| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. মূসিকসুত্তং
7. Mūsikasuttaṃ
১০৭. ‘‘চতস্সো ইমা, ভিক্খৰে, মূসিকা। কতমা চতস্সো? গাধং কত্তা নো ৰসিতা, ৰসিতা নো গাধং কত্তা, নেৰ গাধং কত্তা নো ৰসিতা, গাধং কত্তা চ ৰসিতা চ – ইমা খো, ভিক্খৰে, চতস্সো মূসিকা। এৰমেৰং খো, ভিক্খৰে, চত্তারো মূসিকূপমা পুগ্গলা সন্তো সংৰিজ্জমানা লোকস্মিং। কতমে চত্তারো? গাধং কত্তা নো ৰসিতা, ৰসিতা নো গাধং কত্তা, নেৰ গাধং কত্তা নো ৰসিতা, গাধং কত্তা চ ৰসিতা চ।
107. ‘‘Catasso imā, bhikkhave, mūsikā. Katamā catasso? Gādhaṃ kattā no vasitā, vasitā no gādhaṃ kattā, neva gādhaṃ kattā no vasitā, gādhaṃ kattā ca vasitā ca – imā kho, bhikkhave, catasso mūsikā. Evamevaṃ kho, bhikkhave, cattāro mūsikūpamā puggalā santo saṃvijjamānā lokasmiṃ. Katame cattāro? Gādhaṃ kattā no vasitā, vasitā no gādhaṃ kattā, neva gādhaṃ kattā no vasitā, gādhaṃ kattā ca vasitā ca.
‘‘কথঞ্চ , ভিক্খৰে, পুগ্গলো গাধং কত্তা হোতি নো ৰসিতা? ইধ, ভিক্খৰে, একচ্চো পুগ্গলো ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। সো ‘ইদং দুক্খ’ন্তি যথাভূতং নপ্পজানাতি…পে॰… ‘অযং দুক্খনিরোধগামিনী পটিপদা’তি যথাভূতং নপ্পজানাতি। এৰং খো, ভিক্খৰে, পুগ্গলো গাধং কত্তা হোতি, নো ৰসিতা। সেয্যথাপি সা , ভিক্খৰে, মূসিকা গাধং কত্তা, নো ৰসিতা; তথূপমাহং, ভিক্খৰে, ইমং পুগ্গলং ৰদামি।
‘‘Kathañca , bhikkhave, puggalo gādhaṃ kattā hoti no vasitā? Idha, bhikkhave, ekacco puggalo dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. So ‘idaṃ dukkha’nti yathābhūtaṃ nappajānāti…pe… ‘ayaṃ dukkhanirodhagāminī paṭipadā’ti yathābhūtaṃ nappajānāti. Evaṃ kho, bhikkhave, puggalo gādhaṃ kattā hoti, no vasitā. Seyyathāpi sā , bhikkhave, mūsikā gādhaṃ kattā, no vasitā; tathūpamāhaṃ, bhikkhave, imaṃ puggalaṃ vadāmi.
‘‘কথঞ্চ, ভিক্খৰে, পুগ্গলো ৰসিতা হোতি, নো গাধং কত্তা? ইধ, ভিক্খৰে, একচ্চো পুগ্গলো ধম্মং ন পরিযাপুণাতি – সুত্তং, গেয্যং, ৰেয্যাকরণং, গাথং , উদানং, ইতিৰুত্তকং, জাতকং, অব্ভুতধম্মং, ৰেদল্লং। সো ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি। এৰং খো, ভিক্খৰে, পুগ্গলো ৰসিতা হোতি, নো গাধং কত্তা। সেয্যথাপি সা, ভিক্খৰে, মূসিকা ৰসিতা হোতি, নো গাধং কত্তা; তথূপমাহং, ভিক্খৰে, ইমং, পুগ্গলং ৰদামি।
‘‘Kathañca, bhikkhave, puggalo vasitā hoti, no gādhaṃ kattā? Idha, bhikkhave, ekacco puggalo dhammaṃ na pariyāpuṇāti – suttaṃ, geyyaṃ, veyyākaraṇaṃ, gāthaṃ , udānaṃ, itivuttakaṃ, jātakaṃ, abbhutadhammaṃ, vedallaṃ. So ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, puggalo vasitā hoti, no gādhaṃ kattā. Seyyathāpi sā, bhikkhave, mūsikā vasitā hoti, no gādhaṃ kattā; tathūpamāhaṃ, bhikkhave, imaṃ, puggalaṃ vadāmi.
‘‘কথঞ্চ, ভিক্খৰে, পুগ্গলো নেৰ গাধং কত্তা হোতি নো ৰসিতা? ইধ, ভিক্খৰে, একচ্চো পুগ্গলো ধম্মং ন পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। সো ‘ইদং দুক্খ’ন্তি যথাভূতং নপ্পজানাতি…পে॰… ‘অযং দুক্খনিরোধগামিনী পটিপদা’তি যথাভূতং নপ্পজানাতি। এৰং খো, ভিক্খৰে , পুগ্গলো নেৰ গাধং কত্তা হোতি, নো ৰসিতা। সেয্যথাপি সা, ভিক্খৰে, মূসিকা নেৰ গাধং কত্তা হোতি, নো ৰসিতা; তথূপমাহং, ভিক্খৰে, ইমং পুগ্গলং ৰদামি।
‘‘Kathañca, bhikkhave, puggalo neva gādhaṃ kattā hoti no vasitā? Idha, bhikkhave, ekacco puggalo dhammaṃ na pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. So ‘idaṃ dukkha’nti yathābhūtaṃ nappajānāti…pe… ‘ayaṃ dukkhanirodhagāminī paṭipadā’ti yathābhūtaṃ nappajānāti. Evaṃ kho, bhikkhave , puggalo neva gādhaṃ kattā hoti, no vasitā. Seyyathāpi sā, bhikkhave, mūsikā neva gādhaṃ kattā hoti, no vasitā; tathūpamāhaṃ, bhikkhave, imaṃ puggalaṃ vadāmi.
‘‘কথঞ্চ, ভিক্খৰে, পুগ্গলো গাধং কত্তা চ হোতি ৰসিতা চ? ইধ, ভিক্খৰে, একচ্চো পুগ্গলো ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। সো ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি। এৰং খো, ভিক্খৰে, পুগ্গলো গাধং কত্তা চ হোতি ৰসিতা চ। সেয্যথাপি সা, ভিক্খৰে, মূসিকা গাধং কত্তা চ হোতি ৰসিতা চ; তথূপমাহং, ভিক্খৰে, ইমং পুগ্গলং ৰদামি। ইমে খো, ভিক্খৰে, চত্তারো মূসিকূপমা পুগ্গলা সন্তো সংৰিজ্জমানা লোকস্মি’’ন্তি। সত্তমং।
‘‘Kathañca, bhikkhave, puggalo gādhaṃ kattā ca hoti vasitā ca? Idha, bhikkhave, ekacco puggalo dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. So ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, puggalo gādhaṃ kattā ca hoti vasitā ca. Seyyathāpi sā, bhikkhave, mūsikā gādhaṃ kattā ca hoti vasitā ca; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, cattāro mūsikūpamā puggalā santo saṃvijjamānā lokasmi’’nti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. মূসিকসুত্তৰণ্ণনা • 7. Mūsikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭. মূসিকসুত্তৰণ্ণনা • 7. Mūsikasuttavaṇṇanā
