| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
10. நச்சகீ³தஸிக்கா²பத³வண்ணனா
10. Naccagītasikkhāpadavaṇṇanā
நச்சந்தி நடாத³யோ வா நச்சந்து, ஸொண்டா³ வா அந்தமஸோ மோரஸுவமக்கடாத³யோபி, ஸப்³ப³மேதங் நச்சமேவ. தேனாஹ ‘‘நச்சந்தி அந்தமஸோ மோரனச்சம்பீ’’தி . கீ³தந்தி நடாதீ³னங் வா கீ³தங் ஹோது, அரியானங் பரினிப்³பா³னகாலே ரதனத்தயகு³ணூபஸங்ஹிதங் ஸாது⁴கீளிதகீ³தங் வா, அந்தமஸோ ‘‘த³ந்தகீ³தம்பி கா³யிஸ்ஸாமா’’தி புப்³ப³பா⁴கே³ ஓகூஜந்தா கரொந்தி, ஸப்³ப³மேதங் கீ³தமேவ. தேனாஹ ‘‘கீ³தந்தி அந்தமஸோ த⁴ம்மபா⁴ணககீ³தம்பீ’’தி. தத்த² த⁴ம்மபா⁴ணககீ³தங் நாம அஸஞ்ஞதபி⁴க்கூ²னங் தங் தங் வத்தங் பி⁴ந்தி³த்வா அதிதீ³க⁴ங் கத்வா கீ³தஸ்ஸரேன த⁴ம்மப⁴ணனங், தம்பி நேவ பி⁴க்கு²னோ, ந பி⁴க்கு²னீனங் வட்டதி. ததா² ஹி வுத்தங் பரமத்த²ஜோதிகாய கு²த்³த³கட்ட²கதா²ய (கு²॰ பா॰ அட்ட²॰ 2.பச்சி²மபஞ்சஸிக்கா²பத³வண்ணனா) ‘‘த⁴ம்மூபஸங்ஹிதங் கீ³தங் வட்டதி, கீ³தூபஸங்ஹிதோ பன த⁴ம்மோ ந வட்டதீ’’தி. தஸ்மா த⁴ம்மங் ப⁴ணந்தேன ஜாதகவத்தாதி³ங் தங் தங் வத்தங் அவினாஸெத்வா சதுரஸ்ஸேன (சூளவ॰ அட்ட²॰ 249) வத்தேன பரிமண்ட³லானி பத³ப்³யஞ்ஜனானி த³ஸ்ஸேதப்³பா³னி. வாதி³தந்தி தந்திப³த்³தா⁴தி³வாத³னீயப⁴ண்ட³வாதி³தங் வா ஹோது, குடபே⁴ரிவாதி³தங் வா அந்தமஸோ உத³கபே⁴ரிவாதி³தம்பி, ஸப்³ப³மேவேதங் வாதி³தமேவ. தேனாஹ ‘‘வாதி³தந்தி அந்தமஸோ உத³கபே⁴ரிவாதி³த’’ந்தி. யங் பன நிட்டு²ப⁴ந்தீ வா ஸாஸங்கே வா டி²தா அச்ச²ரிகங் வா போ²டேதி, பாணிங் வா பஹரதி, தத்த² அனாபத்தி. த³ஸ்ஸனேன செத்த² ஸவனம்பி ஸங்க³ஹிதங் விரூபேகஸேஸனயேன. ஆலோசனஸபா⁴வதாய வா பஞ்சன்னங் விஞ்ஞாணானங் ஸவனகிரியாயபி த³ஸ்ஸனஸங்கே²பஸப்³பா⁴வதோ ‘‘த³ஸ்ஸனாய’’இச்சேவ வுத்தந்தி ஆஹ ‘‘ஏதேஸு யங் கிஞ்சி த³ஸ்ஸனாய க³ச்ச²ந்தியா’’தி. யத்த² டி²தாதி ஏவங் க³ந்த்வா யஸ்மிங் பதே³ஸே டி²தா.
Naccanti naṭādayo vā naccantu, soṇḍā vā antamaso morasuvamakkaṭādayopi, sabbametaṃ naccameva. Tenāha ‘‘naccanti antamaso moranaccampī’’ti . Gītanti naṭādīnaṃ vā gītaṃ hotu, ariyānaṃ parinibbānakāle ratanattayaguṇūpasaṃhitaṃ sādhukīḷitagītaṃ vā, antamaso ‘‘dantagītampi gāyissāmā’’ti pubbabhāge okūjantā karonti, sabbametaṃ gītameva. Tenāha ‘‘gītanti antamaso dhammabhāṇakagītampī’’ti. Tattha dhammabhāṇakagītaṃ nāma asaññatabhikkhūnaṃ taṃ taṃ vattaṃ bhinditvā atidīghaṃ katvā gītassarena dhammabhaṇanaṃ, tampi neva bhikkhuno, na bhikkhunīnaṃ vaṭṭati. Tathā hi vuttaṃ paramatthajotikāya khuddakaṭṭhakathāya (khu. pā. aṭṭha. 2.pacchimapañcasikkhāpadavaṇṇanā) ‘‘dhammūpasaṃhitaṃ gītaṃ vaṭṭati, gītūpasaṃhito pana dhammo na vaṭṭatī’’ti. Tasmā dhammaṃ bhaṇantena jātakavattādiṃ taṃ taṃ vattaṃ avināsetvā caturassena (cūḷava. aṭṭha. 249) vattena parimaṇḍalāni padabyañjanāni dassetabbāni. Vāditanti tantibaddhādivādanīyabhaṇḍavāditaṃ vā hotu, kuṭabherivāditaṃ vā antamaso udakabherivāditampi, sabbamevetaṃ vāditameva. Tenāha ‘‘vāditanti antamaso udakabherivādita’’nti. Yaṃ pana niṭṭhubhantī vā sāsaṅke vā ṭhitā accharikaṃ vā phoṭeti, pāṇiṃ vā paharati, tattha anāpatti. Dassanena cettha savanampi saṅgahitaṃ virūpekasesanayena. Ālocanasabhāvatāya vā pañcannaṃ viññāṇānaṃ savanakiriyāyapi dassanasaṅkhepasabbhāvato ‘‘dassanāya’’icceva vuttanti āha ‘‘etesu yaṃ kiñci dassanāya gacchantiyā’’ti. Yattha ṭhitāti evaṃ gantvā yasmiṃ padese ṭhitā.
நனு ச ஸயங்னச்சனாதீ³ஸு பாசித்தியங் பாளியங் ந வுத்தங், அத² கத²ங் க³ஹேதப்³ப³ந்தி ஆஹ ‘‘ஸப்³ப³அட்ட²கதா²ஸு வுத்த’’ந்தி, இமினா பாளியங் அவுத்தேபி அட்ட²கதா²பமாணேன க³ஹேதப்³ப³ந்தி த³ஸ்ஸேதி. ஸமுட்டா²னாதீ³னி ஏளகலோமஸதி³ஸானீதி பன மாதிகாக³தபாசித்தியஸ்ஸேவ வஸேன வுத்தங், ஸப்³பே³ஸங் வஸேன பன ச²ஸமுட்டா²னந்தி க³ஹேதப்³ப³ங். ‘‘ஆராமே ட²த்வா’’தி இத³ங் நித³ஸ்ஸனமத்தங் ஸேஸஇரியாபதே²ஹி யுத்தாய பஸ்ஸந்தியா அனாபத்தியா இச்சி²தப்³ப³த்தா. இதரதா² ஹி நிஸின்னாபி பஸ்ஸிதுங் ந லபெ⁴ய்ய. ‘‘பஸ்ஸிஸ்ஸாமீ’’தி விஹாரதோ விஹாரங் க³ச்ச²ந்தியா ஆபத்தியேவ. ஆஸனஸாலாய நிஸின்னா பஸ்ஸதி, அனாபத்தி, ‘‘பஸ்ஸிஸ்ஸாமீ’’தி உட்ட²ஹித்வா க³ச்ச²ந்தியா ஆபத்தி. வீதி²யங் ட²த்வா கீ³வங் பரிவத்தெத்வா பஸ்ஸந்தியாபி ஆபத்தியேவ. பி⁴க்கு²ஸ்ஸாபி ஏஸேவ நயோ, ஆபத்திபே⁴தோ³வ நானங்.
Nanu ca sayaṃnaccanādīsu pācittiyaṃ pāḷiyaṃ na vuttaṃ, atha kathaṃ gahetabbanti āha ‘‘sabbaaṭṭhakathāsu vutta’’nti, iminā pāḷiyaṃ avuttepi aṭṭhakathāpamāṇena gahetabbanti dasseti. Samuṭṭhānādīni eḷakalomasadisānīti pana mātikāgatapācittiyasseva vasena vuttaṃ, sabbesaṃ vasena pana chasamuṭṭhānanti gahetabbaṃ. ‘‘Ārāme ṭhatvā’’ti idaṃ nidassanamattaṃ sesairiyāpathehi yuttāya passantiyā anāpattiyā icchitabbattā. Itarathā hi nisinnāpi passituṃ na labheyya. ‘‘Passissāmī’’ti vihārato vihāraṃ gacchantiyā āpattiyeva. Āsanasālāya nisinnā passati, anāpatti, ‘‘passissāmī’’ti uṭṭhahitvā gacchantiyā āpatti. Vīthiyaṃ ṭhatvā gīvaṃ parivattetvā passantiyāpi āpattiyeva. Bhikkhussāpi eseva nayo, āpattibhedova nānaṃ.
நச்சகீ³தஸிக்கா²பத³வண்ணனா நிட்டி²தா.
Naccagītasikkhāpadavaṇṇanā niṭṭhitā.
லஸுணவக்³கோ³ பட²மோ.
Lasuṇavaggo paṭhamo.
