| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๗. สตฺตรสมวโคฺค
17. Sattarasamavaggo
(๑๗๕) ๑๐. น วตฺตพฺพํ พุทฺธสฺสทินฺนํ มหปฺผลนฺติกถา
(175) 10. Na vattabbaṃ buddhassadinnaṃ mahapphalantikathā
๗๙๙. น วตฺตพฺพํ – ‘‘พุทฺธสฺส ทินฺนํ มหปฺผล’’นฺติ? อามนฺตาฯ นนุ ภควา ทฺวิปทานํ อโคฺค, ทฺวิปทานํ เสโฎฺฐ, ทฺวิปทานํ ปโมโกฺข, ทฺวิปทานํ อุตฺตโม, ทฺวิปทานํ ปวโร อสโม อสมสโม อปฺปฎิสโม อปฺปฎิภาโค อปฺปฎิปุคฺคโลติ? อามนฺตาฯ หญฺจิ ภควา ทฺวิปทานํ อโคฺค, ทฺวิปทานํ เสโฎฺฐ, ทฺวิปทานํ ปโมโกฺข, ทฺวิปทานํ อุตฺตโม, ทฺวิปทานํ ปวโร อสโม อสมสโม อปฺปฎิสโม อปฺปฎิภาโค อปฺปฎิปุคฺคโล, เตน วต เร วตฺตเพฺพ – ‘‘พุทฺธสฺส ทินฺนํ มหปฺผล’’นฺติฯ
799. Na vattabbaṃ – ‘‘buddhassa dinnaṃ mahapphala’’nti? Āmantā. Nanu bhagavā dvipadānaṃ aggo, dvipadānaṃ seṭṭho, dvipadānaṃ pamokkho, dvipadānaṃ uttamo, dvipadānaṃ pavaro asamo asamasamo appaṭisamo appaṭibhāgo appaṭipuggaloti? Āmantā. Hañci bhagavā dvipadānaṃ aggo, dvipadānaṃ seṭṭho, dvipadānaṃ pamokkho, dvipadānaṃ uttamo, dvipadānaṃ pavaro asamo asamasamo appaṭisamo appaṭibhāgo appaṭipuggalo, tena vata re vattabbe – ‘‘buddhassa dinnaṃ mahapphala’’nti.
น วตฺตพฺพํ – ‘‘พุทฺธสฺส ทินฺนํ มหปฺผล’’นฺติ? อามนฺตาฯ อตฺถิ โกจิ พุเทฺธน สมสโม – สีเลน สมาธินา ปญฺญายาติ? นตฺถิ ฯ หญฺจิ นตฺถิ โกจิ พุเทฺธน สมสโม – สีเลน สมาธินา ปญฺญาย, เตน วต เร วตฺตเพฺพ – ‘‘พุทฺธสฺส ทินฺนํ มหปฺผล’’นฺติฯ
Na vattabbaṃ – ‘‘buddhassa dinnaṃ mahapphala’’nti? Āmantā. Atthi koci buddhena samasamo – sīlena samādhinā paññāyāti? Natthi . Hañci natthi koci buddhena samasamo – sīlena samādhinā paññāya, tena vata re vattabbe – ‘‘buddhassa dinnaṃ mahapphala’’nti.
น วตฺตพฺพํ – ‘‘พุทฺธสฺส ทินฺนํ มหปฺผล’’นฺติ? อามนฺตาฯ นนุ วุตฺตํ ภควตา –
Na vattabbaṃ – ‘‘buddhassa dinnaṃ mahapphala’’nti? Āmantā. Nanu vuttaṃ bhagavatā –
‘‘นยิมสฺมิํ วา โลเก ปรสฺมิํ วา ปน,
‘‘Nayimasmiṃ vā loke parasmiṃ vā pana,
พุเทฺธน เสโฎฺฐ จ สโม จ วิชฺชติ;
Buddhena seṭṭho ca samo ca vijjati;
ยมาหุเนยฺยานํ อคฺคตํ คโต,
Yamāhuneyyānaṃ aggataṃ gato,
อเตฺถว สุตฺตโนฺตติ? อามนฺตาฯ เตน หิ พุทฺธสฺส ทินฺนํ มหปฺผลนฺติฯ
Attheva suttantoti? Āmantā. Tena hi buddhassa dinnaṃ mahapphalanti.
น วตฺตพฺพํ พุทฺธสฺส ทินฺนํ มหปฺผลนฺติกถา นิฎฺฐิตาฯ
Na vattabbaṃ buddhassa dinnaṃ mahapphalantikathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๑๐. น วตฺตพฺพํ พุทฺธสฺส ทินฺนํ มหปฺผลนฺติกถาวณฺณนา • 10. Na vattabbaṃ buddhassa dinnaṃ mahapphalantikathāvaṇṇanā
