| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
මුසාවාදවග්‌ගවණ්‌ණනා
Musāvādavaggavaṇṇanā
444. මුසාවාදවග්‌ගෙ – පාරාජිකං ගච්‌ඡතීති පාරාජිකගාමී; පාරාජිකාපත්‌තිභාවං පාපුණාතීති අත්‌ථො. ඉතරෙසුපි එසෙව නයො. තත්‌ථ අසන්‌තඋත්‌තරිමනුස්‌සධම්‌මාරොචනමුසාවාදො පාරාජිකගාමී, අමූලකෙන පාරාජිකෙන අනුද්‌ධංසනමුසාවාදො සඞ්‌ඝාදිසෙසගාමී, ‘‘යො තෙ විහාරෙ වසතී’’තිආදිනා පරියායෙන ජානන්‌තස්‌ස වුත්‌තමුසාවාදො ථුල්‌ලච්‌චයගාමී, අජානන්‌තස්‌ස දුක්‌කටගාමී, ‘‘සම්‌පජානමුසාවාදෙ පාචිත්‌තිය’’න්‌ති ආගතො පාචිත්‌තියගාමීති වෙදිතබ්‌බො.
444. Musāvādavagge – pārājikaṃ gacchatīti pārājikagāmī; pārājikāpattibhāvaṃ pāpuṇātīti attho. Itaresupi eseva nayo. Tattha asantauttarimanussadhammārocanamusāvādo pārājikagāmī, amūlakena pārājikena anuddhaṃsanamusāvādo saṅghādisesagāmī, ‘‘yo te vihāre vasatī’’tiādinā pariyāyena jānantassa vuttamusāvādo thullaccayagāmī, ajānantassa dukkaṭagāmī, ‘‘sampajānamusāvāde pācittiya’’nti āgato pācittiyagāmīti veditabbo.
අදස්‌සනෙනාති විනයධරස්‌ස අදස්‌සනෙන. කප්‌පියාකප්‌පියෙසු හි කුක්‌කුච්‌චෙ උප්‌පන්‌නෙ විනයධරං දිස්‌වා කප්‌පියාකප්‌පියභාවං පටිපුච්‌ඡිත්‌වා අකප්‌පියං පහාය කප්‌පියං කරෙය්‍ය, තං අපස්‌සන්‌තො පන අකප්‌පියම්‌පි කප්‌පියන්‌ති කරොන්‌තො ආපජ්‌ජති. එවං ආපජ්‌ජිතබ්‌බං ආපත්‌තිං විනයධරස්‌ස දස්‌සනෙන නාපජ්‌ජති, අදස්‌සනෙනෙව ආපජ්‌ජති, තෙන වුත්‌තං ‘‘අදස්‌සනෙනා’’ති. අස්‌සවනෙනාති එකවිහාරෙපි වසන්‌තො පන විනයධරස්‌ස උපට්‌ඨානං ගන්‌ත්‌වා කප්‌පියාකප්‌පියං අපුච්‌ඡිත්‌වා වා අඤ්‌ඤෙසඤ්‌ච වුච්‌චමානං අසුණන්‌තො ආපජ්‌ජතියෙව, තෙන වුත්‌තං ‘‘අස්‌සවනෙනා’’ති. පසුත්‌තකතාති පසුත්‌තකතාය. සහගාරසෙය්‍යඤ්‌හි පසුත්‌තකභාවෙනපි ආපජ්‌ජති. අකප්‌පියෙ කප්‌පියසඤ්‌ඤිතාය ආපජ්‌ජන්‌තො පන තථාසඤ්‌ඤී ආපජ්‌ජති. සතිසම්‌මොසා එකරත්‌තාතික්‌කමාදිවසෙන ආපජ්‌ජිතබ්‌බං ආපජ්‌ජති. සෙසං සබ්‌බත්‌ථ උත්‌තානමෙවාති.
Adassanenāti vinayadharassa adassanena. Kappiyākappiyesu hi kukkucce uppanne vinayadharaṃ disvā kappiyākappiyabhāvaṃ paṭipucchitvā akappiyaṃ pahāya kappiyaṃ kareyya, taṃ apassanto pana akappiyampi kappiyanti karonto āpajjati. Evaṃ āpajjitabbaṃ āpattiṃ vinayadharassa dassanena nāpajjati, adassaneneva āpajjati, tena vuttaṃ ‘‘adassanenā’’ti. Assavanenāti ekavihārepi vasanto pana vinayadharassa upaṭṭhānaṃ gantvā kappiyākappiyaṃ apucchitvā vā aññesañca vuccamānaṃ asuṇanto āpajjatiyeva, tena vuttaṃ ‘‘assavanenā’’ti. Pasuttakatāti pasuttakatāya. Sahagāraseyyañhi pasuttakabhāvenapi āpajjati. Akappiye kappiyasaññitāya āpajjanto pana tathāsaññī āpajjati. Satisammosā ekarattātikkamādivasena āpajjitabbaṃ āpajjati. Sesaṃ sabbattha uttānamevāti.
මුසාවාදවග්‌ගවණ්‌ණනා නිට්‌ඨිතා.
Musāvādavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 7. මුසාවාදවග්‌ගො • 7. Musāvādavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / මුසාවාදවග්‌ගවණ්‌ණනා • Musāvādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / මුසාවාදවග්‌ගවණ්‌ණනා • Musāvādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / මුසාවාදවග්‌ගවණ්‌ණනා • Musāvādavaggavaṇṇanā
