| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๗. สตฺตรสมวโคฺค
17. Sattarasamavaggo
(๑๗๑) ๖. น วตฺตพฺพํ สโงฺฆ ทกฺขิณํ ปฎิคฺคณฺหาติกถา
(171) 6. Na vattabbaṃ saṅgho dakkhiṇaṃ paṭiggaṇhātikathā
๗๙๑. น วตฺตพฺพํ – ‘‘สโงฺฆ ทกฺขิณํ ปฎิคฺคณฺหาตี’’ติ? อามนฺตาฯ นนุ สโงฺฆ อาหุเนโยฺย ปาหุเนโยฺย ทกฺขิเณโยฺย อญฺชลิกรณีโย อนุตฺตรํ ปุญฺญเกฺขตฺตํ โลกสฺสาติ? อามนฺตาฯ หญฺจิ สโงฺฆ อาหุเนโยฺย ปาหุเนโยฺย ทกฺขิเณโยฺย อญฺชลิกรณีโย อนุตฺตรํ ปุญฺญเกฺขตฺตํ โลกสฺส, เตน วต เร วตฺตเพฺพ – ‘‘สโงฺฆ ทกฺขิณํ ปฎิคฺคณฺหาตี’’ติฯ
791. Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti? Āmantā. Hañci saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
น วตฺตพฺพํ – ‘‘สโงฺฆ ทกฺขิณํ ปฎิคฺคณฺหาตี’’ติ? อามนฺตาฯ นนุ จตฺตาโร ปุริสยุคา อฎฺฐปุริสปุคฺคลา ทกฺขิเณยฺยา วุตฺตา ภควตาติ? อามนฺตาฯ หญฺจิ จตฺตาโร ปุริสยุคา อฎฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตเพฺพ – ‘‘สโงฺฆ ทกฺขิณํ ปฎิคฺคณฺหาตี’’ติฯ
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu cattāro purisayugā aṭṭhapurisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
น วตฺตพฺพํ – ‘‘สโงฺฆ ทกฺขิณํ ปฎิคฺคณฺหาตี’’ติ? อามนฺตาฯ นนุ อตฺถิ เกจิ สงฺฆสฺส ทานํ เทนฺตีติ? อามนฺตาฯ หญฺจิ อตฺถิ เกจิ สงฺฆสฺส ทานํ เทนฺติ, เตน วต เร วตฺตเพฺพ – ‘‘สโงฺฆ ทกฺขิณํ ปฎิคฺคณฺหาตี’’ติฯ นนุ อตฺถิ เกจิ สงฺฆสฺส จีวรํ เทนฺติ…เป.… ปิณฺฑปาตํ เทนฺติ… เสนาสนํ เทนฺติ… คิลานปจฺจยเภสชฺชปริกฺขารํ เทนฺติ… ขาทนียํ เทนฺติ… โภชนียํ เทนฺติ…เป.… ปานียํ เทนฺตีติ? อามนฺตาฯ หญฺจิ อตฺถิ เกจิ สงฺฆสฺส ปานียํ เทนฺติ, เตน วต เร วตฺตเพฺพ – ‘‘สโงฺฆ ทกฺขิณํ ปฎิคฺคณฺหาตี’’ติฯ
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu atthi keci saṅghassa dānaṃ dentīti? Āmantā. Hañci atthi keci saṅghassa dānaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti. Nanu atthi keci saṅghassa cīvaraṃ denti…pe… piṇḍapātaṃ denti… senāsanaṃ denti… gilānapaccayabhesajjaparikkhāraṃ denti… khādanīyaṃ denti… bhojanīyaṃ denti…pe… pānīyaṃ dentīti? Āmantā. Hañci atthi keci saṅghassa pānīyaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
น วตฺตพฺพํ – ‘‘สโงฺฆ ทกฺขิณํ ปฎิคฺคณฺหาตี’’ติ? อามนฺตาฯ นนุ วุตฺตํ ภควตา –
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu vuttaṃ bhagavatā –
‘‘อาหุติํ ชาตเวโทว, มหาเมฆํว เมทนี;
‘‘Āhutiṃ jātavedova, mahāmeghaṃva medanī;
สโงฺฆ สมาธิสมฺปโนฺน, ปฎิคฺคณฺหาติ ทกฺขิณ’’นฺติฯ
Saṅgho samādhisampanno, paṭiggaṇhāti dakkhiṇa’’nti.
อเตฺถว สุตฺตโนฺตติ? อามนฺตาฯ เตน หิ สโงฺฆ ทกฺขิณํ ปฎิคฺคณฺหาตีติฯ
Attheva suttantoti? Āmantā. Tena hi saṅgho dakkhiṇaṃ paṭiggaṇhātīti.
๗๙๒. สโงฺฆ ทกฺขิณํ ปฎิคฺคณฺหาตีติ? อามนฺตาฯ มโคฺค ปฎิคฺคณฺหาติ, ผลํ ปฎิคฺคณฺหาตีติ? น เหวํ วตฺตเพฺพ…เป.…ฯ
792. Saṅgho dakkhiṇaṃ paṭiggaṇhātīti? Āmantā. Maggo paṭiggaṇhāti, phalaṃ paṭiggaṇhātīti? Na hevaṃ vattabbe…pe….
น วตฺตพฺพํ สโงฺฆ ทกฺขิณํ ปฎิคฺคณฺหาตีติกถา นิฎฺฐิตาฯ
Na vattabbaṃ saṅgho dakkhiṇaṃ paṭiggaṇhātītikathā niṭṭhitā.
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๖. น วตฺตพฺพํ สโงฺฆ ทกฺขิณํ ปฎิคฺคณฺหาตีติกถาวณฺณนา • 6. Na vattabbaṃ saṅgho dakkhiṇaṃ paṭiggaṇhātītikathāvaṇṇanā
