| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
பாசித்தியகண்டோ³
Pācittiyakaṇḍo
1. முஸாவாத³வக்³கோ³
1. Musāvādavaggo
1. முஸாவாத³ஸிக்கா²பத³வண்ணனா
1. Musāvādasikkhāpadavaṇṇanā
பாசித்தியேஸு முஸாவாத³வக்³க³ஸ்ஸ பட²மே ஸம்பஜானமுஸாவாதே³தி புப்³பே³பி ஜானித்வா வசனக்க²ணேபி ஜானந்தஸ்ஸேவ முஸாவாத³ப⁴ணனே. ப⁴ணனஞ்ச நாம இத⁴ அபூ⁴தஸ்ஸ வா பூ⁴ததங், பூ⁴தஸ்ஸ வா அபூ⁴ததங் கத்வா காயேன வா வாசாய வா விஞ்ஞாபனப்பயோகோ³, நிமித்தத்தே² சேதங் பு⁴ம்மவசனங். தஸ்மா யோ ஸம்பஜானமுஸாவாத³ங் வத³தி, தஸ்ஸ தங்னிமித்தங் தங்ஹேது தப்பச்சயா பாசித்தியங் ஹோதீதி ஏவமெத்த² அஞ்ஞேஸு ச ஈதி³ஸேஸு அத்தோ² வேதி³தப்³போ³.
Pācittiyesu musāvādavaggassa paṭhame sampajānamusāvādeti pubbepi jānitvā vacanakkhaṇepi jānantasseva musāvādabhaṇane. Bhaṇanañca nāma idha abhūtassa vā bhūtataṃ, bhūtassa vā abhūtataṃ katvā kāyena vā vācāya vā viññāpanappayogo, nimittatthe cetaṃ bhummavacanaṃ. Tasmā yo sampajānamusāvādaṃ vadati, tassa taṃnimittaṃ taṃhetu tappaccayā pācittiyaṃ hotīti evamettha aññesu ca īdisesu attho veditabbo.
ஸாவத்தி²யங் ஹத்த²கங் ஸக்யபுத்தங் ஆரப்³ப⁴ அவஜானித்வா படிஜானநாதி³வத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், உத்தரிமனுஸ்ஸத⁴ம்மாரோசனத்த²ங் முஸா ப⁴ணந்தஸ்ஸ பாராஜிகங், அமூலகேன பாராஜிகேன அனுத்³த⁴ங்ஸனத்த²ங் ஸங்கா⁴தி³ஸேஸோ, ஸங்கா⁴தி³ஸேஸேன அனுத்³த⁴ங்ஸனத்த²ங் பாசித்தியங், ஆசாரவிபத்தியா அனுத்³த⁴ங்ஸனத்த²ங் து³க்கடங், ‘‘யோ தே விஹாரே வஸீ’’திஆதி³னா (பாரா॰ 220) பரியாயேன உத்தரிமனுஸ்ஸத⁴ம்மாரோசனத்த²ங் படிவிஜானந்தஸ்ஸ முஸா ப⁴ணிதே து²ல்லச்சயங், அப்படிவிஜானந்தஸ்ஸ து³க்கடங், கேவலங் முஸா ப⁴ணந்தஸ்ஸ இத⁴ பாசித்தியங். அனுபதா⁴ரெத்வா ஸஹஸா ப⁴ணந்தஸ்ஸ, ‘‘அஞ்ஞங் ப⁴ணிஸ்ஸாமீ’’தி அஞ்ஞங் ப⁴ணந்தஸ்ஸ, உம்மத்தகாதீ³னஞ்ச அனாபத்தி. விஸங்வாத³னபுரெக்கா²ரதா, விஸங்வாத³னசித்தேன யமத்த²ங் வத்துகாமோ, தஸ்ஸ புக்³க³லஸ்ஸ விஞ்ஞாபனபயோகோ³ சாதி இமானெத்த² த்³வே அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.
Sāvatthiyaṃ hatthakaṃ sakyaputtaṃ ārabbha avajānitvā paṭijānanādivatthusmiṃ paññattaṃ, sādhāraṇapaññatti, anāṇattikaṃ, uttarimanussadhammārocanatthaṃ musā bhaṇantassa pārājikaṃ, amūlakena pārājikena anuddhaṃsanatthaṃ saṅghādiseso, saṅghādisesena anuddhaṃsanatthaṃ pācittiyaṃ, ācāravipattiyā anuddhaṃsanatthaṃ dukkaṭaṃ, ‘‘yo te vihāre vasī’’tiādinā (pārā. 220) pariyāyena uttarimanussadhammārocanatthaṃ paṭivijānantassa musā bhaṇite thullaccayaṃ, appaṭivijānantassa dukkaṭaṃ, kevalaṃ musā bhaṇantassa idha pācittiyaṃ. Anupadhāretvā sahasā bhaṇantassa, ‘‘aññaṃ bhaṇissāmī’’ti aññaṃ bhaṇantassa, ummattakādīnañca anāpatti. Visaṃvādanapurekkhāratā, visaṃvādanacittena yamatthaṃ vattukāmo, tassa puggalassa viññāpanapayogo cāti imānettha dve aṅgāni. Samuṭṭhānādīni adinnādānasadisānīti.
முஸாவாத³ஸிக்கா²பத³வண்ணனா நிட்டி²தா.
Musāvādasikkhāpadavaṇṇanā niṭṭhitā.
2. ஓமஸவாத³ஸிக்கா²பத³வண்ணனா
2. Omasavādasikkhāpadavaṇṇanā
து³தியே ஓமஸவாதே³தி ஓவிஜ்ஜ²னவசனே, ஜாதினாமகொ³த்தகம்மஸிப்பஆபா³த⁴லிங்க³கிலேஸஆபத்திஅக்கோஸேஸு பூ⁴தேன வா அபூ⁴தேன வா யேன கேனசி பாராஜிகங் ஆபன்னங் வா அனாபன்னங் வா யங்கிஞ்சி பி⁴க்கு²ங் யாய காயசி வாசாய வா ஹத்த²முத்³தா³ய வா அனஞ்ஞாபதே³ஸேன அக்கோஸனவசனே பாசித்தியந்தி அத்தோ².
Dutiye omasavādeti ovijjhanavacane, jātināmagottakammasippaābādhaliṅgakilesaāpattiakkosesu bhūtena vā abhūtena vā yena kenaci pārājikaṃ āpannaṃ vā anāpannaṃ vā yaṃkiñci bhikkhuṃ yāya kāyaci vācāya vā hatthamuddāya vā anaññāpadesena akkosanavacane pācittiyanti attho.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ ஓமஸனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், தேஹியேவ த³ஸஹி அக்கோஸவத்தூ²ஹி ‘‘ஸந்தி இதே⁴கச்சே சண்டா³லா’’திஆதி³னா (பாசி॰ 26) நயேன அஞ்ஞாபதே³ஸங் கத்வா அக்கோஸந்தஸ்ஸ, ‘‘சோரோஸி க³ண்டி²பே⁴த³கோஸீ’’திஆதீ³ஹி பாளிமுத்தகபதே³ஹி அக்கோஸந்தஸ்ஸ, யதா² ததா² வா அனுபஸம்பன்னங் அக்கோஸந்தஸ்ஸ ச து³க்கடங். இத⁴ பி⁴க்கு²னீபி அனுபஸம்பன்னஸங்க்²யங் க³ச்ச²தி. அனக்கோஸிதுகாமஸ்ஸ கேவலங் த³வகம்யதாய வத³தோ ஸப்³ப³த்த² து³ப்³பா⁴ஸிதங். அத்த²த⁴ம்மஅனுஸாஸனிபுரெக்கா²ரானங், உம்மத்தகாதீ³னஞ்ச அனாபத்தி. யங் அக்கோஸதி, தஸ்ஸ உபஸம்பன்னதா, அனஞ்ஞாபதே³ஸேன ஜாதிஆதீ³ஹி அக்கோஸனங், ‘‘மங் அக்கோஸதீ’’தி ஜானநா, அத்த²புரெக்கா²ரதாதீ³னங் அபா⁴வோதி இமானெத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, வேத³னா பன இத⁴ து³க்கா²தி.
Sāvatthiyaṃ chabbaggiye bhikkhū ārabbha omasanavatthusmiṃ paññattaṃ, sādhāraṇapaññatti, anāṇattikaṃ, tehiyeva dasahi akkosavatthūhi ‘‘santi idhekacce caṇḍālā’’tiādinā (pāci. 26) nayena aññāpadesaṃ katvā akkosantassa, ‘‘corosi gaṇṭhibhedakosī’’tiādīhi pāḷimuttakapadehi akkosantassa, yathā tathā vā anupasampannaṃ akkosantassa ca dukkaṭaṃ. Idha bhikkhunīpi anupasampannasaṅkhyaṃ gacchati. Anakkositukāmassa kevalaṃ davakamyatāya vadato sabbattha dubbhāsitaṃ. Atthadhammaanusāsanipurekkhārānaṃ, ummattakādīnañca anāpatti. Yaṃ akkosati, tassa upasampannatā, anaññāpadesena jātiādīhi akkosanaṃ, ‘‘maṃ akkosatī’’ti jānanā, atthapurekkhāratādīnaṃ abhāvoti imānettha cattāri aṅgāni. Samuṭṭhānādīni adinnādānasadisāni, vedanā pana idha dukkhāti.
ஓமஸவாத³ஸிக்கா²பத³வண்ணனா நிட்டி²தா.
Omasavādasikkhāpadavaṇṇanā niṭṭhitā.
3. பேஸுஞ்ஞஸிக்கா²பத³வண்ணனா
3. Pesuññasikkhāpadavaṇṇanā
ததியே பி⁴க்கு²பேஸுஞ்ஞேதி பி⁴க்கு²ஸ்ஸ பேஸுஞ்ஞே, ஜாதிஆதீ³ஹி அக்கோஸவத்தூ²ஹி பி⁴க்கூ² அக்கோஸந்தஸ்ஸ பி⁴க்கு²னோ ஸுத்வா வசனங் பி⁴க்கு²னோ பியகம்யதாய வா பே⁴தா³தி⁴ப்பாயேன வா யோ அக்குத்³தோ⁴, தஸ்ஸ பி⁴க்கு²ஸ்ஸ காயேன வா வாசாய வா உபஸங்ஹடே தஸ்மிங் பேஸுஞ்ஞகரணவசனே பாசித்தியந்தி அத்தோ².
Tatiye bhikkhupesuññeti bhikkhussa pesuññe, jātiādīhi akkosavatthūhi bhikkhū akkosantassa bhikkhuno sutvā vacanaṃ bhikkhuno piyakamyatāya vā bhedādhippāyena vā yo akkuddho, tassa bhikkhussa kāyena vā vācāya vā upasaṃhaṭe tasmiṃ pesuññakaraṇavacane pācittiyanti attho.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ பேஸுஞ்ஞஉபஸங்ஹரணவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், வுத்தனயேனேவ அஞ்ஞாபதே³ஸேன அக்கோஸந்தஸ்ஸ வசனூபஸங்ஹாரே வா பாளிமுத்தகஅக்கோஸூபஸங்ஹாரே வா அனுபஸம்பன்னஸ்ஸ ச உபஸங்ஹாரே து³க்கடங். இதா⁴பி பி⁴க்கு²னீ அனுபஸம்பன்னட்டா²னே டி²தா. ந பியகம்யதாய, ந பே⁴தா³தி⁴ப்பாயேன கேவலங் பாபக³ரஹிதாய வத³ந்தஸ்ஸ, உம்மத்தகாதீ³னஞ்ச அனாபத்தி. ஜாதிஆதீ³ஹி அனஞ்ஞாபதே³ஸேன அக்கோஸந்தஸ்ஸ பி⁴க்கு²னோ ஸுத்வா வசனங் பி⁴க்கு²ஸ்ஸ உபஸங்ஹரணங், பியகம்யதாபே⁴தா³தி⁴ப்பாயேஸு அஞ்ஞதரதா , தஸ்ஸ விஜானநாதி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானேவாதி.
Sāvatthiyaṃ chabbaggiye bhikkhū ārabbha pesuññaupasaṃharaṇavatthusmiṃ paññattaṃ, sādhāraṇapaññatti, anāṇattikaṃ, vuttanayeneva aññāpadesena akkosantassa vacanūpasaṃhāre vā pāḷimuttakaakkosūpasaṃhāre vā anupasampannassa ca upasaṃhāre dukkaṭaṃ. Idhāpi bhikkhunī anupasampannaṭṭhāne ṭhitā. Na piyakamyatāya, na bhedādhippāyena kevalaṃ pāpagarahitāya vadantassa, ummattakādīnañca anāpatti. Jātiādīhi anaññāpadesena akkosantassa bhikkhuno sutvā vacanaṃ bhikkhussa upasaṃharaṇaṃ, piyakamyatābhedādhippāyesu aññataratā , tassa vijānanāti imānettha tīṇi aṅgāni. Samuṭṭhānādīni adinnādānasadisānevāti.
பேஸுஞ்ஞஸிக்கா²பத³வண்ணனா நிட்டி²தா.
Pesuññasikkhāpadavaṇṇanā niṭṭhitā.
4. பத³ஸோத⁴ம்மஸிக்கா²பத³வண்ணனா
4. Padasodhammasikkhāpadavaṇṇanā
சதுத்தே² பத³ஸோ த⁴ம்மங் வாசெய்யாதி ஸங்கீ³தித்தயங் அனாருள்ஹம்பி ராஜோவாத³திக்கி²ந்த்³ரியசதுபரிவத்தனநந்தோ³பனந்த³குலும்பஸுத்தமக்³க³கதா²தி³த⁴ம்மஞ்ச ஸங்கீ³தித்தயமாருள்ஹங் திபிடகத⁴ம்மஞ்ச பத³ங் பத³ங் வாசெய்ய, பதா³னுபத³அன்வக்க²ரஅனுப்³யஞ்ஜனேஸு ஏகேகங் கொட்டா²ஸந்தி அத்தோ². பாசித்தியந்தி ஏதேஸு பதா³தீ³ஸு பி⁴க்கு²ஞ்ச பி⁴க்கு²னிஞ்ச ட²பெத்வா யங்கஞ்சி கொட்டா²ஸங் அவஸேஸபுக்³க³லேஹி ஸத்³தி⁴ங் ஏகதோ ப⁴ணந்தஸ்ஸ பதா³தி³க³ணனாய பாசித்தியங்.
Catutthe padaso dhammaṃ vāceyyāti saṅgītittayaṃ anāruḷhampi rājovādatikkhindriyacatuparivattananandopanandakulumpasuttamaggakathādidhammañca saṅgītittayamāruḷhaṃ tipiṭakadhammañca padaṃ padaṃ vāceyya, padānupadaanvakkharaanubyañjanesu ekekaṃ koṭṭhāsanti attho. Pācittiyanti etesu padādīsu bhikkhuñca bhikkhuniñca ṭhapetvā yaṃkañci koṭṭhāsaṃ avasesapuggalehi saddhiṃ ekato bhaṇantassa padādigaṇanāya pācittiyaṃ.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ பத³ஸோ த⁴ம்மவாசனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங். உபஸம்பன்னே அனுபஸம்பன்னஸஞ்ஞினோ வேமதிகஸ்ஸ வா து³க்கடங். அனுபஸம்பன்னேன ஸத்³தி⁴ங் ஏகதோ உத்³தே³ஸக்³க³ஹணே, ஸஜ்ஜா²யகரணே, தஸ்ஸ ஸந்திகே உத்³தே³ஸக்³க³ஹணே, யேபு⁴ய்யேன பகு³ணக³ந்த²ங் ப⁴ணந்தஸ்ஸ, ஓஸாரெந்தஸ்ஸ ச க²லிதட்டா²னே ‘‘ஏவங் ப⁴ணாஹீ’’தி வசனே ச ஏகதோ ப⁴ணந்தஸ்ஸாபி, உம்மத்தகாதீ³னஞ்ச அனாபத்தி. அனுபஸம்பன்னதா, வுத்தலக்க²ணங் த⁴ம்மங் பத³ஸோ வாசனதா, ஏகதோ ஓஸாபனஞ்சாதி இமானெத்த² தீணி அங்கா³னி. பத³ஸோத⁴ம்மஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், வசீகம்மங், திசித்தங், திவேத³னந்தி.
Sāvatthiyaṃ chabbaggiye bhikkhū ārabbha padaso dhammavācanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ. Upasampanne anupasampannasaññino vematikassa vā dukkaṭaṃ. Anupasampannena saddhiṃ ekato uddesaggahaṇe, sajjhāyakaraṇe, tassa santike uddesaggahaṇe, yebhuyyena paguṇaganthaṃ bhaṇantassa, osārentassa ca khalitaṭṭhāne ‘‘evaṃ bhaṇāhī’’ti vacane ca ekato bhaṇantassāpi, ummattakādīnañca anāpatti. Anupasampannatā, vuttalakkhaṇaṃ dhammaṃ padaso vācanatā, ekato osāpanañcāti imānettha tīṇi aṅgāni. Padasodhammasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, vacīkammaṃ, ticittaṃ, tivedananti.
பத³ஸோத⁴ம்மஸிக்கா²பத³வண்ணனா நிட்டி²தா.
Padasodhammasikkhāpadavaṇṇanā niṭṭhitā.
5. பட²மஸஹஸெய்யஸிக்கா²பத³வண்ணனா
5. Paṭhamasahaseyyasikkhāpadavaṇṇanā
பஞ்சமே அனுபஸம்பன்னேனாதி பி⁴க்கு²ங் ட²பெத்வா அந்தமஸோ பாராஜிகவத்து²பூ⁴தேன திரச்சா²னக³தேனாபி. உத்தரிதி³ரத்ததிரத்தந்தி த்³வின்னங் வா திண்ணங் வா ரத்தீனங் உபரி. ஸஹஸெய்யந்தி ஸப்³ப³ச்ச²ன்னபரிச்ச²ன்னே யேபு⁴ய்யேன ச²ன்னபரிச்ச²ன்னே வா ஸேனாஸனே புப்³பா³பரியேன வா ஏகக்க²ணேன வா ஏகதோ நிபஜ்ஜனங். கப்பெய்யாதி வித³ஹெய்ய ஸம்பாதெ³ய்ய. தத்த² ச²த³னங் அனாஹச்ச தி³யட்³ட⁴ஹத்து²ப்³பே³தே⁴ன பாகாராதி³னா பரிச்சி²ன்னம்பி ஸப்³ப³பரிச்ச²ன்னமிச்சேவ வேதி³தப்³ப³ங், தஸ்மா இமினா லக்க²ணேன ஸமன்னாக³தோ ஸசேபி ஸத்தபூ⁴மிகோ பாஸாதோ³ ஏகூபசாரோ ஹோதி, ஸதக³ப்³ப⁴ங் வா சதுஸாலங், யோ தத்த² வா அஞ்ஞத்த² வா தாதி³ஸே தேன வா அஞ்ஞேன வா அனுபஸம்பன்னேன ஸஹ திஸ்ஸோ ரத்தியோ ஸயித்வா சதுத்த²தி³வஸே அத்த²ங்க³தே ஸூரியே அனுபஸம்பன்னே நிபன்னே க³ப்³ப⁴த்³வாரங் பிதா⁴ய வா அபிதா⁴ய வா நிபஜ்ஜதி, பட²மனிபன்னோ வா தஸ்மிங் நிபஜ்ஜந்தே ந வுட்டா²தி, தஸ்ஸ உபி⁴ன்னங் உட்ட²ஹித்வா நிபஜ்ஜனப்பயோக³க³ணனாய அனுபஸம்பன்னக³ணனாய ச பாசித்தியங். அயமெத்த² ஸங்கே²போ, வித்தா²ரோ பன ஸமந்தபாஸாதி³காயங் (பாசி॰ அட்ட²॰ 51) ஸப்³ப³ப்பகாரதோ வுத்தோ.
Pañcame anupasampannenāti bhikkhuṃ ṭhapetvā antamaso pārājikavatthubhūtena tiracchānagatenāpi. Uttaridirattatirattanti dvinnaṃ vā tiṇṇaṃ vā rattīnaṃ upari. Sahaseyyanti sabbacchannaparicchanne yebhuyyena channaparicchanne vā senāsane pubbāpariyena vā ekakkhaṇena vā ekato nipajjanaṃ. Kappeyyāti vidaheyya sampādeyya. Tattha chadanaṃ anāhacca diyaḍḍhahatthubbedhena pākārādinā paricchinnampi sabbaparicchannamicceva veditabbaṃ, tasmā iminā lakkhaṇena samannāgato sacepi sattabhūmiko pāsādo ekūpacāro hoti, satagabbhaṃ vā catusālaṃ, yo tattha vā aññattha vā tādise tena vā aññena vā anupasampannena saha tisso rattiyo sayitvā catutthadivase atthaṅgate sūriye anupasampanne nipanne gabbhadvāraṃ pidhāya vā apidhāya vā nipajjati, paṭhamanipanno vā tasmiṃ nipajjante na vuṭṭhāti, tassa ubhinnaṃ uṭṭhahitvā nipajjanappayogagaṇanāya anupasampannagaṇanāya ca pācittiyaṃ. Ayamettha saṅkhepo, vitthāro pana samantapāsādikāyaṃ (pāci. aṭṭha. 51) sabbappakārato vutto.
ஆளவியங் ஸம்ப³ஹுலே பி⁴க்கூ² ஆரப்³ப⁴ அனுபஸம்பன்னேன ஸஹஸெய்யவத்து²ஸ்மிங் பஞ்ஞத்தங், ‘‘உத்தரிதி³ரத்ததிரத்த’’ந்தி அயமெத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகங், திகபாசித்தியங், உபஸம்பன்னே அனுபஸம்பன்னஸஞ்ஞினோ வேமதிகஸ்ஸ வா உபத்³த⁴ச்ச²ன்னபரிச்ச²ன்னாதீ³ஸு ச து³க்கடங். ஊனகதி³ரத்ததிரத்தங் வஸந்தஸ்ஸ, ததியாய ரத்தியா புராருணா நிக்க²மித்வா புன வஸந்தஸ்ஸ, ஸப்³ப³ச்ச²ன்னஸப்³பா³பரிச்ச²ன்னாதீ³ஸு வஸந்தஸ்ஸ, இதரஸ்மிங் நிஸின்னே நிபஜ்ஜந்தஸ்ஸ, நிபன்னே வா நிஸீத³ந்தஸ்ஸ, உம்மத்தகாதீ³னஞ்ச அனாபத்தி. பாசித்தியவத்து²கஸேனாஸனங், தத்த² அனுபஸம்பன்னேன ஸஹ நிபஜ்ஜனங், சதுத்த²தி³வஸே ஸூரியத்த²ங்க³மனந்தி இமானெத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.
Āḷaviyaṃ sambahule bhikkhū ārabbha anupasampannena sahaseyyavatthusmiṃ paññattaṃ, ‘‘uttaridirattatiratta’’nti ayamettha anupaññatti, sādhāraṇapaññatti, anāṇattikaṃ, tikapācittiyaṃ, upasampanne anupasampannasaññino vematikassa vā upaddhacchannaparicchannādīsu ca dukkaṭaṃ. Ūnakadirattatirattaṃ vasantassa, tatiyāya rattiyā purāruṇā nikkhamitvā puna vasantassa, sabbacchannasabbāparicchannādīsu vasantassa, itarasmiṃ nisinne nipajjantassa, nipanne vā nisīdantassa, ummattakādīnañca anāpatti. Pācittiyavatthukasenāsanaṃ, tattha anupasampannena saha nipajjanaṃ, catutthadivase sūriyatthaṅgamananti imānettha tīṇi aṅgāni. Samuṭṭhānādīni eḷakalomasadisānevāti.
பட²மஸஹஸெய்யஸிக்கா²பத³வண்ணனா நிட்டி²தா.
Paṭhamasahaseyyasikkhāpadavaṇṇanā niṭṭhitā.
6. து³தியஸஹஸெய்யஸிக்கா²பத³வண்ணனா
6. Dutiyasahaseyyasikkhāpadavaṇṇanā
ச²ட்டே² மாதுகா³மேனாதி அந்தமஸோ தத³ஹுஜாதாயபி மனுஸ்ஸித்தி²யா. தி³ஸ்ஸமானரூபா பன யக்கி²பேதியோ பண்ட³கோ மேது²னவத்து²பூ⁴தா ச திரச்சா²னித்தி²யோ இத⁴ து³க்கடவத்து²கா ஹொந்தி.
Chaṭṭhe mātugāmenāti antamaso tadahujātāyapi manussitthiyā. Dissamānarūpā pana yakkhipetiyo paṇḍako methunavatthubhūtā ca tiracchānitthiyo idha dukkaṭavatthukā honti.
ஸாவத்தி²யங் ஆயஸ்மந்தங் அனுருத்³த⁴த்தே²ரங் ஆரப்³ப⁴ மாதுகா³மேன ஸஹஸெய்யவத்து²ஸ்மிங் பஞ்ஞத்தங், ஸேஸங் அனந்தரஸிக்கா²பதே³ வுத்தனயேனேவ வேதி³தப்³ப³ங் அஞ்ஞத்ர ரத்திபரிச்சே²தா³, தத்ர ஹி சதுத்த²தி³வஸே ஆபத்தி, இத⁴ பன பட²மதி³வஸேபீதி.
Sāvatthiyaṃ āyasmantaṃ anuruddhattheraṃ ārabbha mātugāmena sahaseyyavatthusmiṃ paññattaṃ, sesaṃ anantarasikkhāpade vuttanayeneva veditabbaṃ aññatra rattiparicchedā, tatra hi catutthadivase āpatti, idha pana paṭhamadivasepīti.
து³தியஸஹஸெய்யஸிக்கா²பத³வண்ணனா நிட்டி²தா.
Dutiyasahaseyyasikkhāpadavaṇṇanā niṭṭhitā.
7. த⁴ம்மதே³ஸனாஸிக்கா²பத³வண்ணனா
7. Dhammadesanāsikkhāpadavaṇṇanā
ஸத்தமே உத்தரிச²ப்பஞ்சவாசாஹீதிஎத்த² ஏகோ கா³தா²பாதோ³ ஏகா வாசாதி ஏவங் ஸப்³ப³த்த² வாசாபமாணங் வேதி³தப்³ப³ங். த⁴ம்மங் தே³ஸெய்யாதி பத³ஸோத⁴ம்மஸிக்கா²பதே³ வுத்தலக்க²ணங் த⁴ம்மங் வா அட்ட²கதா²த⁴ம்மங் வா பா⁴ஸெய்ய. அஞ்ஞத்ர விஞ்ஞுனா புரிஸவிக்³க³ஹேனாதி வினா விஞ்ஞுனா புரிஸேன. மனுஸ்ஸவிக்³க³ஹங் க³ஹெத்வா டி²தேன பன யக்கே²ன வா பேதேன வா திரச்சா²னேன வா ஸத்³தி⁴ங் டி²தாயபி த⁴ம்மங் தே³ஸேதுங் ந வட்டதி. பாசித்தியந்தி து³தியானியதே வுத்தலக்க²ணேன மனுஸ்ஸேன வினா விஞ்ஞுமனுஸ்ஸித்தி²யா ச²ன்னங் வாசானங் உபரி பதா³தி³வஸேன த⁴ம்மங் தே³ஸெந்தஸ்ஸ பதா³தி³க³ணனாய, ப³ஹூனங் தே³ஸயதோ மாதுகா³மக³ணனாய ச பாசித்தியங்.
Sattame uttarichappañcavācāhītiettha eko gāthāpādo ekā vācāti evaṃ sabbattha vācāpamāṇaṃ veditabbaṃ. Dhammaṃ deseyyāti padasodhammasikkhāpade vuttalakkhaṇaṃ dhammaṃ vā aṭṭhakathādhammaṃ vā bhāseyya. Aññatra viññunā purisaviggahenāti vinā viññunā purisena. Manussaviggahaṃ gahetvā ṭhitena pana yakkhena vā petena vā tiracchānena vā saddhiṃ ṭhitāyapi dhammaṃ desetuṃ na vaṭṭati. Pācittiyanti dutiyāniyate vuttalakkhaṇena manussena vinā viññumanussitthiyā channaṃ vācānaṃ upari padādivasena dhammaṃ desentassa padādigaṇanāya, bahūnaṃ desayato mātugāmagaṇanāya ca pācittiyaṃ.
ஸாவத்தி²யங் உதா³யித்தே²ரங் ஆரப்³ப⁴ மாதுகா³மஸ்ஸ த⁴ம்மதே³ஸனாவத்து²ஸ்மிங் பஞ்ஞத்தங், ‘‘அஞ்ஞத்ர விஞ்ஞுனா’’தி அயமெத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகங், திகபாசித்தியங், அமாதுகா³மே மாதுகா³மஸஞ்ஞினோ வேமதிகஸ்ஸ வா யக்கி²பேதிபண்ட³கமனுஸ்ஸவிக்³க³ஹதிரச்சா²னித்தீ²னங் தே³ஸெந்தஸ்ஸ ச து³க்கடங். ச²ஹி வாசாஹி, ததோ வா ஓரங் தே³ஸெந்தஸ்ஸ, வுத்தலக்க²ணே வா புரிஸே ஸதி, ஸயங் வா உட்டா²ய, புன நிஸீதி³த்வா மாதுகா³மஸ்ஸ வா உட்ட²ஹித்வா புன நிஸின்னஸ்ஸ, அஞ்ஞஸ்ஸ வா மாதுகா³மஸ்ஸ தே³ஸயதோ, ‘‘தீ³க⁴னிகாயோ நாம ப⁴ந்தே கிமத்தி²யோ’’தி ஏவங் பன புட்டே² ஸப்³ப³ம்பி தீ³க⁴னிகாயங் தே³ஸெந்தஸ்ஸ, அஞ்ஞஸ்ஸத்தா²ய வுச்சமானங் மாதுகா³மே ஸுணந்தே, உம்மத்தகாதீ³னஞ்ச அனாபத்தி. வுத்தலக்க²ணஸ்ஸ த⁴ம்மஸ்ஸ ச²ன்னங் வாசானங் உபரி தே³ஸனா, வுத்தலக்க²ணோ மாதுகா³மோ, இரியாபத²பரிவத்தாபா⁴வோ, கப்பியகாரகஸ்ஸாபா⁴வோ, அபஞ்ஹாவிஸ்ஸஜ்ஜனாதி இமானெத்த² பஞ்ச அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானேவ, கேவலங் இத⁴ கிரியாகிரியங் ஹோதீதி.
Sāvatthiyaṃ udāyittheraṃ ārabbha mātugāmassa dhammadesanāvatthusmiṃ paññattaṃ, ‘‘aññatra viññunā’’ti ayamettha anupaññatti, sādhāraṇapaññatti, anāṇattikaṃ, tikapācittiyaṃ, amātugāme mātugāmasaññino vematikassa vā yakkhipetipaṇḍakamanussaviggahatiracchānitthīnaṃ desentassa ca dukkaṭaṃ. Chahi vācāhi, tato vā oraṃ desentassa, vuttalakkhaṇe vā purise sati, sayaṃ vā uṭṭhāya, puna nisīditvā mātugāmassa vā uṭṭhahitvā puna nisinnassa, aññassa vā mātugāmassa desayato, ‘‘dīghanikāyo nāma bhante kimatthiyo’’ti evaṃ pana puṭṭhe sabbampi dīghanikāyaṃ desentassa, aññassatthāya vuccamānaṃ mātugāme suṇante, ummattakādīnañca anāpatti. Vuttalakkhaṇassa dhammassa channaṃ vācānaṃ upari desanā, vuttalakkhaṇo mātugāmo, iriyāpathaparivattābhāvo, kappiyakārakassābhāvo, apañhāvissajjanāti imānettha pañca aṅgāni. Samuṭṭhānādīni padasodhammasadisāneva, kevalaṃ idha kiriyākiriyaṃ hotīti.
த⁴ம்மதே³ஸனாஸிக்கா²பத³வண்ணனா நிட்டி²தா.
Dhammadesanāsikkhāpadavaṇṇanā niṭṭhitā.
8. பூ⁴தாரோசனஸிக்கா²பத³வண்ணனா
8. Bhūtārocanasikkhāpadavaṇṇanā
அட்ட²மே உத்தரிமனுஸ்ஸத⁴ம்மந்தி சதுத்த²பாராஜிகே வுத்தலக்க²ணங் உத்தரிமனுஸ்ஸானங் ஜா²யீனஞ்சேவ அரியானஞ்ச த⁴ம்மங். பூ⁴தஸ்மிங் பாசித்தியந்தி அத்தனி ஜா²னாதி³த⁴ம்மே ஸதி தங் பி⁴க்கு²ஞ்ச பி⁴க்கு²னிஞ்ச ட²பெத்வா அஞ்ஞஸ்ஸ ஆரோசயதோ பாசித்தியங்.
Aṭṭhame uttarimanussadhammanti catutthapārājike vuttalakkhaṇaṃ uttarimanussānaṃ jhāyīnañceva ariyānañca dhammaṃ. Bhūtasmiṃ pācittiyanti attani jhānādidhamme sati taṃ bhikkhuñca bhikkhuniñca ṭhapetvā aññassa ārocayato pācittiyaṃ.
வேஸாலியங் வக்³கு³முதா³தீரியே பி⁴க்கூ² ஆரப்³ப⁴ தேஸங் பூ⁴தாரோசனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி , அனாணத்திகங், நிப்பரியாயேன அத்தனி விஜ்ஜமானங் ஜா²னாதி³த⁴ம்மங் ஆரோசெந்தஸ்ஸ ஸசே யஸ்ஸ ஆரோசேதி, ஸோ அனந்தரமேவ ‘‘அயங் ஜா²னலாபீ⁴’’தி வா ‘‘அரியோ’’தி வா யேன கேனசி ஆகாரேன தமத்த²ங் ஜானாதி, பாசித்தியங். நோ சே ஜானாதி, து³க்கடங். பரியாயேன ஆரோசிதங் பன ஜானாது வா, மா வா, து³க்கடமேவ. ததா²ரூபே காரணே ஸதி உபஸம்பன்னஸ்ஸ ஆரோசயதோ, ஆதி³கம்மிகஸ்ஸ ச அனாபத்தி. யஸ்மா பன அரியானங் உம்மத்தகாதி³பா⁴வோ நத்தி², ஜா²னலாபி⁴னோ பன தஸ்மிங் ஸதி ஜா²னா பரிஹாயந்தி, தஸ்மா தே இத⁴ ந க³ஹிதா. உத்தரிமனுஸ்ஸத⁴ம்மஸ்ஸ பூ⁴ததா, அனுபஸம்பன்னஸ்ஸ ஆரோசனங், தங்க²ணவிஜானநா, அனஞ்ஞாபதே³ஸோதி இமானெத்த² சத்தாரி அங்கா³னி. பூ⁴தாரோசனஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், குஸலாப்³யாகதசித்தேஹி த்³விசித்தங், ஸுக²மஜ்ஜ²த்தவேத³னாஹி த்³விவேத³னந்தி.
Vesāliyaṃ vaggumudātīriye bhikkhū ārabbha tesaṃ bhūtārocanavatthusmiṃ paññattaṃ, sādhāraṇapaññatti , anāṇattikaṃ, nippariyāyena attani vijjamānaṃ jhānādidhammaṃ ārocentassa sace yassa āroceti, so anantarameva ‘‘ayaṃ jhānalābhī’’ti vā ‘‘ariyo’’ti vā yena kenaci ākārena tamatthaṃ jānāti, pācittiyaṃ. No ce jānāti, dukkaṭaṃ. Pariyāyena ārocitaṃ pana jānātu vā, mā vā, dukkaṭameva. Tathārūpe kāraṇe sati upasampannassa ārocayato, ādikammikassa ca anāpatti. Yasmā pana ariyānaṃ ummattakādibhāvo natthi, jhānalābhino pana tasmiṃ sati jhānā parihāyanti, tasmā te idha na gahitā. Uttarimanussadhammassa bhūtatā, anupasampannassa ārocanaṃ, taṅkhaṇavijānanā, anaññāpadesoti imānettha cattāri aṅgāni. Bhūtārocanasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, kusalābyākatacittehi dvicittaṃ, sukhamajjhattavedanāhi dvivedananti.
பூ⁴தாரோசனஸிக்கா²பத³வண்ணனா நிட்டி²தா.
Bhūtārocanasikkhāpadavaṇṇanā niṭṭhitā.
9. து³ட்டு²ல்லாரோசனஸிக்கா²பத³வண்ணனா
9. Duṭṭhullārocanasikkhāpadavaṇṇanā
நவமே பி⁴க்கு²ஸ்ஸாதி பாராஜிகங் அனஜ்ஜா²பன்னஸ்ஸ. து³ட்டு²ல்லந்தி கிஞ்சாபி த்³வின்னங் ஆபத்திக்க²ந்தா⁴னமேதங் அதி⁴வசனங், இத⁴ பன ஸங்கா⁴தி³ஸேஸமேவ அதி⁴ப்பேதங். அஞ்ஞத்ர பி⁴க்கு²ஸம்முதியாதி யங் ஸங்கோ⁴ அபி⁴ண்ஹாபத்திகஸ்ஸ பி⁴க்கு²னோ ஆயதிங் ஸங்வரத்தா²ய ஆபத்தீனஞ்ச குலானஞ்ச பரியந்தங் கத்வா வா அகத்வா வா திக்க²த்துங் அபலோகெத்வா கதிகங் கரோதி, தங் ட²பெத்வா, அயதா²கதிகாய ‘‘அயங் அஸுசிங் மோசெத்வா ஸங்கா⁴தி³ஸேஸங் ஆபன்னோ’’திஆதி³னா நயேன வத்து²னா ஸத்³தி⁴ங் ஆபத்திங் க⁴டெத்வா ஆரோசெந்தஸ்ஸ பாசித்தியங்.
Navame bhikkhussāti pārājikaṃ anajjhāpannassa. Duṭṭhullanti kiñcāpi dvinnaṃ āpattikkhandhānametaṃ adhivacanaṃ, idha pana saṅghādisesameva adhippetaṃ. Aññatra bhikkhusammutiyāti yaṃ saṅgho abhiṇhāpattikassa bhikkhuno āyatiṃ saṃvaratthāya āpattīnañca kulānañca pariyantaṃ katvā vā akatvā vā tikkhattuṃ apaloketvā katikaṃ karoti, taṃ ṭhapetvā, ayathākatikāya ‘‘ayaṃ asuciṃ mocetvā saṅghādisesaṃ āpanno’’tiādinā nayena vatthunā saddhiṃ āpattiṃ ghaṭetvā ārocentassa pācittiyaṃ.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ து³ட்டு²ல்லாபத்திஆரோசனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங் , அது³ட்டு²ல்லாய து³ட்டு²ல்லஸஞ்ஞினோ வேமதிகஸ்ஸ வா து³க்கடங், அவஸேஸே ச² ஆபத்திக்க²ந்தே⁴, அனுபஸம்பன்னஸ்ஸ புரிமபஞ்சஸிக்கா²பத³வீதிக்கமஸங்கா²தங் து³ட்டு²ல்லங் வா இதரங் அது³ட்டு²ல்லங் வா அஜ்ஜா²சாரங் ஆரோசெந்தஸ்ஸாபி து³க்கடமேவ. வத்து²மத்தங் வா ஆபத்திமத்தங் வா ஆரோசெந்தஸ்ஸ, பி⁴க்கு²ஸம்முதிபரிச்சே²த³ங் அனதிக்கமித்வா ஆரோசெந்தஸ்ஸ, உம்மத்தகாதீ³னஞ்ச அனாபத்தி. வுத்தலக்க²ணஸ்ஸ பி⁴க்கு²னோ ஸவத்து²கோ ஸங்கா⁴தி³ஸேஸோ, அனுபஸம்பன்னஸ்ஸ ஆரோசனங், பி⁴க்கு²ஸம்முதியா அபா⁴வோதி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, வேத³னா பன இத⁴ து³க்கா²யேவாதி.
Sāvatthiyaṃ chabbaggiye bhikkhū ārabbha duṭṭhullāpattiārocanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ , aduṭṭhullāya duṭṭhullasaññino vematikassa vā dukkaṭaṃ, avasese cha āpattikkhandhe, anupasampannassa purimapañcasikkhāpadavītikkamasaṅkhātaṃ duṭṭhullaṃ vā itaraṃ aduṭṭhullaṃ vā ajjhācāraṃ ārocentassāpi dukkaṭameva. Vatthumattaṃ vā āpattimattaṃ vā ārocentassa, bhikkhusammutiparicchedaṃ anatikkamitvā ārocentassa, ummattakādīnañca anāpatti. Vuttalakkhaṇassa bhikkhuno savatthuko saṅghādiseso, anupasampannassa ārocanaṃ, bhikkhusammutiyā abhāvoti imānettha tīṇi aṅgāni. Samuṭṭhānādīni adinnādānasadisāni, vedanā pana idha dukkhāyevāti.
து³ட்டு²ல்லாரோசனஸிக்கா²பத³வண்ணனா நிட்டி²தா.
Duṭṭhullārocanasikkhāpadavaṇṇanā niṭṭhitā.
10. பத²வீக²ணனஸிக்கா²பத³வண்ணனா
10. Pathavīkhaṇanasikkhāpadavaṇṇanā
த³ஸமே பத²விந்தி து³விதா⁴ பத²வீ ஜாதபத²வீ அஜாதபத²வீதி. தத்த² ஜாதபத²வீ ஸுத்³த⁴மிஸ்ஸபுஞ்ஜவஸேன திவிதா⁴, தத்த² ஸுத்³த⁴பத²வீ நாம பகதியா ஸுத்³த⁴பங்ஸு வா ஸுத்³த⁴மத்திகா வா. மிஸ்ஸபத²வீ நாம யத்த² பங்ஸுதோ வா மத்திகாதோ வா பாஸாணஸக்க²ரகத²லமரும்ப³வாலுகாஸு அஞ்ஞதரஸ்ஸ ததியபா⁴கோ³ ஹோதி. புஞ்ஜபத²வீ நாம ‘‘அதிரேகசாதுமாஸங் ஓவட்டோ² பங்ஸுபுஞ்ஜோ வா மத்திகாபுஞ்ஜோ வா’’தி (பாசி॰ 86) வுத்தங், வுத்தலக்க²ணேன பன மிஸ்ஸகபுஞ்ஜோபி பிட்டி²பாஸாணே டி²தஸுகு²மரஜம்பி ச தே³வே பு²ஸாயந்தே ஸகிங் திந்தங் சதுமாஸச்சயேன திந்தோகாஸோ புஞ்ஜபத²விஸங்க²மேவ க³ச்ச²தி. திவிதா⁴பி சேஸா பத²வீ உத்³த⁴னபத்தபசனாதி³வஸேன வா யதா² ததா² வா அத³ட்³டா⁴ ‘ஜாதபத²வீ’தி வுச்சதி, த³ட்³டா⁴ பன வுத்தப்பமாணதோ அதி⁴கதரபாஸாணாதி³மிஸ்ஸா வா அஜாதபத²வீ நாம ஹோதி, கோ பன வாதோ³ ஸுத்³த⁴பாஸாணாதி³பே⁴தா³ய. தத்த² யா ‘ஜாதபத²வீ’தி வுத்தா, அயங் அகப்பியபத²வீ. யோ பி⁴க்கு² தங் ஏவரூபங் பத²விங் ஸயங் க²ணதி, க²ணனபே⁴த³னவிலேக²னபசனாதீ³ஹி விகோபேதி, தஸ்ஸ பயோக³க³ணனாய பாசித்தியங். யோ பன க²ணாபேதி, வுத்தனயேனேவ விகோபாபேதி, தஸ்ஸ ‘‘இமங் பதே³ஸ’’ந்தி வா ‘‘இமங் பத²வி’’ந்தி வா ஏவங் நியமெத்வா ‘‘க²ண, பி⁴ந்தா³’’திஆதி³னா நயேன ஆணாபெந்தஸ்ஸ ஆணத்தியா து³க்கடங், ஸகிங் ஆணத்தே தி³வஸம்பி க²ணந்தே ஆணாபகஸ்ஸ ஏகமேவ பாசித்தியங், ஸசே இதரோ புனப்புனங் ஆணாபேதி, வாசாய வாசாய பாசித்தியங்.
Dasame pathavinti duvidhā pathavī jātapathavī ajātapathavīti. Tattha jātapathavī suddhamissapuñjavasena tividhā, tattha suddhapathavī nāma pakatiyā suddhapaṃsu vā suddhamattikā vā. Missapathavī nāma yattha paṃsuto vā mattikāto vā pāsāṇasakkharakathalamarumbavālukāsu aññatarassa tatiyabhāgo hoti. Puñjapathavī nāma ‘‘atirekacātumāsaṃ ovaṭṭho paṃsupuñjo vā mattikāpuñjo vā’’ti (pāci. 86) vuttaṃ, vuttalakkhaṇena pana missakapuñjopi piṭṭhipāsāṇe ṭhitasukhumarajampi ca deve phusāyante sakiṃ tintaṃ catumāsaccayena tintokāso puñjapathavisaṅkhameva gacchati. Tividhāpi cesā pathavī uddhanapattapacanādivasena vā yathā tathā vā adaḍḍhā ‘jātapathavī’ti vuccati, daḍḍhā pana vuttappamāṇato adhikatarapāsāṇādimissā vā ajātapathavī nāma hoti, ko pana vādo suddhapāsāṇādibhedāya. Tattha yā ‘jātapathavī’ti vuttā, ayaṃ akappiyapathavī. Yo bhikkhu taṃ evarūpaṃ pathaviṃ sayaṃ khaṇati, khaṇanabhedanavilekhanapacanādīhi vikopeti, tassa payogagaṇanāya pācittiyaṃ. Yo pana khaṇāpeti, vuttanayeneva vikopāpeti, tassa ‘‘imaṃ padesa’’nti vā ‘‘imaṃ pathavi’’nti vā evaṃ niyametvā ‘‘khaṇa, bhindā’’tiādinā nayena āṇāpentassa āṇattiyā dukkaṭaṃ, sakiṃ āṇatte divasampi khaṇante āṇāpakassa ekameva pācittiyaṃ, sace itaro punappunaṃ āṇāpeti, vācāya vācāya pācittiyaṃ.
ஆளவியங் ஆளவகே பி⁴க்கூ² ஆரப்³ப⁴ பத²விக²ணனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸாணத்திகங், பத²வியா வேமதிகஸ்ஸ, அபத²வியா பத²விஸஞ்ஞினோ சேவ வேமதிகஸ்ஸ ச து³க்கடங். ஓகாஸங் அனியமெத்வா ‘‘பொக்க²ரணிங் க²ண, ஆவாடங் க²ண, கந்த³ங் க²ணா’’திஆதீ³னி ப⁴ணந்தஸ்ஸ, ஆதபேன ஸுஸ்ஸித்வா ப²லிதகத்³த³மங் வா கோ³கண்டகங் வா ஹெட்டா² பத²வியா அஸம்ப³த்³த⁴ங் பி⁴ஜ்ஜித்வா பதிதனதி³தடங் வா மஹந்தம்பி நங்க³லச்சி²ன்னமத்திகாபிண்ட³ந்திஏவமாதீ³னி ஸப்³ப³ஞ்ச அஜாதபத²விங் விகோபெந்தஸ்ஸ, ‘‘இமஸ்ஸ த²ம்ப⁴ஸ்ஸ ஆவாடங் ஜான , மத்திகங் தே³ஹி, மத்திகங் ஆஹர, பங்ஸுனா மே அத்தோ², மத்திகங் கப்பியங் கரோஹீ’’தி ப⁴ணந்தஸ்ஸ, அஸஞ்சிச்ச ருக்கா²தி³பவட்டனேன பி⁴ந்த³ந்தஸ்ஸ, அஸதியா பாத³ங்கு³ட்ட²காதீ³ஹி விலேக²ந்தஸ்ஸ, ஜாதபத²விபா⁴வங் வா, ‘‘க²ணாமி வா அஹ’’ந்தி அஜானந்தஸ்ஸ, உம்மத்தகாதீ³னஞ்ச அனாபத்தி. ஜாதபத²வீ, பத²விஸஞ்ஞிதா, க²ணனக²ணாபனானங் அஞ்ஞதரந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன பண்ணத்திவஜ்ஜங், திசித்தங், திவேத³னந்தி.
Āḷaviyaṃ āḷavake bhikkhū ārabbha pathavikhaṇanavatthusmiṃ paññattaṃ, sādhāraṇapaññatti, sāṇattikaṃ, pathaviyā vematikassa, apathaviyā pathavisaññino ceva vematikassa ca dukkaṭaṃ. Okāsaṃ aniyametvā ‘‘pokkharaṇiṃ khaṇa, āvāṭaṃ khaṇa, kandaṃ khaṇā’’tiādīni bhaṇantassa, ātapena sussitvā phalitakaddamaṃ vā gokaṇṭakaṃ vā heṭṭhā pathaviyā asambaddhaṃ bhijjitvā patitanaditaṭaṃ vā mahantampi naṅgalacchinnamattikāpiṇḍantievamādīni sabbañca ajātapathaviṃ vikopentassa, ‘‘imassa thambhassa āvāṭaṃ jāna , mattikaṃ dehi, mattikaṃ āhara, paṃsunā me attho, mattikaṃ kappiyaṃ karohī’’ti bhaṇantassa, asañcicca rukkhādipavaṭṭanena bhindantassa, asatiyā pādaṅguṭṭhakādīhi vilekhantassa, jātapathavibhāvaṃ vā, ‘‘khaṇāmi vā aha’’nti ajānantassa, ummattakādīnañca anāpatti. Jātapathavī, pathavisaññitā, khaṇanakhaṇāpanānaṃ aññataranti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
பத²வீக²ணனஸிக்கா²பத³வண்ணனா நிட்டி²தா.
Pathavīkhaṇanasikkhāpadavaṇṇanā niṭṭhitā.
முஸாவாத³வக்³கோ³ பட²மோ.
Musāvādavaggo paṭhamo.
