| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၇. မူသိကသုတ္တဝဏ္ဏနာ
7. Mūsikasuttavaṇṇanā
၁၀၇. သတ္တမေ အာဝာဋံ ခနတီတိ အတ္တနော အာသယံ ဗိလကူပံ ခနတိ။ န စ တတ္ထ ဝသတီတိ တတ္ထ အဝသိတ္ဝာ ကိသ္မိဉ္စိဒေဝ ဌာနေ ဝသတိ, ဧဝံ ဗိဠာရာဒိအမိတ္တဝသံ ဂစ္ဆတိ။ ဝသိတာ နော ဂာဓံ ကတ္တာတိ သယံ န ခနတိ, ပရေန ကတေ ဗိလေ ဝသတိ, ဧဝံ ဇီဝိတံ ရက္ခတိ။ တတိယာ ဒ္ဝေပိ ကရောန္တီ ဇီဝိတံ ရက္ခတိ။ စတုတ္ထီ ဒ္ဝေပိ အကရောန္တီ အမိတ္တဝသံ ဂစ္ဆတိ။ ဣမာယ ပန ဥပမာယ ဥပမိတေသု ပုဂ္ဂလေသု ပဌမော ယထာ သာ မူသိကာ ဂာဓံ ခနတိ, ဧဝံ နဝင္ဂံ သတ္ထုသာသနံ ဥဂ္ဂဏ္ဟာတိ။ ယထာ ပန သာ တတ္ထ န ဝသတိ, ကိသ္မိဉ္စိဒေဝ ဌာနေ ဝသန္တီ အမိတ္တဝသံ ဂစ္ဆတိ, တထာ အယမ္ပိ ပရိယတ္တိဝသေန ဉာဏံ ပေသေတ္ဝာ စတုသစ္စဓမ္မံ န ပဋိဝိဇ္ဈတိ, လောကာမိသဋ္ဌာနေသု ဝိစရန္တော မစ္စုမာရကိလေသမာရဒေဝပုတ္တမာရသင္ခာတာနံ ဝသံ ဂစ္ဆတိ။ ဒုတိယော ယထာ မူသိကာ ဂာဓံ န ခနတိ, ဧဝံ နဝင္ဂံ သတ္ထုသာသနံ န ဥဂ္ဂဏ္ဟာတိ။ ယထာ ပန ပရေန ခနိတေ ဗိလေ ဝသန္တီ ဇီဝိတံ ရက္ခတိ, ဧဝံ ပရသ္သ ကထံ သုတ္ဝာ စတုသစ္စဓမ္မံ ပဋိဝိဇ္ဈိတ္ဝာ တိဏ္ဏံ မာရာနံ ဝသံ အတိက္ကမတိ။ ဣမိနာ နယေန တတိယစတုတ္ထေသုပိ ဩပမ္မသံသန္ဒနံ ဝေဒိတဗ္ဗံ။
107. Sattame āvāṭaṃ khanatīti attano āsayaṃ bilakūpaṃ khanati. Na ca tattha vasatīti tattha avasitvā kismiñcideva ṭhāne vasati, evaṃ biḷārādiamittavasaṃ gacchati. Vasitā no gādhaṃ kattāti sayaṃ na khanati, parena kate bile vasati, evaṃ jīvitaṃ rakkhati. Tatiyā dvepi karontī jīvitaṃ rakkhati. Catutthī dvepi akarontī amittavasaṃ gacchati. Imāya pana upamāya upamitesu puggalesu paṭhamo yathā sā mūsikā gādhaṃ khanati, evaṃ navaṅgaṃ satthusāsanaṃ uggaṇhāti. Yathā pana sā tattha na vasati, kismiñcideva ṭhāne vasantī amittavasaṃ gacchati, tathā ayampi pariyattivasena ñāṇaṃ pesetvā catusaccadhammaṃ na paṭivijjhati, lokāmisaṭṭhānesu vicaranto maccumārakilesamāradevaputtamārasaṅkhātānaṃ vasaṃ gacchati. Dutiyo yathā mūsikā gādhaṃ na khanati, evaṃ navaṅgaṃ satthusāsanaṃ na uggaṇhāti. Yathā pana parena khanite bile vasantī jīvitaṃ rakkhati, evaṃ parassa kathaṃ sutvā catusaccadhammaṃ paṭivijjhitvā tiṇṇaṃ mārānaṃ vasaṃ atikkamati. Iminā nayena tatiyacatutthesupi opammasaṃsandanaṃ veditabbaṃ.
မူသိကသုတ္တဝဏ္ဏနာ နိဋ္ဌိတာ။
Mūsikasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. မူသိကသုတ္တံ • 7. Mūsikasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇. မူသိကသုတ္တဝဏ္ဏနာ • 7. Mūsikasuttavaṇṇanā
