| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൭. സത്തരസമവഗ്ഗോ
17. Sattarasamavaggo
(൧൭൧) ൬. ന വത്തബ്ബം സങ്ഘോ ദക്ഖിണം പടിഗ്ഗണ്ഹാതികഥാ
(171) 6. Na vattabbaṃ saṅgho dakkhiṇaṃ paṭiggaṇhātikathā
൭൯൧. ന വത്തബ്ബം – ‘‘സങ്ഘോ ദക്ഖിണം പടിഗ്ഗണ്ഹാതീ’’തി? ആമന്താ. നനു സങ്ഘോ ആഹുനേയ്യോ പാഹുനേയ്യോ ദക്ഖിണേയ്യോ അഞ്ജലികരണീയോ അനുത്തരം പുഞ്ഞക്ഖേത്തം ലോകസ്സാതി? ആമന്താ. ഹഞ്ചി സങ്ഘോ ആഹുനേയ്യോ പാഹുനേയ്യോ ദക്ഖിണേയ്യോ അഞ്ജലികരണീയോ അനുത്തരം പുഞ്ഞക്ഖേത്തം ലോകസ്സ, തേന വത രേ വത്തബ്ബേ – ‘‘സങ്ഘോ ദക്ഖിണം പടിഗ്ഗണ്ഹാതീ’’തി.
791. Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti? Āmantā. Hañci saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ന വത്തബ്ബം – ‘‘സങ്ഘോ ദക്ഖിണം പടിഗ്ഗണ്ഹാതീ’’തി? ആമന്താ. നനു ചത്താരോ പുരിസയുഗാ അട്ഠപുരിസപുഗ്ഗലാ ദക്ഖിണേയ്യാ വുത്താ ഭഗവതാതി? ആമന്താ. ഹഞ്ചി ചത്താരോ പുരിസയുഗാ അട്ഠ പുരിസപുഗ്ഗലാ ദക്ഖിണേയ്യാ വുത്താ ഭഗവതാ, തേന വത രേ വത്തബ്ബേ – ‘‘സങ്ഘോ ദക്ഖിണം പടിഗ്ഗണ്ഹാതീ’’തി.
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu cattāro purisayugā aṭṭhapurisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ന വത്തബ്ബം – ‘‘സങ്ഘോ ദക്ഖിണം പടിഗ്ഗണ്ഹാതീ’’തി? ആമന്താ. നനു അത്ഥി കേചി സങ്ഘസ്സ ദാനം ദേന്തീതി? ആമന്താ. ഹഞ്ചി അത്ഥി കേചി സങ്ഘസ്സ ദാനം ദേന്തി, തേന വത രേ വത്തബ്ബേ – ‘‘സങ്ഘോ ദക്ഖിണം പടിഗ്ഗണ്ഹാതീ’’തി. നനു അത്ഥി കേചി സങ്ഘസ്സ ചീവരം ദേന്തി…പേ॰… പിണ്ഡപാതം ദേന്തി… സേനാസനം ദേന്തി… ഗിലാനപച്ചയഭേസജ്ജപരിക്ഖാരം ദേന്തി… ഖാദനീയം ദേന്തി… ഭോജനീയം ദേന്തി…പേ॰… പാനീയം ദേന്തീതി? ആമന്താ. ഹഞ്ചി അത്ഥി കേചി സങ്ഘസ്സ പാനീയം ദേന്തി, തേന വത രേ വത്തബ്ബേ – ‘‘സങ്ഘോ ദക്ഖിണം പടിഗ്ഗണ്ഹാതീ’’തി.
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu atthi keci saṅghassa dānaṃ dentīti? Āmantā. Hañci atthi keci saṅghassa dānaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti. Nanu atthi keci saṅghassa cīvaraṃ denti…pe… piṇḍapātaṃ denti… senāsanaṃ denti… gilānapaccayabhesajjaparikkhāraṃ denti… khādanīyaṃ denti… bhojanīyaṃ denti…pe… pānīyaṃ dentīti? Āmantā. Hañci atthi keci saṅghassa pānīyaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ന വത്തബ്ബം – ‘‘സങ്ഘോ ദക്ഖിണം പടിഗ്ഗണ്ഹാതീ’’തി? ആമന്താ. നനു വുത്തം ഭഗവതാ –
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu vuttaṃ bhagavatā –
‘‘ആഹുതിം ജാതവേദോവ, മഹാമേഘംവ മേദനീ;
‘‘Āhutiṃ jātavedova, mahāmeghaṃva medanī;
സങ്ഘോ സമാധിസമ്പന്നോ, പടിഗ്ഗണ്ഹാതി ദക്ഖിണ’’ന്തി.
Saṅgho samādhisampanno, paṭiggaṇhāti dakkhiṇa’’nti.
അത്ഥേവ സുത്തന്തോതി? ആമന്താ. തേന ഹി സങ്ഘോ ദക്ഖിണം പടിഗ്ഗണ്ഹാതീതി.
Attheva suttantoti? Āmantā. Tena hi saṅgho dakkhiṇaṃ paṭiggaṇhātīti.
൭൯൨. സങ്ഘോ ദക്ഖിണം പടിഗ്ഗണ്ഹാതീതി? ആമന്താ. മഗ്ഗോ പടിഗ്ഗണ്ഹാതി, ഫലം പടിഗ്ഗണ്ഹാതീതി? ന ഹേവം വത്തബ്ബേ…പേ॰….
792. Saṅgho dakkhiṇaṃ paṭiggaṇhātīti? Āmantā. Maggo paṭiggaṇhāti, phalaṃ paṭiggaṇhātīti? Na hevaṃ vattabbe…pe….
ന വത്തബ്ബം സങ്ഘോ ദക്ഖിണം പടിഗ്ഗണ്ഹാതീതികഥാ നിട്ഠിതാ.
Na vattabbaṃ saṅgho dakkhiṇaṃ paṭiggaṇhātītikathā niṭṭhitā.
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൬. ന വത്തബ്ബം സങ്ഘോ ദക്ഖിണം പടിഗ്ഗണ്ഹാതീതികഥാവണ്ണനാ • 6. Na vattabbaṃ saṅgho dakkhiṇaṃ paṭiggaṇhātītikathāvaṇṇanā
