| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
७. न वत्तब्बं सङ्घो दक्खिणं विसोधेतीतिकथावण्णना
7. Na vattabbaṃ saṅgho dakkhiṇaṃ visodhetītikathāvaṇṇanā
७९३-७९४. इदानि न वत्तब्बं सङ्घो दक्खिणं विसोधेतीतिकथा नाम होति। तत्थ ‘‘मग्गफलानेव सङ्घो नाम, न च तानि दक्खिणं विसोधेतुं सक्कोन्ति, तस्मा न वत्तब्बं सङ्घो दक्खिणं विसोधेती’’ति येसं लद्धि, सेय्यथापि तेसञ्ञेव; ते सन्धाय पुच्छा सकवादिस्स, पटिञ्ञा इतरस्स। आहुनेय्योतिआदि ‘‘यदि सङ्घो दक्खिणं विसोधेतुं न सक्कुणेय्य, न नं सत्था एवं थोमेय्या’’ति दस्सनत्थं वुत्तं। विसोधेतीति महप्फलं करोति। सङ्घस्मिञ्हि अप्पं दिन्नं बहु होति, बहु दिन्नं बहुतरं। दक्खिणेय्याति दक्खिणारहा दक्खिणाय अनुच्छविका, दक्खिणं विसोधेतुं समत्थाति अत्थो। दक्खिणं आराधेन्तीति सम्पादेन्ति, अप्पमत्तिकायपि दक्खिणाय महन्तं फलं पापुणन्तीति अत्थो। सेसं हेट्ठा वुत्तनयमेवाति।
793-794. Idāni na vattabbaṃ saṅgho dakkhiṇaṃ visodhetītikathā nāma hoti. Tattha ‘‘maggaphalāneva saṅgho nāma, na ca tāni dakkhiṇaṃ visodhetuṃ sakkonti, tasmā na vattabbaṃ saṅgho dakkhiṇaṃ visodhetī’’ti yesaṃ laddhi, seyyathāpi tesaññeva; te sandhāya pucchā sakavādissa, paṭiññā itarassa. Āhuneyyotiādi ‘‘yadi saṅgho dakkhiṇaṃ visodhetuṃ na sakkuṇeyya, na naṃ satthā evaṃ thomeyyā’’ti dassanatthaṃ vuttaṃ. Visodhetīti mahapphalaṃ karoti. Saṅghasmiñhi appaṃ dinnaṃ bahu hoti, bahu dinnaṃ bahutaraṃ. Dakkhiṇeyyāti dakkhiṇārahā dakkhiṇāya anucchavikā, dakkhiṇaṃ visodhetuṃ samatthāti attho. Dakkhiṇaṃ ārādhentīti sampādenti, appamattikāyapi dakkhiṇāya mahantaṃ phalaṃ pāpuṇantīti attho. Sesaṃ heṭṭhā vuttanayamevāti.
न वत्तब्बं सङ्घो दक्खिणं विसोधेतीतिकथावण्णना।
Na vattabbaṃ saṅgho dakkhiṇaṃ visodhetītikathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१७२) ७. न वत्तब्बं सङ्घो दक्खिणं विसोधेतीतिकथा • (172) 7. Na vattabbaṃ saṅgho dakkhiṇaṃ visodhetītikathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ७. नवत्तब्बंसङ्घोदक्खिणंविसोधेतीतिकथावण्णना • 7. Navattabbaṃsaṅghodakkhiṇaṃvisodhetītikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ७. नवत्तब्बंसङ्घोदक्खिणंविसोधेतीतिकथावण्णना • 7. Navattabbaṃsaṅghodakkhiṇaṃvisodhetītikathāvaṇṇanā
