| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၇. သတ္တရသမဝဂ္ဂော
17. Sattarasamavaggo
(၁၇၃) ၈. န ဝတ္တဗ္ဗံ သင္ဃော ဘုဉ္ဇတီတိကထာ
(173) 8. Na vattabbaṃ saṅgho bhuñjatītikathā
၇၉၅. န ဝတ္တဗ္ဗံ – ‘‘သင္ဃော ဘုဉ္ဇတိ ပိဝတိ ခာဒတိ သာယတီ’’တိ? အာမန္တာ။ နနု အတ္ထိ ကေစိ သင္ဃဘတ္တာနိ ကရောန္တိ, ဥဒ္ဒေသဘတ္တာနိ ကရောန္တိ, ယာဂုပာနာနိ ကရောန္တီတိ? အာမန္တာ။ ဟဉ္စိ အတ္ထိ ကေစိ သင္ဃဘတ္တာနိ ကရောန္တိ, ဥဒ္ဒေသဘတ္တာနိ ကရောန္တိ, ယာဂုပာနာနိ ကရောန္တိ, တေန ဝတ ရေ ဝတ္တဗ္ဗေ – ‘‘သင္ဃော ဘုဉ္ဇတိ ပိဝတိ ခာဒတိ သာယတီ’’တိ။
795. Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu atthi keci saṅghabhattāni karonti, uddesabhattāni karonti, yāgupānāni karontīti? Āmantā. Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe – ‘‘saṅgho bhuñjati pivati khādati sāyatī’’ti.
န ဝတ္တဗ္ဗံ – ‘‘သင္ဃော ဘုဉ္ဇတိ ပိဝတိ ခာဒတိ သာယတီ’’တိ? အာမန္တာ။ နနု ဝုတ္တံ ဘဂဝတာ – ‘‘ဂဏဘောဇနံ ပရမ္ပရဘောဇနံ အတိရိတ္တဘောဇနံ အနတိရိတ္တဘောဇန’’န္တိ? အာမန္တာ။ ဟဉ္စိ ဝုတ္တံ ဘဂဝတာ – ‘‘ဂဏဘောဇနံ ပရမ္ပရဘောဇနံ အတိရိတ္တဘောဇနံ အနတိရိတ္တဘောဇနံ’’, တေန ဝတ ရေ ဝတ္တဗ္ဗေ – ‘‘သင္ဃော ဘုဉ္ဇတိ ပိဝတိ ခာဒတိ သာယတီ’’တိ။
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojana’’nti? Āmantā. Hañci vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojanaṃ’’, tena vata re vattabbe – ‘‘saṅgho bhuñjati pivati khādati sāyatī’’ti.
န ဝတ္တဗ္ဗံ – ‘‘သင္ဃော ဘုဉ္ဇတိ ပိဝတိ ခာဒတိ သာယတီ’’တိ? အာမန္တာ။ နနု အဋ္ဌ ပာနာနိ ဝုတ္တာနိ ဘဂဝတာ – အမ္ဗပာနံ, ဇမ္ဗုပာနံ , စောစပာနံ, မောစပာနံ, မဓုကပာနံ, 1 မုဒ္ဒိကပာနံ, သာလုကပာနံ, ဖာရုသကပာနန္တိ? အာမန္တာ။ ဟဉ္စိ အဋ္ဌ ပာနာနိ ဝုတ္တာနိ ဘဂဝတာ – အမ္ဗပာနံ, ဇမ္ဗုပာနံ, စောစပာနံ, မောစပာနံ, မဓုကပာနံ, မုဒ္ဒိကပာနံ , သာလုကပာနံ, ဖာရုသကပာနံ, တေန ဝတ ရေ ဝတ္တဗ္ဗေ – ‘‘သင္ဃော ဘုဉ္ဇတိ ပိဝတိ ခာဒတိ သာယတီ’’တိ။
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu aṭṭha pānāni vuttāni bhagavatā – ambapānaṃ, jambupānaṃ , cocapānaṃ, mocapānaṃ, madhukapānaṃ, 2 muddikapānaṃ, sālukapānaṃ, phārusakapānanti? Āmantā. Hañci aṭṭha pānāni vuttāni bhagavatā – ambapānaṃ, jambupānaṃ, cocapānaṃ, mocapānaṃ, madhukapānaṃ, muddikapānaṃ , sālukapānaṃ, phārusakapānaṃ, tena vata re vattabbe – ‘‘saṅgho bhuñjati pivati khādati sāyatī’’ti.
၇၉၆. သင္ဃော ဘုဉ္ဇတိ ပိဝတိ ခာဒတိ သာယတီတိ? အာမန္တာ။ မဂ္ဂော ဘုဉ္ဇတိ ပိဝတိ ခာဒတိ သာယတိ, ဖလံ ဘုဉ္ဇတိ ပိဝတိ ခာဒတိ သာယတီတိ? န ဟေဝံ ဝတ္တဗ္ဗေ။ပေ.။။
796. Saṅgho bhuñjati pivati khādati sāyatīti? Āmantā. Maggo bhuñjati pivati khādati sāyati, phalaṃ bhuñjati pivati khādati sāyatīti? Na hevaṃ vattabbe…pe….
န ဝတ္တဗ္ဗံ သင္ဃော ဘုဉ္ဇတီတိကထာ နိဋ္ဌိတာ။
Na vattabbaṃ saṅgho bhuñjatītikathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. န ဝတ္တဗ္ဗံ သင္ဃော ဘုဉ္ဇတီတိကထာဝဏ္ဏနာ • 8. Na vattabbaṃ saṅgho bhuñjatītikathāvaṇṇanā
