Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā)

    ॥ নমো তস্স ভগৰতো অরহতো সম্মাসম্বুদ্ধস্স॥

    Namo tassa bhagavato arahato sammāsambuddhassa

    মজ্ঝিমনিকাযে

    Majjhimanikāye

    মূলপণ্ণাস-অট্ঠকথা

    Mūlapaṇṇāsa-aṭṭhakathā

    (পঠমো ভাগো)

    (Paṭhamo bhāgo)

    গন্থারম্ভকথা

    Ganthārambhakathā

    করুণাসীতলহদযং , পঞ্ঞাপজ্জোতৰিহতমোহতমং।

    Karuṇāsītalahadayaṃ , paññāpajjotavihatamohatamaṃ;

    সনরামরলোকগরুং, ৰন্দে সুগতং গতিৰিমুত্তং॥

    Sanarāmaralokagaruṃ, vande sugataṃ gativimuttaṃ.

    বুদ্ধোপি বুদ্ধভাৰং, ভাৰেত্ৰা চেৰ সচ্ছিকত্ৰা চ।

    Buddhopi buddhabhāvaṃ, bhāvetvā ceva sacchikatvā ca;

    যং উপগতো গতমলং, ৰন্দে তমনুত্তরং ধম্মং॥

    Yaṃ upagato gatamalaṃ, vande tamanuttaraṃ dhammaṃ.

    সুগতস্স ওরসানং, পুত্তানং মারসেনমথনানং।

    Sugatassa orasānaṃ, puttānaṃ mārasenamathanānaṃ;

    অট্ঠন্নম্পি সমূহং, সিরসা ৰন্দে অরিযসঙ্ঘং॥

    Aṭṭhannampi samūhaṃ, sirasā vande ariyasaṅghaṃ.

    ইতি মে পসন্নমতিনো, রতনত্তযৰন্দনামযং পুঞ্ঞং।

    Iti me pasannamatino, ratanattayavandanāmayaṃ puññaṃ;

    যং সুৰিহতন্তরাযো, হুত্ৰা তস্সানুভাৰেন॥

    Yaṃ suvihatantarāyo, hutvā tassānubhāvena.

    মজ্ঝিমপমাণসুত্তঙ্কিতস্স ইধ মজ্ঝিমাগমৰরস্স।

    Majjhimapamāṇasuttaṅkitassa idha majjhimāgamavarassa;

    বুদ্ধানুবুদ্ধসংৰণ্ণিতস্স পরৰাদমথনস্স॥

    Buddhānubuddhasaṃvaṇṇitassa paravādamathanassa.

    অত্থপ্পকাসনত্থং, অট্ঠকথা আদিতো ৰসিসতেহি।

    Atthappakāsanatthaṃ, aṭṭhakathā ādito vasisatehi;

    পঞ্চহি যা সঙ্গীতা, অনুসঙ্গীতা চ পচ্ছাপি॥

    Pañcahi yā saṅgītā, anusaṅgītā ca pacchāpi.

    সীহল়দীপং পন আভতাথ ৰসিনা মহামহিন্দেন।

    Sīhaḷadīpaṃ pana ābhatātha vasinā mahāmahindena;

    ঠপিতা সীহল়ভাসায, দীপৰাসীনমত্থায॥

    Ṭhapitā sīhaḷabhāsāya, dīpavāsīnamatthāya.

    অপনেত্ৰান ততোহং, সীহল়ভাসং মনোরমং ভাসং।

    Apanetvāna tatohaṃ, sīhaḷabhāsaṃ manoramaṃ bhāsaṃ;

    তন্তিনযানুচ্ছৰিকং, আরোপেন্তো ৰিগতদোসং॥

    Tantinayānucchavikaṃ, āropento vigatadosaṃ.

    সমযং অৰিলোমেন্তো, থেরানং থেরৰংসদীপানং।

    Samayaṃ avilomento, therānaṃ theravaṃsadīpānaṃ;

    সুনিপুণৰিনিচ্ছযানং, মহাৰিহারে নিৰাসীনং॥

    Sunipuṇavinicchayānaṃ, mahāvihāre nivāsīnaṃ.

    হিত্ৰা পুনপ্পুনাগতমত্থং, অত্থং পকাসযিস্সামি।

    Hitvā punappunāgatamatthaṃ, atthaṃ pakāsayissāmi;

    সুজনস্স চ তুট্ঠত্থং, চিরট্ঠিতত্থঞ্চ ধম্মস্স॥

    Sujanassa ca tuṭṭhatthaṃ, ciraṭṭhitatthañca dhammassa.

    সীলকথা ধুতধম্মা, কম্মট্ঠানানি চেৰ সব্বানি।

    Sīlakathā dhutadhammā, kammaṭṭhānāni ceva sabbāni;

    চরিযাৰিধানসহিতো, ঝানসমাপত্তিৰিত্থারো॥

    Cariyāvidhānasahito, jhānasamāpattivitthāro.

    সব্বা চ অভিঞ্ঞাযো, পঞ্ঞাসঙ্কলননিচ্ছযো চেৰ।

    Sabbā ca abhiññāyo, paññāsaṅkalananicchayo ceva;

    খন্ধাধাতাযতনিন্দ্রিযানি অরিযানি চেৰ চত্তারি॥

    Khandhādhātāyatanindriyāni ariyāni ceva cattāri.

    সচ্চানি পচ্চযাকারদেসনা সুপরিসুদ্ধনিপুণনযা।

    Saccāni paccayākāradesanā suparisuddhanipuṇanayā;

    অৰিমুত্ততন্তিমগ্গা, ৰিপস্সনাভাৰনা চেৰ॥

    Avimuttatantimaggā, vipassanābhāvanā ceva.

    ইতি পন সব্বং যস্মা, ৰিসুদ্ধিমগ্গে মযা সুপরিসুদ্ধং।

    Iti pana sabbaṃ yasmā, visuddhimagge mayā suparisuddhaṃ;

    ৰুত্তং তস্মা ভিয্যো, ন তং ইধ ৰিচারযিস্সামি॥

    Vuttaṃ tasmā bhiyyo, na taṃ idha vicārayissāmi.

    ‘‘মজ্ঝে ৰিসুদ্ধিমগ্গো, এস চতুন্নম্পি আগমানঞ্হি।

    ‘‘Majjhe visuddhimaggo, esa catunnampi āgamānañhi;

    ঠত্ৰা পকাসযিস্সতি, তত্থ যথাভাসিতমত্থং’’॥

    Ṭhatvā pakāsayissati, tattha yathābhāsitamatthaṃ’’.

    ইচ্চেৰ কতো তস্মা, তম্পি গহেত্ৰান সদ্ধিমেতায।

    Icceva kato tasmā, tampi gahetvāna saddhimetāya;

    অট্ঠকথায ৰিজানথ, মজ্ঝিমসঙ্গীতিযা অত্থন্তি॥

    Aṭṭhakathāya vijānatha, majjhimasaṅgītiyā atthanti.

    নিদানকথা

    Nidānakathā

    ১. তত্থ মজ্ঝিমসঙ্গীতি নাম পণ্ণাসতো মূলপণ্ণাসা মজ্ঝিমপণ্ণাসা উপরিপণ্ণাসাতি পণ্ণাসত্তযসঙ্গহা। ৰগ্গতো একেকায পণ্ণাসায পঞ্চ পঞ্চ ৰগ্গে কত্ৰা পন্নরসৰগ্গসমাযোগা। সুত্ততো দিযড্ঢসুত্তসতং দ্ৰে চ সুত্তন্তা। পদতো তেৰীসুত্তরপঞ্চসতাধিকানি অসীতিপদসহস্সানি। তেনাহু পোরাণা –

    1. Tattha majjhimasaṅgīti nāma paṇṇāsato mūlapaṇṇāsā majjhimapaṇṇāsā uparipaṇṇāsāti paṇṇāsattayasaṅgahā. Vaggato ekekāya paṇṇāsāya pañca pañca vagge katvā pannarasavaggasamāyogā. Suttato diyaḍḍhasuttasataṃ dve ca suttantā. Padato tevīsuttarapañcasatādhikāni asītipadasahassāni. Tenāhu porāṇā –

    ‘‘অসীতিপদসহস্সানি, ভিয্যো পঞ্চসতানি চ।

    ‘‘Asītipadasahassāni, bhiyyo pañcasatāni ca;

    পুন তেৰীসতি ৰুত্তা, পদমেৰং ৰৰত্থিত’’ন্তি॥

    Puna tevīsati vuttā, padamevaṃ vavatthita’’nti.

    অক্খরতো সত্ত অক্খরসতসহস্সানি চত্তালীসঞ্চ সহস্সানি তেপঞ্ঞাসঞ্চ অক্খরানি। ভাণৰারতো অসীতি ভাণৰারা তেৰীসপদাধিকো চ উপড্ঢভাণৰারো। অনুসন্ধিতো পুচ্ছানুসন্ধি-অজ্ঝাসযানুসন্ধি-যথানুসন্ধিৰসেন সঙ্খেপতো তিৰিধো অনুসন্ধি। ৰিত্থারতো পনেত্থ তীণি অনুসন্ধিসহস্সানি নৰ চ সতানি হোন্তি। তেনাহু পোরাণা –

    Akkharato satta akkharasatasahassāni cattālīsañca sahassāni tepaññāsañca akkharāni. Bhāṇavārato asīti bhāṇavārā tevīsapadādhiko ca upaḍḍhabhāṇavāro. Anusandhito pucchānusandhi-ajjhāsayānusandhi-yathānusandhivasena saṅkhepato tividho anusandhi. Vitthārato panettha tīṇi anusandhisahassāni nava ca satāni honti. Tenāhu porāṇā –

    ‘‘তীণি সন্ধিসহস্সানি, তথা নৰসতানি চ।

    ‘‘Tīṇi sandhisahassāni, tathā navasatāni ca;

    অনুসন্ধিনযা এতে, মজ্ঝিমস্স পকাসিতা’’তি॥

    Anusandhinayā ete, majjhimassa pakāsitā’’ti.

    তত্থ পণ্ণাসাসু মূলপণ্ণাসা আদি, ৰগ্গেসু মূলপরিযাযৰগ্গো, সুত্তেসু মূলপরিযাযসুত্তং। তস্সাপি ‘‘এৰং মে সুত’’ন্তিআদিকং আযস্মতা আনন্দেন পঠমমহাসঙ্গীতিকালে ৰুত্তং নিদানমাদি। সা পনেসা পঠমমহাসঙ্গীতি সুমঙ্গলৰিলাসিনিযা দীঘনিকাযট্ঠকথায আদিম্হি ৰিত্থারিতা। তস্মা সা তত্থ ৰিত্থারিতনযেনেৰ ৰেদিতব্বা।

    Tattha paṇṇāsāsu mūlapaṇṇāsā ādi, vaggesu mūlapariyāyavaggo, suttesu mūlapariyāyasuttaṃ. Tassāpi ‘‘evaṃ me suta’’ntiādikaṃ āyasmatā ānandena paṭhamamahāsaṅgītikāle vuttaṃ nidānamādi. Sā panesā paṭhamamahāsaṅgīti sumaṅgalavilāsiniyā dīghanikāyaṭṭhakathāya ādimhi vitthāritā. Tasmā sā tattha vitthāritanayeneva veditabbā.

    ১. মূলপরিযাযৰগ্গো

    1. Mūlapariyāyavaggo

    ১. মূলপরিযাযসুত্তৰণ্ণনা

    1. Mūlapariyāyasuttavaṇṇanā

    ১. যং পনেতং ‘‘এৰং মে সুত’’ন্তিআদিকং নিদানং। তত্থ এৰন্তি নিপাতপদং। মেতিআদীনি নামপদানি। উক্কট্ঠাযং ৰিহরতীতি এত্থ ৰীতি উপসগ্গপদং, হরতীতি আখ্যাতপদন্তি ইমিনা তাৰ নযেন পদৰিভাগো ৰেদিতব্বো।

    1. Yaṃ panetaṃ ‘‘evaṃ me suta’’ntiādikaṃ nidānaṃ. Tattha evanti nipātapadaṃ. Metiādīni nāmapadāni. Ukkaṭṭhāyaṃ viharatīti ettha vīti upasaggapadaṃ, haratīti ākhyātapadanti iminā tāva nayena padavibhāgo veditabbo.

    অত্থতো পন এৰং-সদ্দো তাৰ উপমূপদেসসম্পহংসনগরহণৰচনসম্পটিগ্গহাকারনিদস্সনাৰধারণাদিঅনেকত্থপ্পভেদো। তথাহেস – ‘‘এৰং জাতেন মচ্চেন কত্তব্বং কুসলং বহু’’ন্তি এৰমাদীসু (ধ॰ প॰ ৫৩) উপমাযং আগতো। ‘‘এৰং তে অভিক্কমিতব্বং, এৰং তে পটিক্কমিতব্ব’’ন্তিআদীসু (অ॰ নি॰ ৪.১২২) উপদেসে। ‘‘এৰমেতং ভগৰা, এৰমেতং সুগতা’’তিআদীসু (অ॰ নি॰ ৩.৬৬) সম্পহংসনে। ‘‘এৰমেৰং পনাযং ৰসলী যস্মিং ৰা তস্মিং ৰা তস্স মুণ্ডকস্স সমণকস্স ৰণ্ণং ভাসতী’’তিআদীসু (সং॰ নি॰ ১.১৮৭) গরহণে। ‘‘এৰং ভন্তেতি খো তে ভিক্খূ ভগৰতো পচ্চস্সোসু’’ন্তিআদীসু (ম॰ নি॰ ১.১) ৰচনসম্পটিগ্গহে। ‘‘এৰং ব্যাখো অহং, ভন্তে, ভগৰতা ধম্মং দেসিতং আজানামী’’তিআদীসু (ম॰ নি॰ ১.৩৯৮) আকারে। ‘‘এহি ত্ৰং, মাণৰক, যেন সমণো আনন্দো তেনুপসঙ্কম, উপসঙ্কমিত্ৰা মম ৰচনেন সমণং, আনন্দং, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – ‘সুভো মাণৰো তোদেয্যপুত্তো, ভৰন্তং আনন্দং, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’তি, এৰঞ্চ ৰদেহি সাধু কির ভৰং আনন্দো যেন সুভস্স মাণৰস্স তোদেয্যপুত্তস্স নিৰেসনং, তেনুপসঙ্কমতু অনুকম্পং উপাদাযা’’তিআদীসু (দী॰ নি॰ ১.৪৪৫) নিদস্সনে। ‘‘তং কিং মঞ্ঞথ, কালামা, ইমে ধম্মা কুসলা ৰা অকুসলা ৰাতি? অকুসলা, ভন্তে। সাৰজ্জা ৰা অনৰজ্জা ৰাতি? সাৰজ্জা, ভন্তে। ৰিঞ্ঞুগরহিতা ৰা ৰিঞ্ঞুপ্পসত্থা ৰাতি? ৰিঞ্ঞুগরহিতা, ভন্তে। সমত্তা সমাদিন্না অহিতায দুক্খায সংৰত্তন্তি নো ৰা, কথং ৰো এত্থ হোতীতি? সমত্তা, ভন্তে, সমাদিন্না অহিতায দুক্খায সংৰত্তন্তি, এৰং নো এত্থ হোতী’’তিআদীসু (অ॰ নি॰ ৩.৬৬) অৰধারণে। স্ৰাযমিধ আকারনিদস্সনাৰধারণেসু দট্ঠব্বো।

    Atthato pana evaṃ-saddo tāva upamūpadesasampahaṃsanagarahaṇavacanasampaṭiggahākāranidassanāvadhāraṇādianekatthappabhedo. Tathāhesa – ‘‘evaṃ jātena maccena kattabbaṃ kusalaṃ bahu’’nti evamādīsu (dha. pa. 53) upamāyaṃ āgato. ‘‘Evaṃ te abhikkamitabbaṃ, evaṃ te paṭikkamitabba’’ntiādīsu (a. ni. 4.122) upadese. ‘‘Evametaṃ bhagavā, evametaṃ sugatā’’tiādīsu (a. ni. 3.66) sampahaṃsane. ‘‘Evamevaṃ panāyaṃ vasalī yasmiṃ vā tasmiṃ vā tassa muṇḍakassa samaṇakassa vaṇṇaṃ bhāsatī’’tiādīsu (saṃ. ni. 1.187) garahaṇe. ‘‘Evaṃ bhanteti kho te bhikkhū bhagavato paccassosu’’ntiādīsu (ma. ni. 1.1) vacanasampaṭiggahe. ‘‘Evaṃ byākho ahaṃ, bhante, bhagavatā dhammaṃ desitaṃ ājānāmī’’tiādīsu (ma. ni. 1.398) ākāre. ‘‘Ehi tvaṃ, māṇavaka, yena samaṇo ānando tenupasaṅkama, upasaṅkamitvā mama vacanena samaṇaṃ, ānandaṃ, appābādhaṃ appātaṅkaṃ lahuṭṭhānaṃ balaṃ phāsuvihāraṃ puccha – ‘subho māṇavo todeyyaputto, bhavantaṃ ānandaṃ, appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchatī’ti, evañca vadehi sādhu kira bhavaṃ ānando yena subhassa māṇavassa todeyyaputtassa nivesanaṃ, tenupasaṅkamatu anukampaṃ upādāyā’’tiādīsu (dī. ni. 1.445) nidassane. ‘‘Taṃ kiṃ maññatha, kālāmā, ime dhammā kusalā vā akusalā vāti? Akusalā, bhante. Sāvajjā vā anavajjā vāti? Sāvajjā, bhante. Viññugarahitā vā viññuppasatthā vāti? Viññugarahitā, bhante. Samattā samādinnā ahitāya dukkhāya saṃvattanti no vā, kathaṃ vo ettha hotīti? Samattā, bhante, samādinnā ahitāya dukkhāya saṃvattanti, evaṃ no ettha hotī’’tiādīsu (a. ni. 3.66) avadhāraṇe. Svāyamidha ākāranidassanāvadhāraṇesu daṭṭhabbo.

    তত্থ আকারট্ঠেন এৰংসদ্দেন এতমত্থং দীপেতি – নানানযনিপুণং অনেকজ্ঝাসযসমুট্ঠানং অত্থব্যঞ্জনসম্পন্নং ৰিৰিধপাটিহারিযং ধম্মত্থদেসনাপটিৰেধগম্ভীরং সব্বসত্তানং সকসকভাসানুরূপতো সোতপথমাগচ্ছন্তং তস্স ভগৰতো ৰচনং সব্বপ্পকারেন কো সমত্থো ৰিঞ্ঞাতুং, সব্বথামেন পন সোতুকামতং জনেত্ৰাপি এৰং মে সুতং, মযাপি একেনাকারেন সুতন্তি।

    Tattha ākāraṭṭhena evaṃsaddena etamatthaṃ dīpeti – nānānayanipuṇaṃ anekajjhāsayasamuṭṭhānaṃ atthabyañjanasampannaṃ vividhapāṭihāriyaṃ dhammatthadesanāpaṭivedhagambhīraṃ sabbasattānaṃ sakasakabhāsānurūpato sotapathamāgacchantaṃ tassa bhagavato vacanaṃ sabbappakārena ko samattho viññātuṃ, sabbathāmena pana sotukāmataṃ janetvāpi evaṃ me sutaṃ, mayāpi ekenākārena sutanti.

    নিদস্সনট্ঠেন ‘‘নাহং সযম্ভূ, ন মযা ইদং সচ্ছিকত’’ন্তি অত্তানং পরিমোচেন্তো এৰং মে সুতং, মযাপি এৰং সুতন্তি ইদানি ৰত্তব্বং সকলং সুত্তং নিদস্সেতি।

    Nidassanaṭṭhena ‘‘nāhaṃ sayambhū, na mayā idaṃ sacchikata’’nti attānaṃ parimocento evaṃ me sutaṃ, mayāpi evaṃ sutanti idāni vattabbaṃ sakalaṃ suttaṃ nidasseti.

    অৰধারণট্ঠেন ‘‘এতদগ্গং, ভিক্খৰে, মম সাৰকানং ভিক্খূনং বহুস্সুতানং যদিদং আনন্দো, গতিমন্তানং, সতিমন্তানং, ধিতিমন্তানং, উপট্ঠাকানং যদিদং আনন্দো’’তি (অ॰ নি॰ ১.২১৯-২২৩) এৰং ভগৰতা, ‘‘আযস্মা আনন্দো অত্থকুসলো ধম্মকুসলো ব্যঞ্জনকুসলো নিরুত্তিকুসলো পুব্বাপরকুসলো’’তি (অ॰ নি॰ ৫.১৬৯) এৰং ধম্মসেনাপতিনা চ পসত্থভাৰানুরূপং অত্তনো ধারণবলং দস্সেন্তো সত্তানং সোতুকম্যতং জনেতি ‘‘এৰং মে সুতং, তঞ্চ খো অত্থতো ৰা ব্যঞ্জনতো ৰা অনূনমনধিকং, এৰমেৰ ন অঞ্ঞথা দট্ঠব্ব’’ন্তি।

    Avadhāraṇaṭṭhena ‘‘etadaggaṃ, bhikkhave, mama sāvakānaṃ bhikkhūnaṃ bahussutānaṃ yadidaṃ ānando, gatimantānaṃ, satimantānaṃ, dhitimantānaṃ, upaṭṭhākānaṃ yadidaṃ ānando’’ti (a. ni. 1.219-223) evaṃ bhagavatā, ‘‘āyasmā ānando atthakusalo dhammakusalo byañjanakusalo niruttikusalo pubbāparakusalo’’ti (a. ni. 5.169) evaṃ dhammasenāpatinā ca pasatthabhāvānurūpaṃ attano dhāraṇabalaṃ dassento sattānaṃ sotukamyataṃ janeti ‘‘evaṃ me sutaṃ, tañca kho atthato vā byañjanato vā anūnamanadhikaṃ, evameva na aññathā daṭṭhabba’’nti.

    মে-সদ্দো তীসু অত্থেসু দিস্সতি। তথা হিস্স ‘‘গাথাভিগীতং মে অভোজনেয্য’’ন্তিআদীসু (সু॰ নি॰ ৮১) মযাতি অত্থো। ‘‘সাধু মে, ভন্তে ভগৰা, সংখিত্তেন ধম্মং দেসেতূ’’তিআদীসু (সং॰ নি॰ ৪.৮৮) ময্হন্তি অত্থো। ‘‘ধম্মদাযাদা মে, ভিক্খৰে, ভৰথা’’তিআদীসু (ম॰ নি॰ ১.২৯) মমাতি অত্থো। ইধ পন ‘‘মযা সুত’’ন্তি চ ‘‘মম সুত’’ন্তি চ অত্থদ্ৰযে যুজ্জতি।

    Me-saddo tīsu atthesu dissati. Tathā hissa ‘‘gāthābhigītaṃ me abhojaneyya’’ntiādīsu (su. ni. 81) mayāti attho. ‘‘Sādhu me, bhante bhagavā, saṃkhittena dhammaṃ desetū’’tiādīsu (saṃ. ni. 4.88) mayhanti attho. ‘‘Dhammadāyādā me, bhikkhave, bhavathā’’tiādīsu (ma. ni. 1.29) mamāti attho. Idha pana ‘‘mayā suta’’nti ca ‘‘mama suta’’nti ca atthadvaye yujjati.

    সুতন্তি অযং সুত-সদ্দো সউপসগ্গো চ অনুপসগ্গো চ গমন-ৰিস্সুত-কিলিন্ন-উপচিতানুযোগ-সোতৰিঞ্ঞেয্য-সোতদ্ৰারানুসারৰিঞ্ঞাতাদিঅনেকত্থপ্পভেদো। তথা হিস্স ‘‘সেনায পসুতো’’তিআদীসু গচ্ছন্তোতি অত্থো। ‘‘সুতধম্মস্স পস্সতো’’তিআদীসু (উদা॰ ১১) ৰিস্সুতধম্মস্সাতি অত্থো, ‘‘অৰস্সুতা অৰস্সুতস্সাতি’’আদীসু (পাচি॰ ৬৫৭) কিলিন্না কিলিন্নস্সাতি অত্থো। ‘‘তুম্হেহি পুঞ্ঞং পসুতং অনপ্পক’’ন্তিআদীসু (খু॰ পা॰ ৭.১২) উপচিতন্তি অত্থো। ‘‘যে ঝানপসুতা ধীরা’’তিআদীসু (ধ॰ প॰ ১৮১) ঝানানুযুত্তাতি অত্থো। ‘‘দিট্ঠং সুতং মুত’’ন্তিআদীসু (ম॰ নি॰ ১.২৪১) সোতৰিঞ্ঞেয্যন্তি অত্থো। ‘‘সুতধরো সুতসন্নিচযো’’তিআদীসু (ম॰ নি॰ ১.৩৩৯) সোতদ্ৰারানুসারৰিঞ্ঞাতধরোতি অত্থো। ইধ পনস্স সোতদ্ৰারানুসারেন ‘‘উপধারিত’’ন্তি ৰা ‘‘উপধারণ’’ন্তি ৰাতি অত্থো। মে-সদ্দস্স হি মযাতি অত্থে সতি ‘‘এৰং মযা সুতং সোতদ্ৰারানুসারেন উপধারিত’’ন্তি যুজ্জতি। মমাতি অত্থে সতি ‘‘এৰং মম সুতং সোতদ্ৰারানুসারেন উপধারণ’’ন্তি যুজ্জতি।

    Sutanti ayaṃ suta-saddo saupasaggo ca anupasaggo ca gamana-vissuta-kilinna-upacitānuyoga-sotaviññeyya-sotadvārānusāraviññātādianekatthappabhedo. Tathā hissa ‘‘senāya pasuto’’tiādīsu gacchantoti attho. ‘‘Sutadhammassa passato’’tiādīsu (udā. 11) vissutadhammassāti attho, ‘‘avassutā avassutassāti’’ādīsu (pāci. 657) kilinnā kilinnassāti attho. ‘‘Tumhehi puññaṃ pasutaṃ anappaka’’ntiādīsu (khu. pā. 7.12) upacitanti attho. ‘‘Ye jhānapasutā dhīrā’’tiādīsu (dha. pa. 181) jhānānuyuttāti attho. ‘‘Diṭṭhaṃ sutaṃ muta’’ntiādīsu (ma. ni. 1.241) sotaviññeyyanti attho. ‘‘Sutadharo sutasannicayo’’tiādīsu (ma. ni. 1.339) sotadvārānusāraviññātadharoti attho. Idha panassa sotadvārānusārena ‘‘upadhārita’’nti vā ‘‘upadhāraṇa’’nti vāti attho. Me-saddassa hi mayāti atthe sati ‘‘evaṃ mayā sutaṃ sotadvārānusārena upadhārita’’nti yujjati. Mamāti atthe sati ‘‘evaṃ mama sutaṃ sotadvārānusārena upadhāraṇa’’nti yujjati.

    এৰমেতেসু তীসু পদেসু এৰন্তি সোতৰিঞ্ঞাণাদিৰিঞ্ঞাণকিচ্চনিদস্সনং। মেতি ৰুত্তৰিঞ্ঞাণসমঙ্গিপুগ্গলনিদস্সনং। সুতন্তি অস্সৰনভাৰপ্পটিক্খেপতো অনূনানধিকাৰিপরীতগ্গহণনিদস্সনং। তথা এৰন্তি তস্সা সোতদ্ৰারানুসারেন পৰত্তায ৰিঞ্ঞাণৰীথিযা নানপ্পকারেন আরম্মণে পৰত্তিভাৰপ্পকাসনং। মেতি অত্তপ্পকাসনং। সুতন্তি ধম্মপ্পকাসনং। অযঞ্হেত্থ সঙ্খেপো ‘‘নানপ্পকারেন আরম্মণে পৰত্তায ৰিঞ্ঞাণৰীথিযা মযা ন অঞ্ঞং কতং, ইদং পন কতং, অযং ধম্মো সুতো’’তি।

    Evametesu tīsu padesu evanti sotaviññāṇādiviññāṇakiccanidassanaṃ. Meti vuttaviññāṇasamaṅgipuggalanidassanaṃ. Sutanti assavanabhāvappaṭikkhepato anūnānadhikāviparītaggahaṇanidassanaṃ. Tathā evanti tassā sotadvārānusārena pavattāya viññāṇavīthiyā nānappakārena ārammaṇe pavattibhāvappakāsanaṃ. Meti attappakāsanaṃ. Sutanti dhammappakāsanaṃ. Ayañhettha saṅkhepo ‘‘nānappakārena ārammaṇe pavattāya viññāṇavīthiyā mayā na aññaṃ kataṃ, idaṃ pana kataṃ, ayaṃ dhammo suto’’ti.

    তথা এৰন্তি নিদ্দিসিতব্বপ্পকাসনং। মেতি পুগ্গলপ্পকাসনং। সুতন্তি পুগ্গলকিচ্চপ্পকাসনং। ইদং ৰুত্তং হোতি – যং সুত্তং নিদ্দিসিস্সামি, তং মযা এৰং সুতন্তি।

    Tathā evanti niddisitabbappakāsanaṃ. Meti puggalappakāsanaṃ. Sutanti puggalakiccappakāsanaṃ. Idaṃ vuttaṃ hoti – yaṃ suttaṃ niddisissāmi, taṃ mayā evaṃ sutanti.

    তথা এৰন্তি যস্স চিত্তসন্তানস্স নানাকারপ্পৰত্তিযা নানত্থব্যঞ্জনগ্গহণং হোতি, তস্স নানাকারনিদ্দেসো। এৰন্তি হি অযং আকারপঞ্ঞত্তি, মেতি কত্তুনিদ্দেসো, সুতন্তি ৰিসযনিদ্দেসো। এত্তাৰতা নানাকারপ্পৰত্তেন চিত্তসন্তানেন তংসমঙ্গিনো কত্তুৰিসযে গহণসন্নিট্ঠানং কতং হোতি।

    Tathā evanti yassa cittasantānassa nānākārappavattiyā nānatthabyañjanaggahaṇaṃ hoti, tassa nānākāraniddeso. Evanti hi ayaṃ ākārapaññatti, meti kattuniddeso, sutanti visayaniddeso. Ettāvatā nānākārappavattena cittasantānena taṃsamaṅgino kattuvisaye gahaṇasanniṭṭhānaṃ kataṃ hoti.

    অথ ৰা এৰন্তি পুগ্গলকিচ্চনিদ্দেসো। সুতন্তি ৰিঞ্ঞাণকিচ্চনিদ্দেসো। মেতি উভযকিচ্চযুত্তপুগ্গলনিদ্দেসো। অযং পনেত্থ সঙ্খেপো – মযা সৰনকিচ্চৰিঞ্ঞাণসমঙ্গিনা পুগ্গলেন ৰিঞ্ঞাণৰসেন লদ্ধসৰনকিচ্চৰোহারেন সুতন্তি।

    Atha vā evanti puggalakiccaniddeso. Sutanti viññāṇakiccaniddeso. Meti ubhayakiccayuttapuggalaniddeso. Ayaṃ panettha saṅkhepo – mayā savanakiccaviññāṇasamaṅginā puggalena viññāṇavasena laddhasavanakiccavohārena sutanti.

    তত্থ এৰন্তি চ মেতি চ সচ্চিকট্ঠপরমত্থৰসেন অৰিজ্জমানপঞ্ঞত্তি। কিঞ্হেত্থ তং পরমত্থতো অত্থি, যং এৰন্তি ৰা মেতি ৰা নিদ্দেসং লভেথ? সুতন্তি ৰিজ্জমানপঞ্ঞত্তি। যঞ্হি তমেত্থ সোতেন উপলদ্ধং, তং পরমত্থতো ৰিজ্জমানন্তি।

    Tattha evanti ca meti ca saccikaṭṭhaparamatthavasena avijjamānapaññatti. Kiñhettha taṃ paramatthato atthi, yaṃ evanti vā meti vā niddesaṃ labhetha? Sutanti vijjamānapaññatti. Yañhi tamettha sotena upaladdhaṃ, taṃ paramatthato vijjamānanti.

    তথা এৰন্তি চ মেতি চ তং তং উপাদায ৰত্তব্বতো উপাদাপঞ্ঞত্তি। সুতন্তি দিট্ঠাদীনি উপনিধায ৰত্তব্বতো উপনিধাপঞ্ঞত্তি। এত্থ চ এৰন্তি ৰচনেন অসম্মোহং দীপেতি। ন হি সম্মূল়্হো নানপ্পকারপটিৰেধসমত্থো হোতি। সুতন্তি ৰচনেন সুতস্স অসম্মোসং দীপেতি। যস্স হি সুতং সম্মুট্ঠং হোতি , ন সো কালন্তরেন মযা সুতন্তি পটিজানাতি। ইচ্চস্স অসম্মোহেন পঞ্ঞাসিদ্ধি, অসম্মোসেন পন সতিসিদ্ধি। তত্থ পঞ্ঞা পুব্বঙ্গমায সতিযা ব্যঞ্জনাৰধারণসমত্থতা, সতিপুব্বঙ্গমায পঞ্ঞায অত্থপটিৰেধসমত্থতা, তদুভযসমত্থতাযোগেন অত্থব্যঞ্জনসম্পন্নস্স ধম্মকোসস্স অনুপালনসমত্থতো ধম্মভণ্ডাগারিকত্তসিদ্ধি।

    Tathā evanti ca meti ca taṃ taṃ upādāya vattabbato upādāpaññatti. Sutanti diṭṭhādīni upanidhāya vattabbato upanidhāpaññatti. Ettha ca evanti vacanena asammohaṃ dīpeti. Na hi sammūḷho nānappakārapaṭivedhasamattho hoti. Sutanti vacanena sutassa asammosaṃ dīpeti. Yassa hi sutaṃ sammuṭṭhaṃ hoti , na so kālantarena mayā sutanti paṭijānāti. Iccassa asammohena paññāsiddhi, asammosena pana satisiddhi. Tattha paññā pubbaṅgamāya satiyā byañjanāvadhāraṇasamatthatā, satipubbaṅgamāya paññāya atthapaṭivedhasamatthatā, tadubhayasamatthatāyogena atthabyañjanasampannassa dhammakosassa anupālanasamatthato dhammabhaṇḍāgārikattasiddhi.

    অপরো নযো – এৰন্তি ৰচনেন যোনিসো মনসিকারং দীপেতি, অযোনিসো মনসিকরোতো হি নানপ্পকারপটিৰেধাভাৰতো। সুতন্তি ৰচনেন অৰিক্খেপং দীপেতি, ৰিক্খিত্তচিত্তস্স সৰনাভাৰতো। তথা হি ৰিক্খিত্তচিত্তো পুগ্গলো সব্বসম্পত্তিযা ৰুচ্চমানোপি ‘‘ন মযা সুতং, পুন ভণথা’’তি ভণতি। যোনিসো মনসিকারেন চেত্থ অত্তসম্মাপণিধিং পুব্বে চ কতপুঞ্ঞতং সাধেতি, সম্মা অপণিহিতত্তস্স পুব্বে অকতপুঞ্ঞস্স ৰা তদভাৰতো। অৰিক্খেপেন পন সদ্ধম্মস্সৰনং সপ্পুরিসূপনিস্সযঞ্চ সাধেতি। ন হি ৰিক্খিত্তচিত্তো সোতুং সক্কোতি, ন চ সপ্পুরিসে অনুপস্সযমানস্স সৰনং অত্থীতি।

    Aparo nayo – evanti vacanena yoniso manasikāraṃ dīpeti, ayoniso manasikaroto hi nānappakārapaṭivedhābhāvato. Sutanti vacanena avikkhepaṃ dīpeti, vikkhittacittassa savanābhāvato. Tathā hi vikkhittacitto puggalo sabbasampattiyā vuccamānopi ‘‘na mayā sutaṃ, puna bhaṇathā’’ti bhaṇati. Yoniso manasikārena cettha attasammāpaṇidhiṃ pubbe ca katapuññataṃ sādheti, sammā apaṇihitattassa pubbe akatapuññassa vā tadabhāvato. Avikkhepena pana saddhammassavanaṃ sappurisūpanissayañca sādheti. Na hi vikkhittacitto sotuṃ sakkoti, na ca sappurise anupassayamānassa savanaṃ atthīti.

    অপরো নযো – যস্মা এৰন্তি যস্স চিত্তসন্তানস্স নানাকারপ্পৰত্তিযা নানত্থব্যঞ্জনগ্গহণং হোতি, তস্স নানাকারনিদ্দেসোতি ৰুত্তং। সো চ এৰং ভদ্দকো আকারো ন সম্মা অপ্পণিহিতত্তনো পুব্বে অকতপুঞ্ঞস্স ৰা হোতি, তস্মা এৰন্তি ইমিনা ভদ্দকেন আকারেন পচ্ছিমচক্কদ্ৰযসম্পত্তিং অত্তনো দীপেতি, সুতন্তি সৰনযোগেন পুরিমচক্কদ্ৰযসম্পত্তিং। ন হি অপ্পতিরূপদেসে ৰসতো সপ্পুরিসূপনিস্সযৰিরহিতস্স ৰা সৰনং অত্থি। ইচ্চস্স পচ্ছিমচক্কদ্ৰযসিদ্ধিযা আসযসুদ্ধি সিদ্ধা হোতি। পুরিমচক্কদ্ৰযসিদ্ধিযা পযোগসুদ্ধি। তায চ আসযসুদ্ধিযা অধিগমব্যত্তিসিদ্ধি, পযোগসুদ্ধিযা আগমব্যত্তিসিদ্ধি। ইতি পযোগাসযসুদ্ধস্স আগমাধিগমসম্পন্নস্স ৰচনং অরুণুগ্গং ৰিয সূরিযস্স উদযতো যোনিসোমনসিকারো ৰিয চ কুসলকম্মস্স অরহতি ভগৰতো ৰচনস্স পুব্বঙ্গমং ভৰিতুন্তি ঠানে নিদানং ঠপেন্তো এৰং মে সুতন্তিআদিমাহ।

    Aparo nayo – yasmā evanti yassa cittasantānassa nānākārappavattiyā nānatthabyañjanaggahaṇaṃ hoti, tassa nānākāraniddesoti vuttaṃ. So ca evaṃ bhaddako ākāro na sammā appaṇihitattano pubbe akatapuññassa vā hoti, tasmā evanti iminā bhaddakena ākārena pacchimacakkadvayasampattiṃ attano dīpeti, sutanti savanayogena purimacakkadvayasampattiṃ. Na hi appatirūpadese vasato sappurisūpanissayavirahitassa vā savanaṃ atthi. Iccassa pacchimacakkadvayasiddhiyā āsayasuddhi siddhā hoti. Purimacakkadvayasiddhiyā payogasuddhi. Tāya ca āsayasuddhiyā adhigamabyattisiddhi, payogasuddhiyā āgamabyattisiddhi. Iti payogāsayasuddhassa āgamādhigamasampannassa vacanaṃ aruṇuggaṃ viya sūriyassa udayato yonisomanasikāro viya ca kusalakammassa arahati bhagavato vacanassa pubbaṅgamaṃ bhavitunti ṭhāne nidānaṃ ṭhapento evaṃ me sutantiādimāha.

    অপরো নযো – এৰন্তি ইমিনা নানপ্পকারপটিৰেধদীপকেন ৰচনেন অত্তনো অত্থপটিভানপটিসম্ভিদাসম্পত্তিসব্ভাৰং দীপেতি। সুতন্তি ইমিনা সোতব্বভেদপটিৰেধদীপকেন ধম্মনিরুত্তিপটিসম্ভিদাসম্পত্তিসব্ভাৰং । এৰন্তি চ ইদং যোনিসোমনসিকারদীপকং ৰচনং ভাসমানো – ‘‘এতে মযা ধম্মা মনসানুপেক্খিতা দিট্ঠিযা সুপ্পটিৰিদ্ধা’’তি দীপেতি। সুতন্তি ইদং সৰনযোগদীপকং ৰচনং ভাসমানো – ‘‘বহূ মযা ধম্মা সুতা ধাতা ৰচসা পরিচিতা’’তি দীপেতি। তদুভযেনপি অত্থব্যঞ্জনপারিপূরিং দীপেন্তো সৰনে আদরং জনেতি। অত্থব্যঞ্জনপরিপুণ্ণঞ্হি ধম্মং আদরেন অস্সুণন্তো মহতা হিতা পরিবাহিরো হোতীতি আদরং জনেত্ৰা সক্কচ্চং ধম্মো সোতব্বোতি।

    Aparo nayo – evanti iminā nānappakārapaṭivedhadīpakena vacanena attano atthapaṭibhānapaṭisambhidāsampattisabbhāvaṃ dīpeti. Sutanti iminā sotabbabhedapaṭivedhadīpakena dhammaniruttipaṭisambhidāsampattisabbhāvaṃ . Evanti ca idaṃ yonisomanasikāradīpakaṃ vacanaṃ bhāsamāno – ‘‘ete mayā dhammā manasānupekkhitā diṭṭhiyā suppaṭividdhā’’ti dīpeti. Sutanti idaṃ savanayogadīpakaṃ vacanaṃ bhāsamāno – ‘‘bahū mayā dhammā sutā dhātā vacasā paricitā’’ti dīpeti. Tadubhayenapi atthabyañjanapāripūriṃ dīpento savane ādaraṃ janeti. Atthabyañjanaparipuṇṇañhi dhammaṃ ādarena assuṇanto mahatā hitā paribāhiro hotīti ādaraṃ janetvā sakkaccaṃ dhammo sotabboti.

    ‘‘এৰং মে সুত’’ন্তি ইমিনা পন সকলেন ৰচনেন আযস্মা আনন্দো তথাগতপ্পৰেদিতং ধম্মং অত্তনো অদহন্তো অসপ্পুরিসভূমিং অতিক্কমতি, সাৰকত্তং পটিজানন্তো সপ্পুরিসভূমিং ওক্কমতি। তথা অসদ্ধম্মা চিত্তং ৰুট্ঠাপেতি, সদ্ধম্মে চিত্তং পতিট্ঠাপেতি। ‘‘কেৰলং সুতমেৰেতং মযা তস্সেৰ পন ভগৰতো ৰচন’’ন্তি দীপেন্তো অত্তানং পরিমোচেতি, সত্থারং অপদিসতি, জিনৰচনং অপ্পেতি, ধম্মনেত্তিং পতিট্ঠাপেতি।

    ‘‘Evaṃ me suta’’nti iminā pana sakalena vacanena āyasmā ānando tathāgatappaveditaṃ dhammaṃ attano adahanto asappurisabhūmiṃ atikkamati, sāvakattaṃ paṭijānanto sappurisabhūmiṃ okkamati. Tathā asaddhammā cittaṃ vuṭṭhāpeti, saddhamme cittaṃ patiṭṭhāpeti. ‘‘Kevalaṃ sutamevetaṃ mayā tasseva pana bhagavato vacana’’nti dīpento attānaṃ parimoceti, satthāraṃ apadisati, jinavacanaṃ appeti, dhammanettiṃ patiṭṭhāpeti.

    অপিচ ‘‘এৰং মে সুত’’ন্তি অত্তনা উপ্পাদিতভাৰং অপ্পটিজানন্তো পুরিমৰচনং ৰিৰরন্তো ‘‘সম্মুখা পটিগ্গহিতমিদং মযা তস্স ভগৰতো চতুৰেসারজ্জৰিসারদস্স দসবলধরস্স আসভট্ঠানট্ঠাযিনো সীহনাদনাদিনো সব্বসত্তুত্তমস্স ধম্মিস্সরস্স ধম্মরাজস্স ধম্মাধিপতিনো ধম্মদীপস্স ধম্মসরণস্স সদ্ধম্মৰরচক্কৰত্তিনো সম্মাসম্বুদ্ধস্স ৰচনং, ন এত্থ অত্থে ৰা ধম্মে ৰা পদে ৰা ব্যঞ্জনে ৰা কঙ্খা ৰা ৰিমতি ৰা কত্তব্বা’’তি সব্বদেৰমনুস্সানং ইমস্মিং ধম্মে অস্সদ্ধিযং ৰিনাসেতি, সদ্ধাসম্পদং উপ্পাদেতীতি। তেনেতং ৰুচ্চতি –

    Apica ‘‘evaṃ me suta’’nti attanā uppāditabhāvaṃ appaṭijānanto purimavacanaṃ vivaranto ‘‘sammukhā paṭiggahitamidaṃ mayā tassa bhagavato catuvesārajjavisāradassa dasabaladharassa āsabhaṭṭhānaṭṭhāyino sīhanādanādino sabbasattuttamassa dhammissarassa dhammarājassa dhammādhipatino dhammadīpassa dhammasaraṇassa saddhammavaracakkavattino sammāsambuddhassa vacanaṃ, na ettha atthe vā dhamme vā pade vā byañjane vā kaṅkhā vā vimati vā kattabbā’’ti sabbadevamanussānaṃ imasmiṃ dhamme assaddhiyaṃ vināseti, saddhāsampadaṃ uppādetīti. Tenetaṃ vuccati –

    ‘‘ৰিনাসযতি অস্সদ্ধং, সদ্ধং ৰড্ঢেতি সাসনে।

    ‘‘Vināsayati assaddhaṃ, saddhaṃ vaḍḍheti sāsane;

    এৰং মে সুতমিচ্চেৰং, ৰদং গোতমসাৰকো’’তি॥

    Evaṃ me sutamiccevaṃ, vadaṃ gotamasāvako’’ti.

    একন্তি গণনপরিচ্ছেদনিদ্দেসো। সমযন্তি পরিচ্ছিন্ননিদ্দেসো। একং সমযন্তি অনিযমিতপরিদীপনং। তত্থ সমযসদ্দো –

    Ekanti gaṇanaparicchedaniddeso. Samayanti paricchinnaniddeso. Ekaṃ samayanti aniyamitaparidīpanaṃ. Tattha samayasaddo –

    সমৰাযে খণে কালে, সমূহে হেতুদিট্ঠিসু।

    Samavāye khaṇe kāle, samūhe hetudiṭṭhisu;

    পটিলাভে পহানে চ, পটিৰেধে চ দিস্সতি॥

    Paṭilābhe pahāne ca, paṭivedhe ca dissati.

    তথা হিস্স ‘‘অপ্পেৰ নাম স্ৰেপি উপসঙ্কমেয্যাম কালঞ্চ সমযঞ্চ উপাদাযা’’তি এৰমাদীসু (দী॰ নি॰ ১.৪৪৭) সমৰাযো অত্থো। ‘‘একোৰ খো, ভিক্খৰে, খণো চ সমযো চ ব্রহ্মচরিযৰাসাযা’’তিআদীসু (অ॰ নি॰ ৮.২৯) খণো। ‘‘উণ্হসমযো পরিল়াহসমযো’’তিআদীসু (পাচি॰ ৩৫৮) কালো। ‘‘মহাসমযো পৰনস্মি’’ন্তিআদীসু সমূহো। ‘‘সমযোপি খো তে, ভদ্দালি, অপ্পটিৰিদ্ধো অহোসি, ভগৰা খো সাৰত্থিযং ৰিহরতি, ভগৰাপি মং জানিস্সতি, ‘ভদ্দালি, নাম ভিক্খু সত্থুসাসনে সিক্খায ন পরিপূরকারী’তি, অযম্পি খো তে, ভদ্দালি, সমযো অপ্পটিৰিদ্ধো অহোসী’’তিআদীসু (ম॰ নি॰ ২.১৩৫) হেতু । ‘‘তেন খো পন সমযেন উগ্গাহমানো পরিব্বাজকো সমণমুণ্ডিকাপুত্তো সমযপ্পৰাদকে তিন্দুকাচীরে একসালকে মল্লিকায আরামে পটিৰসতী’’তিআদীসু (ম॰ নি॰ ২.২৬০) দিট্ঠি।

    Tathā hissa ‘‘appeva nāma svepi upasaṅkameyyāma kālañca samayañca upādāyā’’ti evamādīsu (dī. ni. 1.447) samavāyo attho. ‘‘Ekova kho, bhikkhave, khaṇo ca samayo ca brahmacariyavāsāyā’’tiādīsu (a. ni. 8.29) khaṇo. ‘‘Uṇhasamayo pariḷāhasamayo’’tiādīsu (pāci. 358) kālo. ‘‘Mahāsamayo pavanasmi’’ntiādīsu samūho. ‘‘Samayopi kho te, bhaddāli, appaṭividdho ahosi, bhagavā kho sāvatthiyaṃ viharati, bhagavāpi maṃ jānissati, ‘bhaddāli, nāma bhikkhu satthusāsane sikkhāya na paripūrakārī’ti, ayampi kho te, bhaddāli, samayo appaṭividdho ahosī’’tiādīsu (ma. ni. 2.135) hetu . ‘‘Tena kho pana samayena uggāhamāno paribbājako samaṇamuṇḍikāputto samayappavādake tindukācīre ekasālake mallikāya ārāme paṭivasatī’’tiādīsu (ma. ni. 2.260) diṭṭhi.

    ‘‘দিট্ঠে ধম্মে চ যো অত্থো, যো চত্থো সম্পরাযিকো।

    ‘‘Diṭṭhe dhamme ca yo attho, yo cattho samparāyiko;

    অত্থাভিসমযা ধীরো, পণ্ডিতোতি পৰুচ্চতী’’তি॥ –

    Atthābhisamayā dhīro, paṇḍitoti pavuccatī’’ti. –

    আদীসু (সং॰ নি॰ ১.১২৯) পটিলাভো। ‘‘সম্মা মানাভিসমযা অন্তমকাসি দুক্খস্সা’’তিআদীসু (ম॰ নি॰ ১.২৪) পহানং। ‘‘দুক্খস্স পীল়নট্ঠো সঙ্খতট্ঠো সন্তাপট্ঠো ৰিপরিণামট্ঠো অভিসমযট্ঠো’’তিআদীসু (পটি॰ ম॰ ৩.১) পটিৰেধো। ইধ পনস্স কালো অত্থো। তেন সংৰচ্ছর-উতু-মাসড্ঢমাস-রত্তি-দিৰ-পুব্বণ্হ-মজ্ঝন্হিক-সাযন্হ- পঠমমজ্ঝিমপচ্ছিমযাম-মুহুত্তাদীসু কালপ্পভেদভূতেসু সমযেসু একং সমযন্তি দীপেতি।

    Ādīsu (saṃ. ni. 1.129) paṭilābho. ‘‘Sammā mānābhisamayā antamakāsi dukkhassā’’tiādīsu (ma. ni. 1.24) pahānaṃ. ‘‘Dukkhassa pīḷanaṭṭho saṅkhataṭṭho santāpaṭṭho vipariṇāmaṭṭho abhisamayaṭṭho’’tiādīsu (paṭi. ma. 3.1) paṭivedho. Idha panassa kālo attho. Tena saṃvacchara-utu-māsaḍḍhamāsa-ratti-diva-pubbaṇha-majjhanhika-sāyanha- paṭhamamajjhimapacchimayāma-muhuttādīsu kālappabhedabhūtesu samayesu ekaṃ samayanti dīpeti.

    তত্থ কিঞ্চাপি এতেসু সংৰচ্ছরাদীসু সমযেসু যং যং সুত্তং যম্হি যম্হি সংৰচ্ছরে উতুম্হি মাসে পক্খে রত্তিভাগে দিৰসভাগে ৰা ৰুত্তং, সব্বং তং থেরস্স সুৰিদিতং সুৰৰত্থাপিতং পঞ্ঞায। যস্মা পন ‘‘এৰং মে সুতং অসুকসংৰচ্ছরে অসুকউতুম্হি অসুকমাসে অসুকপক্খে অসুকরত্তিভাগে অসুকদিৰসভাগে ৰা’’তি এৰং ৰুত্তে ন সক্কা সুখেন ধারেতুং ৰা উদ্দিসিতুং ৰা উদ্দিসাপেতুং ৰা, বহু চ ৰত্তব্বং হোতি, তস্মা একেনেৰ পদেন তমত্থং সমোধানেত্ৰা ‘‘একং সময’’ন্তি আহ।

    Tattha kiñcāpi etesu saṃvaccharādīsu samayesu yaṃ yaṃ suttaṃ yamhi yamhi saṃvacchare utumhi māse pakkhe rattibhāge divasabhāge vā vuttaṃ, sabbaṃ taṃ therassa suviditaṃ suvavatthāpitaṃ paññāya. Yasmā pana ‘‘evaṃ me sutaṃ asukasaṃvacchare asukautumhi asukamāse asukapakkhe asukarattibhāge asukadivasabhāge vā’’ti evaṃ vutte na sakkā sukhena dhāretuṃ vā uddisituṃ vā uddisāpetuṃ vā, bahu ca vattabbaṃ hoti, tasmā ekeneva padena tamatthaṃ samodhānetvā ‘‘ekaṃ samaya’’nti āha.

    যে ৰা ইমে গব্ভোক্কন্তিসমযো জাতিসমযো সংৰেগসমযো অভিনিক্খমনসমযো দুক্করকারিকসমযো মারৰিজযসমযো অভিসম্বোধিসমযো দিট্ঠধম্মসুখৰিহারসমযো দেসনাসমযো পরিনিব্বানসমযোতি এৰমাদযো ভগৰতো দেৰমনুস্সেসু অতিৰিয সুপ্পকাসা অনেককালপ্পভেদা এৰ সমযা, তেসু সমযেসু দেসনাসমযসঙ্খাতং একং সমযন্তি দীপেতি। যো চাযং ঞাণকরুণাকিচ্চসমযেসু অরুণাকিচ্চসমযো, অত্তহিতপরহিতপটিপত্তিসমযেসু পরহিতপটিপত্তিসমযো, সন্নিপতিতানং করণীযদ্ৰযসমযেসু ধম্মিকথাসমযো, দেসনাপটিপত্তিসমযেসু দেসনাসমযো, তেসুপি সমযেসু অঞ্ঞতরং সন্ধায ‘‘একং সময’’ন্তি আহ।

    Ye vā ime gabbhokkantisamayo jātisamayo saṃvegasamayo abhinikkhamanasamayo dukkarakārikasamayo māravijayasamayo abhisambodhisamayo diṭṭhadhammasukhavihārasamayo desanāsamayo parinibbānasamayoti evamādayo bhagavato devamanussesu ativiya suppakāsā anekakālappabhedā eva samayā, tesu samayesu desanāsamayasaṅkhātaṃ ekaṃ samayanti dīpeti. Yo cāyaṃ ñāṇakaruṇākiccasamayesu aruṇākiccasamayo, attahitaparahitapaṭipattisamayesu parahitapaṭipattisamayo, sannipatitānaṃ karaṇīyadvayasamayesu dhammikathāsamayo, desanāpaṭipattisamayesu desanāsamayo, tesupi samayesu aññataraṃ sandhāya ‘‘ekaṃ samaya’’nti āha.

    কস্মা পনেত্থ যথা অভিধম্মে ‘‘যস্মিং সমযে কামাৰচর’’ন্তি চ ইতো অঞ্ঞেসু সুত্তপদেসু ‘‘যস্মিং সমযে, ভিক্খৰে, ভিক্খু ৰিৰিচ্চেৰ কামেহী’’তি চ ভুম্মৰচনেন নিদ্দেসো কতো, ৰিনযে চ ‘‘তেন সমযেন বুদ্ধো ভগৰা’’তি করণৰচনেন, তথা অকত্ৰা ‘‘একং সময’’ন্তি উপযোগৰচননিদ্দেসো কতোতি। তত্থ তথা ইধ চ অঞ্ঞথা অত্থসম্ভৰতো। তত্থ হি অভিধম্মে ইতো অঞ্ঞেসু সুত্তপদেসু চ অধিকরণত্থো ভাৰেনভাৰলক্খণত্থো চ সম্ভৰতি। অধিকরণঞ্হি কালত্থো চ সমূহত্থো চ সমযো, তত্থ ৰুত্তানং ফস্সাদিধম্মানং খণসমৰাযহেতুসঙ্খাতস্স চ সমযস্স ভাৰেন তেসং ভাৰো লক্খীযতি, তস্মা তদত্থজোতনত্থং তত্থ ভুম্মৰচননিদ্দেসো কতো।

    Kasmā panettha yathā abhidhamme ‘‘yasmiṃ samaye kāmāvacara’’nti ca ito aññesu suttapadesu ‘‘yasmiṃ samaye, bhikkhave, bhikkhu vivicceva kāmehī’’ti ca bhummavacanena niddeso kato, vinaye ca ‘‘tena samayena buddho bhagavā’’ti karaṇavacanena, tathā akatvā ‘‘ekaṃ samaya’’nti upayogavacananiddeso katoti. Tattha tathā idha ca aññathā atthasambhavato. Tattha hi abhidhamme ito aññesu suttapadesu ca adhikaraṇattho bhāvenabhāvalakkhaṇattho ca sambhavati. Adhikaraṇañhi kālattho ca samūhattho ca samayo, tattha vuttānaṃ phassādidhammānaṃ khaṇasamavāyahetusaṅkhātassa ca samayassa bhāvena tesaṃ bhāvo lakkhīyati, tasmā tadatthajotanatthaṃ tattha bhummavacananiddeso kato.

    ৰিনযে চ হেতুঅত্থো করণত্থো চ সম্ভৰতি। যো হি সো সিক্খাপদপঞ্ঞত্তিসমযো সারিপুত্তাদীহিপি দুব্বিঞ্ঞেয্যো, তেন সমযেন হেতুভূতেন করণভূতেন চ সিক্খাপদানি পঞ্ঞাপযন্তো সিক্খাপদপঞ্ঞত্তিহেতুঞ্চ অপেক্খমানো ভগৰা তত্থ তত্থ ৰিহাসি, তস্মা তদত্থজোতনত্থং তত্থ করণৰচনেন নিদ্দেসো কতো।

    Vinaye ca hetuattho karaṇattho ca sambhavati. Yo hi so sikkhāpadapaññattisamayo sāriputtādīhipi dubbiññeyyo, tena samayena hetubhūtena karaṇabhūtena ca sikkhāpadāni paññāpayanto sikkhāpadapaññattihetuñca apekkhamāno bhagavā tattha tattha vihāsi, tasmā tadatthajotanatthaṃ tattha karaṇavacanena niddeso kato.

    ইধ পন অঞ্ঞস্মিঞ্চ এৰংজাতিকে অচ্চন্তসংযোগত্থো সম্ভৰতি। যঞ্হি সমযং ভগৰা ইমং অঞ্ঞং ৰা সুত্তন্তং দেসেসি, অচ্চন্তমেৰ তং সমযং করুণাৰিহারেন ৰিহাসি, তস্মা তদত্থজোতনত্থং ইধ উপযোগৰচননিদ্দেসো কতোতি।

    Idha pana aññasmiñca evaṃjātike accantasaṃyogattho sambhavati. Yañhi samayaṃ bhagavā imaṃ aññaṃ vā suttantaṃ desesi, accantameva taṃ samayaṃ karuṇāvihārena vihāsi, tasmā tadatthajotanatthaṃ idha upayogavacananiddeso katoti.

    তেনেতং ৰুচ্চতি –

    Tenetaṃ vuccati –

    ‘‘তং তং অত্থমপেক্খিত্ৰা, ভুম্মেন করণেন চ।

    ‘‘Taṃ taṃ atthamapekkhitvā, bhummena karaṇena ca;

    অঞ্ঞত্র সমযো ৰুত্তো, উপযোগেন সো ইধা’’তি॥

    Aññatra samayo vutto, upayogena so idhā’’ti.

    পোরাণা পন ৰণ্ণযন্তি – ‘‘তস্মিং সমযে’’তি ৰা – ‘‘তেন সমযেনা’’তি ৰা – ‘‘একং সময’’ন্তি ৰা অভিলাপমত্তভেদো এস, সব্বত্থ ভুম্মমেৰ অত্থোতি। তস্মা ‘‘একং সময’’ন্তি ৰুত্তেপি ‘‘একস্মিং সমযে’’তি অত্থো ৰেদিতব্বো।

    Porāṇā pana vaṇṇayanti – ‘‘tasmiṃ samaye’’ti vā – ‘‘tena samayenā’’ti vā – ‘‘ekaṃ samaya’’nti vā abhilāpamattabhedo esa, sabbattha bhummameva atthoti. Tasmā ‘‘ekaṃ samaya’’nti vuttepi ‘‘ekasmiṃ samaye’’ti attho veditabbo.

    ভগৰাতি গরু। গরুঞ্হি লোকে ‘‘ভগৰা’’তি ৰদন্তি। অযঞ্চ সব্বগুণৰিসিট্ঠতায সব্বসত্তানং গরু, তস্মা ‘‘ভগৰা’’তি ৰেদিতব্বো। পোরাণেহিপি ৰুত্তং –

    Bhagavāti garu. Garuñhi loke ‘‘bhagavā’’ti vadanti. Ayañca sabbaguṇavisiṭṭhatāya sabbasattānaṃ garu, tasmā ‘‘bhagavā’’ti veditabbo. Porāṇehipi vuttaṃ –

    ‘‘ভগৰাতি ৰচনং সেট্ঠং, ভগৰাতি ৰচনমুত্তমং।

    ‘‘Bhagavāti vacanaṃ seṭṭhaṃ, bhagavāti vacanamuttamaṃ;

    গরুগারৰযুত্তো সো, ভগৰা তেন ৰুচ্চতী’’তি॥

    Garugāravayutto so, bhagavā tena vuccatī’’ti.

    অপিচ –

    Apica –

    ‘‘ভাগ্যৰা ভগ্গৰা যুত্তো, ভগেহি চ ৰিভত্তৰা।

    ‘‘Bhāgyavā bhaggavā yutto, bhagehi ca vibhattavā;

    ভত্তৰা ৰন্তগমনো, ভৰেসু ভগৰা ততো’’তি॥ –

    Bhattavā vantagamano, bhavesu bhagavā tato’’ti. –

    ইমিস্সা গাথায ৰসেনস্স পদস্স ৰিত্থারতো অত্থো ৰেদিতব্বো। সো চ ৰিসুদ্ধিমগ্গে বুদ্ধানুস্সতিনিদ্দেসে ৰুত্তোযেৰ।

    Imissā gāthāya vasenassa padassa vitthārato attho veditabbo. So ca visuddhimagge buddhānussatiniddese vuttoyeva.

    এত্তাৰতা চেত্থ এৰং মে সুতন্তি ৰচনেন যথাসুতং ধম্মং দস্সেন্তো ভগৰতো ধম্মসরীরং পচ্চক্খং করোতি। তেন – ‘‘নযিদং অতিক্কন্তসত্থুকং পাৰচনং, অযং ৰো সত্থা’’তি সত্থু অদস্সনেন উক্কণ্ঠিতং জনং সমস্সাসেতি।

    Ettāvatā cettha evaṃ me sutanti vacanena yathāsutaṃ dhammaṃ dassento bhagavato dhammasarīraṃ paccakkhaṃ karoti. Tena – ‘‘nayidaṃ atikkantasatthukaṃ pāvacanaṃ, ayaṃ vo satthā’’ti satthu adassanena ukkaṇṭhitaṃ janaṃ samassāseti.

    একং সমযং ভগৰাতি ৰচনেন তস্মিং সমযে ভগৰতো অৰিজ্জমানভাৰং দস্সেন্তো রূপকাযপরিনিব্বানং সাধেতি। তেন ‘‘এৰংৰিধস্স নাম অরিযধম্মস্স দেসকো দসবলধরো ৰজিরসঙ্ঘাতসমানকাযো, সোপি ভগৰা পরিনিব্বুতো, কেন অঞ্ঞেন জীৰিতে আসা জনেতব্বা’’তি জীৰিতমদমত্তং জনং সংৰেজেতি, সদ্ধম্মে চস্স উস্সাহং জনেতি।

    Ekaṃ samayaṃ bhagavāti vacanena tasmiṃ samaye bhagavato avijjamānabhāvaṃ dassento rūpakāyaparinibbānaṃ sādheti. Tena ‘‘evaṃvidhassa nāma ariyadhammassa desako dasabaladharo vajirasaṅghātasamānakāyo, sopi bhagavā parinibbuto, kena aññena jīvite āsā janetabbā’’ti jīvitamadamattaṃ janaṃ saṃvejeti, saddhamme cassa ussāhaṃ janeti.

    এৰন্তি চ ভণন্তো দেসনাসম্পত্তিং নিদ্দিসতি। মে সুতন্তি সাৰকসম্পত্তিং। একং সমযন্তি কালসম্পত্তিং। ভগৰাতি দেসকসম্পত্তিং।

    Evanti ca bhaṇanto desanāsampattiṃ niddisati. Me sutanti sāvakasampattiṃ. Ekaṃ samayanti kālasampattiṃ. Bhagavāti desakasampattiṃ.

    উক্কট্ঠাযং ৰিহরতীতি এত্থ উক্কাতি দীপিকা, তঞ্চ নগরং ‘‘মঙ্গলদিৰসো সুখণো সুনক্খত্তং মা অতিক্কমী’’তি রত্তিম্পি উক্কাসু ঠিতাসু মাপিতত্তা উক্কট্ঠাতি ৰুচ্চতি। দণ্ডদীপিকাসু জালেত্ৰা ধারীযমানাসু মাপিতত্তাতি ৰুত্তং হোতি, তস্সং উক্কট্ঠাযং। সমীপত্থে চেতং ভুম্মৰচনং। ৰিহরতীতি অৰিসেসেন ইরিযাপথদিব্বব্রহ্মঅরিযৰিহারেসু অঞ্ঞতরৰিহারসমঙ্গিপরিদীপনমেতং। ইধ পন ঠানগমননিসিন্নসযনপ্পভেদেসু রিযাপথেসু অঞ্ঞতরইরিযাপথসমাযোগপরিদীপনং। তেন ঠিতোপি গচ্ছন্তোপি নিসিন্নোপি সযানোপি ভগৰা ৰিহরতিচ্চেৰ ৰেদিতব্বো। সো হি ভগৰা একং ইরিযাপথবাধনং অঞ্ঞেন ইরিযাপথেন ৰিচ্ছিন্দিত্ৰা অপরিপতন্তং অত্তভাৰং হরতি পৰত্তেতি, তস্মা ৰিহরতীতি ৰুচ্চতি।

    Ukkaṭṭhāyaṃ viharatīti ettha ukkāti dīpikā, tañca nagaraṃ ‘‘maṅgaladivaso sukhaṇo sunakkhattaṃ mā atikkamī’’ti rattimpi ukkāsu ṭhitāsu māpitattā ukkaṭṭhāti vuccati. Daṇḍadīpikāsu jāletvā dhārīyamānāsu māpitattāti vuttaṃ hoti, tassaṃ ukkaṭṭhāyaṃ. Samīpatthe cetaṃ bhummavacanaṃ. Viharatīti avisesena iriyāpathadibbabrahmaariyavihāresu aññataravihārasamaṅgiparidīpanametaṃ. Idha pana ṭhānagamananisinnasayanappabhedesu riyāpathesu aññatarairiyāpathasamāyogaparidīpanaṃ. Tena ṭhitopi gacchantopi nisinnopi sayānopi bhagavā viharaticceva veditabbo. So hi bhagavā ekaṃ iriyāpathabādhanaṃ aññena iriyāpathena vicchinditvā aparipatantaṃ attabhāvaṃ harati pavatteti, tasmā viharatīti vuccati.

    সুভগৰনেতি এত্থ সুভগত্তা সুভগং, সুন্দরসিরিকত্তা সুন্দরকামত্তা চাতি ৰুত্তং হোতি। তস্স হি ৰনস্স সিরিসম্পত্তিযা মনুস্সা অন্নপানাদীনি আদায দিৰসং তত্থেৰ ছণসমজ্জউস্সৰে করোন্তা ভোগসুখং অনুভোন্তি, সুন্দরসুন্দরে চেত্থ কামে পত্থেন্তি ‘‘পুত্তং লভাম, ধীতরং লভামা’’তি, তেসং তং তথেৰ হোতি, এৰং তং সুন্দরসিরিকত্তা সুন্দরকামত্তা চ সুভগং। অপিচ বহুজনকন্ততাযপি সুভগং। ৰনযতীতি ৰনং, অত্তসম্পদায সত্তানং ভত্তিং কারেতি, অত্তনি সিনেহং উপ্পাদেতীতি অত্থো। ৰনুতে ইতি ৰা ৰনং, নানাৰিধকুসুম-গন্ধসম্মোদমত্তকোকিলাদিৰিহঙ্গমাভিরুতেহি মন্দমালুতচলিতরুক্খসাখাৰিটপপল্লৰপলাসেহি চ ‘‘এথ মং পরিভুঞ্জথা’’তি সব্বপাণিনো যাচতি ৰিযাতি অত্থো। সুভগঞ্চ তং ৰনঞ্চাতি সুভগৰনং। তস্মিং সুভগৰনে। ৰনঞ্চ নাম রোপিমং, সযংজাতন্তি দুৰিধং। তত্থ ৰেল়ুৰনজেতৰনাদীনি রোপিমানি। অন্ধৰনমহাৰনঅঞ্জনৰনাদীনি সযং জাতানি। ইদম্পি সযংজাতন্তি ৰেদিতব্বং।

    Subhagavaneti ettha subhagattā subhagaṃ, sundarasirikattā sundarakāmattā cāti vuttaṃ hoti. Tassa hi vanassa sirisampattiyā manussā annapānādīni ādāya divasaṃ tattheva chaṇasamajjaussave karontā bhogasukhaṃ anubhonti, sundarasundare cettha kāme patthenti ‘‘puttaṃ labhāma, dhītaraṃ labhāmā’’ti, tesaṃ taṃ tatheva hoti, evaṃ taṃ sundarasirikattā sundarakāmattā ca subhagaṃ. Apica bahujanakantatāyapi subhagaṃ. Vanayatīti vanaṃ, attasampadāya sattānaṃ bhattiṃ kāreti, attani sinehaṃ uppādetīti attho. Vanute iti vā vanaṃ, nānāvidhakusuma-gandhasammodamattakokilādivihaṅgamābhirutehi mandamālutacalitarukkhasākhāviṭapapallavapalāsehi ca ‘‘etha maṃ paribhuñjathā’’ti sabbapāṇino yācati viyāti attho. Subhagañca taṃ vanañcāti subhagavanaṃ. Tasmiṃ subhagavane. Vanañca nāma ropimaṃ, sayaṃjātanti duvidhaṃ. Tattha veḷuvanajetavanādīni ropimāni. Andhavanamahāvanaañjanavanādīni sayaṃ jātāni. Idampi sayaṃjātanti veditabbaṃ.

    সালরাজমূলেতি এত্থ সালরুক্খোপি সালোতি ৰুচ্চতি। যথাহ ‘‘সেয্যথাপি, ভিক্খৰে, গামস্স ৰা নিগমস্স ৰা অৰিদূরে মহন্তং সালৰনং, তঞ্চস্স এল়ণ্ডেহি সঞ্ছন্ন’’ন্তি (ম॰ নি॰ ১.২২৫) ‘‘অন্তরেন যমকসালান’’ন্তি চ (দী॰ নি॰ ২.১৯৫) ৰনপ্পতিজেট্ঠকরুক্খোপি। যথাহ –

    Sālarājamūleti ettha sālarukkhopi sāloti vuccati. Yathāha ‘‘seyyathāpi, bhikkhave, gāmassa vā nigamassa vā avidūre mahantaṃ sālavanaṃ, tañcassa eḷaṇḍehi sañchanna’’nti (ma. ni. 1.225) ‘‘antarena yamakasālāna’’nti ca (dī. ni. 2.195) vanappatijeṭṭhakarukkhopi. Yathāha –

    ‘‘তৰেৰ দেৰ ৰিজিতে, তৰেৰুয্যানভূমিযা।

    ‘‘Taveva deva vijite, tavevuyyānabhūmiyā;

    উজুৰংসা মহাসালা, নীলোভাসা মনোরমা’’তি॥ (জা॰ ২.১৯.৪)।

    Ujuvaṃsā mahāsālā, nīlobhāsā manoramā’’ti. (jā. 2.19.4);

    যো কোচি রুক্খোপি। যথাহ ‘‘অথ খো তং, ভিক্খৰে, মালুৰবীজং অঞ্ঞতরস্মিং সালমূলে নিপতেয্যা’’তি (ম॰ নি॰ ১.৪৬৯)। ইধ পন ৰনপ্পতিজেট্ঠকরুক্খো অধিপ্পেতো। রাজসদ্দো পনস্স তমেৰ জেট্ঠকভাৰং সাধেতি। যথাহ ‘‘সুপ্পতিট্ঠিতস্স খো ব্রাহ্মণ ধম্মিক নিগ্রোধরাজস্সা’’তি (অ॰ নি॰ ৬.৫৪)। তত্থ দ্ৰেধা সমাসো, সালানং রাজাতিপি সালরাজা, সালো চ সো জেট্ঠকট্ঠেন রাজা চ ইতিপি সালরাজা। মূলন্তি সমীপং। অযঞ্হি মূলসদ্দো, ‘‘মূলানি উদ্ধরেয্য, অন্তমসো উসিরনাল়িমত্তানিপী’’তিআদীসু (অ॰ নি॰ ৪.১৯৫) মূলমূলে দিস্সতি। ‘‘লোভো অকুসলমূল’’ন্তিআদীসু (দী॰ নি॰ ৩.৩০৫) অসাধারণহেতুম্হি। ‘‘যাৰ মজ্ঝন্হিকে কালে ছাযা ফরতি, নিৰাতে পণ্ণানি পতন্তি, এত্তাৰতা রুক্খমূল’’ন্তিআদীসু সমীপে। ইধ পন সমীপে অধিপ্পেতো, তস্মা সালরাজস্স সমীপেতি এৰমেত্থ অত্থো দট্ঠব্বো।

    Yo koci rukkhopi. Yathāha ‘‘atha kho taṃ, bhikkhave, māluvabījaṃ aññatarasmiṃ sālamūle nipateyyā’’ti (ma. ni. 1.469). Idha pana vanappatijeṭṭhakarukkho adhippeto. Rājasaddo panassa tameva jeṭṭhakabhāvaṃ sādheti. Yathāha ‘‘suppatiṭṭhitassa kho brāhmaṇa dhammika nigrodharājassā’’ti (a. ni. 6.54). Tattha dvedhā samāso, sālānaṃ rājātipi sālarājā, sālo ca so jeṭṭhakaṭṭhena rājā ca itipi sālarājā. Mūlanti samīpaṃ. Ayañhi mūlasaddo, ‘‘mūlāni uddhareyya, antamaso usiranāḷimattānipī’’tiādīsu (a. ni. 4.195) mūlamūle dissati. ‘‘Lobho akusalamūla’’ntiādīsu (dī. ni. 3.305) asādhāraṇahetumhi. ‘‘Yāva majjhanhike kāle chāyā pharati, nivāte paṇṇāni patanti, ettāvatā rukkhamūla’’ntiādīsu samīpe. Idha pana samīpe adhippeto, tasmā sālarājassa samīpeti evamettha attho daṭṭhabbo.

    তত্থ সিযা – যদি তাৰ ভগৰা উক্কট্ঠাযং ৰিহরতি, ‘‘সুভগৰনে সালরাজমূলে’’তি ন ৰত্তব্বং, অথ তত্থ ৰিহরতি, ‘‘উক্কট্ঠায’’ন্তি ন ৰত্তব্বং, ন হি সক্কা উভযত্থ একং সমযং ৰিহরিতুন্তি। ন খো পনেতং এৰং দট্ঠব্বং।

    Tattha siyā – yadi tāva bhagavā ukkaṭṭhāyaṃ viharati, ‘‘subhagavane sālarājamūle’’ti na vattabbaṃ, atha tattha viharati, ‘‘ukkaṭṭhāya’’nti na vattabbaṃ, na hi sakkā ubhayattha ekaṃ samayaṃ viharitunti. Na kho panetaṃ evaṃ daṭṭhabbaṃ.

    ননু অৰোচুম্হ ‘‘সমীপত্থে চেতং ভুম্মৰচন’’ন্তি। তস্মা যথা গঙ্গাযমুনাদীনং সমীপে গোযূথানি চরন্তানি ‘‘গঙ্গায চরন্তি, যমুনায চরন্তী’’তি ৰুচ্চন্তি, এৰমিধাপি যদিদং উক্কট্ঠায সমীপে সুভগৰনং সালরাজমূলং, তত্থ ৰিহরন্তো ৰুচ্চতি ‘‘উক্কট্ঠাযং ৰিহরতি সুভগৰনে সালরাজমূলে’’তি। গোচরগামনিদস্সনত্থঞ্হিস্স উক্কট্ঠাৰচনং, পব্বজিতানুরূপনিৰাসট্ঠাননিদস্সনত্থং সেসৰচনং।

    Nanu avocumha ‘‘samīpatthe cetaṃ bhummavacana’’nti. Tasmā yathā gaṅgāyamunādīnaṃ samīpe goyūthāni carantāni ‘‘gaṅgāya caranti, yamunāya carantī’’ti vuccanti, evamidhāpi yadidaṃ ukkaṭṭhāya samīpe subhagavanaṃ sālarājamūlaṃ, tattha viharanto vuccati ‘‘ukkaṭṭhāyaṃ viharati subhagavane sālarājamūle’’ti. Gocaragāmanidassanatthañhissa ukkaṭṭhāvacanaṃ, pabbajitānurūpanivāsaṭṭhānanidassanatthaṃ sesavacanaṃ.

    তত্থ উক্কট্ঠাকিত্তনেন আযস্মা আনন্দো ভগৰতো গহট্ঠানুগ্গহকরণং দস্সেতি, সুভগৰনাদিকিত্তনেন পব্বজিতানুগ্গহকরণং। তথা পুরিমেন পচ্চযগ্গহণতো অত্তকিলমথানুযোগৰিৰজ্জনং, পচ্ছিমেন ৰত্থুকামপ্পহানতো কামসুখল্লিকানুযোগৰিৰজ্জনুপাযদস্সনং। পুরিমেন চ ধম্মদেসনাভিযোগং, পচ্ছিমেন ৰিৰেকাধিমুত্তিং। পুরিমেন করুণায উপগমনং, পচ্ছিমেন পঞ্ঞায অপগমনং। পুরিমেন সত্তানং হিতসুখনিপ্ফাদনাধিমুত্ততং, পচ্ছিমেন পরহিতসুখকরণে নিরুপলেপনং। পুরিমেন ধম্মিকসুখাপরিচ্চাগনিমিত্তং ফাসুৰিহারং, পচ্ছিমেন উত্তরিমনুস্সধম্মানুযোগনিমিত্তং । পুরিমেন মনুস্সানং উপকারবহুলতং, পচ্ছিমেন দেৰানং। পুরিমেন লোকে জাতস্স লোকে সংৰড্ঢভাৰং, পচ্ছিমেন লোকেন অনুপলিত্ততং। পুরিমেন ‘‘একপুগ্গলো, ভিক্খৰে, লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং। কতমো একপুগ্গলো, তথাগতো অরহং সম্মাসম্বুদ্ধো’’তি (অ॰ নি॰ ১.১৭০) ৰচনতো যদত্থং ভগৰা উপ্পন্নো, তদত্থপরিনিপ্ফাদনং, পচ্ছিমেন যত্থ উপ্পন্নো, তদনুরূপৰিহারং। ভগৰা হি পঠমং লুম্বিনিৰনে, দুতিযং বোধিমণ্ডেতি লোকিযলোকুত্তরায উপ্পত্তিযা ৰনেযেৰ উপ্পন্নো, তেনস্স ৰনেযেৰ ৰিহারং দস্সেতীতি এৰমাদিনা নযেনেত্থ অত্থযোজনা ৰেদিতব্বা।

    Tattha ukkaṭṭhākittanena āyasmā ānando bhagavato gahaṭṭhānuggahakaraṇaṃ dasseti, subhagavanādikittanena pabbajitānuggahakaraṇaṃ. Tathā purimena paccayaggahaṇato attakilamathānuyogavivajjanaṃ, pacchimena vatthukāmappahānato kāmasukhallikānuyogavivajjanupāyadassanaṃ. Purimena ca dhammadesanābhiyogaṃ, pacchimena vivekādhimuttiṃ. Purimena karuṇāya upagamanaṃ, pacchimena paññāya apagamanaṃ. Purimena sattānaṃ hitasukhanipphādanādhimuttataṃ, pacchimena parahitasukhakaraṇe nirupalepanaṃ. Purimena dhammikasukhāpariccāganimittaṃ phāsuvihāraṃ, pacchimena uttarimanussadhammānuyoganimittaṃ . Purimena manussānaṃ upakārabahulataṃ, pacchimena devānaṃ. Purimena loke jātassa loke saṃvaḍḍhabhāvaṃ, pacchimena lokena anupalittataṃ. Purimena ‘‘ekapuggalo, bhikkhave, loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṃ. Katamo ekapuggalo, tathāgato arahaṃ sammāsambuddho’’ti (a. ni. 1.170) vacanato yadatthaṃ bhagavā uppanno, tadatthaparinipphādanaṃ, pacchimena yattha uppanno, tadanurūpavihāraṃ. Bhagavā hi paṭhamaṃ lumbinivane, dutiyaṃ bodhimaṇḍeti lokiyalokuttarāya uppattiyā vaneyeva uppanno, tenassa vaneyeva vihāraṃ dassetīti evamādinā nayenettha atthayojanā veditabbā.

    তত্রাতি দেসকালপরিদীপনং। তঞ্হি যং সমযং ৰিহরতি, তত্র সমযে। যস্মিঞ্চ সালরাজমূলে ৰিহরতি, তত্র সালরাজমূলেতি দীপেতি। ভাসিতব্বযুত্তে ৰা দেসকালে দীপেতি। ন হি ভগৰা অযুত্তে দেসে কালে ৰা ধম্মং ভাসতি। ‘‘অকালো খো তাৰ বাহিযা’’তি (উদা॰ ১০) আদিচেত্থ সাধকং। খোতি পদপূরণমত্তে অৰধারণে আদিকালত্থে ৰা নিপাতো। ভগৰাতি লোকগরুদীপনং। ভিক্খূতি কথাসৰনযুত্তপুগ্গলৰচনং। অপিচেত্থ, ‘‘ভিক্খকোতি ভিক্খু, ভিক্খাচরিযং অজ্ঝুপগতোতি ভিক্খূ’’তিআদিনা (পারা॰ ৪৫) নযেন ৰচনত্থো ৰেদিতব্বো। আমন্তেসীতি আলপি অভাসি সম্বোধেসীতি অযমেত্থ অত্থো। অঞ্ঞত্র পন ঞাপনেপি হোতি। যথাহ ‘‘আমন্তযামি ৰো, ভিক্খৰে, পটিৰেদযামি ৰো, ভিক্খৰে’’তি। পক্কোসনেপি। যথাহ ‘‘এহি ত্ৰং ভিক্খু মম ৰচনেন সারিপুত্তং আমন্তেহী’’তি (অ॰ নি॰ ৯.১১)।

    Tatrāti desakālaparidīpanaṃ. Tañhi yaṃ samayaṃ viharati, tatra samaye. Yasmiñca sālarājamūle viharati, tatra sālarājamūleti dīpeti. Bhāsitabbayutte vā desakāle dīpeti. Na hi bhagavā ayutte dese kāle vā dhammaṃ bhāsati. ‘‘Akālo kho tāva bāhiyā’’ti (udā. 10) ādicettha sādhakaṃ. Khoti padapūraṇamatte avadhāraṇe ādikālatthe vā nipāto. Bhagavāti lokagarudīpanaṃ. Bhikkhūti kathāsavanayuttapuggalavacanaṃ. Apicettha, ‘‘bhikkhakoti bhikkhu, bhikkhācariyaṃ ajjhupagatoti bhikkhū’’tiādinā (pārā. 45) nayena vacanattho veditabbo. Āmantesīti ālapi abhāsi sambodhesīti ayamettha attho. Aññatra pana ñāpanepi hoti. Yathāha ‘‘āmantayāmi vo, bhikkhave, paṭivedayāmi vo, bhikkhave’’ti. Pakkosanepi. Yathāha ‘‘ehi tvaṃ bhikkhu mama vacanena sāriputtaṃ āmantehī’’ti (a. ni. 9.11).

    ভিক্খৰোতি আমন্তনাকারদীপনং। তঞ্চ ভিক্খনসীলতাদিগুণযোগসিদ্ধত্তা ৰুত্তং। ভিক্খনসীলতাগুণযুত্তোপি হি ভিক্খু ভিক্খনধম্মতাগুণযুত্তোপি। ভিক্খনে সাধুকারিতাগুণযুত্তোপীতি সদ্দৰিদূ মঞ্ঞন্তি। তেন চ নেসং ভিক্খনসীলতাদিগুণযোগসিদ্ধেন ৰচনেন হীনাধিকজনসেৰিতং ৰুত্তিং পকাসেন্তো উদ্ধতদীনভাৰনিগ্গহং করোতি। ভিক্খৰোতি ইমিনা চ করুণাৰিপ্ফারসোম্মহদযনযননিপাতপুব্বঙ্গমেন ৰচনেন তে অত্তনো মুখাভিমুখে করোতি। তেনেৰ চ কথেতুকম্যতাদীপকেন ৰচনেন নেসং সোতুকম্যতং জনেতি। তেনেৰ চ সম্বোধনট্ঠেন সাধুকং সৰনমনসিকারেপি নে নিযোজেতি। সাধুকসৰনমনসিকারাযত্তা হি সাসনসম্পত্তি।

    Bhikkhavoti āmantanākāradīpanaṃ. Tañca bhikkhanasīlatādiguṇayogasiddhattā vuttaṃ. Bhikkhanasīlatāguṇayuttopi hi bhikkhu bhikkhanadhammatāguṇayuttopi. Bhikkhane sādhukāritāguṇayuttopīti saddavidū maññanti. Tena ca nesaṃ bhikkhanasīlatādiguṇayogasiddhena vacanena hīnādhikajanasevitaṃ vuttiṃ pakāsento uddhatadīnabhāvaniggahaṃ karoti. Bhikkhavoti iminā ca karuṇāvipphārasommahadayanayananipātapubbaṅgamena vacanena te attano mukhābhimukhe karoti. Teneva ca kathetukamyatādīpakena vacanena nesaṃ sotukamyataṃ janeti. Teneva ca sambodhanaṭṭhena sādhukaṃ savanamanasikārepi ne niyojeti. Sādhukasavanamanasikārāyattā hi sāsanasampatti.

    অপরেসুপি দেৰমনুস্সেসু ৰিজ্জমানেসু কস্মা ভিক্খূযেৰ আমন্তেসীতি চে। জেট্ঠসেট্ঠাসন্নসদাসন্নিহিতভাৰতো। সব্বপরিসসাধারণা হি ভগৰতো ধম্মদেসনা। পরিসায চ জেট্ঠা ভিক্খূ, পঠমুপ্পন্নত্তা। সেট্ঠা, অনগারিযভাৰং আদিং কত্ৰা সত্থুচরিযানুৰিধাযকত্তা সকলসাসনপটিগ্গাহকত্তা চ। আসন্না, তত্থ নিসিন্নেসু সত্থুসন্তিকত্তা। সদাসন্নিহিতা, সত্থুসন্তিকাৰচরত্তাতি। অপিচ তে ধম্মদেসনায ভাজনং, যথানুসিট্ঠং পটিপত্তিসব্ভাৰতো। ৰিসেসতো চ একচ্চে ভিক্খূযেৰ সন্ধায অযং দেসনাতিপি তে এৰ আমন্তেসি।

    Aparesupi devamanussesu vijjamānesu kasmā bhikkhūyeva āmantesīti ce. Jeṭṭhaseṭṭhāsannasadāsannihitabhāvato. Sabbaparisasādhāraṇā hi bhagavato dhammadesanā. Parisāya ca jeṭṭhā bhikkhū, paṭhamuppannattā. Seṭṭhā, anagāriyabhāvaṃ ādiṃ katvā satthucariyānuvidhāyakattā sakalasāsanapaṭiggāhakattā ca. Āsannā, tattha nisinnesu satthusantikattā. Sadāsannihitā, satthusantikāvacarattāti. Apica te dhammadesanāya bhājanaṃ, yathānusiṭṭhaṃ paṭipattisabbhāvato. Visesato ca ekacce bhikkhūyeva sandhāya ayaṃ desanātipi te eva āmantesi.

    তত্থ সিযা – কিমত্থং পন ভগৰা ধম্মং দেসেন্তো পঠমং ভিক্খূ আমন্তেসি, ন ধম্মমেৰ দেসেতীতি। সতিজননত্থং। ভিক্খূ হি অঞ্ঞং চিন্তেন্তাপি ৰিক্খিত্তচিত্তাপি ধম্মং পচ্চৰেক্খন্তাপি কম্মট্ঠানং মনসিকরোন্তাপি নিসিন্না হোন্তি, তে অনামন্তেত্ৰা ধম্মে দেসিযমানে – ‘‘অযং দেসনা কিন্নিদানা কিংপচ্চযা কতমায অট্ঠুপ্পত্তিযা দেসিতা’’তি সল্লক্খেতুং অসক্কোন্তা দুগ্গহিতং ৰা গণ্হেয্যুং, ন ৰা গণ্হেয্যুং। তেন নেসং সতিজননত্থং ভগৰা পঠমং আমন্তেত্ৰা পচ্ছা ধম্মং দেসেতি।

    Tattha siyā – kimatthaṃ pana bhagavā dhammaṃ desento paṭhamaṃ bhikkhū āmantesi, na dhammameva desetīti. Satijananatthaṃ. Bhikkhū hi aññaṃ cintentāpi vikkhittacittāpi dhammaṃ paccavekkhantāpi kammaṭṭhānaṃ manasikarontāpi nisinnā honti, te anāmantetvā dhamme desiyamāne – ‘‘ayaṃ desanā kinnidānā kiṃpaccayā katamāya aṭṭhuppattiyā desitā’’ti sallakkhetuṃ asakkontā duggahitaṃ vā gaṇheyyuṃ, na vā gaṇheyyuṃ. Tena nesaṃ satijananatthaṃ bhagavā paṭhamaṃ āmantetvā pacchā dhammaṃ deseti.

    ভদন্তেতি গারৰৰচনমেতং, সত্থুনো পটিৰচনদানং ৰা, অপিচেত্থ ভিক্খৰোতি ৰদমানো ভগৰা তে ভিক্খূ আলপতি। ভদন্তেতি ৰদমানা তে ভগৰন্তং পচ্চালপন্তি। তথা ভিক্খৰোতি ভগৰা আভাসতি। ভদন্তেতি তে পচ্চাভাসন্তি। ভিক্খৰোতি পটিৰচনং দাপেতি, ভদন্তেতি পটিৰচনং দেন্তি। তে ভিক্খূতি যে ভগৰা আমন্তেসি। ভগৰতো পচ্চস্সোসুন্তি ভগৰতো আমন্তনং পটিঅস্সোসুং, অভিমুখা হুত্ৰা সুণিংসু সম্পটিচ্ছিংসু পটিগ্গহেসুন্তি অত্থো। ভগৰা এতদৰোচাতি ভগৰা এতং ইদানি ৰত্তব্বং সকলং সুত্তং অৰোচ।

    Bhadanteti gāravavacanametaṃ, satthuno paṭivacanadānaṃ vā, apicettha bhikkhavoti vadamāno bhagavā te bhikkhū ālapati. Bhadanteti vadamānā te bhagavantaṃ paccālapanti. Tathā bhikkhavoti bhagavā ābhāsati. Bhadanteti te paccābhāsanti. Bhikkhavoti paṭivacanaṃ dāpeti, bhadanteti paṭivacanaṃ denti. Te bhikkhūti ye bhagavā āmantesi. Bhagavato paccassosunti bhagavato āmantanaṃ paṭiassosuṃ, abhimukhā hutvā suṇiṃsu sampaṭicchiṃsu paṭiggahesunti attho. Bhagavā etadavocāti bhagavā etaṃ idāni vattabbaṃ sakalaṃ suttaṃ avoca.

    এত্তাৰতা চ যং আযস্মতা আনন্দেন কমলকুৰলযুজ্জলৰিমলসাদুরসসলিলায পোক্খরণিযা সুখাৰতরণত্থং নিম্মলসিলাতলরচনৰিলাসসোভিতরতনসোপানং ৰিপ্পকিণ্ণমুত্তাতলসদিসৰালিকাকিণ্ণপণ্ডরভূমিভাগং তিত্থং ৰিয সুৰিভত্তভিত্তিৰিচিত্রৰেদিকাপরিক্খিত্তস্স নক্খত্তপথং ফুসিতুকামতায ৰিয, ৰিজম্ভিতসমুস্সযস্স পাসাদৰরস্স সুখারোহণত্থং দন্তময-সণ্হমুদুফলক-কঞ্চনলতাৰিনদ্ধ- মণিগণপ্পভাসমুদযুজ্জলসোভং সোপানং ৰিয, সুৰণ্ণৰলযানূপুরাদিসঙ্ঘট্টনসদ্দসম্মিস্সিতকথিতহসিতমধুরস্সরগেহজনৰিচরিতস্স উল়ারইস্সরিযৰিভৰসোভিতস্স মহাঘরস্স সুখপ্পৰেসনত্থং সুৰণ্ণরজতমণিমুত্তাপৰাল়াদিজুতিৰিস্সরৰিজ্জোতিত-সুপ্পতিট্ঠিতৰিসালদ্ৰারবাহং মহাদ্ৰারং ৰিয চ অত্থব্যঞ্জনসম্পন্নস্স বুদ্ধানং দেসনাঞাণগম্ভীরভাৰসংসূচকস্স ইমস্স সুত্তস্স সুখাৰগাহণত্থং কালদেসদেসকৰত্থুপরিসাপদেসপটিমণ্ডিতং নিদানং ভাসিতং, তস্স অত্থৰণ্ণনা সমত্তা।

    Ettāvatā ca yaṃ āyasmatā ānandena kamalakuvalayujjalavimalasādurasasalilāya pokkharaṇiyā sukhāvataraṇatthaṃ nimmalasilātalaracanavilāsasobhitaratanasopānaṃ vippakiṇṇamuttātalasadisavālikākiṇṇapaṇḍarabhūmibhāgaṃ titthaṃ viya suvibhattabhittivicitravedikāparikkhittassa nakkhattapathaṃ phusitukāmatāya viya, vijambhitasamussayassa pāsādavarassa sukhārohaṇatthaṃ dantamaya-saṇhamuduphalaka-kañcanalatāvinaddha- maṇigaṇappabhāsamudayujjalasobhaṃ sopānaṃ viya, suvaṇṇavalayānūpurādisaṅghaṭṭanasaddasammissitakathitahasitamadhurassaragehajanavicaritassa uḷāraissariyavibhavasobhitassa mahāgharassa sukhappavesanatthaṃ suvaṇṇarajatamaṇimuttāpavāḷādijutivissaravijjotita-suppatiṭṭhitavisāladvārabāhaṃ mahādvāraṃ viya ca atthabyañjanasampannassa buddhānaṃ desanāñāṇagambhīrabhāvasaṃsūcakassa imassa suttassa sukhāvagāhaṇatthaṃ kāladesadesakavatthuparisāpadesapaṭimaṇḍitaṃ nidānaṃ bhāsitaṃ, tassa atthavaṇṇanā samattā.

    সুত্তনিক্খেপৰণ্ণনা

    Suttanikkhepavaṇṇanā

    ইদানি ‘‘সব্বধম্মমূলপরিযাযং ৰো’’তিআদিনা নযেন ভগৰতা নিক্খিত্তস্স সুত্তস্স ৰণ্ণনায ওকাসো অনুপ্পত্তো। সা পনেসা সুত্তৰণ্ণনা যস্মা সুত্তনিক্খেপং ৰিচারেত্ৰা ৰুচ্চমানা পাকটা হোতি, তস্মা সুত্তনিক্খেপং তাৰ ৰিচারযিস্সাম। চত্তারো হি সুত্তনিক্খেপা অত্তজ্ঝাসযো পরজ্ঝাসযো পুচ্ছাৰসিকো অট্ঠুপ্পত্তিকোতি।

    Idāni ‘‘sabbadhammamūlapariyāyaṃ vo’’tiādinā nayena bhagavatā nikkhittassa suttassa vaṇṇanāya okāso anuppatto. Sā panesā suttavaṇṇanā yasmā suttanikkhepaṃ vicāretvā vuccamānā pākaṭā hoti, tasmā suttanikkhepaṃ tāva vicārayissāma. Cattāro hi suttanikkhepā attajjhāsayo parajjhāsayo pucchāvasiko aṭṭhuppattikoti.

    তত্থ যানি সুত্তানি ভগৰা পরেহি অনজ্ঝিট্ঠো কেৰলং অত্তনো অজ্ঝাসযেনেৰ কথেসি। সেয্যথিদং, আকঙ্খেয্যসুত্তং, ৰত্থসুত্তং, মহাসতিপট্ঠানসুত্তং, মহাসল়াযতনৰিভঙ্গসুত্তং, অরিযৰংসসুত্তং, সম্মপ্পধানসুত্তন্তহারকো, ইদ্ধিপাদইন্দ্রিযবলবোজ্ঝঙ্গমগ্গঙ্গসুত্তন্তহারকোতি এৰমাদীনি। তেসং অত্তজ্ঝাসযো নিক্খেপো।

    Tattha yāni suttāni bhagavā parehi anajjhiṭṭho kevalaṃ attano ajjhāsayeneva kathesi. Seyyathidaṃ, ākaṅkheyyasuttaṃ, vatthasuttaṃ, mahāsatipaṭṭhānasuttaṃ, mahāsaḷāyatanavibhaṅgasuttaṃ, ariyavaṃsasuttaṃ, sammappadhānasuttantahārako, iddhipādaindriyabalabojjhaṅgamaggaṅgasuttantahārakoti evamādīni. Tesaṃ attajjhāsayo nikkhepo.

    যানি পন ‘‘পরিপক্কা খো রাহুলস্স ৰিমুত্তিপরিপাচনীযা ধম্মা, যংনূনাহং রাহুলং উত্তরি আসৰানং খযে ৰিনেয্য’’ন্তি (সং॰ নি॰ ৪.১২১) এৰং পরেসং অজ্ঝাসযং খন্তিং মনং অভিনীহারং বুজ্ঝনভাৰঞ্চ অৰেক্খিত্ৰা পরজ্ঝাসযৰসেন কথিতানি। সেয্যথিদং, চূল়রাহুলোৰাদসুত্তং, মহারাহুলোৰাদসুত্তং, ধম্মচক্কপ্পৰত্তনং, ধাতুৰিভঙ্গসুত্তন্তি এৰমাদীনি। তেসং পরজ্ঝাসযো নিক্খেপো।

    Yāni pana ‘‘paripakkā kho rāhulassa vimuttiparipācanīyā dhammā, yaṃnūnāhaṃ rāhulaṃ uttari āsavānaṃ khaye vineyya’’nti (saṃ. ni. 4.121) evaṃ paresaṃ ajjhāsayaṃ khantiṃ manaṃ abhinīhāraṃ bujjhanabhāvañca avekkhitvā parajjhāsayavasena kathitāni. Seyyathidaṃ, cūḷarāhulovādasuttaṃ, mahārāhulovādasuttaṃ, dhammacakkappavattanaṃ, dhātuvibhaṅgasuttanti evamādīni. Tesaṃ parajjhāsayo nikkhepo.

    ভগৰন্তং পন উপসঙ্কমিত্ৰা চতস্সো পরিসা চত্তারো ৰণ্ণা নাগা সুপণ্ণা গন্ধব্বা অসুরা যক্খা মহারাজানো তাৰতিংসাদযো দেৰা মহাব্রহ্মাতি এৰমাদযো ‘‘বোজ্ঝঙ্গা বোজ্ঝঙ্গা’’তি, ভন্তে, ৰুচ্চন্তি। ‘‘নীৰরণা নীৰরণা’’তি, ভন্তে, ৰুচ্চন্তি। ইমে নু খো, ভন্তে, পঞ্চুপাদানক্খন্ধা। ‘‘কিং সূধ ৰিত্তং পুরিসস্স সেট্ঠ’’ন্তিআদিনা (সু॰ নি॰ ১৮৩) নযেন পঞ্হং পুচ্ছন্তি। এৰং পুট্ঠেন ভগৰতা যানি কথিতানি বোজ্ঝঙ্গসংযুত্তাদীনি। যানি ৰা পনঞ্ঞানিপি দেৰতাসংযুত্ত-মারসংযুত্ত-ব্রহ্মসংযুত্ত-সক্কপঞ্হ-চূল়ৰেদল্ল-মহাৰেদল্ল-সামঞ্ঞফল- আল়ৰক-সূচিলোম-খরলোমসুত্তাদীনি, তেসং পুচ্ছাৰসিকো নিক্খেপো।

    Bhagavantaṃ pana upasaṅkamitvā catasso parisā cattāro vaṇṇā nāgā supaṇṇā gandhabbā asurā yakkhā mahārājāno tāvatiṃsādayo devā mahābrahmāti evamādayo ‘‘bojjhaṅgā bojjhaṅgā’’ti, bhante, vuccanti. ‘‘Nīvaraṇā nīvaraṇā’’ti, bhante, vuccanti. Ime nu kho, bhante, pañcupādānakkhandhā. ‘‘Kiṃ sūdha vittaṃ purisassa seṭṭha’’ntiādinā (su. ni. 183) nayena pañhaṃ pucchanti. Evaṃ puṭṭhena bhagavatā yāni kathitāni bojjhaṅgasaṃyuttādīni. Yāni vā panaññānipi devatāsaṃyutta-mārasaṃyutta-brahmasaṃyutta-sakkapañha-cūḷavedalla-mahāvedalla-sāmaññaphala- āḷavaka-sūciloma-kharalomasuttādīni, tesaṃ pucchāvasiko nikkhepo.

    যানি পনেতানি উপ্পন্নং কারণং পটিচ্চ কথিতানি। সেয্যথিদং, ধম্মদাযাদং চূল়সীহনাদং চন্দূপমং পুত্তমংসূপমং দারুক্খন্ধূপমং অগ্গিক্খন্ধূপমং ফেণপিণ্ডূপমং পারিচ্ছত্তকূপমন্তি এৰমাদীনি। তেসং অট্ঠুপ্পত্তিকো নিক্খেপো।

    Yāni panetāni uppannaṃ kāraṇaṃ paṭicca kathitāni. Seyyathidaṃ, dhammadāyādaṃ cūḷasīhanādaṃ candūpamaṃ puttamaṃsūpamaṃ dārukkhandhūpamaṃ aggikkhandhūpamaṃ pheṇapiṇḍūpamaṃ pāricchattakūpamanti evamādīni. Tesaṃ aṭṭhuppattiko nikkhepo.

    এৰমিমেসু চতূসু নিক্খেপেসু ইমস্স সুত্তস্স অট্ঠুপ্পত্তিকো নিক্খেপো। অট্ঠুপ্পত্তিযঞ্হি ইদং ভগৰতা নিক্খিত্তং। কতরায অট্ঠুপ্পত্তিযা? পরিযত্তিং নিস্সায উপ্পন্নে মানে। পঞ্চসতা কির ব্রাহ্মণা তিণ্ণং ৰেদানং পারগূ অপরভাগে ভগৰতো ধম্মদেসনং সুত্ৰা কামেসু আদীনৰং নেক্খম্মে চ আনিসংসং সম্পস্সমানা ভগৰতো সন্তিকে পব্বজিত্ৰা নচিরস্সেৰ সব্বং বুদ্ধৰচনং উগ্গণ্হিত্ৰা পরিযত্তিং নিস্সায মানং উপ্পাদেসুং ‘‘যং যং ভগৰা কথেতি, তং তং মযং খিপ্পমেৰ জানাম, ভগৰা হি তীণি লিঙ্গানি চত্তারি পদানি সত্ত ৰিভত্তিযো মুঞ্চিত্ৰা ন কিঞ্চি কথেতি, এৰং কথিতে চ অম্হাকং গণ্ঠিপদং নাম নত্থী’’তি। তে ভগৰতি অগারৰা হুত্ৰা ততো পট্ঠায ভগৰতো উপট্ঠানম্পি ধম্মস্সৰনম্পি অভিণ্হং ন গচ্ছন্তি। ভগৰা তেসং তং চিত্তচারং ঞত্ৰা ‘‘অভব্বা ইমে ইমং মানখিলং অনুপহচ্চ মগ্গং ৰা ফলং ৰা সচ্ছিকাতু’’ন্তি তেসং সুতপরিযত্তিং নিস্সায উপ্পন্নং মানং অট্ঠুপ্পত্তিং কত্ৰা দেসনাকুসলো ভগৰা মানভঞ্জনত্থং সব্বধম্মমূলপরিযাযন্তি দেসনং আরভি।

    Evamimesu catūsu nikkhepesu imassa suttassa aṭṭhuppattiko nikkhepo. Aṭṭhuppattiyañhi idaṃ bhagavatā nikkhittaṃ. Katarāya aṭṭhuppattiyā? Pariyattiṃ nissāya uppanne māne. Pañcasatā kira brāhmaṇā tiṇṇaṃ vedānaṃ pāragū aparabhāge bhagavato dhammadesanaṃ sutvā kāmesu ādīnavaṃ nekkhamme ca ānisaṃsaṃ sampassamānā bhagavato santike pabbajitvā nacirasseva sabbaṃ buddhavacanaṃ uggaṇhitvā pariyattiṃ nissāya mānaṃ uppādesuṃ ‘‘yaṃ yaṃ bhagavā katheti, taṃ taṃ mayaṃ khippameva jānāma, bhagavā hi tīṇi liṅgāni cattāri padāni satta vibhattiyo muñcitvā na kiñci katheti, evaṃ kathite ca amhākaṃ gaṇṭhipadaṃ nāma natthī’’ti. Te bhagavati agāravā hutvā tato paṭṭhāya bhagavato upaṭṭhānampi dhammassavanampi abhiṇhaṃ na gacchanti. Bhagavā tesaṃ taṃ cittacāraṃ ñatvā ‘‘abhabbā ime imaṃ mānakhilaṃ anupahacca maggaṃ vā phalaṃ vā sacchikātu’’nti tesaṃ sutapariyattiṃ nissāya uppannaṃ mānaṃ aṭṭhuppattiṃ katvā desanākusalo bhagavā mānabhañjanatthaṃ sabbadhammamūlapariyāyanti desanaṃ ārabhi.

    তত্থ সব্বধম্মমূলপরিযাযন্তি সব্বেসং ধম্মানং মূলপরিযাযং। সব্বেসন্তি অনৰসেসানং। অনৰসেসৰাচকো হি অযং সব্ব-সদ্দো। সো যেন যেন সম্বন্ধং গচ্ছতি, তস্স তস্স অনৰসেসতং দীপেতি। যথা, ‘‘সব্বং রূপং অনিচ্চং সব্বা ৰেদনা অনিচ্চা সব্বসক্কাযপরিযাপন্নেসু ধম্মেসূ’’তি। ধম্ম-সদ্দো পনাযং পরিযত্তি-সচ্চ-সমাধি-পঞ্ঞা-পকতি-সভাৰসুঞ্ঞতা-পুঞ্ঞাপত্তি-ঞেয্যাদীসু দিস্সতি। ‘‘ইধ ভিক্খু ধম্মং পরিযাপুণাতি সুত্তং গেয্য’’ন্তিআদীসু (অ॰ নি॰ ৫.৭৩) হি ধম্মসদ্দো পরিযত্তিযং ৰত্ততি। ‘‘দিট্ঠধম্মো ৰিদিতধম্মো’’তিআদীসু (দী॰ নি॰ ১.২৯৯) সচ্চেসু। ‘‘এৰং ধম্মা তে ভগৰন্তো’’তিআদীসু সমাধিম্হি।

    Tattha sabbadhammamūlapariyāyanti sabbesaṃ dhammānaṃ mūlapariyāyaṃ. Sabbesanti anavasesānaṃ. Anavasesavācako hi ayaṃ sabba-saddo. So yena yena sambandhaṃ gacchati, tassa tassa anavasesataṃ dīpeti. Yathā, ‘‘sabbaṃ rūpaṃ aniccaṃ sabbā vedanā aniccā sabbasakkāyapariyāpannesu dhammesū’’ti. Dhamma-saddo panāyaṃ pariyatti-sacca-samādhi-paññā-pakati-sabhāvasuññatā-puññāpatti-ñeyyādīsu dissati. ‘‘Idha bhikkhu dhammaṃ pariyāpuṇāti suttaṃ geyya’’ntiādīsu (a. ni. 5.73) hi dhammasaddo pariyattiyaṃ vattati. ‘‘Diṭṭhadhammo viditadhammo’’tiādīsu (dī. ni. 1.299) saccesu. ‘‘Evaṃ dhammā te bhagavanto’’tiādīsu samādhimhi.

    ‘‘যস্সেতে চতুরো ধম্মা, ৰানরিন্দ যথা তৰ।

    ‘‘Yassete caturo dhammā, vānarinda yathā tava;

    সচ্চং ধম্মো ধিতি চাগো, দিট্ঠং সো অতিৰত্ততী’’তি॥ –

    Saccaṃ dhammo dhiti cāgo, diṭṭhaṃ so ativattatī’’ti. –

    আদীসু (জা॰ ১.১.৫৭) পঞ্ঞায।

    Ādīsu (jā. 1.1.57) paññāya.

    ‘‘জাতিধম্মা জরাধম্মা, অথো মরণধম্মিনো’’তিআদীসু পকতিযং। ‘‘কুসলা ধম্মা’’তিআদীসু (ধ॰ স॰ ১.তিকমাতিকা) সভাৰে। ‘‘তস্মিং খো পন সমযে ধম্মা হোন্তী’’তিআদীসু (ধ॰ স॰ ১২১) সুঞ্ঞতাযং। ‘‘ধম্মো সুচিণ্ণো সুখমাৰহাতী’’তিআদীসু (জা॰ ১.১০.১০২) পুঞ্ঞে। ‘‘দ্ৰে অনিযতা ধম্মা’’তিআদীসু (পারা॰ ৪৪৩) আপত্তিযং। ‘‘সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথং আগচ্ছন্তী’’তিআদীসু ঞেয্যে। ইধ পনাযং সভাৰে ৰত্ততি। তত্রাযং ৰচনত্থো – অত্তনো লক্খণং ধারেন্তীতি ধম্মা। মূল-সদ্দো ৰিত্থারিতো এৰ। ইধ পনাযং অসাধারণহেতুম্হি দট্ঠব্বো।

    ‘‘Jātidhammā jarādhammā, atho maraṇadhammino’’tiādīsu pakatiyaṃ. ‘‘Kusalā dhammā’’tiādīsu (dha. sa. 1.tikamātikā) sabhāve. ‘‘Tasmiṃ kho pana samaye dhammā hontī’’tiādīsu (dha. sa. 121) suññatāyaṃ. ‘‘Dhammo suciṇṇo sukhamāvahātī’’tiādīsu (jā. 1.10.102) puññe. ‘‘Dve aniyatā dhammā’’tiādīsu (pārā. 443) āpattiyaṃ. ‘‘Sabbe dhammā sabbākārena buddhassa bhagavato ñāṇamukhe āpāthaṃ āgacchantī’’tiādīsu ñeyye. Idha panāyaṃ sabhāve vattati. Tatrāyaṃ vacanattho – attano lakkhaṇaṃ dhārentīti dhammā. Mūla-saddo vitthārito eva. Idha panāyaṃ asādhāraṇahetumhi daṭṭhabbo.

    পরিযাযসদ্দো ‘‘মধুপিণ্ডিকপরিযাযোতি নং ধারেহী’’তিআদীসু (ম॰ নি॰ ১.২০৫) দেসনাযং ৰত্ততি। ‘‘অত্থি খ্ৰেস ব্রাহ্মণ, পরিযাযো, যেন মং পরিযাযেন সম্মা ৰদমানো ৰদেয্য অকিরিযৰাদো সমণো গোতমো’’তিআদীসু (পারা॰ ৩) কারণে। ‘‘কস্স নু খো, আনন্দ, অজ্জ পরিযাযো ভিক্খুনিযো ওৰদিতু’’ন্তিআদীসু (ম॰ নি॰ ৩.৩৯৮) ৰারে। ইধ পন কারণেপি দেসনাযম্পি ৰত্ততি। তস্মা ‘‘সব্বধম্মমূলপরিযায’’ন্তি এত্থ সব্বেসং ধম্মানং অসাধারণহেতুসঞ্ঞিতং কারণন্তি ৰা সব্বেসং ধম্মানং কারণদেসনন্তি ৰা এৰং অত্থো দট্ঠব্বো। নেয্যত্থত্তা চস্স সুত্তস্স, ন চতুভূমকাপি সভাৰধম্মা সব্বধম্মাতি ৰেদিতব্বা। সক্কাযপরিযাপন্না পন তেভূমকা ধম্মাৰ অনৰসেসতো ৰেদিতব্বা, অযমেত্থ অধিপ্পাযোতি।

    Pariyāyasaddo ‘‘madhupiṇḍikapariyāyoti naṃ dhārehī’’tiādīsu (ma. ni. 1.205) desanāyaṃ vattati. ‘‘Atthi khvesa brāhmaṇa, pariyāyo, yena maṃ pariyāyena sammā vadamāno vadeyya akiriyavādo samaṇo gotamo’’tiādīsu (pārā. 3) kāraṇe. ‘‘Kassa nu kho, ānanda, ajja pariyāyo bhikkhuniyo ovaditu’’ntiādīsu (ma. ni. 3.398) vāre. Idha pana kāraṇepi desanāyampi vattati. Tasmā ‘‘sabbadhammamūlapariyāya’’nti ettha sabbesaṃ dhammānaṃ asādhāraṇahetusaññitaṃ kāraṇanti vā sabbesaṃ dhammānaṃ kāraṇadesananti vā evaṃ attho daṭṭhabbo. Neyyatthattā cassa suttassa, na catubhūmakāpi sabhāvadhammā sabbadhammāti veditabbā. Sakkāyapariyāpannā pana tebhūmakā dhammāva anavasesato veditabbā, ayamettha adhippāyoti.

    ৰোতি অযং ৰো-সদ্দো পচ্চত্তউপযোগকরণসম্পদানসামিৰচনপদপূরণেসু দিস্সতি। ‘‘কচ্চি পন ৰো, অনুরুদ্ধা, সমগ্গা সম্মোদমানা’’তিআদীসু (ম॰ নি॰ ১.৩২৬) হি পচ্চত্তে দিস্সতি। ‘‘গচ্ছথ, ভিক্খৰে, পণামেমি ৰো’’তিআদীসু (ম॰ নি॰ ২.১৫৭) উপযোগে। ‘‘ন ৰো মম সন্তিকে ৰত্থব্ব’’ন্তিআদীসু (ম॰ নি॰ ২.১৫৭) করণে। ‘‘ৰনপত্থপরিযাযং ৰো, ভিক্খৰে, দেসেস্সামী’’তিআদীসু (ম॰ নি॰ ১.১৯০) সম্পদানে। ‘‘সব্বেসং ৰো, সারিপুত্ত, সুভাসিত’’ন্তিআদীসু (ম॰ নি॰ ১.৩৪৫) সামিৰচনে। ‘‘যে হি ৰো অরিযা পরিসুদ্ধকাযকম্মন্তা’’তিআদীসু (ম॰ নি॰ ১.৩৫) পদপূরণমত্তে। ইধ পনাযং সম্পদানে দট্ঠব্বো।

    Voti ayaṃ vo-saddo paccattaupayogakaraṇasampadānasāmivacanapadapūraṇesu dissati. ‘‘Kacci pana vo, anuruddhā, samaggā sammodamānā’’tiādīsu (ma. ni. 1.326) hi paccatte dissati. ‘‘Gacchatha, bhikkhave, paṇāmemi vo’’tiādīsu (ma. ni. 2.157) upayoge. ‘‘Na vo mama santike vatthabba’’ntiādīsu (ma. ni. 2.157) karaṇe. ‘‘Vanapatthapariyāyaṃ vo, bhikkhave, desessāmī’’tiādīsu (ma. ni. 1.190) sampadāne. ‘‘Sabbesaṃ vo, sāriputta, subhāsita’’ntiādīsu (ma. ni. 1.345) sāmivacane. ‘‘Ye hi vo ariyā parisuddhakāyakammantā’’tiādīsu (ma. ni. 1.35) padapūraṇamatte. Idha panāyaṃ sampadāne daṭṭhabbo.

    ভিক্খৰেতি পতিস্সৰেন অভিমুখীভূতানং পুনালপনং। দেসেস্সামীতি দেসনাপটিজাননং। ইদং ৰুত্তং হোতি, ভিক্খৰে, সব্বধম্মানং মূলকারণং তুম্হাকং দেসেস্সামি, দুতিযেন নযেন কারণদেসনং তুম্হাকং দেসেস্সামীতি। তং সুণাথাতি তমত্থং তং কারণং তং দেসনং মযা ৰুচ্চমানং সুণাথ। সাধুকং মনসি করোথাতি এত্থ পন সাধুকং সাধূতি একত্থমেতং। অযঞ্চ সাধু সদ্দো আযাচনসম্পটিচ্ছনসম্পহংসনসুন্দরদল়্হীকম্মাদীসু দিস্সতি। ‘‘সাধু মে ভন্তে ভগৰা, সংখিত্তেন ধম্মং দেসেতূ’’তিআদীসু (সং॰ নি॰ ৪.৯৫) হি আযাচনে দিস্সতি। ‘‘সাধু, ভন্তেতি খো সো ভিক্খু ভগৰতো ভাসিতং অভিনন্দিত্ৰা অনুমোদিত্ৰা’’তিআদীসু (ম॰ নি॰ ৩.৮৬) সম্পটিচ্ছনে। ‘‘সাধু, সাধু সারিপুত্তা’’তিআদীসু (দী॰ নি॰ ৩.৩৪৯) সম্পহংসনে।

    Bhikkhaveti patissavena abhimukhībhūtānaṃ punālapanaṃ. Desessāmīti desanāpaṭijānanaṃ. Idaṃ vuttaṃ hoti, bhikkhave, sabbadhammānaṃ mūlakāraṇaṃ tumhākaṃ desessāmi, dutiyena nayena kāraṇadesanaṃ tumhākaṃ desessāmīti. Taṃ suṇāthāti tamatthaṃ taṃ kāraṇaṃ taṃ desanaṃ mayā vuccamānaṃ suṇātha. Sādhukaṃ manasi karothāti ettha pana sādhukaṃ sādhūti ekatthametaṃ. Ayañca sādhu saddo āyācanasampaṭicchanasampahaṃsanasundaradaḷhīkammādīsu dissati. ‘‘Sādhu me bhante bhagavā, saṃkhittena dhammaṃ desetū’’tiādīsu (saṃ. ni. 4.95) hi āyācane dissati. ‘‘Sādhu, bhanteti kho so bhikkhu bhagavato bhāsitaṃ abhinanditvā anumoditvā’’tiādīsu (ma. ni. 3.86) sampaṭicchane. ‘‘Sādhu, sādhu sāriputtā’’tiādīsu (dī. ni. 3.349) sampahaṃsane.

    ‘‘সাধু ধম্মরুচী রাজা, সাধু পঞ্ঞাণৰা নরো।

    ‘‘Sādhu dhammarucī rājā, sādhu paññāṇavā naro;

    সাধু মিত্তানমদ্দুব্ভো, পাপস্সাকরণং সুখ’’ন্তি॥

    Sādhu mittānamaddubbho, pāpassākaraṇaṃ sukha’’nti.

    আদীসু (জা॰ ২.১৮.১০১) সুন্দরে। ‘‘তেন হি, ব্রাহ্মণ, সাধুকং সুণাহী’’তিআদীসু (অ॰ নি॰ ৫.১৯২) সাধুকসদ্দোযেৰ দল়্হীকম্মে, আণত্তিযন্তিপি ৰুচ্চতি। ইধাপি অযং এত্থেৰ দল়্হীকম্মে চ আণত্তিযঞ্চ অত্থো ৰেদিতব্বো। সুন্দরত্থেপি ৰত্ততি। দল়্হীকরণত্থেন হি দল়্হমিমং ধম্মং সুণাথ সুগ্গহিতং গণ্হন্তা। আণত্তিঅত্থেন মম আণত্তিযা সুণাথ। সুন্দরত্থেন সুন্দরমিমং ভদ্দকং ধম্মং সুণাথাতি এৰং দীপিতং হোতি।

    Ādīsu (jā. 2.18.101) sundare. ‘‘Tena hi, brāhmaṇa, sādhukaṃ suṇāhī’’tiādīsu (a. ni. 5.192) sādhukasaddoyeva daḷhīkamme, āṇattiyantipi vuccati. Idhāpi ayaṃ ettheva daḷhīkamme ca āṇattiyañca attho veditabbo. Sundaratthepi vattati. Daḷhīkaraṇatthena hi daḷhamimaṃ dhammaṃ suṇātha suggahitaṃ gaṇhantā. Āṇattiatthena mama āṇattiyā suṇātha. Sundaratthena sundaramimaṃ bhaddakaṃ dhammaṃ suṇāthāti evaṃ dīpitaṃ hoti.

    মনসি করোথাতি আৰজ্জেথ, সমন্নাহরথাতি অত্থো, অৰিক্খিত্তচিত্তা হুত্ৰা নিসামেথ চিত্তে করোথাতি অধিপ্পাযো। ইদানেত্থ তং সুণাথাতি সোতিন্দ্রিযৰিক্খেপৰারণমেতং। সাধুকং মনসি করোথাতি মনসিকারে দল়্হীকম্মনিযোজনেন মনিন্দ্রিযৰিক্খেপৰারণং। পুরিমঞ্চেত্থ ব্যঞ্জনৰিপল্লাসগ্গাহৰারণং, পচ্ছিমং অত্থৰিপল্লাসগ্গাহৰারণং। পুরিমেন চ ধম্মস্সৰনে নিযোজেতি, পচ্ছিমেন সুতানং ধম্মানং ধারণূপপরিক্খাদীসু। পুরিমেন চ সব্যঞ্জনো অযং ধম্মো, তস্মা সৰনীযোতি দীপেতি। পচ্ছিমেন সাত্থো, তস্মা মনসি কাতব্বোতি। সাধুকপদং ৰা উভযপদেহি যোজেত্ৰা যস্মা অযং ধম্মো ধম্মগম্ভীরো দেসনাগম্ভীরো চ, তস্মা সুণাথ সাধুকং, যস্মা অত্থগম্ভীরো পটিৰেধগম্ভীরো চ, তস্মা সাধুকং মনসি করোথাতি এৰং যোজনা ৰেদিতব্বা।

    Manasikarothāti āvajjetha, samannāharathāti attho, avikkhittacittā hutvā nisāmetha citte karothāti adhippāyo. Idānettha taṃ suṇāthāti sotindriyavikkhepavāraṇametaṃ. Sādhukaṃ manasi karothāti manasikāre daḷhīkammaniyojanena manindriyavikkhepavāraṇaṃ. Purimañcettha byañjanavipallāsaggāhavāraṇaṃ, pacchimaṃ atthavipallāsaggāhavāraṇaṃ. Purimena ca dhammassavane niyojeti, pacchimena sutānaṃ dhammānaṃ dhāraṇūpaparikkhādīsu. Purimena ca sabyañjano ayaṃ dhammo, tasmā savanīyoti dīpeti. Pacchimena sāttho, tasmā manasi kātabboti. Sādhukapadaṃ vā ubhayapadehi yojetvā yasmā ayaṃ dhammo dhammagambhīro desanāgambhīro ca, tasmā suṇātha sādhukaṃ, yasmā atthagambhīro paṭivedhagambhīro ca, tasmā sādhukaṃ manasi karothāti evaṃ yojanā veditabbā.

    ভাসিস্সামীতি দেসেস্সামি। ‘‘তং সুণাথা’’তি এত্থ পটিঞ্ঞাতং দেসনং ন সংখিত্ততোৰ দেসেস্সামি, অপিচ খো ৰিত্থারতোপি নং ভাসিস্সামীতি ৰুত্তং হোতি, সঙ্খেপৰিত্থারৰাচকানি হি এতানি পদানি। যথাহ ৰঙ্গীসত্থেরো –

    Bhāsissāmīti desessāmi. ‘‘Taṃ suṇāthā’’ti ettha paṭiññātaṃ desanaṃ na saṃkhittatova desessāmi, apica kho vitthāratopi naṃ bhāsissāmīti vuttaṃ hoti, saṅkhepavitthāravācakāni hi etāni padāni. Yathāha vaṅgīsatthero –

    ‘‘সংখিত্তেনপি দেসেতি, ৰিত্থারেনপি ভাসতি।

    ‘‘Saṃkhittenapi deseti, vitthārenapi bhāsati;

    সাল়িকাযিৰ নিগ্ঘোসো, পটিভানং উদীরযী’’তি॥ (সং॰ নি॰ ১.২১৪)।

    Sāḷikāyiva nigghoso, paṭibhānaṃ udīrayī’’ti. (saṃ. ni. 1.214);

    এৰং ৰুত্তে উস্সাহজাতা হুত্ৰা এৰং ভন্তেতি খো তে ভিক্খূ ভগৰতো পচ্চস্সোসুং সত্থু ৰচনং সম্পটিচ্ছিংসু, পটিগ্গহেসুন্তি ৰুত্তং হোতি। অথ নেসং ভগৰা এতদৰোচ এতং ইদানি ৰত্তব্বং ইধ ভিক্খৰোতিআদিকং সকলং সুত্তং অৰোচ। তত্থ ইধাতি দেসাপদেসে নিপাতো। স্ৰাযং কত্থচি লোকং উপাদায ৰুচ্চতি। যথাহ – ‘‘ইধ তথাগতো লোকে উপ্পজ্জতী’’তি (দী॰ নি॰ ১.১৯০)। কত্থচি সাসনং। যথাহ – ‘‘ইধেৰ, ভিক্খৰে, সমণো, ইধ দুতিযো সমণো’’তি (অ॰ নি॰ ৪.২৪১)। কত্থচি ওকাসং। যথাহ –

    Evaṃ vutte ussāhajātā hutvā evaṃ bhanteti kho te bhikkhū bhagavato paccassosuṃ satthu vacanaṃ sampaṭicchiṃsu, paṭiggahesunti vuttaṃ hoti. Atha nesaṃ bhagavā etadavoca etaṃ idāni vattabbaṃ idha bhikkhavotiādikaṃ sakalaṃ suttaṃ avoca. Tattha idhāti desāpadese nipāto. Svāyaṃ katthaci lokaṃ upādāya vuccati. Yathāha – ‘‘idha tathāgato loke uppajjatī’’ti (dī. ni. 1.190). Katthaci sāsanaṃ. Yathāha – ‘‘idheva, bhikkhave, samaṇo, idha dutiyo samaṇo’’ti (a. ni. 4.241). Katthaci okāsaṃ. Yathāha –

    ‘‘ইধেৰ তিট্ঠমানস্স, দেৰভূতস্স মে সতো।

    ‘‘Idheva tiṭṭhamānassa, devabhūtassa me sato;

    পুনরাযু চ মে লদ্ধো, এৰং জানাহি মারিসা’’তি॥ (দী॰ নি॰ ২.৩৬৯)।

    Punarāyu ca me laddho, evaṃ jānāhi mārisā’’ti. (dī. ni. 2.369);

    কত্থচি পদপূরণমত্তমেৰ। যথাহ ‘‘ইধাহং – ভিক্খৰে, ভুত্তাৰী অস্সং পৰারিতো’’তি (ম॰ নি॰ ১.৩০)। ইধ পন লোকং উপাদায ৰুত্তোতি ৰেদিতব্বো।

    Katthaci padapūraṇamattameva. Yathāha ‘‘idhāhaṃ – bhikkhave, bhuttāvī assaṃ pavārito’’ti (ma. ni. 1.30). Idha pana lokaṃ upādāya vuttoti veditabbo.

    ২. ভিক্খৰেতি যথাপটিঞ্ঞাতং দেসনং দেসেতুং পুন ভিক্খূ আলপতি। উভযেনাপি, ভিক্খৰে, ইমস্মিং লোকেতি ৰুত্তং হোতি। অস্সুতৰা পুথুজ্জনোতি এত্থ পন আগমাধিগমাভাৰা ঞেয্যো অস্সুতৰা ইতি। যস্স হি খন্ধধাতুআযতনসচ্চপচ্চযাকারসতিপট্ঠানাদীসু উগ্গহপরিপুচ্ছাৰিনিচ্ছযরহিতত্তা মঞ্ঞনাপটিসেধকো নেৰ আগমো, পটিপত্তিযা অধিগন্তব্বস্স অনধিগতত্তা নেৰ অধিগমো অত্থি। সো আগমাধিগমাভাৰা ঞেয্যো অস্সুতৰা ইতি। স্ৰাযং –

    2.Bhikkhaveti yathāpaṭiññātaṃ desanaṃ desetuṃ puna bhikkhū ālapati. Ubhayenāpi, bhikkhave, imasmiṃ loketi vuttaṃ hoti. Assutavā puthujjanoti ettha pana āgamādhigamābhāvā ñeyyo assutavā iti. Yassa hi khandhadhātuāyatanasaccapaccayākārasatipaṭṭhānādīsu uggahaparipucchāvinicchayarahitattā maññanāpaṭisedhako neva āgamo, paṭipattiyā adhigantabbassa anadhigatattā neva adhigamo atthi. So āgamādhigamābhāvā ñeyyo assutavā iti. Svāyaṃ –

    পুথূনং জননাদীহি, কারণেহি পুথুজ্জনো।

    Puthūnaṃ jananādīhi, kāraṇehi puthujjano;

    পুথুজ্জনন্তোগধত্তা, পুথুৰাযং জনো ইতি॥

    Puthujjanantogadhattā, puthuvāyaṃ jano iti.

    সো হি পুথূনং নানপ্পকারানং কিলেসাদীনং জননাদীহি কারণেহি পুথুজ্জনো। যথাহ – পুথু কিলেসে জনেন্তীতি পুথুজ্জনা, পুথু অৰিহতসক্কাযদিট্ঠিকাতি পুথুজ্জনা, পুথু সত্থারানং মুখমুল্লোকিকাতি পুথুজ্জনা, পুথু সব্বগতীহি অৰুট্ঠিতাতি পুথুজ্জনা, পুথু নানাভিসঙ্খারে অভিসঙ্খরোন্তীতি পুথুজ্জনা, পুথু নানাওঘেহি ৰুয্হন্তীতি পুথুজ্জনা, পুথু নানাসন্তাপেহি সন্তপ্পন্তীতি পুথুজ্জনা, পুথু নানাপরিল়াহেহি পরিদয্হন্তীতি পুথুজ্জনা, পুথু পঞ্চসু কামগুণেসু রত্তা গিদ্ধা গধিতা মুচ্ছিতা অজ্ঝোসন্না লগ্গা লগিতা পলিবুদ্ধাতি পুথুজ্জনা, পুথু পঞ্চহি নীৰরণেহি আৰুটা নিৰুতা ওৰুতা পিহিতা পটিচ্ছন্না পটিকুজ্জিতাতি পুথুজ্জনাতি (মহানি॰ ৫১)। পুথূনং ৰা গণনপথমতীতানং অরিযধম্মপরম্মুখানং নীচধম্মসমাচারানং জনানং অন্তোগধত্তাপি পুথুজ্জনা। পুথু ৰা অযং, ৰিসুংযেৰ সঙ্খং গতো, ৰিসংসট্ঠো সীলসুতাদিগুণযুত্তেহি অরিযেহি জনোতিপি পুথুজ্জনো। এৰমেতেহি ‘‘অস্সুতৰা পুথুজ্জনো’’তি দ্ৰীহিপি পদেহি যেতে –

    So hi puthūnaṃ nānappakārānaṃ kilesādīnaṃ jananādīhi kāraṇehi puthujjano. Yathāha – puthu kilese janentīti puthujjanā, puthu avihatasakkāyadiṭṭhikāti puthujjanā, puthu satthārānaṃ mukhamullokikāti puthujjanā, puthu sabbagatīhi avuṭṭhitāti puthujjanā, puthu nānābhisaṅkhāre abhisaṅkharontīti puthujjanā, puthu nānāoghehi vuyhantīti puthujjanā, puthu nānāsantāpehi santappantīti puthujjanā, puthu nānāpariḷāhehi paridayhantīti puthujjanā, puthu pañcasu kāmaguṇesu rattā giddhā gadhitā mucchitā ajjhosannā laggā lagitā palibuddhāti puthujjanā, puthu pañcahi nīvaraṇehi āvuṭā nivutā ovutā pihitā paṭicchannā paṭikujjitāti puthujjanāti (mahāni. 51). Puthūnaṃ vā gaṇanapathamatītānaṃ ariyadhammaparammukhānaṃ nīcadhammasamācārānaṃ janānaṃ antogadhattāpi puthujjanā. Puthu vā ayaṃ, visuṃyeva saṅkhaṃ gato, visaṃsaṭṭho sīlasutādiguṇayuttehi ariyehi janotipi puthujjano. Evametehi ‘‘assutavā puthujjano’’ti dvīhipi padehi yete –

    দুৰে পুথুজ্জনা ৰুত্তা, বুদ্ধেনাদিচ্চবন্ধুনা।

    Duve puthujjanā vuttā, buddhenādiccabandhunā;

    অন্ধো পুথুজ্জনো একো, কল্যাণেকো পুথুজ্জনোতি॥ –

    Andho puthujjano eko, kalyāṇeko puthujjanoti. –

    দ্ৰে পুথুজ্জনা ৰুত্তা। তেসু অন্ধপুথুজ্জনো ৰুত্তো হোতীতি ৰেদিতব্বো। অরিযানং অদস্সাৰীতিআদীসু অরিযাতি আরকত্তা কিলেসেহি, অনযে নইরিযনতো, অযে ইরিযনতো, সদেৰকেন চ লোকেন অরণীযতো বুদ্ধা চ পচ্চেকবুদ্ধা চ বুদ্ধসাৰকা চ ৰুচ্চন্তি, বুদ্ধা এৰ ৰা ইধ অরিযা। যথাহ ‘‘সদেৰকে, ভিক্খৰে, লোকে…পে॰… তথাগতো অরিযোতি ৰুচ্চতী’’তি (সং॰ নি॰ ৫.১০৯৮)। সপ্পুরিসাতি এত্থ পন পচ্চেকবুদ্ধা তথাগতসাৰকা চ ‘‘সপ্পুরিসা’’তি ৰেদিতব্বা। তে হি লোকুত্তরগুণযোগেন সোভনা পুরিসাতি সপ্পুরিসা। সব্বেৰ ৰা এতে দ্ৰেধাপি ৰুত্তা। বুদ্ধাপি হি অরিযা চ সপ্পুরিসা চ, পচ্চেকবুদ্ধা বুদ্ধসাৰকাপি। যথাহ –

    Dve puthujjanā vuttā. Tesu andhaputhujjano vutto hotīti veditabbo. Ariyānaṃ adassāvītiādīsu ariyāti ārakattā kilesehi, anaye nairiyanato, aye iriyanato, sadevakena ca lokena araṇīyato buddhā ca paccekabuddhā ca buddhasāvakā ca vuccanti, buddhā eva vā idha ariyā. Yathāha ‘‘sadevake, bhikkhave, loke…pe… tathāgato ariyoti vuccatī’’ti (saṃ. ni. 5.1098). Sappurisāti ettha pana paccekabuddhā tathāgatasāvakā ca ‘‘sappurisā’’ti veditabbā. Te hi lokuttaraguṇayogena sobhanā purisāti sappurisā. Sabbeva vā ete dvedhāpi vuttā. Buddhāpi hi ariyā ca sappurisā ca, paccekabuddhā buddhasāvakāpi. Yathāha –

    ‘‘যো ৰে কতঞ্ঞূ কতৰেদি ধীরো,

    ‘‘Yo ve kataññū katavedi dhīro,

    কল্যাণমিত্তো দল়্হভত্তি চ হোতি।

    Kalyāṇamitto daḷhabhatti ca hoti;

    দুখিতস্স সক্কচ্চ করোতি কিচ্চং,

    Dukhitassa sakkacca karoti kiccaṃ,

    তথাৰিধং সপ্পুরিসং ৰদন্তী’’তি॥ (জা॰ ২.১৭.৭৮)।

    Tathāvidhaṃ sappurisaṃ vadantī’’ti. (jā. 2.17.78);

    কল্যাণমিত্তো দল়্হভত্তি চ হোতীতি এত্তাৰতা হি বুদ্ধসাৰকো ৰুত্তো, কতঞ্ঞুতাদীহি পচ্চেকবুদ্ধা বুদ্ধাতি। ইদানি যো তেসং অরিযানং অদস্সনসীলো, ন চ দস্সনে সাধুকারী, সো অরিযানং অদস্সাৰীতি ৰেদিতব্বো। সো চ চক্খুনা অদস্সাৰী ঞাণেন অদস্সাৰীতি দুৰিধো, তেসু ঞাণেন অদস্সাৰী ইধ অধিপ্পেতো। মংসচক্খুনা হি দিব্বচক্খুনা ৰা অরিযা দিট্ঠাপি অদিট্ঠাৰ হোন্তি। তেসং চক্খূনং ৰণ্ণমত্তগ্গহণতো, ন অরিযভাৰগোচরতো। সোণসিঙ্গালাদযোপি চ চক্খুনা অরিযে পস্সন্তি। ন চ তে অরিযানং দস্সাৰিনো।

    Kalyāṇamitto daḷhabhatti ca hotīti ettāvatā hi buddhasāvako vutto, kataññutādīhi paccekabuddhā buddhāti. Idāni yo tesaṃ ariyānaṃ adassanasīlo, na ca dassane sādhukārī, so ariyānaṃ adassāvīti veditabbo. So ca cakkhunā adassāvī ñāṇena adassāvīti duvidho, tesu ñāṇena adassāvī idha adhippeto. Maṃsacakkhunā hi dibbacakkhunā vā ariyā diṭṭhāpi adiṭṭhāva honti. Tesaṃ cakkhūnaṃ vaṇṇamattaggahaṇato, na ariyabhāvagocarato. Soṇasiṅgālādayopi ca cakkhunā ariye passanti. Na ca te ariyānaṃ dassāvino.

    তত্রিদং ৰত্থু – চিত্তলপব্বতৰাসিনো কির খীণাসৰত্থেরস্স উপট্ঠাকো ৰুড্ঢপব্বজিতো একদিৰসং থেরেন সদ্ধিং পিণ্ডায চরিত্ৰা থেরস্স পত্তচীৰরং গহেত্ৰা পিট্ঠিতো আগচ্ছন্তো থেরং পুচ্ছি ‘‘অরিযা নাম, ভন্তে, কীদিসা’’তি। থেরো আহ ‘‘ইধেকচ্চো মহল্লকো অরিযানং পত্তচীৰরং গহেত্ৰা ৰত্তপটিপত্তিং কত্ৰা সহচরন্তোপি নেৰ অরিযে জানাতি, এৰং দুজ্জানা, আৰুসো, অরিযা’’তি। এৰং ৰুত্তেপি সো নেৰ অঞ্ঞাসি। তস্মা ন চক্খুনা দস্সনং দস্সনং, ঞাণেন দস্সনমেৰ দস্সনং। যথাহ ‘‘কিং তে, ৰক্কলি, ইমিনা পূতিকাযেন দিট্ঠেন, যো খো, ৰক্কলি , ধম্মং পস্সতি, সো মং পস্সতী’’তি (সং॰ নি॰ ৩.৮৭)। তস্মা চক্খুনা পস্সন্তোপি ঞাণেন অরিযেহি দিট্ঠং অনিচ্চাদিলক্খণং অপস্সন্তো অরিযাধিগতঞ্চ ধম্মং অনধিগচ্ছন্তো অরিযকরধম্মানং অরিযভাৰস্স চ অদিট্ঠত্তা ‘‘অরিযানং অদস্সাৰী’’তি ৰেদিতব্বো।

    Tatridaṃ vatthu – cittalapabbatavāsino kira khīṇāsavattherassa upaṭṭhāko vuḍḍhapabbajito ekadivasaṃ therena saddhiṃ piṇḍāya caritvā therassa pattacīvaraṃ gahetvā piṭṭhito āgacchanto theraṃ pucchi ‘‘ariyā nāma, bhante, kīdisā’’ti. Thero āha ‘‘idhekacco mahallako ariyānaṃ pattacīvaraṃ gahetvā vattapaṭipattiṃ katvā sahacarantopi neva ariye jānāti, evaṃ dujjānā, āvuso, ariyā’’ti. Evaṃ vuttepi so neva aññāsi. Tasmā na cakkhunā dassanaṃ dassanaṃ, ñāṇena dassanameva dassanaṃ. Yathāha ‘‘kiṃ te, vakkali, iminā pūtikāyena diṭṭhena, yo kho, vakkali , dhammaṃ passati, so maṃ passatī’’ti (saṃ. ni. 3.87). Tasmā cakkhunā passantopi ñāṇena ariyehi diṭṭhaṃ aniccādilakkhaṇaṃ apassanto ariyādhigatañca dhammaṃ anadhigacchanto ariyakaradhammānaṃ ariyabhāvassa ca adiṭṭhattā ‘‘ariyānaṃ adassāvī’’ti veditabbo.

    অরিযধম্মস্স অকোৰিদোতি সতিপট্ঠানাদিভেদে অরিযধম্মে অকুসলো। অরিযধম্মে অৰিনীতোতি এত্থ পন –

    Ariyadhammassa akovidoti satipaṭṭhānādibhede ariyadhamme akusalo. Ariyadhamme avinītoti ettha pana –

    দুৰিধো ৰিনযো নাম, একমেকেত্থ পঞ্চধা।

    Duvidho vinayo nāma, ekamekettha pañcadhā;

    অভাৰতো তস্স অযং, ‘‘অৰিনীতো’’তি ৰুচ্চতি॥

    Abhāvato tassa ayaṃ, ‘‘avinīto’’ti vuccati.

    অযঞ্হি সংৰরৰিনযো পহানৰিনযোতি দুৰিধো ৰিনযো। এত্থ চ দুৰিধেপি ৰিনযে একমেকো ৰিনযো পঞ্চধা ভিজ্জতি। সংৰরৰিনযোপি হি সীলসংৰরো সতিসংৰরো ঞাণসংৰরো খন্তিসংৰরো ৰীরিযসংৰরোতি পঞ্চৰিধো। পহানৰিনযোপি তদঙ্গপহানং ৰিক্খম্ভনপহানং সমুচ্ছেদপহানং পটিপ্পস্সদ্ধিপহানং নিস্সরণপহানন্তি পঞ্চৰিধো।

    Ayañhi saṃvaravinayo pahānavinayoti duvidho vinayo. Ettha ca duvidhepi vinaye ekameko vinayo pañcadhā bhijjati. Saṃvaravinayopi hi sīlasaṃvaro satisaṃvaro ñāṇasaṃvaro khantisaṃvaro vīriyasaṃvaroti pañcavidho. Pahānavinayopi tadaṅgapahānaṃ vikkhambhanapahānaṃ samucchedapahānaṃ paṭippassaddhipahānaṃ nissaraṇapahānanti pañcavidho.

    তত্থ ‘‘ইমিনা পাতিমোক্খসংৰরেন উপেতো হোতি সমুপেতো’’তি (ৰিভ॰ ৫১১) অযং সীলসংৰরো। ‘‘রক্খতি চক্খুন্দ্রিযং চক্খুন্দ্রিযে সংৰরং আপজ্জতী’’তি (দী॰ নি॰ ১.২১৩; ম॰ নি॰ ১.২৯৫; সং॰ নি॰ ৪.২৩৯; অ॰ নি॰ ৩.১৬) অযং সতিসংৰরো।

    Tattha ‘‘iminā pātimokkhasaṃvarena upeto hoti samupeto’’ti (vibha. 511) ayaṃ sīlasaṃvaro. ‘‘Rakkhati cakkhundriyaṃ cakkhundriye saṃvaraṃ āpajjatī’’ti (dī. ni. 1.213; ma. ni. 1.295; saṃ. ni. 4.239; a. ni. 3.16) ayaṃ satisaṃvaro.

    ‘‘যানি সোতানি লোকস্মিং, (অজিতাতি ভগৰা)

    ‘‘Yāni sotāni lokasmiṃ, (ajitāti bhagavā)

    সতি তেসং নিৰারণং।

    Sati tesaṃ nivāraṇaṃ;

    সোতানং সংৰরং ব্রূমি,

    Sotānaṃ saṃvaraṃ brūmi,

    পঞ্ঞাযেতে পিধীযরে’’তি॥ (সু॰ নি॰ ১০৪১)।

    Paññāyete pidhīyare’’ti. (su. ni. 1041);

    অযং ঞাণসংৰরো। ‘‘খমো হোতি সীতস্স উণ্হস্সা’’তি (ম॰ নি॰ ১.২৩; অ॰ নি॰ ৪.১১৪; ৬.৫৮) অযং খন্তিসংৰরো। ‘‘উপ্পন্নং কামৰিতক্কং নাধিৰাসেতী’’তি (ম॰ নি॰ ১.২৬; অ॰ নি॰ ৪.১১৪; ৬.৫৮) অযং ৰীরিযসংৰরো। সব্বোপি চাযং সংৰরো যথাসকং সংৰরিতব্বানং ৰিনেতব্বানঞ্চ কাযদুচ্চরিতাদীনং সংৰরণতো ‘‘সংৰরো’’, ৰিনযনতো ‘‘ৰিনযো’’তি ৰুচ্চতি। এৰং তাৰ সংৰরৰিনযো পঞ্চধা ভিজ্জতীতি ৰেদিতব্বো।

    Ayaṃ ñāṇasaṃvaro. ‘‘Khamo hoti sītassa uṇhassā’’ti (ma. ni. 1.23; a. ni. 4.114; 6.58) ayaṃ khantisaṃvaro. ‘‘Uppannaṃ kāmavitakkaṃ nādhivāsetī’’ti (ma. ni. 1.26; a. ni. 4.114; 6.58) ayaṃ vīriyasaṃvaro. Sabbopi cāyaṃ saṃvaro yathāsakaṃ saṃvaritabbānaṃ vinetabbānañca kāyaduccaritādīnaṃ saṃvaraṇato ‘‘saṃvaro’’, vinayanato ‘‘vinayo’’ti vuccati. Evaṃ tāva saṃvaravinayo pañcadhā bhijjatīti veditabbo.

    তথা যং নামরূপপরিচ্ছেদাদীসু ৰিপস্সনাঞাণেসু পটিপক্খভাৰতো দীপালোকেনেৰ তমস্স, তেন তেন ৰিপস্সনাঞাণেন তস্স তস্স অনত্থস্স পহানং। সেয্যথিদং, নামরূপৰৰত্থানেন সক্কাযদিট্ঠিযা, পচ্চযপরিগ্গহেন অহেতুৰিসমহেতুদিট্ঠীনং, তস্সেৰ অপরভাগেন কঙ্খাৰিতরণেন কথংকথীভাৰস্স, কলাপসম্মসনেন ‘‘অহং মমা’’তি গাহস্স, মগ্গামগ্গৰৰত্থানেন অমগ্গে মগ্গসঞ্ঞায, উদযদস্সনেন উচ্ছেদদিট্ঠিযা, ৰযদস্সনেন সস্সতদিট্ঠিযা, ভযদস্সনেন সভযে অভযসঞ্ঞায, আদীনৰদস্সনেন অস্সাদসঞ্ঞায, নিব্বিদানুপস্সনায অভিরতিসঞ্ঞায, মুচ্চিতুকম্যতাঞাণেন অমুচ্চিতুকম্যতায, উপেক্খাঞাণেন অনুপেক্খায, অনুলোমেন ধম্মট্ঠিতিযং নিব্বানে চ পটিলোমভাৰস্স, গোত্রভুনা সঙ্খারনিমিত্তগ্গাহস্স পহানং, এতং তদঙ্গপহানংনাম।

    Tathā yaṃ nāmarūpaparicchedādīsu vipassanāñāṇesu paṭipakkhabhāvato dīpālokeneva tamassa, tena tena vipassanāñāṇena tassa tassa anatthassa pahānaṃ. Seyyathidaṃ, nāmarūpavavatthānena sakkāyadiṭṭhiyā, paccayapariggahena ahetuvisamahetudiṭṭhīnaṃ, tasseva aparabhāgena kaṅkhāvitaraṇena kathaṃkathībhāvassa, kalāpasammasanena ‘‘ahaṃ mamā’’ti gāhassa, maggāmaggavavatthānena amagge maggasaññāya, udayadassanena ucchedadiṭṭhiyā, vayadassanena sassatadiṭṭhiyā, bhayadassanena sabhaye abhayasaññāya, ādīnavadassanena assādasaññāya, nibbidānupassanāya abhiratisaññāya, muccitukamyatāñāṇena amuccitukamyatāya, upekkhāñāṇena anupekkhāya, anulomena dhammaṭṭhitiyaṃ nibbāne ca paṭilomabhāvassa, gotrabhunā saṅkhāranimittaggāhassa pahānaṃ, etaṃ tadaṅgapahānaṃnāma.

    যং পন উপচারপ্পনাভেদেন সমাধিনা পৰত্তিভাৰনিৰারণতো ঘটপ্পহারেনেৰ উদকপিট্ঠে সেৰালস্স তেসং তেসং নীৰরণাদিধম্মানং পহানং, এতং ৰিক্খম্ভনপহানং নাম।

    Yaṃ pana upacārappanābhedena samādhinā pavattibhāvanivāraṇato ghaṭappahāreneva udakapiṭṭhe sevālassa tesaṃ tesaṃ nīvaraṇādidhammānaṃ pahānaṃ, etaṃ vikkhambhanapahānaṃ nāma.

    যং চতুন্নং অরিযমগ্গানং ভাৰিতত্তা তংতংমগ্গৰতো অত্তনো অত্তনো সন্তানে ‘‘দিট্ঠিগতানং পহানাযা’’তিআদিনা (ধ॰ স॰ ২৭৭) নযেন ৰুত্তস্স সমুদযপক্খিকস্স কিলেসগণস্স অচ্চন্তং অপ্পৰত্তিভাৰেন পহানং, ইদং সমুচ্ছেদপহানং নাম। যং পন ফলক্খণে পটিপ্পস্সদ্ধত্তং কিলেসানং, এতং পটিপ্পস্সদ্ধিপহানং নাম। যং সব্বসঙ্খতনিস্সটত্তা পহীনসব্বসঙ্খতং নিব্বানং এতং নিস্সরণপহানং নাম। সব্বম্পি চেতং পহানং যস্মা চাগট্ঠেন পহানং, ৰিনযনট্ঠেন ৰিনযো, তস্মা ‘‘পহানৰিনযো’’তি ৰুচ্চতি। তংতংপহানৰতো ৰা তস্স তস্স ৰিনযস্স সম্ভৰতোপেতং ‘‘পহানৰিনযো’’তি ৰুচ্চতি। এৰং পহানৰিনযোপি পঞ্চধা ভিজ্জতীতি ৰেদিতব্বো।

    Yaṃ catunnaṃ ariyamaggānaṃ bhāvitattā taṃtaṃmaggavato attano attano santāne ‘‘diṭṭhigatānaṃ pahānāyā’’tiādinā (dha. sa. 277) nayena vuttassa samudayapakkhikassa kilesagaṇassa accantaṃ appavattibhāvena pahānaṃ, idaṃ samucchedapahānaṃ nāma. Yaṃ pana phalakkhaṇe paṭippassaddhattaṃ kilesānaṃ, etaṃ paṭippassaddhipahānaṃ nāma. Yaṃ sabbasaṅkhatanissaṭattā pahīnasabbasaṅkhataṃ nibbānaṃ etaṃ nissaraṇapahānaṃ nāma. Sabbampi cetaṃ pahānaṃ yasmā cāgaṭṭhena pahānaṃ, vinayanaṭṭhena vinayo, tasmā ‘‘pahānavinayo’’ti vuccati. Taṃtaṃpahānavato vā tassa tassa vinayassa sambhavatopetaṃ ‘‘pahānavinayo’’ti vuccati. Evaṃ pahānavinayopi pañcadhā bhijjatīti veditabbo.

    এৰমযং সঙ্খেপতো দুৰিধো, ভেদতো চ দসৰিধো ৰিনযো ভিন্নসংৰরত্তা পহাতব্বস্স চ অপ্পহীনত্তা যস্মা এতস্স অস্সুতৰতো পুথুজ্জনস্স নত্থি, তস্মা অভাৰতো তস্স অযং অৰিনীতোতি ৰুচ্চতীতি। এস নযো সপ্পুরিসানং অদস্সাৰী সপ্পুরিসধম্মস্স অকোৰিদো সপ্পুরিসধম্মে অৰিনীতোতি এত্থপি। নিন্নানাকরণঞ্হি এতং অত্থতো। যথাহ ‘‘যেৰ তে অরিযা, তেৰ তে সপ্পুরিসা। যেৰ তে সপ্পুরিসা, তেৰ তে অরিযা। যো এৰ সো অরিযানং ধম্মো, সো এৰ সো সপ্পুরিসানং ধম্মো। যো এৰ সো সপ্পুরিসানং ধম্মো, সো এৰ সো অরিযানং ধম্মো। যেৰ তে অরিযৰিনযা, তেৰ তে সপ্পুরিসৰিনযা। যেৰ তে সপ্পুরিসৰিনযা, তেৰ তে অরিযৰিনযা। অরিযেতি ৰা সপ্পুরিসেতি ৰা, অরিযধম্মেতি ৰা সপ্পুরিসধম্মেতি ৰা, অরিযৰিনযেতি ৰা সপ্পুরিসৰিনযেতি ৰা এসেসে একে একত্থে সমে সমভাগে তজ্জাতে তঞ্ঞেৰা’’তি।

    Evamayaṃ saṅkhepato duvidho, bhedato ca dasavidho vinayo bhinnasaṃvarattā pahātabbassa ca appahīnattā yasmā etassa assutavato puthujjanassa natthi, tasmā abhāvato tassa ayaṃ avinītoti vuccatīti. Esa nayo sappurisānaṃ adassāvī sappurisadhammassa akovido sappurisadhamme avinītoti etthapi. Ninnānākaraṇañhi etaṃ atthato. Yathāha ‘‘yeva te ariyā, teva te sappurisā. Yeva te sappurisā, teva te ariyā. Yo eva so ariyānaṃ dhammo, so eva so sappurisānaṃ dhammo. Yo eva so sappurisānaṃ dhammo, so eva so ariyānaṃ dhammo. Yeva te ariyavinayā, teva te sappurisavinayā. Yeva te sappurisavinayā, teva te ariyavinayā. Ariyeti vā sappuriseti vā, ariyadhammeti vā sappurisadhammeti vā, ariyavinayeti vā sappurisavinayeti vā esese eke ekatthe same samabhāge tajjāte taññevā’’ti.

    ‘‘কস্মা পন ভগৰা সব্বধম্মমূলপরিযাযং ৰো, ভিক্খৰে, দেসেস্সামী’’তি ৰত্ৰা তং অদেসেত্ৰাৰ ‘‘ইধ, ভিক্খৰে, অস্সুতৰা পুথুজ্জনো অরিযানং অদস্সাৰী’’তি এৰং পুথুজ্জনং নিদ্দিসীতি? পুগ্গলাধিট্ঠানায ধম্মদেসনায তমত্থং আৰিকাতুং। ভগৰতো হি ধম্মাধিট্ঠানা ধম্মদেসনা, ধম্মাধিট্ঠানা পুগ্গলদেসনা, পুগ্গলাধিট্ঠানা পুগ্গলদেসনা, পুগ্গলাধিট্ঠানা ধম্মদেসনাতি ধম্মপুগ্গলৰসেনেৰ তাৰ চতুব্বিধা দেসনা।

    ‘‘Kasmā pana bhagavā sabbadhammamūlapariyāyaṃ vo, bhikkhave, desessāmī’’ti vatvā taṃ adesetvāva ‘‘idha, bhikkhave, assutavā puthujjano ariyānaṃ adassāvī’’ti evaṃ puthujjanaṃ niddisīti? Puggalādhiṭṭhānāya dhammadesanāya tamatthaṃ āvikātuṃ. Bhagavato hi dhammādhiṭṭhānā dhammadesanā, dhammādhiṭṭhānā puggaladesanā, puggalādhiṭṭhānā puggaladesanā, puggalādhiṭṭhānā dhammadesanāti dhammapuggalavaseneva tāva catubbidhā desanā.

    তত্থ, ‘‘তিস্সো ইমা, ভিক্খৰে, ৰেদনা। কতমা তিস্সো? সুখা ৰেদনা দুক্খা ৰেদনা অদুক্খমসুখা ৰেদনা। ইমা খো, ভিক্খৰে, তিস্সো ৰেদনা’’তি (সং॰ নি॰ ৪.২৫০) এৰরূপী ধম্মাধিট্ঠানা ধম্মদেসনা ৰেদিতব্বা। ‘‘ছ ধাতুযো অযং পুতিসো ছ ফস্সাযতনো অট্ঠারস মনোপৰিচারো চতুরাধিট্ঠানো’’তি (ম॰ নি॰ ৩.৩৪৩) এৰরূপী ধম্মাধিট্ঠানা পুগ্গলদেসনা। ‘‘তযোমে, ভিক্খৰে, পুগ্গলা সন্তো সংৰিজ্জমানা লোকস্মিং। কতমে তযো? অন্ধো একচক্খু দ্ৰিচক্খু। কতমো চ, ভিক্খৰে, পুগ্গলো অন্ধো’’তি? (অ॰ নি॰ ৩.২৯) এৰরূপী পুগ্গলাধিট্ঠানা পুগ্গলদেসনা। ‘‘কতমঞ্চ, ভিক্খৰে, দুগ্গতিভযং? ইধ, ভিক্খৰে, একচ্চো ইতি পটিসঞ্চিক্খতি, কাযদুচ্চরিতস্স খো পাপকো ৰিপাকো অভিসম্পরাযং…পে॰… সুদ্ধমত্তানং পরিহরতি। ইদং ৰুচ্চতি, ভিক্খৰে, দুগ্গতিভয’’ন্তি (অ॰ নি॰ ৪.১২১) এৰরূপী পুগ্গলাধিট্ঠানা ধম্মদেসনা।

    Tattha, ‘‘tisso imā, bhikkhave, vedanā. Katamā tisso? Sukhā vedanā dukkhā vedanā adukkhamasukhā vedanā. Imā kho, bhikkhave, tisso vedanā’’ti (saṃ. ni. 4.250) evarūpī dhammādhiṭṭhānā dhammadesanā veditabbā. ‘‘Cha dhātuyo ayaṃ putiso cha phassāyatano aṭṭhārasa manopavicāro caturādhiṭṭhāno’’ti (ma. ni. 3.343) evarūpī dhammādhiṭṭhānā puggaladesanā. ‘‘Tayome, bhikkhave, puggalā santo saṃvijjamānā lokasmiṃ. Katame tayo? Andho ekacakkhu dvicakkhu. Katamo ca, bhikkhave, puggalo andho’’ti? (A. ni. 3.29) evarūpī puggalādhiṭṭhānā puggaladesanā. ‘‘Katamañca, bhikkhave, duggatibhayaṃ? Idha, bhikkhave, ekacco iti paṭisañcikkhati, kāyaduccaritassa kho pāpako vipāko abhisamparāyaṃ…pe… suddhamattānaṃ pariharati. Idaṃ vuccati, bhikkhave, duggatibhaya’’nti (a. ni. 4.121) evarūpī puggalādhiṭṭhānā dhammadesanā.

    স্ৰাযং ইধ যস্মা পুথুজ্জনো অপরিঞ্ঞাতৰত্থুকো, অপরিঞ্ঞামূলিকা চ ইধাধিপ্পেতানং সব্বধম্মানং মূলভূতা মঞ্ঞনা হোতি, তস্মা পুথুজ্জনং দস্সেত্ৰা পুগ্গলাধিট্ঠানায দেসনায তমত্থং আৰিকাতুং, ‘‘ইধ, ভিক্খৰে, অস্সুতৰা পুথুজ্জনো অরিযানং অদস্সাৰী’’তি এৰং পুথুজ্জনং নিদ্দিসীতি ৰেদিতব্বো।

    Svāyaṃ idha yasmā puthujjano apariññātavatthuko, apariññāmūlikā ca idhādhippetānaṃ sabbadhammānaṃ mūlabhūtā maññanā hoti, tasmā puthujjanaṃ dassetvā puggalādhiṭṭhānāya desanāya tamatthaṃ āvikātuṃ, ‘‘idha, bhikkhave, assutavā puthujjano ariyānaṃ adassāvī’’ti evaṃ puthujjanaṃ niddisīti veditabbo.

    সুত্তনিক্খেপৰণ্ণনা নিট্ঠিতা।

    Suttanikkhepavaṇṇanā niṭṭhitā.

    পথৰীৰারৰণ্ণনা

    Pathavīvāravaṇṇanā

    এৰং পুথুজ্জনং নিদ্দিসিত্ৰা ইদানি তস্স পথৰীআদীসু ৰত্থূসু সব্বসক্কাযধম্মজনিতং মঞ্ঞনং দস্সেন্তো, পথৰিং পথৰিতোতিআদিমাহ। তত্থ লক্খণপথৰী সসম্ভারপথৰী আরম্মণপথৰী সম্মুতিপথৰীতি চতুব্বিধা পথৰী। তাসু ‘‘কতমা চ, আৰুসো, অজ্ঝত্তিকা পথৰীধাতু? যং অজ্ঝত্তং পচ্চত্তং কক্খল়ং খরিগত’’ন্তিআদীসু (ৰিভ॰ ১৭৩) ৰুত্তা লক্খণপথৰী। ‘‘পথৰিং খণেয্য ৰা খণাপেয্য ৰা’’তিআদীসু (পাচি॰ ৮৫) ৰুত্তা সসম্ভারপথৰী। যে চ কেসাদযো ৰীসতি কোট্ঠাসা, অযোলোহাদযো চ বাহিরা। সা হি ৰণ্ণাদীহি সম্ভারেহি সদ্ধিং পথৰীতি সসম্ভারপথৰী। ‘‘পথৰীকসিণমেকো সঞ্জানাতী’’তিআদীসু (দী॰ নি॰ ৩.৩৬০) আগতা পন আরম্মণপথৰী, নিমিত্তপথৰীতিপি ৰুচ্চতি। পথৰীকসিণজ্ঝানলাভী দেৰলোকে নিব্বত্তো আগমনৰসেন পথৰীদেৰতাতি নামং লভতি। অযং সম্মুতিপথৰীতি ৰেদিতব্বা। সা সব্বাপি ইধ লব্ভতি। তাসু যংকঞ্চি পথৰিং অযং পুথুজ্জনো পথৰিতো সঞ্জানাতি, পথৰীতি সঞ্জানাতি, পথৰীভাগেন সঞ্জানাতি, লোকৰোহারং গহেত্ৰা সঞ্ঞাৰিপল্লাসেন সঞ্জানাতি পথৰীতি। এৰং পথৰীভাগং অমুঞ্চন্তোযেৰ ৰা এতং ‘‘সত্তোতি ৰা সত্তস্সা’’তি ৰা আদিনা নযেন সঞ্জানাতি। কস্মা এৰং সঞ্জানাতীতি ন ৰত্তব্বং। উম্মত্তকো ৰিয হি পুথুজ্জনো। সো যংকিঞ্চি যেন কেনচি আকারেন গণ্হাতি। অরিযানং অদস্সাৰিতাদিভেদমেৰ ৰা এত্থ কারণং। যং ৰা পরতো ‘‘অপরিঞ্ঞাতং তস্সা’’তি ৰদন্তেন ভগৰতাৰ ৰুত্তং।

    Evaṃ puthujjanaṃ niddisitvā idāni tassa pathavīādīsu vatthūsu sabbasakkāyadhammajanitaṃ maññanaṃ dassento, pathaviṃ pathavitotiādimāha. Tattha lakkhaṇapathavī sasambhārapathavī ārammaṇapathavī sammutipathavīti catubbidhā pathavī. Tāsu ‘‘katamā ca, āvuso, ajjhattikā pathavīdhātu? Yaṃ ajjhattaṃ paccattaṃ kakkhaḷaṃ kharigata’’ntiādīsu (vibha. 173) vuttā lakkhaṇapathavī. ‘‘Pathaviṃ khaṇeyya vā khaṇāpeyya vā’’tiādīsu (pāci. 85) vuttā sasambhārapathavī. Ye ca kesādayo vīsati koṭṭhāsā, ayolohādayo ca bāhirā. Sā hi vaṇṇādīhi sambhārehi saddhiṃ pathavīti sasambhārapathavī. ‘‘Pathavīkasiṇameko sañjānātī’’tiādīsu (dī. ni. 3.360) āgatā pana ārammaṇapathavī, nimittapathavītipi vuccati. Pathavīkasiṇajjhānalābhī devaloke nibbatto āgamanavasena pathavīdevatāti nāmaṃ labhati. Ayaṃ sammutipathavīti veditabbā. Sā sabbāpi idha labbhati. Tāsu yaṃkañci pathaviṃ ayaṃ puthujjano pathavito sañjānāti, pathavīti sañjānāti, pathavībhāgena sañjānāti, lokavohāraṃ gahetvā saññāvipallāsena sañjānāti pathavīti. Evaṃ pathavībhāgaṃ amuñcantoyeva vā etaṃ ‘‘sattoti vā sattassā’’ti vā ādinā nayena sañjānāti. Kasmā evaṃ sañjānātīti na vattabbaṃ. Ummattako viya hi puthujjano. So yaṃkiñci yena kenaci ākārena gaṇhāti. Ariyānaṃ adassāvitādibhedameva vā ettha kāraṇaṃ. Yaṃ vā parato ‘‘apariññātaṃ tassā’’ti vadantena bhagavatāva vuttaṃ.

    পথৰিং পথৰিতো সঞ্ঞত্ৰাতি সো তং পথৰিং এৰং ৰিপরীতসঞ্ঞায সঞ্জানিত্ৰা, ‘‘সঞ্ঞানিদানা হি পপঞ্চসঙ্খা’’তি (সু॰ নি॰ ৮৮০) ৰচনতো অপরভাগে থামপত্তেহি তণ্হামানদিট্ঠিপপঞ্চেহি ইধ মঞ্ঞনানামেন ৰুত্তেহি মঞ্ঞতি কপ্পেতি ৰিকপ্পেতি, নানপ্পকারতো অঞ্ঞথা গণ্হাতি। তেন ৰুত্তং ‘‘পথৰিং মঞ্ঞতী’’তি। এৰং মঞ্ঞতো চস্স তা মঞ্ঞনা ওল়ারিকনযেন দস্সেতুং ‘‘যা অযং কেসা লোমা’’তিআদিনা নযেন ৰীসতিভেদা অজ্ঝত্তিকা পথৰী ৰুত্তা। যা চাযং ৰিভঙ্গে ‘‘তত্থ কতমা বাহিরা পথৰীধাতু? যং বাহিরং কক্খল়ং খরিগতং কক্খল়ত্তং কক্খল়ভাৰো বহিদ্ধা অনুপাদিন্নং। সেয্যথিদং, অযো লোহং তিপু সীসং সজ্ঝং মুত্তা মণি ৰেল়ুরিযং সঙ্খো সিলা পৰাল়ং রজতং জাতরূপং লোহিতঙ্কো মসারগল্লং তিণং কট্ঠং সক্খরা কঠলং ভূমি পাসাণো পব্বতো’’তি (ৰিভ॰ ১৭৩) এৰং বাহিরা পথৰী ৰুত্তা। যা চ অজ্ঝত্তারম্মণত্তিকে নিমিত্তপথৰী, তং গহেত্ৰা অযমত্থযোজনা ৰুচ্চতি।

    Pathaviṃ pathavito saññatvāti so taṃ pathaviṃ evaṃ viparītasaññāya sañjānitvā, ‘‘saññānidānā hi papañcasaṅkhā’’ti (su. ni. 880) vacanato aparabhāge thāmapattehi taṇhāmānadiṭṭhipapañcehi idha maññanānāmena vuttehi maññati kappeti vikappeti, nānappakārato aññathā gaṇhāti. Tena vuttaṃ ‘‘pathaviṃ maññatī’’ti. Evaṃ maññato cassa tā maññanā oḷārikanayena dassetuṃ ‘‘yā ayaṃ kesā lomā’’tiādinā nayena vīsatibhedā ajjhattikā pathavī vuttā. Yā cāyaṃ vibhaṅge ‘‘tattha katamā bāhirā pathavīdhātu? Yaṃ bāhiraṃ kakkhaḷaṃ kharigataṃ kakkhaḷattaṃ kakkhaḷabhāvo bahiddhā anupādinnaṃ. Seyyathidaṃ, ayo lohaṃ tipu sīsaṃ sajjhaṃ muttā maṇi veḷuriyaṃ saṅkho silā pavāḷaṃ rajataṃ jātarūpaṃ lohitaṅko masāragallaṃ tiṇaṃ kaṭṭhaṃ sakkharā kaṭhalaṃ bhūmi pāsāṇo pabbato’’ti (vibha. 173) evaṃ bāhirā pathavī vuttā. Yā ca ajjhattārammaṇattike nimittapathavī, taṃ gahetvā ayamatthayojanā vuccati.

    পথৰিং মঞ্ঞতীতি তীহি মঞ্ঞনাহি অহং পথৰীতি মঞ্ঞতি, মম পথৰীতি মঞ্ঞতি, পরো পথৰীতি মঞ্ঞতি, পরস্স পথৰীতি মঞ্ঞতি, অথ ৰা অজ্ঝত্তিকং পথৰিং তণ্হামঞ্ঞনায মঞ্ঞতি, মানমঞ্ঞনায মঞ্ঞতি, দিট্ঠিমঞ্ঞনায মঞ্ঞতি। কথং? অযঞ্হি কেসাদীসু ছন্দরাগং জনেতি কেসে অস্সাদেতি অভিনন্দতি অভিৰদতি অজ্ঝোসায তিট্ঠতি। লোমে, নখে, দন্তে, তচং, অঞ্ঞতরং ৰা পন রজ্জনীযৰত্থুং। এৰং অজ্ঝত্তিকং পথৰিং তণ্হামঞ্ঞনায মঞ্ঞতি। ইতি মে কেসা সিযুং অনাগতমদ্ধানং। ইতি লোমাতিআদিনা ৰা পন নযেন তত্থ নন্দিং সমন্নানেতি। ‘‘ইমিনাহং সীলেন ৰা…পে॰… ব্রহ্মচরিযেন ৰা এৰং সিনিদ্ধমুদুসুখুমনীলকেসো ভৰিস্সামী’’তিআদিনা ৰা পন নযেন অপ্পটিলদ্ধানং পটিলাভায চিত্তং পণিদহতি। এৰম্পি অজ্ঝত্তিকং পথৰিং তণ্হামঞ্ঞনায মঞ্ঞতি।

    Pathaviṃ maññatīti tīhi maññanāhi ahaṃ pathavīti maññati, mama pathavīti maññati, paro pathavīti maññati, parassa pathavīti maññati, atha vā ajjhattikaṃ pathaviṃ taṇhāmaññanāya maññati, mānamaññanāya maññati, diṭṭhimaññanāya maññati. Kathaṃ? Ayañhi kesādīsu chandarāgaṃ janeti kese assādeti abhinandati abhivadati ajjhosāya tiṭṭhati. Lome, nakhe, dante, tacaṃ, aññataraṃ vā pana rajjanīyavatthuṃ. Evaṃ ajjhattikaṃ pathaviṃ taṇhāmaññanāya maññati. Iti me kesā siyuṃ anāgatamaddhānaṃ. Iti lomātiādinā vā pana nayena tattha nandiṃ samannāneti. ‘‘Imināhaṃ sīlena vā…pe… brahmacariyena vā evaṃ siniddhamudusukhumanīlakeso bhavissāmī’’tiādinā vā pana nayena appaṭiladdhānaṃ paṭilābhāya cittaṃ paṇidahati. Evampi ajjhattikaṃ pathaviṃ taṇhāmaññanāya maññati.

    তথা অত্তনো কেসাদীনং সম্পত্তিং ৰা ৰিপত্তিং ৰা নিস্সায মানং জনেতি, ‘‘সেয্যোহমস্মীতি ৰা সদিসোহমস্মীতি ৰা হীনোহমস্মীতি ৰা’’তি। এৰং অজ্ঝত্তিকং পথৰিং মানমঞ্ঞনায মঞ্ঞতি। ‘‘তং জীৰং তং সরীর’’ন্তি (ম॰ নি॰ ২.১৮৭) আগতনযেন পন কেসং ‘‘জীৰো’’তি অভিনিৰিসতি। এস নযো লোমাদীসু। এৰং অজ্ঝত্তিকং পথৰিং দিট্ঠিমঞ্ঞনায মঞ্ঞতি।

    Tathā attano kesādīnaṃ sampattiṃ vā vipattiṃ vā nissāya mānaṃ janeti, ‘‘seyyohamasmīti vā sadisohamasmīti vā hīnohamasmīti vā’’ti. Evaṃ ajjhattikaṃ pathaviṃ mānamaññanāya maññati. ‘‘Taṃ jīvaṃ taṃ sarīra’’nti (ma. ni. 2.187) āgatanayena pana kesaṃ ‘‘jīvo’’ti abhinivisati. Esa nayo lomādīsu. Evaṃ ajjhattikaṃ pathaviṃ diṭṭhimaññanāya maññati.

    অথ ৰা ‘‘যা চেৰ খো পনাৰুসো, অজ্ঝত্তিকা পথৰীধাতু, যা চ বাহিরা পথৰীধাতু, পথৰীধাতুরেৰেসা , তং নেতং মমা’’তি (ম॰ নি॰ ১.৩০২) ইমিস্সা পৰত্তিযা পচ্চনীকনযেন কেসাদিভেদং পথৰিং এতং মম এসোহমস্মি এসো মে অত্তাতি অভিনিৰিসতি। এৰম্পি অজ্ঝত্তিকং পথৰিং দিট্ঠিমঞ্ঞনায মঞ্ঞতি। এৰং তাৰ অজ্ঝত্তিকং পথৰিং তীহি মঞ্ঞনাহি মঞ্ঞতি।

    Atha vā ‘‘yā ceva kho panāvuso, ajjhattikā pathavīdhātu, yā ca bāhirā pathavīdhātu, pathavīdhāturevesā , taṃ netaṃ mamā’’ti (ma. ni. 1.302) imissā pavattiyā paccanīkanayena kesādibhedaṃ pathaviṃ etaṃ mama esohamasmi eso me attāti abhinivisati. Evampi ajjhattikaṃ pathaviṃ diṭṭhimaññanāya maññati. Evaṃ tāva ajjhattikaṃ pathaviṃ tīhi maññanāhi maññati.

    যথা চ অজ্ঝত্তিকং এৰং বাহিরম্পি। কথং? ‘‘অযঞ্হি অযলোহাদীসু ছন্দরাগং জনেতি। অযলোহাদীনি অস্সাদেতি অভিনন্দতি অভিৰদতি অজ্ঝোসায তিট্ঠতি। মম অযো মম লোহন্তিআদিনা নযেন অযাদীনি মমাযতি রক্খতি গোপযতি, এৰং বাহিরং পথৰিং তণ্হামঞ্ঞনায মঞ্ঞতি। ইতি মে অযলোহাদযো সিযুং অনাগতমদ্ধানন্তি ৰা পনেত্থ নন্দিং সমন্নানেতি, ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা এৰং সম্পন্নঅযলোহাদিউপকরণো ভৰিস্সামী’’তি অপ্পটিলদ্ধস্স পটিলাভায চিত্তং পণিদহতি। এৰম্পি বাহিরং পথৰিং তণ্হামঞ্ঞনায মঞ্ঞতি।

    Yathā ca ajjhattikaṃ evaṃ bāhirampi. Kathaṃ? ‘‘Ayañhi ayalohādīsu chandarāgaṃ janeti. Ayalohādīni assādeti abhinandati abhivadati ajjhosāya tiṭṭhati. Mama ayo mama lohantiādinā nayena ayādīni mamāyati rakkhati gopayati, evaṃ bāhiraṃ pathaviṃ taṇhāmaññanāya maññati. Iti me ayalohādayo siyuṃ anāgatamaddhānanti vā panettha nandiṃ samannāneti, imināhaṃ sīlena vā vatena vā tapena vā brahmacariyena vā evaṃ sampannaayalohādiupakaraṇo bhavissāmī’’ti appaṭiladdhassa paṭilābhāya cittaṃ paṇidahati. Evampi bāhiraṃ pathaviṃ taṇhāmaññanāya maññati.

    তথা অত্তনো অযলোহাদীনং সম্পত্তিং ৰা ৰিপত্তিং ৰা নিস্সায মানং জনেতি ‘‘ইমিনাহং সেয্যোস্মীতি ৰা, সদিসোস্মীতি ৰা হীনোস্মীতি ৰা’’তি (ৰিভ॰ ৮৩২) এৰং বাহিরং পথৰিং মানমঞ্ঞনায মঞ্ঞতি। অযে জীৰসঞ্ঞী হুত্ৰা পন অযং ‘‘জীৰো’’তি অভিনিৰিসতি। এস নযো লোহাদীসু। এৰং বাহিরং পথৰিং দিট্ঠিমঞ্ঞনায মঞ্ঞতি।

    Tathā attano ayalohādīnaṃ sampattiṃ vā vipattiṃ vā nissāya mānaṃ janeti ‘‘imināhaṃ seyyosmīti vā, sadisosmīti vā hīnosmīti vā’’ti (vibha. 832) evaṃ bāhiraṃ pathaviṃ mānamaññanāya maññati. Aye jīvasaññī hutvā pana ayaṃ ‘‘jīvo’’ti abhinivisati. Esa nayo lohādīsu. Evaṃ bāhiraṃ pathaviṃ diṭṭhimaññanāya maññati.

    অথ ৰা ‘‘ইধেকচ্চো পথৰীকসিণং অত্ততো সমনুপস্সতি। যং পথৰীকসিণং, সো অহং। যো অহং, তং পথৰীকসিণন্তি পথৰীকসিণঞ্চ অত্তঞ্চ অদ্ৰযং সমনুপস্সতী’’তি (পটি॰ ম॰ ১.১৩১) পটিসম্ভিদাযং ৰুত্তনযেনেৰ নিমিত্তপথৰিং ‘‘অত্তা’’তি অভিনিৰিসতি। এৰং বাহিরং পথৰিং দিট্ঠিমঞ্ঞনায মঞ্ঞতি। এৰম্পি বাহিরং পথৰিং তীহি মঞ্ঞনাহি মঞ্ঞতি। এৰং তাৰ ‘‘পথৰিং মঞ্ঞতী’’তি এত্থ তিস্সোপি মঞ্ঞনা ৰেদিতব্বা। ইতো পরং সঙ্খেপেনেৰ কথযিস্সাম।

    Atha vā ‘‘idhekacco pathavīkasiṇaṃ attato samanupassati. Yaṃ pathavīkasiṇaṃ, so ahaṃ. Yo ahaṃ, taṃ pathavīkasiṇanti pathavīkasiṇañca attañca advayaṃ samanupassatī’’ti (paṭi. ma. 1.131) paṭisambhidāyaṃ vuttanayeneva nimittapathaviṃ ‘‘attā’’ti abhinivisati. Evaṃ bāhiraṃ pathaviṃ diṭṭhimaññanāya maññati. Evampi bāhiraṃ pathaviṃ tīhi maññanāhi maññati. Evaṃ tāva ‘‘pathaviṃ maññatī’’ti ettha tissopi maññanā veditabbā. Ito paraṃ saṅkhepeneva kathayissāma.

    পথৰিযা মঞ্ঞতীতি এত্থ পথৰিযাতি ভুম্মৰচনমেতং। তস্মা অহং পথৰিযাতি মঞ্ঞতি, ময্হং কিঞ্চনং পলিবোধো পথৰিযাতি মঞ্ঞতি, পরো পথৰিযাতি মঞ্ঞতি, পরস্স কিঞ্চনং পলিবোধো পথৰিযাতি মঞ্ঞতীতি অযমেত্থ অত্থো।

    Pathaviyāmaññatīti ettha pathaviyāti bhummavacanametaṃ. Tasmā ahaṃ pathaviyāti maññati, mayhaṃ kiñcanaṃ palibodho pathaviyāti maññati, paro pathaviyāti maññati, parassa kiñcanaṃ palibodho pathaviyāti maññatīti ayamettha attho.

    অথ ৰা য্ৰাযং ‘‘কথং রূপস্মিং অত্তানং সমনুপস্সতি? ইধেকচ্চো ৰেদনং… সঞ্ঞং… সঙ্খারে… ৰিঞ্ঞাণং অত্ততো সমনুপস্সতি, তস্স এৰং হোতি, অযং খো মে অত্তা, সো খো পন মে অত্তা ইমস্মিং রূপেতি এৰং রূপস্মিং ৰা অত্তানং সমনুপস্সতী’’তি (পটি॰ ম॰ ১.১৩১) এতস্স অত্থনযো ৰুত্তো, এতেনেৰ নযেন ৰেদনাদিধম্মে অত্ততো গহেত্ৰা ততো অজ্ঝত্তিকবাহিরাসু পথৰীসু যংকিঞ্চি পথৰিং তস্সোকাসভাৰেন পরিকপ্পেত্ৰা সো খো পন মে অযং অত্তা ইমিস্সা পথৰিযাতি মঞ্ঞন্তো পথৰিযা মঞ্ঞতি, অযমস্স দিট্ঠিমঞ্ঞনা। তস্মিংযেৰ পনস্স অত্তনি সিনেহং তব্বত্থুকঞ্চ মানং উপ্পাদযতো তণ্হামানমঞ্ঞনাপি ৰেদিতব্বা। যদা পন তেনেৰ নযেন সো খো পনস্স অত্তা পথৰিযাতি মঞ্ঞতি, তদা দিট্ঠিমঞ্ঞনা এৰ যুজ্জতি। ইতরাযোপি পন ইচ্ছন্তি।

    Atha vā yvāyaṃ ‘‘kathaṃ rūpasmiṃ attānaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati, tassa evaṃ hoti, ayaṃ kho me attā, so kho pana me attā imasmiṃ rūpeti evaṃ rūpasmiṃ vā attānaṃ samanupassatī’’ti (paṭi. ma. 1.131) etassa atthanayo vutto, eteneva nayena vedanādidhamme attato gahetvā tato ajjhattikabāhirāsu pathavīsu yaṃkiñci pathaviṃ tassokāsabhāvena parikappetvā so kho pana me ayaṃ attā imissā pathaviyāti maññanto pathaviyā maññati, ayamassa diṭṭhimaññanā. Tasmiṃyeva panassa attani sinehaṃ tabbatthukañca mānaṃ uppādayato taṇhāmānamaññanāpi veditabbā. Yadā pana teneva nayena so kho panassa attā pathaviyāti maññati, tadā diṭṭhimaññanā eva yujjati. Itarāyopi pana icchanti.

    পথৰিতো মঞ্ঞতীতি এত্থ পন পথৰিতোতি নিস্সক্কৰচনং। তস্মা সউপকরণস্স অত্তনো ৰা পরস্স ৰা যথাৰুত্তপ্পভেদতো পথৰিতো উপ্পত্তিং ৰা নিগ্গমনং ৰা পথৰিতো ৰা অঞ্ঞো অত্তাতি মঞ্ঞমানো পথৰিতো মঞ্ঞতীতি ৰেদিতব্বো, অযমস্স দিট্ঠিমঞ্ঞনা। তস্মিংযেৰ পনস্স দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনাপি ৰেদিতব্বা। অপরে আহু পথৰীকসিণং পরিত্তং ভাৰেত্ৰা ততো অঞ্ঞং অপ্পমাণং অত্তানং গহেত্ৰা পথৰিতো বহিদ্ধাপি মে অত্তাতি মঞ্ঞমানো পথৰিতো মঞ্ঞতীতি।

    Pathavito maññatīti ettha pana pathavitoti nissakkavacanaṃ. Tasmā saupakaraṇassa attano vā parassa vā yathāvuttappabhedato pathavito uppattiṃ vā niggamanaṃ vā pathavito vā añño attāti maññamāno pathavito maññatīti veditabbo, ayamassa diṭṭhimaññanā. Tasmiṃyeva panassa diṭṭhimaññanāya maññite vatthusmiṃ sinehaṃ mānañca uppādayato taṇhāmānamaññanāpi veditabbā. Apare āhu pathavīkasiṇaṃ parittaṃ bhāvetvā tato aññaṃ appamāṇaṃ attānaṃ gahetvā pathavito bahiddhāpi me attāti maññamāno pathavito maññatīti.

    পথৰিং মেতি মঞ্ঞতীতি এত্থ পন কেৰলঞ্হি মহাপথৰিং তণ্হাৰসেন মমাযতীতি ইমিনা নযেন পৰত্তা একা তণ্হামঞ্ঞনা এৰ লব্ভতীতি ৰেদিতব্বা। সা চাযং মম কেসা, মম লোমা, মম অযো, মম লোহন্তি এৰং যথাৰুত্তপ্পভেদায সব্বাযপি অজ্ঝত্তিকবাহিরায পথৰিযা যোজেতব্বাতি।

    Pathaviṃ meti maññatīti ettha pana kevalañhi mahāpathaviṃ taṇhāvasena mamāyatīti iminā nayena pavattā ekā taṇhāmaññanā eva labbhatīti veditabbā. Sā cāyaṃ mama kesā, mama lomā, mama ayo, mama lohanti evaṃ yathāvuttappabhedāya sabbāyapi ajjhattikabāhirāya pathaviyā yojetabbāti.

    পথৰিং অভিনন্দতীতি ৰুত্তপ্পকারমেৰ পথৰিং তণ্হাদীহি অভিনন্দতি, অস্সাদেতি, পরামসতি চাতি ৰুত্তং হোতি। ‘‘পথৰিং মঞ্ঞতী’’তি এতেনেৰ এতস্মিং অত্থে সিদ্ধে কস্মা এতং ৰুত্তন্তি চে। অৰিচারিতমেতং পোরাণেহি। অযং পন অত্তনো মতি, দেসনাৰিলাসতো ৰা আদীনৰদস্সনতো ৰা। যস্সা হি ধম্মধাতুযা সুপ্পটিৰিদ্ধত্তা নানানযৰিচিত্রদেসনাৰিলাসসম্পন্নো, অযং সা ভগৰতা সুপ্পটিৰিদ্ধা। তস্মা পুব্বে মঞ্ঞনাৰসেন কিলেসুপ্পত্তিং দস্সেত্ৰা ইদানি অভিনন্দনাৰসেন দস্সেন্তো দেসনাৰিলাসতো ৰা ইদমাহ । যো ৰা পথৰিং মঞ্ঞতি, পথৰিযা মঞ্ঞতি, পথৰিতো মঞ্ঞতি, পথৰিং মেতি মঞ্ঞতি, সো যস্মা ন সক্কোতি পথৰীনিস্সিতং তণ্হং ৰা দিট্ঠিং ৰা পহাতুং, তস্মা পথৰিং অভিনন্দতিযেৰ। যো চ পথৰিং অভিনন্দতি, দুক্খং সো অভিনন্দতি, দুক্খঞ্চ আদীনৰোতি আদীনৰদস্সনতোপি ইদমাহ। ৰুত্তঞ্চেতং ভগৰতা ‘‘যো, ভিক্খৰে, পথৰীধাতুং অভিনন্দতি, দুক্খং সো অভিনন্দতি, যো দুক্খং অভিনন্দতি, অপরিমুত্তো সো দুক্খস্মাতি ৰদামী’’তি।

    Pathaviṃabhinandatīti vuttappakārameva pathaviṃ taṇhādīhi abhinandati, assādeti, parāmasati cāti vuttaṃ hoti. ‘‘Pathaviṃ maññatī’’ti eteneva etasmiṃ atthe siddhe kasmā etaṃ vuttanti ce. Avicāritametaṃ porāṇehi. Ayaṃ pana attano mati, desanāvilāsato vā ādīnavadassanato vā. Yassā hi dhammadhātuyā suppaṭividdhattā nānānayavicitradesanāvilāsasampanno, ayaṃ sā bhagavatā suppaṭividdhā. Tasmā pubbe maññanāvasena kilesuppattiṃ dassetvā idāni abhinandanāvasena dassento desanāvilāsato vā idamāha . Yo vā pathaviṃ maññati, pathaviyā maññati, pathavito maññati, pathaviṃ meti maññati, so yasmā na sakkoti pathavīnissitaṃ taṇhaṃ vā diṭṭhiṃ vā pahātuṃ, tasmā pathaviṃ abhinandatiyeva. Yo ca pathaviṃ abhinandati, dukkhaṃ so abhinandati, dukkhañca ādīnavoti ādīnavadassanatopi idamāha. Vuttañcetaṃ bhagavatā ‘‘yo, bhikkhave, pathavīdhātuṃ abhinandati, dukkhaṃ so abhinandati, yo dukkhaṃ abhinandati, aparimutto so dukkhasmāti vadāmī’’ti.

    এৰং পথৰীৰত্থুকং মঞ্ঞনং অভিনন্দনঞ্চ ৰত্ৰা ইদানি যেন কারণেন সো মঞ্ঞতি, অভিনন্দতি চ, তং কারণং আৰিকরোন্তো আহ তং কিস্স হেতু, অপরিঞ্ঞাতং তস্সাতি ৰদামীতি। তস্সত্থো, সো পুথুজ্জনো তং পথৰিং কিস্স হেতু মঞ্ঞতি, কেন কারণেন মঞ্ঞতি, অভিনন্দতীতি চে। অপরিঞ্ঞাতং তস্সাতি ৰদামীতি, যস্মা তং ৰত্থু তস্স অপরিঞ্ঞাতং, তস্মাতি ৰুত্তং হোতি। যো হি পথৰিং পরিজানাতি, সো তীহি পরিঞ্ঞাহি পরিজানাতি ঞাতপরিঞ্ঞায তীরণপরিঞ্ঞায পহানপরিঞ্ঞাযাতি।

    Evaṃ pathavīvatthukaṃ maññanaṃ abhinandanañca vatvā idāni yena kāraṇena so maññati, abhinandati ca, taṃ kāraṇaṃ āvikaronto āha taṃ kissa hetu, apariññātaṃ tassāti vadāmīti. Tassattho, so puthujjano taṃ pathaviṃ kissa hetu maññati, kena kāraṇena maññati, abhinandatīti ce. Apariññātaṃ tassāti vadāmīti, yasmā taṃ vatthu tassa apariññātaṃ, tasmāti vuttaṃ hoti. Yo hi pathaviṃ parijānāti, so tīhi pariññāhi parijānāti ñātapariññāya tīraṇapariññāya pahānapariññāyāti.

    তত্থ কতমা ঞাতপরিঞ্ঞা। পথৰীধাতুং পরিজানাতি, অযং পথৰীধাতু অজ্ঝত্তিকা, অযং বাহিরা, ইদমস্সা লক্খণং, ইমানি রসপচ্চুপট্ঠানপদট্ঠানানীতি, অযং ঞাতপরিঞ্ঞা। কতমা তীরণপরিঞ্ঞা? এৰং ঞাতং কত্ৰা পথৰীধাতুং তীরেতি অনিচ্চতো দুক্খতো রোগতোতি দ্ৰাচত্তালীসায আকারেহি, অযং তীরণপরিঞ্ঞা। কতমা পহানপরিঞ্ঞা? এৰং তীরযিত্ৰা অগ্গমগ্গেন পথৰীধাতুযা ছন্দরাগং পজহতি, অযং পহানপরিঞ্ঞা।

    Tattha katamā ñātapariññā. Pathavīdhātuṃ parijānāti, ayaṃ pathavīdhātu ajjhattikā, ayaṃ bāhirā, idamassā lakkhaṇaṃ, imāni rasapaccupaṭṭhānapadaṭṭhānānīti, ayaṃ ñātapariññā. Katamā tīraṇapariññā? Evaṃ ñātaṃ katvā pathavīdhātuṃ tīreti aniccato dukkhato rogatoti dvācattālīsāya ākārehi, ayaṃ tīraṇapariññā. Katamā pahānapariññā? Evaṃ tīrayitvā aggamaggena pathavīdhātuyā chandarāgaṃ pajahati, ayaṃ pahānapariññā.

    নামরূপৰৰত্থানং ৰা ঞাতপরিঞ্ঞা। কলাপসম্মসনাদিঅনুলোমপরিযোসানা তীরণপরিঞ্ঞা। অরিযমগ্গে ঞাণং পহানপরিঞ্ঞাতি। যো পথৰিং পরিজানাতি, সো ইমাহি তীহি পরিঞ্ঞাহি পরিজানাতি, অস্স চ পুথুজ্জনস্স তা পরিঞ্ঞাযো নত্থি, তস্মা অপরিঞ্ঞাতত্তা পথৰিং মঞ্ঞতি চ অভিনন্দতি চাতি। তেনাহ ভগৰা – ইধ, ভিক্খৰে, অস্সুতৰা পুথুজ্জনো…পে॰… পথৰিং মঞ্ঞতি, পথৰিযা মঞ্ঞতি, পথৰিতো মঞ্ঞতি, পথৰিং মেতি মঞ্ঞতি, পথৰিং অভিনন্দতি। তং কিস্স হেতু? অপরিঞ্ঞাতং তস্সাতি ৰদামী’’তি।

    Nāmarūpavavatthānaṃ vā ñātapariññā. Kalāpasammasanādianulomapariyosānā tīraṇapariññā. Ariyamagge ñāṇaṃ pahānapariññāti. Yo pathaviṃ parijānāti, so imāhi tīhi pariññāhi parijānāti, assa ca puthujjanassa tā pariññāyo natthi, tasmā apariññātattā pathaviṃ maññati ca abhinandati cāti. Tenāha bhagavā – idha, bhikkhave, assutavā puthujjano…pe… pathaviṃ maññati, pathaviyā maññati, pathavito maññati, pathaviṃ meti maññati, pathaviṃ abhinandati. Taṃ kissa hetu? Apariññātaṃ tassāti vadāmī’’ti.

    পথৰীৰারৰণ্ণনা নিট্ঠিতা।

    Pathavīvāravaṇṇanā niṭṭhitā.

    আপোৰারাদিৰণ্ণনা

    Āpovārādivaṇṇanā

    আপং আপতোতি এত্থাপি লক্খণসসম্ভারারম্মণসম্মুতিৰসেন চতুব্বিধো আপো। তেসু ‘‘তত্থ, কতমা অজ্ঝত্তিকা আপোধাতু। যং অজ্ঝত্তং পচ্চত্তং আপো আপোগতং, সিনেহো সিনেহগতং বন্ধনত্তং রূপস্স অজ্ঝত্তং উপাদিন্ন’’ন্তিআদীসু (ৰিভ॰ ১৭৪) ৰুত্তো লক্খণআপো। ‘‘আপোকসিণং উগ্গণ্হন্তো আপস্মিং নিমিত্তং গণ্হাতী’’তিআদীসু ৰুত্তো সসম্ভারাপো। সেসং সব্বং পথৰিযং ৰুত্তসদিসমেৰ। কেৰলং যোজনানযে পন ‘‘পিত্তং সেম্হ’’ন্তিআদিনা নযেন ৰুত্তা দ্ৰাদসভেদা অজ্ঝত্তিকা আপোধাতু, ‘‘তত্থ, কতমা বাহিরা আপোধাতু? যং বাহিরং আপো আপোগতং, সিনেহো সিনেহগতং বন্ধনত্তং রূপস্স বহিদ্ধা অনুপাদিন্নং। সেয্যথিদং, মূলরসো খন্ধরসো তচরসো পত্তরসো পুপ্ফরসো ফলরসো খীরং দধি সপ্পি নৰনীতং তেলং মধু ফাণিতং ভুম্মানি ৰা উদকানি অন্তলিক্খানি ৰা’’তি (ৰিভ॰ ১৭৪) এৰং ৰুত্তা চ বাহিরা আপোধাতু ৰেদিতব্বা, যো চ অজ্ঝত্তারম্মণত্তিকে নিমিত্তআপো।

    Āpaṃāpatoti etthāpi lakkhaṇasasambhārārammaṇasammutivasena catubbidho āpo. Tesu ‘‘tattha, katamā ajjhattikā āpodhātu. Yaṃ ajjhattaṃ paccattaṃ āpo āpogataṃ, sineho sinehagataṃ bandhanattaṃ rūpassa ajjhattaṃ upādinna’’ntiādīsu (vibha. 174) vutto lakkhaṇaāpo. ‘‘Āpokasiṇaṃ uggaṇhanto āpasmiṃ nimittaṃ gaṇhātī’’tiādīsu vutto sasambhārāpo. Sesaṃ sabbaṃ pathaviyaṃ vuttasadisameva. Kevalaṃ yojanānaye pana ‘‘pittaṃ semha’’ntiādinā nayena vuttā dvādasabhedā ajjhattikā āpodhātu, ‘‘tattha, katamā bāhirā āpodhātu? Yaṃ bāhiraṃ āpo āpogataṃ, sineho sinehagataṃ bandhanattaṃ rūpassa bahiddhā anupādinnaṃ. Seyyathidaṃ, mūlaraso khandharaso tacaraso pattaraso puppharaso phalaraso khīraṃ dadhi sappi navanītaṃ telaṃ madhu phāṇitaṃ bhummāni vā udakāni antalikkhāni vā’’ti (vibha. 174) evaṃ vuttā ca bāhirā āpodhātu veditabbā, yo ca ajjhattārammaṇattike nimittaāpo.

    তেজং তেজতোতি ইমস্মিং তেজোৰারেপি ৰুত্তনযেনেৰ ৰিত্থারো ৰেদিতব্বো। যোজনানযে পনেত্থ ‘‘যেন চ সন্তপ্পতি, যেন চ জীরীযতি, যেন চ পরিডয্হতি, যেন চ অসিতপীতখাযিতসাযিতং সম্মা পরিণামং গচ্ছতী’’তি (ৰিভ॰ ১৭৫) এৰং ৰুত্তা চতুপ্পভেদা অজ্ঝত্তিকা তেজোধাতু। ‘‘তত্থ কতমা বাহিরা তেজোধাতু? যং বাহিরং তেজো তেজোগতং উস্মা উস্মাগতং উসুমং উসুমগতং বহিদ্ধা অনুপাদিন্নং। সেয্যথিদং, কট্ঠগ্গি পলালগ্গি তিণগ্গি গোমযগ্গি থুসগ্গি সঙ্কারগ্গি ইন্দগ্গি অগ্গিসন্তাপো সূরিযসন্তাপো কট্ঠসন্নিচযসন্তাপো তিণসন্নিচযসন্তাপো ধঞ্ঞসন্নিচযসন্তাপো ভণ্ডসন্নিচযসন্তাপো’’তি (ৰিভ॰ ১৭৫) এৰং ৰুত্তা চ বাহিরা তেজোধাতু ৰেদিতব্বা।

    Tejaṃ tejatoti imasmiṃ tejovārepi vuttanayeneva vitthāro veditabbo. Yojanānaye panettha ‘‘yena ca santappati, yena ca jīrīyati, yena ca pariḍayhati, yena ca asitapītakhāyitasāyitaṃ sammā pariṇāmaṃ gacchatī’’ti (vibha. 175) evaṃ vuttā catuppabhedā ajjhattikā tejodhātu. ‘‘Tattha katamā bāhirā tejodhātu? Yaṃ bāhiraṃ tejo tejogataṃ usmā usmāgataṃ usumaṃ usumagataṃ bahiddhā anupādinnaṃ. Seyyathidaṃ, kaṭṭhaggi palālaggi tiṇaggi gomayaggi thusaggi saṅkāraggi indaggi aggisantāpo sūriyasantāpo kaṭṭhasannicayasantāpo tiṇasannicayasantāpo dhaññasannicayasantāpo bhaṇḍasannicayasantāpo’’ti (vibha. 175) evaṃ vuttā ca bāhirā tejodhātu veditabbā.

    ৰাযং ৰাযতোতি ইমস্স ৰাযৰারস্সাপি যোজনানযে পন ‘‘উদ্ধঙ্গমা ৰাতা অধোগমা ৰাতা কুচ্ছিসযা ৰাতা কোট্ঠাসযা ৰাতা অঙ্গমঙ্গানুসারিনো ৰাতা সত্থকৰাতা খুরকৰাতা উপ্পলকৰাতা অস্সাসো পস্সাসো’’তি এৰং ৰুত্তা অজ্ঝত্তিকা ৰাযোধাতু। ‘‘তত্থ কতমা বাহিরা ৰাযোধাতু? যং বাহিরং ৰাযো ৰাযোগতং থম্ভিতত্তং রূপস্স বহিদ্ধা অনুপাদিন্নং। সেয্যথিদং, পুরত্থিমা ৰাতা পচ্ছিমা ৰাতা উত্তরা ৰাতা দক্খিণা ৰাতা সরজা ৰাতা অরজা ৰাতা সীতা ৰাতা উণ্হা ৰাতা পরিত্তা ৰাতা অধিমত্তা ৰাতা কাল়ৰাতা ৰেরম্ভৰাতা পক্খৰাতা সুপণ্ণৰাতা তালৰণ্টৰাতা ৰিধূপনৰাতা’’তি (ৰিভ॰ ১৭৬) এৰং ৰুত্তা চ বাহিরা ৰাযোধাতু ৰেদিতব্বা। সেসং ৰুত্তনযমেৰাতি। এত্তাৰতা চ য্ৰাযং –

    Vāyaṃ vāyatoti imassa vāyavārassāpi yojanānaye pana ‘‘uddhaṅgamā vātā adhogamā vātā kucchisayā vātā koṭṭhāsayā vātā aṅgamaṅgānusārino vātā satthakavātā khurakavātā uppalakavātā assāso passāso’’ti evaṃ vuttā ajjhattikā vāyodhātu. ‘‘Tattha katamā bāhirā vāyodhātu? Yaṃ bāhiraṃ vāyo vāyogataṃ thambhitattaṃ rūpassa bahiddhā anupādinnaṃ. Seyyathidaṃ, puratthimā vātā pacchimā vātā uttarā vātā dakkhiṇā vātā sarajā vātā arajā vātā sītā vātā uṇhā vātā parittā vātā adhimattā vātā kāḷavātā verambhavātā pakkhavātā supaṇṇavātā tālavaṇṭavātā vidhūpanavātā’’ti (vibha. 176) evaṃ vuttā ca bāhirā vāyodhātu veditabbā. Sesaṃ vuttanayamevāti. Ettāvatā ca yvāyaṃ –

    ‘‘ৰুত্তম্হি একধম্মে, যে ধম্মা একলক্খণা তেন।

    ‘‘Vuttamhi ekadhamme, ye dhammā ekalakkhaṇā tena;

    ৰুত্তা ভৰন্তি সব্বে, ইতি ৰুত্তো লক্খণো হারো’’তি॥ –

    Vuttā bhavanti sabbe, iti vutto lakkhaṇo hāro’’ti. –

    এৰং নেত্তিযং লক্খণো নাম হারো ৰুত্তো, তস্স ৰসেন যস্মা চতূসু ভূতেসু গহিতেসু উপাদারূপম্পি গহিতমেৰ ভৰতি, রূপলক্খণং অনতীতত্তা। যঞ্চ ভূতোপাদারূপং সো রূপক্খন্ধো। তস্মা ‘‘অস্সুতৰা পুথুজ্জনো পথৰিং আপং তেজং ৰাযং মঞ্ঞতী’’তি ৰদন্তেন অত্থতো রূপং অত্ততো সমনুপস্সতীতিপি ৰুত্তং হোতি। ‘‘পথৰিযা আপস্মিং তেজস্মিং ৰাযস্মিং মঞ্ঞতী’’তি ৰদন্তেন রূপস্মিং ৰা অত্তানং সমনুপস্সতীতি ৰুত্তম্পি হোতি। ‘‘পথৰিতো আপতো তেজতো ৰাযতো মঞ্ঞতী’’তি ৰদন্তেন রূপতো অঞ্ঞো অত্তাতি সিদ্ধত্তা রূপৰন্তং ৰা অত্তানং অত্তনি ৰা রূপং সমনুপস্সতীতিপি ৰুত্তং হোতি। এৰমেতা চতস্সো রূপৰত্থুকা সক্কাযদিট্ঠিমঞ্ঞনা ৰেদিতব্বা। তত্থ একা উচ্ছেদদিট্ঠি, তিস্সো সস্সতদিট্ঠিযোতি দ্ৰেৰ দিট্ঠিযো হোন্তীতি অযম্পি অত্থৰিসেসো ৰেদিতব্বো।

    Evaṃ nettiyaṃ lakkhaṇo nāma hāro vutto, tassa vasena yasmā catūsu bhūtesu gahitesu upādārūpampi gahitameva bhavati, rūpalakkhaṇaṃ anatītattā. Yañca bhūtopādārūpaṃ so rūpakkhandho. Tasmā ‘‘assutavā puthujjano pathaviṃ āpaṃ tejaṃ vāyaṃ maññatī’’ti vadantena atthato rūpaṃ attato samanupassatītipi vuttaṃ hoti. ‘‘Pathaviyā āpasmiṃ tejasmiṃ vāyasmiṃ maññatī’’ti vadantena rūpasmiṃ vā attānaṃ samanupassatīti vuttampi hoti. ‘‘Pathavito āpato tejato vāyato maññatī’’ti vadantena rūpato añño attāti siddhattā rūpavantaṃ vā attānaṃ attani vā rūpaṃ samanupassatītipi vuttaṃ hoti. Evametā catasso rūpavatthukā sakkāyadiṭṭhimaññanā veditabbā. Tattha ekā ucchedadiṭṭhi, tisso sassatadiṭṭhiyoti dveva diṭṭhiyo hontīti ayampi atthaviseso veditabbo.

    আপোৰারাদিৰণ্ণনা নিট্ঠিতা।

    Āpovārādivaṇṇanā niṭṭhitā.

    ভূতৰারাদিৰণ্ণনা

    Bhūtavārādivaṇṇanā

    ৩. এৰং রূপমুখেন সঙ্খারৰত্থুকং মঞ্ঞনং ৰত্ৰা ইদানি যে সঙ্খারে উপাদায সত্তা পঞ্ঞপীযন্তি, তেসু সঙ্খারেসু সত্তেসুপি যস্মা পুথুজ্জনো মঞ্ঞনং করোতি, তস্মা তে সত্তে নিদ্দিসন্তো ভূতে ভূততো সঞ্জানাতীতিআদিমাহ। তত্থাযং ভূতসদ্দো পঞ্চক্খন্ধঅমনুস্সধাতুৰিজ্জমানখীণাসৰসত্তরুক্খাদীসু দিস্সতি। ‘‘ভূতমিদন্তি, ভিক্খৰে, সমনুপস্সথা’’তিআদীসু (ম॰ নি॰ ১.৪০১) হি অযং পঞ্চক্খন্ধেসু দিস্সতি। ‘‘যানীধ ভূতানি সমাগতানী’’তি (সু॰ নি॰ ২২৪) এত্থ অমনুস্সেসু। ‘‘চত্তারো খো, ভিক্খু, মহাভূতা হেতূ’’তি (ম॰ নি॰ ৩.৮৬) এত্থ ধাতূসু। ‘‘ভূতস্মিং পাচিত্তিয’’ন্তিআদীসু (পাচি॰ ৬৯) ৰিজ্জমানে। ‘‘যো চ কালঘসো ভূতো’’তি (জা॰ ১.১০.১৯০) এত্থ খীণাসৰে। ‘‘সব্বেৰ নিক্খিপিস্সন্তি ভূতা লোকে সমুস্সয’’ন্তি (দী॰ নি॰ ২.২২০) এত্থ সত্তেসু। ‘‘ভূতগামপাতব্যতাযা’’তি (পাচি॰ ৯০) এত্থ রুক্খাদীসু। ইধ পনাযং সত্তেসু ৰত্ততি, নো চ খো অৰিসেসেন। চাতুমহারাজিকানং হি হেট্ঠা সত্তা ইধ ভূতাতি অধিপ্পেতা।

    3. Evaṃ rūpamukhena saṅkhāravatthukaṃ maññanaṃ vatvā idāni ye saṅkhāre upādāya sattā paññapīyanti, tesu saṅkhāresu sattesupi yasmā puthujjano maññanaṃ karoti, tasmā te satte niddisanto bhūte bhūtato sañjānātītiādimāha. Tatthāyaṃ bhūtasaddo pañcakkhandhaamanussadhātuvijjamānakhīṇāsavasattarukkhādīsu dissati. ‘‘Bhūtamidanti, bhikkhave, samanupassathā’’tiādīsu (ma. ni. 1.401) hi ayaṃ pañcakkhandhesu dissati. ‘‘Yānīdha bhūtāni samāgatānī’’ti (su. ni. 224) ettha amanussesu. ‘‘Cattāro kho, bhikkhu, mahābhūtā hetū’’ti (ma. ni. 3.86) ettha dhātūsu. ‘‘Bhūtasmiṃ pācittiya’’ntiādīsu (pāci. 69) vijjamāne. ‘‘Yo ca kālaghaso bhūto’’ti (jā. 1.10.190) ettha khīṇāsave. ‘‘Sabbeva nikkhipissanti bhūtā loke samussaya’’nti (dī. ni. 2.220) ettha sattesu. ‘‘Bhūtagāmapātabyatāyā’’ti (pāci. 90) ettha rukkhādīsu. Idha panāyaṃ sattesu vattati, no ca kho avisesena. Cātumahārājikānaṃ hi heṭṭhā sattā idha bhūtāti adhippetā.

    তত্থ ভূতে ভূততো সঞ্জানাতীতিআদি ৰুত্তনযমেৰ। ভূতে মঞ্ঞতীতিআদীসু পন তিস্সোপি মঞ্ঞনা যোজেতব্বা। কথং? অযঞ্হি ‘‘সো পস্সতি গহপতিং ৰা গহপতিপুত্তং ৰা পঞ্চহি কামগুণেহি সমপ্পিতং সমঙ্গিভূত’’ন্তি (অ॰ নি॰ ৭.৫০) ৰুত্তনযেন ভূতে সুভা সুখিতাতি গহেত্ৰা রজ্জতি, দিস্ৰাপি নে রজ্জতি, সুত্ৰাপি, ঘাযিত্ৰাপি, সাযিত্ৰাপি, ফুসিত্ৰাপি, ঞত্ৰাপি। এৰং ভূতে তণ্হামঞ্ঞনায মঞ্ঞতি। ‘‘অহো ৰতাহং খত্তিযমহাসালানং ৰা সহব্যতং উপপজ্জেয্য’’ন্তিআদিনা (দী॰ নি॰ ৩.৩৩৭) ৰা পন নযেন অপ্পটিলদ্ধস্স পটিলাভায চিত্তং পণিদহতি, এৰম্পি ভূতে তণ্হামঞ্ঞনায মঞ্ঞতি। অত্তনো পন ভূতানঞ্চ সম্পত্তিৰিপত্তিং নিস্সায অত্তানং ৰা সেয্যং দহতি। ভূতেসু চ যংকিঞ্চি ভূতং হীনং অত্তানং ৰা হীনং, যংকিঞ্চি ভূতং সেয্যং । অত্তানং ৰা ভূতেন, ভূতং ৰা অত্তনা সদিসং দহতি। যথাহ ‘‘ইধেকচ্চো জাতিযা ৰা…পে॰… অঞ্ঞতরঞ্ঞতরেন ৰত্থুনা পুব্বকালং পরেহি সদিসং অত্তানং দহতি। অপরকালং অত্তানং সেয্যং দহতি। পরে হীনে দহতি, যো এৰরূপো মানো …পে॰… অযং ৰুচ্চতি মানাতিমানো’’তি (ৰিভ॰ ৮৭৬-৮৮০)। এৰং ভূতে মানমঞ্ঞনায মঞ্ঞতি।

    Tattha bhūte bhūtato sañjānātītiādi vuttanayameva. Bhūte maññatītiādīsu pana tissopi maññanā yojetabbā. Kathaṃ? Ayañhi ‘‘so passati gahapatiṃ vā gahapatiputtaṃ vā pañcahi kāmaguṇehi samappitaṃ samaṅgibhūta’’nti (a. ni. 7.50) vuttanayena bhūte subhā sukhitāti gahetvā rajjati, disvāpi ne rajjati, sutvāpi, ghāyitvāpi, sāyitvāpi, phusitvāpi, ñatvāpi. Evaṃ bhūte taṇhāmaññanāya maññati. ‘‘Aho vatāhaṃ khattiyamahāsālānaṃ vā sahabyataṃ upapajjeyya’’ntiādinā (dī. ni. 3.337) vā pana nayena appaṭiladdhassa paṭilābhāya cittaṃ paṇidahati, evampi bhūte taṇhāmaññanāya maññati. Attano pana bhūtānañca sampattivipattiṃ nissāya attānaṃ vā seyyaṃ dahati. Bhūtesu ca yaṃkiñci bhūtaṃ hīnaṃ attānaṃ vā hīnaṃ, yaṃkiñci bhūtaṃ seyyaṃ . Attānaṃ vā bhūtena, bhūtaṃ vā attanā sadisaṃ dahati. Yathāha ‘‘idhekacco jātiyā vā…pe… aññataraññatarena vatthunā pubbakālaṃ parehi sadisaṃ attānaṃ dahati. Aparakālaṃ attānaṃ seyyaṃ dahati. Pare hīne dahati, yo evarūpo māno …pe… ayaṃ vuccati mānātimāno’’ti (vibha. 876-880). Evaṃ bhūte mānamaññanāya maññati.

    ভূতে পন ‘‘নিচ্চা ধুৰা সস্সতা অৰিপরিণামধম্মা’’তি ৰা ‘‘সব্বে সত্তা সব্বে পাণা সব্বে ভূতা সব্বে জীৰা অৰসা অবলা অৰীরিযা নিযতিসঙ্গতিভাৰপরিণতা ছস্ৰেৰাভিজাতীসু সুখদুক্খং পটিসংৰেদেন্তী’’তি (দী॰ নি॰ ১.১৬৮) ৰা মঞ্ঞমানো দিট্ঠিমঞ্ঞনায মঞ্ঞতি। এৰং ভূতে তীহি মঞ্ঞনাহি মঞ্ঞতি।

    Bhūte pana ‘‘niccā dhuvā sassatā avipariṇāmadhammā’’ti vā ‘‘sabbe sattā sabbe pāṇā sabbe bhūtā sabbe jīvā avasā abalā avīriyā niyatisaṅgatibhāvapariṇatā chasvevābhijātīsu sukhadukkhaṃ paṭisaṃvedentī’’ti (dī. ni. 1.168) vā maññamāno diṭṭhimaññanāya maññati. Evaṃ bhūte tīhi maññanāhi maññati.

    কথং ভূতেসু মঞ্ঞতি? তেসু তেসু ভূতেসু অত্তনো উপপত্তিং ৰা সুখুপ্পত্তিং ৰা আকঙ্খতি। এৰং তাৰ তণ্হামঞ্ঞনায ভূতেসু মঞ্ঞতি। ভূতেসু ৰা উপপত্তিং আকঙ্খমানো দানং দেতি, সীলং সমাদিযতি, উপোসথকম্মং করোতি। এৰম্পি ভূতেসু তণ্হামঞ্ঞনায মঞ্ঞতি। ভূতে পন সমূহগ্গাহেন গহেত্ৰা তত্থ একচ্চে ভূতে সেয্যতো দহতি, একচ্চে সদিসতো ৰা হীনতো ৰাতি। এৰং ভূতেসু মানমঞ্ঞনায মঞ্ঞতি। তথা একচ্চে ভূতে নিচ্চা ধুৰাতি মঞ্ঞতি। একচ্চে অনিচ্চা অধুৰাতি, অহম্পি ভূতেসু অঞ্ঞতরোস্মীতি ৰা মঞ্ঞতি। এৰং ভূতেসু দিট্ঠিমঞ্ঞনায মঞ্ঞতি।

    Kathaṃ bhūtesu maññati? Tesu tesu bhūtesu attano upapattiṃ vā sukhuppattiṃ vā ākaṅkhati. Evaṃ tāva taṇhāmaññanāya bhūtesu maññati. Bhūtesu vā upapattiṃ ākaṅkhamāno dānaṃ deti, sīlaṃ samādiyati, uposathakammaṃ karoti. Evampi bhūtesu taṇhāmaññanāya maññati. Bhūte pana samūhaggāhena gahetvā tattha ekacce bhūte seyyato dahati, ekacce sadisato vā hīnato vāti. Evaṃ bhūtesu mānamaññanāya maññati. Tathā ekacce bhūte niccā dhuvāti maññati. Ekacce aniccā adhuvāti, ahampi bhūtesu aññatarosmīti vā maññati. Evaṃ bhūtesu diṭṭhimaññanāya maññati.

    ভূততো মঞ্ঞতীতি এত্থ পন সউপকরণস্স অত্তনো ৰা পরস্স ৰা যতো কুতোচি ভূততো উপ্পত্তিং মঞ্ঞমানো ভূততো মঞ্ঞতীতি ৰেদিতব্বো, অযমস্স দিট্ঠিমঞ্ঞনা। তস্মিংযেৰ পনস্স দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনাপি ৰেদিতব্বা। ভূতে মেতি মঞ্ঞতীতি এত্থ পন একা তণ্হামঞ্ঞনাৰ লব্ভতি। সা চাযং ‘‘মম পুত্তা, মম ধীতা, মম অজেল়কা, কুক্কুটসূকরা, হত্থিগৰস্সৰল়ৰা’’তি এৰমাদিনা নযেন মমাযতো পৰত্ততীতি ৰেদিতব্বা। ভূতে অভিনন্দতীতি এতং ৰুত্তনযমেৰ। অপরিঞ্ঞাতং তস্সাতি এত্থ পন যে সঙ্খারে উপাদায ভূতানং পঞ্ঞত্তি, তেসং অপরিঞ্ঞাতত্তা ভূতা অপরিঞ্ঞাতা হোন্তীতি ৰেদিতব্বা। যোজনা পন ৰুত্তনযেনেৰ কাতব্বা।

    Bhūtato maññatīti ettha pana saupakaraṇassa attano vā parassa vā yato kutoci bhūtato uppattiṃ maññamāno bhūtato maññatīti veditabbo, ayamassa diṭṭhimaññanā. Tasmiṃyeva panassa diṭṭhimaññanāya maññite vatthusmiṃ sinehaṃ mānañca uppādayato taṇhāmānamaññanāpi veditabbā. Bhūte meti maññatīti ettha pana ekā taṇhāmaññanāva labbhati. Sā cāyaṃ ‘‘mama puttā, mama dhītā, mama ajeḷakā, kukkuṭasūkarā, hatthigavassavaḷavā’’ti evamādinā nayena mamāyato pavattatīti veditabbā. Bhūte abhinandatīti etaṃ vuttanayameva. Apariññātaṃ tassāti ettha pana ye saṅkhāre upādāya bhūtānaṃ paññatti, tesaṃ apariññātattā bhūtā apariññātā hontīti veditabbā. Yojanā pana vuttanayeneva kātabbā.

    এৰং সঙ্খেপতো সঙ্খারৰসেন চ সত্তৰসেন চ মঞ্ঞনাৰত্থুং দস্সেত্ৰা ইদানি ভূমিৰিসেসাদিনা ভেদেন ৰিত্থারতোপি তং দস্সেন্তো দেৰে দেৰতোতিআদিমাহ। তত্থ দিব্বন্তি পঞ্চহি কামগুণেহি অত্তনো ৰা ইদ্ধিযাতি দেৰা, কীল়ন্তি জোতেন্তি চাতি অত্থো। তে তিৰিধা সম্মুতিদেৰা উপপত্তিদেৰা ৰিসুদ্ধিদেৰাতি। সম্মুতিদেৰা নাম রাজানো দেৰিযো রাজকুমারা। উপপত্তিদেৰা নাম চাতুমহারাজিকে দেৰে উপাদায ততুত্তরিদেৰা। ৰিসুদ্ধিদেৰা নাম অরহন্তো খীণাসৰা। ইধ পন উপপত্তিদেৰা দট্ঠব্বা, নো চ খো অৰিসেসেন। পরনিম্মিতৰসৰত্তিদেৰলোকে মারং সপরিসং ঠপেত্ৰা সেসা ছ কামাৰচরা ইধ দেৰাতি অধিপ্পেতা। তত্থ সব্বা অত্থৰণ্ণনা ভূতৰারে ৰুত্তনযেনেৰ ৰেদিতব্বা।

    Evaṃ saṅkhepato saṅkhāravasena ca sattavasena ca maññanāvatthuṃ dassetvā idāni bhūmivisesādinā bhedena vitthāratopi taṃ dassento deve devatotiādimāha. Tattha dibbanti pañcahi kāmaguṇehi attano vā iddhiyāti devā, kīḷanti jotenti cāti attho. Te tividhā sammutidevā upapattidevā visuddhidevāti. Sammutidevā nāma rājāno deviyo rājakumārā. Upapattidevā nāma cātumahārājike deve upādāya tatuttaridevā. Visuddhidevā nāma arahanto khīṇāsavā. Idha pana upapattidevā daṭṭhabbā, no ca kho avisesena. Paranimmitavasavattidevaloke māraṃ saparisaṃ ṭhapetvā sesā cha kāmāvacarā idha devāti adhippetā. Tattha sabbā atthavaṇṇanā bhūtavāre vuttanayeneva veditabbā.

    পজাপতিন্তি এত্থ পন মারো পজাপতীতি ৰেদিতব্বো। কেচি পন ‘‘তেসং তেসং দেৰানং অধিপতীনং মহারাজাদীনমেতং অধিৰচন’’ন্তি ৰদন্তি। তং দেৰগ্গহণেনেৰ তেসং গহিতত্তা অযুত্তন্তি মহাঅট্ঠকথাযং পটিক্খিত্তং, মারোযেৰ পন সত্তসঙ্খাতায পজায অধিপতিভাৰেন ইধ পজাপতীতি অধিপ্পেতো। সো কুহিং ৰসতি? পরনিম্মিতৰসৰত্তিদেৰলোকে । তত্র হি ৰসৰত্তিরাজা রজ্জং কারেতি। মারো একস্মিং পদেসে অত্তনো পরিসায ইস্সরিযং পৰত্তেন্তো রজ্জপচ্চন্তে দামরিকরাজপুত্তো ৰিয ৰসতীতি ৰদন্তি। মারগ্গহণেনেৰ চেত্থ মারপরিসাযপি গহণং ৰেদিতব্বং। যোজনানযো চেত্থ পজাপতিং ৰণ্ণৰন্তং দীঘাযুকং সুখবহুলং দিস্ৰা ৰা সুত্ৰা ৰা রজ্জন্তো তণ্হামঞ্ঞনায মঞ্ঞতি। ‘‘অহো ৰতাহং পজাপতিনো সহব্যতং উপপজ্জেয্য’’ন্তিআদিনা ৰা পন নযেন অপ্পটিলদ্ধস্স পটিলাভায চিত্তং পণিদহন্তোপি পজাপতিং তণ্হামঞ্ঞনায মঞ্ঞতি। পজাপতিভাৰং পন পত্তো সমানো অহমস্মি পজানমিস্সরো অধিপতীতি মানং জনেন্তো পজাপতিং মানমঞ্ঞনায মঞ্ঞতি। ‘‘পজাপতি নিচ্চো ধুৰো’’তি ৰা ‘‘উচ্ছিজ্জিস্সতি ৰিনস্সিস্সতী’’তি ৰা ‘‘অৰসো অবলো অৰীরিযো নিযতিসঙ্গতিভাৰপরিণতো ছস্ৰেৰাভিজাতীসু সুখদুক্খং পটিসংৰেদেতী’’তি ৰা মঞ্ঞমানো পন পজাপতিং দিট্ঠিমঞ্ঞনায মঞ্ঞতীতি ৰেদিতব্বো।

    Pajāpatinti ettha pana māro pajāpatīti veditabbo. Keci pana ‘‘tesaṃ tesaṃ devānaṃ adhipatīnaṃ mahārājādīnametaṃ adhivacana’’nti vadanti. Taṃ devaggahaṇeneva tesaṃ gahitattā ayuttanti mahāaṭṭhakathāyaṃ paṭikkhittaṃ, māroyeva pana sattasaṅkhātāya pajāya adhipatibhāvena idha pajāpatīti adhippeto. So kuhiṃ vasati? Paranimmitavasavattidevaloke . Tatra hi vasavattirājā rajjaṃ kāreti. Māro ekasmiṃ padese attano parisāya issariyaṃ pavattento rajjapaccante dāmarikarājaputto viya vasatīti vadanti. Māraggahaṇeneva cettha māraparisāyapi gahaṇaṃ veditabbaṃ. Yojanānayo cettha pajāpatiṃ vaṇṇavantaṃ dīghāyukaṃ sukhabahulaṃ disvā vā sutvā vā rajjanto taṇhāmaññanāya maññati. ‘‘Aho vatāhaṃ pajāpatino sahabyataṃ upapajjeyya’’ntiādinā vā pana nayena appaṭiladdhassa paṭilābhāya cittaṃ paṇidahantopi pajāpatiṃ taṇhāmaññanāya maññati. Pajāpatibhāvaṃ pana patto samāno ahamasmi pajānamissaro adhipatīti mānaṃ janento pajāpatiṃ mānamaññanāya maññati. ‘‘Pajāpati nicco dhuvo’’ti vā ‘‘ucchijjissati vinassissatī’’ti vā ‘‘avaso abalo avīriyo niyatisaṅgatibhāvapariṇato chasvevābhijātīsu sukhadukkhaṃ paṭisaṃvedetī’’ti vā maññamāno pana pajāpatiṃ diṭṭhimaññanāya maññatīti veditabbo.

    পজাপতিস্মিন্তি এত্থ পন একা দিট্ঠিমঞ্ঞনাৰ যুজ্জতি। তস্সা এৰং পৰত্তি ৰেদিতব্বা। ইধেকচ্চো ‘‘পজাপতিস্মিং যে চ ধম্মা সংৰিজ্জন্তি, সব্বে তে নিচ্চা ধুৰা সস্সতা অৰিপরিণামধম্মা’’তি মঞ্ঞতি। অথ ৰা ‘‘পজাপতিস্মিং নত্থি পাপং, ন তস্মিং পাপকানি কম্মানি উপলব্ভন্তী’’তি মঞ্ঞতি।

    Pajāpatisminti ettha pana ekā diṭṭhimaññanāva yujjati. Tassā evaṃ pavatti veditabbā. Idhekacco ‘‘pajāpatismiṃ ye ca dhammā saṃvijjanti, sabbe te niccā dhuvā sassatā avipariṇāmadhammā’’ti maññati. Atha vā ‘‘pajāpatismiṃ natthi pāpaṃ, na tasmiṃ pāpakāni kammāni upalabbhantī’’ti maññati.

    পজাপতিতোতি এত্থ তিস্সোপি মঞ্ঞনা লব্ভন্তি। কথং? ইধেকচ্চো সউপকরণস্স অত্তনো ৰা পরস্স ৰা পজাপতিতো উপ্পত্তিং ৰা নিগ্গমনং ৰা মঞ্ঞতি, অযমস্স দিট্ঠিমঞ্ঞনা। তস্মিংযেৰ পনস্স দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনাপি ৰেদিতব্বা। পজাপতিং মেতি এত্থ পন একা তণ্হামঞ্ঞনাৰ লব্ভতি। সা চাযং ‘‘পজাপতি মম সত্থা মম সামী’’তিআদিনা নযেন মমাযতো পৰত্ততীতি ৰেদিতব্বা। সেসং ৰুত্তনযমেৰ।

    Pajāpatitoti ettha tissopi maññanā labbhanti. Kathaṃ? Idhekacco saupakaraṇassa attano vā parassa vā pajāpatito uppattiṃ vā niggamanaṃ vā maññati, ayamassa diṭṭhimaññanā. Tasmiṃyeva panassa diṭṭhimaññanāya maññite vatthusmiṃ sinehaṃ mānañca uppādayato taṇhāmānamaññanāpi veditabbā. Pajāpatiṃ meti ettha pana ekā taṇhāmaññanāva labbhati. Sā cāyaṃ ‘‘pajāpati mama satthā mama sāmī’’tiādinā nayena mamāyato pavattatīti veditabbā. Sesaṃ vuttanayameva.

    ব্রহ্মং ব্রহ্মতোতি এত্থ ব্রূহিতো তেহি তেহি গুণৰিসেসেহীতি ব্রহ্মা। অপিচ ব্রহ্মাতি মহাব্রহ্মাপি ৰুচ্চতি, তথাগতোপি ব্রাহ্মণোপি মাতাপিতরোপি সেট্ঠম্পি। ‘‘সহস্সো ব্রহ্মা দ্ৰিসহস্সো ব্রহ্মা’’তিআদীসু (ম॰ নি॰ ৩.১৬৫-১৬৬) হি মহাব্রহ্মা ব্রহ্মাতি ৰুচ্চতি। ‘‘ব্রহ্মাতি খো, ভিক্খৰে , তথাগতস্সেতং অধিৰচন’’ন্তি এত্থ তথাগতো।

    Brahmaṃ brahmatoti ettha brūhito tehi tehi guṇavisesehīti brahmā. Apica brahmāti mahābrahmāpi vuccati, tathāgatopi brāhmaṇopi mātāpitaropi seṭṭhampi. ‘‘Sahasso brahmā dvisahasso brahmā’’tiādīsu (ma. ni. 3.165-166) hi mahābrahmā brahmāti vuccati. ‘‘Brahmāti kho, bhikkhave , tathāgatassetaṃ adhivacana’’nti ettha tathāgato.

    ‘‘তমোনুদো বুদ্ধো সমন্তচক্খু,

    ‘‘Tamonudo buddho samantacakkhu,

    লোকন্তগূ সব্বভৰাতিৰত্তো।

    Lokantagū sabbabhavātivatto;

    অনাসৰো সব্বদুক্খপ্পহীনো,

    Anāsavo sabbadukkhappahīno,

    সচ্চৰ্হযো ব্রহ্মে উপাসিতো মে’’তি॥ (চূল়নি॰ ১০৪) –

    Saccavhayo brahme upāsito me’’ti. (cūḷani. 104) –

    এত্থ ব্রাহ্মণো।

    Ettha brāhmaṇo.

    ‘‘ব্রহ্মাতি মাতাপিতরো, পুব্বাচরিযাতি ৰুচ্চরে’’তি॥ (ইতিৰু॰ ১০৬; জা॰ ২.২০.১৮১) –

    ‘‘Brahmāti mātāpitaro, pubbācariyāti vuccare’’ti. (itivu. 106; jā. 2.20.181) –

    এত্থ মাতাপিতরো। ‘‘ব্রহ্মচক্কং পৰত্তেতী’’তি (ম॰ নি॰ ১.১৪৮; অ॰ নি॰ ৫.১১) এত্থ সেট্ঠং। ইধ পন পঠমাভিনিব্বত্তো কপ্পাযুকো ব্রহ্মা অধিপ্পেতো। তগ্গহণেনেৰ চ ব্রহ্মপুরোহিতব্রহ্মপারিসজ্জাপি গহিতাতি ৰেদিতব্বা। অত্থৰণ্ণনা পনেত্থ পজাপতিৰারে ৰুত্তনযেনেৰ ৰেদিতব্বা।

    Ettha mātāpitaro. ‘‘Brahmacakkaṃ pavattetī’’ti (ma. ni. 1.148; a. ni. 5.11) ettha seṭṭhaṃ. Idha pana paṭhamābhinibbatto kappāyuko brahmā adhippeto. Taggahaṇeneva ca brahmapurohitabrahmapārisajjāpi gahitāti veditabbā. Atthavaṇṇanā panettha pajāpativāre vuttanayeneva veditabbā.

    আভস্সরৰারে দণ্ডদীপিকায অচ্চি ৰিয এতেসং সরীরতো আভা ছিজ্জিত্ৰা ছিজ্জিত্ৰা পতন্তী ৰিয সরতি ৰিসরতীতি আভস্সরা। তেসং গহণেন সব্বাপি দুতিযজ্ঝানভূমি গহিতা, একতলৰাসিনো এৰ চেতে সব্বেপি পরিত্তাভা অপ্পমাণাভা আভস্সরাতি ৰেদিতব্বা।

    Ābhassaravāre daṇḍadīpikāya acci viya etesaṃ sarīrato ābhā chijjitvā chijjitvā patantī viya sarati visaratīti ābhassarā. Tesaṃ gahaṇena sabbāpi dutiyajjhānabhūmi gahitā, ekatalavāsino eva cete sabbepi parittābhā appamāṇābhā ābhassarāti veditabbā.

    সুভকিণ্হৰারে সুভেন ওকিণ্ণা ৰিকিণ্ণা সুভেন সরীরপ্পভাৰণ্ণেন একগ্ঘনা সুৰণ্ণমঞ্জূসায ঠপিতসম্পজ্জলিতকঞ্চনপিণ্ডসস্সিরিকাতি সুভকিণ্হা। তেসং গহণেন সব্বাপি ততিযজ্ঝানভূমি গহিতা। একতলৰাসিনো এৰ চেতে সব্বেপি পরিত্তসুভা অপ্পমাণসুভা সুভকিণ্হাতি ৰেদিতব্বা।

    Subhakiṇhavāre subhena okiṇṇā vikiṇṇā subhena sarīrappabhāvaṇṇena ekagghanā suvaṇṇamañjūsāya ṭhapitasampajjalitakañcanapiṇḍasassirikāti subhakiṇhā. Tesaṃ gahaṇena sabbāpi tatiyajjhānabhūmi gahitā. Ekatalavāsino eva cete sabbepi parittasubhā appamāṇasubhā subhakiṇhāti veditabbā.

    ৰেহপ্ফলৰারে, ৰিপুলা ফলাতি ৰেহপ্ফলা। চতুত্থজ্ঝানভূমি ব্রহ্মানো ৰুচ্চন্তি। অত্থনযযোজনা পন ইমেসু তীসুপি ৰারেসু ভূতৰারে ৰুত্তনযেনেৰ ৰেদিতব্বা।

    Vehapphalavāre, vipulā phalāti vehapphalā. Catutthajjhānabhūmi brahmāno vuccanti. Atthanayayojanā pana imesu tīsupi vāresu bhūtavāre vuttanayeneva veditabbā.

    অভিভূৰারে অভিভৰীতি অভিভূ। কিং অভিভৰি? চত্তারো খন্ধে অরূপিনো। অসঞ্ঞভৰস্সেতং অধিৰচনং। অসঞ্ঞসত্তা দেৰা ৰেহপ্ফলেহি সদ্ধিং একতলাযেৰ একস্মিং ওকাসে যেন ইরিযাপথেন নিব্বত্তা, তেনেৰ যাৰতাযুকং তিট্ঠন্তি চিত্তকম্মরূপসদিসা হুত্ৰা। তে ইধ সব্বেপি অভিভূৰচনেন গহিতা। কেচি অভিভূ নাম সহস্সো ব্রহ্মাতি এৰমাদিনা নযেন তত্থ তত্থ অধিপতিব্রহ্মানং ৰণ্ণযন্তি। ব্রহ্মগ্গহণেনেৰ পন তস্স গহিতত্তা অযুত্তমেতন্তি ৰেদিতব্বং। যোজনানযো চেত্থ অভিভূ ৰণ্ণৰা দীঘাযুকোতি সুত্ৰা তত্থ ছন্দরাগং উপ্পাদেন্তো অভিভুং তণ্হামঞ্ঞনায মঞ্ঞতি। ‘‘অহো ৰতাহং অভিভুনো সহব্যতং উপপজ্জেয্য’’ন্তিআদিনা পন নযেন অপ্পটিলদ্ধস্স পটিলাভায চিত্তং পণিদহন্তোপি অভিভুং তণ্হামঞ্ঞনায মঞ্ঞতি। অত্তানং হীনতো অভিভুং সেয্যতো দহন্তো পন অভিভুং মানমঞ্ঞনায মঞ্ঞতি। ‘‘অভিভূ নিচ্চো ধুৰো’’তিআদিনা নযেন পরামসন্তো অভিভুং দিট্ঠিমঞ্ঞনায মঞ্ঞতীতি ৰেদিতব্বো। সেসং পজাপতিৰারে ৰুত্তনযমেৰ।

    Abhibhūvāre abhibhavīti abhibhū. Kiṃ abhibhavi? Cattāro khandhe arūpino. Asaññabhavassetaṃ adhivacanaṃ. Asaññasattā devā vehapphalehi saddhiṃ ekatalāyeva ekasmiṃ okāse yena iriyāpathena nibbattā, teneva yāvatāyukaṃ tiṭṭhanti cittakammarūpasadisā hutvā. Te idha sabbepi abhibhūvacanena gahitā. Keci abhibhū nāma sahasso brahmāti evamādinā nayena tattha tattha adhipatibrahmānaṃ vaṇṇayanti. Brahmaggahaṇeneva pana tassa gahitattā ayuttametanti veditabbaṃ. Yojanānayo cettha abhibhū vaṇṇavā dīghāyukoti sutvā tattha chandarāgaṃ uppādento abhibhuṃ taṇhāmaññanāya maññati. ‘‘Aho vatāhaṃ abhibhuno sahabyataṃ upapajjeyya’’ntiādinā pana nayena appaṭiladdhassa paṭilābhāya cittaṃ paṇidahantopi abhibhuṃ taṇhāmaññanāya maññati. Attānaṃ hīnato abhibhuṃ seyyato dahanto pana abhibhuṃ mānamaññanāya maññati. ‘‘Abhibhū nicco dhuvo’’tiādinā nayena parāmasanto abhibhuṃ diṭṭhimaññanāya maññatīti veditabbo. Sesaṃ pajāpativāre vuttanayameva.

    ভূতৰারাদিৰণ্ণনা নিট্ঠিতা।

    Bhūtavārādivaṇṇanā niṭṭhitā.

    আকাসানঞ্চাযতনৰারাদিৰণ্ণনা

    Ākāsānañcāyatanavārādivaṇṇanā

    ৪. এৰং ভগৰা পটিপাটিযা দেৰলোকে দস্সেন্তোপি অভিভূৰচনেন অসঞ্ঞভৰং দস্সেত্ৰা ইদানি যস্মা অযং ৰট্টকথা, সুদ্ধাৰাসা চ ৰিৰট্টপক্খে ঠিতা, অনাগামিখীণাসৰা এৰ হি তে দেৰা। যস্মা ৰা কতিপযকপ্পসহস্সাযুকা তে দেৰা, বুদ্ধুপ্পাদকালেযেৰ হোন্তি। বুদ্ধা পন অসঙ্খেযেপি কপ্পে ন উপ্পজ্জন্তি, তদা সুঞ্ঞাপি সা ভূমি হোতি। রঞ্ঞো খন্ধাৰারট্ঠানং ৰিয হি বুদ্ধানং সুদ্ধাৰাসভৰো। তে তেনেৰ চ কারণেন ৰিঞ্ঞাণট্ঠিতিসত্তাৰাসৰসেনপি ন গহিতা, সব্বকালিকা পন ইমা মঞ্ঞনা। তস্মা তাসং সদাৰিজ্জমানভূমিং দস্সেন্তো সুদ্ধাৰাসে অতিক্কমিত্ৰা, আকাসানঞ্চাযতনন্তিআদিমাহ। তত্থ আকাসানঞ্চাযতনন্তি তব্ভূমিকা চত্তারো কুসলৰিপাককিরিযা খন্ধা। তে চ তত্রূপপন্নাযেৰ দট্ঠব্বা ভৰপরিচ্ছেদকথা অযন্তি কত্ৰা। এস নযো ৰিঞ্ঞাণঞ্চাযতনাদীসু। অত্থযোজনা পন চতূসুপি এতেসু ৰারেসু অভিভূৰারে ৰুত্তনযেনেৰ ৰেদিতব্বা। মানমঞ্ঞনা চেত্থ পজাপতিৰারে ৰুত্তনযেনাপি যুজ্জতি।

    4. Evaṃ bhagavā paṭipāṭiyā devaloke dassentopi abhibhūvacanena asaññabhavaṃ dassetvā idāni yasmā ayaṃ vaṭṭakathā, suddhāvāsā ca vivaṭṭapakkhe ṭhitā, anāgāmikhīṇāsavā eva hi te devā. Yasmā vā katipayakappasahassāyukā te devā, buddhuppādakāleyeva honti. Buddhā pana asaṅkheyepi kappe na uppajjanti, tadā suññāpi sā bhūmi hoti. Rañño khandhāvāraṭṭhānaṃ viya hi buddhānaṃ suddhāvāsabhavo. Te teneva ca kāraṇena viññāṇaṭṭhitisattāvāsavasenapi na gahitā, sabbakālikā pana imā maññanā. Tasmā tāsaṃ sadāvijjamānabhūmiṃ dassento suddhāvāse atikkamitvā, ākāsānañcāyatanantiādimāha. Tattha ākāsānañcāyatananti tabbhūmikā cattāro kusalavipākakiriyā khandhā. Te ca tatrūpapannāyeva daṭṭhabbā bhavaparicchedakathā ayanti katvā. Esa nayo viññāṇañcāyatanādīsu. Atthayojanā pana catūsupi etesu vāresu abhibhūvāre vuttanayeneva veditabbā. Mānamaññanā cettha pajāpativāre vuttanayenāpi yujjati.

    আকাসানঞ্চাযতনৰারাদিৰণ্ণনা নিট্ঠিতা।

    Ākāsānañcāyatanavārādivaṇṇanā niṭṭhitā.

    দিট্ঠসুতৰারাদিৰণ্ণনা

    Diṭṭhasutavārādivaṇṇanā

    ৫. এৰং ভূমিৰিসেসাদিনা ভেদেন ৰিত্থারতোপি মঞ্ঞনাৰত্থুং দস্সেত্ৰা ইদানি সব্বমঞ্ঞনাৰত্থুভূতং সক্কাযপরিযাপন্নং তেভূমকধম্মভেদং দিট্ঠাদীহি চতূহি সঙ্গণ্হিত্ৰা দস্সেন্তো, দিট্ঠং দিট্ঠতোতিআদিমাহ।

    5. Evaṃ bhūmivisesādinā bhedena vitthāratopi maññanāvatthuṃ dassetvā idāni sabbamaññanāvatthubhūtaṃ sakkāyapariyāpannaṃ tebhūmakadhammabhedaṃ diṭṭhādīhi catūhi saṅgaṇhitvā dassento, diṭṭhaṃ diṭṭhatotiādimāha.

    তত্থ দিট্ঠন্তি মংসচক্খুনাপি দিট্ঠং, দিব্বচক্খুনাপি দিট্ঠং। রূপাযতনস্সেতং অধিৰচনং। তত্থ দিট্ঠং মঞ্ঞতীতি দিট্ঠং তীহি মঞ্ঞনাহি মঞ্ঞতি। কথং? রূপাযতনং সুভসঞ্ঞায সুখসঞ্ঞায চ পস্সন্তো তত্থ ছন্দরাগং জনেতি, তং অস্সাদেতি অভিনন্দতি। ৰুত্তম্পি হেতং ভগৰতা ‘‘ইত্থিরূপে, ভিক্খৰে, সত্তা রত্তা গিদ্ধা গধিতা মুচ্ছিতা অজ্ঝোসন্না, তে দীঘরত্তং সোচন্তি ইত্থিরূপৰসানুগা’’তি (অ॰ নি॰ ৫.৫৫)। এৰং দিট্ঠং তণ্হামঞ্ঞনায মঞ্ঞতি। ‘‘ইতি মে রূপং সিযা অনাগতমদ্ধানন্তি ৰা পনেত্থ নন্দিং সমন্নানেতি, রূপসম্পদং ৰা পন আকঙ্খমানো দানং দেতী’’তি ৰিত্থারো। এৰম্পি দিট্ঠং তণ্হামঞ্ঞনায মঞ্ঞতি। অত্তনো পন পরস্স চ রূপসম্পত্তিং ৰিপত্তিং নিস্সায মানং জনেতি। ‘‘ইমিনাহং সেয্যোস্মী’’তি ৰা ‘‘সদিসোস্মী’’তি ৰা ‘‘হীনোস্মী’’তি ৰাতি এৰং দিট্ঠং মানমঞ্ঞনায মঞ্ঞতি। রূপাযতনং পন নিচ্চং ধুৰং সস্সতন্তি মঞ্ঞতি, অত্তানং অত্তনিযন্তি মঞ্ঞতি, মঙ্গলং অমঙ্গলন্তি মঞ্ঞতি, এৰং দিট্ঠং দিট্ঠিমঞ্ঞনায মঞ্ঞতি। এৰং দিট্ঠং তীহি মঞ্ঞনাহি মঞ্ঞতি। কথং দিট্ঠস্মিং মঞ্ঞতি? রূপস্মিং অত্তানং সমনুপস্সননযেন মঞ্ঞন্তো দিট্ঠস্মিং মঞ্ঞতি। যথা ৰা ধনে ধঞ্ঞে। এৰং রূপস্মিং রাগাদযোতি মঞ্ঞন্তোপি দিট্ঠস্মিং মঞ্ঞতি। অযমস্স দিট্ঠিমঞ্ঞনা। তস্মিঞ্ঞেৰ পনস্স দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনাপি ৰেদিতব্বা। এৰং দিট্ঠস্মিং মঞ্ঞতি। সেসং পথৰীৰারে ৰুত্তনযেনেৰ ৰেদিতব্বং।

    Tattha diṭṭhanti maṃsacakkhunāpi diṭṭhaṃ, dibbacakkhunāpi diṭṭhaṃ. Rūpāyatanassetaṃ adhivacanaṃ. Tattha diṭṭhaṃ maññatīti diṭṭhaṃ tīhi maññanāhi maññati. Kathaṃ? Rūpāyatanaṃ subhasaññāya sukhasaññāya ca passanto tattha chandarāgaṃ janeti, taṃ assādeti abhinandati. Vuttampi hetaṃ bhagavatā ‘‘itthirūpe, bhikkhave, sattā rattā giddhā gadhitā mucchitā ajjhosannā, te dīgharattaṃ socanti itthirūpavasānugā’’ti (a. ni. 5.55). Evaṃ diṭṭhaṃ taṇhāmaññanāya maññati. ‘‘Iti me rūpaṃ siyā anāgatamaddhānanti vā panettha nandiṃ samannāneti, rūpasampadaṃ vā pana ākaṅkhamāno dānaṃ detī’’ti vitthāro. Evampi diṭṭhaṃ taṇhāmaññanāya maññati. Attano pana parassa ca rūpasampattiṃ vipattiṃ nissāya mānaṃ janeti. ‘‘Imināhaṃ seyyosmī’’ti vā ‘‘sadisosmī’’ti vā ‘‘hīnosmī’’ti vāti evaṃ diṭṭhaṃ mānamaññanāya maññati. Rūpāyatanaṃ pana niccaṃ dhuvaṃ sassatanti maññati, attānaṃ attaniyanti maññati, maṅgalaṃ amaṅgalanti maññati, evaṃ diṭṭhaṃ diṭṭhimaññanāya maññati. Evaṃ diṭṭhaṃ tīhi maññanāhi maññati. Kathaṃ diṭṭhasmiṃ maññati? Rūpasmiṃ attānaṃ samanupassananayena maññanto diṭṭhasmiṃ maññati. Yathā vā dhane dhaññe. Evaṃ rūpasmiṃ rāgādayoti maññantopi diṭṭhasmiṃ maññati. Ayamassa diṭṭhimaññanā. Tasmiññeva panassa diṭṭhimaññanāya maññite vatthusmiṃ sinehaṃ mānañca uppādayato taṇhāmānamaññanāpi veditabbā. Evaṃ diṭṭhasmiṃ maññati. Sesaṃ pathavīvāre vuttanayeneva veditabbaṃ.

    সুতন্তি মংসসোতেনপি সুতং, দিব্বসোতেনপি সুতং, সদ্দাযতনস্সেতং অধিৰচনং।

    Sutanti maṃsasotenapi sutaṃ, dibbasotenapi sutaṃ, saddāyatanassetaṃ adhivacanaṃ.

    মুতন্তি মুত্ৰা মুনিত্ৰা চ গহিতং, আহচ্চ উপগন্ত্ৰাতি অত্থো, ইন্দ্রিযানং আরম্মণানঞ্চ অঞ্ঞমঞ্ঞসংসিলেসে ৰিঞ্ঞাতন্তি ৰুত্তং হোতি, গন্ধরসফোট্ঠব্বাযতনানমেতং অধিৰচনং।

    Mutanti mutvā munitvā ca gahitaṃ, āhacca upagantvāti attho, indriyānaṃ ārammaṇānañca aññamaññasaṃsilese viññātanti vuttaṃ hoti, gandharasaphoṭṭhabbāyatanānametaṃ adhivacanaṃ.

    ৰিঞ্ঞাতন্তি মনসা ৰিঞ্ঞাতং, সেসানং সত্তন্নং আযতনানমেতং অধিৰচনং ধম্মারম্মণস্স ৰা। ইধ পন সক্কাযপরিযাপন্নমেৰ লব্ভতি। ৰিত্থারো পনেত্থ দিট্ঠৰারে ৰুত্তনযেনেৰ ৰেদিতব্বো।

    Viññātanti manasā viññātaṃ, sesānaṃ sattannaṃ āyatanānametaṃ adhivacanaṃ dhammārammaṇassa vā. Idha pana sakkāyapariyāpannameva labbhati. Vitthāro panettha diṭṭhavāre vuttanayeneva veditabbo.

    দিট্ঠসুত্তৰারাদিৰণ্ণনা নিট্ঠিতা।

    Diṭṭhasuttavārādivaṇṇanā niṭṭhitā.

    একত্তৰারাদিৰণ্ণনা

    Ekattavārādivaṇṇanā

    ৬. এৰং সব্বং সক্কাযভেদং দিট্ঠাদীহি চতূহি দস্সেত্ৰা ইদানি তমেৰ সমাপন্নকৰারেন চ অসমাপন্নকৰারেন চ দ্ৰিধা দস্সেন্তো একত্তং নানত্তন্তিআদিমাহ।

    6. Evaṃ sabbaṃ sakkāyabhedaṃ diṭṭhādīhi catūhi dassetvā idāni tameva samāpannakavārena ca asamāpannakavārena ca dvidhā dassento ekattaṃ nānattantiādimāha.

    একত্তন্তি ইমিনা হি সমাপন্নকৰারং দস্সেতি। নানত্তন্তি ইমিনা অসমাপন্নকৰারং। তেসং অযং ৰচনত্থো একভাৰো একত্তং। নানাভাৰো নানত্তন্তি। যোজনা পনেত্থ সমাপন্নকৰারং চতূহি খন্ধেহি, অসমাপন্নকৰারঞ্চ পঞ্চহি খন্ধেহি ভিন্দিত্ৰা ‘‘রূপং অত্ততো সমনুপস্সতী’’তিআদিনা সাসননযেন পথৰীৰারাদীসু ৰুত্তেন চ অট্ঠকথানযেন যথানুরূপং ৰীমংসিত্ৰা ৰেদিতব্বা। কেচি পন একত্তন্তি একত্তনযং ৰদন্তি নানত্তন্তি নানত্তনযং। অপরে ‘‘একত্তসঞ্ঞী অত্তা হোতি অরোগো পরং মরণা, নানত্তসঞ্ঞী অত্তা হোতী’’তি এৰং দিট্ঠাভিনিৰেসং। তং সব্বং ইধ নাধিপ্পেতত্তা অযুত্তমেৰ হোতি।

    Ekattanti iminā hi samāpannakavāraṃ dasseti. Nānattanti iminā asamāpannakavāraṃ. Tesaṃ ayaṃ vacanattho ekabhāvo ekattaṃ. Nānābhāvo nānattanti. Yojanā panettha samāpannakavāraṃ catūhi khandhehi, asamāpannakavārañca pañcahi khandhehi bhinditvā ‘‘rūpaṃ attato samanupassatī’’tiādinā sāsananayena pathavīvārādīsu vuttena ca aṭṭhakathānayena yathānurūpaṃ vīmaṃsitvā veditabbā. Keci pana ekattanti ekattanayaṃ vadanti nānattanti nānattanayaṃ. Apare ‘‘ekattasaññī attā hoti arogo paraṃ maraṇā, nānattasaññī attā hotī’’ti evaṃ diṭṭhābhinivesaṃ. Taṃ sabbaṃ idha nādhippetattā ayuttameva hoti.

    এৰং সব্বং সক্কাযং দ্ৰিধা দস্সেত্ৰা ইদানি তমেৰ একধা সম্পিণ্ডেত্ৰা দস্সেন্তো সব্বং সব্বতোতিআদিমাহ। যোজনানযো পনেত্থ সব্বং অস্সাদেন্তো সব্বং তণ্হামঞ্ঞনায মঞ্ঞতি। ‘‘মযা এতে সত্তা নিম্মিতা’’তিআদিনা নযেন অত্তনা নিম্মিতং মঞ্ঞন্তো সব্বং মানমঞ্ঞনায মঞ্ঞতি। ‘‘সব্বং পুব্বেকতকম্মহেতু, সব্বং ইস্সরনিম্মানহেতু, সব্বং অহেতুঅপচ্চযা, সব্বং অত্থি, সব্বং নত্থী’’তিআদিনা নযেন মঞ্ঞন্তো সব্বং দিট্ঠিমঞ্ঞনায মঞ্ঞতীতি ৰেদিতব্বো। কথং সব্বস্মিং মঞ্ঞতি? ইধেকচ্চো এৰংদিট্ঠিকো হোতি ‘‘মহা মে অত্তা’’তি। সো সব্বলোকসন্নিৰাসং তস্সোকাসভাৰেন পরিকপ্পেত্ৰা সো খো পন মে অযং অত্তা সব্বস্মিন্তি মঞ্ঞতি, অযমস্স দিট্ঠিমঞ্ঞনা। তস্মিংযেৰ পনস্স অত্তনি সিনেহং তব্বত্থুকঞ্চ মানং উপ্পাদযতো তণ্হামানমঞ্ঞনাপি ৰেদিতব্বা। সেসং পথৰীৰারে ৰুত্তনযেনেৰ ৰেদিতব্বং।

    Evaṃ sabbaṃ sakkāyaṃ dvidhā dassetvā idāni tameva ekadhā sampiṇḍetvā dassento sabbaṃ sabbatotiādimāha. Yojanānayo panettha sabbaṃ assādento sabbaṃ taṇhāmaññanāya maññati. ‘‘Mayā ete sattā nimmitā’’tiādinā nayena attanā nimmitaṃ maññanto sabbaṃ mānamaññanāya maññati. ‘‘Sabbaṃ pubbekatakammahetu, sabbaṃ issaranimmānahetu, sabbaṃ ahetuapaccayā, sabbaṃ atthi, sabbaṃ natthī’’tiādinā nayena maññanto sabbaṃ diṭṭhimaññanāya maññatīti veditabbo. Kathaṃ sabbasmiṃ maññati? Idhekacco evaṃdiṭṭhiko hoti ‘‘mahā me attā’’ti. So sabbalokasannivāsaṃ tassokāsabhāvena parikappetvā so kho pana me ayaṃ attā sabbasminti maññati, ayamassa diṭṭhimaññanā. Tasmiṃyeva panassa attani sinehaṃ tabbatthukañca mānaṃ uppādayato taṇhāmānamaññanāpi veditabbā. Sesaṃ pathavīvāre vuttanayeneva veditabbaṃ.

    এৰং সব্বং সক্কাযং একধা দস্সেত্ৰা ইদানি অপরেনপি নযেন তং একধা দস্সেন্তো নিব্বানং নিব্বানতোতি আহ। তত্থ নিব্বানন্তি ‘‘যতো খো, ভো, অযং অত্তা পঞ্চহি কামগুণেহি সমপ্পিতো সমঙ্গিভূতো পরিচারেতি। এত্তাৰতা খো, ভো, অযং অত্তা পরমদিট্ঠধম্মনিব্বানং পত্তো হোতী’’তিআদিনা নযেন পঞ্চধা আগতং পরমদিট্ঠধম্মনিব্বানং ৰেদিতব্বং। তত্থ নিব্বানং অস্সাদেন্তো তণ্হামঞ্ঞনায মঞ্ঞতি। তেন নিব্বানেন ‘‘অহমস্মি নিব্বানং পত্তো’’তি মানং জনেন্তো মানমঞ্ঞনায মঞ্ঞতি। অনিব্বানংযেৰ সমানং তং নিব্বানতো নিচ্চাদিতো চ গণ্হন্তো দিট্ঠিমঞ্ঞনায মঞ্ঞতীতি ৰেদিতব্বো।

    Evaṃ sabbaṃ sakkāyaṃ ekadhā dassetvā idāni aparenapi nayena taṃ ekadhā dassento nibbānaṃ nibbānatoti āha. Tattha nibbānanti ‘‘yato kho, bho, ayaṃ attā pañcahi kāmaguṇehi samappito samaṅgibhūto paricāreti. Ettāvatā kho, bho, ayaṃ attā paramadiṭṭhadhammanibbānaṃ patto hotī’’tiādinā nayena pañcadhā āgataṃ paramadiṭṭhadhammanibbānaṃ veditabbaṃ. Tattha nibbānaṃ assādento taṇhāmaññanāya maññati. Tena nibbānena ‘‘ahamasmi nibbānaṃ patto’’ti mānaṃ janento mānamaññanāya maññati. Anibbānaṃyeva samānaṃ taṃ nibbānato niccādito ca gaṇhanto diṭṭhimaññanāya maññatīti veditabbo.

    নিব্বানতো পন অঞ্ঞং অত্তানং গহেত্ৰা সো খো পন মে অযং অত্তা ইমস্মিং নিব্বানেতি মঞ্ঞন্তো নিব্বানস্মিং মঞ্ঞতি, অযমস্স দিট্ঠিমঞ্ঞনা। তস্মিংযেৰ পনস্স অত্তনি সিনেহং তব্বত্থুকঞ্চ মানং উপ্পাদযতো তণ্হামানমঞ্ঞনাপি ৰেদিতব্বা। এস নযো নিব্বানতো মঞ্ঞনাযপি। তত্রপি হি নিব্বানতো অঞ্ঞং অত্তানং গহেত্ৰা ‘‘ইদং নিব্বানং, অযং অত্তা, সো খো পন মে অযং অত্তা ইতো নিব্বানতো অঞ্ঞো’’তি মঞ্ঞন্তো নিব্বানতো মঞ্ঞতি, অযমস্স দিট্ঠিমঞ্ঞনা। তস্মিংযেৰ পনস্স অত্তনি সিনেহং তব্বত্থুকঞ্চ মানং উপ্পাদযতো তণ্হামানমঞ্ঞনাপি ৰেদিতব্বা। ‘‘অহো সুখং মম নিব্বান’’ন্তি মঞ্ঞন্তো পন নিব্বানং মেতি মঞ্ঞতীতি ৰেদিতব্বো। সেসং ৰুত্তনযমেৰ। অযং পনেত্থ অনুগীতি –

    Nibbānato pana aññaṃ attānaṃ gahetvā so kho pana me ayaṃ attā imasmiṃ nibbāneti maññanto nibbānasmiṃ maññati, ayamassa diṭṭhimaññanā. Tasmiṃyeva panassa attani sinehaṃ tabbatthukañca mānaṃ uppādayato taṇhāmānamaññanāpi veditabbā. Esa nayo nibbānato maññanāyapi. Tatrapi hi nibbānato aññaṃ attānaṃ gahetvā ‘‘idaṃ nibbānaṃ, ayaṃ attā, so kho pana me ayaṃ attā ito nibbānato añño’’ti maññanto nibbānato maññati, ayamassa diṭṭhimaññanā. Tasmiṃyeva panassa attani sinehaṃ tabbatthukañca mānaṃ uppādayato taṇhāmānamaññanāpi veditabbā. ‘‘Aho sukhaṃ mama nibbāna’’nti maññanto pana nibbānaṃ meti maññatīti veditabbo. Sesaṃ vuttanayameva. Ayaṃ panettha anugīti –

    যাদিসো এস সক্কাযো, তথা নং অৰিজানতো।

    Yādiso esa sakkāyo, tathā naṃ avijānato;

    পুথুজ্জনস্স সক্কাযে, জাযন্তি সব্বমঞ্ঞনা॥

    Puthujjanassa sakkāye, jāyanti sabbamaññanā.

    জেগুচ্ছো ভিদুরো চাযং, দুক্খো অপরিণাযকো।

    Jeguccho bhiduro cāyaṃ, dukkho apariṇāyako;

    তং পচ্চনীকতো বালো, গণ্হং গণ্হাতি মঞ্ঞনং॥

    Taṃ paccanīkato bālo, gaṇhaṃ gaṇhāti maññanaṃ.

    সুভতো সুখতো চেৰ, সক্কাযং অনুপস্সতো।

    Subhato sukhato ceva, sakkāyaṃ anupassato;

    সলভস্সেৰ অগ্গিম্হি, হোতি তণ্হায মঞ্ঞনা॥

    Salabhasseva aggimhi, hoti taṇhāya maññanā.

    নিচ্চসঞ্ঞং অধিট্ঠায, সম্পত্তিং তস্স পস্সতো।

    Niccasaññaṃ adhiṭṭhāya, sampattiṃ tassa passato;

    গূথাদী ৰিয গূথস্মিং, হোতি মানেন মঞ্ঞনা॥

    Gūthādī viya gūthasmiṃ, hoti mānena maññanā.

    অত্তা অত্তনিযো মেতি, পস্সতো নং অবুদ্ধিনো।

    Attā attaniyo meti, passato naṃ abuddhino;

    আদাসে ৰিয বোন্ধিস্স, দিট্ঠিযা হোতি মঞ্ঞনা॥

    Ādāse viya bondhissa, diṭṭhiyā hoti maññanā.

    মঞ্ঞনাতি চ নামেতং, সুখুমং মারবন্ধনং।

    Maññanāti ca nāmetaṃ, sukhumaṃ mārabandhanaṃ;

    সিথিলং দুপ্পমুঞ্চঞ্চ, যেন বদ্ধো পুথুজ্জনো॥

    Sithilaṃ duppamuñcañca, yena baddho puthujjano.

    বহুং ৰিপ্ফন্দমানোপি, সক্কাযং নাতিৰত্ততি।

    Bahuṃ vipphandamānopi, sakkāyaṃ nātivattati;

    সমুস্সিতং দল়্হত্থম্ভং, সাৰ গদ্দুলবন্ধনো॥

    Samussitaṃ daḷhatthambhaṃ, sāva gaddulabandhano.

    স’সো সক্কাযমলীনো, জাতিযা চ জরায চ।

    Sa’so sakkāyamalīno, jātiyā ca jarāya ca;

    রোগাদীহি চ দুক্খেহি, নিচ্চং হঞ্ঞতি বাল়্হসো॥

    Rogādīhi ca dukkhehi, niccaṃ haññati bāḷhaso.

    তং ৰো ৰদামি ভদ্দন্তে, সক্কাযং অনুপস্সথ।

    Taṃ vo vadāmi bhaddante, sakkāyaṃ anupassatha;

    অসাততো অসুভতো, ভেদতো চ অনত্ততো॥

    Asātato asubhato, bhedato ca anattato.

    এসো সভাৰো হেতস্স, পস্সং এৰমিমং বুধো।

    Eso sabhāvo hetassa, passaṃ evamimaṃ budho;

    পহায মঞ্ঞনা সব্বা, সব্বদুক্খা পমুচ্চতীতি॥

    Pahāya maññanā sabbā, sabbadukkhā pamuccatīti.

    একত্তৰারাদিৰণ্ণনা নিট্ঠিতা।

    Ekattavārādivaṇṇanā niṭṭhitā.

    পুথুজ্জনৰসেন চতুৰীসতিপব্বা পঠমনযকথা নিট্ঠিতা।

    Puthujjanavasena catuvīsatipabbā paṭhamanayakathā niṭṭhitā.

    সেক্খৰারদুতিযনযৰণ্ণনা

    Sekkhavāradutiyanayavaṇṇanā

    ৭. এৰং ভগৰা পথৰীআদীসু ৰত্থূসু সব্বসক্কাযধম্মমূলভূতং পুথুজ্জনস্স পৰত্তিং দস্সেত্ৰা ইদানি তেস্ৰেৰ ৰত্থূসু সেক্খস্স পৰত্তিং দস্সেন্তো যোপি সো, ভিক্খৰে, ভিক্খু সেক্খোতিআদিমাহ। তত্থ যোতি উদ্দেসৰচনং। সোতি নিদ্দেসৰচনং। পিকারো সম্পিণ্ডনত্থো অযম্পি ধম্মো অনিযতোতিআদীসু ৰিয। তেন চ আরম্মণসভাগেন পুগ্গলং সম্পিণ্ডেতি, নো পুগ্গলসভাগেন, হেট্ঠতো হি পুগ্গলা দিট্ঠিৰিপন্না, ইধ দিট্ঠিসম্পন্না, ন তেসং সভাগতা অত্থি। আরম্মণং পন হেট্ঠা পুগ্গলানম্পি তদেৰ, ইমেসম্পি তদেৰাতি। তেন ৰুত্তং ‘‘আরম্মণসভাগেন পুগ্গলং সম্পিণ্ডেতি নো পুগ্গলসভাগেনা’’তি। যোপি সোতি ইমিনা পন সকলেন ৰচনেন ইদানি ৰত্তব্বং সেক্খং দস্সেতীতি ৰেদিতব্বো। ভিক্খৰে, ভিক্খূতি ইদং ৰুত্তনযমেৰ।

    7. Evaṃ bhagavā pathavīādīsu vatthūsu sabbasakkāyadhammamūlabhūtaṃ puthujjanassa pavattiṃ dassetvā idāni tesveva vatthūsu sekkhassa pavattiṃ dassento yopi so, bhikkhave, bhikkhu sekkhotiādimāha. Tattha yoti uddesavacanaṃ. Soti niddesavacanaṃ. Pikāro sampiṇḍanattho ayampi dhammo aniyatotiādīsu viya. Tena ca ārammaṇasabhāgena puggalaṃ sampiṇḍeti, no puggalasabhāgena, heṭṭhato hi puggalā diṭṭhivipannā, idha diṭṭhisampannā, na tesaṃ sabhāgatā atthi. Ārammaṇaṃ pana heṭṭhā puggalānampi tadeva, imesampi tadevāti. Tena vuttaṃ ‘‘ārammaṇasabhāgena puggalaṃ sampiṇḍeti no puggalasabhāgenā’’ti. Yopi soti iminā pana sakalena vacanena idāni vattabbaṃ sekkhaṃ dassetīti veditabbo. Bhikkhave, bhikkhūti idaṃ vuttanayameva.

    সেক্খোতি কেনট্ঠেন সেক্খো? সেক্খধম্মপ্পটিলাভতো সেক্খো। ৰুত্তঞ্হেতং ‘‘কিত্তাৰতা নু খো, ভন্তে, সেক্খো হোতীতি? ইধ, ভিক্খৰে, ভিক্খু সেক্খায সম্মাদিট্ঠিযা সমন্নাগতো হোতি…পে॰… সেক্খেন সম্মাসমাধিনা সমন্নাগতো হোতি। এত্তাৰতা খো ভিক্খু, সেক্খো হোতী’’তি (সং॰ নি॰ ৫.১৩)। অপিচ সিক্খতীতিপি সেক্খো। ৰুত্তঞ্হেতং ‘‘সিক্খতীতি খো ভিক্খু তস্মা সেক্খোতি ৰুচ্চতি। কিঞ্চ সিক্খতি? অধিসীলম্পি সিক্খতি, অধিচিত্তম্পি সিক্খতি, অধিপঞ্ঞম্পি সিক্খতি, সিক্খতীতি খো ভিক্খু তস্মা সেক্খোতি ৰুচ্চতী’’তি (অ॰ নি॰ ৩.৮৬)।

    Sekkhoti kenaṭṭhena sekkho? Sekkhadhammappaṭilābhato sekkho. Vuttañhetaṃ ‘‘kittāvatā nu kho, bhante, sekkho hotīti? Idha, bhikkhave, bhikkhu sekkhāya sammādiṭṭhiyā samannāgato hoti…pe… sekkhena sammāsamādhinā samannāgato hoti. Ettāvatā kho bhikkhu, sekkho hotī’’ti (saṃ. ni. 5.13). Apica sikkhatītipi sekkho. Vuttañhetaṃ ‘‘sikkhatīti kho bhikkhu tasmā sekkhoti vuccati. Kiñca sikkhati? Adhisīlampi sikkhati, adhicittampi sikkhati, adhipaññampi sikkhati, sikkhatīti kho bhikkhu tasmā sekkhoti vuccatī’’ti (a. ni. 3.86).

    যোপি কল্যাণপুথুজ্জনো অনুলোমপটিপদায পরিপূরকারী সীলসম্পন্নো ইন্দ্রিযেসু গুত্তদ্ৰারো ভোজনে মত্তঞ্ঞূ জাগরিযানুযোগমনুযুত্তো পুব্বরত্তাপররত্তং বোধিপক্খিযানং ধম্মানং ভাৰনানুযোগমনুযুত্তো ৰিহরতি – ‘‘অজ্জ ৰা স্ৰে ৰা অঞ্ঞতরং সামঞ্ঞফলং অধিগমিস্সামী’’তি, সোপি ৰুচ্চতি সিক্খতীতি সেক্খোতি। ইমস্মিং পনত্থে পটিৰেধপ্পত্তোৰ সেক্খো অধিপ্পেতো, নো পুথুজ্জনো।

    Yopi kalyāṇaputhujjano anulomapaṭipadāya paripūrakārī sīlasampanno indriyesu guttadvāro bhojane mattaññū jāgariyānuyogamanuyutto pubbarattāpararattaṃ bodhipakkhiyānaṃ dhammānaṃ bhāvanānuyogamanuyutto viharati – ‘‘ajja vā sve vā aññataraṃ sāmaññaphalaṃ adhigamissāmī’’ti, sopi vuccati sikkhatīti sekkhoti. Imasmiṃ panatthe paṭivedhappattova sekkho adhippeto, no puthujjano.

    অপ্পত্তং মানসং এতেনাতি অপ্পত্তমানসো। মানসন্তি রাগোপি চিত্তম্পি অরহত্তম্পি। ‘‘অন্তলিক্খচরো পাসো, য্ৰাযং চরতি মানসো’’তি (মহাৰ॰ ৩৩; সং॰ নি॰ ১.১৫১) এত্থ হি রাগো মানসং। ‘‘চিত্তং মনো মানস’’ন্তি (ধ॰ স॰ ৬৫) এত্থ চিত্তং। ‘‘অপ্পত্তমানসো সেক্খো, কালং কযিরা জনেসুতা’’তি (সং॰ নি॰ ১.১৫৯) এত্থ অরহত্তং। ইধাপি অরহত্তমেৰ অধিপ্পেতং। তেন অপ্পত্তারহত্তোতি ৰুত্তং হোতি।

    Appattaṃ mānasaṃ etenāti appattamānaso. Mānasanti rāgopi cittampi arahattampi. ‘‘Antalikkhacaro pāso, yvāyaṃ carati mānaso’’ti (mahāva. 33; saṃ. ni. 1.151) ettha hi rāgo mānasaṃ. ‘‘Cittaṃ mano mānasa’’nti (dha. sa. 65) ettha cittaṃ. ‘‘Appattamānaso sekkho, kālaṃ kayirā janesutā’’ti (saṃ. ni. 1.159) ettha arahattaṃ. Idhāpi arahattameva adhippetaṃ. Tena appattārahattoti vuttaṃ hoti.

    অনুত্তরন্তি সেট্ঠং, অসদিসন্তি অত্থো। চতূহি যোগেহি খেমং অননুযুত্তন্তি যোগক্খেমং, অরহত্তমেৰ অধিপ্পেতং। পত্থযমানোতি দ্ৰে পত্থনা তণ্হাপত্থনা চ, ছন্দপত্থনা চ। ‘‘পত্থযমানস্স হি পজপ্পিতানি, পৰেধিতং ৰাপি পকপ্পিতেসূ’’তি (সু॰ নি॰ ৯০৮) এত্থ তণ্হাপত্থনা।

    Anuttaranti seṭṭhaṃ, asadisanti attho. Catūhi yogehi khemaṃ ananuyuttanti yogakkhemaṃ, arahattameva adhippetaṃ. Patthayamānoti dve patthanā taṇhāpatthanā ca, chandapatthanā ca. ‘‘Patthayamānassa hi pajappitāni, pavedhitaṃ vāpi pakappitesū’’ti (su. ni. 908) ettha taṇhāpatthanā.

    ‘‘ছিন্নং পাপিমতো সোতং, ৰিদ্ধস্তং ৰিনল়ীকতং।

    ‘‘Chinnaṃ pāpimato sotaṃ, viddhastaṃ vinaḷīkataṃ;

    পামোজ্জবহুলা হোথ, খেমং পত্তত্থ ভিক্খৰো’’তি॥ (ম॰ নি॰ ১.৩৫২) –

    Pāmojjabahulā hotha, khemaṃ pattattha bhikkhavo’’ti. (ma. ni. 1.352) –

    এত্থ কত্তুকম্যতা কুসলচ্ছন্দপত্থনা। অযমেৰ ইধাধিপ্পেতা। তেন পত্থযমানোতি তং যোগক্খেমং পত্তুকামো অধিগন্তুকামো তন্নিন্নো তপ্পোণো তপ্পব্ভারোতি ৰেদিতব্বো। ৰিহরতীতি অঞ্ঞং ইরিযাপথদুক্খং অঞ্ঞেন ইরিযাপথেন ৰিচ্ছিন্দিত্ৰা অপরিপতন্তং কাযং হরতি। অথ ৰা ‘‘সব্বে সঙ্খারা অনিচ্চাতি অধিমুচ্চন্তো সদ্ধায ৰিহরতী’’তিআদিনাপি নিদ্দেসনযেনেত্থ অত্থো দট্ঠব্বো। পথৰিং পথৰিতো অভিজানাতীতি পথৰিং পথৰীভাৰেন অভিজানাতি, ন পুথুজ্জনো ৰিয সব্বাকারৰিপরীতায সঞ্ঞায সঞ্জানাতি। অপিচ খো অভিৰিসিট্ঠেন ঞাণেন জানাতি, এৰং পথৰীতি এতং পথৰীভাৰং অধিমুচ্চন্তো এৰ নং অনিচ্চাতিপি দুক্খাতিপি অনত্তাতিপি এৰং অভিজানাতীতি ৰুত্তং হোতি। এৰঞ্চ নং অভিঞ্ঞত্ৰা পথৰিং মা মঞ্ঞীতি ৰুত্তং হোতি। মঞ্ঞতীতি মঞ্ঞি। অযং পন মঞ্ঞী চ ন মঞ্ঞী চ ন ৰত্তব্বোতি। এতস্মিঞ্হি অত্থে ইদং পদং নিপাতেত্ৰা ৰুত্তন্তি ৰেদিতব্বং। কো পনেত্থ অধিপ্পাযোতি। ৰুচ্চতে, পুথুজ্জনো তাৰ সব্বমঞ্ঞনানং অপ্পহীনত্তা মঞ্ঞতীতি ৰুত্তো। খীণাসৰো পহীনত্তা ন মঞ্ঞতীতি। সেক্খস্স পন দিট্ঠিমঞ্ঞনা পহীনা, ইতরা পন তনুভাৰং গতা, তেন সো মঞ্ঞতীতিপি ন ৰত্তব্বো পুথুজ্জনো ৰিয, ন মঞ্ঞতীতিপি ন ৰত্তব্বো খীণাসৰো ৰিযাতি।

    Ettha kattukamyatā kusalacchandapatthanā. Ayameva idhādhippetā. Tena patthayamānoti taṃ yogakkhemaṃ pattukāmo adhigantukāmo tanninno tappoṇo tappabbhāroti veditabbo. Viharatīti aññaṃ iriyāpathadukkhaṃ aññena iriyāpathena vicchinditvā aparipatantaṃ kāyaṃ harati. Atha vā ‘‘sabbe saṅkhārā aniccāti adhimuccanto saddhāya viharatī’’tiādināpi niddesanayenettha attho daṭṭhabbo. Pathaviṃ pathavito abhijānātīti pathaviṃ pathavībhāvena abhijānāti, na puthujjano viya sabbākāraviparītāya saññāya sañjānāti. Apica kho abhivisiṭṭhena ñāṇena jānāti, evaṃ pathavīti etaṃ pathavībhāvaṃ adhimuccanto eva naṃ aniccātipi dukkhātipi anattātipi evaṃ abhijānātīti vuttaṃ hoti. Evañca naṃ abhiññatvā pathaviṃ mā maññīti vuttaṃ hoti. Maññatīti maññi. Ayaṃ pana maññī ca na maññī ca na vattabboti. Etasmiñhi atthe idaṃ padaṃ nipātetvā vuttanti veditabbaṃ. Ko panettha adhippāyoti. Vuccate, puthujjano tāva sabbamaññanānaṃ appahīnattā maññatīti vutto. Khīṇāsavo pahīnattā na maññatīti. Sekkhassa pana diṭṭhimaññanā pahīnā, itarā pana tanubhāvaṃ gatā, tena so maññatītipi na vattabbo puthujjano viya, na maññatītipi na vattabbo khīṇāsavo viyāti.

    পরিঞ্ঞেয্যং তস্সাতি তস্স সেক্খস্স তং মঞ্ঞনাৰত্থু ওক্কন্তনিযামত্তা সম্বোধিপরাযণত্তা চ তীহি পরিঞ্ঞাহি পরিঞ্ঞেয্যং, অপরিঞ্ঞেয্যঞ্চ অপরিঞ্ঞাতঞ্চ ন হোতি পুথুজ্জনস্স ৰিয, নোপি পরিঞ্ঞাতং খীণাসৰস্স ৰিয। সেসং সব্বত্থ ৰুত্তনযমেৰ।

    Pariññeyyaṃ tassāti tassa sekkhassa taṃ maññanāvatthu okkantaniyāmattā sambodhiparāyaṇattā ca tīhi pariññāhi pariññeyyaṃ, apariññeyyañca apariññātañca na hoti puthujjanassa viya, nopi pariññātaṃ khīṇāsavassa viya. Sesaṃ sabbattha vuttanayameva.

    সেক্খৰসেন দুতিযনযকথা নিট্ঠিতা।

    Sekkhavasena dutiyanayakathā niṭṭhitā.

    খীণাসৰৰারততিযাদিনযৰণ্ণনা

    Khīṇāsavavāratatiyādinayavaṇṇanā

    ৮. এৰং পথৰীআদীসু ৰত্থূসু সেক্খস্স পৰত্তিং দস্সেত্ৰা ইদানি খীণাসৰস্স পৰত্তিং দস্সেন্তো যোপি সো, ভিক্খৰে, ভিক্খু অরহন্তিআদিমাহ। তত্থ যোপীতি পি-সদ্দো সম্পিণ্ডনত্থো। তেন ইধ উভযসভাগতাপি লব্ভতীতি দস্সেতি। সেক্খো হি খীণাসৰেন অরিযপুগ্গলত্তা সভাগো, তেন পুগ্গলসভাগতা লব্ভতি, আরম্মণসভাগতা পন ৰুত্তনযা এৰ। অরহন্তি আরককিলেসো, দূরকিলেসো পহীনকিলেসোতি অত্থো। ৰুত্তঞ্চেতং ভগৰতা ‘‘কথঞ্চ , ভিক্খৰে, ভিক্খু অরহং হোতি? আরকাস্স হোন্তি পাপকা অকুসলা ধম্মা সংকিলেসিকা পোনোব্ভৰিকা সদরা দুক্খৰিপাকা আযতিং জাতিজরামরণিযা। এৰং খো, ভিক্খৰে, ভিক্খু অরহং হোতী’’তি। (ম॰ নি॰ ১.৪৩৪) খীণাসৰোতি চত্তারো আসৰা কামাসৰো…পে॰… অৰিজ্জাসৰো, ইমে চত্তারো আসৰা অরহতো খীণা পহীনা সমুচ্ছিন্না পটিপ্পস্সদ্ধা, অভব্বুপ্পত্তিকা ঞাণগ্গিনা দড্ঢা, তেন ৰুচ্চতি খীণাসৰোতি।

    8. Evaṃ pathavīādīsu vatthūsu sekkhassa pavattiṃ dassetvā idāni khīṇāsavassa pavattiṃ dassento yopi so, bhikkhave, bhikkhu arahantiādimāha. Tattha yopīti pi-saddo sampiṇḍanattho. Tena idha ubhayasabhāgatāpi labbhatīti dasseti. Sekkho hi khīṇāsavena ariyapuggalattā sabhāgo, tena puggalasabhāgatā labbhati, ārammaṇasabhāgatā pana vuttanayā eva. Arahanti ārakakileso, dūrakileso pahīnakilesoti attho. Vuttañcetaṃ bhagavatā ‘‘kathañca , bhikkhave, bhikkhu arahaṃ hoti? Ārakāssa honti pāpakā akusalā dhammā saṃkilesikā ponobbhavikā sadarā dukkhavipākā āyatiṃ jātijarāmaraṇiyā. Evaṃ kho, bhikkhave, bhikkhu arahaṃ hotī’’ti. (Ma. ni. 1.434) khīṇāsavoti cattāro āsavā kāmāsavo…pe… avijjāsavo, ime cattāro āsavā arahato khīṇā pahīnā samucchinnā paṭippassaddhā, abhabbuppattikā ñāṇagginā daḍḍhā, tena vuccati khīṇāsavoti.

    ৰুসিতৰাতি গরুসংৰাসেপি অরিযমগ্গসংৰাসেপি দসসু অরিযৰাসেসুপি ৰসি পরিৰসি ৰুত্থো পরিৰুত্থো, সো ৰুত্থৰাসো চিণ্ণচরণোতি ৰুসিতৰা কতকরণীযোতি পুথুজ্জনকল্যাণকং উপাদায সত্ত সেক্খা চতূহি মগ্গেহি করণীযং করোন্তি নাম, খীণাসৰস্স সব্বকরণীযানি কতানি পরিযোসিতানি, নত্থি তস্স উত্তরি করণীযং দুক্খক্খযাধিগমাযাতি কতকরণীযো। ৰুত্তম্পি হেতং –

    Vusitavāti garusaṃvāsepi ariyamaggasaṃvāsepi dasasu ariyavāsesupi vasi parivasi vuttho parivuttho, so vutthavāso ciṇṇacaraṇoti vusitavā katakaraṇīyoti puthujjanakalyāṇakaṃ upādāya satta sekkhā catūhi maggehi karaṇīyaṃ karonti nāma, khīṇāsavassa sabbakaraṇīyāni katāni pariyositāni, natthi tassa uttari karaṇīyaṃ dukkhakkhayādhigamāyāti katakaraṇīyo. Vuttampi hetaṃ –

    ‘‘তস্স সম্মা ৰিমুত্তস্স, সন্তচিত্তস্স ভিক্খুনো।

    ‘‘Tassa sammā vimuttassa, santacittassa bhikkhuno;

    কতস্স পটিচযো নত্থি, করণীযং ন ৰিজ্জতী’’তি॥ (থেরগা॰ ৬৪২)।

    Katassa paṭicayo natthi, karaṇīyaṃ na vijjatī’’ti. (theragā. 642);

    ওহিতভারোতি তযো ভারা খন্ধভারো কিলেসভারো অভিসঙ্খারভারোতি, তস্সিমে তযো ভারা ওহিতা ওরোপিতা নিক্খিত্তা পাতিতা, তেন ৰুচ্চতি ওহিতভারোতি। অনুপ্পত্তসদত্থোতি অনুপ্পত্তো সদত্থং, সকত্থন্তি ৰুত্তং হোতি। ককারস্সাযং দকারো কতো, সদত্থোতি চ অরহত্তং ৰেদিতব্বং। তঞ্হি অত্তুপনিবন্ধনট্ঠেন অত্তানং অৰিজহনট্ঠেন অত্তনো পরমত্থট্ঠেন চ অত্তনো অত্থো সকত্থোতি ৰুচ্চতি।

    Ohitabhāroti tayo bhārā khandhabhāro kilesabhāro abhisaṅkhārabhāroti, tassime tayo bhārā ohitā oropitā nikkhittā pātitā, tena vuccati ohitabhāroti. Anuppattasadatthoti anuppatto sadatthaṃ, sakatthanti vuttaṃ hoti. Kakārassāyaṃ dakāro kato, sadatthoti ca arahattaṃ veditabbaṃ. Tañhi attupanibandhanaṭṭhena attānaṃ avijahanaṭṭhena attano paramatthaṭṭhena ca attano attho sakatthoti vuccati.

    পরিক্খীণভৰসংযোজনোতি ভৰসংযোজনানীতি দস সংযোজনানি কামরাগসংযোজনং পটিঘমানদিট্ঠিৰিচিকিচ্ছাসীলব্বতপরামাসভৰরাগইস্সামচ্ছরিযসংযোজনং অৰিজ্জাসংযোজনং। ইমানি হি সত্তে ভৰেসু সংযোজেন্তি উপনিবন্ধন্তি, ভৰং ৰা ভৰেন সংযোজেন্তি, তস্মা ‘‘ভৰসংযোজনানী’’তি ৰুচ্চন্তি। ইমানি ভৰসংযোজনানি অরহতো পরিক্খীণানি পহীনানি ঞাণগ্গিনা দড্ঢানি, তেন ৰুচ্চতি ‘‘পরিক্খীণভৰসংযোজনো’’তি। সম্মদঞ্ঞা ৰিমুত্তোতি এত্থ সম্মদঞ্ঞাতি সম্মা অঞ্ঞায। কিং ৰুত্তং হোতি – খন্ধানং খন্ধট্ঠং, আযতনানং আযতনট্ঠং, ধাতূনং ধাতুট্ঠং, দুক্খস্স পীল়নট্ঠং, সমুদযস্স পভৰট্ঠং, নিরোধস্স সন্তট্ঠং, মগ্গস্স দস্সনট্ঠং, সব্বে সঙ্খারা অনিচ্চাতি এৰমাদিং ৰা ভেদং সম্মা যথাভূতং অঞ্ঞায জানিত্ৰা তীরযিত্ৰা তুলযিত্ৰা ৰিভাৰেত্ৰা ৰিভূতং কত্ৰাতি।

    Parikkhīṇabhavasaṃyojanoti bhavasaṃyojanānīti dasa saṃyojanāni kāmarāgasaṃyojanaṃ paṭighamānadiṭṭhivicikicchāsīlabbataparāmāsabhavarāgaissāmacchariyasaṃyojanaṃ avijjāsaṃyojanaṃ. Imāni hi satte bhavesu saṃyojenti upanibandhanti, bhavaṃ vā bhavena saṃyojenti, tasmā ‘‘bhavasaṃyojanānī’’ti vuccanti. Imāni bhavasaṃyojanāni arahato parikkhīṇāni pahīnāni ñāṇagginā daḍḍhāni, tena vuccati ‘‘parikkhīṇabhavasaṃyojano’’ti. Sammadaññā vimuttoti ettha sammadaññāti sammā aññāya. Kiṃ vuttaṃ hoti – khandhānaṃ khandhaṭṭhaṃ, āyatanānaṃ āyatanaṭṭhaṃ, dhātūnaṃ dhātuṭṭhaṃ, dukkhassa pīḷanaṭṭhaṃ, samudayassa pabhavaṭṭhaṃ, nirodhassa santaṭṭhaṃ, maggassa dassanaṭṭhaṃ, sabbe saṅkhārā aniccāti evamādiṃ vā bhedaṃ sammā yathābhūtaṃ aññāya jānitvā tīrayitvā tulayitvā vibhāvetvā vibhūtaṃ katvāti.

    ৰিমুত্তোতি দ্ৰে ৰিমুত্তিযো চিত্তস্স চ ৰিমুত্তি নিব্বানঞ্চ। অরহা সব্বকিলেসেহি ৰিমুত্তচিত্তত্তা চিত্তৰিমুত্তিযাপি ৰিমুত্তো। নিব্বানং অধিমুত্তত্তা নিব্বানেপি ৰিমুত্তো। তেন ৰুচ্চতি ‘‘সম্মদঞ্ঞা ৰিমুত্তো’’তি। পরিঞ্ঞাতং তস্সাতি তস্স অরহতো তং মঞ্ঞনাৰত্থু তীহি পরিঞ্ঞাহি পরিঞ্ঞাতং। তস্মা সো তং ৰত্থুং ন মঞ্ঞতি, তং ৰা মঞ্ঞনং ন মঞ্ঞতীতি ৰুত্তং হোতি, সেসং ৰুত্তনযমেৰ।

    Vimuttoti dve vimuttiyo cittassa ca vimutti nibbānañca. Arahā sabbakilesehi vimuttacittattā cittavimuttiyāpi vimutto. Nibbānaṃ adhimuttattā nibbānepi vimutto. Tena vuccati ‘‘sammadaññā vimutto’’ti. Pariññātaṃ tassāti tassa arahato taṃ maññanāvatthu tīhi pariññāhi pariññātaṃ. Tasmā so taṃ vatthuṃ na maññati, taṃ vā maññanaṃ na maññatīti vuttaṃ hoti, sesaṃ vuttanayameva.

    নিব্বানৰারে পন খযা রাগস্সাতিআদযো তযো ৰারা ৰুত্তা। তে পথৰীৰারাদীসুপি ৰিত্থারেতব্বা। অযঞ্চ পরিঞ্ঞাতৰারো নিব্বানৰারেপি ৰিত্থারেতব্বো। ৰিত্থারেন্তেন চ পরিঞ্ঞাতং তস্সাতি সব্বপদেহি যোজেত্ৰা পুন খযা রাগস্স ৰীতরাগত্তাতি যোজেতব্বং। এস নযো ইতরেসু। দেসনা পন একত্থ ৰুত্তং সব্বত্থ ৰুত্তমেৰ হোতীতি সংখিত্তা।

    Nibbānavāre pana khayā rāgassātiādayo tayo vārā vuttā. Te pathavīvārādīsupi vitthāretabbā. Ayañca pariññātavāro nibbānavārepi vitthāretabbo. Vitthārentena ca pariññātaṃ tassāti sabbapadehi yojetvā puna khayā rāgassa vītarāgattāti yojetabbaṃ. Esa nayo itaresu. Desanā pana ekattha vuttaṃ sabbattha vuttameva hotīti saṃkhittā.

    খযা রাগস্স ৰীতরাগত্তাতি এত্থ চ যস্মা বাহিরকো কামেসু ৰীতরাগো, ন খযা রাগস্স ৰীতরাগো। অরহা পন খযা যেৰ, তস্মা ৰুত্তং ‘‘খযা রাগস্স ৰীতরাগত্তা’’তি। এস নযো দোসমোহেসুপি। যথা চ ‘‘পরিঞ্ঞাতং তস্সাতি ৰদামী’’তি ৰুত্তেপি পরিঞ্ঞাতত্তা সো তং ৰত্থুং তং ৰা মঞ্ঞনং ন মঞ্ঞতীতি অত্থো হোতি, এৰমিধাপি ৰীতরাগত্তা সো তং ৰত্থুং তং ৰা মঞ্ঞনং ন মঞ্ঞতীতি দট্ঠব্বো।

    Khayā rāgassa vītarāgattāti ettha ca yasmā bāhirako kāmesu vītarāgo, na khayā rāgassa vītarāgo. Arahā pana khayā yeva, tasmā vuttaṃ ‘‘khayā rāgassa vītarāgattā’’ti. Esa nayo dosamohesupi. Yathā ca ‘‘pariññātaṃ tassāti vadāmī’’ti vuttepi pariññātattā so taṃ vatthuṃ taṃ vā maññanaṃ na maññatīti attho hoti, evamidhāpi vītarāgattā so taṃ vatthuṃ taṃ vā maññanaṃ na maññatīti daṭṭhabbo.

    এত্থ চ পরিঞ্ঞাতং তস্সাতি অযং ৰারো মগ্গভাৰনাপারিপূরিদস্সনত্থং ৰুত্তো। ইতরে পন ফলসচ্ছিকিরিযাপারিপূরিদস্সনত্থন্তি ৰেদিতব্বা। দ্ৰীহি ৰা কারণেহি অরহা ন মঞ্ঞতি ৰত্থুস্স চ পরিঞ্ঞাতত্তা অকুসলমূলানঞ্চ সমুচ্ছিন্নত্তা। তেনস্স পরিঞ্ঞাতৰারেন ৰত্থুনো ৰত্থুপরিঞ্ঞং দীপেতি, ইতরেহি অকুসলমূলসমুচ্ছেদন্তি। তত্থ পচ্ছিমেসু তীসু ৰারেসু অযং ৰিসেসো ৰেদিতব্বো, তীসু হি ৰারেসু রাগে আদীনৰং দিস্ৰা দুক্খানুপস্সী ৰিহরন্তো অপ্পণিহিতৰিমোক্খেন ৰিমুত্তো খযা রাগস্স ৰীতরাগো হোতি। দোসে আদীনৰং দিস্ৰা অনিচ্চানুপস্সী ৰিহরন্তো অনিমিত্তৰিমোক্খেন ৰিমুত্তো খযা দোসস্স ৰীতদোসো হোতি। মোহে আদীনৰং দিস্ৰা অনত্তানুপস্সী ৰিহরন্তো সুঞ্ঞতৰিমোক্খেন ৰিমুত্তো খযা মোহস্স ৰীতমোহো হোতীতি।

    Ettha ca pariññātaṃ tassāti ayaṃ vāro maggabhāvanāpāripūridassanatthaṃ vutto. Itare pana phalasacchikiriyāpāripūridassanatthanti veditabbā. Dvīhi vā kāraṇehi arahā na maññati vatthussa ca pariññātattā akusalamūlānañca samucchinnattā. Tenassa pariññātavārena vatthuno vatthupariññaṃ dīpeti, itarehi akusalamūlasamucchedanti. Tattha pacchimesu tīsu vāresu ayaṃ viseso veditabbo, tīsu hi vāresu rāge ādīnavaṃ disvā dukkhānupassī viharanto appaṇihitavimokkhena vimutto khayā rāgassa vītarāgo hoti. Dose ādīnavaṃ disvā aniccānupassī viharanto animittavimokkhena vimutto khayā dosassa vītadoso hoti. Mohe ādīnavaṃ disvā anattānupassī viharanto suññatavimokkhena vimutto khayā mohassa vītamoho hotīti.

    এৰং সন্তে ন একো তীহি ৰিমোক্খেহি ৰিমুচ্চতীতি দ্ৰে ৰারা ন ৰত্তব্বা সিযুন্তি চে, তং ন। কস্মা? অনিযমিতত্তা। অনিযমেন হি ৰুত্তং ‘‘যোপি সো, ভিক্খৰে, ভিক্খু অরহ’’ন্তি। ন পন ৰুত্তং অপ্পণিহিতৰিমোক্খেন ৰা ৰিমুত্তো, ইতরেন ৰাতি, তস্মা যং অরহতো যুজ্জতি, তং সব্বং ৰত্তব্বমেৰাতি।

    Evaṃ sante na eko tīhi vimokkhehi vimuccatīti dve vārā na vattabbā siyunti ce, taṃ na. Kasmā? Aniyamitattā. Aniyamena hi vuttaṃ ‘‘yopi so, bhikkhave, bhikkhu araha’’nti. Na pana vuttaṃ appaṇihitavimokkhena vā vimutto, itarena vāti, tasmā yaṃ arahato yujjati, taṃ sabbaṃ vattabbamevāti.

    অৰিসেসেন ৰা যো কোচি অরহা সমানেপি রাগাদিক্খযে ৰিপরিণামদুক্খস্স পরিঞ্ঞাতত্তা খযা রাগস্স ৰীতরাগোতি ৰুচ্চতি, দুক্খদুক্খস্স পরিঞ্ঞাতত্তা খযা দোসস্স ৰীতদোসোতি। সঙ্খারদুক্খস্স পরিঞ্ঞাতত্তা খযা মোহস্স ৰীতমোহোতি। ইট্ঠারম্মণস্স ৰা পরিঞ্ঞাতত্তা খযা রাগস্স ৰীতরাগো। অনিট্ঠারম্মণস্স পরিঞ্ঞাতত্তা খযা দোসস্স ৰীতদোসো। মজ্ঝত্তারম্মণস্স পরিঞ্ঞাতত্তা খযা মোহস্স ৰীতমোহো। সুখায ৰা ৰেদনায রাগানুসযস্স সমুচ্ছিন্নত্তা খযা রাগস্স ৰীতরাগো, ইতরাসু পটিঘমোহানুসযানং সমুচ্ছিন্নত্তা ৰীতদোসো ৰীতমোহো চাতি। তস্মা তং ৰিসেসং দস্সেন্তো আহ ‘‘খযা রাগস্স ৰীতরাগত্তা…পে॰… ৰীতমোহত্তা’’তি।

    Avisesena vā yo koci arahā samānepi rāgādikkhaye vipariṇāmadukkhassa pariññātattā khayā rāgassa vītarāgoti vuccati, dukkhadukkhassa pariññātattā khayā dosassa vītadosoti. Saṅkhāradukkhassa pariññātattā khayā mohassa vītamohoti. Iṭṭhārammaṇassa vā pariññātattā khayā rāgassa vītarāgo. Aniṭṭhārammaṇassa pariññātattā khayā dosassa vītadoso. Majjhattārammaṇassa pariññātattā khayā mohassa vītamoho. Sukhāya vā vedanāya rāgānusayassa samucchinnattā khayā rāgassa vītarāgo, itarāsu paṭighamohānusayānaṃ samucchinnattā vītadoso vītamoho cāti. Tasmā taṃ visesaṃ dassento āha ‘‘khayā rāgassa vītarāgattā…pe… vītamohattā’’ti.

    খীণাসৰৰসেন ততিযচতুত্থপঞ্চমছট্ঠনযকথা নিট্ঠিতা।

    Khīṇāsavavasena tatiyacatutthapañcamachaṭṭhanayakathā niṭṭhitā.

    তথাগতৰারসত্তমনযৰণ্ণনা

    Tathāgatavārasattamanayavaṇṇanā

    ১২. এৰং পথৰীআদীসু ৰত্থূসু খীণাসৰস্স পৰত্তিং দস্সেত্ৰা ইদানি অত্তনো পৰত্তিং দস্সেন্তো তথাগতোপি, ভিক্খৰেতিআদিমাহ। তত্থ তথাগতোতি অট্ঠহি কারণেহি ভগৰা তথাগতোতি ৰুচ্চতি – তথা আগতোতি তথাগতো, তথা গতোতি তথাগতো, তথলক্খণং আগতোতি তথাগতো, তথধম্মে যাথাৰতো অভিসম্বুদ্ধোতি তথাগতো, তথদস্সিতায তথাগতো, তথাৰাদিতায তথাগতো, তথাকারিতায তথাগতো, অভিভৰনট্ঠেন তথাগতোতি।

    12. Evaṃ pathavīādīsu vatthūsu khīṇāsavassa pavattiṃ dassetvā idāni attano pavattiṃ dassento tathāgatopi, bhikkhavetiādimāha. Tattha tathāgatoti aṭṭhahi kāraṇehi bhagavā tathāgatoti vuccati – tathā āgatoti tathāgato, tathā gatoti tathāgato, tathalakkhaṇaṃ āgatoti tathāgato, tathadhamme yāthāvato abhisambuddhoti tathāgato, tathadassitāya tathāgato, tathāvāditāya tathāgato, tathākāritāya tathāgato, abhibhavanaṭṭhena tathāgatoti.

    কথং ভগৰা তথা আগতোতি তথাগতো? যথা সব্বলোকহিতায উস্সুক্কমাপন্না পুরিমকা সম্মাসম্বুদ্ধা আগতা, যথা ৰিপস্সী ভগৰা আগতো, যথা সিখী ভগৰা, যথা ৰেস্সভূ ভগৰা, যথা ককুসন্ধো ভগৰা, যথা কোণাগমনো ভগৰা, যথা কস্সপো ভগৰা আগতোতি। কিং ৰুত্তং হোতি? যেন অভিনীহারেন এতে ভগৰন্তো আগতা, তেনেৰ অম্হাকম্পি ভগৰা আগতো।

    Kathaṃ bhagavā tathā āgatoti tathāgato? Yathā sabbalokahitāya ussukkamāpannā purimakā sammāsambuddhā āgatā, yathā vipassī bhagavā āgato, yathā sikhī bhagavā, yathā vessabhū bhagavā, yathā kakusandho bhagavā, yathā koṇāgamano bhagavā, yathā kassapo bhagavā āgatoti. Kiṃ vuttaṃ hoti? Yena abhinīhārena ete bhagavanto āgatā, teneva amhākampi bhagavā āgato.

    অথ ৰা যথা ৰিপস্সী ভগৰা…পে॰… যথা কস্সপো ভগৰা দানপারমিং পূরেত্ৰা, সীলনেক্খম্মপঞ্ঞাৰীরিযখন্তিসচ্চঅধিট্ঠানমেত্তাউপেক্খাপারমিং পূরেত্ৰা, ইমা দস পারমিযো, দস উপপারমিযো, দস পরমত্থপারমিযোতি, সমতিংস পারমিযো পূরেত্ৰা, অঙ্গপরিচ্চাগং নযনধনরজ্জপুত্তদারপরিচ্চাগন্তি ইমে পঞ্চ মহাপরিচ্চাগে পরিচ্চজিত্ৰা পুব্বযোগপুব্বচরিযধম্মক্খানঞাতত্থচরিযাদযো পূরেত্ৰা, বুদ্ধিচরিযায কোটিং পত্ৰা আগতো, তথা অম্হাকম্পি ভগৰা আগতো।

    Atha vā yathā vipassī bhagavā…pe… yathā kassapo bhagavā dānapāramiṃ pūretvā, sīlanekkhammapaññāvīriyakhantisaccaadhiṭṭhānamettāupekkhāpāramiṃ pūretvā, imā dasa pāramiyo, dasa upapāramiyo, dasa paramatthapāramiyoti, samatiṃsa pāramiyo pūretvā, aṅgapariccāgaṃ nayanadhanarajjaputtadārapariccāganti ime pañca mahāpariccāge pariccajitvā pubbayogapubbacariyadhammakkhānañātatthacariyādayo pūretvā, buddhicariyāya koṭiṃ patvā āgato, tathā amhākampi bhagavā āgato.

    যথা চ ৰিপস্সী ভগৰা…পে॰… যথা কস্সপো ভগৰা চত্তারো সতিপট্ঠানে সম্মপ্পধানে ইদ্ধিপাদে পঞ্চিন্দ্রিযানি পঞ্চ বলানি সত্ত বোজ্ঝঙ্গে অরিযং অট্ঠঙ্গিকং মগ্গং ভাৰেত্ৰা ব্রূহেত্ৰা আগতো, তথা অম্হাকং ভগৰাপি আগতোতি তথাগতো।

    Yathā ca vipassī bhagavā…pe… yathā kassapo bhagavā cattāro satipaṭṭhāne sammappadhāne iddhipāde pañcindriyāni pañca balāni satta bojjhaṅge ariyaṃ aṭṭhaṅgikaṃ maggaṃ bhāvetvā brūhetvā āgato, tathā amhākaṃ bhagavāpi āgatoti tathāgato.

    যথেৰ লোকম্হি ৰিপস্সিআদযো,

    Yatheva lokamhi vipassiādayo,

    সব্বঞ্ঞুভাৰং মুনযো ইধাগতা।

    Sabbaññubhāvaṃ munayo idhāgatā;

    তথা অযং সক্যমুনীপি আগতো,

    Tathā ayaṃ sakyamunīpi āgato,

    তথাগতো ৰুচ্চতি তেন চক্খুমাতি॥

    Tathāgato vuccati tena cakkhumāti.

    এৰং তথা আগতোতি তথাগতো।

    Evaṃ tathā āgatoti tathāgato.

    কথং তথা গতোতি তথাগতো। যথা সম্পতিজাতো ৰিপস্সী ভগৰা গতো…পে॰… কস্সপো ভগৰা গতো। কথঞ্চ সো গতোতি, সো হি সম্পতিজাতোৰ সমেহি পাদেহি পথৰিযং পতিট্ঠায উত্তরাভিমুখো সত্তপদৰীতিহারেন গতো। যথাহ – সম্পতিজাতো, আনন্দ, বোধিসত্তো সমেহি পাদেহি পথৰিযং পতিট্ঠহিত্ৰা উত্তরাভিমুখো সত্তপদৰীতিহারেন গচ্ছতি সেতম্হি ছত্তে অনুধারীযমানে, সব্বা চ দিসা অনুৰিলোকেতি, আসভিঞ্চ ৰাচং ভাসতি ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’তি (ম॰ নি॰ ৩.২০৭)।

    Kathaṃ tathā gatoti tathāgato. Yathā sampatijāto vipassī bhagavā gato…pe… kassapo bhagavā gato. Kathañca so gatoti, so hi sampatijātova samehi pādehi pathaviyaṃ patiṭṭhāya uttarābhimukho sattapadavītihārena gato. Yathāha – sampatijāto, ānanda, bodhisatto samehi pādehi pathaviyaṃ patiṭṭhahitvā uttarābhimukho sattapadavītihārena gacchati setamhi chatte anudhārīyamāne, sabbā ca disā anuviloketi, āsabhiñca vācaṃ bhāsati ‘‘aggohamasmi lokassa, jeṭṭhohamasmi lokassa, seṭṭhohamasmi lokassa, ayamantimā jāti, natthi dāni punabbhavo’’ti (ma. ni. 3.207).

    তঞ্চস্স গমনং তথং অহোসি অৰিতথং অনেকেসং ৰিসেসাধিগমানং পুব্বনিমিত্তভাৰেন। যঞ্হি সো সম্পতিজাতোৰ সমেহি পাদেহি পতিট্ঠহি, ইদমস্স চতুরিদ্ধিপাদপটিলাভস্স পুব্বনিমিত্তং। উত্তরাভিমুখভাৰো পন সব্বলোকুত্তরভাৰস্স পুব্বনিমিত্তং। সত্তপদৰীতিহারো সত্তবোজ্ঝঙ্গরতনপটিলাভস্স। ‘‘সুৰণ্ণদণ্ডা ৰীতিপতন্তি চামরা’’তি (সু॰ নি॰ ৬৯৩) এত্থ ৰুত্তো চামরুক্খেপো সব্বতিত্থিযনিম্মথনস্স। সেতচ্ছত্তধারণং অরহত্তৰিমুত্তিৰরৰিমলসেতচ্ছত্তপটিলাভস্স। সব্বদিসানুৰিলোকনং সব্বঞ্ঞুতানাৰরণঞাণপটিলাভস্স। আসভীৰাচাভাসনং অপ্পটিৰত্তিযৰরধম্মচক্কপ্পৰত্তনস্স পুব্বনিমিত্তং। তথা অযং ভগৰাপি গতো। তঞ্চস্স গমনং তথং অহোসি অৰিতথং তেসঞ্ঞেৰ ৰিসেসাধিগমানং পুব্বনিমিত্তভাৰেন। তেনাহু পোরাণা –

    Tañcassa gamanaṃ tathaṃ ahosi avitathaṃ anekesaṃ visesādhigamānaṃ pubbanimittabhāvena. Yañhi so sampatijātova samehi pādehi patiṭṭhahi, idamassa caturiddhipādapaṭilābhassa pubbanimittaṃ. Uttarābhimukhabhāvo pana sabbalokuttarabhāvassa pubbanimittaṃ. Sattapadavītihāro sattabojjhaṅgaratanapaṭilābhassa. ‘‘Suvaṇṇadaṇḍā vītipatanti cāmarā’’ti (su. ni. 693) ettha vutto cāmarukkhepo sabbatitthiyanimmathanassa. Setacchattadhāraṇaṃ arahattavimuttivaravimalasetacchattapaṭilābhassa. Sabbadisānuvilokanaṃ sabbaññutānāvaraṇañāṇapaṭilābhassa. Āsabhīvācābhāsanaṃ appaṭivattiyavaradhammacakkappavattanassa pubbanimittaṃ. Tathā ayaṃ bhagavāpi gato. Tañcassa gamanaṃ tathaṃ ahosi avitathaṃ tesaññeva visesādhigamānaṃ pubbanimittabhāvena. Tenāhu porāṇā –

    ‘‘মুহুত্তজাতোৰ গৰম্পতী যথা,

    ‘‘Muhuttajātova gavampatī yathā,

    সমেহি পাদেহি ফুসী ৰসুন্ধরং।

    Samehi pādehi phusī vasundharaṃ;

    সো ৰিক্কমী সত্ত পদানি গোতমো,

    So vikkamī satta padāni gotamo,

    সেতঞ্চ ছত্তং অনুধারযুং মরূ॥

    Setañca chattaṃ anudhārayuṃ marū.

    গন্ত্ৰান সো সত্ত পদানি গোতমো,

    Gantvāna so satta padāni gotamo,

    দিসা ৰিলোকেসি সমা সমন্ততো।

    Disā vilokesi samā samantato;

    অট্ঠঙ্গুপেতং গিরমব্ভুদীরযী,

    Aṭṭhaṅgupetaṃ giramabbhudīrayī,

    সীহো যথা পব্বতমুদ্ধনিট্ঠিতো’’তি॥ –

    Sīho yathā pabbatamuddhaniṭṭhito’’ti. –

    এৰং তথা গতোতি তথাগতো।

    Evaṃ tathā gatoti tathāgato.

    অথ ৰা যথা ৰিপস্সী ভগৰা…পে॰… যথা কস্সপো ভগৰা, অযম্পি ভগৰা তথেৰ নেক্খম্মেন কামচ্ছন্দং পহায গতো। অব্যাপাদেন ব্যাপাদং, আলোকসঞ্ঞায থিনমিদ্ধং, অৰিক্খেপেন উদ্ধচ্চকুক্কুচ্চং, ধম্মৰৰত্থানেন ৰিচিকিচ্ছং পহায, ঞাণেন অৰিজ্জং পদালেত্ৰা, পামোজ্জেন অরতিং ৰিনোদেত্ৰা, পঠমজ্ঝানেন নীৰরণকৰাটং উগ্ঘাটেত্ৰা, দুতিযজ্ঝানেন ৰিতক্কৰিচারধূমং ৰূপসমেত্ৰা, ততিযজ্ঝানেন পীতিং ৰিরাজেত্ৰা, চতুত্থজ্ঝানেন সুখদুক্খং পহায, আকাসানঞ্চাযতনসমাপত্তিযা রূপসঞ্ঞাপটিঘসঞ্ঞানানত্তসঞ্ঞাযো সমতিক্কমিত্ৰা, ৰিঞ্ঞাণঞ্চাযতনসমাপত্তিযা আকাসানঞ্চাযতনসঞ্ঞং, আকিঞ্চঞ্ঞাযতনসমাপত্তিযা ৰিঞ্ঞাণঞ্চাযতনসঞ্ঞং, নেৰসঞ্ঞানাসঞ্ঞাযতনসমাপত্তিযা আকিঞ্চঞ্ঞাযতনসঞ্ঞং সমতিক্কমিত্ৰা গতো।

    Atha vā yathā vipassī bhagavā…pe… yathā kassapo bhagavā, ayampi bhagavā tatheva nekkhammena kāmacchandaṃ pahāya gato. Abyāpādena byāpādaṃ, ālokasaññāya thinamiddhaṃ, avikkhepena uddhaccakukkuccaṃ, dhammavavatthānena vicikicchaṃ pahāya, ñāṇena avijjaṃ padāletvā, pāmojjena aratiṃ vinodetvā, paṭhamajjhānena nīvaraṇakavāṭaṃ ugghāṭetvā, dutiyajjhānena vitakkavicāradhūmaṃ vūpasametvā, tatiyajjhānena pītiṃ virājetvā, catutthajjhānena sukhadukkhaṃ pahāya, ākāsānañcāyatanasamāpattiyā rūpasaññāpaṭighasaññānānattasaññāyo samatikkamitvā, viññāṇañcāyatanasamāpattiyā ākāsānañcāyatanasaññaṃ, ākiñcaññāyatanasamāpattiyā viññāṇañcāyatanasaññaṃ, nevasaññānāsaññāyatanasamāpattiyā ākiñcaññāyatanasaññaṃ samatikkamitvā gato.

    অনিচ্চানুপস্সনায নিচ্চসঞ্ঞং পহায, দুক্খানুপস্সনায সুখসঞ্ঞং, অনত্তানুপস্সনায অত্তসঞ্ঞং, নিব্বিদানুপস্সনায নন্দিং, ৰিরাগানুপস্সনায রাগং, নিরোধানুপস্সনায সমুদযং, পটিনিস্সগ্গানুপস্সনায আদানং, খযানুপস্সনায ঘনসঞ্ঞং, ৰযানুপস্সনায আযূহনং, ৰিপরিণামানুপস্সনায ধুৰসঞ্ঞং, অনিমিত্তানুপস্সনায নিমিত্তং, অপ্পণিহিতানুপস্সনায পণিধিং, সুঞ্ঞতানুপস্সনায অভিনিৰেসং, অধিপঞ্ঞাধম্মৰিপস্সনায সারাদানাভিনিৰেসং, যথাভূতঞাণদস্সনেন সম্মোহাভিনিৰেসং, আদীনৰানুপস্সনায আলযাভিনিৰেসং, পটিসঙ্খানুপস্সনায অপ্পটিসঙ্খং, ৰিৰট্টানুপস্সনায সংযোগাভিনিৰেসং, সোতাপত্তিমগ্গেন দিট্ঠেকট্ঠে কিলেসে ভঞ্জিত্ৰা, সকদাগামিমগ্গেন ওল়ারিকে কিলেসে পহায, অনাগামিমগ্গেন অণুসহগতে কিলেসে সমুগ্ঘাটেত্ৰা, অরহত্তমগ্গেন সব্বকিলেসে সমুচ্ছিন্দিত্ৰা গতো। এৰম্পি তথা গতোতি তথাগতো।

    Aniccānupassanāya niccasaññaṃ pahāya, dukkhānupassanāya sukhasaññaṃ, anattānupassanāya attasaññaṃ, nibbidānupassanāya nandiṃ, virāgānupassanāya rāgaṃ, nirodhānupassanāya samudayaṃ, paṭinissaggānupassanāya ādānaṃ, khayānupassanāya ghanasaññaṃ, vayānupassanāya āyūhanaṃ, vipariṇāmānupassanāya dhuvasaññaṃ, animittānupassanāya nimittaṃ, appaṇihitānupassanāya paṇidhiṃ, suññatānupassanāya abhinivesaṃ, adhipaññādhammavipassanāya sārādānābhinivesaṃ, yathābhūtañāṇadassanena sammohābhinivesaṃ, ādīnavānupassanāya ālayābhinivesaṃ, paṭisaṅkhānupassanāya appaṭisaṅkhaṃ, vivaṭṭānupassanāya saṃyogābhinivesaṃ, sotāpattimaggena diṭṭhekaṭṭhe kilese bhañjitvā, sakadāgāmimaggena oḷārike kilese pahāya, anāgāmimaggena aṇusahagate kilese samugghāṭetvā, arahattamaggena sabbakilese samucchinditvā gato. Evampi tathā gatoti tathāgato.

    কথং তথলক্খণং আগতোতি তথাগতো। পথৰীধাতুযা কক্খল়ত্তলক্খণং তথং অৰিতথং। আপোধাতুযা পগ্ঘরণলক্খণং। তেজোধাতুযা উণ্হত্তলক্খণং। ৰাযোধাতুযা ৰিত্থম্ভনলক্খণং। আকাসধাতুযা অসম্ফুট্ঠলক্খণং । ৰিঞ্ঞাণধাতুযা ৰিজাননলক্খণং।

    Kathaṃ tathalakkhaṇaṃ āgatoti tathāgato. Pathavīdhātuyā kakkhaḷattalakkhaṇaṃ tathaṃ avitathaṃ. Āpodhātuyā paggharaṇalakkhaṇaṃ. Tejodhātuyā uṇhattalakkhaṇaṃ. Vāyodhātuyā vitthambhanalakkhaṇaṃ. Ākāsadhātuyā asamphuṭṭhalakkhaṇaṃ . Viññāṇadhātuyā vijānanalakkhaṇaṃ.

    রূপস্স রুপ্পনলক্খণং। ৰেদনায ৰেদযিতলক্খণং। সঞ্ঞায সঞ্জাননলক্খণং। সঙ্খারানং অভিসঙ্খরণলক্খণং। ৰিঞ্ঞাণস্স ৰিজাননলক্খণং।

    Rūpassa ruppanalakkhaṇaṃ. Vedanāya vedayitalakkhaṇaṃ. Saññāya sañjānanalakkhaṇaṃ. Saṅkhārānaṃ abhisaṅkharaṇalakkhaṇaṃ. Viññāṇassa vijānanalakkhaṇaṃ.

    ৰিতক্কস্স অভিনিরোপনলক্খণং। ৰিচারস্স অনুমজ্জনলক্খণং। পীতিযা ফরণলক্খণং। সুখস্স সাতলক্খণং। চিত্তেকগ্গতায অৰিক্খেপলক্খণং। ফস্সস্স ফুসনলক্খণং।

    Vitakkassa abhiniropanalakkhaṇaṃ. Vicārassa anumajjanalakkhaṇaṃ. Pītiyā pharaṇalakkhaṇaṃ. Sukhassa sātalakkhaṇaṃ. Cittekaggatāya avikkhepalakkhaṇaṃ. Phassassa phusanalakkhaṇaṃ.

    সদ্ধিন্দ্রিযস্স অধিমোক্খলক্খণং। ৰীরিযিন্দ্রিযস্স পগ্গহণলক্খণং। সতিন্দ্রিযস্স উপট্ঠানলক্খণং। সমাধিন্দ্রিযস্স অৰিক্খেপলক্খণং। পঞ্ঞিন্দ্রিযস্স পজাননলক্খণং।

    Saddhindriyassa adhimokkhalakkhaṇaṃ. Vīriyindriyassa paggahaṇalakkhaṇaṃ. Satindriyassa upaṭṭhānalakkhaṇaṃ. Samādhindriyassa avikkhepalakkhaṇaṃ. Paññindriyassa pajānanalakkhaṇaṃ.

    সদ্ধাবলস্স অস্সদ্ধিযে অকম্পিযলক্খণং। ৰীরিযবলস্স কোসজ্জে। সতিবলস্স মুট্ঠসচ্চে। সমাধিবলস্স উদ্ধচ্চে। পঞ্ঞাবলস্স অৰিজ্জায অকম্পিযলক্খণং।

    Saddhābalassa assaddhiye akampiyalakkhaṇaṃ. Vīriyabalassa kosajje. Satibalassa muṭṭhasacce. Samādhibalassa uddhacce. Paññābalassa avijjāya akampiyalakkhaṇaṃ.

    সতিসম্বোজ্ঝঙ্গস্স উপট্ঠানলক্খণং। ধম্মৰিচযসম্বোজ্ঝঙ্গস্স পৰিচযলক্খণং। ৰীরিযসম্বোজ্ঝঙ্গস্স পগ্গহণলক্খণং। পীতিসম্বোজ্ঝঙ্গস্স ফরণলক্খণং। পস্সদ্ধিসম্বোজ্ঝঙ্গস্স উপসমলক্খণং। সমাধিসম্বোজ্ঝঙ্গস্স অৰিক্খেপলক্খণং। উপেক্খাসম্বোজ্ঝঙ্গস্স পটিসঙ্খানলক্খণং।

    Satisambojjhaṅgassa upaṭṭhānalakkhaṇaṃ. Dhammavicayasambojjhaṅgassa pavicayalakkhaṇaṃ. Vīriyasambojjhaṅgassa paggahaṇalakkhaṇaṃ. Pītisambojjhaṅgassa pharaṇalakkhaṇaṃ. Passaddhisambojjhaṅgassa upasamalakkhaṇaṃ. Samādhisambojjhaṅgassa avikkhepalakkhaṇaṃ. Upekkhāsambojjhaṅgassa paṭisaṅkhānalakkhaṇaṃ.

    সম্মাদিট্ঠিযা দস্সনলক্খণং। সম্মাসঙ্কপ্পস্স অভিনিরোপনলক্খণং। সম্মাৰাচায পরিগ্গাহলক্খণং। সম্মাকম্মন্তস্স সমুট্ঠানলক্খণং। সম্মাআজীৰস্স ৰোদানলক্খণং। সম্মাৰাযামস্স পগ্গহণলক্খণং। সম্মাসতিযা উপট্ঠানলক্খণং। সম্মাসমাধিস্স অৰিক্খেপলক্খণং।

    Sammādiṭṭhiyā dassanalakkhaṇaṃ. Sammāsaṅkappassa abhiniropanalakkhaṇaṃ. Sammāvācāya pariggāhalakkhaṇaṃ. Sammākammantassa samuṭṭhānalakkhaṇaṃ. Sammāājīvassa vodānalakkhaṇaṃ. Sammāvāyāmassa paggahaṇalakkhaṇaṃ. Sammāsatiyā upaṭṭhānalakkhaṇaṃ. Sammāsamādhissa avikkhepalakkhaṇaṃ.

    অৰিজ্জায অঞ্ঞাণলক্খণং। সঙ্খারানং চেতনালক্খণং। ৰিঞ্ঞাণস্স ৰিজাননলক্খণং। নামস্স নমনলক্খণং। রূপস্স রুপ্পনলক্খণং। সল়াযতনস্স আযতনলক্খণং। ফস্সস্স ফুসনলক্খণং। ৰেদনায ৰেদযিতলক্খণং। তণ্হায হেতুলক্খণং। উপাদানস্স গহণলক্খণং। ভৰস্স আযূহনলক্খণং। জাতিযা নিব্বত্তিলক্খণং। জরায জীরণলক্খণং। মরণস্স চুতিলক্খণং।

    Avijjāya aññāṇalakkhaṇaṃ. Saṅkhārānaṃ cetanālakkhaṇaṃ. Viññāṇassa vijānanalakkhaṇaṃ. Nāmassa namanalakkhaṇaṃ. Rūpassa ruppanalakkhaṇaṃ. Saḷāyatanassa āyatanalakkhaṇaṃ. Phassassa phusanalakkhaṇaṃ. Vedanāya vedayitalakkhaṇaṃ. Taṇhāya hetulakkhaṇaṃ. Upādānassa gahaṇalakkhaṇaṃ. Bhavassa āyūhanalakkhaṇaṃ. Jātiyā nibbattilakkhaṇaṃ. Jarāya jīraṇalakkhaṇaṃ. Maraṇassa cutilakkhaṇaṃ.

    ধাতূনং সুঞ্ঞতালক্খণং। আযতনানং আযতনলক্খণং। সতিপট্ঠানানং উপট্ঠানলক্খণং। সম্মপ্পধানানং পদহনলক্খণং। ইদ্ধিপাদানং ইজ্ঝনলক্খণং। ইন্দ্রিযানং অধিপতিলক্খণং। বলানং অকম্পিযলক্খণং। বোজ্ঝঙ্গানং নিয্যানলক্খণং। মগ্গস্স হেতুলক্খণং।

    Dhātūnaṃ suññatālakkhaṇaṃ. Āyatanānaṃ āyatanalakkhaṇaṃ. Satipaṭṭhānānaṃ upaṭṭhānalakkhaṇaṃ. Sammappadhānānaṃ padahanalakkhaṇaṃ. Iddhipādānaṃ ijjhanalakkhaṇaṃ. Indriyānaṃ adhipatilakkhaṇaṃ. Balānaṃ akampiyalakkhaṇaṃ. Bojjhaṅgānaṃ niyyānalakkhaṇaṃ. Maggassa hetulakkhaṇaṃ.

    সচ্চানং তথলক্খণং। সমথস্স অৰিক্খেপলক্খণং। ৰিপস্সনায অনুপস্সনালক্খণং। সমথৰিপস্সনানং একরসলক্খণং। যুগনন্ধানং অনতিৰত্তনলক্খণং।

    Saccānaṃ tathalakkhaṇaṃ. Samathassa avikkhepalakkhaṇaṃ. Vipassanāya anupassanālakkhaṇaṃ. Samathavipassanānaṃ ekarasalakkhaṇaṃ. Yuganandhānaṃ anativattanalakkhaṇaṃ.

    সীলৰিসুদ্ধিযা সংৰরলক্খণং। চিত্তৰিসুদ্ধিযা অৰিক্খেপলক্খণং। দিট্ঠিৰিসুদ্ধিযা দস্সনলক্খণং।

    Sīlavisuddhiyā saṃvaralakkhaṇaṃ. Cittavisuddhiyā avikkhepalakkhaṇaṃ. Diṭṭhivisuddhiyā dassanalakkhaṇaṃ.

    খযেঞাণস্স সমুচ্ছেদলক্খণং। অনুপ্পাদে ঞাণস্স পস্সদ্ধিলক্খণং। ছন্দস্স মূললক্খণং। মনসিকারস্স সমুট্ঠানলক্খণং। ফস্সস্স সমোধানলক্খণং। ৰেদনায সমোসরণলক্খণং। সমাধিস্স পমুখলক্খণং। সতিযা আধিপতেয্যলক্খণং। পঞ্ঞায ততুত্তরিলক্খণং। ৰিমুত্তিযা সারলক্খণং। অমতোগধস্স নিব্বানস্স পরিযোসানলক্খণং তথং অৰিতথং। এৰং তথলক্খণং ঞাণগতিযা আগতো অৰিরজ্ঝিত্ৰা পত্তো অনুপ্পত্তোতি তথাগতো, এৰং তথলক্খণং আগতোতি তথাগতো।

    Khayeñāṇassa samucchedalakkhaṇaṃ. Anuppāde ñāṇassa passaddhilakkhaṇaṃ. Chandassa mūlalakkhaṇaṃ. Manasikārassa samuṭṭhānalakkhaṇaṃ. Phassassa samodhānalakkhaṇaṃ. Vedanāya samosaraṇalakkhaṇaṃ. Samādhissa pamukhalakkhaṇaṃ. Satiyā ādhipateyyalakkhaṇaṃ. Paññāya tatuttarilakkhaṇaṃ. Vimuttiyā sāralakkhaṇaṃ. Amatogadhassa nibbānassa pariyosānalakkhaṇaṃ tathaṃ avitathaṃ. Evaṃ tathalakkhaṇaṃ ñāṇagatiyā āgato avirajjhitvā patto anuppattoti tathāgato, evaṃ tathalakkhaṇaṃ āgatoti tathāgato.

    কথং তথধম্মে যাথাৰতো অভিসম্বুদ্ধোতি তথাগতো? তথধম্মা নাম চত্তারি অরিযসচ্চানি। যথাহ ‘‘চত্তারিমানি, ভিক্খৰে, তথানি অৰিতথানি অনঞ্ঞথানি। কতমানি চত্তারি, ইদং দুক্খন্তি, ভিক্খৰে, তথমেতং অৰিতথমেতং অনঞ্ঞথমেত’’ন্তি (সং॰ নি॰ ৫.১০৫০) ৰিত্থারো। তানি চ ভগৰা অভিসম্বুদ্ধো, তস্মা তথানং অভিসম্বুদ্ধত্তা তথাগতোতি ৰুচ্চতি। অভিসম্বুদ্ধত্থো হি এত্থ গতসদ্দো। অপিচ জরামরণস্স জাতিপচ্চযসম্ভূতসমুদাগতট্ঠো তথো অৰিতথো অনঞ্ঞথো…পে॰… সঙ্খারানং অৰিজ্জাপচ্চযসম্ভূতসমুদাগতট্ঠো তথো অৰিতথো অনঞ্ঞথো। তথা অৰিজ্জায সঙ্খারানং পচ্চযট্ঠো। সঙ্খারানং ৰিঞ্ঞাণস্স পচ্চযট্ঠো…পে॰… জাতিযা জরামরণস্স পচ্চযট্ঠো তথো অৰিতথো অনঞ্ঞথো। তং সব্বং ভগৰা অভিসম্বুদ্ধো, তস্মাপি তথানং ধম্মানং অভিসম্বুদ্ধত্তা তথাগতোতি ৰুচ্চতি। এৰং তথধম্মে যাথাৰতো অভিসম্বুদ্ধোতি তথাগতো।

    Kathaṃ tathadhamme yāthāvato abhisambuddhoti tathāgato? Tathadhammā nāma cattāri ariyasaccāni. Yathāha ‘‘cattārimāni, bhikkhave, tathāni avitathāni anaññathāni. Katamāni cattāri, idaṃ dukkhanti, bhikkhave, tathametaṃ avitathametaṃ anaññathameta’’nti (saṃ. ni. 5.1050) vitthāro. Tāni ca bhagavā abhisambuddho, tasmā tathānaṃ abhisambuddhattā tathāgatoti vuccati. Abhisambuddhattho hi ettha gatasaddo. Apica jarāmaraṇassa jātipaccayasambhūtasamudāgataṭṭho tatho avitatho anaññatho…pe… saṅkhārānaṃ avijjāpaccayasambhūtasamudāgataṭṭho tatho avitatho anaññatho. Tathā avijjāya saṅkhārānaṃ paccayaṭṭho. Saṅkhārānaṃ viññāṇassa paccayaṭṭho…pe… jātiyā jarāmaraṇassa paccayaṭṭho tatho avitatho anaññatho. Taṃ sabbaṃ bhagavā abhisambuddho, tasmāpi tathānaṃ dhammānaṃ abhisambuddhattā tathāgatoti vuccati. Evaṃ tathadhamme yāthāvato abhisambuddhoti tathāgato.

    কথং তথদস্সিতায তথাগতো? ভগৰা যং সদেৰকে লোকে…পে॰… সদেৰমনুস্সায অপরিমাণাসু লোকধাতূসু অপরিমাণানং সত্তানং চক্খুদ্ৰারে আপাথং আগচ্ছন্তং রূপারম্মণং নাম অত্থি। তং সব্বাকারতো জানাতি, পস্সতি। এৰং জানতা পস্সতা চ তেন তং ইট্ঠানিট্ঠাদিৰসেন ৰা দিট্ঠসুতমুতৰিঞ্ঞাতেসু লব্ভমানকপদৰসেন ৰা ‘‘কতমং তং রূপং রূপাযতনং, যং রূপং চতুন্নং মহাভূতানং উপাদায ৰণ্ণনিভা সনিদস্সনং সপ্পটিঘং নীলং পীতক’’ন্তি (ধ॰ স॰ ৬১৬) আদিনা নযেন অনেকেহি নামেহি তেরসহি ৰারেহি দ্ৰেপঞ্ঞাসায নযেহি ৰিভজ্জমানং তথমেৰ হোতি, ৰিতথং নত্থি। এস নযো সোতদ্ৰারাদীসুপি আপাথমাগচ্ছন্তেসু সদ্দাদীসু। ৰুত্তঞ্চেতং ভগৰতা ‘‘যং, ভিক্খৰে, সদেৰকস্স লোকস্স…পে॰… সদেৰমনুস্সায দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, তমহং জানামি, …তমহং অভিঞ্ঞাসিং, তং তথাগতস্স ৰিদিতং, তং তথাগতো ন উপট্ঠাসী’’তি (অ॰ নি॰ ৪.২৪)। এৰং তথদস্সিতায তথাগতো। তত্থ তথদস্সীঅত্থে তথাগতোতি পদসম্ভৰো ৰেদিতব্বো।

    Kathaṃ tathadassitāya tathāgato? Bhagavā yaṃ sadevake loke…pe… sadevamanussāya aparimāṇāsu lokadhātūsu aparimāṇānaṃ sattānaṃ cakkhudvāre āpāthaṃ āgacchantaṃ rūpārammaṇaṃ nāma atthi. Taṃ sabbākārato jānāti, passati. Evaṃ jānatā passatā ca tena taṃ iṭṭhāniṭṭhādivasena vā diṭṭhasutamutaviññātesu labbhamānakapadavasena vā ‘‘katamaṃ taṃ rūpaṃ rūpāyatanaṃ, yaṃ rūpaṃ catunnaṃ mahābhūtānaṃ upādāya vaṇṇanibhā sanidassanaṃ sappaṭighaṃ nīlaṃ pītaka’’nti (dha. sa. 616) ādinā nayena anekehi nāmehi terasahi vārehi dvepaññāsāya nayehi vibhajjamānaṃ tathameva hoti, vitathaṃ natthi. Esa nayo sotadvārādīsupi āpāthamāgacchantesu saddādīsu. Vuttañcetaṃ bhagavatā ‘‘yaṃ, bhikkhave, sadevakassa lokassa…pe… sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ jānāmi, …tamahaṃ abhiññāsiṃ, taṃ tathāgatassa viditaṃ, taṃ tathāgato na upaṭṭhāsī’’ti (a. ni. 4.24). Evaṃ tathadassitāya tathāgato. Tattha tathadassīatthe tathāgatoti padasambhavo veditabbo.

    কথং তথাৰাদিতায তথাগতো? যং রত্তিং ভগৰা বোধিমণ্ডে অপরাজিতপল্লঙ্কে নিসিন্নো তিণ্ণং মারানং মত্থকং মদ্দিত্ৰা অনুত্তরং সম্মাসম্বোধিং অভিসম্বুদ্ধো, যঞ্চ রত্তিং যমকসালানমন্তরে অনুপাদিসেসায নিব্বানধাতুযা পরিনিব্বাযি, এত্থন্তরে পঞ্চচত্তালীসৰস্সপরিমাণে কালে পঠমবোধিযাপি মজ্ঝিমবোধিযাপি পচ্ছিমবোধিযাপি যং ভগৰতা ভাসিতং সুত্তং গেয্যং…পে॰… ৰেদল্লং, তং সব্বং অত্থতো চ ব্যঞ্জনতো চ অনুপৰজ্জং অনূনমনধিকং সব্বাকারপরিপুণ্ণং রাগমদনিম্মদনং দোসমোহমদনিম্মদনং, নত্থি তত্থ ৰালগ্গমত্তম্পি পক্খলিতং, সব্বং তং একমুদ্দিকায লঞ্ছিতং ৰিয, একনাল়িযা মিতং ৰিয, একতুলায তুলিতং ৰিয চ তথমেৰ হোতি অৰিতথং। তেনাহ – ‘‘যঞ্চ, চুন্দ, রত্তিং তথাগতো অনুত্তরং সম্মাসম্বোধিং অভিসম্বুজ্ঝতি, যঞ্চ রত্তিং অনুপাদিসেসায নিব্বানধাতুযা পরিনিব্বাযতি, যং এতস্মিং অন্তরে ভাসতি লপতি নিদ্দিসতি, সব্বং তং তথেৰ হোতি নো অঞ্ঞথা। তস্মা তথাগতোতি ৰুচ্চতী’’তি (অ॰ নি॰ ৪.২৩)। গদঅত্থো হি এত্থ গতসদ্দো। এৰং তথাৰাদিতায তথাগতো। অপিচ আগদনং আগদো, ৰচনন্তি অত্থো। তথো অৰিপরীতো আগদো অস্সাতি দকারস্স তকারং কত্ৰা তথাগতোতি এৰমেতস্মিং অত্থে পদসিদ্ধি ৰেদিতব্বা।

    Kathaṃ tathāvāditāya tathāgato? Yaṃ rattiṃ bhagavā bodhimaṇḍe aparājitapallaṅke nisinno tiṇṇaṃ mārānaṃ matthakaṃ madditvā anuttaraṃ sammāsambodhiṃ abhisambuddho, yañca rattiṃ yamakasālānamantare anupādisesāya nibbānadhātuyā parinibbāyi, etthantare pañcacattālīsavassaparimāṇe kāle paṭhamabodhiyāpi majjhimabodhiyāpi pacchimabodhiyāpi yaṃ bhagavatā bhāsitaṃ suttaṃ geyyaṃ…pe… vedallaṃ, taṃ sabbaṃ atthato ca byañjanato ca anupavajjaṃ anūnamanadhikaṃ sabbākāraparipuṇṇaṃ rāgamadanimmadanaṃ dosamohamadanimmadanaṃ, natthi tattha vālaggamattampi pakkhalitaṃ, sabbaṃ taṃ ekamuddikāya lañchitaṃ viya, ekanāḷiyā mitaṃ viya, ekatulāya tulitaṃ viya ca tathameva hoti avitathaṃ. Tenāha – ‘‘yañca, cunda, rattiṃ tathāgato anuttaraṃ sammāsambodhiṃ abhisambujjhati, yañca rattiṃ anupādisesāya nibbānadhātuyā parinibbāyati, yaṃ etasmiṃ antare bhāsati lapati niddisati, sabbaṃ taṃ tatheva hoti no aññathā. Tasmā tathāgatoti vuccatī’’ti (a. ni. 4.23). Gadaattho hi ettha gatasaddo. Evaṃ tathāvāditāya tathāgato. Apica āgadanaṃ āgado, vacananti attho. Tatho aviparīto āgado assāti dakārassa takāraṃ katvā tathāgatoti evametasmiṃ atthe padasiddhi veditabbā.

    কথং তথাকারিতায তথাগতো? ভগৰতো হি ৰাচায কাযো অনুলোমেতি, কাযস্সপি ৰাচা। তস্মা যথাৰাদী তথাকারী, যথাকারী তথাৰাদী চ হোতি। এৰংভূতস্স চস্স যথা ৰাচা , কাযোপি তথাগতো পৰত্তোতি অত্থো। যথা চ কাযো, ৰাচাপি তথা গতা পৰত্তাতি তথাগতো। তেনাহ ‘‘যথাৰাদী, ভিক্খৰে, তথাগতো তথাকারী, যথাকারী তথাৰাদী। ইতি যথাৰাদী তথাকারী, যথাকারী তথাৰাদী, তস্মা তথাগতোতি ৰুচ্চতী’’তি (অ॰ নি॰ ৪.২৩)। এৰং তথাকারিতায তথাগতো।

    Kathaṃ tathākāritāya tathāgato? Bhagavato hi vācāya kāyo anulometi, kāyassapi vācā. Tasmā yathāvādī tathākārī, yathākārī tathāvādī ca hoti. Evaṃbhūtassa cassa yathā vācā , kāyopi tathāgato pavattoti attho. Yathā ca kāyo, vācāpi tathā gatā pavattāti tathāgato. Tenāha ‘‘yathāvādī, bhikkhave, tathāgato tathākārī, yathākārī tathāvādī. Iti yathāvādī tathākārī, yathākārī tathāvādī, tasmā tathāgatoti vuccatī’’ti (a. ni. 4.23). Evaṃ tathākāritāya tathāgato.

    কথং অভিভৰনট্ঠেন তথাগতো? উপরি ভৰগ্গং হেট্ঠা অৰিচিং পরিযন্তং কত্ৰা তিরিযং অপরিমাণাসু লোকধাতূসু সব্বসত্তে অভিভৰতি, সীলেনপি সমাধিনাপি পঞ্ঞাযপি ৰিমুত্তিযাপি ৰিমুত্তিঞাণদস্সনেনপি, ন তস্স তুলা ৰা পমাণং ৰা অত্থি, অতুলো অপ্পমেয্যো অনুত্তরো রাজরাজো দেৰদেৰো সক্কানং অতিসক্কো ব্রহ্মানং অতিব্রহ্মা। তেনাহ ‘‘সদেৰকে, ভিক্খৰে, লোকে…পে॰… সদেৰমনুস্সায তথাগতো অভিভূ অনভিভূতো অঞ্ঞদত্থু দসো ৰসৰত্তী। তস্মা তথাগতোতি ৰুচ্চতী’’তি।

    Kathaṃ abhibhavanaṭṭhena tathāgato? Upari bhavaggaṃ heṭṭhā aviciṃ pariyantaṃ katvā tiriyaṃ aparimāṇāsu lokadhātūsu sabbasatte abhibhavati, sīlenapi samādhināpi paññāyapi vimuttiyāpi vimuttiñāṇadassanenapi, na tassa tulā vā pamāṇaṃ vā atthi, atulo appameyyo anuttaro rājarājo devadevo sakkānaṃ atisakko brahmānaṃ atibrahmā. Tenāha ‘‘sadevake, bhikkhave, loke…pe… sadevamanussāya tathāgato abhibhū anabhibhūto aññadatthu daso vasavattī. Tasmā tathāgatoti vuccatī’’ti.

    তত্রেৰং পদসিদ্ধি ৰেদিতব্বা, অগদো ৰিয অগদো। কো পনেস? দেসনাৰিলাসমযো চেৰ পুঞ্ঞুস্সযো চ। তেন হেস মহানুভাৰো ভিসক্কো দিব্বাগদেন সপ্পে ৰিয সব্বপরপ্পৰাদিনো সদেৰকঞ্চ লোকং অভিভৰতি, ইতি সব্বলোকাভিভৰনে তথো অৰিপরীতো দেসনাৰিলাসমযো চেৰ পুঞ্ঞস্সযো চ অগদো অস্সাতি দকারস্স তকারং কত্ৰা তথাগতোতি ৰেদিতব্বো। এৰং অভিভৰনট্ঠেন তথাগতো।

    Tatrevaṃ padasiddhi veditabbā, agado viya agado. Ko panesa? Desanāvilāsamayo ceva puññussayo ca. Tena hesa mahānubhāvo bhisakko dibbāgadena sappe viya sabbaparappavādino sadevakañca lokaṃ abhibhavati, iti sabbalokābhibhavane tatho aviparīto desanāvilāsamayo ceva puññassayo ca agado assāti dakārassa takāraṃ katvā tathāgatoti veditabbo. Evaṃ abhibhavanaṭṭhena tathāgato.

    অপিচ তথায গতোতিপি তথাগতো, তথং গতোতিপি তথাগতো। গতোতি অৰগতো, অতীতো, পত্তো, পটিপন্নোতি অত্থো। তত্থ সকলং লোকং তীরণপরিঞ্ঞায তথায গতো অৰগতোতি তথাগতো। লোকসমুদযং পহানপরিঞ্ঞায তথায গতো অতীতোতি তথাগতো। লোকনিরোধং সচ্ছিকিরিযায তথায গতো পত্তোতি তথাগতো। লোকনিরোধগামিনিং পটিপদং তথং গতো পটিপন্নোতি তথাগতো। তেন যং ৰুত্তং ভগৰতা ‘‘লোকো, ভিক্খৰে, তথাগতেন অভিসম্বুদ্ধো, লোকস্মা তথাগতো ৰিসংযুত্তো। লোকসমুদযো, ভিক্খৰে, তথাগতেন অভিসম্বুদ্ধো, লোকসমুদযো তথাগতস্স পহীনো। লোকনিরোধো, ভিক্খৰে, তথাগতেন অভিসম্বুদ্ধো, লোকনিরোধো তথাগতস্স সচ্ছিকতো। লোকনিরোধগামিনী পটিপদা, ভিক্খৰে, তথাগতেন অভিসম্বুদ্ধা, লোকনিরোধগামিনী পটিপদা তথাগতস্স ভাৰিতা। যং, ভিক্খৰে, সদেৰকস্স লোকস্স…পে॰… সব্বং তং তথাগতেন অভিসম্বুদ্ধং, তস্মা তথাগতোতি ৰুচ্চতী’’তি (অ॰ নি॰ ৪.২৩)। তস্স এৰম্পি অত্থো ৰেদিতব্বো। ইদম্পি চ তথাগতস্স তথাগতভাৰদীপনে মুখমত্তমেৰ। সব্বাকারেন পন তথাগতোৰ তথাগতস্স তথাগতভাৰং ৰণ্ণেয্য।

    Apica tathāya gatotipi tathāgato, tathaṃ gatotipi tathāgato. Gatoti avagato, atīto, patto, paṭipannoti attho. Tattha sakalaṃ lokaṃ tīraṇapariññāya tathāya gato avagatoti tathāgato. Lokasamudayaṃ pahānapariññāya tathāya gato atītoti tathāgato. Lokanirodhaṃ sacchikiriyāya tathāya gato pattoti tathāgato. Lokanirodhagāminiṃ paṭipadaṃ tathaṃ gato paṭipannoti tathāgato. Tena yaṃ vuttaṃ bhagavatā ‘‘loko, bhikkhave, tathāgatena abhisambuddho, lokasmā tathāgato visaṃyutto. Lokasamudayo, bhikkhave, tathāgatena abhisambuddho, lokasamudayo tathāgatassa pahīno. Lokanirodho, bhikkhave, tathāgatena abhisambuddho, lokanirodho tathāgatassa sacchikato. Lokanirodhagāminī paṭipadā, bhikkhave, tathāgatena abhisambuddhā, lokanirodhagāminī paṭipadā tathāgatassa bhāvitā. Yaṃ, bhikkhave, sadevakassa lokassa…pe… sabbaṃ taṃ tathāgatena abhisambuddhaṃ, tasmā tathāgatoti vuccatī’’ti (a. ni. 4.23). Tassa evampi attho veditabbo. Idampi ca tathāgatassa tathāgatabhāvadīpane mukhamattameva. Sabbākārena pana tathāgatova tathāgatassa tathāgatabhāvaṃ vaṇṇeyya.

    অরহং সম্মাসম্বুদ্ধোতি পদদ্ৰযে পন আরকত্তা অরীনং, অরানঞ্চ হতত্তা, পচ্চযাদীনং অরহত্তা, পাপকরণে রহাভাৰাতি ইমেহি তাৰ কারণেহি অরহন্তি ৰেদিতব্বো।

    Arahaṃ sammāsambuddhoti padadvaye pana ārakattā arīnaṃ, arānañca hatattā, paccayādīnaṃ arahattā, pāpakaraṇe rahābhāvāti imehi tāva kāraṇehi arahanti veditabbo.

    সম্মা সামঞ্চ সব্বধম্মানং বুদ্ধত্তা পন সম্মাসম্বুদ্ধোতি। অযমেত্থ সঙ্খেপো। ৰিত্থারতো পনেতং পদদ্ৰযং ৰিসুদ্ধিমগ্গে বুদ্ধানুস্সতিৰণ্ণনাযং পকাসিতং।

    Sammā sāmañca sabbadhammānaṃ buddhattā pana sammāsambuddhoti. Ayamettha saṅkhepo. Vitthārato panetaṃ padadvayaṃ visuddhimagge buddhānussativaṇṇanāyaṃ pakāsitaṃ.

    পরিঞ্ঞাতন্তং তথাগতস্সাতি এত্থ পন তং মঞ্ঞনাৰত্থু পরিঞ্ঞাতং তথাগতস্সাতিপি অত্থো ৰেদিতব্বো। পরিঞ্ঞাতন্তং নাম পরিঞ্ঞাতপারং পরিঞ্ঞাতাৰসানং অনৰসেসতো পরিঞ্ঞাতন্তি ৰুত্তং হোতি। বুদ্ধানঞ্হি সাৰকেহি সদ্ধিং কিঞ্চাপি তেন তেন মগ্গেন কিলেসপ্পহানে ৰিসেসো নত্থি, পরিঞ্ঞায পন অত্থি। সাৰকা হি চতুন্নং ধাতূনং একদেসমেৰ সম্মসিত্ৰা নিব্বানং পাপুণন্তি। বুদ্ধানং পন অণুপ্পমাণম্পি সঙ্খারগতং ঞাণেন অদিট্ঠমতুলিতমতীরিতমসচ্ছিকতং নত্থি।

    Pariññātantaṃ tathāgatassāti ettha pana taṃ maññanāvatthu pariññātaṃ tathāgatassātipi attho veditabbo. Pariññātantaṃ nāma pariññātapāraṃ pariññātāvasānaṃ anavasesato pariññātanti vuttaṃ hoti. Buddhānañhi sāvakehi saddhiṃ kiñcāpi tena tena maggena kilesappahāne viseso natthi, pariññāya pana atthi. Sāvakā hi catunnaṃ dhātūnaṃ ekadesameva sammasitvā nibbānaṃ pāpuṇanti. Buddhānaṃ pana aṇuppamāṇampi saṅkhāragataṃ ñāṇena adiṭṭhamatulitamatīritamasacchikataṃ natthi.

    তথাগতৰারসত্তমনযৰণ্ণনা নিট্ঠিতা।

    Tathāgatavārasattamanayavaṇṇanā niṭṭhitā.

    তথাগতৰারঅট্ঠমনযৰণ্ণনা

    Tathāgatavāraaṭṭhamanayavaṇṇanā

    ১৩. নন্দী দুক্খস্স মূলন্তিআদীসু চ নন্দীতি পুরিমতণ্হা। দুক্খন্তি পঞ্চক্খন্ধা। মূলন্তিআদি। ইতি ৰিদিত্ৰাতি তং পুরিমভৰনন্দিং ‘‘ইমস্স দুক্খস্স মূল’’ন্তি এৰং জানিত্ৰা। ভৰাতি কম্মভৰতো। জাতীতি ৰিপাকক্খন্ধা। তে হি যস্মা জাযন্তি, তস্মা ‘‘জাতী’’তি ৰুত্তা। জাতিসীসেন ৰা অযং দেসনা। এতম্পি ‘‘ইতি ৰিদিত্ৰা’’তি ইমিনা যোজেতব্বং। অযঞ্হি এত্থ অত্থো ‘‘কম্মভৰতো উপপত্তিভৰো হোতীতি এৰঞ্চ জানিত্ৰা’’তি। ভূতস্সাতি সত্তস্স। জরামরণন্তি জরা চ মরণঞ্চ। ইদং ৰুত্তং হোতি – তেন উপপত্তিভৰেন ভূতস্স সত্তস্স খন্ধানং জরামরণং হোতীতি এৰঞ্চ জানিত্ৰাতি।

    13.Nandīdukkhassa mūlantiādīsu ca nandīti purimataṇhā. Dukkhanti pañcakkhandhā. Mūlantiādi. Itividitvāti taṃ purimabhavanandiṃ ‘‘imassa dukkhassa mūla’’nti evaṃ jānitvā. Bhavāti kammabhavato. Jātīti vipākakkhandhā. Te hi yasmā jāyanti, tasmā ‘‘jātī’’ti vuttā. Jātisīsena vā ayaṃ desanā. Etampi ‘‘iti viditvā’’ti iminā yojetabbaṃ. Ayañhi ettha attho ‘‘kammabhavato upapattibhavo hotīti evañca jānitvā’’ti. Bhūtassāti sattassa. Jarāmaraṇanti jarā ca maraṇañca. Idaṃ vuttaṃ hoti – tena upapattibhavena bhūtassa sattassa khandhānaṃ jarāmaraṇaṃ hotīti evañca jānitvāti.

    এত্তাৰতা যং বোধিরুক্খমূলে অপরাজিতপল্লঙ্কে নিসিন্নো সম্মসিত্ৰা সব্বঞ্ঞুতং পত্তো, তস্স পটিচ্চসমুপ্পাদস্স পটিৰেধা মঞ্ঞনানং অভাৰকারণং দস্সেন্তো চতুসঙ্খেপং তিসন্ধিং তিযদ্ধং ৰীসতাকারং তমেৰ পটিচ্চসমুপ্পাদং দস্সেতি।

    Ettāvatā yaṃ bodhirukkhamūle aparājitapallaṅke nisinno sammasitvā sabbaññutaṃ patto, tassa paṭiccasamuppādassa paṭivedhā maññanānaṃ abhāvakāraṇaṃ dassento catusaṅkhepaṃ tisandhiṃ tiyaddhaṃ vīsatākāraṃ tameva paṭiccasamuppādaṃ dasseti.

    কথং পন এত্তাৰতা এস সব্বো দস্সিতো হোতীতি। এত্থ হি নন্দীতি অযং একো সঙ্খেপো। দুক্খস্সাতি ৰচনতো দুক্খং দুতিযো, ভৰা জাতীতি ৰচনতো ভৰো ততিযো, জাতিজরামরণং চতুত্থো। এৰং তাৰ চত্তারো সঙ্খেপা ৰেদিতব্বা, কোট্ঠাসাতি অত্থো। তণ্হাদুক্খানং পন অন্তরং একো সন্ধি, দুক্খস্স চ ভৰস্স চ অন্তরং দুতিযো, ভৰস্স চ জাতিযা চ অন্তরং ততিযো। এৰং চতুন্নং অঙ্গুলীনং অন্তরসদিসা চতুসঙ্খেপন্তরা তযো সন্ধী ৰেদিতব্বা।

    Kathaṃ pana ettāvatā esa sabbo dassito hotīti. Ettha hi nandīti ayaṃ eko saṅkhepo. Dukkhassāti vacanato dukkhaṃ dutiyo, bhavā jātīti vacanato bhavo tatiyo, jātijarāmaraṇaṃ catuttho. Evaṃ tāva cattāro saṅkhepā veditabbā, koṭṭhāsāti attho. Taṇhādukkhānaṃ pana antaraṃ eko sandhi, dukkhassa ca bhavassa ca antaraṃ dutiyo, bhavassa ca jātiyā ca antaraṃ tatiyo. Evaṃ catunnaṃ aṅgulīnaṃ antarasadisā catusaṅkhepantarā tayo sandhī veditabbā.

    তত্থ নন্দীতি অতীতো অদ্ধা, জাতিজরামরণং অনাগতো, দুক্খঞ্চ ভৰো চ পচ্চুপ্পন্নোতি এৰং তযো অদ্ধা ৰেদিতব্বা। অতীতে পন পঞ্চসু আকারেসু নন্দীৰচনেন তণ্হা একা আগতা, তায অনাগতাপি অৰিজ্জাসঙ্খারউপাদানভৰা পচ্চযলক্খণেন গহিতাৰ হোন্তি। জাতিজরামরণৰচনেন পন যেসং খন্ধানং তজ্জাতিজরামরণং, তে ৰুত্তা যেৰাতি কত্ৰা আযতিং ৰিঞ্ঞাণনামরূপসল়াযতনফস্সৰেদনা গহিতাৰ হোন্তি।

    Tattha nandīti atīto addhā, jātijarāmaraṇaṃ anāgato, dukkhañca bhavo ca paccuppannoti evaṃ tayo addhā veditabbā. Atīte pana pañcasu ākāresu nandīvacanena taṇhā ekā āgatā, tāya anāgatāpi avijjāsaṅkhāraupādānabhavā paccayalakkhaṇena gahitāva honti. Jātijarāmaraṇavacanena pana yesaṃ khandhānaṃ tajjātijarāmaraṇaṃ, te vuttā yevāti katvā āyatiṃ viññāṇanāmarūpasaḷāyatanaphassavedanā gahitāva honti.

    এৰমেতে ‘‘পুরিমকম্মভৰস্মিং মোহো অৰিজ্জা, আযূহনা সঙ্খারা, নিকন্তি তণ্হা, উপগমনং উপাদানং, চেতনা ভৰো ইতি ইমে পঞ্চ ধম্মা পুরিমকম্মভৰস্মিং ইধ পটিসন্ধিযা পচ্চযা। ইধ পটিসন্ধি ৰিঞ্ঞাণং, ওক্কন্তি নামরূপং, পসাদো আযতনং, ফুট্ঠো ফস্সো, ৰেদযিতং ৰেদনা ইতি ইমে পঞ্চ ধম্মা ইধূপপত্তিভৰস্মিং পুরেকতস্স কম্মস্স পচ্চযা। ইধ পরিপক্কত্তা আযতনানং মোহো অৰিজ্জা, আযূহনা সঙ্খারা, নিকন্তি তণ্হা, উপগমনমুপাদানং, চেতনা ভৰো ইতি ইমে পঞ্চ ধম্মা ইধ কম্মভৰস্মিং আযতিং পটিসন্ধিযা পচ্চযা। আযতিং পটিসন্ধি ৰিঞ্ঞাণং, ওক্কন্তি নামরূপং, পসাদো আযতনং, ফুট্ঠো ফস্সো , ৰেদযিতং ৰেদনা ইতি ইমে পঞ্চ ধম্মা আযতিং উপপত্তিভৰস্মিং ইধ কতস্স কম্মস্স পচ্চযা’’তি এৰং নিদ্দিট্ঠলক্খণা ৰীসতি আকারা ইধ ৰেদিতব্বা। এৰং ‘‘নন্দী দুক্খস্স মূলন্তি ইতি ৰিদিত্ৰা ভৰা জাতি, ভূতস্স জরামরণ’’ন্তি এত্তাৰতা এস সব্বোপি চতুসঙ্খেপো তিসন্ধি তিযদ্ধো ৰীসতাকারো পটিচ্চসমুপ্পাদো দস্সিতো হোতীতি ৰেদিতব্বো।

    Evamete ‘‘purimakammabhavasmiṃ moho avijjā, āyūhanā saṅkhārā, nikanti taṇhā, upagamanaṃ upādānaṃ, cetanā bhavo iti ime pañca dhammā purimakammabhavasmiṃ idha paṭisandhiyā paccayā. Idha paṭisandhi viññāṇaṃ, okkanti nāmarūpaṃ, pasādo āyatanaṃ, phuṭṭho phasso, vedayitaṃ vedanā iti ime pañca dhammā idhūpapattibhavasmiṃ purekatassa kammassa paccayā. Idha paripakkattā āyatanānaṃ moho avijjā, āyūhanā saṅkhārā, nikanti taṇhā, upagamanamupādānaṃ, cetanā bhavo iti ime pañca dhammā idha kammabhavasmiṃ āyatiṃ paṭisandhiyā paccayā. Āyatiṃ paṭisandhi viññāṇaṃ, okkanti nāmarūpaṃ, pasādo āyatanaṃ, phuṭṭho phasso , vedayitaṃ vedanā iti ime pañca dhammā āyatiṃ upapattibhavasmiṃ idha katassa kammassa paccayā’’ti evaṃ niddiṭṭhalakkhaṇā vīsati ākārā idha veditabbā. Evaṃ ‘‘nandī dukkhassa mūlanti iti viditvā bhavā jāti, bhūtassa jarāmaraṇa’’nti ettāvatā esa sabbopi catusaṅkhepo tisandhi tiyaddho vīsatākāro paṭiccasamuppādo dassito hotīti veditabbo.

    ইদানি তস্মা তিহ, ভিক্খৰে…পে॰… অভিসম্বুদ্ধোতি ৰদামীতি এত্থ অপুব্বপদৰণ্ণনং কত্ৰা পদযোজনায অত্থনিগমনং করিস্সাম। তস্মা তিহাতি তস্মা ইচ্চেৰ ৰুত্তং হোতি। তিকারহকারা হি নিপাতা। সব্বসোতি অনৰসেসৰচনমেতং। তণ্হানন্তি নন্দীতি এৰং ৰুত্তানং সব্বতণ্হানং। খযাতি লোকুত্তরমগ্গেন অচ্চন্তক্খযা। ৰিরাগাদীনি খযৰেৰচনানেৰ। যা হি তণ্হা খীণা, ৰিরত্তাপি তা ভৰন্তি নিরুদ্ধাপি চত্তাপি পটিনিস্সট্ঠাপি। খযাতি ৰা চতুমগ্গকিচ্চসাধারণমেতং। ততো পঠমমগ্গেন ৰিরাগা, দুতিযেন নিরোধা, ততিযেন চাগা, চতুত্থেন পটিনিস্সগ্গাতি যোজেতব্বং। যাহি ৰা তণ্হাহি পথৰিং পথৰিতো সঞ্জানেয্য, তাসং খযা। যাহি পথৰিং মঞ্ঞেয্য, তাসং ৰিরাগা। যাহি পথৰিযা মঞ্ঞেয্য, তাসং নিরোধা। যাহি পথৰিতো মঞ্ঞেয্য, তাসং চাগা। যাহি পথৰিং মেতি মঞ্ঞেয্য, তাসং পটিনিস্সগ্গা। যাহি ৰা পথৰিং মঞ্ঞেয্য, তাসং খযা…পে॰… যাহি পথৰিং অভিনন্দেয্য, তাসং পটিনিস্সগ্গাতি এৰমেত্থ যোজনা কাতব্বা, ন কিঞ্চি ৰিরুজ্ঝতি।

    Idāni tasmā tiha, bhikkhave…pe… abhisambuddhoti vadāmīti ettha apubbapadavaṇṇanaṃ katvā padayojanāya atthanigamanaṃ karissāma. Tasmā tihāti tasmā icceva vuttaṃ hoti. Tikārahakārā hi nipātā. Sabbasoti anavasesavacanametaṃ. Taṇhānanti nandīti evaṃ vuttānaṃ sabbataṇhānaṃ. Khayāti lokuttaramaggena accantakkhayā. Virāgādīni khayavevacanāneva. Yā hi taṇhā khīṇā, virattāpi tā bhavanti niruddhāpi cattāpi paṭinissaṭṭhāpi. Khayāti vā catumaggakiccasādhāraṇametaṃ. Tato paṭhamamaggena virāgā, dutiyena nirodhā, tatiyena cāgā, catutthena paṭinissaggāti yojetabbaṃ. Yāhi vā taṇhāhi pathaviṃ pathavito sañjāneyya, tāsaṃ khayā. Yāhi pathaviṃ maññeyya, tāsaṃ virāgā. Yāhi pathaviyā maññeyya, tāsaṃ nirodhā. Yāhi pathavito maññeyya, tāsaṃ cāgā. Yāhi pathaviṃ meti maññeyya, tāsaṃ paṭinissaggā. Yāhi vā pathaviṃ maññeyya, tāsaṃ khayā…pe… yāhi pathaviṃ abhinandeyya, tāsaṃ paṭinissaggāti evamettha yojanā kātabbā, na kiñci virujjhati.

    অনুত্তরন্তি উত্তরৰিরহিতং সব্বসেট্ঠং। সম্মাসম্বোধিন্তি সম্মা সামঞ্চ বোধিং। অথ ৰা পসত্থং সুন্দরঞ্চ বোধিং। বোধীতি রুক্খোপি মগ্গোপি সব্বঞ্ঞুতঞাণম্পি নিব্বানম্পি। ‘‘বোধিরুক্খমূলে পঠমাভিসম্বুদ্ধো’’তি (মহাৰ॰ ১; উদা॰ ১) চ ‘‘অন্তরা চ বোধিং অন্তরা চ গয’’ন্তি (মহাৰ॰ ১১; ম॰ নি॰ ১.২৮৫) চ আগতট্ঠানেহি রুক্খো বোধীতি ৰুচ্চতি। ‘‘চতূসু মগ্গেসু ঞাণ’’ন্তি (চূল়নি॰ ১২১) আগতট্ঠানে মগ্গো। ‘‘পপ্পোতি বোধিং ৰরভূরিমেধসো’’তি (দী॰ নি॰ ৩.২১৭) আগতট্ঠানে সব্বঞ্ঞুতঞাণং। ‘‘পত্ৰান বোধিং অমতং অসঙ্খত’’ন্তি আগতট্ঠানে নিব্বানং। ইধ পন ভগৰতো অরহত্তমগ্গঞাণং অধিপ্পেতং। অপরে সব্বঞ্ঞুতঞাণন্তিপি ৰদন্তি।

    Anuttaranti uttaravirahitaṃ sabbaseṭṭhaṃ. Sammāsambodhinti sammā sāmañca bodhiṃ. Atha vā pasatthaṃ sundarañca bodhiṃ. Bodhīti rukkhopi maggopi sabbaññutañāṇampi nibbānampi. ‘‘Bodhirukkhamūle paṭhamābhisambuddho’’ti (mahāva. 1; udā. 1) ca ‘‘antarā ca bodhiṃ antarā ca gaya’’nti (mahāva. 11; ma. ni. 1.285) ca āgataṭṭhānehi rukkho bodhīti vuccati. ‘‘Catūsu maggesu ñāṇa’’nti (cūḷani. 121) āgataṭṭhāne maggo. ‘‘Pappoti bodhiṃ varabhūrimedhaso’’ti (dī. ni. 3.217) āgataṭṭhāne sabbaññutañāṇaṃ. ‘‘Patvāna bodhiṃ amataṃ asaṅkhata’’nti āgataṭṭhāne nibbānaṃ. Idha pana bhagavato arahattamaggañāṇaṃ adhippetaṃ. Apare sabbaññutañāṇantipi vadanti.

    সাৰকানং অরহত্তমগ্গো অনুত্তরা বোধি হোতি ন হোতীতি। ন হোতি। কস্মা? অসব্বগুণদাযকত্তা। তেসঞ্হি কস্সচি অরহত্তমগ্গো অরহত্তফলমেৰ দেতি, কস্সচি তিস্সো ৰিজ্জা, কস্সচি ছ অভিঞ্ঞা, কস্সচি চতস্সো পটিসম্ভিদা, কস্সচি সাৰকপারমীঞাণং। পচ্চেকবুদ্ধানম্পি পচ্চেকবোধিঞাণমেৰ দেতি। বুদ্ধানং পন সব্বগুণসম্পত্তিং দেতি অভিসেকো ৰিয রঞ্ঞো সব্বলোকিস্সরিযভাৰং। তস্মা অঞ্ঞস্স কস্সচিপি অনুত্তরা বোধি ন হোতীতি।

    Sāvakānaṃ arahattamaggo anuttarā bodhi hoti na hotīti. Na hoti. Kasmā? Asabbaguṇadāyakattā. Tesañhi kassaci arahattamaggo arahattaphalameva deti, kassaci tisso vijjā, kassaci cha abhiññā, kassaci catasso paṭisambhidā, kassaci sāvakapāramīñāṇaṃ. Paccekabuddhānampi paccekabodhiñāṇameva deti. Buddhānaṃ pana sabbaguṇasampattiṃ deti abhiseko viya rañño sabbalokissariyabhāvaṃ. Tasmā aññassa kassacipi anuttarā bodhi na hotīti.

    অভিসম্বুদ্ধোতি অভিঞ্ঞাসি পটিৰিজ্ঝি, পত্তো অধিগতোতি ৰুত্তং হোতি। ইতি ৰদামীতি ইতি ৰদামি আচিক্খামি দেসেমি পঞ্ঞপেমি, পট্ঠপেমি ৰিৰরামি ৰিভজামি উত্তানীকরোমীতি। তত্রাযং যোজনা – তথাগতোপি, ভিক্খৰে…পে॰… পথৰিং ন মঞ্ঞতি…পে॰… পথৰিং নাভিনন্দতি। তং কিস্স হেতু, নন্দী দুক্খস্স মূলং, ভৰা জাতি, ভূতস্স জরামরণন্তি ইতি ৰিদিত্ৰাতি। তত্থ ইতি ৰিদিত্ৰাতি ইতিকারো কারণত্থো। তেন ইমস্স পটিচ্চসমুপ্পাদস্স ৰিদিতত্তা পটিৰিদ্ধত্তাতি ৰুত্তং হোতি। কিঞ্চ ভিয্যো – যস্মা চ এৰমিমং পটিচ্চসমুপ্পাদং ৰিদিত্ৰা তথাগতস্স যা নন্দীতি ৰুত্ততণ্হা সব্বপ্পকারা, সা পহীনা, তাসঞ্চ তথাগতো সব্বসো তণ্হানং খযা…পে॰… অনুত্তরং সম্মাসম্বোধিং অভিসম্বুদ্ধো। তস্মা পথৰিং ন মঞ্ঞতি…পে॰… পথৰিং নাভিনন্দতীতি ৰদামীতি এৰং অভিসম্বুদ্ধত্তা ন মঞ্ঞতি নাভিনন্দতীতি ৰদামীতি ৰুত্তং হোতি।

    Abhisambuddhoti abhiññāsi paṭivijjhi, patto adhigatoti vuttaṃ hoti. Iti vadāmīti iti vadāmi ācikkhāmi desemi paññapemi, paṭṭhapemi vivarāmi vibhajāmi uttānīkaromīti. Tatrāyaṃ yojanā – tathāgatopi, bhikkhave…pe… pathaviṃ na maññati…pe… pathaviṃ nābhinandati. Taṃ kissa hetu, nandī dukkhassa mūlaṃ, bhavā jāti, bhūtassa jarāmaraṇanti iti viditvāti. Tattha iti viditvāti itikāro kāraṇattho. Tena imassa paṭiccasamuppādassa viditattā paṭividdhattāti vuttaṃ hoti. Kiñca bhiyyo – yasmā ca evamimaṃ paṭiccasamuppādaṃ viditvā tathāgatassa yā nandīti vuttataṇhā sabbappakārā, sā pahīnā, tāsañca tathāgato sabbaso taṇhānaṃ khayā…pe… anuttaraṃ sammāsambodhiṃ abhisambuddho. Tasmā pathaviṃ na maññati…pe… pathaviṃ nābhinandatīti vadāmīti evaṃ abhisambuddhattā na maññati nābhinandatīti vadāmīti vuttaṃ hoti.

    অথ ৰা যস্মা ‘‘নন্দী দুক্খস্স মূল’’ন্তিআদিনা নযেন পটিচ্চসমুপ্পাদং ৰিদিত্ৰা সব্বসো তণ্হা খযং গতা, তস্মা তিহ, ভিক্খৰে, তথাগতো সব্বসো তণ্হানং খযা…পে॰… অভিসম্বুদ্ধোতি ৰদামি। সো এৰং অভিসম্বুদ্ধত্তা পথৰিং ন মঞ্ঞতি…পে॰… নাভিনন্দতীতি। যত্থ যত্থ হি যস্মাতি অৰত্ৰা তস্মাতি ৰুচ্চতি, তত্থ তত্থ যস্মাতি আনেত্ৰা যোজেতব্বং, অযং সাসনযুত্তি। এস নযো সব্বত্থ।

    Atha vā yasmā ‘‘nandī dukkhassa mūla’’ntiādinā nayena paṭiccasamuppādaṃ viditvā sabbaso taṇhā khayaṃ gatā, tasmā tiha, bhikkhave, tathāgato sabbaso taṇhānaṃ khayā…pe… abhisambuddhoti vadāmi. So evaṃ abhisambuddhattā pathaviṃ na maññati…pe… nābhinandatīti. Yattha yattha hi yasmāti avatvā tasmāti vuccati, tattha tattha yasmāti ānetvā yojetabbaṃ, ayaṃ sāsanayutti. Esa nayo sabbattha.

    ইদমৰোচ ভগৰাতি ইদং নিদানাৰসানতো পভুতি যাৰ অভিসম্বুদ্ধোতি ৰদামীতি সকলসুত্তন্তং ভগৰা পরেসং পঞ্ঞায অলব্ভণেয্যপতিট্ঠং পরমগম্ভীরং সব্বঞ্ঞুতঞাণং দস্সেন্তো একেন পুথুজ্জনৰারেন একেন সেক্খৰারেন চতূহি খীণাসৰৰারেহি দ্ৰীহি তথাগতৰারেহীতি অট্ঠহি মহাৰারেহি একমেকস্মিঞ্চ ৰারে পথৰীআদীহি চতুৰীসতিযা অন্তরৰারেহি পটিমণ্ডেত্ৰা দ্ৰেভাণৰারপরিমাণায তন্তিযা অৰোচ।

    Idamavoca bhagavāti idaṃ nidānāvasānato pabhuti yāva abhisambuddhoti vadāmīti sakalasuttantaṃ bhagavā paresaṃ paññāya alabbhaṇeyyapatiṭṭhaṃ paramagambhīraṃ sabbaññutañāṇaṃ dassento ekena puthujjanavārena ekena sekkhavārena catūhi khīṇāsavavārehi dvīhi tathāgatavārehīti aṭṭhahi mahāvārehi ekamekasmiñca vāre pathavīādīhi catuvīsatiyā antaravārehi paṭimaṇḍetvā dvebhāṇavāraparimāṇāya tantiyā avoca.

    এৰং ৰিচিত্রনযদেসনাৰিলাসযুত্তং পনেতং সুত্তং করৰিকরুদমঞ্জুনা কণ্ণসুখেন পণ্ডিতজনহদযানং অমতাভিসেকসদিসেন ব্রহ্মস্সরেন ভাসমানস্সাপি। ন তে ভিক্খূ ভগৰতো ভাসিতং অভিনন্দুন্তি তে পঞ্চসতা ভিক্খূ ইদং ভগৰতো ৰচনং নানুমোদিংসু। কস্মা? অঞ্ঞাণকেন। তে কির ইমস্স সুত্তস্স অত্থং ন জানিংসু, তস্মা নাভিনন্দিংসু। তেসঞ্হি তস্মিং সমযে এৰং ৰিচিত্রনযদেসনাৰিলাসযুত্তম্পি এতং সুত্তং ঘনপুথুলেন দুস্সপট্টেন মুখে বন্ধং কত্ৰা পুরতো ঠপিতমনুঞ্ঞভোজনং ৰিয অহোসি। ননু চ ভগৰা অত্তনা দেসিতং ধম্মং পরে ঞাপেতুং কপ্পসতসহস্সাধিকানি চত্তারি অসঙ্খ্যেয্যানি পারমিযো পূরেত্ৰা সব্বঞ্ঞুতং পত্তো। সো কস্মা যথা তে ন জানন্তি, তথা দেসেসীতি। ৰুত্তমিদং ইমস্স সুত্তস্স নিক্খেপৰিচারণাযং এৰ ‘‘মানভঞ্জনত্থং সব্বধম্মমূলপরিযাযন্তি দেসনং আরভী’’তি, তস্মা ন যিধ পুন ৰত্তব্বমত্থি, এৰং মানভঞ্জনত্থং দেসিতঞ্চ পনেতং সুত্তং সুত্ৰা তে ভিক্খূ তংযেৰ কির পথৰিং দিট্ঠিগতিকোপি সঞ্জানাতি, সেক্খোপি অরহাপি তথাগতোপি সঞ্জানাতি। কিন্নামিদং কথং নামিদন্তি চিন্তেন্তা পুব্বে মযং ভগৰতা কথিতং যংকিঞ্চি খিপ্পমেৰ জানাম, ইদানি পনিমস্স মূলপরিযাযস্স অন্তং ৰা কোটিং ৰা ন জানাম ন পস্সাম, অহো বুদ্ধা নাম অপ্পমেয্যা অতুলাতি উদ্ধটদাঠা ৰিয সপ্পা নিম্মদা হুত্ৰা বুদ্ধুপট্ঠানঞ্চ ধম্মস্সৰনঞ্চ সক্কচ্চং আগমংসু।

    Evaṃ vicitranayadesanāvilāsayuttaṃ panetaṃ suttaṃ karavikarudamañjunā kaṇṇasukhena paṇḍitajanahadayānaṃ amatābhisekasadisena brahmassarena bhāsamānassāpi. Na te bhikkhū bhagavato bhāsitaṃ abhinandunti te pañcasatā bhikkhū idaṃ bhagavato vacanaṃ nānumodiṃsu. Kasmā? Aññāṇakena. Te kira imassa suttassa atthaṃ na jāniṃsu, tasmā nābhinandiṃsu. Tesañhi tasmiṃ samaye evaṃ vicitranayadesanāvilāsayuttampi etaṃ suttaṃ ghanaputhulena dussapaṭṭena mukhe bandhaṃ katvā purato ṭhapitamanuññabhojanaṃ viya ahosi. Nanu ca bhagavā attanā desitaṃ dhammaṃ pare ñāpetuṃ kappasatasahassādhikāni cattāri asaṅkhyeyyāni pāramiyo pūretvā sabbaññutaṃ patto. So kasmā yathā te na jānanti, tathā desesīti. Vuttamidaṃ imassa suttassa nikkhepavicāraṇāyaṃ eva ‘‘mānabhañjanatthaṃ sabbadhammamūlapariyāyanti desanaṃ ārabhī’’ti, tasmā na yidha puna vattabbamatthi, evaṃ mānabhañjanatthaṃ desitañca panetaṃ suttaṃ sutvā te bhikkhū taṃyeva kira pathaviṃ diṭṭhigatikopi sañjānāti, sekkhopi arahāpi tathāgatopi sañjānāti. Kinnāmidaṃ kathaṃ nāmidanti cintentā pubbe mayaṃ bhagavatā kathitaṃ yaṃkiñci khippameva jānāma, idāni panimassa mūlapariyāyassa antaṃ vā koṭiṃ vā na jānāma na passāma, aho buddhā nāma appameyyā atulāti uddhaṭadāṭhā viya sappā nimmadā hutvā buddhupaṭṭhānañca dhammassavanañca sakkaccaṃ āgamaṃsu.

    তেন খো পন সমযেন ভিক্খূ ধম্মসভাযং সন্নিসিন্না ইমং কথং সমুট্ঠাপেসুং ‘‘অহো বুদ্ধানং আনুভাৰো, তে নাম ব্রাহ্মণপব্বজিতা তথা মানমদমত্তা ভগৰতা মূলপরিযাযদেসনায নিহতমানা কতা’’তি, অযঞ্চরহি তেসং ভিক্খূনং অন্তরাকথা ৰিপ্পকতা। অথ ভগৰা গন্ধকুটিযা নিক্খমিত্ৰা তঙ্খণানুরূপেন পাটিহারিযেন ধম্মসভাযং পঞ্ঞত্তৰরবুদ্ধাসনে নিসীদিত্ৰা তে ভিক্খূ আহ – ‘‘কায নুত্থ, ভিক্খৰে, এতরহি কথায সন্নিসিন্না’’তি। তে তমত্থং ভগৰতো আরোচেসুং। ভগৰা এতদৰোচ – ‘‘ন, ভিক্খৰে, ইদানেৰ, পুব্বেপি অহং ইমে এৰং মানপগ্গহিতসিরে ৰিচরন্তে নিহতমানে অকাসি’’ন্তি। ততো ইমিস্সা অট্ঠুপ্পত্তিযা ইদং অতীতং আনেসি –

    Tena kho pana samayena bhikkhū dhammasabhāyaṃ sannisinnā imaṃ kathaṃ samuṭṭhāpesuṃ ‘‘aho buddhānaṃ ānubhāvo, te nāma brāhmaṇapabbajitā tathā mānamadamattā bhagavatā mūlapariyāyadesanāya nihatamānā katā’’ti, ayañcarahi tesaṃ bhikkhūnaṃ antarākathā vippakatā. Atha bhagavā gandhakuṭiyā nikkhamitvā taṅkhaṇānurūpena pāṭihāriyena dhammasabhāyaṃ paññattavarabuddhāsane nisīditvā te bhikkhū āha – ‘‘kāya nuttha, bhikkhave, etarahi kathāya sannisinnā’’ti. Te tamatthaṃ bhagavato ārocesuṃ. Bhagavā etadavoca – ‘‘na, bhikkhave, idāneva, pubbepi ahaṃ ime evaṃ mānapaggahitasire vicarante nihatamāne akāsi’’nti. Tato imissā aṭṭhuppattiyā idaṃ atītaṃ ānesi –

    ভূতপুব্বং , ভিক্খৰে, অঞ্ঞতরো দিসাপামোক্খো ব্রাহ্মণো বারাণসিযং পটিৰসতি তিণ্ণং ৰেদানং পারগূ সনিঘণ্টুকেটুভানং সাক্খরপ্পভেদানং ইতিহাসপঞ্চমানং পদকো ৰেয্যাকরণো লোকাযতমহাপুরিসলক্খণেসু অনৰযো, সো পঞ্চমত্তানি মাণৰকসতানি মন্তে ৰাচেতি। পণ্ডিতা মাণৰকা বহুঞ্চ গণ্হন্তি লহুঞ্চ, সুট্ঠু চ উপধারেন্তি, গহিতঞ্চ তেসং ন ৰিনস্সতি। সোপি ব্রাহ্মণো আচরিযমুট্ঠিং অকত্ৰা ঘটে উদকং আসিঞ্চন্তো ৰিয সব্বম্পি সিপ্পং উগ্গণ্হাপেত্ৰা তে মাণৰকে এতদৰোচ ‘‘এত্তকমিদং সিপ্পং দিট্ঠধম্মসম্পরাযহিত’’ন্তি। তে মাণৰকা – ‘‘যং অম্হাকং আচরিযো জানাতি, মযম্পি তং জানাম, মযম্পি দানি আচরিযা এৰা’’তি মানং উপ্পাদেত্ৰা ততো পভুতি আচরিযে অগারৰা নিক্খিত্তৰত্তা ৰিহরিংসু। আচরিযো ঞত্ৰা ‘‘করিস্সামি নেসং মাননিগ্গহ’’ন্তি চিন্তেসি। সো একদিৰসং উপট্ঠানং আগন্ত্ৰা ৰন্দিত্ৰা নিসিন্নে তে মাণৰকে আহ ‘‘তাতা পঞ্হং পুচ্ছিস্সামি, কচ্চিত্থ সমত্থা কথেতু’’ন্তি। তে ‘‘পুচ্ছথ আচরিয, পুচ্ছথ আচরিযা’’তি সহসাৰ আহংসু, যথা তং সুতমদমত্তা। আচরিযো আহ –

    Bhūtapubbaṃ , bhikkhave, aññataro disāpāmokkho brāhmaṇo bārāṇasiyaṃ paṭivasati tiṇṇaṃ vedānaṃ pāragū sanighaṇṭukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo, so pañcamattāni māṇavakasatāni mante vāceti. Paṇḍitā māṇavakā bahuñca gaṇhanti lahuñca, suṭṭhu ca upadhārenti, gahitañca tesaṃ na vinassati. Sopi brāhmaṇo ācariyamuṭṭhiṃ akatvā ghaṭe udakaṃ āsiñcanto viya sabbampi sippaṃ uggaṇhāpetvā te māṇavake etadavoca ‘‘ettakamidaṃ sippaṃ diṭṭhadhammasamparāyahita’’nti. Te māṇavakā – ‘‘yaṃ amhākaṃ ācariyo jānāti, mayampi taṃ jānāma, mayampi dāni ācariyā evā’’ti mānaṃ uppādetvā tato pabhuti ācariye agāravā nikkhittavattā vihariṃsu. Ācariyo ñatvā ‘‘karissāmi nesaṃ mānaniggaha’’nti cintesi. So ekadivasaṃ upaṭṭhānaṃ āgantvā vanditvā nisinne te māṇavake āha ‘‘tātā pañhaṃ pucchissāmi, kaccittha samatthā kathetu’’nti. Te ‘‘pucchatha ācariya, pucchatha ācariyā’’ti sahasāva āhaṃsu, yathā taṃ sutamadamattā. Ācariyo āha –

    ‘‘কালো ঘসতি ভূতানি, সব্বানেৰ সহত্তনা।

    ‘‘Kālo ghasati bhūtāni, sabbāneva sahattanā;

    যো চ কালঘসো ভূতো, স ভূতপচনিং পচী’’তি॥ (জা॰ ১.১০.১৯০) –

    Yo ca kālaghaso bhūto, sa bhūtapacaniṃ pacī’’ti. (jā. 1.10.190) –

    ৰিস্সজ্জেথ তাতা ইমং পঞ্হন্তি।

    Vissajjetha tātā imaṃ pañhanti.

    তে চিন্তেত্ৰা অজানমানা তুণ্হী অহেসুং। আচরিযো আহ ‘‘অলং তাতা গচ্ছথজ্জ, স্ৰে কথেয্যাথা’’তি উয্যোজেসি। তে দসপি ৰীসতিপি সম্পিণ্ডিতা হুত্ৰা ন তস্স পঞ্হস্স আদিং, ন অন্তমদ্দসংসু। আগন্ত্ৰা আচরিযস্স আরোচেসুং ‘‘ন ইমস্স পঞ্হস্স অত্থং আজানামা’’তি। আচরিযো তেসং নিগ্গহত্থায ইমং গাথমভাসি –

    Te cintetvā ajānamānā tuṇhī ahesuṃ. Ācariyo āha ‘‘alaṃ tātā gacchathajja, sve katheyyāthā’’ti uyyojesi. Te dasapi vīsatipi sampiṇḍitā hutvā na tassa pañhassa ādiṃ, na antamaddasaṃsu. Āgantvā ācariyassa ārocesuṃ ‘‘na imassa pañhassa atthaṃ ājānāmā’’ti. Ācariyo tesaṃ niggahatthāya imaṃ gāthamabhāsi –

    ‘‘বহূনি নরসীসানি, লোমসানি ব্রহানি চ।

    ‘‘Bahūni narasīsāni, lomasāni brahāni ca;

    গীৰাসু পটিমুক্কানি, কোচিদেৰেত্থ কণ্ণৰা’’তি॥ (জা॰ ১.১০.১৯১) –

    Gīvāsu paṭimukkāni, kocidevettha kaṇṇavā’’ti. (jā. 1.10.191) –

    গাথাযত্থো – বহূনি নরানং সীসানি দিস্সন্তি, সব্বানি চ তানি লোমসানি সব্বানি চ মহন্তানি গীৰাযমেৰ চ ঠপিতানি, ন তালফলং ৰিয হত্থেন গহিতানি, নত্থি তেসং ইমেহি ধম্মেহি নানাকরণং। এত্থ পন কোচিদেৰ কণ্ণৰাতি অত্তানং সন্ধাযাহ। কণ্ণৰাতি পঞ্ঞৰা। কণ্ণচ্ছিদ্দং পন ন কস্সচি নত্থি, তং সুত্ৰা তে মাণৰকা মঙ্কুভূতা পত্তক্খন্ধা অধোমুখা অঙ্গুলিযা ভূমিং ৰিলিখন্তা তুণ্হী অহেসুং।

    Gāthāyattho – bahūni narānaṃ sīsāni dissanti, sabbāni ca tāni lomasāni sabbāni ca mahantāni gīvāyameva ca ṭhapitāni, na tālaphalaṃ viya hatthena gahitāni, natthi tesaṃ imehi dhammehi nānākaraṇaṃ. Ettha pana kocideva kaṇṇavāti attānaṃ sandhāyāha. Kaṇṇavāti paññavā. Kaṇṇacchiddaṃ pana na kassaci natthi, taṃ sutvā te māṇavakā maṅkubhūtā pattakkhandhā adhomukhā aṅguliyā bhūmiṃ vilikhantā tuṇhī ahesuṃ.

    অথ নেসং অহিরিকভাৰং পস্সিত্ৰা আচরিযো ‘‘উগ্গণ্হথ তাতা পঞ্হ’’ন্তি পঞ্হং ৰিস্সজ্জেসি। কালোতি পুরেভত্তকালোপি পচ্ছাভত্তকালোপীতি এৰমাদি। ভূতানীতি সত্তাধিৰচনমেতং। কালো হি ভূতানং ন চম্মমংসাদীনি খাদতি, অপিচ খো নেসং আযুৰণ্ণবলানি খেপেন্তো যোব্বঞ্ঞং মদ্দন্তো আরোগ্যং ৰিনাসেন্তো ঘসতি খাদতীতি ৰুচ্চতি। সব্বানেৰ সহত্তনাতি এৰং ঘসন্তো চ ন কিঞ্চি ৰজ্জেতি, সব্বানেৰ ঘসতি। ন কেৰলঞ্চ ভূতানিযেৰ, অপিচ খো সহত্তনা অত্তানম্পি ঘসতি। পুরেভত্তকালো হি পচ্ছাভত্তকালং ন পাপুণাতি। এস নযো পচ্ছাভত্তকালাদীসু। যো চ কালঘসো ভূতোতি খীণাসৰস্সেতং অধিৰচনং। সো হি আযতিং পটিসন্ধিকালং খেপেত্ৰা খাদিত্ৰা ঠিতত্তা ‘‘কালঘসো’’তি ৰুচ্চতি। স ভূতপচনিং পচীতি সো যাযং তণ্হা অপাযেসু ভূতে পচতি, তং ঞাণগ্গিনা পচি দয্হি ভস্মমকাসি, তেন ‘‘ভূতপচনিং পচী’’তি ৰুচ্চতি। ‘‘পজনি’’ন্তিপি পাঠো। জনিকং নিব্বত্তিকন্তি অত্থো।

    Atha nesaṃ ahirikabhāvaṃ passitvā ācariyo ‘‘uggaṇhatha tātā pañha’’nti pañhaṃ vissajjesi. Kāloti purebhattakālopi pacchābhattakālopīti evamādi. Bhūtānīti sattādhivacanametaṃ. Kālo hi bhūtānaṃ na cammamaṃsādīni khādati, apica kho nesaṃ āyuvaṇṇabalāni khepento yobbaññaṃ maddanto ārogyaṃ vināsento ghasati khādatīti vuccati. Sabbāneva sahattanāti evaṃ ghasanto ca na kiñci vajjeti, sabbāneva ghasati. Na kevalañca bhūtāniyeva, apica kho sahattanā attānampi ghasati. Purebhattakālo hi pacchābhattakālaṃ na pāpuṇāti. Esa nayo pacchābhattakālādīsu. Yo ca kālaghaso bhūtoti khīṇāsavassetaṃ adhivacanaṃ. So hi āyatiṃ paṭisandhikālaṃ khepetvā khāditvā ṭhitattā ‘‘kālaghaso’’ti vuccati. Sa bhūtapacaniṃ pacīti so yāyaṃ taṇhā apāyesu bhūte pacati, taṃ ñāṇagginā paci dayhi bhasmamakāsi, tena ‘‘bhūtapacaniṃ pacī’’ti vuccati. ‘‘Pajani’’ntipi pāṭho. Janikaṃ nibbattikanti attho.

    অথ তে মাণৰকা দীপসহস্সালোকেন ৰিয রত্তিং সমৰিসমং আচরিযস্স ৰিস্সজ্জনেন পঞ্হস্স অত্থং পাকটং দিস্ৰা ‘‘ইদানি মযং যাৰজীৰং গুরুৰাসং ৰসিস্সাম, মহন্তা এতে আচরিযা নাম, মযঞ্হি বহুস্সুতমানং উপ্পাদেত্ৰা চতুপ্পদিকগাথাযপি অত্থং ন জানামা’’তি নিহতমানা পুব্বসদিসমেৰ আচরিযস্স ৰত্তপ্পটিপত্তিং কত্ৰা সগ্গপরাযণা অহেসুং।

    Atha te māṇavakā dīpasahassālokena viya rattiṃ samavisamaṃ ācariyassa vissajjanena pañhassa atthaṃ pākaṭaṃ disvā ‘‘idāni mayaṃ yāvajīvaṃ guruvāsaṃ vasissāma, mahantā ete ācariyā nāma, mayañhi bahussutamānaṃ uppādetvā catuppadikagāthāyapi atthaṃ na jānāmā’’ti nihatamānā pubbasadisameva ācariyassa vattappaṭipattiṃ katvā saggaparāyaṇā ahesuṃ.

    অহং খো, ভিক্খৰে, তেন সমযেন তেসং আচরিযো অহোসিং, ইমে ভিক্খূ মাণৰকা। এৰং পুব্বেপাহং ইমে এৰং মানপগ্গহিতসিরে ৰিচরন্তে নিহতমানে অকাসিন্তি।

    Ahaṃ kho, bhikkhave, tena samayena tesaṃ ācariyo ahosiṃ, ime bhikkhū māṇavakā. Evaṃ pubbepāhaṃ ime evaṃ mānapaggahitasire vicarante nihatamāne akāsinti.

    ইমঞ্চ জাতকং সুত্ৰা তে ভিক্খূ পুব্বেপি মযং মানেনেৰ উপহতাতি ভিয্যোসোমত্তায নিহতমানা হুত্ৰা অত্তনো উপকারককম্মট্ঠানপরাযণা অহেসুং।

    Imañca jātakaṃ sutvā te bhikkhū pubbepi mayaṃ māneneva upahatāti bhiyyosomattāya nihatamānā hutvā attano upakārakakammaṭṭhānaparāyaṇā ahesuṃ.

    ততো ভগৰা একং সমযং জনপদচারিকং চরন্তো ৰেসালিং পত্ৰা গোতমকে চেতিযে ৰিহরন্তো ইমেসং পঞ্চসতানং ভিক্খূনং ঞাণপরিপাকং ৰিদিত্ৰা ইমং গোতমকসুত্তং কথেসি –

    Tato bhagavā ekaṃ samayaṃ janapadacārikaṃ caranto vesāliṃ patvā gotamake cetiye viharanto imesaṃ pañcasatānaṃ bhikkhūnaṃ ñāṇaparipākaṃ viditvā imaṃ gotamakasuttaṃ kathesi –

    ‘‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞায, সনিদানাহং…পে॰… সপ্পাটিহারিযাহং, ভিক্খৰে, ধম্মং দেসেমি নো অপ্পাটিহারিযং। তস্স ময্হং, ভিক্খৰে, অভিঞ্ঞায ধম্মং দেসযতো…পে॰… নো অপ্পাটিহারিযং। করণীযো ওৰাদো, করণীযা অনুসাসনী। অলঞ্চ পন ৰো, ভিক্খৰে, তুট্ঠিযা অলং অত্তমনতায অলং সোমনস্সায। সম্মাসম্বুদ্ধো ভগৰা, স্ৰাক্খাতো ধম্মো, সুপ্পটিপন্নো সঙ্ঘোতি। ইদমৰোচ ভগৰা, ইমস্মিঞ্চ পন ৰেয্যাকরণস্মিং ভঞ্ঞমানে দসসহস্সিলোকধাতু অকম্পিত্থা’’তি (অ॰ নি॰ ৩.১২৬)।

    ‘‘Abhiññāyāhaṃ, bhikkhave, dhammaṃ desemi no anabhiññāya, sanidānāhaṃ…pe… sappāṭihāriyāhaṃ, bhikkhave, dhammaṃ desemi no appāṭihāriyaṃ. Tassa mayhaṃ, bhikkhave, abhiññāya dhammaṃ desayato…pe… no appāṭihāriyaṃ. Karaṇīyo ovādo, karaṇīyā anusāsanī. Alañca pana vo, bhikkhave, tuṭṭhiyā alaṃ attamanatāya alaṃ somanassāya. Sammāsambuddho bhagavā, svākkhāto dhammo, suppaṭipanno saṅghoti. Idamavoca bhagavā, imasmiñca pana veyyākaraṇasmiṃ bhaññamāne dasasahassilokadhātu akampitthā’’ti (a. ni. 3.126).

    ইদঞ্চ সুত্তং সুত্ৰা তে পঞ্চসতা ভিক্খূ তস্মিংযেৰাসনে সহ পটিসম্ভিদাহি অরহত্তং পাপুণিংসু, এৰাযং দেসনা এতস্মিং ঠানে নিট্ঠমগমাসীতি।

    Idañca suttaṃ sutvā te pañcasatā bhikkhū tasmiṃyevāsane saha paṭisambhidāhi arahattaṃ pāpuṇiṃsu, evāyaṃ desanā etasmiṃ ṭhāne niṭṭhamagamāsīti.

    তথাগতৰারঅট্ঠমনযৰণ্ণনা নিট্ঠিতা।

    Tathāgatavāraaṭṭhamanayavaṇṇanā niṭṭhitā.

    পপঞ্চসূদনিযা মজ্ঝিমনিকাযট্ঠকথায

    Papañcasūdaniyā majjhimanikāyaṭṭhakathāya

    মূলপরিযাযসুত্তৰণ্ণনা নিট্ঠিতা।

    Mūlapariyāyasuttavaṇṇanā niṭṭhitā.




    Next: ২. সব্বাসৰসুত্তৰণ্ণনা • 2. Sabbāsavasuttavaṇṇanā




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১. মূলপরিযাযসুত্তং • 1. Mūlapariyāyasuttaṃ

    টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১. মূলপরিযাযসুত্তৰণ্ণনা • 1. Mūlapariyāyasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact