| Library / Tipiṭaka / තිපිටක • Tipiṭaka / ද්‌වෙමාතිකාපාළි • Dvemātikāpāḷi |
10…පෙ.…16. මුසාවාදාදිවග්‌ගො
10…Pe…16. musāvādādivaggo
මුසාවාදාදිසික්‌ඛාපදවණ්‌ණනා
Musāvādādisikkhāpadavaṇṇanā
ඉතො පරෙසු මුසාවාදවග්‌ගාදීසු සත්‌තසු වග්‌ගෙසු භික්‌ඛුපාතිමොක්‌ඛවණ්‌ණනායං වුත්‌තනයෙනෙව විනිච්‌ඡයො වෙදිතබ්‌බොති.
Ito paresu musāvādavaggādīsu sattasu vaggesu bhikkhupātimokkhavaṇṇanāyaṃ vuttanayeneva vinicchayo veditabboti.
සොළසමවග්‌ගො.
Soḷasamavaggo.
උද්‌දිට්‌ඨා ඛො අය්‍යායො ඡසට්‌ඨිසතා පාචිත්‌තියා ධම්‌මාති භික්‌ඛූ ආරබ්‌භ පඤ්‌ඤත්‌තා සාධාරණා සත්‌තති, අසාධාරණා ඡන්‌නවුතීති එවං ඡසට්‌ඨිසතා. සෙසං සබ්‌බත්‌ථ උත්‌තානමෙවාති.
Uddiṭṭhākho ayyāyo chasaṭṭhisatā pācittiyā dhammāti bhikkhū ārabbha paññattā sādhāraṇā sattati, asādhāraṇā channavutīti evaṃ chasaṭṭhisatā. Sesaṃ sabbattha uttānamevāti.
කඞ්‌ඛාවිතරණියා පාතිමොක්‌ඛවණ්‌ණනාය
Kaṅkhāvitaraṇiyā pātimokkhavaṇṇanāya
භික්‌ඛුනිපාතිමොක්‌ඛෙ
Bhikkhunipātimokkhe
සුද්‌ධපාචිත්‌තියවණ්‌ණනා නිට්‌ඨිතා.
Suddhapācittiyavaṇṇanā niṭṭhitā.
තත්‍රායං සඞ්‌ඛෙපතො අසාධාරණසික්‌ඛාපදෙසු සමුට්‌ඨානවිනිච්‌ඡයො – ගිරග්‌ගසමජ්‌ජා චිත්‌තාගාරසික්‌ඛාපදං සඞ්‌ඝාණී ඉත්‌ථාලඞ්‌කාරො ගන්‌ධවණ්‌ණකො වාසිතකපිඤ්‌ඤාකො භික්‌ඛුනිආදීහි උම්‌මද්‌දනපරිමද්‌දනාති ඉමානි දස සික්‌ඛාපදානි අචිත්‌තකානි ලොකවජ්‌ජානි අකුසලචිත්‌තානි. අයං පනෙත්‌ථ අධිප්‌පායො, විනාපි චිත්‌තෙන ආපජ්‌ජිතබ්‌බත්‌තා අචිත්‌තකානි, චිත්‌තෙ පන සති අකුසලෙනෙව ආපජ්‌ජිතබ්‌බත්‌තා ලොකවජ්‌ජානි චෙව අකුසලචිත්‌තානි චාති. අවසෙසානි සචිත්‌තකානි පණ්‌ණත්‌තිවජ්‌ජානෙව. චොරිවුට්‌ඨාපනං ගාමන්‌තරං ආරාමසික්‌ඛාපදං ගබ්‌භිනිවග්‌ගෙ ආදිතො පට්‌ඨාය සත්‌ත, කුමාරිභූතවග්‌ගෙ ආදිතො පට්‌ඨාය පඤ්‌ච පුරිසාදිසංසට්‌ඨං පාරිවාසිකඡන්‌දදානං අනුවස්‌සවුට්‌ඨාපනං එකන්‌තරිකවුට්‌ඨාපනන්‌ති ඉමානි එකූනවීසති සික්‌ඛාපදානි සචිත්‌තකානි පණ්‌ණත්‌තිවජ්‌ජානි. අවසෙසානි සචිත්‌තකානි ලොකවජ්‌ජානෙවාති.
Tatrāyaṃ saṅkhepato asādhāraṇasikkhāpadesu samuṭṭhānavinicchayo – giraggasamajjā cittāgārasikkhāpadaṃ saṅghāṇī itthālaṅkāro gandhavaṇṇako vāsitakapiññāko bhikkhuniādīhi ummaddanaparimaddanāti imāni dasa sikkhāpadāni acittakāni lokavajjāni akusalacittāni. Ayaṃ panettha adhippāyo, vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cāti. Avasesāni sacittakāni paṇṇattivajjāneva. Corivuṭṭhāpanaṃ gāmantaraṃ ārāmasikkhāpadaṃ gabbhinivagge ādito paṭṭhāya satta, kumāribhūtavagge ādito paṭṭhāya pañca purisādisaṃsaṭṭhaṃ pārivāsikachandadānaṃ anuvassavuṭṭhāpanaṃ ekantarikavuṭṭhāpananti imāni ekūnavīsati sikkhāpadāni sacittakāni paṇṇattivajjāni. Avasesāni sacittakāni lokavajjānevāti.
