Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya

    ༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎

    Namo tassa bhagavato arahato sammāsambuddhassa

    མཛ྄ཛྷིམནིཀཱཡོ

    Majjhimanikāyo

    མཱུལཔཎྞཱསཔཱལི༹

    Mūlapaṇṇāsapāḷi

    ༡. མཱུལཔརིཡཱཡཝགྒོ

    1. Mūlapariyāyavaggo

    ༡. མཱུལཔརིཡཱཡསུཏྟཾ

    1. Mūlapariyāyasuttaṃ

    ༡. ཨེཝཾ མེ སུཏཾ – ཨེཀཾ སམཡཾ བྷགཝཱ ཨུཀྐཊྛཱཡཾ ཝིཧརཏི སུབྷགཝནེ སཱལརཱཛམཱུལེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ – ‘‘སབྦདྷམྨམཱུལཔརིཡཱཡཾ ཝོ, བྷིཀྑཝེ, དེསེསྶཱམི། ཏཾ སུཎཱཐ, སཱདྷུཀཾ མནསི ཀརོཐ, བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    1. Evaṃ me sutaṃ – ekaṃ samayaṃ bhagavā ukkaṭṭhāyaṃ viharati subhagavane sālarājamūle. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘sabbadhammamūlapariyāyaṃ vo, bhikkhave, desessāmi. Taṃ suṇātha, sādhukaṃ manasi karotha, bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ༢. ‘‘ཨིདྷ, བྷིཀྑཝེ, ཨསྶུཏཝཱ པུཐུཛྫནོ ཨརིཡཱནཾ ཨདསྶཱཝཱི ཨརིཡདྷམྨསྶ ཨཀོཝིདོ ཨརིཡདྷམྨེ ཨཝིནཱིཏོ, སཔྤུརིསཱནཾ ཨདསྶཱཝཱི སཔྤུརིསདྷམྨསྶ ཨཀོཝིདོ སཔྤུརིསདྷམྨེ ཨཝིནཱིཏོ – པཐཝིཾ 1 པཐཝིཏོ སཉྫཱནཱཏི; པཐཝིཾ པཐཝིཏོ སཉྙཏྭཱ པཐཝིཾ མཉྙཏི, པཐཝིཡཱ མཉྙཏི, པཐཝིཏོ མཉྙཏི, པཐཝིཾ མེཏི མཉྙཏི , པཐཝིཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    2. ‘‘Idha, bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto – pathaviṃ 2 pathavito sañjānāti; pathaviṃ pathavito saññatvā pathaviṃ maññati, pathaviyā maññati, pathavito maññati, pathaviṃ meti maññati , pathaviṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཨཱཔཾ ཨཱཔཏོ སཉྫཱནཱཏི; ཨཱཔཾ ཨཱཔཏོ སཉྙཏྭཱ ཨཱཔཾ མཉྙཏི, ཨཱཔསྨིཾ མཉྙཏི, ཨཱཔཏོ མཉྙཏི, ཨཱཔཾ མེཏི མཉྙཏི, ཨཱཔཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Āpaṃ āpato sañjānāti; āpaṃ āpato saññatvā āpaṃ maññati, āpasmiṃ maññati, āpato maññati, āpaṃ meti maññati, āpaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཏེཛཾ ཏེཛཏོ སཉྫཱནཱཏི; ཏེཛཾ ཏེཛཏོ སཉྙཏྭཱ ཏེཛཾ མཉྙཏི, ཏེཛསྨིཾ མཉྙཏི, ཏེཛཏོ མཉྙཏི, ཏེཛཾ མེཏི མཉྙཏི, ཏེཛཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Tejaṃ tejato sañjānāti; tejaṃ tejato saññatvā tejaṃ maññati, tejasmiṃ maññati, tejato maññati, tejaṃ meti maññati, tejaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཝཱཡཾ ཝཱཡཏོ སཉྫཱནཱཏི; ཝཱཡཾ ཝཱཡཏོ སཉྙཏྭཱ ཝཱཡཾ མཉྙཏི, ཝཱཡསྨིཾ མཉྙཏི, ཝཱཡཏོ མཉྙཏི, ཝཱཡཾ མེཏི མཉྙཏི, ཝཱཡཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Vāyaṃ vāyato sañjānāti; vāyaṃ vāyato saññatvā vāyaṃ maññati, vāyasmiṃ maññati, vāyato maññati, vāyaṃ meti maññati, vāyaṃ abhinandati. Taṃ kissa hetu? ‘Apariññātaṃ tassā’ti vadāmi.

    ༣. ‘‘བྷཱུཏེ བྷཱུཏཏོ སཉྫཱནཱཏི; བྷཱུཏེ བྷཱུཏཏོ སཉྙཏྭཱ བྷཱུཏེ མཉྙཏི, བྷཱུཏེསུ མཉྙཏི, བྷཱུཏཏོ མཉྙཏི, བྷཱུཏེ མེཏི མཉྙཏི, བྷཱུཏེ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    3. ‘‘Bhūte bhūtato sañjānāti; bhūte bhūtato saññatvā bhūte maññati, bhūtesu maññati, bhūtato maññati, bhūte meti maññati, bhūte abhinandati. Taṃ kissa hetu? ‘Apariññātaṃ tassā’ti vadāmi.

    ‘‘དེཝེ དེཝཏོ སཉྫཱནཱཏི; དེཝེ དེཝཏོ སཉྙཏྭཱ དེཝེ མཉྙཏི, དེཝེསུ མཉྙཏི, དེཝཏོ མཉྙཏི, དེཝེ མེཏི མཉྙཏི, དེཝེ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Deve devato sañjānāti; deve devato saññatvā deve maññati, devesu maññati, devato maññati, deve meti maññati, deve abhinandati. Taṃ kissa hetu? ‘Apariññātaṃ tassā’ti vadāmi.

    ‘‘པཛཱཔཏིཾ པཛཱཔཏིཏོ སཉྫཱནཱཏི; པཛཱཔཏིཾ པཛཱཔཏིཏོ སཉྙཏྭཱ པཛཱཔཏིཾ མཉྙཏི, པཛཱཔཏིསྨིཾ མཉྙཏི, པཛཱཔཏིཏོ མཉྙཏི, པཛཱཔཏིཾ མེཏི མཉྙཏི, པཛཱཔཏིཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Pajāpatiṃ pajāpatito sañjānāti; pajāpatiṃ pajāpatito saññatvā pajāpatiṃ maññati, pajāpatismiṃ maññati, pajāpatito maññati, pajāpatiṃ meti maññati, pajāpatiṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘བྲཧྨཾ བྲཧྨཏོ སཉྫཱནཱཏི; བྲཧྨཾ བྲཧྨཏོ སཉྙཏྭཱ བྲཧྨཾ མཉྙཏི , བྲཧྨསྨིཾ མཉྙཏི, བྲཧྨཏོ མཉྙཏི, བྲཧྨཾ མེཏི མཉྙཏི, བྲཧྨཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Brahmaṃ brahmato sañjānāti; brahmaṃ brahmato saññatvā brahmaṃ maññati , brahmasmiṃ maññati, brahmato maññati, brahmaṃ meti maññati, brahmaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཨཱབྷསྶརེ ཨཱབྷསྶརཏོ སཉྫཱནཱཏི; ཨཱབྷསྶརེ ཨཱབྷསྶརཏོ སཉྙཏྭཱ ཨཱབྷསྶརེ མཉྙཏི, ཨཱབྷསྶརེསུ མཉྙཏི, ཨཱབྷསྶརཏོ མཉྙཏི, ཨཱབྷསྶརེ མེཏི མཉྙཏི, ཨཱབྷསྶརེ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Ābhassare ābhassarato sañjānāti; ābhassare ābhassarato saññatvā ābhassare maññati, ābhassaresu maññati, ābhassarato maññati, ābhassare meti maññati, ābhassare abhinandati. Taṃ kissa hetu? ‘Apariññātaṃ tassā’ti vadāmi.

    ‘‘སུབྷཀིཎྷེ སུབྷཀིཎྷཏོ སཉྫཱནཱཏི; སུབྷཀིཎྷེ སུབྷཀིཎྷཏོ སཉྙཏྭཱ སུབྷཀིཎྷེ མཉྙཏི, སུབྷཀིཎྷེསུ མཉྙཏི, སུབྷཀིཎྷཏོ མཉྙཏི, སུབྷཀིཎྷེ མེཏི མཉྙཏི, སུབྷཀིཎྷེ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Subhakiṇhe subhakiṇhato sañjānāti; subhakiṇhe subhakiṇhato saññatvā subhakiṇhe maññati, subhakiṇhesu maññati, subhakiṇhato maññati, subhakiṇhe meti maññati, subhakiṇhe abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཝེཧཔྥལེ ཝེཧཔྥལཏོ སཉྫཱནཱཏི; ཝེཧཔྥལེ ཝེཧཔྥལཏོ སཉྙཏྭཱ ཝེཧཔྥལེ མཉྙཏི, ཝེཧཔྥལེསུ མཉྙཏི, ཝེཧཔྥལཏོ མཉྙཏི, ཝེཧཔྥལེ མེཏི མཉྙཏི, ཝེཧཔྥལེ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Vehapphale vehapphalato sañjānāti; vehapphale vehapphalato saññatvā vehapphale maññati, vehapphalesu maññati, vehapphalato maññati, vehapphale meti maññati, vehapphale abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཨབྷིབྷུཾ ཨབྷིབྷཱུཏོ སཉྫཱནཱཏི; ཨབྷིབྷུཾ ཨབྷིབྷཱུཏོ སཉྙཏྭཱ ཨབྷིབྷུཾ མཉྙཏི, ཨབྷིབྷུསྨིཾ མཉྙཏི, ཨབྷིབྷཱུཏོ མཉྙཏི, ཨབྷིབྷུཾ མེཏི མཉྙཏི, ཨབྷིབྷུཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Abhibhuṃ abhibhūto sañjānāti; abhibhuṃ abhibhūto saññatvā abhibhuṃ maññati, abhibhusmiṃ maññati, abhibhūto maññati, abhibhuṃ meti maññati, abhibhuṃ abhinandati. Taṃ kissa hetu? ‘Apariññātaṃ tassā’ti vadāmi.

    ༤. ‘‘ཨཱཀཱསཱནཉྩཱཡཏནཾ ཨཱཀཱསཱནཉྩཱཡཏནཏོ སཉྫཱནཱཏི; ཨཱཀཱསཱནཉྩཱཡཏནཾ ཨཱཀཱསཱནཉྩཱཡཏནཏོ སཉྙཏྭཱ ཨཱཀཱསཱནཉྩཱཡཏནཾ མཉྙཏི, ཨཱཀཱསཱནཉྩཱཡཏནསྨིཾ མཉྙཏི, ཨཱཀཱསཱནཉྩཱཡཏནཏོ མཉྙཏི, ཨཱཀཱསཱནཉྩཱཡཏནཾ མེཏི མཉྙཏི, ཨཱཀཱསཱནཉྩཱཡཏནཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    4. ‘‘Ākāsānañcāyatanaṃ ākāsānañcāyatanato sañjānāti; ākāsānañcāyatanaṃ ākāsānañcāyatanato saññatvā ākāsānañcāyatanaṃ maññati, ākāsānañcāyatanasmiṃ maññati, ākāsānañcāyatanato maññati, ākāsānañcāyatanaṃ meti maññati, ākāsānañcāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཝིཉྙཱཎཉྩཱཡཏནཾ ཝིཉྙཱཎཉྩཱཡཏནཏོ སཉྫཱནཱཏི; ཝིཉྙཱཎཉྩཱཡཏནཾ ཝིཉྙཱཎཉྩཱཡཏནཏོ སཉྙཏྭཱ ཝིཉྙཱཎཉྩཱཡཏནཾ མཉྙཏི, ཝིཉྙཱཎཉྩཱཡཏནསྨིཾ མཉྙཏི, ཝིཉྙཱཎཉྩཱཡཏནཏོ མཉྙཏི, ཝིཉྙཱཎཉྩཱཡཏནཾ མེཏི མཉྙཏི, ཝིཉྙཱཎཉྩཱཡཏནཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Viññāṇañcāyatanaṃ viññāṇañcāyatanato sañjānāti; viññāṇañcāyatanaṃ viññāṇañcāyatanato saññatvā viññāṇañcāyatanaṃ maññati, viññāṇañcāyatanasmiṃ maññati, viññāṇañcāyatanato maññati, viññāṇañcāyatanaṃ meti maññati, viññāṇañcāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཨཱཀིཉྩཉྙཱཡཏནཾ ཨཱཀིཉྩཉྙཱཡཏནཏོ སཉྫཱནཱཏི; ཨཱཀིཉྩཉྙཱཡཏནཾ ཨཱཀིཉྩཉྙཱཡཏནཏོ སཉྙཏྭཱ ཨཱཀིཉྩཉྙཱཡཏནཾ མཉྙཏི, ཨཱཀིཉྩཉྙཱཡཏནསྨིཾ མཉྙཏི, ཨཱཀིཉྩཉྙཱཡཏནཏོ མཉྙཏི, ཨཱཀིཉྩཉྙཱཡཏནཾ མེཏི མཉྙཏི, ཨཱཀིཉྩཉྙཱཡཏནཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Ākiñcaññāyatanaṃ ākiñcaññāyatanato sañjānāti; ākiñcaññāyatanaṃ ākiñcaññāyatanato saññatvā ākiñcaññāyatanaṃ maññati, ākiñcaññāyatanasmiṃ maññati, ākiñcaññāyatanato maññati, ākiñcaññāyatanaṃ meti maññati, ākiñcaññāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ནེཝསཉྙཱནཱསཉྙཱཡཏནཾ ནེཝསཉྙཱནཱསཉྙཱཡཏནཏོ སཉྫཱནཱཏི; ནེཝསཉྙཱནཱསཉྙཱཡཏནཾ ནེཝསཉྙཱནཱསཉྙཱཡཏནཏོ སཉྙཏྭཱ ནེཝསཉྙཱནཱསཉྙཱཡཏནཾ མཉྙཏི, ནེཝསཉྙཱནཱསཉྙཱཡཏནསྨིཾ མཉྙཏི, ནེཝསཉྙཱནཱསཉྙཱཡཏནཏོ མཉྙཏི, ནེཝསཉྙཱནཱསཉྙཱཡཏནཾ མེཏི མཉྙཏི, ནེཝསཉྙཱནཱསཉྙཱཡཏནཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Nevasaññānāsaññāyatanaṃ nevasaññānāsaññāyatanato sañjānāti; nevasaññānāsaññāyatanaṃ nevasaññānāsaññāyatanato saññatvā nevasaññānāsaññāyatanaṃ maññati, nevasaññānāsaññāyatanasmiṃ maññati, nevasaññānāsaññāyatanato maññati, nevasaññānāsaññāyatanaṃ meti maññati, nevasaññānāsaññāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.

    ༥. ‘‘དིཊྛཾ དིཊྛཏོ སཉྫཱནཱཏི; དིཊྛཾ དིཊྛཏོ སཉྙཏྭཱ དིཊྛཾ མཉྙཏི, དིཊྛསྨིཾ མཉྙཏི, དིཊྛཏོ མཉྙཏི, དིཊྛཾ མེཏི མཉྙཏི, དིཊྛཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    5. ‘‘Diṭṭhaṃ diṭṭhato sañjānāti; diṭṭhaṃ diṭṭhato saññatvā diṭṭhaṃ maññati, diṭṭhasmiṃ maññati, diṭṭhato maññati, diṭṭhaṃ meti maññati, diṭṭhaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘སུཏཾ སུཏཏོ སཉྫཱནཱཏི; སུཏཾ སུཏཏོ སཉྙཏྭཱ སུཏཾ མཉྙཏི, སུཏསྨིཾ མཉྙཏི, སུཏཏོ མཉྙཏི, སུཏཾ མེཏི མཉྙཏི, སུཏཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Sutaṃ sutato sañjānāti; sutaṃ sutato saññatvā sutaṃ maññati, sutasmiṃ maññati, sutato maññati, sutaṃ meti maññati, sutaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘མུཏཾ མུཏཏོ སཉྫཱནཱཏི; མུཏཾ མུཏཏོ སཉྙཏྭཱ མུཏཾ མཉྙཏི, མུཏསྨིཾ མཉྙཏི, མུཏཏོ མཉྙཏི, མུཏཾ མེཏི མཉྙཏི, མུཏཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Mutaṃ mutato sañjānāti; mutaṃ mutato saññatvā mutaṃ maññati, mutasmiṃ maññati, mutato maññati, mutaṃ meti maññati, mutaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ཝིཉྙཱཏཾ ཝིཉྙཱཏཏོ སཉྫཱནཱཏི; ཝིཉྙཱཏཾ ཝིཉྙཱཏཏོ སཉྙཏྭཱ ཝིཉྙཱཏཾ མཉྙཏི, ཝིཉྙཱཏསྨིཾ མཉྙཏི, ཝིཉྙཱཏཏོ མཉྙཏི, ཝིཉྙཱཏཾ མེཏི མཉྙཏི, ཝིཉྙཱཏཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Viññātaṃ viññātato sañjānāti; viññātaṃ viññātato saññatvā viññātaṃ maññati, viññātasmiṃ maññati, viññātato maññati, viññātaṃ meti maññati, viññātaṃ abhinandati. Taṃ kissa hetu? ‘Apariññātaṃ tassā’ti vadāmi.

    ༦. ‘‘ཨེཀཏྟཾ ཨེཀཏྟཏོ སཉྫཱནཱཏི; ཨེཀཏྟཾ ཨེཀཏྟཏོ སཉྙཏྭཱ ཨེཀཏྟཾ མཉྙཏི, ཨེཀཏྟསྨིཾ མཉྙཏི, ཨེཀཏྟཏོ མཉྙཏི, ཨེཀཏྟཾ མེཏི མཉྙཏི, ཨེཀཏྟཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    6. ‘‘Ekattaṃ ekattato sañjānāti; ekattaṃ ekattato saññatvā ekattaṃ maññati, ekattasmiṃ maññati, ekattato maññati, ekattaṃ meti maññati, ekattaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ནཱནཏྟཾ ནཱནཏྟཏོ སཉྫཱནཱཏི; ནཱནཏྟཾ ནཱནཏྟཏོ སཉྙཏྭཱ ནཱནཏྟཾ མཉྙཏི, ནཱནཏྟསྨིཾ མཉྙཏི, ནཱནཏྟཏོ མཉྙཏི, ནཱནཏྟཾ མེཏི མཉྙཏི, ནཱནཏྟཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Nānattaṃ nānattato sañjānāti; nānattaṃ nānattato saññatvā nānattaṃ maññati, nānattasmiṃ maññati, nānattato maññati, nānattaṃ meti maññati, nānattaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘སབྦཾ སབྦཏོ སཉྫཱནཱཏི; སབྦཾ སབྦཏོ སཉྙཏྭཱ སབྦཾ མཉྙཏི, སབྦསྨིཾ མཉྙཏི, སབྦཏོ མཉྙཏི, སབྦཾ མེཏི མཉྙཏི, སབྦཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Sabbaṃ sabbato sañjānāti; sabbaṃ sabbato saññatvā sabbaṃ maññati, sabbasmiṃ maññati, sabbato maññati, sabbaṃ meti maññati, sabbaṃ abhinandati. Taṃ kissa hetu? ‘Apariññātaṃ tassā’ti vadāmi.

    ‘‘ནིབྦཱནཾ ནིབྦཱནཏོ སཉྫཱནཱཏི; ནིབྦཱནཾ ནིབྦཱནཏོ སཉྙཏྭཱ ནིབྦཱནཾ མཉྙཏི, ནིབྦཱནསྨིཾ མཉྙཏི , ནིབྦཱནཏོ མཉྙཏི, ནིབྦཱནཾ མེཏི མཉྙཏི, ནིབྦཱནཾ ཨབྷིནནྡཏི། ཏཾ ཀིསྶ ཧེཏུ? ‘ཨཔརིཉྙཱཏཾ ཏསྶཱ’ཏི ཝདཱམི།

    ‘‘Nibbānaṃ nibbānato sañjānāti; nibbānaṃ nibbānato saññatvā nibbānaṃ maññati, nibbānasmiṃ maññati , nibbānato maññati, nibbānaṃ meti maññati, nibbānaṃ abhinandati. Taṃ kissa hetu? ‘Apariññātaṃ tassā’ti vadāmi.

    པུཐུཛྫནཝསེན པཋམནཡབྷཱུམིཔརིཙྪེདོ ནིཊྛིཏོ།

    Puthujjanavasena paṭhamanayabhūmiparicchedo niṭṭhito.

    ༧. ‘‘ཡོཔི སོ, བྷིཀྑཝེ, བྷིཀྑུ སེཀྑོ 3 ཨཔྤཏྟམཱནསོ ཨནུཏྟརཾ ཡོགཀྑེམཾ པཏྠཡམཱནོ ཝིཧརཏི, སོཔི པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ 4 པཐཝིཾ མཱ མཉྙི 5, པཐཝིཡཱ མཱ མཉྙི, པཐཝིཏོ མཱ མཉྙི, པཐཝིཾ མེཏི མཱ མཉྙི, པཐཝིཾ མཱབྷིནནྡི 6། ཏཾ ཀིསྶ ཧེཏུ? ‘པརིཉྙེཡྻཾ ཏསྶཱ’ཏི ཝདཱམི།

    7. ‘‘Yopi so, bhikkhave, bhikkhu sekkho 7 appattamānaso anuttaraṃ yogakkhemaṃ patthayamāno viharati, sopi pathaviṃ pathavito abhijānāti; pathaviṃ pathavito abhiññāya 8 pathaviṃ mā maññi 9, pathaviyā mā maññi, pathavito mā maññi, pathaviṃ meti mā maññi, pathaviṃ mābhinandi 10. Taṃ kissa hetu? ‘Pariññeyyaṃ tassā’ti vadāmi.

    ‘‘ཨཱཔཾ…པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ… ཨཱཀིཉྩཉྙཱཡཏནཾ… ནེཝསཉྙཱནཱསཉྙཱཡཏནཾ… དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ མཱ མཉྙི, ནིབྦཱནསྨིཾ མཱ མཉྙི, ནིབྦཱནཏོ མཱ མཉྙི, ནིབྦཱནཾ མེཏི མཱ མཉྙི, ནིབྦཱནཾ མཱབྷིནནྡི། ཏཾ ཀིསྶ ཧེཏུ? ‘པརིཉྙེཡྻཾ ཏསྶཱ’ཏི ཝདཱམི།

    ‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ mā maññi, nibbānasmiṃ mā maññi, nibbānato mā maññi, nibbānaṃ meti mā maññi, nibbānaṃ mābhinandi. Taṃ kissa hetu? ‘Pariññeyyaṃ tassā’ti vadāmi.

    སེཀྑཝསེན 11 དུཏིཡནཡབྷཱུམིཔརིཙྪེདོ ནིཊྛིཏོ།

    Sekkhavasena 12 dutiyanayabhūmiparicchedo niṭṭhito.

    ༨. ‘‘ཡོཔི སོ, བྷིཀྑཝེ, བྷིཀྑུ ཨརཧཾ ཁཱིཎཱསཝོ ཝུསིཏཝཱ ཀཏཀརཎཱིཡོ ཨོཧིཏབྷཱརོ ཨནུཔྤཏྟསདཏྠོ པརིཀྑཱིཎབྷཝསཾཡོཛནོ སམྨདཉྙཱ ཝིམུཏྟོ, སོཔི པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ པཐཝིཾ ན མཉྙཏི, པཐཝིཡཱ ན མཉྙཏི, པཐཝིཏོ ན མཉྙཏི, པཐཝིཾ མེཏི ན མཉྙཏི, པཐཝིཾ ནཱབྷིནནྡཏི། ཏཾ ཀིསྶ ཧེཏུ? ‘པརིཉྙཱཏཾ ཏསྶཱ’ཏི ཝདཱམི།

    8. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? ‘Pariññātaṃ tassā’ti vadāmi.

    ‘‘ཨཱཔཾ…པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ… ཨཱཀིཉྩཉྙཱཡཏནཾ… ནེཝསཉྙཱནཱསཉྙཱཡཏནཾ… དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ ན མཉྙཏི, ནིབྦཱནསྨིཾ ན མཉྙཏི, ནིབྦཱནཏོ ན མཉྙཏི, ནིབྦཱནཾ མེཏི ན མཉྙཏི, ནིབྦཱནཾ ནཱབྷིནནྡཏི། ཏཾ ཀིསྶ ཧེཏུ? ‘པརིཉྙཱཏཾ ཏསྶཱ’ཏི ཝདཱམི།

    ‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? ‘Pariññātaṃ tassā’ti vadāmi.

    ཁཱིཎཱསཝཝསེན ཏཏིཡནཡབྷཱུམིཔརིཙྪེདོ ནིཊྛིཏོ།

    Khīṇāsavavasena tatiyanayabhūmiparicchedo niṭṭhito.

    ༩. ‘‘ཡོཔི སོ, བྷིཀྑཝེ, བྷིཀྑུ ཨརཧཾ ཁཱིཎཱསཝོ ཝུསིཏཝཱ ཀཏཀརཎཱིཡོ ཨོཧིཏབྷཱརོ ཨནུཔྤཏྟསདཏྠོ པརིཀྑཱིཎབྷཝསཾཡོཛནོ སམྨདཉྙཱ ཝིམུཏྟོ, སོཔི པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ པཐཝིཾ ན མཉྙཏི, པཐཝིཡཱ ན མཉྙཏི, པཐཝིཏོ ན མཉྙཏི, པཐཝིཾ མེཏི ན མཉྙཏི, པཐཝིཾ ནཱབྷིནནྡཏི། ཏཾ ཀིསྶ ཧེཏུ? ཁཡཱ རཱགསྶ, ཝཱིཏརཱགཏྟཱ།

    9. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? Khayā rāgassa, vītarāgattā.

    ‘‘ཨཱཔཾ…པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ… ཨཱཀིཉྩཉྙཱཡཏནཾ … ནེཝསཉྙཱནཱསཉྙཱཡཏནཾ … དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ ན མཉྙཏི, ནིབྦཱནསྨིཾ ན མཉྙཏི, ནིབྦཱནཏོ ན མཉྙཏི, ནིབྦཱནཾ མེཏི ན མཉྙཏི, ནིབྦཱནཾ ནཱབྷིནནྡཏི། ཏཾ ཀིསྶ ཧེཏུ? ཁཡཱ རཱགསྶ, ཝཱིཏརཱགཏྟཱ།

    ‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ … nevasaññānāsaññāyatanaṃ … diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? Khayā rāgassa, vītarāgattā.

    ཁཱིཎཱསཝཝསེན ཙཏུཏྠནཡབྷཱུམིཔརིཙྪེདོ ནིཊྛིཏོ།

    Khīṇāsavavasena catutthanayabhūmiparicchedo niṭṭhito.

    ༡༠. ‘‘ཡོཔི སོ, བྷིཀྑཝེ, བྷིཀྑུ ཨརཧཾ ཁཱིཎཱསཝོ ཝུསིཏཝཱ ཀཏཀརཎཱིཡོ ཨོཧིཏབྷཱརོ ཨནུཔྤཏྟསདཏྠོ པརིཀྑཱིཎབྷཝསཾཡོཛནོ སམྨདཉྙཱ ཝིམུཏྟོ, སོཔི པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ པཐཝིཾ ན མཉྙཏི, པཐཝིཡཱ ན མཉྙཏི, པཐཝིཏོ ན མཉྙཏི, པཐཝིཾ མེཏི ན མཉྙཏི, པཐཝིཾ ནཱབྷིནནྡཏི། ཏཾ ཀིསྶ ཧེཏུ? ཁཡཱ དོསསྶ, ཝཱིཏདོསཏྟཱ།

    10. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? Khayā dosassa, vītadosattā.

    ‘‘ཨཱཔཾ…པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ… ཨཱཀིཉྩཉྙཱཡཏནཾ… ནེཝསཉྙཱནཱསཉྙཱཡཏནཾ… དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ ན མཉྙཏི, ནིབྦཱནསྨིཾ ན མཉྙཏི, ནིབྦཱནཏོ ན མཉྙཏི, ནིབྦཱནཾ མེཏི ན མཉྙཏི, ནིབྦཱནཾ ནཱབྷིནནྡཏི། ཏཾ ཀིསྶ ཧེཏུ? ཁཡཱ དོསསྶ, ཝཱིཏདོསཏྟཱ།

    ‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? Khayā dosassa, vītadosattā.

    ཁཱིཎཱསཝཝསེན པཉྩམནཡབྷཱུམིཔརིཙྪེདོ ནིཊྛིཏོ།

    Khīṇāsavavasena pañcamanayabhūmiparicchedo niṭṭhito.

    ༡༡. ‘‘ཡོཔི སོ, བྷིཀྑཝེ, བྷིཀྑུ ཨརཧཾ ཁཱིཎཱསཝོ ཝུསིཏཝཱ ཀཏཀརཎཱིཡོ ཨོཧིཏབྷཱརོ ཨནུཔྤཏྟསདཏྠོ པརིཀྑཱིཎབྷཝསཾཡོཛནོ སམྨདཉྙཱ ཝིམུཏྟོ, སོཔི པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ པཐཝིཾ ན མཉྙཏི, པཐཝིཡཱ ན མཉྙཏི, པཐཝིཏོ ན མཉྙཏི, པཐཝིཾ མེཏི ན མཉྙཏི, པཐཝིཾ ནཱབྷིནནྡཏི། ཏཾ ཀིསྶ ཧེཏུ? ཁཡཱ མོཧསྶ, ཝཱིཏམོཧཏྟཱ།

    11. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? Khayā mohassa, vītamohattā.

    ‘‘ཨཱཔཾ…པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ… ཨཱཀིཉྩཉྙཱཡཏནཾ … ནེཝསཉྙཱནཱསཉྙཱཡཏནཾ… དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ ན མཉྙཏི, ནིབྦཱནསྨིཾ ན མཉྙཏི, ནིབྦཱནཏོ ན མཉྙཏི, ནིབྦཱནཾ མེཏི ན མཉྙཏི, ནིབྦཱནཾ ནཱབྷིནནྡཏི། ཏཾ ཀིསྶ ཧེཏུ? ཁཡཱ མོཧསྶ, ཝཱིཏམོཧཏྟཱ།

    ‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ … nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? Khayā mohassa, vītamohattā.

    ཁཱིཎཱསཝཝསེན ཚཊྛནཡབྷཱུམིཔརིཙྪེདོ ནིཊྛིཏོ།

    Khīṇāsavavasena chaṭṭhanayabhūmiparicchedo niṭṭhito.

    ༡༢. ‘‘ཏཐཱགཏོཔི, བྷིཀྑཝེ, ཨརཧཾ སམྨཱསམྦུདྡྷོ པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ པཐཝིཾ ན མཉྙཏི, པཐཝིཡཱ ན མཉྙཏི, པཐཝིཏོ ན མཉྙཏི, པཐཝིཾ མེཏི ན མཉྙཏི, པཐཝིཾ ནཱབྷིནནྡཏི ། ཏཾ ཀིསྶ ཧེཏུ? ‘པརིཉྙཱཏནྟཾ ཏཐཱགཏསྶཱ’ཏི ཝདཱམི།

    12. ‘‘Tathāgatopi, bhikkhave, arahaṃ sammāsambuddho pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati . Taṃ kissa hetu? ‘Pariññātantaṃ tathāgatassā’ti vadāmi.

    ‘‘ཨཱཔཾ…པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ … ཨཱཀིཉྩཉྙཱཡཏནཾ… ནེཝསཉྙཱནཱསཉྙཱཡཏནཾ… དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ ན མཉྙཏི, ནིབྦཱནསྨིཾ ན མཉྙཏི, ནིབྦཱནཏོ ན མཉྙཏི, ནིབྦཱནཾ མེཏི ན མཉྙཏི, ནིབྦཱནཾ ནཱབྷིནནྡཏི། ཏཾ ཀིསྶ ཧེཏུ? ‘པརིཉྙཱཏནྟཾ ཏཐཱགཏསྶཱ’ཏི ཝདཱམི།

    ‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ … ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? ‘Pariññātantaṃ tathāgatassā’ti vadāmi.

    ཏཐཱགཏཝསེན སཏྟམནཡབྷཱུམིཔརིཙྪེདོ ནིཊྛིཏོ།

    Tathāgatavasena sattamanayabhūmiparicchedo niṭṭhito.

    ༡༣. ‘‘ཏཐཱགཏོཔི , བྷིཀྑཝེ, ཨརཧཾ སམྨཱསམྦུདྡྷོ པཐཝིཾ པཐཝིཏོ ཨབྷིཛཱནཱཏི; པཐཝིཾ པཐཝིཏོ ཨབྷིཉྙཱཡ པཐཝིཾ ན མཉྙཏི, པཐཝིཡཱ ན མཉྙཏི, པཐཝིཏོ ན མཉྙཏི, པཐཝིཾ མེཏི ན མཉྙཏི, པཐཝིཾ ནཱབྷིནནྡཏི། ཏཾ ཀིསྶ ཧེཏུ? ‘ནནྡཱི 13 དུཀྑསྶ མཱུལ’ནྟི – ཨིཏི ཝིདིཏྭཱ ‘བྷཝཱ ཛཱཏི བྷཱུཏསྶ ཛརཱམརཎ’ནྟི། ཏསྨཱཏིཧ, བྷིཀྑཝེ, ‘ཏཐཱགཏོ སབྦསོ ཏཎྷཱནཾ ཁཡཱ ཝིརཱགཱ ནིརོདྷཱ ཙཱགཱ པཊིནིསྶགྒཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ’ཏི ཝདཱམི།

    13. ‘‘Tathāgatopi , bhikkhave, arahaṃ sammāsambuddho pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? ‘Nandī 14 dukkhassa mūla’nti – iti viditvā ‘bhavā jāti bhūtassa jarāmaraṇa’nti. Tasmātiha, bhikkhave, ‘tathāgato sabbaso taṇhānaṃ khayā virāgā nirodhā cāgā paṭinissaggā anuttaraṃ sammāsambodhiṃ abhisambuddho’ti vadāmi.

    ‘‘ཨཱཔཾ …པེ॰… ཏེཛཾ… ཝཱཡཾ… བྷཱུཏེ… དེཝེ… པཛཱཔཏིཾ… བྲཧྨཾ… ཨཱབྷསྶརེ… སུབྷཀིཎྷེ… ཝེཧཔྥལེ… ཨབྷིབྷུཾ… ཨཱཀཱསཱནཉྩཱཡཏནཾ… ཝིཉྙཱཎཉྩཱཡཏནཾ… ཨཱཀིཉྩཉྙཱཡཏནཾ… ནེཝསཉྙཱནཱསཉྙཱཡཏནཾ… དིཊྛཾ… སུཏཾ… མུཏཾ… ཝིཉྙཱཏཾ… ཨེཀཏྟཾ… ནཱནཏྟཾ… སབྦཾ… ནིབྦཱནཾ ནིབྦཱནཏོ ཨབྷིཛཱནཱཏི; ནིབྦཱནཾ ནིབྦཱནཏོ ཨབྷིཉྙཱཡ ནིབྦཱནཾ ན མཉྙཏི, ནིབྦཱནསྨིཾ ན མཉྙཏི, ནིབྦཱནཏོ ན མཉྙཏི, ནིབྦཱནཾ མེཏི ན མཉྙཏི, ནིབྦཱནཾ ནཱབྷིནནྡཏི། ཏཾ ཀིསྶ ཧེཏུ? ‘ནནྡཱི དུཀྑསྶ མཱུལ’ནྟི – ཨིཏི ཝིདིཏྭཱ ‘བྷཝཱ ཛཱཏི བྷཱུཏསྶ ཛརཱམརཎ’ནྟི། ཏསྨཱཏིཧ, བྷིཀྑཝེ, ‘ཏཐཱགཏོ སབྦསོ ཏཎྷཱནཾ ཁཡཱ ཝིརཱགཱ ནིརོདྷཱ ཙཱགཱ པཊིནིསྶགྒཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ’ཏི ཝདཱམཱི’’ཏི།

    ‘‘Āpaṃ …pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? ‘Nandī dukkhassa mūla’nti – iti viditvā ‘bhavā jāti bhūtassa jarāmaraṇa’nti. Tasmātiha, bhikkhave, ‘tathāgato sabbaso taṇhānaṃ khayā virāgā nirodhā cāgā paṭinissaggā anuttaraṃ sammāsambodhiṃ abhisambuddho’ti vadāmī’’ti.

    ཏཐཱགཏཝསེན ཨཊྛམནཡབྷཱུམིཔརིཙྪེདོ ནིཊྛིཏོ།

    Tathāgatavasena aṭṭhamanayabhūmiparicchedo niṭṭhito.

    ཨིདམཝོཙ བྷགཝཱ། ན ཏེ བྷིཀྑཱུ 15 བྷགཝཏོ བྷཱསིཏཾ ཨབྷིནནྡུནྟི།

    Idamavoca bhagavā. Na te bhikkhū 16 bhagavato bhāsitaṃ abhinandunti.

    མཱུལཔརིཡཱཡསུཏྟཾ ནིཊྛིཏཾ པཋམཾ།

    Mūlapariyāyasuttaṃ niṭṭhitaṃ paṭhamaṃ.




    Next: ༢. སབྦཱསཝསུཏྟཾ • 2. Sabbāsavasuttaṃ




    Footnotes:
    1. པཋཝིཾ (སཱི॰ སྱཱ॰ ཀཾ॰ པཱི॰)
    2. paṭhaviṃ (sī. syā. kaṃ. pī.)
    3. སེཁོ (སཱི॰ སྱཱ॰ ཀཾ॰ པཱི॰)
    4. ཨབྷིཉྙཏྭཱ (ཀ॰)
    5. ཝཱ མཉྙཏི
    6. ཝཱ ཨབྷིནནྡཏི (སཱི॰) ཊཱིཀཱ ཨོལོཀེཏབྦཱ
    7. sekho (sī. syā. kaṃ. pī.)
    8. abhiññatvā (ka.)
    9. vā maññati
    10. vā abhinandati (sī.) ṭīkā oloketabbā
    11. སཏྠཱརཝསེན (སཱི॰), སཏྠུཝསེན (སྱཱ॰ ཀ॰)
    12. satthāravasena (sī.), satthuvasena (syā. ka.)
    13. ནནྡི (སཱི॰ སྱཱ॰)
    14. nandi (sī. syā.)
    15. ན ཨཏྟམནཱ ཏེབྷིཀྑཱུ (སྱཱ॰), ཏེ བྷིཀྑཱུ (པཱི॰ ཀ॰)
    16. na attamanā tebhikkhū (syā.), te bhikkhū (pī. ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡. མཱུལཔརིཡཱཡསུཏྟཝཎྞནཱ • 1. Mūlapariyāyasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༡. མཱུལཔརིཡཱཡསུཏྟཝཎྞནཱ • 1. Mūlapariyāyasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact