| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. மூஸிகஸுத்தவண்ணனா
7. Mūsikasuttavaṇṇanā
107. ஸத்தமே ஆவாடங் க²னதீதி அத்தனோ ஆஸயங் பி³லகூபங் க²னதி. ந ச தத்த² வஸதீதி தத்த² அவஸித்வா கிஸ்மிஞ்சிதே³வ டா²னே வஸதி, ஏவங் பி³ளாராதி³அமித்தவஸங் க³ச்ச²தி. வஸிதா நோ கா³த⁴ங் கத்தாதி ஸயங் ந க²னதி, பரேன கதே பி³லே வஸதி, ஏவங் ஜீவிதங் ரக்க²தி. ததியா த்³வேபி கரொந்தீ ஜீவிதங் ரக்க²தி. சதுத்தீ² த்³வேபி அகரொந்தீ அமித்தவஸங் க³ச்ச²தி. இமாய பன உபமாய உபமிதேஸு புக்³க³லேஸு பட²மோ யதா² ஸா மூஸிகா கா³த⁴ங் க²னதி, ஏவங் நவங்க³ங் ஸத்து²ஸாஸனங் உக்³க³ண்ஹாதி. யதா² பன ஸா தத்த² ந வஸதி, கிஸ்மிஞ்சிதே³வ டா²னே வஸந்தீ அமித்தவஸங் க³ச்ச²தி, ததா² அயம்பி பரியத்திவஸேன ஞாணங் பேஸெத்வா சதுஸச்சத⁴ம்மங் ந படிவிஜ்ஜ²தி, லோகாமிஸட்டா²னேஸு விசரந்தோ மச்சுமாரகிலேஸமாரதே³வபுத்தமாரஸங்கா²தானங் வஸங் க³ச்ச²தி. து³தியோ யதா² மூஸிகா கா³த⁴ங் ந க²னதி, ஏவங் நவங்க³ங் ஸத்து²ஸாஸனங் ந உக்³க³ண்ஹாதி. யதா² பன பரேன க²னிதே பி³லே வஸந்தீ ஜீவிதங் ரக்க²தி, ஏவங் பரஸ்ஸ கத²ங் ஸுத்வா சதுஸச்சத⁴ம்மங் படிவிஜ்ஜி²த்வா திண்ணங் மாரானங் வஸங் அதிக்கமதி. இமினா நயேன ததியசதுத்தே²ஸுபி ஓபம்மஸங்ஸந்த³னங் வேதி³தப்³ப³ங்.
107. Sattame āvāṭaṃ khanatīti attano āsayaṃ bilakūpaṃ khanati. Na ca tattha vasatīti tattha avasitvā kismiñcideva ṭhāne vasati, evaṃ biḷārādiamittavasaṃ gacchati. Vasitā no gādhaṃ kattāti sayaṃ na khanati, parena kate bile vasati, evaṃ jīvitaṃ rakkhati. Tatiyā dvepi karontī jīvitaṃ rakkhati. Catutthī dvepi akarontī amittavasaṃ gacchati. Imāya pana upamāya upamitesu puggalesu paṭhamo yathā sā mūsikā gādhaṃ khanati, evaṃ navaṅgaṃ satthusāsanaṃ uggaṇhāti. Yathā pana sā tattha na vasati, kismiñcideva ṭhāne vasantī amittavasaṃ gacchati, tathā ayampi pariyattivasena ñāṇaṃ pesetvā catusaccadhammaṃ na paṭivijjhati, lokāmisaṭṭhānesu vicaranto maccumārakilesamāradevaputtamārasaṅkhātānaṃ vasaṃ gacchati. Dutiyo yathā mūsikā gādhaṃ na khanati, evaṃ navaṅgaṃ satthusāsanaṃ na uggaṇhāti. Yathā pana parena khanite bile vasantī jīvitaṃ rakkhati, evaṃ parassa kathaṃ sutvā catusaccadhammaṃ paṭivijjhitvā tiṇṇaṃ mārānaṃ vasaṃ atikkamati. Iminā nayena tatiyacatutthesupi opammasaṃsandanaṃ veditabbaṃ.
மூஸிகஸுத்தவண்ணனா நிட்டி²தா.
Mūsikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. மூஸிகஸுத்தங் • 7. Mūsikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. மூஸிகஸுத்தவண்ணனா • 7. Mūsikasuttavaṇṇanā
