ဌိမဘာဂေန ဆုပန္တံ ပဝေသေန္တော။ မဇ္ဈေန ပဝေသေန္တောတိ အဗ္ဘန္တရတလံ ဆုပိတ္ဝာ မဇ္ဈေန ပဝေသေန္တော။ ကတ္ထစိ အစ္ဆုပန္တံ ပဝေသေတ္ဝာ နီဟရန္တသ္သ ဟိ နတ္ထိ ပာရာဇိကံ, ဒုက္ကဋံ ပန ဟောတိ ဆိန္နသီသဝတ္ထုသ္မိံ ဝဋ္ဋကတေ မုခေ အစ္ဆုပန္တံ ပဝေသေတ္ဝာ နီဟရန္တသ္သ ဝိယ။ မဇ္ဈေနေဝ ဆုပန္တံ ပဝေသေန္တောတိ အဂ္ဂကောဋိယာ ဆုပန္တံ ပဝေသေန္တော။ မဇ္ဈိမပဗ္ဗပိဋ္ဌိယာ သမိဉ္ဇိတင္ဂုလိန္တိ သမ္ဗန္ဓော။ အထ ဝာ သမိဉ္ဇိတင္ဂုလိံ မဇ္ဈိမပဗ္ဗပိဋ္ဌိယာ ပဝေသေန္တော ဝိယာတိ ယောဇေတဗ္ဗံ။ သင္ကောစေတ္ဝာတိ နိမိတ္တမဇ္ဈေန ဘိန္ဒိတ္ဝာ။ ဥပရိဘာဂေနာတိ သင္ကောစိတသ္သ ဥပရိဘာဂကောဋိယာ။ ဣဒာနိ ပုရိသနိမိတ္တသ္သ ဟေဋ္ဌာ ဝုတ္တေသု ဆသု ဌာနေသု ဥပရီတိ ဝုတ္တဋ္ဌာနန္တရသ္သ ဝသေန ဝိသုံ စတ္တာရိ ပသ္သာနိ ဂဟေတ္ဝာ ပုရိသနိမိတ္တေ ဒသဓာ ဌာနဘေဒံ ဒသ္သေန္တော ‘‘တတ္ထာ’’တိအာဒိမာဟ။ ဟေဋ္ဌာ ပန ဝိသုံ တာနိ အဂ္ဂဟေတ္ဝာ ‘‘စတ္တာရိ ပသ္သာနီ’’တိ ဝစနသာမညတောပိ ဝိသုံ ဝိသုံ လဗ္ဘမာနာနိ ဧကစ္စံ ဂဟေတ္ဝာ ဆ ဌာနာနိ ဝုတ္တာနိ။ တုလာဒဏ္ဍသဒိသံ ပဝေသေန္တသ္သာတိ ဥဇုကံ ပဝေသေန္တသ္သ။
Idāni sabbathā lesokāsapidahanatthaṃ itthinimitte purisanimitte ca labbhamānaṃ pavesakāle aññamaññaṃ phassārahaṃ padesavisesaṃ vibhajitvā dassento ‘‘itthinimitte cattāri passānī’’tiādimāha. Vātena hi asamphuṭṭhe allokāse yattha katthaci ekenapi padesena chupitvā pavesento ‘‘pavesetī’’ti vuccati. Vemajjhanti yathā cattāri passāni asamphusanto paveseti, evaṃ katavivarassa itthinimittassa heṭṭhimatalaṃ vuccati , purisanimitte pana majjhanti aggakoṭiṃ sandhāya vadati. Uparīti aggakoṭito uparibhāgappadeso. Idañca majjhena samiñjitvā pavesentassa majjhimapabbasamiñjitaṅguliṃ katthaci pavesentassa aṅguliyā majjhimapabbapiṭṭhisadisaṃ aṅgajātassa uparibhāgavemajjhaṃ sandhāya vuttaṃ. Heṭṭhā pavesentoti itthinimittassa heṭṭhimabhāgena chupantaṃ pavesento. Majjhena pavesentoti abbhantaratalaṃ chupitvā majjhena pavesento. Katthaci acchupantaṃ pavesetvā nīharantassa hi natthi pārājikaṃ, dukkaṭaṃ pana hoti chinnasīsavatthusmiṃ vaṭṭakate mukhe acchupantaṃ pavesetvā nīharantassa viya. Majjheneva chupantaṃ pavesentoti aggakoṭiyā chupantaṃ pavesento. Majjhimapabbapiṭṭhiyā samiñjitaṅgulinti sambandho. Atha vā samiñjitaṅguliṃ majjhimapabbapiṭṭhiyā pavesento viyāti yojetabbaṃ. Saṅkocetvāti nimittamajjhena bhinditvā. Uparibhāgenāti saṅkocitassa uparibhāgakoṭiyā. Idāni purisanimittassa heṭṭhā vuttesu chasu ṭhānesu uparīti vuttaṭṭhānantarassa vasena visuṃ cattāri passāni gahetvā purisanimitte dasadhā ṭhānabhedaṃ dassento ‘‘tatthā’’tiādimāha. Heṭṭhā pana visuṃ tāni aggahetvā ‘‘cattāri passānī’’ti vacanasāmaññatopi visuṃ visuṃ labbhamānāni ekaccaṃ gahetvā cha ṭhānāni vuttāni. Tulādaṇḍasadisaṃ pavesentassāti ujukaṃ pavesentassa.
နိမိတ္တေ ဇာတန္တိ အတ္တနော နိမိတ္တေ ဇာတံ။ စမ္မခီလန္တိ နိမိတ္တေ ဥဋ္ဌိတံ စမ္မမေဝ။ ‘‘ဥဏ္ဏိဂဏ္ဍော’’တိပိ ဝဒန္တိ။ နိမိတ္တေ ဇာတမ္ပိ စမ္မခီလာဒိ နိမိတ္တမေဝာတိ အာဟ ‘‘အာပတ္တိ ပာရာဇိကသ္သာ’’တိ။ ‘‘ဥပဟတကာယပ္ပသာဒ’’န္တိ အဝတ္ဝာ ‘‘နဋ္ဌကာယပ္ပသာဒ’’န္တိ ဝစနံ ဥပာဒိန္နဘာဝသ္သ နတ္ထိတာဒသ္သနတ္ထံ။ တေနေဝာဟ – ‘‘မတစမ္မံ ဝာ သုက္ခပီဠကံ ဝာ’’တိ။ သတိ ဟိ ဥပာဒိန္နဘာဝေ ဥပဟတေပိ ကာယပ္ပသာဒေ ဥပဟတိန္ဒ္ရိယဝတ္ထုသ္မိံ ဝိယ ပာရာဇိကာပတ္တိယေဝ သိယာ, မတစမ္မံ ပန သုက္ခပီဠကဉ္စ အနုပာဒိန္နကံ ဥပာဒိန္နကေယေဝ စ ပာရာဇိကာပတ္တိ။ တေနေဝာဟ ‘‘အာပတ္တိ ဒုက္ကဋသ္သာ’’တိ။ န စ ဧဝံ ကရောန္တသ္သ အနာပတ္တိ သက္ကာ ဝတ္တုန္တိ ဒုက္ကဋံ ဝုတ္တံ, ဣတ္ထိနိမိတ္တသ္သ ပန နဋ္ဌေပိ ဥပာဒိန္နဘာဝေ ပာရာဇိကာပတ္တိယေဝ။ မတေ အက္ခာယိတေ ယေဘုယ္ယေန အက္ခာယိတေ ပာရာဇိကာပတ္တိဝစနတော မေထုနသ္သာဒေနာတိ ဣမိနာ ကာယသံသဂ္ဂရာဂံ နိဝတ္တေတိ။ သတိ ဟိ ကာယသံသဂ္ဂရာဂေ သင္ဃာဒိသေသောဝ သိယာ, ဗီဇာနိပိ နိမိတ္တသင္ခ္ယံ န ဂစ္ဆန္တီတိ ဒုက္ကဋမေဝ ဝုတ္တံ။ ‘‘နိမိတ္တေန နိမိတ္တံ ပဝေသေတီ’’တိ ဟိ ဝုတ္တံ။
Nimitte jātanti attano nimitte jātaṃ. Cammakhīlanti nimitte uṭṭhitaṃ cammameva. ‘‘Uṇṇigaṇḍo’’tipi vadanti. Nimitte jātampi cammakhīlādi nimittamevāti āha ‘‘āpatti pārājikassā’’ti. ‘‘Upahatakāyappasāda’’nti avatvā ‘‘naṭṭhakāyappasāda’’nti vacanaṃ upādinnabhāvassa natthitādassanatthaṃ. Tenevāha – ‘‘matacammaṃ vā sukkhapīḷakaṃ vā’’ti. Sati hi upādinnabhāve upahatepi kāyappasāde upahatindriyavatthusmiṃ viya pārājikāpattiyeva siyā, matacammaṃ pana sukkhapīḷakañca anupādinnakaṃ upādinnakeyeva ca pārājikāpatti. Tenevāha ‘‘āpatti dukkaṭassā’’ti. Na ca evaṃ karontassa anāpatti sakkā vattunti dukkaṭaṃ vuttaṃ, itthinimittassa pana naṭṭhepi upādinnabhāve pārājikāpattiyeva. Mate akkhāyite yebhuyyena akkhāyite pārājikāpattivacanato methunassādenāti iminā kāyasaṃsaggarāgaṃ nivatteti. Sati hi kāyasaṃsaggarāge saṅghādisesova siyā, bījānipi nimittasaṅkhyaṃ na gacchantīti dukkaṭameva vuttaṃ. ‘‘Nimittena nimittaṃ pavesetī’’ti hi vuttaṃ.
ဣဒာနိ ဣမိသ္သာ မေထုနကထာယ အသဗ္ဘိရူပတ္တာ ‘‘ဤဒိသံ ဌာနံ ကထေန္တေဟိ သုဏန္တေဟိ စ ဧဝံ ပဋိပဇ္ဇိတဗ္ဗ’’န္တိ အနုသာသန္တော ‘‘အယဉ္စ မေထုနကထာ နာမာ’’တိအာဒိမာဟ။ မေထုနကထာယ ရာဂဝုဒ္ဓိဟေတုတ္တာ ဟာသဝိသယတ္တာ စ တဒုဘယနိဝတ္တနတ္ထံ ပဋိကူလမနသိကာရာဒီသု နိယောဇေတိ။ ပဋိကူလမနသိကာရေန ဟိ ရာဂော နိဝတ္တတိ, သမဏသညာဒီသု ပစ္စုပဋ္ဌိတေသု ဟာသော နိဝတ္တတိ။ သတ္တာနုဒ္ဒယာယာတိ သတ္တာနံ အပာယဒုက္ခာဒီဟိ အနုရက္ခဏတ္ထံ။ လောကာနုကမ္ပာယာတိ သတ္တလောကဝိသယာယ အနုကမ္ပာယ။
Idāni imissā methunakathāya asabbhirūpattā ‘‘īdisaṃ ṭhānaṃ kathentehi suṇantehi ca evaṃ paṭipajjitabba’’nti anusāsanto ‘‘ayañca methunakathā nāmā’’tiādimāha. Methunakathāya rāgavuddhihetuttā hāsavisayattā ca tadubhayanivattanatthaṃ paṭikūlamanasikārādīsu niyojeti. Paṭikūlamanasikārena hi rāgo nivattati, samaṇasaññādīsu paccupaṭṭhitesu hāso nivattati. Sattānuddayāyāti sattānaṃ apāyadukkhādīhi anurakkhaṇatthaṃ. Lokānukampāyāti sattalokavisayāya anukampāya.
မုခံ အပိဓာယာတိ မုခံ အပိဒဟိတ္ဝာ, ယေန ကေနစိ ပမာဒေန ကဒာစိ မန္ဒဟာသော ဘဝေယ္ယ, တဒာ ဂရုတ္တံ ကုပ္ပေယ္ယ, တသ္မာ တာဒိသေ ကာလေ ဂရုဘာဝသ္သ အဝိကောပနတ္ထံ ဗီဇကေန မုခံ ပဋိစ္ဆာဒေတ္ဝာ နိသီဒိတဗ္ဗန္တိ အဓိပ္ပာယော။ အထ ဝာ မုခံ အပိဓာယာတိ မုခံ ပိဒဟိတ္ဝာတိ အတ္ထော။ ဗီဇကေန မုခံ ပဋိစ္ဆာဒေတ္ဝာ ဟသမာနေန န နိသီဒိတဗ္ဗန္တိ အယမေတ္ထ အဓိပ္ပာယော။ ဒန္တဝိဒံသကန္တိ ဒန္တေ ဒသ္သေတ္ဝာ ဝိဝရိတ္ဝာ စာတိ အတ္ထော။ ဂဗ္ဘိတေနာတိ သင္ကောစံ အနာပဇ္ဇန္တေန, ဥသ္သာဟဇာတေနာတိ အတ္ထော။ ယဒိ ဟိ ‘‘ဤဒိသံ နာမ အသဗ္ဘိံ ကထေမီ’’တိ သင္ကောစံ အာပဇ္ဇေယ္ယ, အတ္ထဝိဘာဝနံ န သိယာ, တသ္မာ ‘‘တာဒိသေန သမ္မာသမ္ဗုဒ္ဓေနပိ တာဝ ဤဒိသံ ကထိတံ, ကိမင္ဂံ ပနာဟံ ကထေမီ’’တိ ဧဝံ ဥသ္သာဟဇာတေန ကထေတဗ္ဗန္တိ အဓိပ္ပာယော။ သတ္ထုပဋိဘာဂေနာတိ သတ္ထုကပ္ပေန, သတ္ထုသဒိသေနာတိ အတ္ထော။
Mukhaṃ apidhāyāti mukhaṃ apidahitvā, yena kenaci pamādena kadāci mandahāso bhaveyya, tadā garuttaṃ kuppeyya, tasmā tādise kāle garubhāvassa avikopanatthaṃ bījakena mukhaṃ paṭicchādetvā nisīditabbanti adhippāyo. Atha vā mukhaṃ apidhāyāti mukhaṃ pidahitvāti attho. Bījakena mukhaṃ paṭicchādetvā hasamānena na nisīditabbanti ayamettha adhippāyo. Dantavidaṃsakanti dante dassetvā vivaritvā cāti attho. Gabbhitenāti saṅkocaṃ anāpajjantena, ussāhajātenāti attho. Yadi hi ‘‘īdisaṃ nāma asabbhiṃ kathemī’’ti saṅkocaṃ āpajjeyya, atthavibhāvanaṃ na siyā, tasmā ‘‘tādisena sammāsambuddhenapi tāva īdisaṃ kathitaṃ, kimaṅgaṃ panāhaṃ kathemī’’ti evaṃ ussāhajātena kathetabbanti adhippāyo. Satthupaṭibhāgenāti satthukappena, satthusadisenāti attho.
မူလပညတ္တိဝဏ္ဏနာ နိဋ္ဌိတာ။
Mūlapaññattivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၁. ပဌမပာရာဇိကံ • 1. Paṭhamapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁. ပဌမပာရာဇိကံ • 1. Paṭhamapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / မူလပညတ္တိကထာဝဏ္ဏနာ • Mūlapaññattikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / မူလပညတ္တိဝဏ္ဏနာ • Mūlapaññattivaṇṇanā
