| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৭. সত্তরসমৰগ্গো
17. Sattarasamavaggo
(১৭১) ৬. ন ৰত্তব্বং সঙ্ঘো দক্খিণং পটিগ্গণ্হাতিকথা
(171) 6. Na vattabbaṃ saṅgho dakkhiṇaṃ paṭiggaṇhātikathā
৭৯১. ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা। ননু সঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সাতি? আমন্তা। হঞ্চি সঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি।
791. Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti? Āmantā. Hañci saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা। ননু চত্তারো পুরিসযুগা অট্ঠপুরিসপুগ্গলা দক্খিণেয্যা ৰুত্তা ভগৰতাতি? আমন্তা। হঞ্চি চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতা, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি।
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu cattāro purisayugā aṭṭhapurisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা। ননু অত্থি কেচি সঙ্ঘস্স দানং দেন্তীতি? আমন্তা। হঞ্চি অত্থি কেচি সঙ্ঘস্স দানং দেন্তি, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি। ননু অত্থি কেচি সঙ্ঘস্স চীৰরং দেন্তি…পে॰… পিণ্ডপাতং দেন্তি… সেনাসনং দেন্তি… গিলানপচ্চযভেসজ্জপরিক্খারং দেন্তি… খাদনীযং দেন্তি… ভোজনীযং দেন্তি…পে॰… পানীযং দেন্তীতি? আমন্তা। হঞ্চি অত্থি কেচি সঙ্ঘস্স পানীযং দেন্তি, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি।
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu atthi keci saṅghassa dānaṃ dentīti? Āmantā. Hañci atthi keci saṅghassa dānaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti. Nanu atthi keci saṅghassa cīvaraṃ denti…pe… piṇḍapātaṃ denti… senāsanaṃ denti… gilānapaccayabhesajjaparikkhāraṃ denti… khādanīyaṃ denti… bhojanīyaṃ denti…pe… pānīyaṃ dentīti? Āmantā. Hañci atthi keci saṅghassa pānīyaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা। ননু ৰুত্তং ভগৰতা –
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu vuttaṃ bhagavatā –
‘‘আহুতিং জাতৰেদোৰ, মহামেঘংৰ মেদনী।
‘‘Āhutiṃ jātavedova, mahāmeghaṃva medanī;
সঙ্ঘো সমাধিসম্পন্নো, পটিগ্গণ্হাতি দক্খিণ’’ন্তি॥
Saṅgho samādhisampanno, paṭiggaṇhāti dakkhiṇa’’nti.
অত্থেৰ সুত্তন্তোতি? আমন্তা। তেন হি সঙ্ঘো দক্খিণং পটিগ্গণ্হাতীতি।
Attheva suttantoti? Āmantā. Tena hi saṅgho dakkhiṇaṃ paṭiggaṇhātīti.
৭৯২. সঙ্ঘো দক্খিণং পটিগ্গণ্হাতীতি? আমন্তা। মগ্গো পটিগ্গণ্হাতি, ফলং পটিগ্গণ্হাতীতি? ন হেৰং ৰত্তব্বে…পে॰…।
792. Saṅgho dakkhiṇaṃ paṭiggaṇhātīti? Āmantā. Maggo paṭiggaṇhāti, phalaṃ paṭiggaṇhātīti? Na hevaṃ vattabbe…pe….
ন ৰত্তব্বং সঙ্ঘো দক্খিণং পটিগ্গণ্হাতীতিকথা নিট্ঠিতা।
Na vattabbaṃ saṅgho dakkhiṇaṃ paṭiggaṇhātītikathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৬. ন ৰত্তব্বং সঙ্ঘো দক্খিণং পটিগ্গণ্হাতীতিকথাৰণ্ণনা • 6. Na vattabbaṃ saṅgho dakkhiṇaṃ paṭiggaṇhātītikathāvaṇṇanā
