| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๙. นวมวโคฺค
9. Navamavaggo
(๙๒) ๙. น ยถาจิตฺตสฺส วาจาติกถา
(92) 9. Na yathācittassa vācātikathā
๕๖๔. น ยถาจิตฺตสฺส วาจาติ? อามนฺตาฯ อผสฺสกสฺส วาจา อเวทนกสฺส วาจา อสญฺญกสฺส วาจา อเจตนกสฺส วาจา อจิตฺตกสฺส วาจาติ? น เหวํ วตฺตเพฺพ…เป.… นนุ สผสฺสกสฺส วาจา สเวทนกสฺส วาจา สสญฺญกสฺส วาจา สเจตนกสฺส วาจา สจิตฺตกสฺส วาจาติ? อามนฺตาฯ หญฺจิ สผสฺสกสฺส วาจา…เป.… สจิตฺตกสฺส วาจา, โน จ วต เร วตฺตเพฺพ – ‘‘น ยถาจิตฺตสฺส วาจา’’ติฯ
564. Na yathācittassa vācāti? Āmantā. Aphassakassa vācā avedanakassa vācā asaññakassa vācā acetanakassa vācā acittakassa vācāti? Na hevaṃ vattabbe…pe… nanu saphassakassa vācā savedanakassa vācā sasaññakassa vācā sacetanakassa vācā sacittakassa vācāti? Āmantā. Hañci saphassakassa vācā…pe… sacittakassa vācā, no ca vata re vattabbe – ‘‘na yathācittassa vācā’’ti.
น ยถาจิตฺตสฺส วาจาติ? อามนฺตาฯ อนาวเฎฺฎนฺตสฺส 1 วาจา…เป.… อนาโภคสฺส วาจา…เป.… อปฺปณิทหนฺตสฺส วาจาติ? น เหวํ วตฺตเพฺพ…เป.… นนุ อาวเฎฺฎนฺตสฺส วาจา อาโภคสฺส วาจา…เป.… ปณิทหนฺตสฺส วาจาติ? อามนฺตาฯ หญฺจิ อาวเฎฺฎนฺตสฺส วาจา อาโภคสฺส วาจา ปณิทหนฺตสฺส วาจา, โน จ วต เร วตฺตเพฺพ – ‘‘น ยถาจิตฺตสฺส วาจา’’ติฯ
Na yathācittassa vācāti? Āmantā. Anāvaṭṭentassa 2 vācā…pe… anābhogassa vācā…pe… appaṇidahantassa vācāti? Na hevaṃ vattabbe…pe… nanu āvaṭṭentassa vācā ābhogassa vācā…pe… paṇidahantassa vācāti? Āmantā. Hañci āvaṭṭentassa vācā ābhogassa vācā paṇidahantassa vācā, no ca vata re vattabbe – ‘‘na yathācittassa vācā’’ti.
น ยถาจิตฺตสฺส วาจาติ? อามนฺตาฯ นนุ วาจา จิตฺตสมุฎฺฐานา จิเตฺตน สหชาตา จิเตฺตน สห เอกุปฺปาทาติ? อามนฺตาฯ หญฺจิ วาจา จิตฺตสมุฎฺฐานา จิเตฺตน สหชาตา จิเตฺตน สห เอกุปฺปาทา, โน จ วต เร วตฺตเพฺพ – ‘‘น ยถาจิตฺตสฺส วาจา’’ติฯ
Na yathācittassa vācāti? Āmantā. Nanu vācā cittasamuṭṭhānā cittena sahajātā cittena saha ekuppādāti? Āmantā. Hañci vācā cittasamuṭṭhānā cittena sahajātā cittena saha ekuppādā, no ca vata re vattabbe – ‘‘na yathācittassa vācā’’ti.
น ยถาจิตฺตสฺส วาจาติ? อามนฺตาฯ น ภณิตุกาโม ภณติ, น กเถตุกาโม กเถติ, น อาลปิตุกาโม อาลปติ, น โวหริตุกาโม โวหรตีติ? น เหวํ วตฺตเพฺพ…เป.… นนุ ภณิตุกาโม ภณติ, กเถตุกาโม กเถติ, อาลปิตุกาโม อาลปติ, โวหริตุกาโม โวหรตีติ? อามนฺตาฯ หญฺจิ ภณิตุกาโม ภณติ, กเถตุกาโม กเถติ, อาลปิตุกาโม อาลปติ, โวหริตุกาโม โวหรติ, โน จ วต เร วตฺตเพฺพ – ‘‘น ยถาจิตฺตสฺส วาจา’’ติฯ
Na yathācittassa vācāti? Āmantā. Na bhaṇitukāmo bhaṇati, na kathetukāmo katheti, na ālapitukāmo ālapati, na voharitukāmo voharatīti? Na hevaṃ vattabbe…pe… nanu bhaṇitukāmo bhaṇati, kathetukāmo katheti, ālapitukāmo ālapati, voharitukāmo voharatīti? Āmantā. Hañci bhaṇitukāmo bhaṇati, kathetukāmo katheti, ālapitukāmo ālapati, voharitukāmo voharati, no ca vata re vattabbe – ‘‘na yathācittassa vācā’’ti.
๕๖๕. น วตฺตพฺพํ – ‘‘น ยถาจิตฺตสฺส วาจา’’ติ? อามนฺตาฯ นนุ อตฺถิ โกจิ ‘‘อญฺญํ ภณิสฺสามี’’ติ อญฺญํ ภณติ, ‘‘อญฺญํ กเถสฺสามี’’ติ อญฺญํ กเถติ, ‘‘อญฺญํ อาลปิสฺสามี’’ติ อญฺญํ อาลปติ, ‘‘อญฺญํ โวหริสฺสามี’’ติ อญฺญํ โวหรตีติ? อามนฺตาฯ หญฺจิ อตฺถิ โกจิ ‘‘อญฺญํ ภณิสฺสามี’’ติ อญฺญํ ภณติ,…เป.… ‘‘อญฺญํ โวหริสฺสามี’’ติ อญฺญํ โวหรติ, เตน วต เร วตฺตเพฺพ – ‘‘น ยถาจิตฺตสฺส วาจา’’ติฯ
565. Na vattabbaṃ – ‘‘na yathācittassa vācā’’ti? Āmantā. Nanu atthi koci ‘‘aññaṃ bhaṇissāmī’’ti aññaṃ bhaṇati, ‘‘aññaṃ kathessāmī’’ti aññaṃ katheti, ‘‘aññaṃ ālapissāmī’’ti aññaṃ ālapati, ‘‘aññaṃ voharissāmī’’ti aññaṃ voharatīti? Āmantā. Hañci atthi koci ‘‘aññaṃ bhaṇissāmī’’ti aññaṃ bhaṇati,…pe… ‘‘aññaṃ voharissāmī’’ti aññaṃ voharati, tena vata re vattabbe – ‘‘na yathācittassa vācā’’ti.
น ยถาจิตฺตสฺส วาจาติกถา นิฎฺฐิตาฯ
Na yathācittassa vācātikathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๙. นยถาจิตฺตสฺส วาจาติกถาวณฺณนา • 9. Nayathācittassa vācātikathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๙. นยถาจิตฺตสฺสวาจาติกถาวณฺณนา • 9. Nayathācittassavācātikathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๙. นยถาจิตฺตสฺสวาจาติกถาวณฺณนา • 9. Nayathācittassavācātikathāvaṇṇanā
