| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
1. муулаяамагам̣
1. Mūlayamakaṃ
уд̣̇д̣̇зсаваараван̣н̣анаа
Uddesavāravaṇṇanā
1. яамагасамуухассаад̇и муулаяамагаад̣̇игасса яамагасамуухасса. муулаяамагаад̣̇аяо хи багаран̣аабзгкааяа аваяавабхууд̇ааби нижжааваяаваабзгкааяа яамагасамууход̇и вуд̇д̇о. д̇знааха ‘‘д̇ам̣самуухасса жа сагаласса багаран̣ассаа’’д̇и.
1. Yamakasamūhassāti mūlayamakādikassa yamakasamūhassa. Mūlayamakādayo hi pakaraṇāpekkhāya avayavabhūtāpi niccāvayavāpekkhāya yamakasamūhoti vutto. Tenāha ‘‘taṃsamūhassa ca sakalassa pakaraṇassā’’ti.
гусалаагусаламуулависзсаананд̇и д̣̇уд̇ияабужчааяа вуд̇д̇аанам̣ сам̣саяабад̣̇асан̇г̇ахид̇аанам̣ гусаласан̇каад̇аанам̣, д̇ат̇аа батамабужчааяа вуд̇д̇аанам̣ гусаламууласан̇каад̇аанам̣ висзсаанам̣ ад̇т̇аяамагабхаавасса вуд̇д̇ад̇д̇аад̇и яож̇анаа. яат̇аа хи батамабужчааяа висзсаванд̇абхаавзна вуд̇д̇ааязва гусалад̇хаммаа д̣̇уд̇ияабужчааяам̣ висзсабхаавзна вуд̇д̇аа, звам̣ батамабужчааяам̣ висзсабхаавзна вуд̇д̇ааязва гусаламуулад̇хаммаа д̣̇уд̇ияабужчааяам̣ висзсаванд̇абхаавзна вуд̇д̇аа. вад̇д̇уважанижчаавасзна хи д̇хаммаанам̣ висзсависзсаванд̇ад̇аавибхааг̇аа хонд̇ийд̇и. гусаламуулагусалависзсзхи сам̣саяид̇абад̣̇асан̇г̇ахид̇зхи гусалагусаламуулаанам̣ висзсаванд̇аананд̇и ад̇хиббааяо. зд̇т̇а жа висзсаванд̇аабзгкависзсавасзна батамо ад̇т̇авигаббо вуд̇д̇о, д̣̇уд̇ияо бана висзсаабзгкависзсаванд̇авасзнаад̇и аяамзд̇зсам̣ висзсо. д̇знааха ‘‘н̃аад̇ум̣ ижчид̇аанам̣ хий’’д̇иаад̣̇и.
Kusalākusalamūlavisesānanti dutiyapucchāya vuttānaṃ saṃsayapadasaṅgahitānaṃ kusalasaṅkhātānaṃ, tathā paṭhamapucchāya vuttānaṃ kusalamūlasaṅkhātānaṃ visesānaṃ atthayamakabhāvassa vuttattāti yojanā. Yathā hi paṭhamapucchāya visesavantabhāvena vuttāyeva kusaladhammā dutiyapucchāyaṃ visesabhāvena vuttā, evaṃ paṭhamapucchāyaṃ visesabhāvena vuttāyeva kusalamūladhammā dutiyapucchāyaṃ visesavantabhāvena vuttā. Vattuvacanicchāvasena hi dhammānaṃ visesavisesavantatāvibhāgā hontīti. Kusalamūlakusalavisesehi saṃsayitapadasaṅgahitehi kusalakusalamūlānaṃ visesavantānanti adhippāyo. Ettha ca visesavantāpekkhavisesavasena paṭhamo atthavikappo vutto, dutiyo pana visesāpekkhavisesavantavasenāti ayametesaṃ viseso. Tenāha ‘‘ñātuṃ icchitānaṃ hī’’tiādi.
д̇ад̇т̇а н̃аад̇ум̣ ижчид̇аананд̇и бужчааяа висаяабхууд̇аананд̇и ад̇т̇о. висзсаананд̇и гусалагусаламуулависзсаанам̣. висзсаванд̇аабзгкаананд̇и гусаламуулагусаласан̇каад̇зхи висзсаванд̇зхи саабзгкаанам̣. висзсавад̇анд̇и гусаламуулагусалаанам̣. висзсаабзгкаананд̇и гусалагусаламуулависзсзхи саабзгкаанам̣. зд̇т̇аад̇и зд̇асмим̣ муулаяамагз. бад̇хаанабхаавод̇и батамавигаббз д̇аава сам̣саяид̇аббад̇хаанад̇д̇аа бужчааяа висзсаанам̣ бад̇хаанабхааво взд̣̇ид̇аб̣б̣о. д̇з хи сам̣саяид̇аанам̣ висзсаванд̇од̇и. д̣̇уд̇ияавигаббз бана висзсаа наама висзсаванд̇аад̇хийнаад̇и висзсаванд̇аанам̣ д̇ад̇т̇а бад̇хаанабхааво д̣̇адтаб̣б̣о. д̣̇виннам̣ бана згаж̇жхам̣ бад̇хаанабхааво на яуж̇ж̇ад̇и. сад̇и хи аббад̇хаанз бад̇хаанам̣ наама сияаа. д̇знааха ‘‘згзгааяа бужчааяа згзго зва ад̇т̇о сан̇г̇ахид̇о ход̇ий’’д̇и. зван̃жзд̇ам̣ самбадижчид̇аб̣б̣ам̣, ан̃н̃ат̇аа винижчид̇ависзсид̇аб̣б̣абхаавзхи ид̇ха бад̇хаанабхааво на яуж̇ж̇ад̇зваад̇и. на д̇хаммаваажагод̇и на сабхаавад̇хаммаваажаго. сабхаавад̇хаммоби хи ад̇т̇од̇и вужжад̇и ‘‘г̇амбхийрабан̃н̃ам̣ нибун̣ад̇т̇ад̣̇асси’’нд̇иаад̣̇ийсу (су. ни. 178). ‘‘хзд̇упалз н̃аан̣ам̣ ад̇т̇абадисамбхид̣̇аа’’д̇иаад̣̇ийсу (вибха. 720) ад̇т̇а-сад̣̇д̣̇асса хзд̇упалаваажагад̇аа д̣̇адтаб̣б̣аа. аад̣̇и-сад̣̇д̣̇знасса ‘‘ад̇т̇аабхисамаяаа’’д̇иаад̣̇ийсу (сам̣. ни. 1.129) ааг̇ад̇аа хид̇аад̣̇иваажагад̇аа сан̇г̇аяхад̇и. д̇знзваад̇и баал̣иад̇т̇аваажагад̇д̇аа зва.
Tattha ñātuṃ icchitānanti pucchāya visayabhūtānanti attho. Visesānanti kusalakusalamūlavisesānaṃ. Visesavantāpekkhānanti kusalamūlakusalasaṅkhātehi visesavantehi sāpekkhānaṃ. Visesavatanti kusalamūlakusalānaṃ. Visesāpekkhānanti kusalakusalamūlavisesehi sāpekkhānaṃ. Etthāti etasmiṃ mūlayamake. Padhānabhāvoti paṭhamavikappe tāva saṃsayitappadhānattā pucchāya visesānaṃ padhānabhāvo veditabbo. Te hi saṃsayitānaṃ visesavantoti. Dutiyavikappe pana visesā nāma visesavantādhīnāti visesavantānaṃ tattha padhānabhāvo daṭṭhabbo. Dvinnaṃ pana ekajjhaṃ padhānabhāvo na yujjati. Sati hi appadhāne padhānaṃ nāma siyā. Tenāha ‘‘ekekāya pucchāya ekeko eva attho saṅgahito hotī’’ti. Evañcetaṃ sampaṭicchitabbaṃ, aññathā vinicchitavisesitabbabhāvehi idha padhānabhāvo na yujjatevāti. Na dhammavācakoti na sabhāvadhammavācako. Sabhāvadhammopi hi atthoti vuccati ‘‘gambhīrapaññaṃ nipuṇatthadassi’’ntiādīsu (su. ni. 178). ‘‘Hetuphale ñāṇaṃ atthapaṭisambhidā’’tiādīsu (vibha. 720) attha-saddassa hetuphalavācakatā daṭṭhabbā. Ādi-saddenassa ‘‘atthābhisamayā’’tiādīsu (saṃ. ni. 1.129) āgatā hitādivācakatā saṅgayhati. Tenevāti pāḷiatthavācakattā eva.
д̇ийн̣иби бад̣̇аанийд̇и зд̇т̇а би-сад̣̇д̣̇о самужжаяад̇т̇о, самужжаяо жа д̇уляаяог̇з сияаа. гим̣ наама-бад̣̇зна анавасзсад̇о гусалаад̣̇ийнам̣ сан̇г̇аход̇и аасан̇гааяа д̇ад̣̇аасан̇гаанивад̇д̇анад̇т̇амааха ‘‘д̇ийн̣иби…бз… сан̇г̇аахагад̇д̇а’’нд̇и. д̇ад̇т̇а сан̇г̇аахагад̇д̇амад̇д̇анд̇и мад̇д̇а-сад̣̇д̣̇о висзсанивад̇д̇иад̇т̇од̇и. д̇зна нивад̇д̇ид̇ам̣ висзсам̣ д̣̇ассзд̇ум̣ ‘‘на ниравасзсасан̇г̇аахагад̇д̇а’’нд̇и вуд̇д̇ам̣. на хи руубам̣ наама-бад̣̇зна сан̇г̇аяхад̇и. гусалаад̣̇иязва нааманд̇и нияамо д̣̇адтаб̣б̣о, на наамам̣язва гусалаад̣̇ийд̇и имамзва жа нияамам̣ санд̇хааяааха ‘‘гусалаад̣̇ийнам̣ сан̇г̇аахагад̇д̇амад̇д̇амзва санд̇хааяа вуд̇д̇а’’нд̇и. яад̣̇иби наама-бад̣̇ам̣ на ниравасзсагусалаад̣̇исан̇г̇аахагам̣, гусалаад̣̇исан̇г̇аахагам̣ бана ход̇и, д̇ад̣̇ад̇т̇амзва жа д̇ам̣ г̇ахид̇анд̇и наамасса гусалад̇д̇игабарияаабаннад̇аа вуд̇д̇аад̇и д̣̇ассзнд̇о ааха ‘‘гусалаад̣̇и…бз… вуд̇д̇а’’нд̇и.
Tīṇipi padānīti ettha pi-saddo samuccayattho, samuccayo ca tulyayoge siyā. Kiṃ nāma-padena anavasesato kusalādīnaṃ saṅgahoti āsaṅkāya tadāsaṅkānivattanatthamāha ‘‘tīṇipi…pe… saṅgāhakatta’’nti. Tattha saṅgāhakattamattanti matta-saddo visesanivattiatthoti. Tena nivattitaṃ visesaṃ dassetuṃ ‘‘na niravasesasaṅgāhakatta’’nti vuttaṃ. Na hi rūpaṃ nāma-padena saṅgayhati. Kusalādiyeva nāmanti niyamo daṭṭhabbo, na nāmaṃyeva kusalādīti imameva ca niyamaṃ sandhāyāha ‘‘kusalādīnaṃ saṅgāhakattamattameva sandhāya vutta’’nti. Yadipi nāma-padaṃ na niravasesakusalādisaṅgāhakaṃ, kusalādisaṅgāhakaṃ pana hoti, tadatthameva ca taṃ gahitanti nāmassa kusalattikapariyāpannatā vuttāti dassento āha ‘‘kusalādi…pe… vutta’’nti.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
нид̣̇д̣̇зсаваараван̣н̣анаа
Niddesavāravaṇṇanā
52. д̣̇уд̇ияаяамагзд̇и згамуулаяамагз. звамид̇хаабийд̇и яат̇аа згамуулаяамагз ‘‘яз гзжи гусалаа’’ижжзва бужчаа аарад̣̇д̇хаа, звам̣ ид̇хааби ан̃н̃аман̃н̃амуулаяамагзби ‘‘яз гзжи гусалаа’’ижжзва бужчаа аарабхид̇аб̣б̣аа сияаа. гасмаа? буримаяамага…бз… аббавад̇д̇ад̇д̇аад̇и. ид̣̇ан̃жа д̣̇уд̇ияаяамагасса д̇ат̇аа аббавад̇д̇ад̇д̇аа вуд̇д̇ам̣, д̇ад̇ияаяамагам̣ бана д̇ат̇зва бавад̇д̇ам̣. гзжийд̇и бад̣̇агаараа. д̇з хи яат̇аа батамад̣̇уд̇ияаяамагзсу буримабужчаа зва баривад̇д̇анавасзна бажчимабужчаа гад̇аад̇и бажчимабужчааяа буримабужчаа самаанаа табзд̇ваа бадиломабхаавам̣, на д̇ат̇аа ан̃н̃аман̃н̃аяамагз. д̇ад̇т̇а хи д̣̇взби бужчаа ан̃н̃аман̃н̃ависад̣̇исаа. яад̣̇и д̇ад̇т̇ааби д̣̇вийхиби бужчаахи сад̣̇исаахи бхавид̇аб̣б̣ам̣ , ‘‘яз гзжи гусалаа’’д̇и батамабужчаа аарабхид̇аб̣б̣аа, бажчимабужчаа ваа ‘‘саб̣б̣з д̇з д̇хаммаа гусаламуулзна згамуулаа’’д̇и вад̇д̇аб̣б̣аа сияаа. звам̣ бана авад̇ваа батамад̣̇уд̇ияаяамагзсу вияа буримабажчимабужчаа сад̣̇исаа агад̇ваа д̇ад̇ияаяамагз д̇аасам̣ висад̣̇исад̇аа ‘‘яз гзжи гусалаа’’д̇и анаарад̣̇д̇хад̇д̇аа, д̇асмаа бадиломабужчаануруубааяа ануломабужчааяа бхавид̇аб̣б̣анд̇и имамад̇т̇ам̣ санд̇хааяа ‘‘яз гзжи гусалаад̇и абужчид̇ваа’’д̇и вуд̇д̇анд̇и вад̣̇анд̇и.
52. Dutiyayamaketi ekamūlayamake. Evamidhāpīti yathā ekamūlayamake ‘‘ye keci kusalā’’icceva pucchā āraddhā, evaṃ idhāpi aññamaññamūlayamakepi ‘‘ye keci kusalā’’icceva pucchā ārabhitabbā siyā. Kasmā? Purimayamaka…pe… appavattattāti. Idañca dutiyayamakassa tathā appavattattā vuttaṃ, tatiyayamakaṃ pana tatheva pavattaṃ. Kecīti padakārā. Te hi yathā paṭhamadutiyayamakesu purimapucchā eva parivattanavasena pacchimapucchā katāti pacchimapucchāya purimapucchā samānā ṭhapetvā paṭilomabhāvaṃ, na tathā aññamaññayamake. Tattha hi dvepi pucchā aññamaññavisadisā. Yadi tatthāpi dvīhipi pucchāhi sadisāhi bhavitabbaṃ , ‘‘ye keci kusalā’’ti paṭhamapucchā ārabhitabbā, pacchimapucchā vā ‘‘sabbe te dhammā kusalamūlena ekamūlā’’ti vattabbā siyā. Evaṃ pana avatvā paṭhamadutiyayamakesu viya purimapacchimapucchā sadisā akatvā tatiyayamake tāsaṃ visadisatā ‘‘ye keci kusalā’’ti anāraddhattā, tasmā paṭilomapucchānurūpāya anulomapucchāya bhavitabbanti imamatthaṃ sandhāya ‘‘ye keci kusalāti apucchitvā’’ti vuttanti vadanti.
ад̇т̇авасзнаад̇и самбхаванд̇аанам̣ нижчид̇асам̣саяид̇аанам̣ ад̇т̇аанам̣ васзна. д̇ад̣̇ануруубааяаад̇и д̇ассаа буримабужчааяа ад̇т̇ад̇о б̣яан̃ж̇анад̇о жа анужчавигааяа. буриман̃хи абзгкид̇ваа бажчимааяа бхавид̇аб̣б̣ам̣. д̇знаад̇и д̇асмаа. яасмаа ануломз сам̣саяажчзд̣̇з ж̇аад̇зби бадиломз сам̣саяо уббаж̇ж̇ад̇и, яад̣̇и на уббаж̇ж̇зяяа, бадиломабужчааяа баяож̇анамзва на сияаа, д̇асмаа на бажчимабужчаануруубаа буримабужчаа, ат̇а ко вуд̇д̇анаязна буримабужчаануруубаа бажчимабужчаа, д̇ааяа жа ануруубад̇ааяа ад̇т̇аад̣̇ивасзна д̣̇виннам̣ бад̣̇аанам̣ самб̣анд̇хад̇д̇аа ад̇т̇аад̣̇ияамагад̇аа вуд̇д̇аа. д̣̇зсанааггамад̇о жзд̇т̇а ануломабадиломад̇аа взд̣̇ид̇аб̣б̣аа ‘‘гусалаа гусаламуулаа’’д̇и вад̇ваа ‘‘гусаламуулаа гусалаа’’д̇и жа вуд̇д̇ад̇д̇аа. сзсаяамагзсуби зсзва наяо. висзсаванд̇ависзса, висзсависзсаванд̇аг̇г̇ахан̣ад̇о ваа ид̇ха ануломабадиломад̇аа взд̣̇ид̇аб̣б̣аа. батамабужчааяан̃хи яз д̇хаммаа висзсаванд̇о, д̇з нижчаяаад̇хидтаанз гад̇ваа д̣̇ассзнд̇о ‘‘яз гзжи гусалаа д̇хаммаа’’д̇и вад̇ваа д̇зсу яасмим̣ висзсо сам̣саяаад̇хидтаано, д̇ам̣д̣̇ассанад̇т̇ам̣ ‘‘саб̣б̣з д̇з гусаламуулаа’’д̇и бужчаа гад̇аа. д̣̇уд̇ияабужчааяам̣ бана д̇аббадиломад̇о язна висзсзна д̇з висзсаванд̇о, д̇ам̣ висзсам̣ саннидтаанам̣ гад̇ваа д̣̇ассзнд̇о ‘‘яз ваа бана гусаламуулаа’’д̇и вад̇ваа д̇з висзсаванд̇з сам̣саяаад̇хидтаанабхууд̇з д̣̇ассзд̇ум̣ ‘‘саб̣б̣з д̇з д̇хаммаа гусалаа’’д̇и бужчаа гад̇аа. анияад̇авад̇т̇угаа хи саннидтаанасам̣саяаа анзгаж̇жхаасаяад̇д̇аа сад̇д̇аанам̣.
Atthavasenāti sambhavantānaṃ nicchitasaṃsayitānaṃ atthānaṃ vasena. Tadanurūpāyāti tassā purimapucchāya atthato byañjanato ca anucchavikāya. Purimañhi apekkhitvā pacchimāya bhavitabbaṃ. Tenāti tasmā. Yasmā anulome saṃsayacchede jātepi paṭilome saṃsayo uppajjati, yadi na uppajjeyya, paṭilomapucchāya payojanameva na siyā, tasmā na pacchimapucchānurūpā purimapucchā, atha kho vuttanayena purimapucchānurūpā pacchimapucchā, tāya ca anurūpatāya atthādivasena dvinnaṃ padānaṃ sambandhattā atthādiyamakatā vuttā. Desanākkamato cettha anulomapaṭilomatā veditabbā ‘‘kusalā kusalamūlā’’ti vatvā ‘‘kusalamūlā kusalā’’ti ca vuttattā. Sesayamakesupi eseva nayo. Visesavantavisesa, visesavisesavantaggahaṇato vā idha anulomapaṭilomatā veditabbā. Paṭhamapucchāyañhi ye dhammā visesavanto, te nicchayādhiṭṭhāne katvā dassento ‘‘ye keci kusalā dhammā’’ti vatvā tesu yasmiṃ viseso saṃsayādhiṭṭhāno, taṃdassanatthaṃ ‘‘sabbe te kusalamūlā’’ti pucchā katā. Dutiyapucchāyaṃ pana tappaṭilomato yena visesena te visesavanto, taṃ visesaṃ sanniṭṭhānaṃ katvā dassento ‘‘ye vā pana kusalamūlā’’ti vatvā te visesavante saṃsayādhiṭṭhānabhūte dassetuṃ ‘‘sabbe te dhammā kusalā’’ti pucchā katā. Aniyatavatthukā hi sanniṭṭhānasaṃsayā anekajjhāsayattā sattānaṃ.
иминааби б̣яан̃ж̇анзнаад̇и ‘‘яз гзжи гусаламуулзна згамуулаа’’д̇и иминааби ваагязна. звам̣ на саггаа вад̇д̇унд̇и язнаад̇хиббааязна вуд̇д̇ам̣, д̇амзваад̇хиббааяам̣ виварад̇и ‘‘на хий’’д̇иаад̣̇инаа. д̇ад̇т̇а д̇знзваад̇и гусалаб̣яан̃ж̇анад̇т̇асса гусаламуулзна згамуулаб̣яан̃ж̇анад̇т̇асса бхиннад̇д̇аа зва. виссаж̇ж̇ананд̇и вибхаж̇анам̣ . ид̇арат̇аад̇и гусаламуулзна згамуулаб̣яан̃ж̇анзна бужчааяа гад̇ааяа. д̇аани важанаанийд̇и гусалаважанам̣ гусаламуулзна згамуулаважанан̃жа. гусалажид̇д̇асамудтаанаруубавасзна жасса аб̣яаагад̇ад̣̇ийбанад̇аа д̣̇адтаб̣б̣аа. зд̇т̇аад̇и ‘‘иминааби б̣яан̃ж̇анзна д̇ассзвад̇т̇асса самбхавад̇о’’д̇и зд̇асмим̣ важанз. яз гзжи гусалаа…бз… самбхавад̇од̇и зд̇зна гусалаанам̣ гусаламуулзна згамуулад̇ааяа б̣яабхижаараабхаавам̣ д̣̇ассзд̇и. д̇знзвааха ‘‘на хи…бз… санд̇ий’’д̇и. вуд̇д̇аб̣яан̃ж̇анад̇т̇ассзва самбхавад̇од̇и хи иминаа авуд̇д̇аб̣яан̃ж̇анад̇т̇асса самбхаваабхаававажанзна свааяамад̇хиббааяамад̇т̇о вибхаавид̇о. яат̇аа хи гусаламуулзна згамуулаб̣яан̃ж̇анад̇т̇о гусалаб̣яан̃ж̇анад̇т̇ам̣ б̣яабхижарад̇и, на звам̣ д̇ам̣ гусалаб̣яан̃ж̇анад̇т̇о. гат̇ам̣ гад̇ваа жод̣̇анаа, гат̇ан̃жа гад̇ваа барихааро? гусаламуулзна згамуулаа гусалаа зваад̇и жод̣̇анаа гад̇аа, гусаламуулзна згамуулаа зва гусалаад̇и бана барихааро бавад̇д̇од̇и взд̣̇ид̇аб̣б̣ам̣. д̣̇уд̇ияаяамагз вияа абужчид̇ваад̇и ‘‘яз гзжи гусалаа’’д̇и абужчид̇ваа. гусаламуулзхийд̇и гусалзхи муулзхи. д̇зд̇и гусаламуулзна згамуулаа.
Imināpi byañjanenāti ‘‘ye keci kusalamūlena ekamūlā’’ti imināpi vākyena. Evaṃ na sakkā vattunti yenādhippāyena vuttaṃ, tamevādhippāyaṃ vivarati ‘‘na hī’’tiādinā. Tattha tenevāti kusalabyañjanatthassa kusalamūlena ekamūlabyañjanatthassa bhinnattā eva. Vissajjananti vibhajanaṃ . Itarathāti kusalamūlena ekamūlabyañjanena pucchāya katāya. Tāni vacanānīti kusalavacanaṃ kusalamūlena ekamūlavacanañca. Kusalacittasamuṭṭhānarūpavasena cassa abyākatadīpanatā daṭṭhabbā. Etthāti ‘‘imināpi byañjanena tassevatthassa sambhavato’’ti etasmiṃ vacane. Ye keci kusalā…pe… sambhavatoti etena kusalānaṃ kusalamūlena ekamūlatāya byabhicārābhāvaṃ dasseti. Tenevāha ‘‘na hi…pe… santī’’ti. Vuttabyañjanatthassevasambhavatoti hi iminā avuttabyañjanatthassa sambhavābhāvavacanena svāyamadhippāyamattho vibhāvito. Yathā hi kusalamūlena ekamūlabyañjanattho kusalabyañjanatthaṃ byabhicarati, na evaṃ taṃ kusalabyañjanattho. Kathaṃ katvā codanā, kathañca katvā parihāro? Kusalamūlena ekamūlā kusalā evāti codanā katā, kusalamūlena ekamūlā eva kusalāti pana parihāro pavattoti veditabbaṃ. Dutiyayamake viya apucchitvāti ‘‘ye keci kusalā’’ti apucchitvā. Kusalamūlehīti kusalehi mūlehi. Teti kusalamūlena ekamūlā.
згад̇о уббаж̇ж̇анд̇ийд̇и зд̇т̇а ид̇и-сад̣̇д̣̇о аад̣̇иад̇т̇о багаарад̇т̇о ваа. д̇зна ‘‘гусаламуулаани згамуулаани жзва ан̃н̃аман̃н̃амуулаани жаа’’д̇иаад̣̇ибаал̣исзсам̣ д̣̇ассзд̇и. яам̣ санд̇хааяа ‘‘хздтаа вуд̇д̇анаязнзва виссаж̇ж̇анам̣ гаад̇аб̣б̣ам̣ бхавзяяаа’’д̇и вуд̇д̇ам̣. д̇ад̇т̇а хздтаад̇и ануломабужчаависсаж̇ж̇анз. вуд̇д̇анаязнаад̇и ‘‘муулаани яаани згад̇о уббаж̇ж̇анд̇ий’’д̇иаад̣̇инаа вуд̇д̇анаязна. д̇амбийд̇и ‘‘гусаламуулзнаа’’д̇иаад̣̇и адтагат̇ааважанамби. д̇ат̇аад̇и д̇зна багаарзна, ануломабужчааяам̣ вияа виссаж̇ж̇анам̣ гаад̇аб̣б̣ам̣ бхавзяяаад̇и иминаа багаарзнаад̇и ад̇т̇о. язна гааран̣зна ‘‘на саггаа вад̇д̇у’’нд̇и вуд̇д̇ам̣, д̇ам̣ гааран̣ам̣ д̣̇ассзд̇ум̣ ‘‘яз ваа банаа’’д̇иаад̣̇имааха. д̇ад̇т̇а ‘‘ааманд̇аа’’ижжзва виссаж̇ж̇анзна бхавид̇аб̣б̣анд̇и ‘‘саб̣б̣з д̇з д̇хаммаа гусалаа’’д̇и бужчааяам̣ вияа ‘‘саб̣б̣з д̇з д̇хаммаа гусаламуулзна згамуулаа’’д̇и бужчид̇зби бадиважанависсаж̇ж̇анамзва лаб̣бхад̇и, на ануломабужчааяам̣ вияа саруубад̣̇ассанависсаж̇ж̇анам̣ вибхаж̇ид̇ваа д̣̇ассзд̇аб̣б̣асса абхаавад̇о. яз хи д̇хаммаа гусаламуулзна згамуулаа, на д̇з д̇хаммаа гусаламуулзна ан̃н̃аман̃н̃амуулаава. яз бана гусаламуулзна ан̃н̃аман̃н̃амуулаа, д̇з гусаламуулзна згамуулаава. д̇знааха ‘‘на хи…бз… вибхааг̇о гаад̇аб̣б̣о бхавзяяаа’’д̇и.
Ekato uppajjantīti ettha iti-saddo ādiattho pakārattho vā. Tena ‘‘kusalamūlāni ekamūlāni ceva aññamaññamūlāni cā’’tiādipāḷisesaṃ dasseti. Yaṃ sandhāya ‘‘heṭṭhā vuttanayeneva vissajjanaṃ kātabbaṃ bhaveyyā’’ti vuttaṃ. Tattha heṭṭhāti anulomapucchāvissajjane. Vuttanayenāti ‘‘mūlāni yāni ekato uppajjantī’’tiādinā vuttanayena. Tampīti ‘‘kusalamūlenā’’tiādi aṭṭhakathāvacanampi. Tathāti tena pakārena, anulomapucchāyaṃ viya vissajjanaṃ kātabbaṃ bhaveyyāti iminā pakārenāti attho. Yena kāraṇena ‘‘na sakkā vattu’’nti vuttaṃ, taṃ kāraṇaṃ dassetuṃ ‘‘ye vā panā’’tiādimāha. Tattha ‘‘āmantā’’icceva vissajjanena bhavitabbanti ‘‘sabbe te dhammā kusalā’’ti pucchāyaṃ viya ‘‘sabbe te dhammā kusalamūlena ekamūlā’’ti pucchitepi paṭivacanavissajjanameva labbhati, na anulomapucchāyaṃ viya sarūpadassanavissajjanaṃ vibhajitvā dassetabbassa abhāvato. Ye hi dhammā kusalamūlena ekamūlā, na te dhammā kusalamūlena aññamaññamūlāva. Ye pana kusalamūlena aññamaññamūlā, te kusalamūlena ekamūlāva. Tenāha ‘‘na hi…pe… vibhāgo kātabbo bhaveyyā’’ti.
д̇ад̇т̇а язнаад̇и язна ан̃н̃аман̃н̃амуулзсу згамууласса абхаавзна. яад̇т̇аад̇и яасмим̣ н̃аан̣асамбаяуд̇д̇ажид̇д̇уббаад̣̇з. ан̃н̃аман̃н̃амуулагад̇д̇аа згамуулагад̇д̇аа жаад̇и ад̇хиббааяо. д̣̇виннам̣ д̣̇виннан̃хи згзгзна ан̃н̃аман̃н̃амуулагад̇д̇з вуд̇д̇з д̇зсам̣ згзгзна згамуулагад̇д̇амби вуд̇д̇амзва ход̇и самаанад̇т̇о згасад̣̇д̣̇од̇и гад̇ваа. д̇знзвааха ‘‘яад̇т̇а бана…бз… на згамуулааний’’д̇и. д̇аяид̣̇ам̣ мижчаа, д̣̇вийсуби згзгзна ид̇арасса згамуулагад̇д̇ам̣ самбхавад̇и зваад̇и. д̇знааха ‘‘зд̇асса г̇ахан̣асса нивааран̣ад̇т̇а’’нд̇иаад̣̇и. ‘‘яз д̇хаммаа гусаламуулзна ан̃н̃аман̃н̃амуулаа, д̇з гусаламуулзна згамуулаа’’д̇и имамад̇т̇ам̣ вибхаавзнд̇зна ид̇ха ‘‘ааманд̇аа’’д̇и бад̣̇зна яад̇т̇а д̣̇вз муулаани уббаж̇ж̇анд̇и, д̇ад̇т̇а згзгзна ид̇арасса згамуулагад̇д̇ам̣ багаасид̇амзваад̇и ааха ‘‘ааманд̇аад̇и иминаава виссаж̇ж̇анзна д̇ам̣г̇ахан̣анивааран̣ад̇о’’д̇и . нижчид̇ад̇д̇аад̇и зд̇т̇а згад̇о уббаж̇ж̇амаанаанам̣ д̇ин̣н̣аннам̣ д̇аава муулаанам̣ нижчид̇ам̣ ход̇у ан̃н̃аман̃н̃згамуулагад̇д̇ам̣, д̣̇виннам̣ бана гат̇анд̇и ааха ‘‘ан̃н̃аман̃н̃амуулаанам̣ хий’’д̇иаад̣̇и. самаанамуулад̇аа зваад̇и авад̇хааран̣зна нивад̇д̇ид̇ад̇т̇ам̣ д̣̇ассзд̇ум̣ ‘‘на ан̃н̃аман̃н̃асамаанамуулад̇аа’’д̇и вуд̇д̇ам̣. д̇зна ан̃н̃аман̃н̃амуулаанам̣ самаанамуулад̇аамад̇д̇аважанижчааяа згамуулаг̇г̇ахан̣ам̣, на д̇зсам̣ ан̃н̃аман̃н̃абажжаяад̇аависидтасамаанамуулад̇аад̣̇ассанад̇т̇анд̇и имамад̇т̇ам̣ д̣̇ассзд̇и. д̣̇виннам̣ муулаананд̇и д̣̇виннам̣ згамуулаанам̣ згад̇о уббаж̇ж̇амаанаанам̣. яат̇аа д̇зсам̣ самаанамуулад̇аа, д̇ам̣ д̣̇ассзд̇ум̣ ‘‘д̇зсу хий’’д̇иаад̣̇и вуд̇д̇ам̣. д̇ам̣муулзхи ан̃н̃зхийд̇и ид̇арамуулзхи муулад̣̇ваяад̇о ан̃н̃зхи сахаж̇аад̇ад̇хаммзхи.
Tattha yenāti yena aññamaññamūlesu ekamūlassa abhāvena. Yatthāti yasmiṃ ñāṇasampayuttacittuppāde. Aññamaññamūlakattā ekamūlakattā cāti adhippāyo. Dvinnaṃ dvinnañhi ekekena aññamaññamūlakatte vutte tesaṃ ekekena ekamūlakattampi vuttameva hoti samānattho ekasaddoti katvā. Tenevāha ‘‘yattha pana…pe… na ekamūlānī’’ti. Tayidaṃ micchā, dvīsupi ekekena itarassa ekamūlakattaṃ sambhavati evāti. Tenāha ‘‘etassa gahaṇassa nivāraṇattha’’ntiādi. ‘‘Ye dhammā kusalamūlena aññamaññamūlā, te kusalamūlena ekamūlā’’ti imamatthaṃ vibhāventena idha ‘‘āmantā’’ti padena yattha dve mūlāni uppajjanti, tattha ekekena itarassa ekamūlakattaṃ pakāsitamevāti āha ‘‘āmantāti imināva vissajjanena taṃgahaṇanivāraṇato’’ti . Nicchitattāti ettha ekato uppajjamānānaṃ tiṇṇannaṃ tāva mūlānaṃ nicchitaṃ hotu aññamaññekamūlakattaṃ, dvinnaṃ pana kathanti āha ‘‘aññamaññamūlānaṃ hī’’tiādi. Samānamūlatā evāti avadhāraṇena nivattitatthaṃ dassetuṃ ‘‘na aññamaññasamānamūlatā’’ti vuttaṃ. Tena aññamaññamūlānaṃ samānamūlatāmattavacanicchāya ekamūlaggahaṇaṃ, na tesaṃ aññamaññapaccayatāvisiṭṭhasamānamūlatādassanatthanti imamatthaṃ dasseti. Dvinnaṃ mūlānanti dvinnaṃ ekamūlānaṃ ekato uppajjamānānaṃ. Yathā tesaṃ samānamūlatā, taṃ dassetuṃ ‘‘tesu hī’’tiādi vuttaṃ. Taṃmūlehi aññehīti itaramūlehi mūladvayato aññehi sahajātadhammehi.
ид̣̇аани язна ад̇хиббааязна бадиломз ‘‘гусалаа’’ижжзва бужчаа гад̇аа, на ‘‘гусаламуулзна згамуулаа’’д̇и, д̇ам̣ д̣̇ассзд̇ум̣ ‘‘ан̃н̃аман̃н̃амуулад̇д̇з бана…бз… гад̇аад̇и д̣̇адтаб̣б̣а’’нд̇и ааха. на хи гусаламуулзна ан̃н̃аман̃н̃амуулзсу гин̃жи згамуулам̣ на ход̇ийд̇и вуд̇д̇овааяамад̇т̇о. муулаяуд̇д̇ад̇амзва вад̣̇ад̇и, на муулзхи аяуд̇д̇анд̇и ад̇хиббааяо. ан̃н̃ат̇аа буб̣б̣знаабарам̣ вируж̇жхзяяа. д̇знзваад̇и муулаяуд̇д̇ад̇ааяа зва вужжамаанад̇д̇аа. убхаяад̇т̇аабийд̇и ан̃н̃аман̃н̃амуулаа згамуулаад̇и д̣̇вийсуби бад̣̇зсу. ‘‘гусаламуулзнаа’’д̇и вуд̇д̇ам̣, гусаламуулзна самбаяуд̇д̇знаад̇и хи ад̇т̇о. яад̣̇и убхаяамби важанам̣ муулаяуд̇д̇ад̇амзва вад̣̇ад̇и, ат̇а гасмаа ануломабужчааяамзва згамуулаг̇г̇ахан̣ам̣ гад̇ам̣, на бадиломабужчааяанд̇и убхаяад̇т̇ааби д̇ам̣ г̇ахзд̇аб̣б̣ам̣ на ваа г̇ахзд̇аб̣б̣ам̣. зван̃хи муулзгамуулаяамагад̣̇зсанаахи аяам̣ ан̃н̃аман̃н̃аяамагад̣̇зсанаа самаанарасаа сияаад̇и жод̣̇анам̣ манаси гад̇ваа ааха ‘‘д̇ад̇т̇аа’’д̇иаад̣̇и.
Idāni yena adhippāyena paṭilome ‘‘kusalā’’icceva pucchā katā, na ‘‘kusalamūlena ekamūlā’’ti, taṃ dassetuṃ ‘‘aññamaññamūlatte pana…pe… katāti daṭṭhabba’’nti āha. Na hi kusalamūlena aññamaññamūlesu kiñci ekamūlaṃ na hotīti vuttovāyamattho. Mūlayuttatameva vadati, na mūlehi ayuttanti adhippāyo. Aññathā pubbenāparaṃ virujjheyya. Tenevāti mūlayuttatāya eva vuccamānattā. Ubhayatthāpīti aññamaññamūlā ekamūlāti dvīsupi padesu. ‘‘Kusalamūlenā’’ti vuttaṃ, kusalamūlena sampayuttenāti hi attho. Yadi ubhayampi vacanaṃ mūlayuttatameva vadati, atha kasmā anulomapucchāyameva ekamūlaggahaṇaṃ kataṃ, na paṭilomapucchāyanti ubhayatthāpi taṃ gahetabbaṃ na vā gahetabbaṃ. Evañhi mūlekamūlayamakadesanāhi ayaṃ aññamaññayamakadesanā samānarasā siyāti codanaṃ manasi katvā āha ‘‘tatthā’’tiādi.
д̇ад̇т̇а д̇ад̇т̇аад̇и д̇асмим̣ ан̃н̃аман̃н̃аяамагз. яад̣̇иби згамуулаа ан̃н̃аман̃н̃амуулаад̇и ид̣̇ам̣ бад̣̇ад̣̇ваяам̣ вуд̇д̇анаязна муулаяуд̇д̇ад̇амзва вад̣̇ад̇и, д̇ат̇ааби сааман̃н̃ависзсалагкан̣з ад̇т̇зва бхзд̣̇од̇и д̣̇ассзд̇ум̣ ‘‘муулаяог̇асааман̃н̃з’’д̇иаад̣̇и вуд̇д̇ам̣. самуулагаанам̣ самаанамуулад̇аа згамуулад̇д̇анд̇и згамуулаважанам̣ д̇зсу ависзсад̇о мууласаб̣бхаавамад̇д̇ам̣ вад̣̇ад̇и, на ан̃н̃аман̃н̃амууласад̣̇д̣̇о вияа муулзсу лаб̣бхамаанам̣ висзсам̣, на жа сааман̃н̃з нижчаяо висзсз сам̣саяам̣ вид̇хамад̇ийд̇и имамад̇т̇амааха ‘‘муулаяог̇асааман̃н̃з…бз… бавад̇д̇аа’’д̇и иминаа. висзсз бана нижчаяо сааман̃н̃з сам̣саяам̣ вид̇хаманд̇о зва бавад̇д̇ад̇ийд̇и ааха ‘‘муулаяог̇ависзсз бана…бз… нижчид̇амзва ход̇ий’’д̇и. д̇асмаад̇и вуд̇д̇ассзва д̇асса хзд̇убхаавзна бараамасанам̣, висзсанижчаязнзва авинаабхаавад̇о, сааман̃н̃асса нижчид̇ад̇д̇аа д̇ад̇т̇а ваа сам̣саяаабхаавад̇од̇и ад̇т̇о. д̇знааха ‘‘згамуулаад̇и бужчам̣ агад̇ваа’’д̇и. гусалабхаавад̣̇ийбагам̣ на ход̇ийд̇и гусалабхаавассзва д̣̇ийбагам̣ на ход̇и д̇ад̣̇ан̃н̃аж̇аад̇игассаби д̣̇ийбанад̇о. д̇знааха ‘‘гусалабхаавз сам̣саяасаб̣бхааваа’’д̇и. ан̃н̃аман̃н̃амуулаважананд̇и гзвалам̣ ан̃н̃аман̃н̃амуулаважананд̇и ад̇хиббааяо. гусалаад̇хигаарасса анувад̇д̇амаанад̇д̇аад̇и иминаа ‘‘саб̣б̣з д̇з д̇хаммаа гусалаа’’д̇и гусалаг̇г̇ахан̣з гааран̣амааха. згамуулаг̇г̇ахан̣з хи баяож̇анаабхааво д̣̇ассид̇о, гусаласса васзна жааяам̣ д̣̇зсанаад̇и.
Tattha tatthāti tasmiṃ aññamaññayamake. Yadipi ekamūlā aññamaññamūlāti idaṃ padadvayaṃ vuttanayena mūlayuttatameva vadati, tathāpi sāmaññavisesalakkhaṇe attheva bhedoti dassetuṃ ‘‘mūlayogasāmaññe’’tiādi vuttaṃ. Samūlakānaṃ samānamūlatā ekamūlattanti ekamūlavacanaṃ tesu avisesato mūlasabbhāvamattaṃ vadati, na aññamaññamūlasaddo viya mūlesu labbhamānaṃ visesaṃ, na ca sāmaññe nicchayo visese saṃsayaṃ vidhamatīti imamatthamāha ‘‘mūlayogasāmaññe…pe… pavattā’’ti iminā. Visese pana nicchayo sāmaññe saṃsayaṃ vidhamanto eva pavattatīti āha ‘‘mūlayogavisese pana…pe… nicchitameva hotī’’ti. Tasmāti vuttasseva tassa hetubhāvena parāmasanaṃ, visesanicchayeneva avinābhāvato, sāmaññassa nicchitattā tattha vā saṃsayābhāvatoti attho. Tenāha ‘‘ekamūlāti pucchaṃ akatvā’’ti. Kusalabhāvadīpakaṃ na hotīti kusalabhāvasseva dīpakaṃ na hoti tadaññajātikassapi dīpanato. Tenāha ‘‘kusalabhāve saṃsayasabbhāvā’’ti. Aññamaññamūlavacananti kevalaṃ aññamaññamūlavacananti adhippāyo. Kusalādhikārassa anuvattamānattāti iminā ‘‘sabbe te dhammā kusalā’’ti kusalaggahaṇe kāraṇamāha. Ekamūlaggahaṇe hi payojanābhāvo dassito, kusalassa vasena cāyaṃ desanāti.
53-61. мууланаяз вуд̇д̇з зва ад̇т̇зд̇и мууланаяз вуд̇д̇з зва гусалаад̣̇ид̇хаммз. гусалаад̣̇аяо хи сабхаавад̇хаммаа ид̇ха баал̣иад̇т̇ад̇ааяа ад̇т̇од̇и вуд̇д̇о. гусаламуулабхаавзна, мууласса висзсанзна, муулаяог̇ад̣̇ийбанзна жа багаасзд̇ум̣. гусаламуулабхууд̇аа муулаа гусаламууламуулаад̇и самаасаяож̇анаа. муулаважанан̃хи нивад̇д̇зд̇аб̣б̣аг̇ахзд̇аб̣б̣асаад̇хааран̣ам̣. агусалааб̣яаагад̇ааби муулад̇хаммаа ад̇т̇ийд̇и гусаламуулабхаавзна муулад̇хаммаа висзсид̇аа. муулаг̇г̇ахан̣зна жа муулаванд̇аанам̣ муулаяог̇о д̣̇ийбид̇о ход̇и. самаанзна муулзна, мууласса висзсанзна, муулаяог̇ад̣̇ийбанзна жа багаасзд̇ум̣ ‘‘згамууламуулаа’’д̇и, ан̃н̃аман̃н̃асса муулзна муулабхаавзна, мууласса висзсанзна, муулаяог̇ад̣̇ийбанзна жа багаасзд̇ум̣ ‘‘ан̃н̃аман̃н̃амууламуулаа’’д̇и мууламууланаяо вуд̇д̇од̇и яож̇анаа. д̇ийсуби яамагзсу яат̇аавуд̇д̇ависзсанамзвзд̇т̇а барияааяанд̇арам̣ д̣̇адтаб̣б̣ам̣.
53-61. Mūlanaye vutte eva attheti mūlanaye vutte eva kusalādidhamme. Kusalādayo hi sabhāvadhammā idha pāḷiatthatāya atthoti vutto. Kusalamūlabhāvena, mūlassa visesanena, mūlayogadīpanena ca pakāsetuṃ. Kusalamūlabhūtā mūlā kusalamūlamūlāti samāsayojanā. Mūlavacanañhi nivattetabbagahetabbasādhāraṇaṃ. Akusalābyākatāpi mūladhammā atthīti kusalamūlabhāvena mūladhammā visesitā. Mūlaggahaṇena ca mūlavantānaṃ mūlayogo dīpito hoti. Samānena mūlena, mūlassa visesanena, mūlayogadīpanena ca pakāsetuṃ ‘‘ekamūlamūlā’’ti, aññamaññassa mūlena mūlabhāvena, mūlassa visesanena, mūlayogadīpanena ca pakāsetuṃ ‘‘aññamaññamūlamūlā’’ti mūlamūlanayo vuttoti yojanā. Tīsupi yamakesu yathāvuttavisesanamevettha pariyāyantaraṃ daṭṭhabbaṃ.
муулаяог̇ам̣ д̣̇ийбзд̇унд̇и муулаяог̇амзва бад̇хаанам̣ саад̇исаяан̃жа гад̇ваа д̣̇ийбзд̇унд̇и ад̇хиббааяо. яат̇аа хи гусалаани муулаани зд̇зсанд̇и гусаламуулагаанийд̇и б̣аахирад̇т̇асамаасз муулаяог̇о бад̇хаанабхаавзна вуд̇д̇о ход̇и, на звам̣ ‘‘гусаласан̇каад̇аа муулаа гусаламуулаа’’д̇и гзвалам̣, ‘‘гусаламууламуулаа’’д̇и сависзсанам̣ ваа вуд̇д̇з уд̇д̇арабад̣̇ад̇т̇аббад̇хаанасамаасз. д̇знааха ‘‘ан̃н̃абад̣̇ад̇т̇а…бз… д̣̇ийбзд̇у’’нд̇и. вуд̇д̇аббагаароваад̇и ‘‘гусаламуулабхаавзна мууласса висзсанзнаа’’д̇иаад̣̇инаа мууламууланаяз жа, ‘‘ан̃н̃абад̣̇ад̇т̇асамаасанд̇зна га-гаарзнаа’’д̇иаад̣̇инаа муулаганаяз жа вуд̇д̇аббагааро зва. важанабарияааяо мууламуулаганаяз згаж̇жхам̣ гад̇ваа яож̇зд̇аб̣б̣о.
Mūlayogaṃdīpetunti mūlayogameva padhānaṃ sātisayañca katvā dīpetunti adhippāyo. Yathā hi kusalāni mūlāni etesanti kusalamūlakānīti bāhiratthasamāse mūlayogo padhānabhāvena vutto hoti, na evaṃ ‘‘kusalasaṅkhātā mūlā kusalamūlā’’ti kevalaṃ, ‘‘kusalamūlamūlā’’ti savisesanaṃ vā vutte uttarapadatthappadhānasamāse. Tenāha ‘‘aññapadattha…pe… dīpetu’’nti. Vuttappakārovāti ‘‘kusalamūlabhāvena mūlassa visesanenā’’tiādinā mūlamūlanaye ca, ‘‘aññapadatthasamāsantena ka-kārenā’’tiādinā mūlakanaye ca vuttappakāro eva. Vacanapariyāyo mūlamūlakanaye ekajjhaṃ katvā yojetabbo.
74-85. на згамуулабхаавам̣ лабхамаанзхийд̇и аб̣яаагад̇амуулзна на згамуулагам̣ д̇ат̇аавад̇д̇аб̣б̣ад̇ам̣ лабхамаанзхи адтаарасаахзд̇угажид̇д̇уббаад̣̇аахзд̇угасамудтаанаруубаниб̣б̣аанзхи згад̇о алаб̣бхамаанад̇д̇аа. яат̇аа хи яат̇аавуд̇д̇ажид̇д̇уббаад̣̇аад̣̇аяо хзд̇убажжаяавирахид̇аа ахзд̇угавохаарам̣ лабханд̇и, на звам̣ сахзд̇угасамудтаанам̣ руубам̣. д̇знааха ‘‘ахзд̇угавохаарарахид̇ам̣ гад̇ваа’’д̇и. зд̇т̇а жа ‘‘саб̣б̣ам̣ руубам̣ на хзд̇угамзва, ахзд̇угамзваа’’д̇и вуд̇д̇ад̇д̇аа гин̃жааби сахзд̇угасамудтаанамби руубам̣ ахзд̇угам̣, ‘‘аб̣яаагад̇о д̇хаммо аб̣яаагад̇асса д̇хаммасса хзд̇убажжаязна бажжаяо, вибаагааб̣яаагад̇аа гирияааб̣яаагад̇аа хзд̇уу самбаяуд̇д̇агаанам̣ канд̇хаанам̣ жид̇д̇асамудтаанаанан̃жа руубаанам̣ хзд̇убажжаязна бажжаяо’’д̇и (бадтаа. 1.1.403) бана важанад̇о хзд̇убажжаяаяог̇зна сахзд̇угасамудтаанасса руубасса ахзд̇угавохаараабхааво вуд̇д̇о. гзжи бана ‘‘аб̣б̣охааригам̣ гад̇ваад̇и сахзд̇угавохаарзна аб̣б̣охааригам̣ гад̇ваад̇и ад̇т̇ам̣ вад̇ваа ан̃н̃ат̇аа ‘ахзд̇угам̣ аб̣яаагад̇ам̣ аб̣яаагад̇амуулзна згамуула’нд̇и на саггаа вад̇д̇у’’нд̇и вад̣̇анд̇и. д̇ад̇т̇а яам̣ вад̇д̇аб̣б̣ам̣, д̇ам̣ вуд̇д̇амзва ахзд̇угавохаараабхаавзна сахзд̇угад̇аабарияааяасса ад̇т̇асид̣̇д̇хад̇д̇аа. абижа хзд̇убажжаяасаб̣бхаавад̇о д̇асса сахзд̇угад̇аабарияааяо лаб̣бхад̇зва. д̇знааха ‘‘на ваа сахзд̇угад̣̇угз вияа…бз… аб̣б̣охааригам̣ гад̇а’’нд̇и. зд̇т̇а зд̇т̇аад̇и зд̇асмим̣ згамуулагад̣̇угз. хзд̇убажжаяаяог̇ааяог̇авасзнаад̇и хзд̇убажжаязна яог̇ааяог̇авасзна, хзд̇убажжаяасса саб̣бхааваасаб̣бхаававасзнаад̇и ад̇т̇о. сахзд̇угавохаарамзва лабхад̇и бажжаяабхууд̇ахзд̇усаб̣бхаавад̇о.
74-85. Na ekamūlabhāvaṃ labhamānehīti abyākatamūlena na ekamūlakaṃ tathāvattabbataṃ labhamānehi aṭṭhārasaahetukacittuppādāhetukasamuṭṭhānarūpanibbānehi ekato alabbhamānattā. Yathā hi yathāvuttacittuppādādayo hetupaccayavirahitā ahetukavohāraṃ labhanti, na evaṃ sahetukasamuṭṭhānaṃ rūpaṃ. Tenāha ‘‘ahetukavohārarahitaṃ katvā’’ti. Ettha ca ‘‘sabbaṃ rūpaṃ na hetukameva, ahetukamevā’’ti vuttattā kiñcāpi sahetukasamuṭṭhānampi rūpaṃ ahetukaṃ, ‘‘abyākato dhammo abyākatassa dhammassa hetupaccayena paccayo, vipākābyākatā kiriyābyākatā hetū sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo’’ti (paṭṭhā. 1.1.403) pana vacanato hetupaccayayogena sahetukasamuṭṭhānassa rūpassa ahetukavohārābhāvo vutto. Keci pana ‘‘abbohārikaṃ katvāti sahetukavohārena abbohārikaṃ katvāti atthaṃ vatvā aññathā ‘ahetukaṃ abyākataṃ abyākatamūlena ekamūla’nti na sakkā vattu’’nti vadanti. Tattha yaṃ vattabbaṃ, taṃ vuttameva ahetukavohārābhāvena sahetukatāpariyāyassa atthasiddhattā. Apica hetupaccayasabbhāvato tassa sahetukatāpariyāyo labbhateva. Tenāha ‘‘na vā sahetukaduke viya…pe… abbohārikaṃ kata’’nti. Ettha etthāti etasmiṃ ekamūlakaduke. Hetupaccayayogāyogavasenāti hetupaccayena yogāyogavasena, hetupaccayassa sabbhāvāsabbhāvavasenāti attho. Sahetukavohārameva labhati paccayabhūtahetusabbhāvato.
абарз бана бхан̣анд̇и ‘‘сахзд̇угажид̇д̇асамудтаанам̣ руубам̣ ахзд̇угам̣ аб̣яаагад̇анд̇и иминаа важанзна сан̇г̇ахам̣ г̇ажчанд̇амби самуулагад̇д̇аа ‘аб̣яаагад̇амуулзна на згамуула’нд̇и на саггаа вад̇д̇ум̣, сад̇иби самуулагад̇д̇з ниббарияааязна сахзд̇угам̣ на ход̇ийд̇и ‘аб̣яаагад̇амуулзна згамуула’нд̇и жа на саггаа вад̇д̇ум̣, д̇асмаа ‘ахзд̇угам̣ аб̣яаагад̇ам̣ аб̣яаагад̇амуулзна на згамуулам̣, сахзд̇угам̣ аб̣яаагад̇ам̣ аб̣яаагад̇амуулзна згамуула’нд̇и д̣̇вийсуби бад̣̇зсу анаварод̇хад̇о аб̣б̣охааригам̣ гад̇ваад̇и вуд̇д̇а’’нд̇и, д̇ам̣ д̇зсам̣ мад̇имад̇д̇ам̣ ‘‘сахзд̇угааб̣яаагад̇асамудтаанам̣ руубам̣ аб̣яаагад̇амуулзна згамуулам̣ ход̇ий’’д̇и адтагат̇ааяам̣ д̇асса згамуулабхаавасса нижчид̇ад̇д̇аа, д̇асмаа вуд̇д̇анаязнзва жзд̇т̇а ад̇т̇о взд̣̇ид̇аб̣б̣о.
Apare pana bhaṇanti ‘‘sahetukacittasamuṭṭhānaṃ rūpaṃ ahetukaṃ abyākatanti iminā vacanena saṅgahaṃ gacchantampi samūlakattā ‘abyākatamūlena na ekamūla’nti na sakkā vattuṃ, satipi samūlakatte nippariyāyena sahetukaṃ na hotīti ‘abyākatamūlena ekamūla’nti ca na sakkā vattuṃ, tasmā ‘ahetukaṃ abyākataṃ abyākatamūlena na ekamūlaṃ, sahetukaṃ abyākataṃ abyākatamūlena ekamūla’nti dvīsupi padesu anavarodhato abbohārikaṃ katvāti vutta’’nti, taṃ tesaṃ matimattaṃ ‘‘sahetukaabyākatasamuṭṭhānaṃ rūpaṃ abyākatamūlena ekamūlaṃ hotī’’ti aṭṭhakathāyaṃ tassa ekamūlabhāvassa nicchitattā, tasmā vuttanayeneva cettha attho veditabbo.
86-97. гусалаагусалааб̣яаагад̇араасид̇о намананааманасан̇каад̇зна висзсзна аруубад̇хаммаанам̣ г̇ахан̣ам̣ нид̣̇д̇хааран̣ам̣ наама ход̇ийд̇и ааха ‘‘наамаанам̣ нид̣̇д̇хаарид̇ад̇д̇аа’’д̇и. д̇зна д̇зсам̣ ад̇хигабхаавамааха вин̃н̃ааяамаанамзва багаран̣зна абарижчиннад̇д̇аа. яад̣̇и звам̣ ‘‘ахзд̇угам̣ наамам̣ сахзд̇угам̣ наама’’нд̇и баатанд̇арз гасмаа наамаг̇г̇ахан̣ам̣ гад̇анд̇и ааха ‘‘субаагадабхаавад̇т̇а’’нд̇и, бариб̣яад̇д̇ам̣ гад̇ваа вуд̇д̇з гим̣ вад̇д̇аб̣б̣анд̇и ад̇хиббааяо.
86-97. Kusalākusalābyākatarāsito namananāmanasaṅkhātena visesena arūpadhammānaṃ gahaṇaṃ niddhāraṇaṃ nāma hotīti āha ‘‘nāmānaṃ niddhāritattā’’ti. Tena tesaṃ adhikabhāvamāha viññāyamānameva pakaraṇena aparicchinnattā. Yadi evaṃ ‘‘ahetukaṃ nāmaṃ sahetukaṃ nāma’’nti pāṭhantare kasmā nāmaggahaṇaṃ katanti āha ‘‘supākaṭabhāvattha’’nti, paribyattaṃ katvā vutte kiṃ vattabbanti adhippāyo.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
муулаяамагаван̣н̣анаа нидтид̇аа.
Mūlayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 1. муулаяамагам̣ • 1. Mūlayamakaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 1. муулаяамагам̣ • 1. Mūlayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 1. муулаяамагам̣ • 1. Mūlayamakaṃ
