| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
6. நதீ³கஸ்ஸபத்தே²ரகா³தா²வண்ணனா
6. Nadīkassapattheragāthāvaṇṇanā
அத்தா²ய வத மேதிஆதி³கா ஆயஸ்மதோ நதீ³கஸ்ஸபத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயங் குஸலங் உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ ஏகதி³வஸங் ஸத்தா²ரங் பிண்டா³ய சரந்தங் தி³ஸ்வா பஸன்னமானஸோ அத்தனா ரோபிதஸ்ஸ அம்ப³ருக்க²ஸ்ஸ பட²முப்பன்னங் மனோஸிலாவண்ணங் ஏகங் அம்ப³ப²லங் அதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ மக³த⁴ரட்டே² ப்³ராஹ்மணகுலே உருவேலகஸ்ஸபஸ்ஸ பா⁴தா ஹுத்வா நிப்³ப³த்தோ. வயப்பத்தோ நிஸ்ஸரணஜ்ஜா²ஸயதாய க⁴ராவாஸங் அனிச்ச²ந்தோ தாபஸபப்³ப³ஜ்ஜங் பப்³ப³ஜித்வா தீஹி தாபஸஸதேஹி ஸத்³தி⁴ங் நேரஞ்ஜராய நதி³யா தீரே அஸ்ஸமங் மாபெத்வா விஹரதி. நதீ³தீரே வஸனதோ ஹிஸ்ஸ கஸ்ஸபகொ³த்ததாய ச நதீ³கஸ்ஸபோதி ஸமஞ்ஞா அஹோஸி. தஸ்ஸ ப⁴க³வா ஸபரிஸஸ்ஸ ஏஹிபி⁴க்கு²பா⁴வேன உபஸம்பத³ங் அதா³ஸி. தங் ஸப்³ப³ங் க²ந்த⁴கே (மஹாவ॰ 36-39) ஆக³தமேவ. ஸோ ப⁴க³வதோ ஆதி³த்தபரியாயதே³ஸனாய (மஹாவ॰ 54; ஸங்॰ நி॰ 4.28) அரஹத்தே பதிட்டா²ஸி. தேன வுத்தங் அபதா³னே (அப॰ தே²ர 2.44.81-87) –
Atthāyavata metiādikā āyasmato nadīkassapattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinanto padumuttarassa bhagavato kāle kulagehe nibbattitvā viññutaṃ patto ekadivasaṃ satthāraṃ piṇḍāya carantaṃ disvā pasannamānaso attanā ropitassa ambarukkhassa paṭhamuppannaṃ manosilāvaṇṇaṃ ekaṃ ambaphalaṃ adāsi. So tena puññakammena devamanussesu saṃsaranto imasmiṃ buddhuppāde magadharaṭṭhe brāhmaṇakule uruvelakassapassa bhātā hutvā nibbatto. Vayappatto nissaraṇajjhāsayatāya gharāvāsaṃ anicchanto tāpasapabbajjaṃ pabbajitvā tīhi tāpasasatehi saddhiṃ nerañjarāya nadiyā tīre assamaṃ māpetvā viharati. Nadītīre vasanato hissa kassapagottatāya ca nadīkassapoti samaññā ahosi. Tassa bhagavā saparisassa ehibhikkhubhāvena upasampadaṃ adāsi. Taṃ sabbaṃ khandhake (mahāva. 36-39) āgatameva. So bhagavato ādittapariyāyadesanāya (mahāva. 54; saṃ. ni. 4.28) arahatte patiṭṭhāsi. Tena vuttaṃ apadāne (apa. thera 2.44.81-87) –
‘‘பது³முத்தரபு³த்³த⁴ஸ்ஸ, லோகஜெட்ட²ஸ்ஸ தாதி³னோ;
‘‘Padumuttarabuddhassa, lokajeṭṭhassa tādino;
பிண்டா³ய விசரந்தஸ்ஸ, தா⁴ரதோ உத்தமங் யஸங்.
Piṇḍāya vicarantassa, dhārato uttamaṃ yasaṃ.
‘‘அக்³க³ப²லங் க³ஹெத்வான, விப்பஸன்னேன சேதஸா;
‘‘Aggaphalaṃ gahetvāna, vippasannena cetasā;
த³க்கி²ணெய்யஸ்ஸ வீரஸ்ஸ, அதா³ஸிங் ஸத்து²னோ அஹங்.
Dakkhiṇeyyassa vīrassa, adāsiṃ satthuno ahaṃ.
‘‘தேன கம்மேன த்³விபதி³ந்த³, லோகஜெட்ட² நராஸப⁴;
‘‘Tena kammena dvipadinda, lokajeṭṭha narāsabha;
பத்தொம்ஹி அசலங் டா²னங், ஹித்வா ஜயபராஜயங்.
Pattomhi acalaṃ ṭhānaṃ, hitvā jayaparājayaṃ.
‘‘ஸதஸஹஸ்ஸிதோ கப்பே, யங் தா³னமத³தி³ங் ததா³;
‘‘Satasahassito kappe, yaṃ dānamadadiṃ tadā;
து³க்³க³திங் நாபி⁴ஜானாமி, அக்³க³தா³னஸ்ஸித³ங் ப²லங்.
Duggatiṃ nābhijānāmi, aggadānassidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தே பன பதிட்டி²தோ அபரபா⁴கே³ அத்தனோ படிபத்திங் பச்சவெக்கி²த்வா தி³ட்டி²ஸமுக்³கா⁴தகித்தனமுகே²ன அஞ்ஞங் ப்³யாகரொந்தோ –
Arahatte pana patiṭṭhito aparabhāge attano paṭipattiṃ paccavekkhitvā diṭṭhisamugghātakittanamukhena aññaṃ byākaronto –
340.
340.
‘‘அத்தா²ய வத மே பு³த்³தோ⁴, நதி³ங் நேரஞ்ஜரங் அகா³;
‘‘Atthāya vata me buddho, nadiṃ nerañjaraṃ agā;
யஸ்ஸாஹங் த⁴ம்மங் ஸுத்வான, மிச்சா²தி³ட்டி²ங் விவஜ்ஜயிங்.
Yassāhaṃ dhammaṃ sutvāna, micchādiṭṭhiṃ vivajjayiṃ.
341.
341.
‘‘யஜிங் உச்சாவசே யஞ்ஞே, அக்³கி³ஹுத்தங் ஜுஹிங் அஹங்;
‘‘Yajiṃ uccāvace yaññe, aggihuttaṃ juhiṃ ahaṃ;
ஏஸா ஸுத்³தீ⁴தி மஞ்ஞந்தோ, அந்த⁴பூ⁴தோ புது²ஜ்ஜனோ.
Esā suddhīti maññanto, andhabhūto puthujjano.
342.
342.
‘‘தி³ட்டி²க³ஹனபக்க²ந்தோ³, பராமாஸேன மோஹிதோ;
‘‘Diṭṭhigahanapakkhando, parāmāsena mohito;
அஸுத்³தி⁴ங் மஞ்ஞிஸங் ஸுத்³தி⁴ங், அந்த⁴பூ⁴தோ அவித்³த³ஸு.
Asuddhiṃ maññisaṃ suddhiṃ, andhabhūto aviddasu.
343.
343.
‘‘மிச்சா²தி³ட்டி² பஹீனா மே, ப⁴வா ஸப்³பே³ விதா³லிதா;
‘‘Micchādiṭṭhi pahīnā me, bhavā sabbe vidālitā;
ஜுஹாமி த³க்கி²ணெய்யக்³கி³ங், நமஸ்ஸாமி ததா²க³தங்.
Juhāmi dakkhiṇeyyaggiṃ, namassāmi tathāgataṃ.
344.
344.
‘‘மோஹா ஸப்³பே³ பஹீனா மே, ப⁴வதண்ஹா பதா³லிதா;
‘‘Mohā sabbe pahīnā me, bhavataṇhā padālitā;
விக்கீ²ணோ ஜாதிஸங்ஸாரோ, நத்தி² தா³னி புனப்³ப⁴வோ’’தி. –
Vikkhīṇo jātisaṃsāro, natthi dāni punabbhavo’’ti. –
இமா பஞ்ச கா³தா² அபா⁴ஸி.
Imā pañca gāthā abhāsi.
தத்த² அத்தா²ய வத மேதி மய்ஹங் அத்தா²ய வத ஹிதாய வத. பு³த்³தோ⁴தி ஸப்³ப³ஞ்ஞுபு³த்³தோ⁴. நதி³ங் நேரஞ்ஜரங் அகா³தி நேரஞ்ஜராஸங்கா²தங் நதி³ங் அக³ஞ்சி², தஸ்ஸா நதி³யா தீரே ச மம பா⁴து உருவேலகஸ்ஸபஸ்ஸ அஸ்ஸமங் உபக³தோதி அதி⁴ப்பாயோ.
Tattha atthāya vata meti mayhaṃ atthāya vata hitāya vata. Buddhoti sabbaññubuddho. Nadiṃ nerañjaraṃ agāti nerañjarāsaṅkhātaṃ nadiṃ agañchi, tassā nadiyā tīre ca mama bhātu uruvelakassapassa assamaṃ upagatoti adhippāyo.
இதா³னி யதா²வுத்தமத்த²ங் விவரிதுங் ‘‘யஸ்ஸாஹ’’ந்திஆதி³ வுத்தங். யஸ்ஸாதி யஸ்ஸ பு³த்³த⁴ஸ்ஸ ப⁴க³வதோ. த⁴ம்மங் ஸுத்வானாதி சதுஸச்சபடிஸங்யுத்தங் த⁴ம்மங் ஸுத்வா, ஸோதத்³வாரானுஸாரேன உபலபி⁴த்வா. மிச்சா²தி³ட்டி²ங் விவஜ்ஜயிந்தி ‘‘யஞ்ஞாதீ³ஹி ஸுத்³தி⁴ ஹோதீ’’திஆதி³னயப்பவத்தங் விபரீதத³ஸ்ஸனங் பஜஹிங்.
Idāni yathāvuttamatthaṃ vivarituṃ ‘‘yassāha’’ntiādi vuttaṃ. Yassāti yassa buddhassa bhagavato. Dhammaṃ sutvānāti catusaccapaṭisaṃyuttaṃ dhammaṃ sutvā, sotadvārānusārena upalabhitvā. Micchādiṭṭhiṃ vivajjayinti ‘‘yaññādīhi suddhi hotī’’tiādinayappavattaṃ viparītadassanaṃ pajahiṃ.
மிச்சா²தி³ட்டி²ங் விவஜ்ஜயிந்தி வுத்தமேவத்த²ங் வித்தா²ரெத்வா த³ஸ்ஸேதுங் ‘‘யஜி’’ந்திஆதி³மாஹ. தத்த² யஜிங் உச்சாவசே யஞ்ஞேதி பாகடயஞ்ஞே ஸோமயாக³வாஜபெய்யாதி³கே நானாவிதே⁴ யஞ்ஞே யஜிங். அக்³கி³ஹுத்தங் ஜுஹிங் அஹந்தி தேஸங் யஞ்ஞானங் யஜனவஸேன ஆஹுதிங் பக்³க³ண்ஹந்தோ அக்³கி³ங் பரிசரிங். ஏஸா ஸுத்³தீ⁴தி மஞ்ஞந்தோதி ஏஸா யஞ்ஞகிரியா அக்³கி³பாரிசரியா ஸுத்³தி⁴ஹேதுபா⁴வதோ ஸுத்³தி⁴ ‘‘ஏவங் மே ஸங்ஸாரஸுத்³தி⁴ ஹோதீ’’தி மஞ்ஞமானோ. அந்த⁴பூ⁴தோ புது²ஜ்ஜனோதி பஞ்ஞாசக்கு²வேகல்லேன அவிஜ்ஜந்த⁴தாய அந்த⁴பூ⁴தோ புது²ஜ்ஜனோ ஹுத்வா வனக³ஹனபப்³ப³தக³ஹனாதீ³னி விய து³ரதிக்கமனட்டே²ன தி³ட்டி²யேவ க³ஹனங் தி³ட்டி²க³ஹனங் , தங் பக்க²ந்தோ³ அனுபவிட்டோ²தி தி³ட்டி²க³ஹனபக்க²ந்தோ³. பராமாஸேனாதி த⁴ம்மஸபா⁴வங் அதிக்கமித்வா ‘‘இத³மேவ ஸச்ச’’ந்தி பராமஸனதோ பராமாஸஸங்கா²தேன மிச்சா²பி⁴னிவேஸேன. மோஹிதோதி மூள்ஹபா⁴வங் பாபிதோ. அஸுத்³தி⁴ங் மஞ்ஞிஸங் ஸுத்³தி⁴ந்தி அஸுத்³தி⁴ங் மக்³க³ங் ‘‘ஸுத்³தி⁴ங் மக்³க³’’ந்தி மஞ்ஞிஸங் மஞ்ஞிங். தத்த² காரணமாஹ ‘‘அந்த⁴பூ⁴தோ அவித்³த³ஸூ’’தி. யஸ்மா அவிஜ்ஜாய அந்த⁴பூ⁴தோ, ததோ ஏவ த⁴ம்மாத⁴ம்மங் யுத்தாயுத்தஞ்ச அவித்³வா, தஸ்மா ததா² மஞ்ஞிந்தி அத்தோ².
Micchādiṭṭhiṃ vivajjayinti vuttamevatthaṃ vitthāretvā dassetuṃ ‘‘yaji’’ntiādimāha. Tattha yajiṃ uccāvace yaññeti pākaṭayaññe somayāgavājapeyyādike nānāvidhe yaññe yajiṃ. Aggihuttaṃ juhiṃ ahanti tesaṃ yaññānaṃ yajanavasena āhutiṃ paggaṇhanto aggiṃ paricariṃ. Esā suddhīti maññantoti esā yaññakiriyā aggipāricariyā suddhihetubhāvato suddhi ‘‘evaṃ me saṃsārasuddhi hotī’’ti maññamāno. Andhabhūto puthujjanoti paññācakkhuvekallena avijjandhatāya andhabhūto puthujjano hutvā vanagahanapabbatagahanādīni viya duratikkamanaṭṭhena diṭṭhiyeva gahanaṃ diṭṭhigahanaṃ , taṃ pakkhando anupaviṭṭhoti diṭṭhigahanapakkhando. Parāmāsenāti dhammasabhāvaṃ atikkamitvā ‘‘idameva sacca’’nti parāmasanato parāmāsasaṅkhātena micchābhinivesena. Mohitoti mūḷhabhāvaṃ pāpito. Asuddhiṃ maññisaṃ suddhinti asuddhiṃ maggaṃ ‘‘suddhiṃ magga’’nti maññisaṃ maññiṃ. Tattha kāraṇamāha ‘‘andhabhūto aviddasū’’ti. Yasmā avijjāya andhabhūto, tato eva dhammādhammaṃ yuttāyuttañca avidvā, tasmā tathā maññinti attho.
மிச்சா²தி³ட்டி² பஹீனா மேதி ஏவங்பூ⁴தஸ்ஸ பன ஸத்து² ஸம்முகா² சதுஸச்சக³ப்³ப⁴ங் த⁴ம்மகத²ங் ஸுத்வா யோனிஸோ படிபஜ்ஜந்தஸ்ஸ அரியமக்³க³ஸம்மாதி³ட்டி²யா ஸப்³பா³பி மிச்சா²தி³ட்டி² ஸமுச்சே²த³ப்பஹானவஸேன மய்ஹங் பஹீனா. ப⁴வாதி காமப⁴வாத³யோ ஸப்³பே³பி ப⁴வா அரியமக்³க³ஸத்தே²ன விதா³லிதா வித்³த⁴ங்ஸிதா. ஜுஹாமி த³க்கி²ணெய்யக்³கி³ந்தி ஆஹவனீயாதி³கே அக்³கீ³ ச²ட்³டெ³த்வா ஸதே³வகஸ்ஸ லோகஸ்ஸ அக்³க³த³க்கி²ணெய்யதாய ஸப்³ப³ஸ்ஸ ச பாபஸ்ஸ த³ஹனதோ த³க்கி²ணெய்யக்³கி³ங் ஸம்மாஸம்பு³த்³த⁴ங் ஜுஹாமி பரிசராமி. தயித³ங் மய்ஹங் த³க்கி²ணெய்யக்³கி³பரிசரணங் த³தி⁴னவனீதமதி²தஸப்பிஆதி³னிரபெக்க²ங் ஸத்து² நமஸ்ஸனமேவாதி ஆஹ ‘‘நமஸ்ஸாமி ததா²க³த’’ந்தி. அத² வா ஜுஹாமி த³க்கி²ணெய்யக்³கி³ந்தி தா³யகானங் த³க்கி²ணாய மஹப்ப²லபா⁴வகரணேன பாபஸ்ஸ ச த³ஹனேன த³க்கி²ணெய்யக்³கி³பூ⁴தங் அத்தானங் ஜுஹாமி பரிசராமி ததா² கத்வா பரிசராமி, ததா² கத்வா பரிஹராமி. புப்³பே³ அக்³கி³தே³வங் நமஸ்ஸாமி, இதா³னி பன நமஸ்ஸாமி ததா²க³தந்தி.
Micchādiṭṭhi pahīnā meti evaṃbhūtassa pana satthu sammukhā catusaccagabbhaṃ dhammakathaṃ sutvā yoniso paṭipajjantassa ariyamaggasammādiṭṭhiyā sabbāpi micchādiṭṭhi samucchedappahānavasena mayhaṃ pahīnā. Bhavāti kāmabhavādayo sabbepi bhavā ariyamaggasatthena vidālitā viddhaṃsitā. Juhāmi dakkhiṇeyyagginti āhavanīyādike aggī chaḍḍetvā sadevakassa lokassa aggadakkhiṇeyyatāya sabbassa ca pāpassa dahanato dakkhiṇeyyaggiṃ sammāsambuddhaṃ juhāmi paricarāmi. Tayidaṃ mayhaṃ dakkhiṇeyyaggiparicaraṇaṃ dadhinavanītamathitasappiādinirapekkhaṃ satthu namassanamevāti āha ‘‘namassāmi tathāgata’’nti. Atha vā juhāmi dakkhiṇeyyagginti dāyakānaṃ dakkhiṇāya mahapphalabhāvakaraṇena pāpassa ca dahanena dakkhiṇeyyaggibhūtaṃ attānaṃ juhāmi paricarāmi tathā katvā paricarāmi, tathā katvā pariharāmi. Pubbe aggidevaṃ namassāmi, idāni pana namassāmi tathāgatanti.
மோஹா ஸப்³பே³ பஹீனா மேதி து³க்கே² அஞ்ஞாணாதி³பே⁴தா³ ஸப்³பே³ மோஹா மய்ஹங் பஹீனா ஸமுச்சி²ன்னா, ததோ ஏவ ‘‘ப⁴வதண்ஹா பதா³லிதா. விக்கீ²ணோ ஜாதிஸங்ஸாரோ, நத்தி² தா³னி புனப்³ப⁴வோ’’தி தீஸு பதே³ஸு மே-ஸத்³தோ³ ஆனெத்வா யோஜேதப்³போ³.
Mohā sabbe pahīnā meti dukkhe aññāṇādibhedā sabbe mohā mayhaṃ pahīnā samucchinnā, tato eva ‘‘bhavataṇhā padālitā. Vikkhīṇo jātisaṃsāro, natthi dāni punabbhavo’’ti tīsu padesu me-saddo ānetvā yojetabbo.
நதீ³கஸ்ஸபத்தே²ரகா³தா²வண்ணனா நிட்டி²தா.
Nadīkassapattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 6. நதீ³கஸ்ஸபத்தே²ரகா³தா² • 6. Nadīkassapattheragāthā
