| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
५. मुट्ठिपुप्फियत्थेरअपदानवण्णना
5. Muṭṭhipupphiyattheraapadānavaṇṇanā
सुदस्सनो नाम नामेनातिआदिकं आयस्मतो मुट्ठिपुप्फियत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो पदुमुत्तरस्स भगवतो काले मालाकारकुले निब्बत्तो वुद्धिमन्वाय सकसिप्पे निप्फत्तिं पत्तो एकदिवसं भगवन्तं दिस्वा पसन्नमानसो जातिसुमनपुप्फानि उभोहि हत्थेहि भगवतो पादमूले ओकिरित्वा पूजेसि। सो तेन कुसलसम्भारेन देवमनुस्सेसु संसरन्तो उभो सम्पत्तियो अनुभवित्वा इमस्मिं बुद्धुप्पादे कुलगेहे निब्बत्तो वुद्धिप्पत्तो पुब्बवासनावसेन सत्थरि पसीदित्वा पब्बजितो नचिरस्सेव अरहा अहोसि।
Sudassanonāma nāmenātiādikaṃ āyasmato muṭṭhipupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle mālākārakule nibbatto vuddhimanvāya sakasippe nipphattiṃ patto ekadivasaṃ bhagavantaṃ disvā pasannamānaso jātisumanapupphāni ubhohi hatthehi bhagavato pādamūle okiritvā pūjesi. So tena kusalasambhārena devamanussesu saṃsaranto ubho sampattiyo anubhavitvā imasmiṃ buddhuppāde kulagehe nibbatto vuddhippatto pubbavāsanāvasena satthari pasīditvā pabbajito nacirasseva arahā ahosi.
१४-२५. सो अपरभागे अत्तनो पुब्बकम्मं अनुस्सरित्वा सोमनस्सजातो पुब्बचरितापदानं पकासेन्तो सुदस्सनो नाम नामेनातिआदिमाह। तत्थ सुदस्सनोति आरोहपरिणाहरूपसण्ठानयोब्बञ्ञसोभनेन सुन्दरो दस्सनोति सुदस्सनो, नामेन सुदस्सनो नाम मालाकारो हुत्वा जातिसुमनपुप्फेहि पदुमुत्तरं भगवन्तं पूजेसिन्ति अत्थो। सेसं सब्बत्थ उत्तानमेवाति।
14-25. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento sudassano nāma nāmenātiādimāha. Tattha sudassanoti ārohapariṇāharūpasaṇṭhānayobbaññasobhanena sundaro dassanoti sudassano, nāmena sudassano nāma mālākāro hutvā jātisumanapupphehi padumuttaraṃ bhagavantaṃ pūjesinti attho. Sesaṃ sabbattha uttānamevāti.
मुट्ठिपुप्फियत्थेरअपदानवण्णना समत्ता।
Muṭṭhipupphiyattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi
३. उप्पलहत्थियत्थेरअपदानं • 3. Uppalahatthiyattheraapadānaṃ
४. पदपूजकत्थेरअपदानं • 4. Padapūjakattheraapadānaṃ
५. मुट्ठिपुप्फियत्थेरअपदानं • 5. Muṭṭhipupphiyattheraapadānaṃ
