| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
6. ந வத்தப்³ப³ங் ஸங்கோ⁴ த³க்கி²ணங் படிக்³க³ண்ஹாதீதிகதா²வண்ணனா
6. Na vattabbaṃ saṅgho dakkhiṇaṃ paṭiggaṇhātītikathāvaṇṇanā
791-792. இதா³னி ந வத்தப்³ப³ங் ஸங்கோ⁴ த³க்கி²ணங் படிக்³க³ண்ஹாதீதிகதா² நாம ஹோதி. தத்த² ‘‘பரமத்த²தோ மக்³க³ப²லானேவ ஸங்கோ⁴, மக்³க³ப²லேஹி அஞ்ஞோ ஸங்கோ⁴ நாம நத்தி², மக்³க³ப²லானி ச ந கிஞ்சி படிக்³க³ண்ஹந்தி, தஸ்மா ந வத்தப்³ப³ங் ஸங்கோ⁴ த³க்கி²ணங் படிக்³க³ண்ஹாதீ’’தி யேஸங் லத்³தி⁴, ஸெய்யதா²பி ஏதரஹி மஹாபுஞ்ஞவாதீ³ஸங்கா²தானங் வேதுல்லகானங்; தே ஸந்தா⁴ய ந வத்தப்³ப³ந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ ஸங்கோ⁴ ந படிக்³க³ண்ஹெய்ய, ந நங் ஸத்தா² ஆஹுனெய்யாதிஆதீ³ஹி தோ²மெய்யா’’தி சோதே³துங் நனு ஸங்கோ⁴ ஆஹுனெய்யோதிஆதி³மாஹ. ஸங்க⁴ஸ்ஸ தா³னங் தெ³ந்தீதி ‘‘யே தே ஸங்க⁴ஸ்ஸ தெ³ந்தி, தே படிக்³கா³ஹகேஸு அஸதி கஸ்ஸ த³தெ³ய்யு’’ந்தி சோத³னத்த²ங் வுத்தங். ஆஹுதிங் ஜாதவேதோ³ வாதி ஸுத்தங் பரஸமயதோ ஆக³தங். தத்த² மஹாமேக⁴ந்தி மேக⁴வுட்டி²ங் ஸந்தா⁴ய வுத்தங். வுட்டி²ஞ்ஹி மேத³னீ படிக்³க³ண்ஹாதி, ந மேக⁴மேவ. மக்³கோ³ படிக்³க³ண்ஹாதீதி ‘‘மக்³க³ப²லானி ஸங்கோ⁴’’தி லத்³தி⁴யா வத³தி, ந ச மக்³க³ப²லானேவ ஸங்கோ⁴. மக்³க³ப²லபாதுபா⁴வபரிஸுத்³தே⁴ பன க²ந்தே⁴ உபாதா³ய பஞ்ஞத்தா அட்ட² புக்³க³லா ஸங்கோ⁴, தஸ்மா அஸாத⁴கமேதந்தி.
791-792. Idāni na vattabbaṃ saṅgho dakkhiṇaṃ paṭiggaṇhātītikathā nāma hoti. Tattha ‘‘paramatthato maggaphalāneva saṅgho, maggaphalehi añño saṅgho nāma natthi, maggaphalāni ca na kiñci paṭiggaṇhanti, tasmā na vattabbaṃ saṅgho dakkhiṇaṃ paṭiggaṇhātī’’ti yesaṃ laddhi, seyyathāpi etarahi mahāpuññavādīsaṅkhātānaṃ vetullakānaṃ; te sandhāya na vattabbanti pucchā sakavādissa, paṭiññā itarassa. Atha naṃ ‘‘yadi saṅgho na paṭiggaṇheyya, na naṃ satthā āhuneyyātiādīhi thomeyyā’’ti codetuṃ nanu saṅgho āhuneyyotiādimāha. Saṅghassa dānaṃ dentīti ‘‘ye te saṅghassa denti, te paṭiggāhakesu asati kassa dadeyyu’’nti codanatthaṃ vuttaṃ. Āhutiṃ jātavedo vāti suttaṃ parasamayato āgataṃ. Tattha mahāmeghanti meghavuṭṭhiṃ sandhāya vuttaṃ. Vuṭṭhiñhi medanī paṭiggaṇhāti, na meghameva. Maggo paṭiggaṇhātīti ‘‘maggaphalāni saṅgho’’ti laddhiyā vadati, na ca maggaphalāneva saṅgho. Maggaphalapātubhāvaparisuddhe pana khandhe upādāya paññattā aṭṭha puggalā saṅgho, tasmā asādhakametanti.
ந வத்தப்³ப³ங் ஸங்கோ⁴ த³க்கி²ணங் படிக்³க³ண்ஹாதீதிகதா²வண்ணனா.
Na vattabbaṃ saṅgho dakkhiṇaṃ paṭiggaṇhātītikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (171) 6. ந வத்தப்³ப³ங் ஸங்கோ⁴ த³க்கி²ணங் படிக்³க³ண்ஹாதிகதா² • (171) 6. Na vattabbaṃ saṅgho dakkhiṇaṃ paṭiggaṇhātikathā
