| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
មុសាវាទវគ្គវណ្ណនា
Musāvādavaggavaṇṇanā
៤៤៤. ធម្មបធានំ ធម្មាធិដ្ឋានំ សន្ធាយ ‘‘បារាជិកំ គច្ឆតីតិ បារាជិកគាមី’’តិ សុទ្ធកត្តុវសេន វុត្តំ, បុគ្គលបធានំ បុគ្គលាធិដ្ឋានំ សន្ធាយ ‘‘បារាជិកំ គច្ឆតិ អនេន, គមាបេតីតិ វា បារាជិកគាមី’’តិ ករណហេតុកត្តុវសេនបិ វត្តព្ពំ។ វិត្ថារំ ទស្សន្តោ អាហ ‘‘តត្ថា’’តិអាទិ ។ តត្ថ តត្ថាតិ ‘‘មុសាវាទោ បារាជិកគាមី’’តិអាទិបាឋេ, ឯវំ វិត្ថារោ វេទិតព្ពោតិ សម្ពន្ធោ។ តេសុ ‘‘មុសាវាទោ បារាជិកគាមី’’តិអាទីសុ វា, និទ្ធារណេ ភុម្មំ។
444. Dhammapadhānaṃ dhammādhiṭṭhānaṃ sandhāya ‘‘pārājikaṃ gacchatīti pārājikagāmī’’ti suddhakattuvasena vuttaṃ, puggalapadhānaṃ puggalādhiṭṭhānaṃ sandhāya ‘‘pārājikaṃ gacchati anena, gamāpetīti vā pārājikagāmī’’ti karaṇahetukattuvasenapi vattabbaṃ. Vitthāraṃ dassanto āha ‘‘tatthā’’tiādi . Tattha tatthāti ‘‘musāvādo pārājikagāmī’’tiādipāṭhe, evaṃ vitthāro veditabboti sambandho. Tesu ‘‘musāvādo pārājikagāmī’’tiādīsu vā, niddhāraṇe bhummaṃ.
អទស្សនេនាតិ ឯត្ថ កស្ស អទស្សនេនាតិ អាហ ‘‘វិនយធរស្សា’’តិ។ វិត្ថារំ ទស្សេន្តោ អាហ ‘‘កប្បិយាកប្បិយេសុ ហី’’តិអាទិ។ តន្តិ វិនយធរំ។ អស្សវនេនាតិ ឯត្ថ កេសំ វចនំ អស្សវនេនាតិ អាហ ‘‘ឯកវិហារេបី’’តិអាទិ។ ឯកវិហារេបីតិ វិនយធរេន ឯកវិហារេបិ។ បិសទ្ទេន នានាវិហារេ បន បគេវាតិ ទស្សេតិ។ ឧបដ្ឋានន្តិ ឧបដ្ឋានត្ថំ, ឧបដ្ឋានដ្ឋានំ វា។ វុច្ចមានំ អញ្ញេសំ វចនំ អសុណន្តោ ហុត្វា វាតិ យោជនា។ បសុត្តកតាតិ ឯត្ថ យការលោបោតិ អាហ ‘‘បសុត្តកតាយា’’តិ។ បសុត្តកភាវេនបីតិ បិសទ្ទោ អញ្ញម្បិ អទស្សនាទិការណំ សម្បិណ្ឌេតិ។ តថាសញ្ញីតិ ឯត្ថ តថាសទ្ទោ កោវិសយោតិ អាហ ‘‘អកប្បិយេ…បេ.… អាបជ្ជន្តោ’’តិ។ ឯករត្តាតិក្កមាទិវសេនាតិ អាទិសទ្ទេន ឆារត្តាតិក្កមាទិំ សង្គណ្ហាតិ។ សព្ពត្ថាតិ មុសាវាទវគ្គេ។
Adassanenāti ettha kassa adassanenāti āha ‘‘vinayadharassā’’ti. Vitthāraṃ dassento āha ‘‘kappiyākappiyesu hī’’tiādi. Tanti vinayadharaṃ. Assavanenāti ettha kesaṃ vacanaṃ assavanenāti āha ‘‘ekavihārepī’’tiādi. Ekavihārepīti vinayadharena ekavihārepi. Pisaddena nānāvihāre pana pagevāti dasseti. Upaṭṭhānanti upaṭṭhānatthaṃ, upaṭṭhānaṭṭhānaṃ vā. Vuccamānaṃ aññesaṃ vacanaṃ asuṇanto hutvā vāti yojanā. Pasuttakatāti ettha yakāralopoti āha ‘‘pasuttakatāyā’’ti. Pasuttakabhāvenapīti pisaddo aññampi adassanādikāraṇaṃ sampiṇḍeti. Tathāsaññīti ettha tathāsaddo kovisayoti āha ‘‘akappiye…pe… āpajjanto’’ti. Ekarattātikkamādivasenāti ādisaddena chārattātikkamādiṃ saṅgaṇhāti. Sabbatthāti musāvādavagge.
ឥតិ មុសាវាទវគ្គវណ្ណនាយ យោជនា សមត្តា។
Iti musāvādavaggavaṇṇanāya yojanā samattā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ៧. មុសាវាទវគ្គោ • 7. Musāvādavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / មុសាវាទវគ្គវណ្ណនា • Musāvādavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / មុសាវាទវគ្គវណ្ណនា • Musāvādavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / មុសាវាទវគ្គវណ្ណនា • Musāvādavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / វោហារវគ្គាទិវណ្ណនា • Vohāravaggādivaṇṇanā
