| Library / Tipiṭaka / ติปิฎก • Tipiṭaka / อปทาน-อฎฺฐกถา • Apadāna-aṭṭhakathā |
๕. มุฎฺฐิปุปฺผิยเตฺถรอปทานวณฺณนา
5. Muṭṭhipupphiyattheraapadānavaṇṇanā
สุทสฺสโน นาม นาเมนาติอาทิกํ อายสฺมโต มุฎฺฐิปุปฺผิยเตฺถรสฺส อปทานํฯ อยมฺปิ ปุริมพุเทฺธสุ กตาธิกาโร ตตฺถ ตตฺถ ภเว วิวฎฺฎูปนิสฺสยานิ ปุญฺญานิ อุปจินโนฺต ปทุมุตฺตรสฺส ภควโต กาเล มาลาการกุเล นิพฺพโตฺต วุทฺธิมนฺวาย สกสิเปฺป นิปฺผตฺติํ ปโตฺต เอกทิวสํ ภควนฺตํ ทิสฺวา ปสนฺนมานโส ชาติสุมนปุปฺผานิ อุโภหิ หเตฺถหิ ภควโต ปาทมูเล โอกิริตฺวา ปูเชสิฯ โส เตน กุสลสมฺภาเรน เทวมนุเสฺสสุ สํสรโนฺต อุโภ สมฺปตฺติโย อนุภวิตฺวา อิมสฺมิํ พุทฺธุปฺปาเท กุลเคเห นิพฺพโตฺต วุทฺธิปฺปโตฺต ปุพฺพวาสนาวเสน สตฺถริ ปสีทิตฺวา ปพฺพชิโต นจิรเสฺสว อรหา อโหสิฯ
Sudassanonāma nāmenātiādikaṃ āyasmato muṭṭhipupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle mālākārakule nibbatto vuddhimanvāya sakasippe nipphattiṃ patto ekadivasaṃ bhagavantaṃ disvā pasannamānaso jātisumanapupphāni ubhohi hatthehi bhagavato pādamūle okiritvā pūjesi. So tena kusalasambhārena devamanussesu saṃsaranto ubho sampattiyo anubhavitvā imasmiṃ buddhuppāde kulagehe nibbatto vuddhippatto pubbavāsanāvasena satthari pasīditvā pabbajito nacirasseva arahā ahosi.
๑๔-๒๕. โส อปรภาเค อตฺตโน ปุพฺพกมฺมํ อนุสฺสริตฺวา โสมนสฺสชาโต ปุพฺพจริตาปทานํ ปกาเสโนฺต สุทสฺสโน นาม นาเมนาติอาทิมาหฯ ตตฺถ สุทสฺสโนติ อาโรหปริณาหรูปสณฺฐานโยพฺพญฺญโสภเนน สุนฺทโร ทสฺสโนติ สุทสฺสโน, นาเมน สุทสฺสโน นาม มาลากาโร หุตฺวา ชาติสุมนปุเปฺผหิ ปทุมุตฺตรํ ภควนฺตํ ปูเชสินฺติ อโตฺถฯ เสสํ สพฺพตฺถ อุตฺตานเมวาติฯ
14-25. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento sudassano nāma nāmenātiādimāha. Tattha sudassanoti ārohapariṇāharūpasaṇṭhānayobbaññasobhanena sundaro dassanoti sudassano, nāmena sudassano nāma mālākāro hutvā jātisumanapupphehi padumuttaraṃ bhagavantaṃ pūjesinti attho. Sesaṃ sabbattha uttānamevāti.
มุฎฺฐิปุปฺผิยเตฺถรอปทานวณฺณนา สมตฺตาฯ
Muṭṭhipupphiyattheraapadānavaṇṇanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / อปทานปาฬิ • Apadānapāḷi
๓. อุปฺปลหตฺถิยเตฺถรอปทานํ • 3. Uppalahatthiyattheraapadānaṃ
๔. ปทปูชกเตฺถรอปทานํ • 4. Padapūjakattheraapadānaṃ
๕. มุฎฺฐิปุปฺผิยเตฺถรอปทานํ • 5. Muṭṭhipupphiyattheraapadānaṃ
