| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. முட்டி²புப்பி²யத்தே²ரஅபதா³னவண்ணனா
5. Muṭṭhipupphiyattheraapadānavaṇṇanā
ஸுத³ஸ்ஸனோ நாம நாமேனாதிஆதி³கங் ஆயஸ்மதோ முட்டி²புப்பி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே மாலாகாரகுலே நிப்³ப³த்தோ வுத்³தி⁴மன்வாய ஸகஸிப்பே நிப்ப²த்திங் பத்தோ ஏகதி³வஸங் ப⁴க³வந்தங் தி³ஸ்வா பஸன்னமானஸோ ஜாதிஸுமனபுப்பா²னி உபோ⁴ஹி ஹத்தே²ஹி ப⁴க³வதோ பாத³மூலே ஓகிரித்வா பூஜேஸி. ஸோ தேன குஸலஸம்பா⁴ரேன தே³வமனுஸ்ஸேஸு ஸங்ஸரந்தோ உபோ⁴ ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴ப்பத்தோ புப்³ப³வாஸனாவஸேன ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Sudassanonāma nāmenātiādikaṃ āyasmato muṭṭhipupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle mālākārakule nibbatto vuddhimanvāya sakasippe nipphattiṃ patto ekadivasaṃ bhagavantaṃ disvā pasannamānaso jātisumanapupphāni ubhohi hatthehi bhagavato pādamūle okiritvā pūjesi. So tena kusalasambhārena devamanussesu saṃsaranto ubho sampattiyo anubhavitvā imasmiṃ buddhuppāde kulagehe nibbatto vuddhippatto pubbavāsanāvasena satthari pasīditvā pabbajito nacirasseva arahā ahosi.
14-25. ஸோ அபரபா⁴கே³ அத்தனோ புப்³ப³கம்மங் அனுஸ்ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுத³ஸ்ஸனோ நாம நாமேனாதிஆதி³மாஹ. தத்த² ஸுத³ஸ்ஸனோதி ஆரோஹபரிணாஹரூபஸண்டா²னயொப்³ப³ஞ்ஞஸோப⁴னேன ஸுந்த³ரோ த³ஸ்ஸனோதி ஸுத³ஸ்ஸனோ, நாமேன ஸுத³ஸ்ஸனோ நாம மாலாகாரோ ஹுத்வா ஜாதிஸுமனபுப்பே²ஹி பது³முத்தரங் ப⁴க³வந்தங் பூஜேஸிந்தி அத்தோ². ஸேஸங் ஸப்³ப³த்த² உத்தானமேவாதி.
14-25. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento sudassano nāma nāmenātiādimāha. Tattha sudassanoti ārohapariṇāharūpasaṇṭhānayobbaññasobhanena sundaro dassanoti sudassano, nāmena sudassano nāma mālākāro hutvā jātisumanapupphehi padumuttaraṃ bhagavantaṃ pūjesinti attho. Sesaṃ sabbattha uttānamevāti.
முட்டி²புப்பி²யத்தே²ரஅபதா³னவண்ணனா ஸமத்தா.
Muṭṭhipupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
3. உப்பலஹத்தி²யத்தே²ரஅபதா³னங் • 3. Uppalahatthiyattheraapadānaṃ
4. பத³பூஜகத்தே²ரஅபதா³னங் • 4. Padapūjakattheraapadānaṃ
5. முட்டி²புப்பி²யத்தே²ரஅபதா³னங் • 5. Muṭṭhipupphiyattheraapadānaṃ
