| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
முஸாவாத³வக்³க³வண்ணனா
Musāvādavaggavaṇṇanā
444. முஸாவாத³வக்³கே³ – பாராஜிகங் க³ச்ச²தீதி பாராஜிககா³மீ; பாராஜிகாபத்திபா⁴வங் பாபுணாதீதி அத்தோ². இதரேஸுபி ஏஸேவ நயோ. தத்த² அஸந்தஉத்தரிமனுஸ்ஸத⁴ம்மாரோசனமுஸாவாதோ³ பாராஜிககா³மீ, அமூலகேன பாராஜிகேன அனுத்³த⁴ங்ஸனமுஸாவாதோ³ ஸங்கா⁴தி³ஸேஸகா³மீ, ‘‘யோ தே விஹாரே வஸதீ’’திஆதி³னா பரியாயேன ஜானந்தஸ்ஸ வுத்தமுஸாவாதோ³ து²ல்லச்சயகா³மீ, அஜானந்தஸ்ஸ து³க்கடகா³மீ, ‘‘ஸம்பஜானமுஸாவாதே³ பாசித்திய’’ந்தி ஆக³தோ பாசித்தியகா³மீதி வேதி³தப்³போ³.
444. Musāvādavagge – pārājikaṃ gacchatīti pārājikagāmī; pārājikāpattibhāvaṃ pāpuṇātīti attho. Itaresupi eseva nayo. Tattha asantauttarimanussadhammārocanamusāvādo pārājikagāmī, amūlakena pārājikena anuddhaṃsanamusāvādo saṅghādisesagāmī, ‘‘yo te vihāre vasatī’’tiādinā pariyāyena jānantassa vuttamusāvādo thullaccayagāmī, ajānantassa dukkaṭagāmī, ‘‘sampajānamusāvāde pācittiya’’nti āgato pācittiyagāmīti veditabbo.
அத³ஸ்ஸனேனாதி வினயத⁴ரஸ்ஸ அத³ஸ்ஸனேன. கப்பியாகப்பியேஸு ஹி குக்குச்சே உப்பன்னே வினயத⁴ரங் தி³ஸ்வா கப்பியாகப்பியபா⁴வங் படிபுச்சி²த்வா அகப்பியங் பஹாய கப்பியங் கரெய்ய, தங் அபஸ்ஸந்தோ பன அகப்பியம்பி கப்பியந்தி கரொந்தோ ஆபஜ்ஜதி. ஏவங் ஆபஜ்ஜிதப்³ப³ங் ஆபத்திங் வினயத⁴ரஸ்ஸ த³ஸ்ஸனேன நாபஜ்ஜதி, அத³ஸ்ஸனேனேவ ஆபஜ்ஜதி, தேன வுத்தங் ‘‘அத³ஸ்ஸனேனா’’தி. அஸ்ஸவனேனாதி ஏகவிஹாரேபி வஸந்தோ பன வினயத⁴ரஸ்ஸ உபட்டா²னங் க³ந்த்வா கப்பியாகப்பியங் அபுச்சி²த்வா வா அஞ்ஞேஸஞ்ச வுச்சமானங் அஸுணந்தோ ஆபஜ்ஜதியேவ, தேன வுத்தங் ‘‘அஸ்ஸவனேனா’’தி. பஸுத்தகதாதி பஸுத்தகதாய. ஸஹகா³ரஸெய்யஞ்ஹி பஸுத்தகபா⁴வேனபி ஆபஜ்ஜதி. அகப்பியே கப்பியஸஞ்ஞிதாய ஆபஜ்ஜந்தோ பன ததா²ஸஞ்ஞீ ஆபஜ்ஜதி. ஸதிஸம்மோஸா ஏகரத்தாதிக்கமாதி³வஸேன ஆபஜ்ஜிதப்³ப³ங் ஆபஜ்ஜதி. ஸேஸங் ஸப்³ப³த்த² உத்தானமேவாதி.
Adassanenāti vinayadharassa adassanena. Kappiyākappiyesu hi kukkucce uppanne vinayadharaṃ disvā kappiyākappiyabhāvaṃ paṭipucchitvā akappiyaṃ pahāya kappiyaṃ kareyya, taṃ apassanto pana akappiyampi kappiyanti karonto āpajjati. Evaṃ āpajjitabbaṃ āpattiṃ vinayadharassa dassanena nāpajjati, adassaneneva āpajjati, tena vuttaṃ ‘‘adassanenā’’ti. Assavanenāti ekavihārepi vasanto pana vinayadharassa upaṭṭhānaṃ gantvā kappiyākappiyaṃ apucchitvā vā aññesañca vuccamānaṃ asuṇanto āpajjatiyeva, tena vuttaṃ ‘‘assavanenā’’ti. Pasuttakatāti pasuttakatāya. Sahagāraseyyañhi pasuttakabhāvenapi āpajjati. Akappiye kappiyasaññitāya āpajjanto pana tathāsaññī āpajjati. Satisammosā ekarattātikkamādivasena āpajjitabbaṃ āpajjati. Sesaṃ sabbattha uttānamevāti.
முஸாவாத³வக்³க³வண்ணனா நிட்டி²தா.
Musāvādavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 7. முஸாவாத³வக்³கோ³ • 7. Musāvādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / முஸாவாத³வக்³க³வண்ணனா • Musāvādavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / முஸாவாத³வக்³க³வண்ணனா • Musāvādavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹாரவக்³கா³தி³வண்ணனா • Vohāravaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / முஸாவாத³வக்³க³வண்ணனா • Musāvādavaggavaṇṇanā
