| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
মুসাৰাদৰগ্গৰণ্ণনা
Musāvādavaggavaṇṇanā
৪৪৪. মুসাৰাদৰগ্গে – পারাজিকং গচ্ছতীতি পারাজিকগামী; পারাজিকাপত্তিভাৰং পাপুণাতীতি অত্থো। ইতরেসুপি এসেৰ নযো। তত্থ অসন্তউত্তরিমনুস্সধম্মারোচনমুসাৰাদো পারাজিকগামী, অমূলকেন পারাজিকেন অনুদ্ধংসনমুসাৰাদো সঙ্ঘাদিসেসগামী, ‘‘যো তে ৰিহারে ৰসতী’’তিআদিনা পরিযাযেন জানন্তস্স ৰুত্তমুসাৰাদো থুল্লচ্চযগামী, অজানন্তস্স দুক্কটগামী, ‘‘সম্পজানমুসাৰাদে পাচিত্তিয’’ন্তি আগতো পাচিত্তিযগামীতি ৰেদিতব্বো।
444. Musāvādavagge – pārājikaṃ gacchatīti pārājikagāmī; pārājikāpattibhāvaṃ pāpuṇātīti attho. Itaresupi eseva nayo. Tattha asantauttarimanussadhammārocanamusāvādo pārājikagāmī, amūlakena pārājikena anuddhaṃsanamusāvādo saṅghādisesagāmī, ‘‘yo te vihāre vasatī’’tiādinā pariyāyena jānantassa vuttamusāvādo thullaccayagāmī, ajānantassa dukkaṭagāmī, ‘‘sampajānamusāvāde pācittiya’’nti āgato pācittiyagāmīti veditabbo.
অদস্সনেনাতি ৰিনযধরস্স অদস্সনেন। কপ্পিযাকপ্পিযেসু হি কুক্কুচ্চে উপ্পন্নে ৰিনযধরং দিস্ৰা কপ্পিযাকপ্পিযভাৰং পটিপুচ্ছিত্ৰা অকপ্পিযং পহায কপ্পিযং করেয্য, তং অপস্সন্তো পন অকপ্পিযম্পি কপ্পিযন্তি করোন্তো আপজ্জতি। এৰং আপজ্জিতব্বং আপত্তিং ৰিনযধরস্স দস্সনেন নাপজ্জতি, অদস্সনেনেৰ আপজ্জতি, তেন ৰুত্তং ‘‘অদস্সনেনা’’তি। অস্সৰনেনাতি একৰিহারেপি ৰসন্তো পন ৰিনযধরস্স উপট্ঠানং গন্ত্ৰা কপ্পিযাকপ্পিযং অপুচ্ছিত্ৰা ৰা অঞ্ঞেসঞ্চ ৰুচ্চমানং অসুণন্তো আপজ্জতিযেৰ, তেন ৰুত্তং ‘‘অস্সৰনেনা’’তি। পসুত্তকতাতি পসুত্তকতায। সহগারসেয্যঞ্হি পসুত্তকভাৰেনপি আপজ্জতি। অকপ্পিযে কপ্পিযসঞ্ঞিতায আপজ্জন্তো পন তথাসঞ্ঞী আপজ্জতি। সতিসম্মোসা একরত্তাতিক্কমাদিৰসেন আপজ্জিতব্বং আপজ্জতি। সেসং সব্বত্থ উত্তানমেৰাতি।
Adassanenāti vinayadharassa adassanena. Kappiyākappiyesu hi kukkucce uppanne vinayadharaṃ disvā kappiyākappiyabhāvaṃ paṭipucchitvā akappiyaṃ pahāya kappiyaṃ kareyya, taṃ apassanto pana akappiyampi kappiyanti karonto āpajjati. Evaṃ āpajjitabbaṃ āpattiṃ vinayadharassa dassanena nāpajjati, adassaneneva āpajjati, tena vuttaṃ ‘‘adassanenā’’ti. Assavanenāti ekavihārepi vasanto pana vinayadharassa upaṭṭhānaṃ gantvā kappiyākappiyaṃ apucchitvā vā aññesañca vuccamānaṃ asuṇanto āpajjatiyeva, tena vuttaṃ ‘‘assavanenā’’ti. Pasuttakatāti pasuttakatāya. Sahagāraseyyañhi pasuttakabhāvenapi āpajjati. Akappiye kappiyasaññitāya āpajjanto pana tathāsaññī āpajjati. Satisammosā ekarattātikkamādivasena āpajjitabbaṃ āpajjati. Sesaṃ sabbattha uttānamevāti.
মুসাৰাদৰগ্গৰণ্ণনা নিট্ঠিতা।
Musāvādavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৭. মুসাৰাদৰগ্গো • 7. Musāvādavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / মুসাৰাদৰগ্গৰণ্ণনা • Musāvādavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / মুসাৰাদৰগ্গৰণ্ণনা • Musāvādavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / মুসাৰাদৰগ্গৰণ্ণনা • Musāvādavaggavaṇṇanā
