| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
வினயபிடகே
Vinayapiṭake
பாசித்யாதி³யோஜனா
Pācityādiyojanā
பாசித்தியயோஜனா
Pācittiyayojanā
மஹாகாருணிகங் நாத²ங், அபி⁴னத்வா ஸமாஸதோ;
Mahākāruṇikaṃ nāthaṃ, abhinatvā samāsato;
பாசித்யாதி³வண்ணனாய, கரிஸ்ஸாமத்த²யோஜனங்.
Pācityādivaṇṇanāya, karissāmatthayojanaṃ.
5. பாசித்தியகண்ட³ங்
5. Pācittiyakaṇḍaṃ
1. முஸாவாத³ஸிக்கா²பத³-அத்த²யோஜனா
1. Musāvādasikkhāpada-atthayojanā
கு²த்³த³கானந்தி ஸுகு²மாபத்திபகாஸகத்தா அப்பகானங், க³ணனதோ வா பசுரத்தா ப³ஹுகானங். யேஸங் ஸிக்கா²பதா³னந்தி ஸம்ப³ந்தோ⁴. ‘‘யேஸ’’ந்தி பத³ங் ‘‘ஸங்க³ஹோ’’தி பதே³ ஸாம்யத்த²ச²ட்டீ². ஸங்க³ஹீயதே ஸங்க³ஹோ . ‘‘நவஹி வக்³கே³ஹீ’’திபத³ங் ‘‘ஸங்க³ஹோ, ஸுப்பதிட்டி²தோ’’தி பத³த்³வயே கரணங். தா³னீதி காலவாசகோ ஸத்தம்யந்தனிபாதோ இதா³னி-பரியாயோ, இமஸ்மிங் காலேதி அத்தோ². தேஸந்தி கு²த்³த³கானங், அயங் வண்ணனாதி ஸம்ப³ந்தோ⁴. ப⁴வதீதி எத்த² தி-ஸத்³தோ³ ஏகங்ஸத்தே² அனாக³தகாலிகோ ஹோதி ‘‘நிரயங் நூன க³ச்சா²மி, எத்த² மே நத்தி² ஸங்ஸயோ’’திஆதீ³ஸு (ஜா॰ 2.22.331) விய. கிஞ்சாபெத்த² ஹி யதா² ஏகங்ஸவாசகோ நூனஸத்³தோ³ அத்தி², ந ஏவங் ‘‘ப⁴வதீ’’தி பதே³, அத்த²தோ பன அயங் வண்ணனா நூன ப⁴விஸ்ஸதீதி அத்தோ² க³ஹேதப்³போ³. அத² வா அவஸ்ஸம்பா⁴வியத்தே² அனாக³தகாலவாசகோ ஹோதி ‘‘து⁴வங் பு³த்³தோ⁴ ப⁴வாமஹ’’ந்திஆதீ³ஸு (பு³॰ வங்॰ 2.109-114) விய. காமஞ்ஹெத்த² யதா² அவஸ்ஸம்பா⁴வியத்த²வாசகோ து⁴வஸத்³தோ³ அத்தி², ந ஏவங் ‘‘ப⁴வதீ’’தி பதே³, அத்த²தோ பன து⁴வங் ப⁴விஸ்ஸதி அயங் வண்ணனாதி அத்தோ² க³ஹேதப்³போ³தி த³ட்ட²ப்³ப³ங்.
Khuddakānanti sukhumāpattipakāsakattā appakānaṃ, gaṇanato vā pacurattā bahukānaṃ. Yesaṃ sikkhāpadānanti sambandho. ‘‘Yesa’’nti padaṃ ‘‘saṅgaho’’ti pade sāmyatthachaṭṭhī. Saṅgahīyate saṅgaho. ‘‘Navahi vaggehī’’tipadaṃ ‘‘saṅgaho, suppatiṭṭhito’’ti padadvaye karaṇaṃ. Dānīti kālavācako sattamyantanipāto idāni-pariyāyo, imasmiṃ kāleti attho. Tesanti khuddakānaṃ, ayaṃ vaṇṇanāti sambandho. Bhavatīti ettha ti-saddo ekaṃsatthe anāgatakāliko hoti ‘‘nirayaṃ nūna gacchāmi, ettha me natthi saṃsayo’’tiādīsu (jā. 2.22.331) viya. Kiñcāpettha hi yathā ekaṃsavācako nūnasaddo atthi, na evaṃ ‘‘bhavatī’’ti pade, atthato pana ayaṃ vaṇṇanā nūna bhavissatīti attho gahetabbo. Atha vā avassambhāviyatthe anāgatakālavācako hoti ‘‘dhuvaṃ buddho bhavāmaha’’ntiādīsu (bu. vaṃ. 2.109-114) viya. Kāmañhettha yathā avassambhāviyatthavācako dhuvasaddo atthi, na evaṃ ‘‘bhavatī’’ti pade, atthato pana dhuvaṃ bhavissati ayaṃ vaṇṇanāti attho gahetabboti daṭṭhabbaṃ.
1. ‘‘தத்தா²’’தி பத³ங் ‘‘முஸாவாத³வக்³க³ஸ்ஸா’’தி பதே³ நித்³தா⁴ரணஸமுதா³யோ, தேஸு நவஸு வக்³கே³ஸூதி அத்தோ². பட²மஸிக்கா²பதே³தி வா, தேஸு கு²த்³த³கேஸு ஸிக்கா²பதே³ஸூதி அத்தோ². ஸக்யானங் புத்தோதி ப⁴கி³னீஹி ஸங்வாஸகரணதோ லோகமரியாத³ங் சி²ந்தி³துங், ஜாதிஸம்பே⁴த³தோ வா ரக்கி²துங் ஸக்குணந்தீதி ஸக்யா. ஸாகவனஸண்டே³ நக³ரங் மாபெந்தீதி வா ஸக்யா, புப்³ப³ராஜானோ. தேஸங் வங்ஸே பூ⁴தத்தா ஏதரஹிபி ராஜானோ ஸக்யா நாம, தேஸங் புத்தோதி அத்தோ². ‘‘பு³த்³த⁴காலே’’தி பத³ங் ‘‘பப்³ப³ஜிங்ஸூ’’தி பதே³ ஆதா⁴ரோ. ஸக்யகுலதோ நிக்க²மித்வாதி ஸம்ப³ந்தோ⁴. ‘‘வாத³க்கி²த்தோ’’த்யாதி³னா வாதே³ன கி²த்தோ, வாத³ம்ஹி வாதி அத்த²ங் த³ஸ்ஸேதி. யத்ர யத்ராதி யஸ்ஸங் யஸ்ஸங் தி³ட்டி²யங் பவத்ததீதி ஸம்ப³ந்தோ⁴. அவஜானித்வாதி படிஸ்ஸவேன வியோக³ங் கத்வா. அவஸத்³தோ³ ஹி வியோக³த்த²வாசகோ. ‘‘அபஜானித்வா’’திபி பாடோ², படிஞ்ஞாதங் அபனீதங் கத்வாதி அத்தோ². தோ³ஸந்தி அயுத்திதோ³ஸங், ஸல்லக்கெ²ந்தோ ஹுத்வாதி ஸம்ப³ந்தோ⁴. கதெ²ந்தோ கதெ²ந்தோதி அந்தஸத்³தோ³ மானஸத்³த³காரியோ. கதி²யமானோ கதி²யமானோதி ஹி அத்தோ². படிஜானித்வாதி படிஞ்ஞாதங் கத்வா. ஆனிஸங்ஸந்தி நித்³தோ³ஸங் கு³ணங். படிபுப்³போ³ சரஸத்³தோ³ படிச்சா²த³னத்தோ²தி ஆஹ ‘‘படிசரதி படிச்சா²தே³தீ’’தி. ‘‘கிங் பன ரூபங் நிச்சங் வா அனிச்சங் வா’’தி வுத்தே ‘‘அனிச்ச’’ந்தி வத³தி. கஸ்மாதி வுத்தே ‘‘ஜானிதப்³ப³தோ’’தி வத³தி. யதி³ ஏவங் நிப்³பா³னம்பி ஜானிதப்³ப³த்தா அனிச்சங் நாம ஸியாதி வுத்தே அத்தனோ ஹேதும்ஹி தோ³ஸங் தி³ஸ்வா அஹங் ‘‘ஜானிதப்³ப³தோ’’தி ஹேதுங் ந வதா³மி, ‘‘ஜாதித⁴ம்மதோ’’தி பன வதா³மி. தயா பன து³ஸ்ஸுதத்தா ஏவங் வுத்தந்தி வத்வா அஞ்ஞேனஞ்ஞங் படிசரதி. ‘‘குருந்தி³ய’’ந்தி பத³ங் ‘‘வுத்த’’ந்தி பதே³ ஆதா⁴ரோ. ஏதஸ்ஸாதி ‘‘ரூபங் அனிச்சங் ஜானிதப்³ப³தோ’’தி வசனஸ்ஸ. தத்ராதி குருந்தி³யங். தஸ்ஸாதி படிஜானநாவஜானநஸ்ஸ. ‘‘படிச்சா²த³னத்த²’’ந்தி பத³ங் ‘‘பா⁴ஸதீ’’திபதே³ ஸம்பதா³னங். ‘‘மஹாஅட்ட²கதா²ய’’ந்திபத³ங் ‘‘வுத்த’’ந்தி பதே³ ஆதா⁴ரோ. ‘‘தி³வாட்டா²னாதீ³ஸூ’’தி பத³ங் உபனேதப்³ப³ங். இத³ங் ‘‘அஸுகஸ்மிங் நாமபதே³ஸே’’தி பதே³ நித்³தா⁴ரணஸமுதா³யோ.
1.‘‘Tatthā’’ti padaṃ ‘‘musāvādavaggassā’’ti pade niddhāraṇasamudāyo, tesu navasu vaggesūti attho. Paṭhamasikkhāpadeti vā, tesu khuddakesu sikkhāpadesūti attho. Sakyānaṃ puttoti bhaginīhi saṃvāsakaraṇato lokamariyādaṃ chindituṃ, jātisambhedato vā rakkhituṃ sakkuṇantīti sakyā. Sākavanasaṇḍe nagaraṃ māpentīti vā sakyā, pubbarājāno. Tesaṃ vaṃse bhūtattā etarahipi rājāno sakyā nāma, tesaṃ puttoti attho. ‘‘Buddhakāle’’ti padaṃ ‘‘pabbajiṃsū’’ti pade ādhāro. Sakyakulato nikkhamitvāti sambandho. ‘‘Vādakkhitto’’tyādinā vādena khitto, vādamhi vāti atthaṃ dasseti. Yatra yatrāti yassaṃ yassaṃ diṭṭhiyaṃ pavattatīti sambandho. Avajānitvāti paṭissavena viyogaṃ katvā. Avasaddo hi viyogatthavācako. ‘‘Apajānitvā’’tipi pāṭho, paṭiññātaṃ apanītaṃ katvāti attho. Dosanti ayuttidosaṃ, sallakkhento hutvāti sambandho. Kathento kathentoti antasaddo mānasaddakāriyo. Kathiyamāno kathiyamānoti hi attho. Paṭijānitvāti paṭiññātaṃ katvā. Ānisaṃsanti niddosaṃ guṇaṃ. Paṭipubbo carasaddo paṭicchādanatthoti āha ‘‘paṭicarati paṭicchādetī’’ti. ‘‘Kiṃ pana rūpaṃ niccaṃ vā aniccaṃ vā’’ti vutte ‘‘anicca’’nti vadati. Kasmāti vutte ‘‘jānitabbato’’ti vadati. Yadi evaṃ nibbānampi jānitabbattā aniccaṃ nāma siyāti vutte attano hetumhi dosaṃ disvā ahaṃ ‘‘jānitabbato’’ti hetuṃ na vadāmi, ‘‘jātidhammato’’ti pana vadāmi. Tayā pana dussutattā evaṃ vuttanti vatvā aññenaññaṃ paṭicarati. ‘‘Kurundiya’’nti padaṃ ‘‘vutta’’nti pade ādhāro. Etassāti ‘‘rūpaṃ aniccaṃ jānitabbato’’ti vacanassa. Tatrāti kurundiyaṃ. Tassāti paṭijānanāvajānanassa. ‘‘Paṭicchādanattha’’nti padaṃ ‘‘bhāsatī’’tipade sampadānaṃ. ‘‘Mahāaṭṭhakathāya’’ntipadaṃ ‘‘vutta’’nti pade ādhāro. ‘‘Divāṭṭhānādīsū’’ti padaṃ upanetabbaṃ. Idaṃ ‘‘asukasmiṃ nāmapadese’’ti pade niddhāraṇasamudāyo.
3. ஸம்மா வத³தி அனேனாதி ஸங்வாத³னங், உஜுஜாதிகசித்தங், ந ஸங்வாத³னங் விஸங்வாத³னங், வஞ்சனாதி⁴ப்பாயவஸப்பவத்தங் சித்தந்தி த³ஸ்ஸெந்தோ ஆஹ ‘‘விஸங்வாத³னசித்த’’ந்தி. ‘‘வாசா’’த்யாதி³னா வசதி ஏதாயாதி வாசாதி அத்த²ங் த³ஸ்ஸேதி . ஹீதி த³ள்ஹீகரணஜோதகங், தத³மினா ஸச்சந்தி அத்தோ². ‘‘வாசாயேவா’’தி பத³ங் ‘‘ப்³யப்பதோ²’’தி பதே³ துல்யத்த²ங், ‘‘வுச்சதீ’’தி பதே³ கம்மங். பத²ஸத்³த³பரத்தா வாசாஸத்³த³ஸ்ஸ ப்³யாதே³ஸோ கதோ. ஸுத்³த⁴சேதனா கதி²தாதி ஸம்ப³ந்தோ⁴. தங்ஸமுட்டி²தஸத்³த³ஸஹிதாதி தாய சேதனாய ஸமுட்டி²தேன ஸத்³தே³ன ஸஹ பவத்தா சேதனா கதி²தாதி யோஜனா.
3. Sammā vadati anenāti saṃvādanaṃ, ujujātikacittaṃ, na saṃvādanaṃ visaṃvādanaṃ, vañcanādhippāyavasappavattaṃ cittanti dassento āha ‘‘visaṃvādanacitta’’nti. ‘‘Vācā’’tyādinā vacati etāyāti vācāti atthaṃ dasseti . Hīti daḷhīkaraṇajotakaṃ, tadaminā saccanti attho. ‘‘Vācāyevā’’ti padaṃ ‘‘byappatho’’ti pade tulyatthaṃ, ‘‘vuccatī’’ti pade kammaṃ. Pathasaddaparattā vācāsaddassa byādeso kato. Suddhacetanā kathitāti sambandho. Taṃsamuṭṭhitasaddasahitāti tāya cetanāya samuṭṭhitena saddena saha pavattā cetanā kathitāti yojanā.
‘‘ஏவ’’ந்தி பத³ங் ‘‘த³ஸ்ஸெத்வா’’தி பதே³ நித³ஸ்ஸனங், கரணங் வா. ‘‘த³ஸ்ஸெத்வா’’தி பத³ங் ‘‘த³ஸ்ஸெந்தோ ஆஹா’’தி பத³த்³வயே புப்³ப³காலகிரியா. அந்தேதி ‘‘வாசா’’திஆதீ³னங் பஞ்சன்னங் பதா³னங் அவஸானே. ‘‘ஆஹா’’தி எத்த² வத்தமான-திவசனஸ்ஸ அகாரோ பச்சுப்பன்னகாலவாசகேன ‘‘இதா³னீ’’தி பதே³ன யோஜிதத்தா. ‘‘தத்தா²’’தி பத³ங் ‘‘அத்தோ² வேதி³தப்³போ³’’தி பதே³ ஆதா⁴ரோ. எத்தா²தி ‘‘அதி³ட்ட²ங் தி³ட்ட²ங் மே’’திஆதீ³ஸு. ‘‘பாளிய’’ந்தி பத³ங் ‘‘தே³ஸனா கதா’’தி பதே³ ஆதா⁴ரோ. நிஸ்ஸிதவிஞ்ஞாணவஸேன அவத்வா நிஸ்ஸயபஸாத³வஸேன ‘‘சக்கு²னா தி³ட்ட²’’ந்தி வுத்தந்தி ஆஹ ‘‘ஓளாரிகேனேவா’’தி.
‘‘Eva’’nti padaṃ ‘‘dassetvā’’ti pade nidassanaṃ, karaṇaṃ vā. ‘‘Dassetvā’’ti padaṃ ‘‘dassento āhā’’ti padadvaye pubbakālakiriyā. Anteti ‘‘vācā’’tiādīnaṃ pañcannaṃ padānaṃ avasāne. ‘‘Āhā’’ti ettha vattamāna-tivacanassa akāro paccuppannakālavācakena ‘‘idānī’’ti padena yojitattā. ‘‘Tatthā’’ti padaṃ ‘‘attho veditabbo’’ti pade ādhāro. Etthāti ‘‘adiṭṭhaṃ diṭṭhaṃ me’’tiādīsu. ‘‘Pāḷiya’’nti padaṃ ‘‘desanā katā’’ti pade ādhāro. Nissitaviññāṇavasena avatvā nissayapasādavasena ‘‘cakkhunā diṭṭha’’nti vuttanti āha ‘‘oḷārikenevā’’ti.
4. தஸ்ஸாதி ‘‘தீஹாகாரேஹீ’’திஆதி³வசனஸ்ஸ. ‘‘அத்தோ²’’தி பத³ங் ‘‘வேதி³தப்³போ³’’தி பதே³ கம்மங். ஹீதி விஸேஸஜோதகங், விஸேஸங் கத²யிஸ்ஸாமீதி அத்தோ². தத்தா²தி சதுத்த²பாராஜிகே. இதா⁴தி இமஸ்மிங் ஸிக்கா²பதே³.
4.Tassāti ‘‘tīhākārehī’’tiādivacanassa. ‘‘Attho’’ti padaṃ ‘‘veditabbo’’ti pade kammaṃ. Hīti visesajotakaṃ, visesaṃ kathayissāmīti attho. Tatthāti catutthapārājike. Idhāti imasmiṃ sikkhāpade.
9. ஆதீ³னம்பீதி பிஸத்³தோ³ ஸம்பிண்ட³னத்தோ².
9.Ādīnampīti pisaddo sampiṇḍanattho.
11. மந்த³ஸத்³தோ³ ஜளத்த²வாசகோதி ஆஹ ‘‘மந்த³த்தா ஜளத்தா’’தி. யோ பன அஞ்ஞங் ப⁴ணதீதி ஸம்ப³ந்தோ⁴. ‘‘ஸாமணேரேனா’’தி பத³ங் ‘‘வுத்தோ’’தி பதே³ கத்தா. அபிஸத்³தோ³ புச்சா²வாசகோ, ‘‘பஸ்ஸித்தா²’’தி பதே³ன யோஜேதப்³போ³, அபி பஸ்ஸித்தா²தி அத்தோ². ‘‘அதி³ட்ட²ங் தி³ட்ட²ங் மே’’திஆதி³வசனதோ அஞ்ஞா பூரணகதா²பி தாவ அத்தீ²தி த³ஸ்ஸெந்தோ ஆஹ ‘‘அஞ்ஞா பூரணகதா² நாம ஹோதீ’’தி. அப்பதாய ஊனஸ்ஸ அத்த²ஸ்ஸ பூரணவஸேன பவத்தா கதா² பூரணகதா². ஏஸா பூரணகதா² நாம காதி ஆஹ ‘‘ஏகோ’’திஆதி³. ஏஸா ஹி கா³மே அப்பகம்பி தேலங் வா பூவக²ண்ட³ங் வா பஸ்ஸித்வா வா லபி⁴த்வா வா ப³ஹுகங் கத்வா பூரணவஸேன கதி²தத்தா பூரணகதா² நாம. ப³ஹுகானி தேலானி வா பூவே வா பஸ்ஸந்தோபி லப⁴ந்தோபி அப்பகங் கத்வா ஊனவஸேன கதி²தத்தா ஊனகதா²பி அத்தீ²தி ஸக்கா வத்துங். அட்ட²கதா²ஸு பன அவுத்தத்தா வீமங்ஸித்வா க³ஹேதப்³ப³ங். ப³ஹுகாய பூரணஸ்ஸ அத்த²ஸ்ஸ ஊனவஸேன பவத்தா கதா² ஊனகதா²தி விக்³க³ஹோ காதப்³போ³தி. பட²மங்.
11. Mandasaddo jaḷatthavācakoti āha ‘‘mandattā jaḷattā’’ti. Yo pana aññaṃ bhaṇatīti sambandho. ‘‘Sāmaṇerenā’’ti padaṃ ‘‘vutto’’ti pade kattā. Apisaddo pucchāvācako, ‘‘passitthā’’ti padena yojetabbo, api passitthāti attho. ‘‘Adiṭṭhaṃ diṭṭhaṃ me’’tiādivacanato aññā pūraṇakathāpi tāva atthīti dassento āha ‘‘aññā pūraṇakathā nāma hotī’’ti. Appatāya ūnassa atthassa pūraṇavasena pavattā kathā pūraṇakathā. Esā pūraṇakathā nāma kāti āha ‘‘eko’’tiādi. Esā hi gāme appakampi telaṃ vā pūvakhaṇḍaṃ vā passitvā vā labhitvā vā bahukaṃ katvā pūraṇavasena kathitattā pūraṇakathā nāma. Bahukāni telāni vā pūve vā passantopi labhantopi appakaṃ katvā ūnavasena kathitattā ūnakathāpi atthīti sakkā vattuṃ. Aṭṭhakathāsu pana avuttattā vīmaṃsitvā gahetabbaṃ. Bahukāya pūraṇassa atthassa ūnavasena pavattā kathā ūnakathāti viggaho kātabboti. Paṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. முஸாவாத³ஸிக்கா²பத³வண்ணனா • 1. Musāvādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. முஸாவாத³ஸிக்கா²பத³வண்ணனா • 1. Musāvādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. முஸாவாத³ஸிக்கா²பத³வண்ணனா • 1. Musāvādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. முஸாவாத³ஸிக்கா²பத³வண்ணனா • 1. Musāvādasikkhāpadavaṇṇanā
