| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. পাচিত্তিযকণ্ডং
5. Pācittiyakaṇḍaṃ
১. মুসাৰাদৰগ্গো
1. Musāvādavaggo
৫৪. যং তেন ভগৰতা জানতা পস্সতা অরহতা সম্মাসম্বুদ্ধেন সম্পজানমুসাৰাদে পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি ? হত্থকং সক্যপুত্তং আরব্ভ । কিস্মিং ৰত্থুস্মিন্তি? আযস্মা হত্থকো সক্যপুত্তো তিত্থিযেহি সদ্ধিং সল্লপন্তো অৰজানিত্ৰা পটিজানি, পটিজানিত্ৰা অৰজানি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
54. Yaṃ tena bhagavatā jānatā passatā arahatā sammāsambuddhena sampajānamusāvāde pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti ? Hatthakaṃ sakyaputtaṃ ārabbha . Kismiṃ vatthusminti? Āyasmā hatthako sakyaputto titthiyehi saddhiṃ sallapanto avajānitvā paṭijāni, paṭijānitvā avajāni, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
৫৫. ওমসৰাদে পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ পেসলেহি ভিক্খূহি সদ্ধিং ভণ্ডন্তা 1 পেসলে ভিক্খূ ওমসিংসু, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
55. Omasavāde pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū pesalehi bhikkhūhi saddhiṃ bhaṇḍantā 2 pesale bhikkhū omasiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
৫৬. ভিক্খুপেসুঞ্ঞে পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ ভিক্খূনং ভণ্ডনজাতানং কলহজাতানং ৰিৰাদাপন্নানং পেসুঞ্ঞং উপসংহরিংসু, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
56. Bhikkhupesuññe pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃhariṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
৫৭. অনুপসম্পন্নং পদসো ধম্মং ৰাচেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ উপাসকে পদসো ধম্মং ৰাচেসুং , তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা ৰাচতো সমুট্ঠাতি, ন কাযতো ন চিত্ততো; সিযা ৰাচতো চ চিত্ততো চ সমুট্ঠাতি, ন কাযতো…পে॰…।
57. Anupasampannaṃ padaso dhammaṃ vācentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū upāsake padaso dhammaṃ vācesuṃ , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā vācato samuṭṭhāti, na kāyato na cittato; siyā vācato ca cittato ca samuṭṭhāti, na kāyato…pe….
৫৮. অনুপসম্পন্নেন উত্তরিদিরত্ততিরত্তং সহসেয্যং কপ্পেন্তস্স পাচিত্তিযং কত্থ পঞ্ঞত্তন্তি? আল়ৰিযং পঞ্ঞত্তং। কং আরব্ভাতি? সম্বহুলে ভিক্খূ আরব্ভ। কিস্মিং ৰত্থুস্মিন্তি? সম্বহুলা ভিক্খূ অনুপসম্পন্নেন সহসেয্যং কপ্পেসুং, তস্মিং ৰত্থুস্মিং। একা পঞ্ঞত্তি , একা অনুপঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা কাযতো চ চিত্ততো চ সমুট্ঠাতি, ন ৰাচতো…পে॰…।
58. Anupasampannena uttaridirattatirattaṃ sahaseyyaṃ kappentassa pācittiyaṃ kattha paññattanti? Āḷaviyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū anupasampannena sahaseyyaṃ kappesuṃ, tasmiṃ vatthusmiṃ. Ekā paññatti , ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
৫৯. মাতুগামেন সহসেয্যং কপ্পেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? আযস্মন্তং অনুরুদ্ধং আরব্ভ। কিস্মিং ৰত্থুস্মিন্তি? আযস্মা অনুরুদ্ধো মাতুগামেন সহসেয্যং কপ্পেসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি এল়কলোমকে…পে॰…।
59. Mātugāmena sahaseyyaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ anuruddhaṃ ārabbha. Kismiṃ vatthusminti? Āyasmā anuruddho mātugāmena sahaseyyaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
৬০. মাতুগামস্স উত্তরিছপ্পঞ্চৰাচাহি ধম্মং দেসেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী মাতুগামস্স ধম্মং দেসেসি, তস্মিং ৰত্থুস্মিং। একা পঞ্ঞত্তি, দ্ৰে অনুপঞ্ঞত্তিযো। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি পদসোধম্মে…পে॰…।
60. Mātugāmassa uttarichappañcavācāhi dhammaṃ desentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmassa dhammaṃ desesi, tasmiṃ vatthusmiṃ. Ekā paññatti, dve anupaññattiyo. Channaṃ āpattisamuṭṭhānānaṃ dvīhi samuṭṭhānehi samuṭṭhāti padasodhamme…pe….
৬১. অনুপসম্পন্নস্স উত্তরিমনুস্সধম্মং ভূতং আরোচেন্তস্স পাচিত্তিযং কত্থ পঞ্ঞত্তন্তি? ৰেসালিযং পঞ্ঞত্তং। কং আরব্ভাতি? ৰগ্গুমুদাতীরিযে ভিক্খূ আরব্ভ। কিস্মিং ৰত্থুস্মিন্তি? ৰগ্গুমুদাতীরিযা ভিক্খূ গিহীনং অঞ্ঞমঞ্ঞস্স উত্তরিমনুস্সধম্মস্স ৰণ্ণং ভাসিংসু, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা ৰাচতো সমুট্ঠাতি, ন কাযতো ন চিত্ততো; সিযা কাযতো চ ৰাচতো চ সমুট্ঠাতি, ন চিত্ততো…পে॰…।
61. Anupasampannassa uttarimanussadhammaṃ bhūtaṃ ārocentassa pācittiyaṃ kattha paññattanti? Vesāliyaṃ paññattaṃ. Kaṃ ārabbhāti? Vaggumudātīriye bhikkhū ārabbha. Kismiṃ vatthusminti? Vaggumudātīriyā bhikkhū gihīnaṃ aññamaññassa uttarimanussadhammassa vaṇṇaṃ bhāsiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato…pe….
৬২. ভিক্খুস্স দুট্ঠুল্লাপত্তিং অনুপসম্পন্নস্স আরোচেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ ভিক্খুস্স দুট্ঠুল্লাপত্তিং অনুপসম্পন্নস্স আরোচেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
62. Bhikkhussa duṭṭhullāpattiṃ anupasampannassa ārocentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhussa duṭṭhullāpattiṃ anupasampannassa ārocesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
৬৩. পথৰিং খণন্তস্স পাচিত্তিযং কত্থ পঞ্ঞত্তন্তি? আল়ৰিযং পঞ্ঞত্তং। কং আরব্ভাতি? আল়ৰকে ভিক্খূ আরব্ভ। কিস্মিং ৰত্থুস্মিন্তি? আল়ৰকা ভিক্খূ পথৰিং খণিংসু , তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
63. Pathaviṃ khaṇantassa pācittiyaṃ kattha paññattanti? Āḷaviyaṃ paññattaṃ. Kaṃ ārabbhāti? Āḷavake bhikkhū ārabbha. Kismiṃ vatthusminti? Āḷavakā bhikkhū pathaviṃ khaṇiṃsu , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
মুসাৰাদৰগ্গো পঠমো।
Musāvādavaggo paṭhamo.
Footnotes:
