| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๗. สตฺตรสมวโคฺค
17. Sattarasamavaggo
(๑๗๓) ๘. น วตฺตพฺพํ สโงฺฆ ภุญฺชตีติกถา
(173) 8. Na vattabbaṃ saṅgho bhuñjatītikathā
๗๙๕. น วตฺตพฺพํ – ‘‘สโงฺฆ ภุญฺชติ ปิวติ ขาทติ สายตี’’ติ? อามนฺตาฯ นนุ อตฺถิ เกจิ สงฺฆภตฺตานิ กโรนฺติ, อุเทฺทสภตฺตานิ กโรนฺติ, ยาคุปานานิ กโรนฺตีติ? อามนฺตาฯ หญฺจิ อตฺถิ เกจิ สงฺฆภตฺตานิ กโรนฺติ, อุเทฺทสภตฺตานิ กโรนฺติ, ยาคุปานานิ กโรนฺติ, เตน วต เร วตฺตเพฺพ – ‘‘สโงฺฆ ภุญฺชติ ปิวติ ขาทติ สายตี’’ติฯ
795. Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu atthi keci saṅghabhattāni karonti, uddesabhattāni karonti, yāgupānāni karontīti? Āmantā. Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe – ‘‘saṅgho bhuñjati pivati khādati sāyatī’’ti.
น วตฺตพฺพํ – ‘‘สโงฺฆ ภุญฺชติ ปิวติ ขาทติ สายตี’’ติ? อามนฺตาฯ นนุ วุตฺตํ ภควตา – ‘‘คณโภชนํ ปรมฺปรโภชนํ อติริตฺตโภชนํ อนติริตฺตโภชน’’นฺติ? อามนฺตาฯ หญฺจิ วุตฺตํ ภควตา – ‘‘คณโภชนํ ปรมฺปรโภชนํ อติริตฺตโภชนํ อนติริตฺตโภชนํ’’, เตน วต เร วตฺตเพฺพ – ‘‘สโงฺฆ ภุญฺชติ ปิวติ ขาทติ สายตี’’ติฯ
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojana’’nti? Āmantā. Hañci vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojanaṃ’’, tena vata re vattabbe – ‘‘saṅgho bhuñjati pivati khādati sāyatī’’ti.
น วตฺตพฺพํ – ‘‘สโงฺฆ ภุญฺชติ ปิวติ ขาทติ สายตี’’ติ? อามนฺตาฯ นนุ อฎฺฐ ปานานิ วุตฺตานิ ภควตา – อมฺพปานํ, ชมฺพุปานํ , โจจปานํ, โมจปานํ, มธุกปานํ, 1 มุทฺทิกปานํ, สาลุกปานํ, ผารุสกปานนฺติ? อามนฺตาฯ หญฺจิ อฎฺฐ ปานานิ วุตฺตานิ ภควตา – อมฺพปานํ, ชมฺพุปานํ, โจจปานํ, โมจปานํ, มธุกปานํ, มุทฺทิกปานํ , สาลุกปานํ, ผารุสกปานํ, เตน วต เร วตฺตเพฺพ – ‘‘สโงฺฆ ภุญฺชติ ปิวติ ขาทติ สายตี’’ติฯ
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu aṭṭha pānāni vuttāni bhagavatā – ambapānaṃ, jambupānaṃ , cocapānaṃ, mocapānaṃ, madhukapānaṃ, 2 muddikapānaṃ, sālukapānaṃ, phārusakapānanti? Āmantā. Hañci aṭṭha pānāni vuttāni bhagavatā – ambapānaṃ, jambupānaṃ, cocapānaṃ, mocapānaṃ, madhukapānaṃ, muddikapānaṃ , sālukapānaṃ, phārusakapānaṃ, tena vata re vattabbe – ‘‘saṅgho bhuñjati pivati khādati sāyatī’’ti.
๗๙๖. สโงฺฆ ภุญฺชติ ปิวติ ขาทติ สายตีติ? อามนฺตาฯ มโคฺค ภุญฺชติ ปิวติ ขาทติ สายติ, ผลํ ภุญฺชติ ปิวติ ขาทติ สายตีติ? น เหวํ วตฺตเพฺพ…เป.…ฯ
796. Saṅgho bhuñjati pivati khādati sāyatīti? Āmantā. Maggo bhuñjati pivati khādati sāyati, phalaṃ bhuñjati pivati khādati sāyatīti? Na hevaṃ vattabbe…pe….
น วตฺตพฺพํ สโงฺฆ ภุญฺชตีติกถา นิฎฺฐิตาฯ
Na vattabbaṃ saṅgho bhuñjatītikathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๘. น วตฺตพฺพํ สโงฺฆ ภุญฺชตีติกถาวณฺณนา • 8. Na vattabbaṃ saṅgho bhuñjatītikathāvaṇṇanā
