| Library / Tipiṭaka / ติปิฎก • Tipiṭaka / ปญฺจปกรณ-อฎฺฐกถา • Pañcapakaraṇa-aṭṭhakathā |
๘. น วตฺตพฺพํ สโงฺฆ ภุญฺชตีติกถาวณฺณนา
8. Na vattabbaṃ saṅgho bhuñjatītikathāvaṇṇanā
๗๙๕-๗๙๖. อิทานิ น วตฺตพฺพํ สโงฺฆ ภุญฺชตีติกถา นาม โหติฯ ตตฺราปิ ‘‘มคฺคผลาเนว สโงฺฆ นาม, น จ ตานิ กิญฺจิ ภุญฺชนฺติ, ตสฺมา น วตฺตพฺพํ สโงฺฆ ภุญฺชติ, ปิวติ, ขาทติ, สายตี’’ติ เยสํ ลทฺธิ, เสยฺยถาปิ เตสํเยว; เต สนฺธาย ปุจฺฉา สกวาทิสฺส, ปฎิญฺญา อิตรสฺสฯ อถ นํ ‘‘ยทิ สโงฺฆ น ภุเญฺชยฺย, สงฺฆภตฺตาทิกรณํ นิรตฺถกํ ภเวยฺยา’’ติ โจเทตุํ นนุ อตฺถิ เกจิ สงฺฆภตฺตานิ กโรนฺตีติอาทิมาหฯ คณโภชนนฺติอาทิ ‘‘ยทิ สโงฺฆ น ภุเญฺชยฺย, กสฺส คณโภชนาทีนิ สิยุ’’นฺติ โจทนตฺถํ วุตฺตํฯ อฎฺฐ ปานานีติ อิทมฺปิ ‘‘ยทิ สโงฺฆ น ปิเวยฺย, กเสฺสตานิ ปานานิ สตฺถา อนุชาเนยฺยา’’ติ โจทนตฺถํ วุตฺตํฯ เสสมิธาปิ เหฎฺฐา วุตฺตนเยเนว เวทิตพฺพนฺติฯ
795-796. Idāni na vattabbaṃ saṅgho bhuñjatītikathā nāma hoti. Tatrāpi ‘‘maggaphalāneva saṅgho nāma, na ca tāni kiñci bhuñjanti, tasmā na vattabbaṃ saṅgho bhuñjati, pivati, khādati, sāyatī’’ti yesaṃ laddhi, seyyathāpi tesaṃyeva; te sandhāya pucchā sakavādissa, paṭiññā itarassa. Atha naṃ ‘‘yadi saṅgho na bhuñjeyya, saṅghabhattādikaraṇaṃ niratthakaṃ bhaveyyā’’ti codetuṃ nanu atthi keci saṅghabhattāni karontītiādimāha. Gaṇabhojanantiādi ‘‘yadi saṅgho na bhuñjeyya, kassa gaṇabhojanādīni siyu’’nti codanatthaṃ vuttaṃ. Aṭṭha pānānīti idampi ‘‘yadi saṅgho na piveyya, kassetāni pānāni satthā anujāneyyā’’ti codanatthaṃ vuttaṃ. Sesamidhāpi heṭṭhā vuttanayeneva veditabbanti.
น วตฺตพฺพํ สโงฺฆ ภุญฺชตีติกถาวณฺณนาฯ
Na vattabbaṃ saṅgho bhuñjatītikathāvaṇṇanā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / กถาวตฺถุปาฬิ • Kathāvatthupāḷi / (๑๗๓) ๘. น วตฺตพฺพํ สโงฺฆ ภุญฺชตีติกถา • (173) 8. Na vattabbaṃ saṅgho bhuñjatītikathā
