| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৪. পাচিত্তিযকণ্ডং
4. Pācittiyakaṇḍaṃ
১. মুসাৰাদৰগ্গো
1. Musāvādavaggo
১৬৫. সম্পজানমুসাৰাদং ভাসন্তো কতি আপত্তিযো আপজ্জতি? সম্পজানমুসাৰাদং ভাসন্তো পঞ্চ আপত্তিযো আপজ্জতি। পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ভিক্খুং অমূলকেন পারাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; ‘‘যো তে ৰিহারে ৰসতি, সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স; সম্পজানমুসাৰাদে পাচিত্তিযং – সম্পজানমুসাৰাদং ভাসন্তো ইমা পঞ্চ আপত্তিযো আপজ্জতি।
165. Sampajānamusāvādaṃ bhāsanto kati āpattiyo āpajjati? Sampajānamusāvādaṃ bhāsanto pañca āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; bhikkhuṃ amūlakena pārājikena dhammena anuddhaṃseti, āpatti saṅghādisesassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa; sampajānamusāvāde pācittiyaṃ – sampajānamusāvādaṃ bhāsanto imā pañca āpattiyo āpajjati.
ওমসন্তো দ্ৰে আপত্তিযো আপজ্জতি। উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স।
Omasanto dve āpattiyo āpajjati. Upasampannaṃ omasati, āpatti pācittiyassa; anupasampannaṃ omasati, āpatti dukkaṭassa.
পেসুঞ্ঞং উপসংহরন্তো দ্ৰে আপত্তিযো আপজ্জতি। উপসম্পন্নস্স পেসুঞ্ঞং উপসংহরতি, আপত্তি পাচিত্তিযস্স; অনুপসম্পন্নস্স পেসুঞ্ঞং উপসংহরতি, আপত্তি দুক্কটস্স।
Pesuññaṃ upasaṃharanto dve āpattiyo āpajjati. Upasampannassa pesuññaṃ upasaṃharati, āpatti pācittiyassa; anupasampannassa pesuññaṃ upasaṃharati, āpatti dukkaṭassa.
অনুপসম্পন্নং পদসো ধম্মং ৰাচেন্তো দ্ৰে আপত্তিযো আপজ্জতি। ৰাচেতি, পযোগে দুক্কটং; পদে পদে আপত্তি পাচিত্তিযস্স।
Anupasampannaṃ padaso dhammaṃ vācento dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
অনুপসম্পন্নেন উত্তরিদিরত্ততিরত্তং সহসেয্যং কপ্পেন্তো দ্ৰে আপত্তিযো আপজ্জতি। নিপজ্জতি, পযোগে দুক্কটং; নিপন্নে আপত্তি পাচিত্তিযস্স।
Anupasampannena uttaridirattatirattaṃ sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
মাতুগামেন সহসেয্যং কপ্পেন্তো দ্ৰে আপত্তিযো আপজ্জতি। নিপজ্জতি, পযোগে দুক্কটং; নিপন্নে আপত্তি পাচিত্তিযস্স।
Mātugāmena sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
মাতুগামস্স উত্তরিছপ্পঞ্চৰাচাহি ধম্মং দেসেন্তো দ্ৰে আপত্তিযো আপজ্জতি। দেসেতি, পযোগে দুক্কটং; পদে পদে আপত্তি পাচিত্তিযস্স।
Mātugāmassa uttarichappañcavācāhi dhammaṃ desento dve āpattiyo āpajjati. Deseti, payoge dukkaṭaṃ; pade pade āpatti pācittiyassa.
অনুপসম্পন্নস্স উত্তরিমনুস্সধম্মং ভূতং আরোচেন্তো দ্ৰে আপত্তিযো আপজ্জতি। আরোচেতি, পযোগে দুক্কটং; আরোচিতে আপত্তি পাচিত্তিযস্স।
Anupasampannassa uttarimanussadhammaṃ bhūtaṃ ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
ভিক্খুস্স দুট্ঠুল্লং আপত্তিং অনুপসম্পন্নস্স আরোচেন্তো দ্ৰে আপত্তিযো আপজ্জতি। আরোচেতি, পযোগে দুক্কটং; আরোচিতে আপত্তি পাচিত্তিযস্স।
Bhikkhussa duṭṭhullaṃ āpattiṃ anupasampannassa ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
পথৰিং খণন্তো দ্ৰে আপত্তিযো আপজ্জতি। খণতি, পযোগে দুক্কটং; পহারে পহারে আপত্তি পাচিত্তিযস্স।
Pathaviṃ khaṇanto dve āpattiyo āpajjati. Khaṇati, payoge dukkaṭaṃ; pahāre pahāre āpatti pācittiyassa.
মুসাৰাদৰগ্গো পঠমো।
Musāvādavaggo paṭhamo.
