| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
абхид̇хаммабидагз
Abhidhammapiṭake
яамагаббагаран̣а-адтагат̇аа
Yamakappakaraṇa-aṭṭhakathā
сан̇кзбзнзва д̣̇зваанам̣, д̣̇звад̣̇зво сураалаяз;
Saṅkhepeneva devānaṃ, devadevo surālaye;
гат̇аавад̇т̇уббагаран̣ам̣, д̣̇зсаяид̇ваа ран̣ан̃ж̇ахо.
Kathāvatthuppakaraṇaṃ, desayitvā raṇañjaho.
яамасса висаяаад̇ийд̇о, наанааяамагаман̣д̣ид̇ам̣;
Yamassa visayātīto, nānāyamakamaṇḍitaṃ;
абхид̇хаммаббагаран̣ам̣, чадтам̣ чадтаана д̣̇зсаго.
Abhidhammappakaraṇaṃ, chaṭṭhaṃ chaṭṭhāna desako.
яамагам̣ аяамаавад̇д̇а-нийлаамалад̇ануурухо;
Yamakaṃ ayamāvatta-nīlāmalatanūruho;
яам̣ д̣̇зсаяи ануббад̇д̇о, д̇асса сам̣ван̣н̣анааггамо;
Yaṃ desayi anuppatto, tassa saṃvaṇṇanākkamo;
ид̣̇аани яасмаа д̇асмаасса, ход̇и сам̣ван̣н̣анаа аяанд̇и.
Idāni yasmā tasmāssa, hoti saṃvaṇṇanā ayanti.
1. муулаяамагам̣
1. Mūlayamakaṃ
уд̣̇д̣̇зсаваараван̣н̣анаа
Uddesavāravaṇṇanā
1. муулаяамагам̣ , канд̇хаяамагам̣, ааяад̇анаяамагам̣, д̇хаад̇уяамагам̣, сажжаяамагам̣, сан̇каараяамагам̣, анусаяаяамагам̣, жид̇д̇аяамагам̣, д̇хаммаяамагам̣, инд̣̇рияаяамаганд̇и имзсам̣ д̣̇асаннам̣ яамагаанам̣ васзна ид̣̇ам̣ багаран̣ам̣ д̣̇асавид̇хзна вибхад̇д̇анд̇и хи вуд̇д̇ам̣. д̇ад̇т̇а язсам̣ д̣̇асаннам̣ яамагаанам̣ васзна ид̣̇ам̣ багаран̣ам̣ д̣̇асавид̇хзна вибхад̇д̇ам̣, д̇зсан̃жзва имасса жа багаран̣асса наамад̇т̇о д̇аава звам̣ взд̣̇ид̇аб̣б̣о – гзнадтзна яамаганд̇и? яуг̇ал̣адтзна. яуг̇ал̣ан̃хи яамаганд̇и вужжад̇и – ‘яамагабаадихаарияам̣, яамагасаалаа’д̇иаад̣̇ийсу вияа. ид̇и яуг̇ал̣асан̇каад̇аанам̣ яамагаанам̣ васзна д̣̇зсид̇ад̇д̇аа имзсу д̣̇асасу згзгам̣ яамагам̣ наама. имзсам̣ бана яамагаанам̣ самуухабхаавад̇о саб̣б̣амбзд̇ам̣ багаран̣ам̣ яамаганд̇и взд̣̇ид̇аб̣б̣ам̣.
1. Mūlayamakaṃ , khandhayamakaṃ, āyatanayamakaṃ, dhātuyamakaṃ, saccayamakaṃ, saṅkhārayamakaṃ, anusayayamakaṃ, cittayamakaṃ, dhammayamakaṃ, indriyayamakanti imesaṃ dasannaṃ yamakānaṃ vasena idaṃ pakaraṇaṃ dasavidhena vibhattanti hi vuttaṃ. Tattha yesaṃ dasannaṃ yamakānaṃ vasena idaṃ pakaraṇaṃ dasavidhena vibhattaṃ, tesañceva imassa ca pakaraṇassa nāmattho tāva evaṃ veditabbo – kenaṭṭhena yamakanti? Yugaḷaṭṭhena. Yugaḷañhi yamakanti vuccati – ‘yamakapāṭihāriyaṃ, yamakasālā’tiādīsu viya. Iti yugaḷasaṅkhātānaṃ yamakānaṃ vasena desitattā imesu dasasu ekekaṃ yamakaṃ nāma. Imesaṃ pana yamakānaṃ samūhabhāvato sabbampetaṃ pakaraṇaṃ yamakanti veditabbaṃ.
д̇ад̇т̇а муулавасзна бужчаависсаж̇ж̇анам̣ гад̇ваа д̣̇зсид̇ад̇д̇аа д̣̇асаннам̣ д̇аава саб̣б̣абатамам̣ муулаяамаганд̇и вуд̇д̇ам̣. д̇асса уд̣̇д̣̇зсавааро, нид̣̇д̣̇зсаваарод̇и д̣̇вз ваараа хонд̇и . д̇зсу уд̣̇д̣̇идтаануггамзна нид̣̇д̣̇исид̇аб̣б̣ад̇д̇аа уд̣̇д̣̇зсавааро батамо. д̇асса яз гзжи гусалаа д̇хаммаа, саб̣б̣з д̇з гусаламуулаа; яз ваа бана гусаламуулаа, саб̣б̣з д̇з д̇хаммаа гусалаад̇и ид̣̇ам̣ яамагам̣ аад̣̇и . д̇асса гусалаагусаламууласан̇каад̇аанам̣ д̣̇виннам̣ ад̇т̇аанам̣ васзна ад̇т̇аяамаганд̇и ваа, д̇зсан̃н̃зва ад̇т̇аанам̣ васзна ануломабадиломад̇о бавад̇д̇абаал̣ид̇хаммавасзна д̇хаммаяамаганд̇и ваа, ануломабадиломад̇о бавад̇д̇абужчаавасзна бужчааяамаганд̇и ваа д̇ид̇хаа яамагабхааво взд̣̇ид̇аб̣б̣о. сзсзсуби зсзва наяо.
Tattha mūlavasena pucchāvissajjanaṃ katvā desitattā dasannaṃ tāva sabbapaṭhamaṃ mūlayamakanti vuttaṃ. Tassa uddesavāro, niddesavāroti dve vārā honti . Tesu uddiṭṭhānukkamena niddisitabbattā uddesavāro paṭhamo. Tassa ye keci kusalā dhammā, sabbe te kusalamūlā; ye vā pana kusalamūlā, sabbe te dhammā kusalāti idaṃ yamakaṃ ādi . Tassa kusalākusalamūlasaṅkhātānaṃ dvinnaṃ atthānaṃ vasena atthayamakanti vā, tesaññeva atthānaṃ vasena anulomapaṭilomato pavattapāḷidhammavasena dhammayamakanti vā, anulomapaṭilomato pavattapucchāvasena pucchāyamakanti vā tidhā yamakabhāvo veditabbo. Sesesupi eseva nayo.
ид̣̇аани имзсам̣ яамагаанам̣ васзна д̣̇зсид̇з имасмим̣ муулаяамагз уд̣̇д̣̇зсаваарасса д̇аава наяаяамагабужчааад̇т̇аваараббабхзд̣̇авасзна баал̣ивавад̇т̇аанамзва звам̣ взд̣̇ид̇аб̣б̣ам̣ – гусалад̇д̇игамаад̇игааяа хи ‘гусалаа д̇хаммаа’д̇и ид̣̇ам̣ аад̣̇ибад̣̇ам̣ ниссааяа мууланаяо, мууламууланаяо, муулаганаяо, мууламуулаганаяод̇и имз жад̇д̇ааро наяаа хонд̇и. д̇зсам̣ згзгасмим̣ наяз муулаяамагам̣, згамуулаяамагам̣, ан̃н̃аман̃н̃амуулаяамаганд̇и д̇ийн̣и д̇ийн̣и яамагаани. звам̣ жад̇уусу наязсу д̣̇ваад̣̇аса яамагаани, згзгасмим̣ яамагз ануломабадиломавасзна д̣̇вз д̣̇вз бужчаад̇и жад̇увийсад̇и бужчаа, згзгааяа бужчааяа саннидтаанасам̣саяавасзна д̣̇вз д̣̇вз ад̇т̇аад̇и адтажад̇д̇аалийса ад̇т̇аад̇и.
Idāni imesaṃ yamakānaṃ vasena desite imasmiṃ mūlayamake uddesavārassa tāva nayayamakapucchāatthavārappabhedavasena pāḷivavatthānameva evaṃ veditabbaṃ – kusalattikamātikāya hi ‘kusalā dhammā’ti idaṃ ādipadaṃ nissāya mūlanayo, mūlamūlanayo, mūlakanayo, mūlamūlakanayoti ime cattāro nayā honti. Tesaṃ ekekasmiṃ naye mūlayamakaṃ, ekamūlayamakaṃ, aññamaññamūlayamakanti tīṇi tīṇi yamakāni. Evaṃ catūsu nayesu dvādasa yamakāni, ekekasmiṃ yamake anulomapaṭilomavasena dve dve pucchāti catuvīsati pucchā, ekekāya pucchāya sanniṭṭhānasaṃsayavasena dve dve atthāti aṭṭhacattālīsa atthāti.
д̇ад̇т̇а яз гзжи гусалаа д̇хаммаад̇и гусалзсу ‘‘гусалаа ну ко, на гусалаа ну ко’’д̇и санд̣̇зхаабхаавад̇о имасмим̣ бад̣̇з саннидтаанад̇т̇о взд̣̇ид̇аб̣б̣о. саб̣б̣з д̇з гусаламуулаад̇и ‘‘саб̣б̣з д̇з гусалаа д̇хаммаа гусаламуулаа ну ко, нану ко’’д̇и звам̣ вимад̇ивасзна бужчид̇ад̇д̇аа имасмим̣ бад̣̇з сам̣саяад̇т̇о взд̣̇ид̇аб̣б̣о. со жа ко взнзяяаанам̣ сам̣саяадтаанз сам̣саяад̣̇ийбанад̇т̇ам̣ вуд̇д̇о, д̇ат̇ааг̇ад̇асса бана сам̣саяо наама над̇т̇и. ид̇о барзсуби бужчаабад̣̇зсу зсзва наяо.
Tattha ye keci kusalā dhammāti kusalesu ‘‘kusalā nu kho, na kusalā nu kho’’ti sandehābhāvato imasmiṃ pade sanniṭṭhānattho veditabbo. Sabbe te kusalamūlāti ‘‘sabbe te kusalā dhammā kusalamūlā nu kho, nanu kho’’ti evaṃ vimativasena pucchitattā imasmiṃ pade saṃsayattho veditabbo. So ca kho veneyyānaṃ saṃsayaṭṭhāne saṃsayadīpanatthaṃ vutto, tathāgatassa pana saṃsayo nāma natthi. Ito paresupi pucchāpadesu eseva nayo.
яат̇аа жа гусалабад̣̇ам̣ ниссааяа имз жад̇д̇ааро наяаа, згзгасмим̣ наяз д̇ин̣н̣ам̣ д̇ин̣н̣ам̣ яамагаанам̣ васзна д̣̇ваад̣̇аса яамагаани, згзгасмим̣ яамагз д̣̇виннам̣ д̣̇виннам̣ бужчаанам̣ васзна жад̇увийсад̇и бужчаа; згзгааяа бужчааяа д̣̇виннам̣ д̣̇виннам̣ ад̇т̇аанам̣ васзна адтажад̇д̇аалийса ад̇т̇аа жа хонд̇и. агусалабад̣̇ам̣ ниссааяаби д̇ат̇зва. аб̣яаагад̇абад̣̇ам̣ ниссааяаби д̇ат̇зва. д̇ийн̣иби бад̣̇аани згад̇о гад̇ваа нид̣̇д̣̇идтам̣ наамабад̣̇ам̣ ниссааяаби д̇ат̇зваад̇и гусалад̇д̇игамаад̇игааяа жад̇уусу бад̣̇зсу саб̣б̣зби сол̣аса наяаа, адтажад̇д̇аалийса яамагаани , чаннавуд̇и бужчаа, д̣̇взнавуд̇исад̇ам̣ ад̇т̇аа жа уд̣̇д̣̇зсавасзна вуд̇д̇аад̇и взд̣̇ид̇аб̣б̣аа. зд̇д̇аавад̇аа муулавааро наама батамам̣ уд̣̇д̣̇идто ход̇и.
Yathā ca kusalapadaṃ nissāya ime cattāro nayā, ekekasmiṃ naye tiṇṇaṃ tiṇṇaṃ yamakānaṃ vasena dvādasa yamakāni, ekekasmiṃ yamake dvinnaṃ dvinnaṃ pucchānaṃ vasena catuvīsati pucchā; ekekāya pucchāya dvinnaṃ dvinnaṃ atthānaṃ vasena aṭṭhacattālīsa atthā ca honti. Akusalapadaṃ nissāyapi tatheva. Abyākatapadaṃ nissāyapi tatheva. Tīṇipi padāni ekato katvā niddiṭṭhaṃ nāmapadaṃ nissāyapi tathevāti kusalattikamātikāya catūsu padesu sabbepi soḷasa nayā, aṭṭhacattālīsa yamakāni , channavuti pucchā, dvenavutisataṃ atthā ca uddesavasena vuttāti veditabbā. Ettāvatā mūlavāro nāma paṭhamaṃ uddiṭṭho hoti.
д̇ад̇о барам̣ яз гзжи гусалаа д̇хаммаа, саб̣б̣з д̇з гусалахзд̇ууд̇иаад̣̇аяо д̇ассзва муулаваарасса взважанавасзна нава ваараа уд̣̇д̣̇идтаа. ид̇и муулавааро, хзд̇увааро, нид̣̇аанавааро, самбхававааро, бабхававааро, самудтаанавааро, аахааравааро, аарамман̣авааро, бажжаяавааро, самуд̣̇аяаваарод̇и саб̣б̣зби д̣̇аса ваараа хонд̇и. д̇ад̇т̇а муулаваарз ааг̇ад̇абарижчзд̣̇знзва сзсзсуби наяаад̣̇аяо взд̣̇ид̇аб̣б̣аад̇и саб̣б̣зсуби д̣̇асасу ваарзсу садтисад̇анаяаа, асийд̇иад̇хигаани жад̇д̇аари яамагасад̇аани, садтиад̇хигаани навабужчаасад̇аани, вийсаад̇хигаани згуунавийсад̇и ад̇т̇асад̇аани жа уд̣̇д̣̇идтаанийд̇и взд̣̇ид̇аб̣б̣аани. звам̣ д̇аава уд̣̇д̣̇зсаваарз наяаяамагабужчааад̇т̇аваараббабхзд̣̇авасзна баал̣ивавад̇т̇аанамзва взд̣̇ид̇аб̣б̣ам̣.
Tato paraṃ ye keci kusalā dhammā, sabbe te kusalahetūtiādayo tasseva mūlavārassa vevacanavasena nava vārā uddiṭṭhā. Iti mūlavāro, hetuvāro, nidānavāro, sambhavavāro, pabhavavāro, samuṭṭhānavāro, āhāravāro, ārammaṇavāro, paccayavāro, samudayavāroti sabbepi dasa vārā honti. Tattha mūlavāre āgataparicchedeneva sesesupi nayādayo veditabbāti sabbesupi dasasu vāresu saṭṭhisatanayā, asītiadhikāni cattāri yamakasatāni, saṭṭhiadhikāni navapucchāsatāni, vīsādhikāni ekūnavīsati atthasatāni ca uddiṭṭhānīti veditabbāni. Evaṃ tāva uddesavāre nayayamakapucchāatthavārappabhedavasena pāḷivavatthānameva veditabbaṃ.
муулам̣ хзд̇у нид̣̇аанан̃жаад̇и г̇аат̇аа д̣̇асаннамби ваараанам̣ уд̣̇д̣̇аанаг̇аат̇аа наама. д̇ад̇т̇а муулаад̣̇ийни саб̣б̣ааниби гааран̣авзважанаанзва. гааран̣ан̃хи бад̇идтаанадтзна муулам̣. ад̇д̇ано паланибпаад̣̇анад̇т̇ам̣ хинод̇и бавад̇д̇ад̇ийд̇и хзд̇у. ‘ханд̣̇а, нам̣ г̇ан̣хаат̇аа’д̇и д̣̇ассзнд̇ам̣ вияа ад̇д̇ано палам̣ нид̣̇зд̇ийд̇и нид̣̇аанам̣. зд̇асмаа палам̣ самбход̇ийд̇и самбхаво. бабхавад̇ийд̇и бабхаво. самудтаад̇и зд̇т̇а палам̣, зд̇зна ваа самудтаад̇ийд̇и самудтаанам̣. ад̇д̇ано палам̣ аахарад̇ийд̇и аахааро. аббадигкибид̇аб̣б̣зна ад̇д̇ано палзна ааламб̣ияад̇ийд̇и ааламб̣ан̣ам̣. зд̇ам̣ бадижжа аббадигкибид̇ваа палам̣ зд̇и бавад̇д̇ад̇ийд̇и бажжаяо. зд̇асмаа палам̣ самуд̣̇зд̇ийд̇и самуд̣̇аяо. звамзд̇зсам̣ бад̣̇аанам̣ важанад̇т̇о взд̣̇ид̇аб̣б̣о.
Mūlaṃ hetu nidānañcāti gāthā dasannampi vārānaṃ uddānagāthā nāma. Tattha mūlādīni sabbānipi kāraṇavevacanāneva. Kāraṇañhi patiṭṭhānaṭṭhena mūlaṃ. Attano phalanipphādanatthaṃ hinoti pavattatīti hetu. ‘Handa, naṃ gaṇhāthā’ti dassentaṃ viya attano phalaṃ nidetīti nidānaṃ. Etasmā phalaṃ sambhotīti sambhavo. Pabhavatīti pabhavo. Samuṭṭhāti ettha phalaṃ, etena vā samuṭṭhātīti samuṭṭhānaṃ. Attano phalaṃ āharatīti āhāro. Appaṭikkhipitabbena attano phalena ālambiyatīti ālambaṇaṃ. Etaṃ paṭicca appaṭikkhipitvā phalaṃ eti pavattatīti paccayo. Etasmā phalaṃ samudetīti samudayo. Evametesaṃ padānaṃ vacanattho veditabbo.
уд̣̇д̣̇зсаваараван̣н̣анаа.
Uddesavāravaṇṇanā.
нид̣̇д̣̇зсаваараван̣н̣анаа
Niddesavāravaṇṇanā
50. ид̣̇аани язгзжи гусалаа д̇хаммаад̇иаад̣̇инаа наязна нид̣̇д̣̇зсавааро аарад̣̇д̇хо. д̇ад̇т̇а яз гзжийд̇и анавасзсаважанам̣. гусалаа д̇хаммаад̇и гусалад̇д̇игасса бад̣̇абхааж̇анз вуд̇д̇алагкан̣аа анаваж̇ж̇асукавибаагаа гусаласабхааваа. саб̣б̣з д̇з гусаламуулаад̇и гим̣ д̇з саб̣б̣зязва гусаламуулаад̇и бужчад̇и. д̇ийн̣зва гусаламуулаанийд̇и на д̇з саб̣б̣з гусаламуулаани, алобхаад̣̇ийни бана д̇ийн̣и зва гусаламуулаанийд̇и ад̇т̇о. авасзсаа гусалаа д̇хаммаа на гусаламуулаад̇и авасзсаа пассаад̣̇аяо гусалаа д̇хаммаа гусаламуулаани наама на хонд̇и. ат̇а ваа авасзсаа пассаад̣̇аяо гусалаа д̇хаммааязва наама, на гусаламуулаанийд̇иби ад̇т̇о. яз ваа бана гусаламуулаад̇и яз ваа бана батамабужчааяа д̣̇уд̇ияабад̣̇зна гусаламуулаад̇и д̇аяо алобхаад̣̇аяо г̇ахид̇аа. саб̣б̣з д̇з д̇хаммаа гусалаад̇и гим̣ д̇з саб̣б̣з д̇аяоби д̇хаммаа гусалаад̇и бужчад̇и. ааманд̇аад̇и саб̣б̣зсамби гусаламуулаанам̣ гусалабхаавам̣ самбадижчанд̇о ааха. аяам̣ д̇аава мууланаяз муулаяамагасса ад̇т̇о. иминаа убааязна саб̣б̣абужчаасу виссаж̇ж̇ананаяо взд̣̇ид̇аб̣б̣о. яам̣ бана яад̇т̇а висзсамад̇д̇ам̣ ад̇т̇и, д̇ад̣̇зва ван̣н̣аяиссаама.
50. Idāni yekeci kusalā dhammātiādinā nayena niddesavāro āraddho. Tattha ye kecīti anavasesavacanaṃ. Kusalā dhammāti kusalattikassa padabhājane vuttalakkhaṇā anavajjasukhavipākā kusalasabhāvā. Sabbe te kusalamūlāti kiṃ te sabbeyeva kusalamūlāti pucchati. Tīṇevakusalamūlānīti na te sabbe kusalamūlāni, alobhādīni pana tīṇi eva kusalamūlānīti attho. Avasesā kusalā dhammā na kusalamūlāti avasesā phassādayo kusalā dhammā kusalamūlāni nāma na honti. Atha vā avasesā phassādayo kusalā dhammāyeva nāma, na kusalamūlānītipi attho. Ye vā pana kusalamūlāti ye vā pana paṭhamapucchāya dutiyapadena kusalamūlāti tayo alobhādayo gahitā. Sabbe te dhammā kusalāti kiṃ te sabbe tayopi dhammā kusalāti pucchati. Āmantāti sabbesampi kusalamūlānaṃ kusalabhāvaṃ sampaṭicchanto āha. Ayaṃ tāva mūlanaye mūlayamakassa attho. Iminā upāyena sabbapucchāsu vissajjananayo veditabbo. Yaṃ pana yattha visesamattaṃ atthi, tadeva vaṇṇayissāma.
51. згамуулаяамагз д̇аава саб̣б̣з д̇з гусаламуулзна згамуулаад̇и г̇ан̣анадтзна згамуулагам̣ аг̇г̇ахзд̇ваа самаанадтзна г̇ахзд̇аб̣б̣аа. аяан̃хзд̇т̇а ад̇т̇о – саб̣б̣з д̇з гусаламуулзна самаанамуулаа. яам̣ пассасса муулам̣, д̇ад̣̇зва взд̣̇анаад̣̇ийнанд̇и. ат̇а нзсам̣ д̇ат̇аабхаавам̣ самбадижчанд̇о ааманд̇аад̇и ааха. гусаласамудтаананд̇и гусалажид̇д̇асамудтаанаруубам̣ д̣̇ассид̇ам̣. згамууланд̇и алобхаад̣̇инаа гусаламуулзна самаанамуулам̣ . яат̇зва хи пассаад̣̇ийнам̣ алобхаад̣̇аяо хзд̇убажжаяад̇д̇аа муулам̣, д̇ат̇аа д̇ам̣ самудтаанаруубассааби, гусалалагкан̣аабхаавзна бана д̇ам̣ на гусалам̣.
51. Ekamūlayamake tāva sabbe te kusalamūlena ekamūlāti gaṇanaṭṭhena ekamūlakaṃ aggahetvā samānaṭṭhena gahetabbā. Ayañhettha attho – sabbe te kusalamūlena samānamūlā. Yaṃ phassassa mūlaṃ, tadeva vedanādīnanti. Atha nesaṃ tathābhāvaṃ sampaṭicchanto āmantāti āha. Kusalasamuṭṭhānanti kusalacittasamuṭṭhānarūpaṃ dassitaṃ. Ekamūlanti alobhādinā kusalamūlena samānamūlaṃ . Yatheva hi phassādīnaṃ alobhādayo hetupaccayattā mūlaṃ, tathā taṃ samuṭṭhānarūpassāpi, kusalalakkhaṇābhāvena pana taṃ na kusalaṃ.
52. ан̃н̃аман̃н̃аяамагз ‘язгзжи гусалаа’д̇и абужчид̇ваа язгзжи гусаламуулзна згамуулаад̇и бужчаа гад̇аа. гасмаа? иминааби б̣яан̃ж̇анзна д̇ассзвад̇т̇асса самбхавад̇о. гусаламуулаанийд̇и ид̣̇ам̣ буримасса висзсанам̣. ‘муулаани яаани згад̇о уббаж̇ж̇анд̇ий’д̇и хи вуд̇д̇ам̣, д̇аани бана гусаламуулааниби хонд̇и агусалааб̣яаагад̇амуулааниби, ид̇ха гусаламуулаанийд̇и висзсад̣̇ассанад̇т̇амид̣̇ам̣ вуд̇д̇ам̣. ан̃н̃аман̃н̃амуулаани жаад̇и ан̃н̃аман̃н̃ам̣ хзд̇убажжаязна бажжаяаа хонд̇ийд̇и ад̇т̇о. д̇ассзва бадиломабужчааяа ‘саб̣б̣з д̇з д̇хаммаа гусаламуулзна згамуулаа’д̇и авад̇ваа саб̣б̣з д̇з д̇хаммаа гусалаад̇и вуд̇д̇ам̣. гасмаа? ад̇т̇ависзсаабхаавад̇о. гусаламуулзна згамуулаад̇и хи бужчааяа гад̇ааяа ‘муулаани яаани згад̇о уббаж̇ж̇анд̇ий’д̇и хздтаа вуд̇д̇анаязнзва виссаж̇ж̇анам̣ гаад̇аб̣б̣ам̣ бхавзяяа, зван̃жа сад̇и ад̇т̇ависзсаабхааво ход̇и. д̇асмаа д̇ат̇аа агад̇ваа звам̣ бужчаа гад̇аа. иминаа убааязна мууламууланаяаад̣̇ийсуби ан̃н̃аман̃н̃амуулаяамагз бужчаависзсо взд̣̇ид̇аб̣б̣о.
52. Aññamaññayamake ‘yekeci kusalā’ti apucchitvā yekeci kusalamūlena ekamūlāti pucchā katā. Kasmā? Imināpi byañjanena tassevatthassa sambhavato. Kusalamūlānīti idaṃ purimassa visesanaṃ. ‘Mūlāni yāni ekato uppajjantī’ti hi vuttaṃ, tāni pana kusalamūlānipi honti akusalaabyākatamūlānipi, idha kusalamūlānīti visesadassanatthamidaṃ vuttaṃ. Aññamaññamūlāni cāti aññamaññaṃ hetupaccayena paccayā hontīti attho. Tasseva paṭilomapucchāya ‘sabbe te dhammā kusalamūlena ekamūlā’ti avatvā sabbe te dhammā kusalāti vuttaṃ. Kasmā? Atthavisesābhāvato. Kusalamūlena ekamūlāti hi pucchāya katāya ‘mūlāni yāni ekato uppajjantī’ti heṭṭhā vuttanayeneva vissajjanaṃ kātabbaṃ bhaveyya, evañca sati atthavisesābhāvo hoti. Tasmā tathā akatvā evaṃ pucchā katā. Iminā upāyena mūlamūlanayādīsupi aññamaññamūlayamake pucchāviseso veditabbo.
53-55. мууламууланаяз саб̣б̣з д̇з гусаламууламуулаад̇и саб̣б̣з д̇з гусаламууласан̇каад̇аа муулаад̇и бужчад̇и. згамууламуулаад̇и самаанадтзна згамзва мууламуулам̣ зд̇зсанд̇и згамууламуулаа. ан̃н̃аман̃н̃амууламуулаад̇и ан̃н̃аман̃н̃асса муулам̣ ан̃н̃аман̃н̃амуулам̣, ан̃н̃аман̃н̃амуулам̣ хзд̇убажжаяадтзна муулам̣ зд̇зсанд̇и ан̃н̃аман̃н̃амууламуулаа.
53-55. Mūlamūlanaye sabbe te kusalamūlamūlāti sabbe te kusalamūlasaṅkhātā mūlāti pucchati. Ekamūlamūlāti samānaṭṭhena ekameva mūlamūlaṃ etesanti ekamūlamūlā. Aññamaññamūlamūlāti aññamaññassa mūlaṃ aññamaññamūlaṃ, aññamaññamūlaṃ hetupaccayaṭṭhena mūlaṃ etesanti aññamaññamūlamūlā.
56. муулаганаяз гусаламуулагаад̇и хзд̇убажжаяадтзна гусалам̣ муулам̣ зд̇зсанд̇и гусаламуулагаа.
56. Mūlakanaye kusalamūlakāti hetupaccayaṭṭhena kusalaṃ mūlaṃ etesanti kusalamūlakā.
57-61. мууламуулаганаяз гусаламууламуулагаад̇и гусалаанам̣ муулам̣ гусаламуулам̣. хзд̇убажжаяадтзнзва гусаламуулам̣ муулам̣ зд̇зсанд̇и гусаламууламуулагаад̇и. аяам̣ д̇аава гусалабад̣̇ам̣ ниссааяа наяаяамагабужчаасу висзсад̇т̇о.
57-61. Mūlamūlakanaye kusalamūlamūlakāti kusalānaṃ mūlaṃ kusalamūlaṃ. Hetupaccayaṭṭheneva kusalamūlaṃ mūlaṃ etesanti kusalamūlamūlakāti. Ayaṃ tāva kusalapadaṃ nissāya nayayamakapucchāsu visesattho.
62-73. агусалабад̣̇аад̣̇ийсуби зсзва наяо. аяам̣ бана висзсо, ахзд̇угам̣ агусаланд̇и вижигижчааяа жзва уд̣̇д̇хажжзна жа самбаяуд̇д̇ам̣ мохам̣ санд̇хааяа вуд̇д̇ам̣.
62-73. Akusalapadādīsupi eseva nayo. Ayaṃ pana viseso, ahetukaṃ akusalanti vicikicchāya ceva uddhaccena ca sampayuttaṃ mohaṃ sandhāya vuttaṃ.
74-85. ахзд̇угам̣ аб̣яаагад̇анд̇и адтаараса жид̇д̇уббаад̣̇аа руубам̣, ниб̣б̣аанан̃жа. аб̣яаагад̇амуулзна на згамууланд̇и ид̇ха бана табзд̇ваа сахзд̇угааб̣яаагад̇асамудтаанам̣ руубам̣, сзсам̣ лаб̣бхад̇и. сахзд̇угааб̣яаагад̇асамудтаанам̣ руубам̣ аб̣яаагад̇амуулзна згамуулам̣ ход̇и, д̇ам̣ аб̣б̣охааригам̣ гад̇ваа згад̇о лаб̣бхамаанагавасзнзва жзд̇ам̣ виссаж̇ж̇анам̣ гад̇ам̣.
74-85. Ahetukaṃabyākatanti aṭṭhārasa cittuppādā rūpaṃ, nibbānañca. Abyākatamūlena na ekamūlanti idha pana ṭhapetvā sahetukaabyākatasamuṭṭhānaṃ rūpaṃ, sesaṃ labbhati. Sahetukaabyākatasamuṭṭhānaṃ rūpaṃ abyākatamūlena ekamūlaṃ hoti, taṃ abbohārikaṃ katvā ekato labbhamānakavaseneva cetaṃ vissajjanaṃ kataṃ.
86-97. наамаа д̇хаммаад̇и наамасан̇каад̇аа д̇хаммаа. д̇з ад̇т̇ад̇о жад̇д̇ааро аруубино канд̇хаа, ниб̣б̣аанан̃жа. навзва наамамуулаанийд̇и гусалаагусалааб̣яаагад̇амуулавасзна нава муулаани. ахзд̇угам̣ наамам̣ наамамуулзна на згамууланд̇и ахзд̇угам̣ саб̣б̣амби адтаараса жид̇д̇уббаад̣̇авижигижчуд̣̇д̇хажжасамбаяуд̇д̇амоханиб̣б̣аанасан̇каад̇ам̣ наамам̣ наамамуулзна на згамуулам̣ . на хи д̇ам̣ д̇зна сад̣̇д̇хим̣ уббаж̇ж̇ад̇и. сахзд̇угам̣ наамам̣ наамамуулзнаад̇и бад̣̇зби сахзд̇угам̣ наамам̣ наамамуулзнаад̇и ад̇т̇о. сзсам̣ саб̣б̣ад̇т̇а уд̇д̇аанад̇т̇амзваад̇и.
86-97. Nāmā dhammāti nāmasaṅkhātā dhammā. Te atthato cattāro arūpino khandhā, nibbānañca. Naveva nāmamūlānīti kusalākusalaabyākatamūlavasena nava mūlāni. Ahetukaṃ nāmaṃ nāmamūlena na ekamūlanti ahetukaṃ sabbampi aṭṭhārasa cittuppādavicikicchuddhaccasampayuttamohanibbānasaṅkhātaṃ nāmaṃ nāmamūlena na ekamūlaṃ . Na hi taṃ tena saddhiṃ uppajjati. Sahetukaṃnāmaṃ nāmamūlenāti padepi sahetukaṃ nāmaṃ nāmamūlenāti attho. Sesaṃ sabbattha uttānatthamevāti.
муулаваараван̣н̣анаа.
Mūlavāravaṇṇanā.
98-99. хзд̇уваараад̣̇ийсуби иминаавубааязна ад̇т̇о взд̣̇ид̇аб̣б̣о. муулам̣ хзд̇у нид̣̇аанан̃жаад̇иг̇аат̇аа яат̇аанид̣̇д̣̇идтаанам̣ д̣̇асаннамби ваараанам̣ буна уд̣̇д̣̇аанавасзнзва вуд̇д̇аад̇и.
98-99. Hetuvārādīsupi imināvupāyena attho veditabbo. Mūlaṃ hetu nidānañcātigāthā yathāniddiṭṭhānaṃ dasannampi vārānaṃ puna uddānavaseneva vuttāti.
муулаяамагаван̣н̣анаа.
Mūlayamakavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 1. муулаяамагам̣ • 1. Mūlayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 1. муулаяамагам̣ • 1. Mūlayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 1. муулаяамагам̣ • 1. Mūlayamakaṃ
