| Library / Tipiṭaka / ติปิฎก • Tipiṭaka / เทฺวมาติกาปาฬิ • Dvemātikāpāḷi |
๑๐…เป.…๑๖. มุสาวาทาทิวโคฺค
10…Pe…16. musāvādādivaggo
มุสาวาทาทิสิกฺขาปทวณฺณนา
Musāvādādisikkhāpadavaṇṇanā
อิโต ปเรสุ มุสาวาทวคฺคาทีสุ สตฺตสุ วเคฺคสุ ภิกฺขุปาติโมกฺขวณฺณนายํ วุตฺตนเยเนว วินิจฺฉโย เวทิตโพฺพติฯ
Ito paresu musāvādavaggādīsu sattasu vaggesu bhikkhupātimokkhavaṇṇanāyaṃ vuttanayeneva vinicchayo veditabboti.
โสฬสมวโคฺคฯ
Soḷasamavaggo.
อุทฺทิฎฺฐา โข อยฺยาโย ฉสฎฺฐิสตา ปาจิตฺติยา ธมฺมาติ ภิกฺขู อารพฺภ ปญฺญตฺตา สาธารณา สตฺตติ, อสาธารณา ฉนฺนวุตีติ เอวํ ฉสฎฺฐิสตาฯ เสสํ สพฺพตฺถ อุตฺตานเมวาติฯ
Uddiṭṭhākho ayyāyo chasaṭṭhisatā pācittiyā dhammāti bhikkhū ārabbha paññattā sādhāraṇā sattati, asādhāraṇā channavutīti evaṃ chasaṭṭhisatā. Sesaṃ sabbattha uttānamevāti.
กงฺขาวิตรณิยา ปาติโมกฺขวณฺณนาย
Kaṅkhāvitaraṇiyā pātimokkhavaṇṇanāya
ภิกฺขุนิปาติโมเกฺข
Bhikkhunipātimokkhe
สุทฺธปาจิตฺติยวณฺณนา นิฎฺฐิตาฯ
Suddhapācittiyavaṇṇanā niṭṭhitā.
ตตฺรายํ สเงฺขปโต อสาธารณสิกฺขาปเทสุ สมุฎฺฐานวินิจฺฉโย – คิรคฺคสมชฺชา จิตฺตาคารสิกฺขาปทํ สงฺฆาณี อิตฺถาลงฺกาโร คนฺธวณฺณโก วาสิตกปิญฺญาโก ภิกฺขุนิอาทีหิ อุมฺมทฺทนปริมทฺทนาติ อิมานิ ทส สิกฺขาปทานิ อจิตฺตกานิ โลกวชฺชานิ อกุสลจิตฺตานิฯ อยํ ปเนตฺถ อธิปฺปาโย, วินาปิ จิเตฺตน อาปชฺชิตพฺพตฺตา อจิตฺตกานิ, จิเตฺต ปน สติ อกุสเลเนว อาปชฺชิตพฺพตฺตา โลกวชฺชานิ เจว อกุสลจิตฺตานิ จาติฯ อวเสสานิ สจิตฺตกานิ ปณฺณตฺติวชฺชาเนวฯ โจริวุฎฺฐาปนํ คามนฺตรํ อารามสิกฺขาปทํ คพฺภินิวเคฺค อาทิโต ปฎฺฐาย สตฺต, กุมาริภูตวเคฺค อาทิโต ปฎฺฐาย ปญฺจ ปุริสาทิสํสฎฺฐํ ปาริวาสิกฉนฺททานํ อนุวสฺสวุฎฺฐาปนํ เอกนฺตริกวุฎฺฐาปนนฺติ อิมานิ เอกูนวีสติ สิกฺขาปทานิ สจิตฺตกานิ ปณฺณตฺติวชฺชานิฯ อวเสสานิ สจิตฺตกานิ โลกวชฺชาเนวาติฯ
Tatrāyaṃ saṅkhepato asādhāraṇasikkhāpadesu samuṭṭhānavinicchayo – giraggasamajjā cittāgārasikkhāpadaṃ saṅghāṇī itthālaṅkāro gandhavaṇṇako vāsitakapiññāko bhikkhuniādīhi ummaddanaparimaddanāti imāni dasa sikkhāpadāni acittakāni lokavajjāni akusalacittāni. Ayaṃ panettha adhippāyo, vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cāti. Avasesāni sacittakāni paṇṇattivajjāneva. Corivuṭṭhāpanaṃ gāmantaraṃ ārāmasikkhāpadaṃ gabbhinivagge ādito paṭṭhāya satta, kumāribhūtavagge ādito paṭṭhāya pañca purisādisaṃsaṭṭhaṃ pārivāsikachandadānaṃ anuvassavuṭṭhāpanaṃ ekantarikavuṭṭhāpananti imāni ekūnavīsati sikkhāpadāni sacittakāni paṇṇattivajjāni. Avasesāni sacittakāni lokavajjānevāti.
